Mɛ gègě sɔ́ nɔ yì nǔwiwa sinsɛn tɔn lɛ ǎ, ɖó ye nɔ mɔ alixlɛ́mɛ abǐ gbɔdónúmɛ ɖebǔ ɖò gbigbɔ sín alixo ɖò finɛ ǎ. Enyi mɔ̌ ɔ, etɛwu a ka ɖó na nɔ yì kplé Klisanwun tɔn Kúnnuɖetɔ́ Jehovah tɔn lɛ tɔn? Etɛ a ka na mɔ ɖò finɛ?

Awǎjijɛ e è nɔ mɔ ɖò gbɛtɔ́ wanyiyinɔ e nɔ keya nú mɛ lɛ é tɛntin é. Xwè kanweko nukɔntɔn ɔ mɛ ɔ, è bló tuto nú Klisanwun lɛ dó agun lɛ mɛ, bɔ ye nɔ kplé bo sɛ̀n Mawu, kplɔ́n Mawuxó ɔ lobo nɔ na kanmɛsyɛn yeɖée. (Eblée lɛ 10:24, 25) Ðó ye nɔ kplé ɖó kpɔ́ ɖò wanyiyi mɛ wutu ɔ, ye nɔ mɔ ɖɔ emi ɖò xɔ́ntɔn nugbǒ lɛ tɛntin, nɔví gbigbɔ tɔn yetɔn lɛ. (2 Tɛsalonikinu lɛ 1:3; 3 Jaan 14) Kpɔ́ndéwú yetɔn xwedó wɛ mǐ ɖè bo nɔ mɔ awǎjijɛ ye ɖɔhun.

Lè e è nɔ mɔ ɖò nugbodòdó Biblu tɔn lɛ kpinkplɔn bo zán mɛ é. Lee Biblu ɖɔ gbɔn é ɔ, sunnu, nyɔnu kpo yɔkpɔvu lɛ bǐ kpo nɔ kplé ɖó kpɔ́. Nùkplɔnmɛtɔ́ nǔwukpétɔ́ lɛ nɔ zán Biblu dó d’alɔ mǐ, bɔ mǐ nɔ ɖó ayi lee mǐ na zán nugbodòdó Biblu tɔn lɛ ɖò gbɛ̀ ayihɔngbe ayihɔngbe tɔn mǐtɔn mɛ gbɔn é wu. (Sɛ́nflínmɛ 31:12; Nɛɛmíi 8:8) Mǐ bǐ sixu ɖè nukúnɖiɖo Klisanwun tɔn mǐtɔn xlɛ́ gbɔn alɔɖiɖo ɖò hanjiji kpo xóɖɔɖókpɔ́ lɛ kpo mɛ gblamɛ.​—Eblée lɛ 10:23.

Nyɔna e è nɔ mɔ ɖó è hɛn nùɖiɖi e è ɖó nú Mawu é lidǒ wu é. Mɛsɛ́dó Pɔlu ɖɔ nú agun hwetɔnnu tɔn lɛ ɖokpo ɖɔ: “É jló mì ɖesu ɖɔ ma wá mɔ mi, . . . ɖɔ nyɛ kpo mi kpo na nɔ kpɔ́, bo na dó na akɔnkpinkpan mǐɖée. Nyɛ na na akɔnkpinkpan mi gbɔn nùɖiɖi ce gblamɛ, bɔ mi lɔ na na akɔnkpinkpan mì gbɔn nùɖiɖi mitɔn gblamɛ.” (Hlɔmanu lɛ 1:11, 12) Kpɔ́ninɔ hwɛhwɛ ɖò kplé lɛ jí xá nùɖitɔ́ hàtɔ́ mǐtɔn lɛ nɔ na hlɔnhlɔn nùɖiɖi kpo kú e mǐ kudeji bo na zán gbɛ̀ Klisanwun ɖɔhun é kpo.

Etɛwu a ma ka na sɔ ylɔ̌ elɔ bo yì kplé agun mǐtɔn tɔn e ja é bo mɔ nǔ enɛ lɛ kpo nukún towe ɖesu kpo ǎ? Mǐ na dó doo nú we kpo xomɛhunhun kpo. Vɔ̌nu wɛ kplé mǐtɔn lɛ nyí, mǐ nɔ yí agbǎnmɛkwɛ gbeɖé ǎ.

• Kpɔ́ndéwú tɛ jí kplé agun tɔn mǐtɔn lɛ ka junjɔn?

• Nɛ̌ mǐɖesunɔ lɛ ka sixu ɖu lè kplé Klisanwun tɔn mǐtɔn lɛ yiyi tɔn gbɔn?

