Linlin Mawu Tɔn Jɛn Ðíe À?

XÀ XÓJLAWEMA ɖebǔ. Kpɔ́n televiziɔn, alǒ ɖǒtó hladio. Adanuwiwa, ahwan kpo wɔ́nxixogbɛwu kpo sín xó gègě wɛ è nɔ sè bo nɔ mɔ! Lin tamɛ dó tagba hwiɖesunɔ tɔn lɛ jí. Vlafo a na ko ɖò wuvɛ̌ ɖaxó ɖé mɛ, ɖó azɔn wutu alǒ mɛvívɛ́ towe ɖé sixu ko kú. A sixu ɖó linlin ɖokpo ɔ kpo nya gbejinɔtɔ́ Jɔbu kpo. É ɖɔ ɖɔ è zé ‘ya dó nylɔ emi.’—Job 10:15, The Holy Bible in the Language of Today.

Kanbyɔ hwiɖee ɖɔ:

• Nǔ e Mawu lin dó nyɛ kpo gbɛtɔ́ lɛ kpo wu é jɛn ɖíe à?

• Fitɛ un ka sixu mɔ alɔdo ɖè bo na ɖeɖɛ tagba ce lɛ?

• Nukúnɖiɖo ɖé ka ɖè ɖɔ mǐ na wá mɔ fífá ɖò ayikúngban ɔ jí gbè ɖokpo à?

Biblu na sìnkɔn e sɔgbe é nú nùkanbyɔ enɛ lɛ.

BIBLU KPLƆ́N MƐ ÐƆ MAWU NA HƐN HUZUHUZU ELƆ LƐ WÁ AYIKÚNGBAN Ɔ JÍ.

“É na sunsun ɖasin bǐ sín nukún yetɔn mɛ; kú sɔ́ na tíìn ǎ, aluwɛ sɔ́ na tíìn ǎ, alěnina sɔ́ na tíìn ǎ, wuvɛ̌ mimɔ sɔ́ na tíìn ǎ.”—Nǔɖexlɛ́mɛ 21:4

“Sékunɔ na lɔ́n ɖi zungbɔ.”—Isaïe 35:6; Matie 11:5

“Nukúntuntɔnnɔ lɛ sín nukún na hun.”—Isaïe 35:5; Matie 21:14

“Mɛkúkú lɛ . . . na tɔ́n sín yɔdo yetɔn lɛ mɛ.”—Jaan 5:28, 29

“Mɛ e nɔ nɔ finɛ lɛ é ɖebǔ na ɖɔ: ‘Un ɖò azɔn jɛ wɛ’ ǎ.”—Isaïe 33:24

“Jinukún na kpé ayikúngban ɔ bǐ jí.”—Psaume 72:16

MƆ LÈ ÐÒ NǓ E BIBLU KPLƆN MƐ LƐ É MƐ

Ma yawu ɖɔ ɖɔ nǔ ɖěɖee xó è ɖɔ ɖò wexwɛ e wá yì lɛ é jí é nyí fanfún ɖé kpowun ó. Mawu d’akpá ɖɔ emi na bló nǔ enɛ, lobɔ Biblu ɔ ka tinmɛ lee é na bló ye gbɔn é.

Amɔ̌, Biblu ɔ lɛ́ ɖó lè ɖò ali ɖevo lɛ nu. É tlɛ ɖɔ lee a na ɖu vivǐ gbɛ̀ ɖagbe ɖé tɔn gbɔn ɖò dìn é. Lin tamɛ kpɛɖé dó nǔ e nɔ vɛ́ adɔ̌ we lɛ é kpo tagba towe lɛ kpo jí. Ye sixu nyí akwɛyózó, tagba xwédo tɔn lɛ, azɔn alǒ mɛvívɛ́ towe ɖé sín kú. Biblu ɔ hɛn ɔ, é na d’alɔ we bɔ a na ɖeɖɛ tagba enɛ lɛ, lobo na lɛ́ dó gbɔ nú we gbɔn sìnkɔn nina nú nùkanbyɔ elɔ lɛ ɖɔhun gblamɛ:

• Aniwu mǐ ka nɔ jiya?

• Nɛ̌ mǐ ka sixu ɖeɖɛ gbɛmɛ tagba lɛ gbɔn?

• Nɛ̌ mǐ ka sixu bló gbɔn bɔ xwédo mǐtɔn na ɖó awǎjijɛ?

• Etɛ ka nɔ jɛ dó mǐ wu ɖò kú mǐtɔn gudo?

• Mǐ ka na lɛ́vɔ wá mɔ mɛvívɛ́ mǐtɔn e kú lɛ é gbeɖé à?

• Nɛ̌ mǐ ka sixu gán jɛ wu ɖɔ Mawu na ɖè akpá e é dó dó sɔgudo wu lɛ é gbɔn?

Wema elɔ e xà wɛ a ɖè é xlɛ́ ɖɔ a na jló na tuùn nǔ e Biblu kplɔ́n mɛ lɛ é. Wema elɔ na d’alɔ we tawun. A na mɔ nùkanbyɔ akpáxwé lɛ tɔn ɖò dò ɖò wexwɛ e jí akpáxwé lɛ ɖè é. Kúnnuɖetɔ́ Jehovah tɔn lɛ nɔ ɖɔ xó ɖó kpɔ́ xá mɛ dó Biblu jí bo nɔ zán alɔ ɖé, é wɛ nyí nùkanbyɔ kpo xósin kpo, bɔ gbɛtɔ́ livi mɔkpan ko ɖu vivǐ tɔn. Mǐ ɖó nukún ɖɔ hwi lɔ na ɖu vivǐ tɔn. Mawu ni dó nú gǎn e dó wɛ a ɖè dìn bo na mɔ nukúnnú jɛ nǔ e Biblu kplɔ́n mɛ tawun é mɛ é.