Ye Dó Awu E Wu Akpataxwi Ga Atɔnnɔ Kwélesinnɔ ɖé Ðè É
Maud nɔ nɔ France bo nɔ w’azɔ̌ ɖò wemaxɔmɛ ɖé; é nɔ d’alɔ vǐ e wɔ̌n ɖò wǔ na lɛ é ɖò klási. Agaɖanu dìn ɔ, wemaxɔmɛví klási ɖé tɔn lɛ ɖò nǔ kplɔ́n dó lee Nazi lɛ hu mɛ vantankánnyá gbɔn é kpo gankpá yadonúmɛ tɔn yetɔn lɛ kpo wu wɛ. Gantɔ́ lɛ ɖó na dó awu gantɔ́ lɛ tɔn e wu è tɔ̀ avɔxwɛ sinmɛnɔ ɖé dó é. Sinmɛ avɔxwɛ ɔ tɔn kpo lee é cí é kpo nɔ ɖè nǔ e wu è wlí mɛɖé dó gan é xlɛ́.
Ee mɛ̌si ɔ ɖò xó ɖɔ dó akpataxwi ga atɔnnɔ kwélesinnɔ e ɖò awu gantɔ́ ɖé lɛ tɔn wu wɛ é ɔ, é ɖɔ: “Un lin ɖɔ nǔ nyí mɔ̌ ɖó ye ɖóxó xá mɛ e ɖó mɛ̌ ɖokpo ɔ ye ɖɔhun lɛ é wutu.” Ee ye tɔ́n sín klási ɔ gudo é ɔ, Maud ɖɔ xó xá mɛ̌si ɔ, bo tinmɛ n’i ɖɔ Nazi lɛ zán akpataxwi ga atɔnnɔ kwélesinnɔ ɔ dó dó gesí Kúnnuɖetɔ́ Jehovah tɔn lɛ.a É byɔ ɛ ɖɔ emi na hɛn wema e ɖɔ xó dó xóta ɔ wu é ɖé lɛ wá n’i. Mɛ̌si ɔ yí gbè n’i, bo lɛ́ byɔ ɛ ɖɔ é ni má nǔ e ɖò wema lɛ mɛ lɛ é xá wemaxɔmɛví lɛ.
Hwenu e mɛ̌si ɖevo wá ɖò nǔ kplɔ́n wemaxɔmɛví lɛ dó xóta enɛ ɖokpo ɔ jí wɛ ɖò klási ɖevo mɛ é ɔ, é zán gbǎví e xlɛ́ wuntun vovo e nɔ ɖò gantɔ́ lɛ sín awu wu lɛ é. Gbǎví ɔ xlɛ́ nyi wɛn ɖɔ akpataxwi ga atɔnnɔ kwélesinnɔ ɔ dó gesí Kúnnuɖetɔ́ Jehovah tɔn lɛ. Ee ye fó é ɔ, Maud má mɔjɛmɛ ɖé lɛ dó xóta ɔ jí xá mɛ̌si enɛ. Mɛ̌si ɔ yí gbè, bo bló tuto bonu Maud na ɖɔ xó nú wemaxɔmɛví lɛ tlɔlɔ.
Maud hɛn nǔ ɖěɖee é zán lɛ é alɔ mɛ
Maud sɔnǔ nú nǔxwlémɛ cɛju 15 tɔn ɖé, bo na xwlé klási nukɔntɔn ɔ, amɔ̌, hwenu e gan ɔ xò é ɔ, mɛ̌si ɔ ɖɔ n’i ɖɔ: “A sixu zán táan ɔ bǐ.” Maud xlɛ́ video e ɖɔ xó dó ya e Nazi lɛ dó nú Kúnnuɖetɔ́ Jehovah tɔn lɛ é wu é dó bɛ́. Hwenu e ye jɛ akpáxwé video ɔ tɔn e ɖɔ ɖɔ Nazi lɛ wlí Kúnnuɖetɔ́ lɛ sín vǐ 800 jí é ɔ, Maud ɖó video ɔ te, bo xà tan vǐ enɛ lɛ atɔn tɔn. Ee Maud xlɛ́ video ɔ fó gudo é ɔ, é xà wema-sɛ́dó-mɛ gudogudo tɔn e Gerhard Steinacher e nyí Kúnnuɖetɔ́ Jehovah tɔn Australie tɔn xwè 19 mɛví ɖé é wlan ɖò 1940, bo sɛ́dó mɛjitɔ́ tɔn lɛ ɖò táan kpɛɖé jɛ nukɔn nú hwenu e Nazi lɛ hu i é é dó sú ta na.b
Maud xwlé nǔ mɔhun klási wegɔ́ ɔ. Ðó Maud gb’adɔ wutu ɔ, mɛ̌si we lɛ bǐ nɔ tɛ́n kpɔ́n dìn bo nɔ ɖɔ xó dó Kúnnuɖetɔ́ Jehovah tɔn lɛ wu hwenu e ye ɖò nǔ kplɔ́n mɛ dó mɛ ɖěɖee sè wuvɛ̌ ɖò yadonúmɛkpá Nazi tɔn lɛ mɛ lɛ é wu wɛ é.
a Ðò Wɛkɛ Hwan Wegɔ́ ɔ hwenu ɔ, è wlí Kúnnuɖetɔ́ Jehovah tɔn Allemagne tɔn ɖěɖee è nɔ lɛ́ ylɔ́ ɖɔ Bibelforscher (Biblu Kplɔntɔ́ lɛ) lɛ é dó gan, ɖó gbɛ̌ e ye gbɛ́ ɖɔ emi kún na nɔ gudo nú Nazi lɛ ó é.
b È ɖó kúhwɛ́ nú Gerhard Steinacher ɖó é gbɛ́ ɖɔ emi kún na xò kpóɖó nú ahwankpá Allemagne tɔn ó. Ðò wema-sɛ́dó-mɛ tɔn gudogudo tɔn ɔ mɛ ɔ, é wlan ɖɔ: “Un kpò ɖò vǔ. Enyi Aklunɔ ɔ na mì hlɔnhlɔn ɔ jɛn un sixu dɛ ɖ’enu, nǔ e un ka nɔ byɔ é nɛ.” Ayihɔngbe tɔn zǎnzǎn ɔ, è hu Gerhard. È wlan xó elɔ dó yɔ tɔn ta: “É kú nú susu Mawu tɔn.