Nɔ ɖeji dó Jehovah wú ɖo nǔ bǐ mɛ

1-2. (a) Étɛ́wú é ka nɔ vɛ́ wǔ nú mɛ gěgé ɖo égbé bónú yě ná ɖeji dó mɛ e ɖo tɛn acɛkpikpa tɔn mɛ lɛ́ é wú? (b) Étɛ́ lɛ́ mǐ ka ná gbéjé kpɔ́n ɖo xóta élɔ́ mɛ?

ÉGBÉ ɔ, é nɔ vɛ́ wǔ nú mɛ gěgé bónú yě ná ɖeji dó mɛ e ɖo tɛn acɛkpikpa tɔn mɛ é ɖé wú. Yě nɔ ɖ’ayi wú ɖɔ hwɛhwɛ ɔ, acɛkpikpa lɛ́ kpó sɛ́n e è ɖó ayǐ lɛ́ é kpó nɔ jɛ hun dó dɔkunnɔ lɛ́ kpó mɛ nukúnɖéjí lɛ́ kpó jí, lobo ka nɔ d’alɔ káká ɖé wamamɔnɔ lɛ́ ǎ. Yǎyá wú wɛ Biblu ɖɔ xó élɔ́ ǎ: “Gbɛtɔ́ ɖě nɔ kpa acɛ gannaganna nú nɔzo tɔn, bó nɔ wa nǔ dó wǔ tɔn.” (Nǔt. 8:9) Gɔ́ ná ɔ, sinsɛngán ɖé lɛ́ nɔ wa nǔ e ma sɔgbe ǎ lɛ́ é, bɔ énɛ́ nɔ zɔ́n bɔ mɛɖé lɛ́ sɔ́ nɔ ɖeji dó Mawu wú ǎ. Énɛ́ wú ɔ, ényí mɛɖé ba ná kplɔ́n Biblu xá mǐ ɔ, alɔ dídó è bónú é ná ɖeji dó Jehovah kpó mɛ e ɖo nukɔn nú nǔ lɛ́ ɖo tutoblónúnǔ Tɔn mɛ ɖo ayǐkúngban jí lɛ́ é kpó wú nɔ vɛ́ wǔ kpɛɖé.

² È ná ɖɔ ɔ, Biblu kplɔ́ntɔ́ lɛ́ kɛ́ɖɛ́ wɛ ná kplɔ́n bó ná ɖeji dó Jehovah kpó tutoblónúnǔ tɔn kpó wú ǎ. Ényí mǐ ná bó tlɛ ko ɖo Jehovah sɛn wɛ sín xwe mɔ̌kpán ɖíe ɔ, mǐ ɖó ná gɔn jiɖe ɖó gbeɖé ɖɔ lěe Jehovah nɔ wa nǔ lɛ́ gbɔn é wɛ nɔ nyɔ́ hú gǎn hwebǐnu ǎ. Hweɖélɛ́nu ɔ, ninɔmɛ ɖé lɛ́ nɔ wá xwetɔ́n, bó sixú tɛ́n jiɖe e mǐ ɖó ɖo ali mɔ̌hun nu é kpɔ́n. Ðo xóta élɔ́ mɛ ɔ, mǐ ná gbéjé ninɔmɛ ɖěɖěe mɛ nǔɖiɖi mǐtɔn sixú gbɔn tɛ́nkpɔ́n mɛ ɖe é atɔn kpɔ́n: (1) hwenu e mǐ ɖo tan Biblu tɔn ɖé lɛ́ xa wɛ é, (2) hwenu e tutoblónúnǔ Jehovah tɔn ná alixlɛ́mɛ ɖé mǐ é, kpó (3) hwenu e mǐ ná ɖo wǔvɛ́ lɛ́ mɛ gbɔn wɛ ɖo sɔgúdo é kpó.

ÐEJI DÓ JEHOVAH WÚ HWENU E A ÐO BIBLU XA WƐ É

3. Nɛ̌ tan Biblu tɔn ɖé lɛ́ ka sixú tɛ́n jiɖe e mǐ ɖó dó Jehovah wú é kpɔ́n gbɔn?

³ Ényí mǐ ɖo Xó Mawu tɔn xa wɛ ɔ, mǐ sixú nɔ kan nǔɖé lɛ́ byɔ́ mǐɖée dó lěe Jehovah wa nǔ gbɔn xá mɛɖé lɛ́ é kpó gbeta e kɔn é wá é ɖé lɛ́ kpó wú. Ði kpɔ́ndéwú ɔ, ɖo wěma Kɛ́nsísɔ́ tɔn mɛ ɔ, mǐ xa ɖɔ Jehovah ɖó kúhwɛ nú Izlayɛ́li ví e ɖo nakí cyán wɛ ɖo Gbɔjɛzángbe é ɖé. Ðo xwe kanweko mɔ̌kpán gúdo, ɖo wěma Samuwɛ́li wegɔ́ ɔ tɔn mɛ ɔ, mǐ xa ɖɔ Jehovah sɔ́ hwɛ kɛ Axɔ́sú Davídi e ba mɛsi bó lɛ́ hu mɛ é. (Kɛ́n. 15:32, 35; 2 Sam. 12:9, 13) Mǐ sixú nɔ kanbyɔ́ mǐɖée ɖɔ: ‘Aniwú Jehovah ka sɔ́ hwɛ kɛ Davídi e ba mɛsi, bó lɛ́ hu mɛ é, lobo ka ɖó kúhwɛ nú nya ɖě ɔ e é cí ɖɔ hwɛ tɔn kún syɛ́n sɔmɔ̌ ó é?’ Bó ná dó ná xósin nú nǔkanbyɔ́ énɛ́ ɔ, ɖ’ayi nǔ atɔn élɔ́ lɛ́ e mǐ ɖó ná hɛn d’ayi mɛ hwenu e mǐ ɖo Biblu xa wɛ é wú.

