NǓ E MƐ WÍNNYÁWÍNNYÁ LƐ́ NƆ KANBYƆ́ LƐ́ É
Xɔ́ntɔnmɛninɔ: Akpáxwé 1: Un ko ɖo gbesisɔmɛ bo ná byɔ́ xɔ́ntɔn mɛ wɛ a?
Ðo xóta élɔ́ mɛ ɔ, mǐ ná ɖɔ xó dó nǔ élɔ́ lɛ́ jí
Étɛ́ ka nyí xɔ́ntɔnmɛninɔ?
Mɛɖé lɛ́ nɔ kpɔ́n xɔ́ntɔnmɛninɔ dó mɔ nǔ e nɔ dó awǎjijɛ lanmɛ nú mɛ é ɖé kpowun. Amɔ̌, ɖo xóta élɔ́ mɛ ɔ, “xɔ́ntɔnmɛninɔ” ɖo gesí dó hwenu e súnnu ɖé kpó nyɔ̌nu ɖé kpó nɔ zán ɖó kpɔ́, bo ná kpɔ́n ɖɔ émí ka ná sɔgbe xá émíɖée bo ná wlí alɔ a jí é wɛ. Hǔn, linlin ɖé wú wɛ è nɔ byɔ́ xɔ́ntɔn mɛ. É nyí ali e nu è nɔ ɖu wǎnyíyí e mɛ e kpó mɛ kpó ma ɖó mɛ̌ ɖokpó ɔ ǎ é nɔ ɖe xlɛ́ mɛ é sín vǐví ɖe e kpowun ǎ.
Hwɛhwɛ ɔ, xɔ́ntɔnmɛninɔ nɔ d’alɔ mɛ bɔ è nɔ wá gbeta ɖé kɔn: È ná wlí alɔ, alǒ è ná ɖó nǔ kancícá wǎnyíyí tɔn ɔ nu. Ényí a byɔ́ xɔ́ntɔn mɛ ɔ, a ɖó ná ɖo gbesisɔmɛ nú nǔ we énɛ́ lɛ́ bǐ.
Nǔ tají ɔ: Ényí a lin ɖɔ émí ɖo gbesisɔmɛ bo ná byɔ́ xɔ́ntɔn mɛ ɔ, a ɖó ná lɛ́ ɖo gbesisɔmɛ bo ná wlí alɔ.
Ényí mɛɖé byɔ́ xɔ́ntɔn mɛ bo ma ka ɖó linlin ɔ ɖɔ émí ná wlí alɔ ǎ ɔ, mɛ énɛ́ cí mɛ e ma ɖo azɔ̌ ba wɛ ǎ, bo ka yí gbe bo yi azɔ̌xwé ɖé bónú è ná kan nǔ byɔ́ ɛ é ɖɔhun
A ko ɖo gbesisɔmɛ bo ná byɔ́ xɔ́ntɔn mɛ wɛ a?
Xɔ́ntɔnmɛninɔ sixú tɔ́n kɔ dó alɔwlíwlí mɛ, énɛ́ wú ɔ, a ɖó ná lin tamɛ dó jijɔ ɖěɖěe a ɖó bɔ yě sixú wa ɖagbe nú xɔ́ntɔnmɛninɔ ɔ, alǒ hɛn nǔ gblé d’é wú lɛ́ é jí. Ði kpɔ́ndéwú ɔ, lin tamɛ dó nǔ élɔ́ lɛ́ e bɔ d’é wú é jí:
Kancícá e a ɖó xá xwédo towe é. Hwɛhwɛ ɔ, lěe a nɔ wa nǔ xá mɛjitɔ́ towe lɛ́ kpó nɔví towe lɛ́ kpó gbɔn, tají ɔ, hwenu e a ɖo xomɛsin jí é nɔ xlɛ́ lěe a ná wa nǔ xá mɛ e a ná da é gbɔn é.
Nǔgbódodó Biblu tɔn: “Mi ní jó mɛhɛndóxomɛ syɛ́nsyɛ́n bǐ, xomɛsin bǐ, majijɛ bǐ, jlɛɖiɖɔ bǐ, mɛzunzun bǐ, kpó nǔ ɖěvo e nɔ wa nǔ dó mɛ wú é bǐ kpó dó.”—Efɛ́zinu lɛ́ 4:31.
Kanbyɔ́ hwiɖée ɖɔ: ‘Mɛjitɔ́ ce lɛ́ kpó nɔví ce lɛ́ kpó ka ná ɖɔ ɖɔ un nɔ wa nǔ xá émí kpó sísí kpó a? Ényí tagba ɖé fɔ́n ɖo nyi kpó yě mɛ ɖé kpó tɛ́ntin ɔ, un ka nɔ kpé wú bo nɔ ɖɔ xó ɖo fífá mɛ a, alǒ xomɛ nɔ sin mì bɔ un nɔ ɖɔ jlɛ?’
