Alɔdlɛndónǔ Kplé Gbɛzán kpo Sinsɛnzɔ́ kpo Tɔn Sín Azɔ̌wema Tɔn Lɛ

7-13 JANVIER

DƆKUN MAWUXÓ Ɔ TƆN ÐÉ LƐ | MƐSƐ́DÓ 21-22

Nǔ Xɔ Akwɛ Biblu Tɔn lɛ Biba

nwtsty sín tinmɛ ɖevo dó Mɛ 22:16 jí

klɔ́ hwɛ towe lɛ gbɔn nyikɔ tɔn yiylɔ́ gblamɛ: Alǒ “klɔ́ hwɛ towe lɛ bo ylɔ́ nyikɔ tɔn.” É nyí baptɛm sin mɛ tɔn ɔ wɛ na súnsún hwɛ mɛ ɔ tɔn lɛ ǎ, loɔ, nyikɔ Jezu tɔn ylɔylɔ́ wɛ na súnsún. Mɔ̌ biblo byɔ ɖɔ è ni ɖi nǔ nú Jezu, bo ɖè nǔɖiɖi enɛ xlɛ́ gbɔn azɔ̌ Klisanwun tɔn lɛ wiwa gblamɛ.—Mɛ 10:43; Ja 2:14, 18.

ZĚ HWIÐÉE BǏ JÓ NÚ MAWUXÓÐIÐƆZƆ́ Ɔ

w10-F 1/2 13 akpá. 2-14 akpá. 2

Klisanwun lɛ Ðó Na Nyi Dandan Wɛ À?

Ðó Sɛ́n ɔ ko jɛnu gbɔn Klisu jí wutu ɔ, dandan wɛ Klisanwun lɛ ɖó na nyi Gbɔjɛzán aklunɔzán gblamɛ tɔn ɔ à? Mawu sɔ́ d’ayi mɛ nú Mɛsɛ́dó Pɔlu b’ɛ na xósin elɔ: “Enyi mɔ̌ hǔn, mi ma lɔn nú mɛɖé ni ɖɔ nú mi ɖɔ nǔ lě wɛ nyɔ́ bɔ mi na ɖu, abǐ nǔ lě wɛ nyɔ́ bɔ mi na nu, abǐ xwezán lě wɛ mi na nyi, sun wá jǐ sín azǎn lě wɛ mi na nyi, abǐ gbɔjɛzán Jwifu lɛ tɔn lě wɛ mi na nyi ó. Nǔ enɛ lɛ bǐ ɔ, nǔ ɖagbe e jawě ɔ sín yɛ kpowun wɛ ye nyí; loɔ, Klisu wɛ nyí nǔjɔnǔ ɔ.—Kolosinu lɛ 2:16, 17.

Xógbe enɛ lɛ xlɛ́ ɖɔ Mawu kún sɔ́ byɔ nǔ ɖokpo ɔ lɛ mɛsɛntɔ́ tɔn lɛ ó. Etɛwu huzuhuzu enɛ ka dó tíìn? Ðó Klisanwun lɛ ɖò sɛ́n yɔyɔ̌ ɖé glɔ́ wutu wɛ, é wɛ nyí “Klisu sín sɛ́n ɔ.” (Galatinu lɛ 6:2) Akɔjijɛsɛ́n e è na Izlayɛli gbɔn Mɔyizi jí é kú acɛ hwenu e é jɛnu gbɔn kú Klisu tɔn gblamɛ é. (Hlɔmanu lɛ 10:4; Efɛzinu lɛ 2:15) Gbeɖiɖe e ɖɔ ɖɔ è ni nyi Gbɔjɛzán é lɔ kú acɛ wɛ à? Ɛɛn. Ee Pɔlu ɖɔ ɖɔ “è ko ɖè mǐ sín sɛ́n ɔ sín acɛ mɛ” gudo é ɔ, é ɖɔ Sɛ́n Wǒ lɛ ɖokpo bɔ d’ewu. (Hlɔmanu lɛ 7:6, 7) Sɛ́n Wǒ lɛ, kaka jɛ Gbɔjɛzán sín sɛ́n ɔ jí, ɖò Sɛ́n e kú acɛ é mɛ. Enɛ wu ɔ, é sɔ́ ɖò dandan ɖɔ Mawu sɛntɔ́ lɛ ni nyi Gbɔjɛzán aklunɔzán gblamɛ tɔn ɔ ǎ.