Nú é tlɛ byɔ ɖɔ mǐ na ɖi zɔnlin gbɔn zun ɖaxó mɛ alǒ gbɛmɛ na bo ma nyɔ́ ǎ ɔ, mǐ nɔ yì kplé Klisanwun tɔn lɛ ɖò gbesisɔmɛ. Lee tagba gbɛmɛ tɔn lɛ kpo azɔ̌ wiwa kpo nɔ cikɔ nú mɛ sɔ é ɔ, nɛ̌ ka gbɔn bɔ Kúnnuɖetɔ́ Jehovah tɔn lɛ nɔ dó gǎn sɔmɔ̌ bo nɔ kplé kpo nùɖitɔ́ hàtɔ́ yetɔn lɛ kpo?

É nyɔ́ nú ɖagbe mɛ nunɔ mǐtɔn. “Mi nú mǐ na kpé nukún dó mǐɖée wu,” wɛ Pɔlu wlan, hwenu e é ɖò xó ɖɔ dó mɛ e kpo mǐ kpo nɔ kplé ɖò agun mɛ lɛ é wu wɛ é. (Eblée lɛ 10:24) Tinmɛ xógbe enɛ tɔn wɛ nyí ɖɔ “mǐ ni nɔ lin nǔ kpɔ́n kpo sɔxwixwe kpo” dó mǐɖée wu, bo tuùn mǐɖée ganji. Enɛ wutu ɔ xógbe mɛsɛ́dó ɔ tɔn lɛ na kanmɛsyɛn mǐ ɖɔ nǔ mɛ ɖě lɛ tɔn ɖó na nɔ byɔ lanmɛ nú mǐ. Enyi mǐ nɔ tɛnkpɔn bo na tuùn xwédo Klisanwun ɖevo lɛ tɔn ɔ, mǐ nɔ wá mɔ ɖɔ mɛɖé lɛ ɖò ye mɛ ko xò tagba mǐtɔn ɖɔhun lɛ zlɛ, bɔ enɛ sixu d’alɔ mǐ bɔ mǐ lɔ na ɖuɖeji.

É nɔ hɛn xɔ́ntɔn nyínyí mǐtɔn syɛn d’eji. Mɛ e kpo mǐ kpo nɔ kplé ɖò kplé mǐtɔn jí lɛ é nyí mɛtuùnmɛ kpowun ǎ, xɔ́ntɔn mǐtɔn adi wɛ ye nyí. Ðò hwe ɖevo lɛ nu ɔ, mǐ nɔ lɛ́ zán hwenu ɖó kpɔ́ ɖò ayiɖeɖayi e sɔgbe lɛ é kɔn. Lè tɛ gbɛ̌dido mɔhunkɔtɔn ka nɔ hɛn wá nú mǐ? Mǐ nɔ kplɔ́n bo tuùn lee mǐ xɔ akwɛ nú mǐɖée sɔ́ ɔ, bɔ enɛ nɔ hɛn gɛdɛ wanyiyi tɔn mǐtɔn syɛn d’eji. Enɛ wutu ɔ, enyi hagbɛ̌ mǐtɔn lɛ ɖò tagba lɛ mɛ ɔ, mǐ nɔ d’alɔ ye kpo jlǒ ɖagbe kpo, ɖó mǐ ko huzu xɔ́ntɔn vívɛ́ná lɛ wutu. (Nùnywɛxó 17:17, nwt) Gbɛ̌dido xá hagbɛ̌ agun mǐtɔn tɔn lɛ bǐ, nɔ xlɛ́ ɖɔ mǐ nɔ “kpé nukún dó [mǐ]ɖée wu.”​—1 Kɔlɛntinu lɛ 12:25, 26.

Mǐ na kanmɛsyɛn we ɖɔ a ni sɔ́ mɛ e ɖò jlǒ Mawu tɔn wà wɛ lɛ é dó ɖó xɔ́ntɔn towe lɛ na. A na mɔ xɔ́ntɔn mɔhunkɔtɔn lɛ ɖò Kúnnuɖetɔ́ Jehovah tɔn lɛ tɛntin. Kɛnklɛn, ma lɔn nú nǔ ɖebǔ dó afɔgblɛ̌gblɛ̌ afɔ mɛ nú we bonu a gɔn gbɛ̌ dó xá mǐ ó.

• Etɛwutu é ka nyí lè nú mǐ ɖɔ mǐ ni nɔ yì kplé Klisanwun tɔn lɛ?

• Hwetɛnu a ka jló na wá nɔ kpɔ́ xá mǐ ɖò kplé lɛ jí?