4. Nɛ̌ Bǐbɛ́mɛ 18:20, 21 kpó Sɛ́nflínmɛ 10:17 kpó ka ná hlɔ̌nhlɔ́n jiɖe e mǐ ɖó dó hwɛ e Jehovah nɔ ɖɔ lɛ́ é wú é gbɔn?

⁴ Hwe lɛ́ bǐ nu wɛ Biblu nɔ ɖɔ gǒflɛ́mɛ e kúnkplá tan ɖé é bǐ mlɛ́mlɛ́ ǎ. Ði kpɔ́ndéwú ɔ, mǐ tuun ɖɔ nǔ e Davídi wa nyi do lɛ́ é vɛ́ n’i nǔgbó nǔgbó. (Ðɛh. 51:4-6) Amɔ̌, mɛ alɔkpa tɛ́ nya e gba Gbɔjɛzánsɛ́n ɔ é ka nyí? Nǔ e é wa é ka vɛ́ n’i a? É nɔ ko t’afɔ sɛ́n Jehovah tɔn lɛ́ jí ɖ’ayǐ wɛ a? Akpá e è gba n’i wá yi lɛ́ é ɔ, é wɔn ya ná, alǒ tlɛ gbɛ́ wɛ a? Biblu ɖɔ ǎ. Amɔ̌, mǐ sixú ɖeji ɖɔ Jehovah kún ‘nɔ wa nǔblíblí ó.’ (Sɛ́n. 32:4) Hwɛhwɛ ɔ, xó e mɛ lɛ́ nɔ ɖɔ lɛ́ é, linlin masɔgbe e yě nɔ ɖó dó mɛ ɖěvo lɛ́ wú é, alǒ nǔ mɔ̌hun ɖěvo lɛ́ jí wɛ gbɛtɔ́ lɛ́ nɔ zɔn dó dó ɖɔ hwɛ; énɛ́ wɛ zɔ́n bɔ yě nɔ ɖɔ hwɛ nyi do. Jehovah tɔn ka nyí mɔ̌ ǎ; nǔ lɛ́ bǐ mɛ wɛ é nɔ tó mɔ nǔ jɛ hwɛ̌ cóbó nɔ wá gbeta tɔn lɛ́ kɔn. (Xa Bǐbɛ́mɛ 18:20, 21; Sɛ́nflínmɛ 10:17.) Lě do mǐ kplɔ́n bó ɖeji dó Jehovah kpó nǔgbódodó tɔn lɛ́ kpó wú sɔ é ɔ, mɔ̌ do wɛ mǐ nɔ ɖeji dó hwɛ e é nɔ ɖɔ lɛ́ é wú sɔ. Ényí mǐ ná bó tlɛ xa Biblu bó ɖó nǔkanbyɔ́ e mǐ ma sixú mɔ xósin tɔn din ǎ lɛ́ é ɔ, mǐ ka tuun nǔ gěgé dó Mawu mǐtɔn wú, bɔ énɛ́ ko kpé bɔ mǐ ná ɖeji ɖɔ ‘é ɖo gbejí ɖo nǔ e é nɔ wa lɛ́ é bǐ mɛ.’—Ðɛh. 145:17.

5. Nɛ̌ hwɛhuhu gú e mǐ ɖu é ka nɔ zɔ́n bɔ mǐ nɔ gɔn nǔ mɔ jɛ nǔ lɛ́ bǐ mɛ ganjí hwebǐnu gbɔn? (Lɛ̌ kpɔ́n gbǎví “Hwɛhuhu gú e mǐ ɖu é nɔ zɔ́n bɔ mǐ sixú gɔn nǔ mɔ jɛ nǔ lɛ́ bǐ mɛ ganjí hwebǐnu.”)