È sixu jlɛ́ huzuhuzu e tíìn ɖò sinsɛn-biblo Izlayɛli-ví lɛ tɔn kpo Klisanwun lɛ tɔn kpo mɛ é dó nǔ elɔ wu: Hwenu e tò ɖé ɖyɔ sɛ́n dodó tɔn é ɔ, é sɔ́ byɔ ɖɔ toví lɛ ni setónú nú sɛ́n dodó xóxó ɔ ǎ. Sɛ́n ɖé lɛ sixu ɖò sɛ́n dodó yɔyɔ̌ ɔ mɛ, bo vlɛ́ sɛ́n dodó xóxó ɔ sín sɛ́n lɛ, amɔ̌, ɖevo lɛ na ɖ’emɛ bo na gbɔn vo. Enɛ wu ɔ, toví lɛ ɖó na kplɔ́n sɛ́n dodó yɔyɔ̌ ɔ tɛnwin lɛnwin, bá mɔ tɛn dó tuùn sɛ́n yɔyɔ̌ e ɖò ayǐ dìn lɛ é. Gɔ́ na ɔ, toví e nɔ ɖó sísí nú sɛ́n lɛ é ɖé ɖó na jló bo na tuùn hwenu e sɛ́n dodó yɔyɔ̌ ɔ bɛ́ azɔ̌ é.

Ðò ali ɖokpo ɔ nu ɔ, Jehovah Mawu na sɛ́n 600 jɛji akɔta Izlayɛli tɔn, bɔ sɛ́n taji 10 ɖ’emɛ. Sɛ́n ɖěɖee kúnkplá walɔ ɖagbe, vɔsisa, lanmɛ na nɔ ganji, kpo Gbɔjɛzán nyinyi kpo lɛ é ɖò sɛ́n enɛ lɛ mɛ. É ɖò mɔ̌ có, Jezu ɖɔ ɖɔ ahwanvu yí ami dó ɖè emitɔn lɛ na nyí “akɔta” yɔyɔ̌ ɖé. (Matie 21:43) Sín xwè 33 H.M. tɔn ɔ, akɔta enɛ ɖó “sɛ́n dodó” yɔyɔ̌ ɖé, b’ɛ jinjɔn sɛ́n taji we jí: wǎn yí nú Mawu kpo wǎn yí nú nɔzo kpo. (Matie 22:36-40) Alixlɛ́mɛ ɖé lɛ ɖò “Klisu sín sɛ́n ɔ” mɛ, bo vlɛ́ ɖěɖee ɖò Sɛ́n e è na Izlayɛli é mɛ lɛ é có, é ɖó na kpaca mǐ ɖɔ sɛ́n ɖé lɛ gbɔn vo tawun, bɔ ɖevo lɛ ka ko kú acɛ ǎ. Sɛ́n e kúnkplá Gbɔjɛzán aklunɔzán gblamɛ tɔn é nyí ɖokpo ɖò ɖěɖee sín acɛ ko kú lɛ é mɛ.