Nǔ e è nɔ mɔ ɖò Klisanwun nukɔntɔn lɛ sín kplé jí tawun lɛ é wɛ nyí han, ɖɛ, Biblu xixa kpo xóɖiɖɔ d’eji kpo. (1 Kɔlɛntinu lɛ 14:26) Nǔ mɔhunkɔtɔn pɛ́ɛ́ wɛ a sixu ɖó nukún na mɔ ɖò kplé mǐtɔn lɛ jí.

Nùkplɔnmɛ lɛ junjɔn Biblu jí bo nɔ d’alɔ mɛ. Ðò aklunɔzán gblamɛ fifo ɔ, agun ɖokpo ɖokpo nɔ kplé bo nɔ sè xóɖiɖɔ junjɔn Biblu jí cɛju 30 tɔn ɖé dó nǔ e Biblu ɖɔ dó gbɛ̀ mǐtɔn kpo hwenu e mǐ ɖò gbɛ̀ nɔ ɖè wɛ ɔ kpo wu é. È byɔ mǐ mɛ bǐ ɖɔ mǐ ni nɔ xwedó wemafɔ lɛ xixa ɖò Biblu mǐɖesu tɔn mɛ. Ðò xóɖiɖɔ ɔ gudo ɔ, è nɔ bló “Atɔxwɛ” Kplɔnkplɔn nú ganxixo ɖokpo, bɔ è nɔ byɔ ɖò mɛ bǐ sí ɖɔ ye ni ɖó alɔ ɖò xó e ɖɔ ɖó kpɔ́ dó akpáxwé e kplɔ́n wɛ è ɖè ɖò Atɔxwɛ e è nɔ kplɔ́n ɖò kplé jí é mɛ é mɛ. Xóɖɔɖókpɔ́ enɛ ɔ nɔ d’alɔ mǐ bɔ mǐ nɔ xwedó alixlɛ́mɛ Biblu tɔn lɛ ɖò gbɛzán mǐtɔn mɛ. Xota ɖokpo ɔ wɛ è nɔ kplɔ́n ɖò agun mǐtɔn e hugǎn 110 000 ɖò ayikúngban ɔ bǐ jí lɛ é mɛ.

É nɔ d’alɔ mǐ bɔ mǐ nɔ hɛn nǔwukpikpé mɛkplɔnkplɔn tɔn mǐtɔn kpɔ́n te d’eji. Mǐ nɔ lɛ́ kplé ɖò hwelɛkɔ ɖokpo ɖò aklunɔzán gblamɛ lɛ nú tuto akpáxwé atɔnnɔ ɖé, bɔ è nɔ ylɔ ɖɔ Gbɛzán Klisanwun Tɔn kpo Sinsɛnzɔ́ Mǐtɔn Kpo. Kplé enɛ nɔ junjɔn nǔ ɖěɖee nɔ tɔ́n sunmɛ sunmɛ ɖò Kplé Gbɛzán kpo Sinsɛnzɔ́ kpo Tɔn Sín Azɔ̌wema ɔ mɛ é jí. Kplé ɔ sín akpáxwé nukɔntɔn e nyí Dɔkun Mawuxó ɔ Tɔn ɖé Lɛ é nɔ d’alɔ mǐ bɔ akpáxwé Biblu tɔn e agun ɔ ko xà jɛ nukɔn é nɔ zawě nú mǐ. Enɛ gudo ɔ, Zě Hwiɖée Bǐ Jó nú Mawuxóɖiɖɔzɔ́ Ɔ nɔ bɔ d’ewu, bɔ wazexlɛ́ lɛ nɔ ɖ’emɛ bo nɔ xlɛ́ lee è na ɖɔ xó dó Biblu jí xá mɛ ɖevo lɛ gbɔn é. Wěɖexámɛtɔ́ ɖé nɔ ɖɔ nǔ e wu é ɖó ayi lɛ é bo nɔ d’alɔ mǐ bonu mǐ na hɛn nǔwukpikpé nùxixa kpo xóɖiɖɔ tɔn mǐtɔn kpo kpɔ́n te. (1 Timɔtée 4:13) Akpáxwé gudo tɔn ɔ wɛ nyí Klisanwun Gbɛ̀ Zinzan. É nɔ xlɛ́ lee è na zán nugbodòdó Biblu tɔn lɛ ɖò gbɛzán mɛtɔn ayihɔngbe ayihɔngbe tɔn mɛ gbɔn é. Xóɖɔɖókpɔ́ nùkanbyɔ kpo xósin nina kpo tɔn nɔ ɖ’emɛ bo nɔ zɔ́n bɔ nukúnnúmɔjɛnǔmɛ e mǐ ɖó dó Biblu jí é nɔ gɔ́ngɔ́n d’eji.