⁵ Hwɛhutɔ́ e mǐ nyí é zɔ́n bɔ mǐ sixú ɖɔ hwɛ bónú blɔ̌ hán ɖ’é wú gbeɖé ǎ. Mawu dá mǐ ɖó akpajlɛ́ tɔn mɛ, énɛ́ wú ɔ, mǐ nɔ ba nǔgbó nǔgbó ɖɔ è ní wa nǔ xá mɛ ɖěvo lɛ́ kpó hwɛjijɔ kpó. (Bǐb. 1:26) Amɔ̌, ɖó mǐ nyí hwɛhutɔ́ wútu ɔ, mǐ sixú nɔ ɖɔ hwɛ nyi do, ényí mǐ ná bó tlɛ nɔ lin ɖɔ mǐ ɖó kúnnuɖenú lɛ́ bǐ ɔ nɛ́. Ði kpɔ́ndéwú ɔ, flín lěe akpɔ ɖó Jonási sɔ hwenu e Jehovah wá gbeta ɔ kɔn bó kú nǔbláwǔ nú Ninívunu lɛ́ é. (Joná. 3:10–4:1) Amɔ̌, lin tamɛ dó nǔ e mɛ é tɔ́n kɔ dó é jí. È hwlɛ́n Ninívunu e lɛ́ kɔ sín hwɛ yětɔn gúdo lɛ́ é 120 000 jɛjí! Gǔdo mɛ ɔ, Jonási wɛ ɖɔ hwɛ agɔ dó togun ɔ, é nyí Jehovah ǎ.

6. Étɛ́wú é ma ka byɔ́ ɖɔ Jehovah ní nɔ tínmɛ gbeta e kɔn é nɔ wá lɛ́ é nú mǐ ǎ?

⁶ É byɔ́ ɖɔ Jehovah ní tínmɛ nǔ e wú é nɔ wá gbeta tɔn lɛ́ kɔn é nú gbɛtɔ́ lɛ́ ǎ. Nǔgbó ɔ, Jehovah yí gbe bɔ mɛsɛntɔ́ tɔn ɖěɖěe nɔ gbɛ ɖo hwexónu lɛ́ é ɖɔ nǔ ɖěɖěe yě lin dó gbeta e kɔn é wá lɛ́ é, alǒ nǔ e ná wa wɛ é ɖe lɛ́ é wú é. (Bǐb. 18:25; Joná. 4:2, 3) Gɔ́ ná ɔ, ɖo ninɔmɛ ɖé mɛ ɔ, é tínmɛ nǔ e wú é wá gbeta ɖé kɔn é. (Joná. 4:10, 11) É ɖo mɔ̌ có, é ka byɔ́ ɖɔ Jehovah ní nɔ tínmɛ nǔ e wú é nɔ wá gbeta tɔn lɛ́ kɔn é nú mǐ ǎ. Ðó é wɛ nyí Gbɛɖótɔ́ mǐtɔn wútu ɔ, é byɔ́ ɖɔ mǐ ní ná ɛ gbe, alǒ ɖɔ nǔ e mǐ lin dó nǔ e é wa é wú é ǎ.—Eza. 40:13, 14; 55:9.

ÐEJI DÓ JEHOVAH WÚ HWENU E È ÐO ALI XLƐ́ WE WƐ É

7. Wǔvɛ́ tɛ́ mǐ ka sixú mɔ? Étɛ́wú?

⁷ Mǐ kán ɖ’é jí kpó ayi mǐtɔn bǐ kpó mlɛ́mlɛ́ ɖɔ hwebǐnu wɛ nǔ e Jehovah nɔ wa lɛ́ é nɔ sɔgbe. Amɔ̌, fí e wǔvɛ́ ɔ ɖe é wɛ nyí lěe mǐ sixú ɖeji dó mɛ e é sɔ́ ɖó nu mǐtɔn lɛ́ é wú gbɔn é. Mǐ sixú nɔ kanbyɔ́ mǐɖée ɖɔ mɛ énɛ́ lɛ́ e ɖ’acɛ ɖó bǎ ɖé mɛ ɖo tutoblónúnǔ Jehovah tɔn mɛ é ɔ, lěe Jehovah nɔ ba ɖɔ è ní wa nǔ lɛ́ gbɔn é jɛ́n yě nɔ wa gbɔn pɛ́pɛ́pɛ́ a jí, alǒ lěe yěɖésúnɔ jló gbɔn é. Mɛɖé lɛ́ sixú ko lin nǔ gbɔn mɔ̌ ɖo Biblu sín táan mɛ. Flín kpɔ́ndéwú mɛ ɖěɖěe xó mǐ ɖɔ ɖo akpáxwé 3gɔ́ ɔ mɛ lɛ́ é tɔn. Hɛ̌nnumɔ nya e gba Gbɔjɛzánsɛ́n ɔ é tɔn ɖé sixú ko nɔ kanbyɔ́ éɖée ɖɔ, Mɔyízi ka kan nǔ byɔ́ Jehovah dóó cóbɔ è ɖó kúhwɛ nú nya ɔ a jí. Gɔ́ ná ɔ, Ulíi Hitíti e sín asi Davídi lɛ aga xá é sín xɔ́ntɔn ɖé sixú ko wá gbeta ɔ kɔn ɖɔ Axɔ́sú e Davídi nyí é wɛ zɔ́n bɔ é xo gló tódɔnnúmɛ e é jɛxá é. Jehovah ɖeji dó mɛ ɖěɖěe é sɔ́ bɔ yě ɖo nukɔn nú nǔ lɛ́ ɖo tutoblónúnǔ ɔ kpó agun lɛ́ kpó mɛ lɛ́ é wú. Énɛ́ wú ɔ, ényí mǐ ma ɖeji dó súnnu énɛ́ lɛ́ wú ǎ ɔ, mǐ sixú ɖɔ ɖɔ mǐ ɖeji dó Jehovah wú ǎ.