Ényí a ma sixú ɖe ɖɛ gbemanɔkpɔ́ lɛ́ xá mɛjitɔ́ towe lɛ́ ǎ ɔ, a ka ná sixú kpé wú dóó bo wa mɔ̌ xá mɛ e a ná da é a?
Mɛɖée sísɔ́ dó sá vɔ̌. Ényí a wlí alɔ ɔ, é ná byɔ́ ɖɔ a ní nɔ sɔ́ ayi ɖó nǔ e mɛ e a da e nɔ yí wǎn ná lɛ́ é jí, bo ná nɔ wa yě hwɛhwɛ.
Nǔgbódodó Biblu tɔn: “Mi nú mɛ ɖokpó ɖokpó ní nɔ ba nǔ e ná hɛn le wá nú mɛ ɖěvo lɛ́ é, é ní ma nyí nǔ e ná hɛn le wá nú éɖésúnɔ é ó.”—1 Kɔlɛ́ntinu lɛ́ 10:24.
Kanbyɔ́ hwiɖée ɖɔ: ‘Un ka nɔ ba ɖɔ nǔ bǐ ní nɔ gbo dó ce jí hwebǐnu wɛ a? Mɛ ɖěvo lɛ́ ka nɔ mɔ ɖɔ un nɔ nɔ jlɛ̌ jí a? Ali tɛ́ lɛ́ nu un ka ko xlɛ́ ɖɔ hudó mɛ ɖěvo lɛ́ tɔn nɔ ɖu ayi mɛ nú mì hú gǎn hudó ce lɛ́ ɖe?’
Mɛɖéesɔ́hwe. Asú ɖagbe alǒ asi ɖagbe ɖé nɔ yí gbe nú nǔwanyido tɔn lɛ́, bo nɔ byɔ́ hwɛsɔ́kɛ dó nǔjɔnǔ mɛ.
Nǔgbódodó Biblu tɔn: “Mǐ mɛ bǐ wɛ nɔ wa nǔ nyi do hwɛhwɛ.”—Jaki 3:2.
Kanbyɔ́ hwiɖée ɖɔ: ‘Un ka nɔ yí gbe nú nǔwanyido ce lɛ́ nǔgbó nǔgbó a, alǒ un nɔ ba hwɛjijɔ? Ényí è ɖe wě xá mì dó fí e un ɖó ná bló hǔzúhúzú ɖe lɛ́ é wú ɔ, xomɛ nɔ sin mì wɛ a?’
Akwɛ́zínzán. Mɛ e nɔ kpé wú bo nɔ zán akwɛ́ tɔn ganjí é nɔ nyi alɔ nú nǔ e nɔ hɛn tagba wá hú gǎn ɖo xwédo mɛ lɛ́ e ɖokpó.
Nǔgbódodó Biblu tɔn: “Mɛ̌ ka ɖo mi mɛ bo ná jló ná gbá atɔxwɛ ɖokpó, bo ma ná to jínjɔ́n ayǐ hwɛ̌, bo lɛ́n akwɛ́ e é ná byɔ́ é, bo ná kpɔ́n ɖɔ émí ɖó akwɛ́ e ná kpé bɔ é ná fó é ǎ?”—Luki 14:28.
Kanbyɔ́ hwiɖée ɖɔ: ‘Un ka nɔ kpɔ́n akwɛ́ zán a, alǒ un nɔ ɖu axɔ́ hwɛhwɛ? Nɛ̌ un ka ko xlɛ́ ɖɔ un sixú zán akwɛ́ ganjí gbɔn?’
Ganjíninɔ ɖo gbigbɔ lixo. Ényí Kúnnuɖetɔ́ Jexóva tɔn wɛ nú we ɔ, a ɖó ná ɖó tuto Biblu kplɔ́nkplɔ́n tɔn ɖagbe ɖé, bo ná nɔ lɛ́ yi kplé klisánwun tɔn lɛ́ ɖo gbesisɔmɛ.
Nǔgbódodó Biblu tɔn: “Awǎjijɛnɔ wɛ nyí mɛ e tuun ɖɔ émí ɖó hudó Mawu tɔn lɛ́ é.”—Matíe 5:3.
Kanbyɔ́ hwiɖée ɖɔ: ‘Un ka nɔ dó gǎn bo ná kpo ɖo ganjí ɖo gbigbɔ lixo a? Nǔ e un nɔ wa bo nɔ vɛ́ kpó Mawu kpó lɛ́ é ka ɖo tají nú mì a, alǒ un nɔ jó nǔ ɖěvo lɛ́ dó bɔ yě nɔ yí tɛn ɖo yě sí?’
Nǔ tají ɔ: É hwe bǐ ɔ, mɛ e a da é jɛxá bo ná ɖó asú ɖagbe alǒ asi ɖagbe. Ényí a ɖo azɔ̌ wá wɛ syɛ́nsyɛ́n bo ná nyí mɛ mɔ̌hun ɔ, é ɖo wɛn ɖɔ, nǔ towe ná jɛ mɛ e ɖo nǔ ɖokpó ɔ wa wɛ é ɖé tɔn jí.