Enyi a wá kplé mǐtɔn lɛ ɔ, mǐ ɖeji ɖɔ nùkplɔnmɛ Biblu tɔn e è nɔ xwlé mɛ lɛ é na jiwǔ nú we.​—Ezayíi 54:13.

• Etɛ a ka sixu ɖó nukún na mɔ ɖò kplé Kúnnuɖetɔ́ Jehovah tɔn lɛ tɔn jí?

• Kplé mǐtɔn ɖětɛ a ka jló na wá ɖò malin-malin mɛ?

A ka ɖó ayi lee Kúnnuɖetɔ́ Jehovah tɔn lɛ nɔ sɔnǔ gbɔn ɖò kplé agun tɔn yetɔn lɛ hwenu ɖò fɔtóo e ɖò wema elɔ mɛ lɛ é wu à? Etɛwu mǐ ka nɔ keya nú acɔ́biba kpo nǔsisɔ mǐtɔn lɛ kpo sɔmɔ̌?

Bo na dó ɖè sísí xlɛ́ Mawu mǐtɔn. Nugbǒ wɛ ɖɔ nǔ e mǐ nyí ɖò nukúnta ɔ kɛɖɛ wɛ Mawu nɔ kpɔ́n ǎ. (1 Samuwɛli 16:7) É ɖò mɔ̌ có, hwenu e mǐ nɔ kplé bo na sɛ̀n ɛ é ɔ, jlǒ nùjɔnǔ tɔn mǐtɔn wɛ nyí ɖɔ mǐ ni xlɛ́ sísí e mǐ ɖó nú Mawu kpo Mawu sɛntɔ́ hàtɔ́ mǐtɔn lɛ kpo é. Enyi mǐ xwè hwɛɖɔtɔ́ ɖé sín nukɔn ɖò hwɛɖɔxɔsa ɔ, mǐ na jló na sɔnǔ bo na xlɛ́ ɖɔ mǐ ɖó sísí nú tɛn e mɛ é ɖè é. Mɔ̌ ɖokpo ɔ, lee mǐ nɔ sɔnǔ gbɔn wá kplé lɛ ɔ nɔ xlɛ́ sísí e mǐ ɖó nú “Hwɛɖɔtɔ́ gbɛ̀ ɔ bǐ tɔn” Jehovah Mawu, kpo fí e mǐ nɔ sɛ̀n ɛ ɖè é kpo é.​—Bǐbɛ̌mɛ 18:25.

Bo na xlɛ́ nugbodòdó e mǐ nɔ xwedó ɖò gbɛmɛ lɛ é. Biblu byɔ Klisanwun lɛ ɖɔ ye ni nɔ sɔnǔ “ɖò yɛ̌yi mɛ, ɖò jlɛ̌ jí.” (1 Timɔtée 2:9, 10) È sɔnǔ “ɖò jlɛ̌ jí” ɔ wɛ nyí ɖɔ è ni nɔ zɔ nú avɔ e sixu dɔn ayi mɛ lɛ tɔn wá mǐ jí, bo nɔ jla ta nú mɛ, nɔ ba axi, kabǐ nɔ ɖè mɛ̌ xlɛ́ lɛ é didó. Mɔ̌ ɖokpo ɔ, nǔsisɔ “ɖò yɛ̌yi mɛ” ɔ nɔ d’alɔ mǐ bɔ mǐ nɔ cyan avɔ e nyɔ́ kpɔ́n cobo ma ka cí kluyɔɔ alǒ zɛ̀kpá ǎ lɛ é. Nugbodòdó enɛ lɛ sixu zɔ́n bɔ mǐ na ba avɔ alɔkpa e mǐ na cyan bo dó lɛ é kpò ǎ. Enyi mǐ na bo ma tlɛ kɛ nu bo ɖɔ xó ǎ ɔ, nǔsisɔ mǐtɔn e nyɔ́ kpɔ́n bo jɛ acɔ́ ɔ sixu na “sísí . . . nùkplɔnmɛ e ɖɔ xó dó Mawu Mɛhwlɛngantɔ́ mǐtɔn wu ɔ” bo “kpa susu nú Mawu.” (Titu 2:10; 1 Piyɛ́ɛ 2:12) Enyi mǐ nɔ sɔnǔ ganji bo nɔ wá kplé lɛ ɔ, é na zɔ́n bɔ nukún e mɛ ɖevo lɛ nɔ dó kpɔ́n sinsɛn-biblo Jehovah tɔn na ɔ na gbɔn vo.

Ma kpɔ́n dó nǔsisɔ towe wu kpowun bo gɔn kplé wá ɖò Kpléxɔ Axɔsuɖuto ɔ tɔn mɛ ó. É byɔ ɖɔ avɔ mǐtɔn lɛ ni vɛ́ axi alǒ ɖò zo jí cobo jɛxa, mɛ́, bo nyɔ́ kpɔ́n ǎ.