8. Kancícá tɛ́ ka ɖo xó e è ɖɔ ɖo Mɛsɛ́dó 16:4, 5 mɛ é kpó lěe è nɔ wa nǔ gbɔn ɖo agun Klisánwun tɔn mɛ égbé é kpó tɛ́ntin?

⁸ “[Deví] gbejínɔtɔ́, ayiɖotenánɔ” ɔ jí wɛ Jehovah nɔ xlɛ́ ali tutoblónúnǔ tɔn sín akpáxwé e ɖo ayǐkúngban jí é gbɔn ɖo égbé. (Mat. 24:45) Hǎgbɛ́ alixlɛ́mɛtɔ́ xwe kanweko nukɔntɔn ɔ tɔn ɖɔhun ɔ, deví énɛ́ nɔ kpé nukún dó togun Mawu tɔn e gbɔn gbɛ ɔ bǐ mɛ é wú, bó nɔ ná alixlɛ́mɛ lɛ́ mɛxó agun tɔn lɛ́. (Xa Mɛsɛ́dó 16:4, 5.) Énɛ́ gúdo ɔ, mɛxó agun tɔn lɛ́ nɔ mɔ nǔ jɛ wú ɖɔ è xwedó alixlɛ́mɛ énɛ́ lɛ́ ɖo agun lɛ́ mɛ. Ényí mǐ nɔ se tónú nú alixlɛ́mɛ e tutoblónúnǔ ɔ kpó mɛxó agun tɔn lɛ́ kpó nɔ ná mǐ é hǔn, xlɛ́xlɛ́ wɛ mǐ ɖe ɖɔ mǐ ɖeji dó lěe Jehovah nɔ wa nǔ lɛ́ gbɔn é wú nɛ́.

9. Hwetɛ́nu é ka sixú vɛ́ wǔ nú mǐ bɔ mǐ ná xwedó gbeta e kɔn mɛxó lɛ́ wá é ɖé? Étɛ́wú?

⁹ Hweɖélɛ́nu ɔ, mǐ sixú mɔ ɖɔ é vɛ́ wǔ bɔ mǐ ná xwedó gbeta e kɔn mɛxó lɛ́ wá lɛ́ é. Ði kpɔ́ndéwú ɔ, agaɖanu din ɔ, è vɔ́ tuto bló nú agun kpó lɛ̌dó kpó gěgé. Ðo ninɔmɛ ɖé lɛ́ mɛ ɔ, mɛxó agun tɔn ɖé lɛ́ byɔ́ wɛnjlátɔ́ lɛ́ ɖɔ yě ní xo kpóɖó nú agun ɖěvo lɛ́, bɔ énɛ́ ná zɔ́n bɔ tɛnmɛ e nɔ nɔ vɔ̌ ɖo Kpléxɔ Axɔ́súɖuto ɔ tɔn mǐtɔn lɛ́ mɛ lɛ́ é ná ɖe kpo. Ényí è byɔ́ mǐ ɖɔ mǐ ní xo kpóɖó nú agun yɔ̌yɔ́ ɖé ɔ, xɔ́ntɔn mǐtɔn lɛ́ kpó xwédo mǐtɔn jíjódó kpó sixú vɛ́ wǔ nú mǐ. Jehovah ka nɔ xlɛ́ ali mɛxó agun tɔn lɛ́ bónú yě ná ɖɔ fí e wɛnjlátɔ́ ɖokpó ɖokpó ná yi é wɛ a? Éǒ. Gɔ́ ná ɔ, énɛ́ tuuntuun sixú zɔ́n bɔ alixlɛ́mɛ e è ná mǐ é xwixwedó sixú vɛ́ wǔ nú mǐ. Amɔ̌, Jehovah ka nɔ ɖeji dó mɛxó agun tɔn lɛ́ wú ɖɔ yě sixú wá gbeta mɔ̌hun kɔn, bɔ mǐ lɔmɔ̌ ɖó ná ɖeji dó yě wǔ.b