14-20 JANVIER

DƆKUN MAWUXÓ Ɔ TƆN ÐÉ LƐ | MƐSƐ́DÓ 23-24

Nǔ Xɔ Akwɛ Biblu Tɔn lɛ Biba

nwtsty sín tinmɛ ɖevo dó Mɛ 23:6 jí

Falizyɛn ɖé wɛ nú mì: Mɛ ɖěɖee ɖò ahwan ɔ mɛ lɛ é ɖé lɛ tuùn Pɔlu. (Mɛ 22:5) Ye na ko mɔ nǔ jɛ mɛ ɖɔ ylɔ̌ e é ylɔ́ éɖée ɖɔ Falizyɛn ví jiji é ɔ, ɖiɖexlɛ́ wɛ é ɖè ɖɔ emi tuùn gǔ e emi kpo ye kpo ɖu é. Falizyɛn lɛ kpo mɛ e ɖò Hwɛɖɔxɔsa Ðaxó Jwifu lɛ tɔn lɛ é kpo mɔ nǔ jɛ mɛ ɖɔ é kún jlɛ́ éɖée nyi dò ó, ɖó ye tuùn ɖɔ Klisanwun kanɖodónǔwutɔ́ ɖé wɛ é wá huzu. Amɔ̌, ɖò wemafɔ elɔ mɛ ɔ, è sixu mɔ nukúnnú jɛ ɖɔ e Pɔlu ɖɔ ɖɔ emi nyí Falizyɛn ɖé é wu ɖó bǎ ɖé mɛ; Pɔlu sɔ́ éɖée jlɛ́ dó Falizyɛn lɛ wu, é nyí dó Saduseɛn lɛ wu ǎ, ɖó é ɖi nǔ nú fínfɔ́n sín kú Falizyɛn lɛ ɖɔhun. Mɔ̌ mɛ ɔ, é bló bɔ Falizyɛn ɖěɖee ɖò finɛ lɛ é kpo é kpo mɔ nǔ jɛ yeɖée gbè mɛ. É cí ɖɔ é lin ɖɔ enyi emi sɔ́ xó enɛ e na dɔn nǔdindɔn wá Hwɛɖɔxɔsa Ðaxó Jwifu lɛ tɔn sín hagbɛ̌ lɛ tɛntin é nyi atɛ jí ɔ, ye mɛ ɖé lɛ na yí gbè nú xó emitɔn ɖɔhun, wlɛnwín ɔ ka w’azɔ̌ nǔgbo. (Mɛ 23:7-9) Xó e Pɔlu ɖɔ ɖò Mɛ 23:6 mɛ é lɛ́ sɔgbe xá lee é ɖè éɖée xlɛ́ gbɔn hwenu e é wá jɛhun dó éɖée jí ɖò Axɔsu Aglipa nukɔn é. (Mɛ 26:5) Hwenu e Pɔlu ɖò Hlɔma bo ɖò nǔ wlan sɛ́dó Klisanwun hatɔ́ tɔn e ɖò Filipu lɛ wɛ é ɔ, é lɛ́ ɖɔ xó dó gǔ e é ɖu, bo nyí Falizyɛn ɖé é wu. (Fili 3:5) É lɛ́ jɛxa ɖɔ è ni ɖó ayi lee è ɖɔ Klisanwun ɖevo e nyí Falizyɛn ɖ’ayǐ lɛ é xó gbɔn ɖò Mɛ 15:5 mɛ é wu.—Kpɔ́n tinmɛ ɖevo dó Mɛ 15:5 jí.