• Nɛ̌ lee mǐ nɔ sɔnǔ gbɔn hwenu e mǐ ɖò Mawu sɛ̀n wɛ ɔ ka nyí nùjɔnǔ sɔ?

• Nugbodòdó tɛ lɛ mǐ ka nɔ xwedó bo nɔ cyan nǔ e mǐ na dó lɛ é?

Enyi a ko ɖò Biblu kplɔ́n xá Kúnnuɖetɔ́ Jehovah tɔn ɖé wɛ ɔ, a sixu ko nɔ tɛnkpɔn bo nɔ gbéjé nǔ e mi na kplɔ́n lɛ é kpɔ́n jɛ nukɔn nú nùkplɔnkplɔn ɖokpo ɖokpo. Enyi a na ɖu lè kplé agun tɔn lɛ tɔn ganji ɔ, é na nyɔ́ ɖɔ a ni nɔ wà nǔ ɖokpo ɔ cobo nɔ yì. Enyi a sɔ́ aca ɖagbe enɛ ɔ, a na mɔ lè ɖ’emɛ tawun.

Ba hwenu kpo fí e a na nɔ kplɔ́n nǔ ɖè é kpo. Hwetɛnu ayi towe ka nɔ nɔ fí ɖokpo hugǎn? Ayitéhɔnnu có a na bɛ́ kézezɔ́ ɔ wɛ à, alǒ gbadanu hwenu e vǐ lɛ ko yì xɔ gudo é? Enyi a na bo ma sixu kplɔ́n nǔ nú hwenu gègě ǎ hǔn, ba hwenu nabi e a na sixu nɔ zán ɔ bo tɛnkpɔn bo ma lɔn nú nǔ ɖebǔ nɔ jɛmɛ ó. Ba fí e ɖò xwii é, cí hladio, televiziɔn, kpo alokan akpomɛ tɔn kpo bo na dó ɖè nǔ e na fɛ́ ayi towe lɛ é bǐ síìn. Ðɛxixo cobo jɛ nǔ kplɔ́n jí na d’alɔ we bɔ a na ɖè linkpɔ́n kéze ɔ tɔn lɛ sín ayi mɛ bo na sixu sɔ́ ayi ɖó Mawuxó ɔ jí.​—Filipunu lɛ 4:6, 7.

Ðǒ wuntun nǔ taji lɛ bo sɔnǔ ba na xósin. Ðò bǐbɛ̌mɛ ɔ, tɛnkpɔn bo mɔ nukúnnú jɛ xota ɔ mɛ. Lin tamɛ dó xota nùkplɔnkplɔn ɔ tɔn jí, ɖǒ ayi nǔ e dɔn xotalá ɖokpo ɖokpo ɖó bǔ kpo xota ɔ kpo é wu, bo gbéjé lee fɔtóo kpo nùkanbyɔ nùflínmɛ tɔn lɛ kpo ɖè xó taji lɛ tɔ́n gbɔn é kpɔ́n. Enɛ gudo hǔn, xà akpáxwé ɖokpo ɖokpo bo ba xósin nùkanbyɔ lɛ tɔn. Ba wemafɔ Biblu tɔn e è ɖè lɛ é bo xà lobo lin nǔ kpɔ́n dó lee ye nɔ gudo nú nùkplɔnmɛ ɔ gbɔn é wu. (Mɛsɛ́dó 17:11) Enyi a mɔ xósin nùkanbyɔ ɖé tɔn hǔn, zɛ xwi dó glɔ na, alǒ ɖǒ wuntun xógbe klewun e na d’alɔ we bɔ a na flín xósin ɔ é ɖò akpáxwé ɔ mɛ. Enɛ gudo ɔ, ɖò kplé jí ɔ, a sixu zé alɔ bo na xósin klewun ɖé dó xógbe towe ɖesu mɛ, enyi a jló ɔ nɛ.

Enyi a nɔ gbéjé xota vovo e jí mǐ na ɖɔ xó ɖó kpɔ́ dó ɖò kplé lɛ jí ɖò aklunɔzán gbla ɖokpo ɖokpo mɛ é kpɔ́n ɔ, linlin yɔyɔ̌ lɛ na zɔ́n bɔ “dɔkun” ɖee nǔ e a tuùn dó Biblu wu lɛ é nyí é na sukpɔ́ d’eji.​—Matie 13:51, 52.

• Aca tɛ a ka sixu sɔ́ ɖ’ayǐ bo na nɔ sɔnǔ nú kplé lɛ?