10. Sɔgbe xá Eblée lɛ́ 13:17 ɔ, étɛ́wú mǐ ka ɖó ná nɔ wa nǔ alɔ ɖo alɔ mɛ xá mɛxó agun tɔn lɛ́?

¹⁰ Ényí gbeta e kɔn mɛxó agun tɔn lɛ́ wá lɛ́ é ma tlɛ nyí nǔ e ɖó nukún wɛ mǐ ɖe é ǎ ɔ, étɛ́wú mǐ ka ɖó ná wa nǔ alɔ ɖo alɔ mɛ xá yě, lobo nɔ gǔdo nú gbeta e kɔn yě wá lɛ́ é? Mɔ̌ wiwa nɔ zɔ́n bɔ mǐ nɔ d’alɔ bɔ è nɔ jɛ hun dó bǔténinɔ e ɖo togun Mawu tɔn mɛ é jí. (Efɛ́. 4:2, 3) Ényí mɛ lɛ́ bǐ nɔ yí gbe nú gbeta e kɔn kplékplé mɛxó lɛ́ tɔn wá lɛ́ é kpó mɛɖéesɔ́hwe kpó ɔ, agun ɔ nɔ yi nukɔn. (Xa Eblée lɛ́ 13:17.) Tají hú gǎn ɔ, nǔ wa ɖó kpɔ́ xá mɛ ɖěɖěe wú Jehovah ɖeji dó ɖɔ yě ná kpé nukún dó mǐ wú lɛ́ é nɔ xlɛ́ ɖɔ mǐ ɖeji dó Jehovah lɔmɔ̌ wú.—Mɛ. 20:28.

11. Étɛ́ ka sixú d’alɔ mǐ bɔ mǐ ná ná hlɔ̌nhlɔ́n jiɖe e mǐ ɖó dó alixlɛ́mɛ e mɛxó agun lɛ́ nɔ ná mǐ é wú?

¹¹ Ényí mǐ nɔ flín ɖɔ hwenu e mɛxó agun tɔn lɛ́ ɖo xó ɖɔ dó nǔ ɖěɖěe kúnkplá agun ɔ lɛ́ é wú wɛ é ɔ, yě nɔ xo ɖɛ bó nɔ byɔ́ alɔdó gbigbɔ mímɛ́ tɔn ɔ, mǐ sixú ná hlɔ̌nhlɔ́n jiɖe e mǐ ɖó dó alixlɛ́mɛ e mǐ nɔ mɔ ɖo yě gɔ́n lɛ́ é wú é. Yě nɔ lɛ́ xwe sɔ bó nɔ gbéjé nǔgbódodó Biblu tɔn ɖěɖěe cá kan xá ninɔmɛ ɔ lɛ́ é kpɔ́n, bó nɔ lɛ́ kpɔ́n alixlɛ́mɛ e tutoblónúnǔ Jehovah tɔn ná dó xó ɔ wú lɛ́ é. Nǔ e nɔ myá nukún nú yě hú gǎn é wɛ nyí yě ná nyɔ́ ɖo Jehovah nukúnmɛ, lobo ka ná sɔ́ nǔ nú nǔ e nyɔ́ hú gǎn é nú togun tɔn lěe é nyɔ́ bló gbɔn é. Nɔví súnnu gbejínɔtɔ́ énɛ́ lɛ́ tuun ɖɔ émí ná ɖó gbe lěe émí wa azɔ̌ émítɔn gbɔn é tɔn nú Mawu. (1 Pi. 5:2, 3) Lin tamɛ dó nǔ élɔ́ jí: Gbɛ élɔ́ klán ɖo akɔ, sinsɛn kpó toxóɖiɖɔ kpó linu có, togun Jehovah tɔn ka ɖo bǔ, bó ɖo Mawu nǔgbó ɖokpó ɔ sɛn wɛ. Nǔ sixú nyí mɔ̌ nyɔ̌ná e Jehovah nɔ kɔn dó tutoblónúnǔ tɔn jí é mɛvo ǎ!

12. Cóbónú mɛxó agun tɔn lɛ́ ná tuun nú mɛɖé lɛ́ kɔ sín hwɛ tɔn lɛ́ gúdo alǒ gbɔ ɔ, étɛ́ lɛ́ yě ka ɖó ná gbéjé kpɔ́n?

¹² Jehovah ɖeji dó mɛxó agun tɔn lɛ́ wú, bó sɔ́ azɔ̌ kpinkpɛn ɖé d’así nú yě, énɛ́ wɛ nyí yě ná kpé nukún dó mǐmɛ́jíninɔ agun ɔ tɔn wú. Ényí Klisánwun ɖé hu hwɛ syɛ́nsyɛ́n ɖé ɔ, Jehovah nɔ ɖó nukún ɖɔ mɛxó agun tɔn lɛ́ ní kpɔ́n ɖɔ é sixú lɛ́ kpo ɖo agun ɔ mɛ alǒ gbɔ a jí. Nǔ e yě nɔ kpɔ́n lɛ́ é ɖokpó wɛ nyí ɖɔ nǔ e mɛ ɔ wa nyi do é ka vɛ́ n’i nǔgbó nǔgbó a jí. É sixú cí ɖɔ é lɛ́ kɔ sín hwɛ tɔn lɛ́ gúdo ɖɔhun, amɔ̌, nǔ e é wa nyi do é ka vɛ́ n’i nǔgbó nǔgbó a? É ka kán ɖ’é jí bó ná gɔn hwɛ énɛ́ hu hweɖévonu a? Ényí gbɛ̌ nyanya lɛ́ dídó wɛ zɔ́n bɔ é hu hwɛ mɔ̌hun ɔ, é ka ɖo gbesisɔmɛ bó ná ɖó nǔ kancícá e é ɖó xá yě lɛ́ é nu a? Mɛxó agun tɔn lɛ́ nɔ xo ɖɛ, gbéjé kúnnuɖenú lɛ́ kpó nǔ e Biblu ɖɔ é kpó kpɔ́n, lobo nɔ wá gbéjé lěe nǔ cí nú nǔwanyidotɔ́ ɔ dó nǔ e é wa nyi do é wú é kpɔ́n. Énɛ́ gúdo ɔ, yě nɔ wá wá gbeta ɔ kɔn ɖɔ nǔwanyidotɔ́ ɔ sixú kpo ɖo agun ɔ mɛ alǒ gbɔ. Ðo ninɔmɛ ɖé lɛ́ mɛ ɔ, è ɖó ná ɖe mɛ ɔ sín agun mɛ.—1 Kɔ. 5:11-13.

