Ee Adamu kpo Ɛvu kpo tɔ́n sín jikpá Edɛni tɔn mɛ gudo é ɔ, ye jì vǐ gègě. Vǐ sunnu yetɔn nukɔntɔn Kanyɛ́ɛ wá huzu glesi ɖé, bɔ wegɔ e nyí Abɛli é wá huzu lɛngbɔnyitɔ́ ɖé.

Gbè ɖokpo wá sù bɔ Kanyɛ́ɛ kpo Abɛli savɔ̌ nú Jehovah. A ka tuùn nǔ e nyí vɔsisa é à? Nùnina bunɔ ɖé wɛ. Jehovah hun xomɛ dó vɔsisa Abɛli tɔn wu, loɔ, é ka hun xomɛ dó Kanyɛ́ɛ tɔn wu ǎ. Enɛ sìn xomɛ nú Kanyɛ́ɛ tawun. Jehovah gb’akpá nú Kanyɛ́ɛ ɖɔ xomɛsin tɔn sixu zɔ́n bɔ é na wà nǔ nyanya. Amɔ̌, Kanyɛ́ɛ ka sè ǎ.

É nyɔ́ wà ɔ, Kanyɛ́ɛ ɖɔ nú Abɛli ɖɔ: ‘Wǎ mǐ yì gle mɛ.’ Hwenu e ye wá ɖò yeɖokpo ɖò gle ɔ mɛ é ɔ, Kanyɛ́ɛ zɔn nɔví tɔn jí bo hu. Etɛ Jehovah ka bló ɖó nǔ enɛ wu? Jehovah dɔn tó nú Kanyɛ́ɛ bo nya ɛ dó zɔ bǐ mlɛ́mlɛ́ nú xwédo tɔn. È sɔ́ na na tɛn Kanyɛ́ɛ bonu é na lɛkɔ wá xwé gbeɖé ǎ.

Nùkplɔnmɛ ɖé ka ɖ’emɛ nú mǐ à? Xomɛ sixu jɛ mǐ sìn jí ɖó nǔ lɛ ɖò yiyi wɛ lee mǐ lin gbɔn é ǎ wutu. Nú xomɛsin ɔ jɛ jijɛji jí, alǒ nú mɛ ɖevo lɛ ɖ’ayi xomɛsin mǐtɔn wu bo gb’akpá nú mǐ ɔ, mǐ ɖó na yawu vɔ́ mǐɖée blóɖó bo ɖu ɖò xomɛsin ɔ jí, bonu é ma wá ɖu ɖò mǐ jí ó.

Ðó Abɛli yí wǎn nú Jehovah bo wà nǔ e sɔgbe é wutu ɔ, Jehovah na flín i tɛgbɛ. Mawu na fɔ́n Abɛli wá gbɛ̀ hwenu e É na bló bɔ ayikúngban ɔ na huzu palaɖisi ɖé é.

Ðò hweɖenu ɔ, gbɛtɔ́ lɛ wá sukpɔ́ ɖò ayikúngban ɔ jí. Gègě yetɔn wɛ nyí mɛ nyanya. Wɛnsagun e ɖò jixwé é ɖé lɛ tlɛ huzu mɛ nyanya. Ye jó xwé yetɔn dó ɖò jixwé bo wá ayikúngban ɔ jí. A ka tuùn nǔ e wu ye wà mɔ̌ é à? Ðó ye jló na da nyɔnu lɛ wutu.

Wɛnsagun lɛ kpo nyɔnu lɛ kpo jì vǐ lɛ. Vǐ enɛ lɛ sù bo ɖó hlɔnhlɔn tawun bo huzu dakaxotɔ́. Ye nɔ gblewu mɛ lɛ. Jehovah sixu tin bonu nǔ enɛ lɛ ɖò jijɛ wɛ kpowun ǎ. Enɛ wu ɔ, é ɖɔ ɖɔ emi na sɔ́ sìn dó sú mɛ nyanya lɛ sín kún dó.

Amɔ̌, nya ɖé tíìn bo gbɔn vo. Jehovah yí wǎn n’i. Nyikɔ tɔn nɔ nyí Nɔwée. É ɖó asì ɖokpo, bo ɖó vǐ sunnu atɔn, ye wɛ nyí Sɛmu, Camu kpo Jafɛti kpo; ye lɔ ɖó asì ɖokpo ɖokpo. Jehovah ɖɔ nú Nɔwée ɖɔ é ni bló tɔjihun ɖaxó ɖokpo, bonu é kpo xwédo tɔn kpo na dó sixu gán ɖò Sìnvɔgbɛ ɔ hwenu. Tɔjihun enɛ nyí gbǎ hoyahoya ɖé bo hɛn ɔ, é na nɔ fo tɔ̀ ɖò sìn nukúnmɛ. Jehovah lɛ́ ɖɔ nú Nɔwée ɖɔ é ni bɛ́ kanlin gègě dó tɔjihun ɔ mɛ bonu ye lɔ na mɔ tɛn dó sixu gán.

Tlolo jɛn Nɔwée jɛ tɔjihun ɔ bló jí. Nɔwée kpo xwédo tɔn kpo bló xwè 50 mɔ̌ cobo bló fó. Ye bló tɔjihun ɔ lee Jehovah ɖɔ nú ye gbɔn é pɛ́pɛ́pɛ́. Ðò avla enɛ mɛ ɔ, Nɔwée gb’akpá nú mɛ lɛ dó Sìnvɔgbɛ ɔ wu. Ye mɛ ɖě ka ɖótó è ǎ.

Dìn ɔ, hwenu sù bɔ ye na byɔ tɔjihun ɔ mɛ. Mǐ ni kpɔ́n nǔ e jɛ bɔ d’ewu é.