• Nɛ̌ a ka sixu sɔnǔ bo na nɔ na xósin ɖò kplé lɛ jí gbɔn?

Sín hwexónu ɖokpoo wɛ Jehovah ko jló ɖɔ xwédo ɖokpo ɖokpo ni nɔ zán hwenu ɖó kpɔ́, nɔ dó gǎn bo vɛ́ kpo emi kpo, bo nɔ hɛn bǔninɔ yetɔn syɛn d’eji. (Sɛ́nflínmɛ 6:6, 7) Enɛ wɛ zɔ́n bɔ Kúnnuɖetɔ́ Jehovah tɔn lɛ nɔ ɖè hwenu ɖó vo ɖò aklunɔzán gbla ɖokpo ɖokpo mɛ nú xwédo yetɔn bo nɔ sɛ̀n Mawu ɖó kpɔ́, ɖɔ xó ɖó kpɔ́ dó hudo gbigbɔ tɔn yetɔn lɛ jí, ɖò ninɔmɛ ɖagbe ɖé mɛ. Hwiɖokpo na bo ɖ’ayǐ ɔ, a sixu zán hwenu mɔhunkɔ ganji bo sɛkpɔ Mawu d’eji, gbɔn xota Biblu tɔn e jló we é kpinkplɔn gblamɛ.

É nɔ nyí hwenu e è na sɛkpɔ Jehovah d’eji ɔ. “Mi sɛkpɔ Mawu; enɛ ɔ é na sɛkpɔ mi.” (Jaki 4:8) Enyi mǐ nɔ kplɔ́n nǔ ganji dó mɛ alɔkpa e Jehovah nyí é kpo nǔwiwa tɔn lɛ kpo wu ɖò Xó tɔn Biblu ɔ mɛ ɔ, mǐ na tuùn i d’eji. Alixo e bɔwǔ bɔ mi na dó bɛ́ sinsɛn-biblo xwédo tɔn ɔ ɖokpo wɛ nyí ɖɔ, mi ni nɔ zán hwenu ɖé dó xà Biblu ɖó kpɔ́ d’aga, vlafo mi sixu xwedó tuto Kplé Gbɛzán kpo Sinsɛnzɔ́ kpo Tɔn aklunɔzán gblamɛ ɔ tɔn. È sixu ko ɖè akpáxwé Biblu xixa ɔ tɔn ɖé nú hagbɛ̌ xwédo ɔ tɔn ɖokpo ɖokpo, bɔ enɛ gudo ɔ, mɛ bǐ sixu ɖɔ xó ɖó kpɔ́ dó nǔ e é kplɔ́n mɛ é jí.

É nɔ nyí hwenu e hagbɛ̌ xwédo ɔ tɔn lɛ na sɛkpɔ yeɖée d’eji ɔ. Asú kpo asì kpo lɛ, kabǐ mɛjitɔ́ kpo vǐ lɛ kpo nɔ hɛn bǔninɔ yetɔn syɛn d’eji, enyi ye nɔ kplɔ́n Biblu ɖò xwédo ɔ mɛ ɔ nɛ. É ɖó na nyí hwenu awǎjijɛ kpo fífá kpo tɔn, hwenu e nyɔ́ hugǎn ɖò aklunɔzán gbla ɔ mɛ é. Mɛjitɔ́ lɛ sixu cyan xota e nyɔ́ bɔ è na ɖɔ xó ɖó kpɔ́ d’eji lɛ é sɔgbe xá xwè vǐ lɛ tɔn, vlafo é sixu nyí xota ɖé lɛ ɖò Atɔxwɛ kpo wema mǐtɔn ɖevo lɛ kpo mɛ, alǒ ɖò tɛn ɛntɛnɛti tɔn mǐtɔn jw.org jí. Mi sixu ɖɔ xó dó nǔ e nɔ kpé vǐ mitɔn lɛ ɖò wemaxɔmɛ lɛ é kpo lee ye na ɖu ɖò ye jí gbɔn ɔ kpo wu. Etɛwu mi ma ka na kpɔ́n tuto televiziɔn jí tɔn JW Télédiffusion tɔn (tv.jw.org) ɖé, bɔ enɛ gudo ɔ, mǐ na ɖɔ xó ɖó kpɔ́ d’eji à? Mi sixu nɔ ɖu vivǐ han e è na jì ɖò kplé lɛ é kpinkplɔn tɔn bo ɖu nùjlómɛnú klewun ɖé ɖò sinsɛn-biblo xwédo tɔn ɔ gudo.