13. Ényí è ɖe xɔ́ntɔn, alǒ hɛ̌nnumɔ mǐtɔn ɖé sín agun mɛ ɔ, linlin tɛ́ ka sixú jɛ ayi mǐtɔn mɛ wá jí?

¹³ Nɛ̌ jiɖe e mǐ ɖó dó mɛxó agun tɔn lɛ́ wú é ka sixú gbɔn tɛ́nkpɔ́n mɛ gbɔn? Ényí mɛ e è ɖe sín agun mɛ é ma nyí xɔ́ntɔn vívɛ́, alǒ hɛ̌nnumɔ mǐtɔn ɖé ǎ ɔ, é sixú bɔwǔ nú mǐ bɔ mǐ ná yí gbe nú gbeta e kɔn mɛxó agun tɔn lɛ́ wá é. Amɔ̌, mǐ ní ɖɔ ɖɔ xɔ́ntɔn vívɛ́ mǐtɔn ɖé wɛ nú mɛ ɔ. Mǐ sixú nɔ xo nǔ kpɔ́n ɖɔ mɛxó agun tɔn lɛ́ kún gbéjé kúnnuɖenú lɛ́ bǐ kpɔ́n ó, alǒ mǐ sixú jɛ kinkanbyɔ́ mǐɖée jí ɖɔ yě ka ɖɔ hwɛ lěe Jehovah ba gbɔn é dóó a jí. Étɛ́ ka sixú d’alɔ mǐ bɔ mǐ ná kpo ɖo linlin e sɔgbe é ɖó dó gbeta e kɔn yě wá é wú wɛ?

14. Ényí mɛxó agun tɔn lɛ́ wá gbeta ɔ kɔn ɖɔ è ɖó ná ɖe xɔ́ntɔn alǒ hɛ̌nnumɔ mǐtɔn ɖé sín agun mɛ ɔ, étɛ́ ka sixú d’alɔ mǐ?

¹⁴ É nyɔ́ ɖɔ mǐ ní flín ɖɔ mɛ ɖiɖe sín agun mɛ ɔ, Jehovah wɛ bló tuto tɔn b’ɛ nɔ wa ɖagbe nú agun ɔ, bó sixú lɛ́ wa ɖagbe nú hwɛhutɔ́ ɔ lɔmɔ̌. Ényí è lɔn bɔ mɛ e ma lɛ́ kɔ sín hwɛ tɔn lɛ́ gúdo ǎ é ɖé kpo ɖo agun ɔ mɛ ɔ, é sixú wa nǔ dó mɛ ɖěvo lɛ́ wú bɔ yě lɔ ná hu hwɛ. (Ga. 5:9) Gɔ́ ná ɔ, é sixú gɔn nukúnnú mɔ jɛ lěe hwɛ e é hu é syɛ́n sɔ é wú, bó sixú gɔn hwɛjijɔ e wú é ná bló hǔzúhúzú lɛ́ ɖo linlin kpó nǔwalɔ tɔn lɛ́ kpó sín akpáxwé, bɔ énɛ́ ná zɔ́n bɔ nǔ tɔn ná lɛ́ nyɔ́ Jehovah nukúnmɛ é wú mɔ nǔ jɛ. (Nǔt. 8:11) Mǐ sixú kú d’é jí ɖɔ ényí mɛxó agun tɔn lɛ́ ɖo gbígbéjé kpɔ́n wɛ ɖɔ è ná ɖe mɛɖé sín agun mɛ alǒ gbɔ ɔ, yě kún nɔ sɔ́ azɔ̌ énɛ́ dó d’ayihún ó. Yě nɔ mɔ nǔ jɛ wú ɖɔ hwɛɖɔtɔ́ e nɔ gbɛ ɖo Izlayɛ́li hwexónu tɔn lɛ́ é ɖɔhun ɔ, émí kún ɖo hwɛ ɖɔ wɛ ɖo “gbɛtɔ́ nyíkɔ mɛ” ó, loɔ ‘Jehovah nyíkɔ mɛ ɖɔ hwɛ dó wɛ’ émí ɖe.—2 Tan 19:6, 7.