nwtsty sín tinmɛ ɖevo dó Mɛ 24:24 jí

Dlusila: É wɛ nyí Elodu e xó è ɖɔ ɖò Mɛ 12:1 mɛ é sín vǐ nyɔnu atɔngɔ́ ɔ, bo nyí yɔkpɔvu bǐ ɔ; Elodu enɛ wɛ nyí Elodu Aglipa I. È jì i ɖò 38 H.M. tɔn, b’ɛ nyí nɔví Aglipa IIgɔ́ ɔ kpo Bernice kpo tɔn. (Kpɔ́n tinmɛ ɖevo dó Mɛ 25:13 jí kpo Xógbe ɖé lɛ Sín Tinmɛ, “Elodu” kpo.) Tokpɔngán Felisi wɛ nyí asú tɔn wegɔ́ ɔ. Axɔsu Silíi tɔn Azizus Émèse tɔn wɛ é da jɛ nukɔn, amɔ̌, é gbɛ́ ɛ, bo wá da Felisi ɖò xwè 54 H.M. tɔn mɔ̌, alǒ hwenu e é ɖó xwè 16 mɔ̌ é. É sixu ko ɖò finɛ hwenu e Pɔlu ɖò Felisi nukɔn bo ɖò xó ɖɔ “dó lee è na zán gbɛ̀ ɖagbe gbɔn é,” “lee è na ɖu ɖò mɛɖesunɔ jí gbɔn é,” kpo “lee Mawu na wá ɖɔhwɛ xá gbɛtɔ́ lɛ gbɔn ɔ” kpo wu wɛ é. (Mɛ 24:25) Hwenu e Felisi jó acɛ dó nú Fɛsitusi gudo é ɔ, Felisi “jló na wà nǔ, bo na dó xomɛhunhun nú Jwifu lɛ,” bo jó Pɔlu dó nyi gankpá mɛ; mɛɖé lɛ lin ɖɔ é wà mɔ̌ bo na dó hɛn asì tɔn yɔyɔ̌ e nyí Jwifu ɖé é sín xomɛ hun.—Mɛ 24:27.

21-27 JANVIER

DƆKUN MAWUXÓ Ɔ TƆN ÐÉ LƐ | MƐSƐ́DÓ 25-26

Nǔ Xɔ Akwɛ Biblu Tɔn lɛ Biba

nwtsty sín tinmɛ ɖevo dó Mɛ 26:14 jí

sɛ́ hwɛ̌ kpò nu xwíɖíxwíɖí sín nuvínu: Kpò gaga ɖé wɛ bɔ gan xwíɖíxwíɖí ɖé nɔ ɖò nuvínu tɔn, bɔ è nɔ sɔ́ sɔ́ kanlin ɖé. (Hwɛ 3:31) Xógbe “sɛ́ hwɛ̌ kpò nu xwíɖíxwíɖí sín nuvínu” ɔ, lǒ ɖé wɛ bɔ è mɔ ɖò wema Glɛkigbe tɔn lɛ mɛ. Nyibu e è ɖò kpò xwíɖíxwíɖí sɔ́ sɔ́ wɛ bɔ é ma ka ɖò gbè sè wɛ ǎ, bɔ wǎgbɔ tɔn ɔ, é nɔ gblewǔ é ɖé wu wɛ è kpɔ́n dó dó ɖɔ xó ɔ. Nǔ ɖokpo ɔ wɛ Solu lɔ wà cobo wá huzu Klisanwun. Ee Pɔlu ɖò ahwanvu Jezu tɔn ɖěɖee gudo Jehovah Mawu nɔ lɛ é dóya na wɛ é ɔ, é wà nǔ dó éɖée wu syɛnsyɛn. (Sɔ́ jlɛ́ dó Mɛ 5:38, 39; 1Ti 1:13, 14 wu.) Ðò Nǔt 12:11 mɛ ɔ, è ɖɔ xó dó “kpò nu xwíɖíxwíɖí e è nɔ sɔ́ kanlin lɛ” é wu ɖò nǔjlɛdonǔwu linu, b’ɛ nɔ dó gesí nǔnywɛtɔ́ ɖé sín xó e nɔ sísɛ́ xósetɔ́ ɖé, b’ɛ nɔ xwedó wěɖexámɛ é.

nwt xógbe ɖé lɛ sín tinmɛ

Kpò nu xwíɖíxwíɖí. Kpò gaga ɖé wɛ bɔ gan xwíɖíxwíɖí ɖé nɔ ɖò nuvínu tɔn bɔ glesi lɛ nɔ sɔ́ sɔ́ kanlin ɖé. È jlɛ́ xó nǔnywɛtɔ́ ɖé tɔn e nɔ sísɛ́ mɛ bɔ è nɔ xwedó wěɖexámɛ e nǔnywɛ kpé lɛ é é dó kpò nu xwíɖíxwíɖí ɔ wu. “Sɛ́ hwɛ̌ kpò nu xwíɖíxwíɖí sín nuvínu” ɔ, nyibu e è ɖò kpò xwíɖíxwíɖí sɔ́ sɔ́ wɛ bɔ é ma ka ɖò gbè sè wɛ ǎ, bɔ wǎgbɔ tɔn ɔ, é nɔ gblewǔ é ɖé wu wɛ è kpɔ́n dó dó ɖɔ xó enɛ.—Mɛ 26:14; Hwɛ 3:31.