Hwenu titewungbe enɛ zinzan ɖò aklunɔzán gbla lɛ bǐ mɛ dó sɛ̀n Jehovah ɖò kpɔ́ na d’alɔ mɛ bǐ ɖò xwédo ɔ mɛ, bɔ mi na mɔ awǎjijɛ ɖò Mawuxó ɔ kpinkplɔn mɛ lobɔ Mawu ka na dó nú gǎndido mitɔn tawun.​—Ðɛhan 1:1-3.

• Nɛ̌ ka gbɔn bɔ mǐ nɔ ɖè hwenu ɖó vo nú sinsɛn-biblo xwédo tɔn?

• Nɛ̌ mɛjitɔ́ lɛ ka sixu bló gbɔn bɔ hwenu enɛ ɔ na nyí awǎjijɛnú nú mɛ lɛ bǐ ɖò xwédo ɔ mɛ?

Nɛ̌ ka gbɔn bɔ awǎjijɛ ɖò mɛ elɔ lɛ sín nukúnta sɔmɔ̌? Kpléɖókpɔ́ mǐtɔn lɛ ɖokpo jí wɛ ye ɖè. Mawu sɛntɔ́ hwexónu tɔn e Mawu byɔ ɖɔ ye ni nɔ kplé ɖó kpɔ́ azɔn atɔn ɖò xwè ɖokpo ɖokpo mɛ lɛ é ɖɔhun ɔ, akpàkpà nɔ sɔ́ mǐ lɔ nú kpléɖókpɔ́ mǐtɔn lɛ. (Sɛ́nflínmɛ 16:16) Kpléɖókpɔ́ atɔn wɛ mǐ ɖó xwewu xwewu. Kpléɖókpɔ́ lɛdo tɔn, azǎn ɖokpo wɛ è nɔ bló na, bɔ è nɔ bló azɔn wè. Kpléɖókpɔ́ ɖaxó, azǎn atɔn wɛ éyɛ nɔ xɔ. Nɛ̌ mǐ ka nɔ ɖu lè kpléɖókpɔ́ enɛ lɛ tɔn gbɔn?

Ye nɔ hɛn nɔví nyínyí Klisanwun tɔn mǐtɔn syɛn d’eji. Lee Izlayɛli-ví lɛ nɔ jɛ awǎ bo nɔ kpa susu nú Jehovah ɖò kpléɖókpɔ́ lɛ jí gbɔn é ɔ, mɔ̌ jɛn mǐ lɔ nɔ ɖu vivǐ sinsɛn-biblo ɖó kpɔ́ tɔn ɖò nǔwiwa kpligidi lɛ hwenu ɔ nɛ. (Ðɛhan 26:12; 111:1) Kpléɖókpɔ́ enɛ lɛ nɔ hun ali bɔ mǐ nɔ xò gò bo nɔ lɛ́ kplé xá Kúnnuɖetɔ́ e gosin agun alǒ tò ɖevo mɛ lɛ é. Mɛ ɖokpo ɖokpo nɔ hɛn nùɖuɖu tɔn wá bɔ mǐ nɔ ɖu nǔ ɖò kpléɖókpɔ́ ɔ tɛnmɛ ɖò gbɔjɛ hwenu, bɔ enɛ nɔ zɔ́n bɔ mǐ nɔ ɖu vivǐ xɔ́ntɔn nyínyí tɔn ɖò nǔwiwa gbigbɔ tɔn enɛ lɛ hwenu. (Mɛsɛ́dó 2:42) Ðò kpléɖókpɔ́ enɛ lɛ hwenu ɔ, mǐɖesunɔ nɔ mɔ wanyiyi e dɔn “kplékplé nɔví lɛ bǐ tɔn” ɖó kpɔ́ ɖò gbɛ̀ ɔ mɛ é.​—1 Piyɛ́ɛ 2:17, nwt.