LĚE JIÐE ÐÍÐÓ DÓ JEHOVAH WÚ DIN NƆ SƆ́ NǓ Ð’AYǏ NÚ MǏ NÚ SƆGÚDO GBƆN É

15. Étɛ́wú mǐ ka ɖó ná nɔ ɖeji dó alixlɛ́mɛ Jehovah tɔn lɛ́ wú din tawun hú ɖ’ayǐ tɔn?

¹⁵ Ée vivɔnu gbɛ élɔ́ tɔn ɖo sisɛkpɔ́ wɛ wunnáwúnná é ɔ, mǐ ɖó ná ɖeji dó lěe Jehovah nɔ wa nǔ lɛ́ gbɔn é wú hú ɖ’ayǐ tɔn. Étɛ́wú? Ðo ya ɖaxó ɔ hwenu ɔ, è sixú ɖe wě ɖěɖěe é sixú vɛ́ wǔ bɔ mǐ ná mɔ nǔ jɛ mɛ, alǒ vɛ́ wǔ bɔ mǐ ná xwedó lɛ́ é xá mǐ. É ɖo wɛn ɖɔ Jehovah kún ná ɖɔ xó nú mǐ mɛ ɖokpó ɖokpó tlɔlɔ lě ó. É nyɔ́ wa ɔ, é ná xlɛ́ ali mǐ gbɔn mɛ ɖěɖěe é sɔ́ ɖó nu mǐtɔn lɛ́ é gblamɛ. Hwenɛ́nu wɛ mǐ ná jɛ nǔ xo kpɔ́n dó alixlɛ́mɛ lɛ́ wú jí, alǒ jɛ nǔ élɔ́ kanbyɔ́ jí ǎ: ‘Jehovah gɔ́n jɛ́n alixlɛ́mɛ élɔ́ ka gosín dóó a, alǒ linlin nɔví e ɖo nukɔn nú mǐ lɛ́ é tɔn wɛ?’ A ka ná ɖeji dó Jehovah kpó tutoblónúnǔ tɔn kpó wú ɖo táan bǔnɔ énɛ́ mɛ a? Linlin e a nɔ ɖó dó alixlɛ́mɛ e tutoblónúnǔ ɔ nɔ ná din lɛ́ é wú é wú wɛ é ná sín. Ényí a nɔ ɖeji dó alixlɛ́mɛ e mǐ nɔ mɔ din lɛ́ é wú bó nɔ yá wǔ se tónú nú yě ɔ, a ná ɖibla lɛ́ wa nǔ ɖokpó ɔ ɖo ya ɖaxó ɔ hwenu.—Luk. 16:10.

16. Nɛ̌ jiɖe e mǐ ɖó dó hwɛɖiɖɔ Jehovah tɔn lɛ́ wú é ka sixú gbɔn tɛ́nkpɔ́n nú ɖo malínmálín mɛ gbɔn?

¹⁶ Nǔ ɖěvo e é ná nyɔ́ ɖɔ mǐ ní lin tamɛ d’é jí é wɛ nyí lěe Jehovah ná ɖɔ hwɛ gbɔn ɖo gbɛ élɔ́ sín vivɔnu é. Din hwɛ̌ ɔ, mǐ ɖo nukún ɖó wɛ ɖɔ mɛ tootóbú e ma ko ɖo Jehovah sɛn wɛ ǎ lɛ́ é, káká jɛ hɛ̌nnumɔ mǐtɔn nǔmaɖitɔ́ lɛ́ jí ní wá xo kpóɖó nú mǐ. Amɔ̌, ɖo Aamagedɔ́ni hwenu ɔ, Jehovah ná gbɔn Jezu jí bó ná wá gbeta gǔdo gúdo tɔn ɔ kɔn dó sɔgúdo yětɔn wú. (Mat. 25:31-33; 2 Tɛ. 1:7-9) Mǐdɛɛ lɛ́ ná sixú ɖɔ mɛ e Jehovah ná kú nǔbláwǔ ná lɛ́ é kpó mɛ e é ma ná kú nǔbláwǔ ná ǎ lɛ́ é kpó ǎ. (Mat. 25:34, 41, 46) Mǐ ka ná kpé wú bó ɖeji dó hwɛɖiɖɔ Jehovah tɔn lɛ́ wú a, alǒ yě ná nyí afɔklɛ́nnú nú mǐ? É ɖo wɛn ɖɔ mǐ ɖó ná ná hlɔ̌nhlɔ́n jiɖe e mǐ ɖó dó Jehovah wú é din, bɔ énɛ́ ná zɔ́n bɔ mǐ ná ɖeji dó wǔ tɔn bǐ mlɛ́mlɛ́ ɖo sɔgúdo.

