NǓKPƆ́NNÚMƐ 12

Xomɛnyínyɔ́ kpo Wuvɛ̌sexámɛ Kpo

1 Tɛsalonikinu lɛ 2:7, 8

SIN SƐ̀ XWE NA: Lee nǔ cí nú we nǔgbo nǔgbo é ni tɔ́n ɖò xóɖiɖɔ towe mɛ, xlɛ́ tóɖówetɔ́ lɛ ɖɔ a yí wǎn nú ye bo jló na d’alɔ ye.

Lin tamɛ dó tóɖówetɔ́ lɛ jí. Flín tagba e ɖí xwi xá wɛ ye ɖè lɛ é hwiɖée dó sɔnǔ nú ayi towe. Tɛ́n kpɔ́n bo dó nukún lee nǔ cí nú ye é mɛ kpɔ́n.
Cyan xó towe lɛ ganji. Tɛ́n kpɔ́n bo fá kɔ nú tóɖówetɔ́ lɛ, dó gbɔ nú ye, bo lɛ́ dó wusyɛn lanmɛ nú ye. Nyi alɔ nú xógbe ɖěɖee sixu dó xomɛsin xomɛ nú ye lɛ é, ma ka ɖɔ xó nyanya ɖé dó mɛ e ma ɖi nǔ nú Jehovah ǎ lɛ é, alǒ dó nǔ e ye ɖi nǔ na syɛnsyɛn lɛ é wu ó.
Ðexlɛ́ ɖɔ mɛ ɖevo lɛ sín nǔ ɖu ayi mɛ nú emi. Ðɔ xó kpo xomɛnyínyɔ́ kpo, bo lɛ́ zán alɔ, wǔtu, kpo afɔ kpo lee é jɛxa gbɔn é dó ɖexlɛ́ tóɖówetɔ́ lɛ ɖɔ nǔ yetɔn ɖu ayi mɛ nú emi tawun. Ðǒ ayi te dó nukúnmɛ sín xlɛ̌ towe lɛ wu; nɔ ko nǔ ɖò nu kpá hwɛhwɛ.

Enyi a ma sixu ɖè lee nǔ cí nú we é xlɛ́ ǎ hǔn, ma ɖɔ dandan ó, ma ka lɛ́ dó sin lee nǔ cí nú we é ɖiɖexlɛ́ jí ó. Hwenu e a ɖò nǔ xà wɛ é ɔ, ɖè lee nǔ cí nú mɛ bɔ akpáxwé ɔ xlɛ́ é tɔ́n, amɔ̌, ma ka dɔn ayi wá hwiɖée jí ó. Tɛ́n kpɔ́n bo ɖɔ xó kpo xomɛnyínyɔ́ kpo kpodo wanyiyi kpo.