28 JANVIER–3 FEVRIER

DƆKUN MAWUXÓ Ɔ TƆN ÐÉ LƐ | MƐSƐ́DÓ 27-28

Nǔ Xɔ Akwɛ Biblu Tɔn lɛ Biba

nwtsty sín tinmɛ ɖevo dó Mɛ 27:9 jí

Hwɛ Súnsún Sín Kɔ nú Mɛ Zán Ðaxó Ɔ sín nublabla: Alǒ “nublabla septembre kabǐ octobre tɔn ɔ.” È na ɖɔ tlɔlɔ ɔ, “nublabla.” Xókwín Glɛkigbe tɔn e è lilɛ dó nublabla é nɔ dó gesí nublabla ɖokpo e è na gbè tɔn ɖò Mɔyizisɛ́n ɔ glɔ́ é, é wɛ nyí nublabla e cá kan xá Hwɛ Súnsún Sín Kɔ nú Mɛ Zán Ðaxó Ɔ sín nublabla xwewu xwewu tɔn ɔ é, é wɛ è lɛ́ ylɔ́ ɖɔ Yom Kippur (yôm hakkippourim ɖò Ebléegbe mɛ, “hwɛ lɛ súnsún súnsún sín azǎn”). (Le 16:29-31; 23:26-32; Kɛ́ 29:7; kpɔ́n Xógbe ɖé lɛ Sín Tinmɛ, “Hwɛ Súnsún Sín Kɔ nú Mɛ Zán Ðaxó Ɔ.”) Ðò kpaa mɛ ɔ, xógbe “dóya nú mɛɖée” e cá kan xá Hwɛ Súnsún Sín Kɔ nú Mɛ Zán Ðaxó Ɔ é sín tinmɛ wɛ nyí è ni gbɛ́ mɛɖée ɖò ali vovo nu, nublabla lɔ ɖ’emɛ. (Le 16:29) Xókwín “nublabla” e è zán ɖò Mɛ 27:9 mɛ é nɔ gudo nú linlin e ɖɔ ɖɔ nublabla ɖò mɛɖée gbigbɛ́ sín nǔwiwa taji e nɔ tíìn ɖò Hwɛ Súnsún Sín Kɔ nú Mɛ Zán Ðaxó Ɔ gbè é mɛ é. Hwɛ Súnsún Sín Kɔ nú Mɛ Zán Ðaxó Ɔ sín nublabla nɔ jɛ dó septembre sín vivɔnu alǒ octobre sín bǐbɛ̌.

nwtsty sín tinmɛ ɖevo dó Mɛ 28:11 jí

Vǐ Sunnu Zewusi Tɔn Lɛ: Xɛxó Glɛkinu lɛ kpo Hlɔmanu lɛ kpo tɔn nɔ ɖɔ ɖɔ “Vǐ Sunnu Zewusi Tɔn Lɛ” (Dioskouroï ɖò Glɛkigbe mɛ) wɛ nyí Castor kpo Pollux kpo, hoxo wɛ ye nyí nú vodun Zewusi (Jupiter) kpo Axɔsi Sparte tɔn Léda kpo. Mɛ lɛ nɔ mɔ ɖɔ ye wɛ nɔ nya xɛ ɖò tɔjihunkúntɔ́ lɛ jí, bo kpéwú bo na hwlɛn ye hwenu e tɔjihun na gba dó ye ɖò xù jí é. Gǒflɛ́mɛ enɛ nyí kúnnuɖenú ɖevo bo xlɛ́ ɖɔ mɛ e mɔ nǔ e jɛ lɛ é ɖé wɛ wlan tan ɔ.