17. Nɛ̌ mǐ ka ná ɖu le hwɛɖiɖɔ Jehovah tɔn lɛ́ tɔn ɖo gbɛ élɔ́ sín vivɔnu gbɔn?

¹⁷ Dǒ nukún lěe nǔ ná cí nú mǐ ɖo gbɛ yɔ̌yɔ́ Mawu tɔn mɛ hwenu e mǐ ná mɔ nǔ e mɛ hwɛɖiɖɔ Jehovah tɔn lɛ́ ná tɔ́n kɔ dó é mɛ kpɔ́n. Sinsɛn nǔvú sɔ́ ná ɖe ǎ, bɔ ajɔ̌wiwa e mɛ nukúnkɛndídó ɖe lɛ́ é sín xó ná fó; mɔ̌ jɛ́n acɛkpikpa e nɔ kp’acɛ gannaganna nú mɛ lɛ́, bó nɔ lɛ́ xo dǎká yě wǔ lɛ́ é lɔ sín xó ná fó bǐ gbídígbídí gbɔn é nɛ́. Azɔn, kpikpo kpó kú e mɛ vívɛ́ná mǐtɔn lɛ́ nɔ kú é kpó ɖě sɔ́ ná tíin ǎ. Satáan kpó awǒvi tɔn lɛ́ kpó sɔ́ ná sixú kpé wú bó wa nǔ dó gbɛtɔ́ lɛ́ wú ǎ nú xwe afatɔ́n. Nǔ nyanya e yě dɔn kɔn nyi ayǐ ɖó gǔfínfɔ́n yětɔn wútu lɛ́ é ɖě sɔ́ ná tíin ǎ. (Nǔɖé. 20:2, 3) É ná su nukún mǐtɔn mɛ tawun ɖɔ mǐ ɖeji dó lěe Jehovah nɔ wa nǔ lɛ́ gbɔn é wú!

18. Étɛ́ kpɔ́ndéwú Izlayɛ́li ví lɛ́ tɔn e xó è ɖɔ ɖo Kɛ́nsísɔ́ 11:4-6 kpó 21:5 kpó mɛ é ka sixú kplɔ́n mǐ?

¹⁸ Gbɛ yɔ̌yɔ́ Mawu tɔn mɛ ninɔ ka sixú zɔ́n bɔ mǐ ná mɔ tagba e ná tɛ́n jiɖe e mǐ ɖó dó lěe Jehovah nɔ wa nǔ lɛ́ gbɔn é wú é kpɔ́n wɛ a? Ði kpɔ́ndéwú ɔ, ɖ’ayǐ nǔ e jɛ hwenu e Izlayɛ́li ví lɛ́ tɔ́n sín kannumɔgbénu ɖo Ejípu bɔ é ná nɔ zaan é wú. Mɛɖé lɛ́ jɛ nǔ húnhún ɖɔ jí ɖó yě sɔ́ nɔ mɔ nǔɖuɖu e sín vǐví yě nɔ ɖu ɖo dɔ̌n é ǎ, bó tlɛ nɔ ylɔ́ mǎna e sín nǔ Jehovah sɔ́ nú yě é ɖɔ wamamɔnɔ núɖuɖu. (Xa Kɛ́nsísɔ́ 11:4-6; 21:5.) Mǐ lɔ ka sixú lin nǔ gbɔn mɔ̌ ɖo ya ɖaxó ɔ gúdo a? Mǐ tuun bǎ e mɛ mǐ ná w’azɔ̌ yi ɖó cóbó ná vɔ́ nǔ lɛ́ jlá ɖó, bɔ kpɛɖé kpɛɖé ɔ ayǐkúngban ɔ ná húzú palaɖísi é ǎ. Bóyá, é sixú byɔ́ azɔ̌ gěgé ɖo mǐ sí, bɔ gbɛ sixú lɛ́ vɛ́ wǔ kpɛɖé ɖo bǐbɛ́mɛ. Mǐ ka ná húnhún nǔ ɖɔ dó nǔ e Jehovah ná ná mǐ hwenɛ́nu lɛ́ é wú wɛ a? Nǔ ɖokpó za wě: Lě do nǔ e Jehovah nɔ sɔ́ nǔ tɔn nú mǐ lɛ́ é nɔ su nukún mǐtɔn mɛ sɔ din é ɔ, mɔ̌ do wɛ yě ná lɛ́ ɖibla su nukún mǐtɔn mɛ sɔ ɖo sɔgúdo.

19. Nɛ̌ a ka sixú sɛ sin xwe nú nǔ tají e ɖo xóta élɔ́ mɛ lɛ́ é gbɔn?

¹⁹ Lěe Jehovah nɔ wa nǔ lɛ́ gbɔn é nɔ sɔgbe hwebǐnu. Mǐ ɖó ná ɖó gǎnjɛwú mɔ̌hun. Mǐ ɖó ná lɛ́ ɖeji dó mɛ ɖěɖěe wú Jehovah ɖeji dó ɖɔ yě ná nɔ nukɔn nú nǔ lɛ́ bɔ è ná xwedó alixlɛ́mɛ émítɔn lɛ́ é wú. Ma wɔn xó élɔ́ e Jehovah ɖɔ gbɔn gbeyíɖɔ tɔn Ezayíi jí é gbeɖé ó: ‘Hlɔ̌nhlɔ́n ɖokpó e ná kpo nú mi ɔ wɛ nyí ɖɔ mi ná cí xwíí, bó ná ɖeji do wǔ ce.’—Eza. 30:15.