Ye nɔ d’alɔ mǐ bɔ mǐ nɔ yì nukɔn ɖò gbigbɔ sín akpáxwé. Izlayɛli-ví lɛ lɔ nɔ j’awǎ ɖó ye nɔ “mɔ nǔ jɛ Mawuxó” e è nɔ tinmɛ nú ye ɖò kpléɖókpɔ́ mɔhun lɛ tɛnmɛ ɔ mɛ. (Nɛɛmíi 8:8, 12) Mǐɖesunɔ tuùn ɖɔ nùkplɔnmɛ Biblu tɔn e mǐ nɔ mɔ ɖò kpléɖókpɔ́ mǐtɔn lɛ jí lɛ é xɔ akwɛ. Tuto kpléɖókpɔ́ lɛ bǐ tɔn nɔ jinjɔn xota Biblu tɔn ɖé jí. Gbɔn xóɖiɖɔ, xómaɖɔ kpo vɔ̌-bló (reconstitutions) lɛ kpo gblamɛ ɔ, mǐ nɔ kplɔ́n lee mǐ na wà jlǒ Mawu tɔn gbɔn ɖò gbɛ̀ mǐtɔn mɛ é. Hwenu e mǐ sè mɛ e ɖò gbɛzán Klisanwun tɔn sín wuvɛ̌ mɔ wɛ cobo ka ɖò gǎn dó wɛ, bo na nɔ gbeji nú Mawu é sín tan lɛ é ɔ, mǐ nɔ mɔ akɔnkpinkpan. Ðò kpléɖókpɔ́ ɖaxó lɛ jí ɔ, nùkpinkpɔn-dó-kplɔ́n nǔ lɛ nɔ d’alɔ mǐ bɔ mǐ nɔ dó nukún nǔ e jɛ bɔ Biblu ɖɔ lɛ é mɛ kpɔ́n b’ɛ nɔ cí ɖɔ mǐ mɔ gannaganna ɖɔhun, bɔ ye nɔ kplɔ́n nǔ mǐ. Ðò kpléɖókpɔ́ lɛ jí ɔ, mɛ e jló na ɖexlɛ́ ɖɔ emi ko sɔ́ emiɖée jó nú Mawu lɛ é nɔ bló baptɛm.

• Nɛ̌ ka gbɔn bɔ kpléɖókpɔ́ lɛ nɔ nyí hwenu awǎjijɛ tɔn?

• Nɛ̌ a ka sixu ɖu lè kpléɖókpɔ́ lɛ yiyi tɔn gbɔn?

Azǎn klewun ɖé jɛ nukɔn nú kú Jezu tɔn ɔ, é ɖɔ jí: “È na jla [Axɔsuɖuto] Mawu tɔn sín Wɛnɖagbe gbɔn gbɛ̀ ɔ bǐ mɛ, bonu é na nyí kúnnuɖiɖe nú gbɛtɔ́ lɛ bǐ. Enɛ ɔ gudo ɔ, gbɛ̀ ɔ na vɔ.” (Matie 24:14) Amɔ̌, nɛ̌ è ka na wà azɔ̌ Mawuxóɖiɖɔ gbɔn gbɛ̀ ɔ bǐ mɛ tɔn elɔ yì fó gbɔn? Gbɔn afɔdomɛ e Jezu sɔ́ ɖ’ayǐ nú mǐ hwenu e é ɖò ayikúngban jí ɔ xwixwedó gblamɛ wɛ.​—Luki 8:1.

Mǐ nɔ tɛnkpɔn bo nɔ yì gbɛtɔ́ lɛ gɔ́n ɖò xwé yetɔn lɛ gbè. Jezu kplɔ́n azɔ̌ ahwanvu tɔn lɛ bonu ye na jla wɛnɖagbe ɔ sín xwé ɖé gbè jɛ xwé ɖé gbè. (Matie 10:11-13; Mɛsɛ́dó 5:42; 20:20) È ɖè ayikúngban tawun e jí wɛnɖagbejlatɔ́ xwè kanweko nukɔntɔn ɔ tɔn enɛ lɛ na ɖɔ Mawuxó ɖè ɔ nú ye. (Matie 10:5, 6; 2 Kɔlɛntinu lɛ 10:13) Mɔ̌ ɖokpo ɔ, è bló tuto nú azɔ̌ Mawuxóɖiɖɔ tɔn mǐtɔn ganji ɖò égbé, bo ɖè fí e agun ɖokpo ɖokpo na wà azɔ̌ ɖè ɔ n’i. Enɛ ɔ d’alɔ mǐ bɔ mǐ nɔ xwedó gbeɖiɖe Jezu tɔn e ɖɔ “mǐ ni jla togun ɔ bǐ, bo ɖekúnnu” ganji é.​—Mɛsɛ́dó 10:42.

Mǐ nɔ dó gǎn bo nɔ yì gbɛtɔ́ lɛ gɔ́n ɖò fí ɖebǔ e è sixu mɔ ye ɖè é. Jezu lɛ́ jó xlɛ̌ nyì ayǐ nú mǐ, bo nɔ ɖɔ Mawuxó nú gbɛtɔ́ lɛ ɖò agbawungba, ɖi xutó kabǐ ɖò sɛ́tɔ̀ e nu mɛ gègě nɔ wá ɔ. (Maki 4:1; Jaan 4:5-15) Mǐ lɔmɔ̌ nɔ ɖɔ xó nú gbɛtɔ́ lɛ dó Biblu wu ɖò fí ɖebǔ e mǐ kpéwú ɖè é: ɖò ali lɛ jí, ajɔ̌watɛn lɛ, hunglintɛn lɛ, gbɔjɛtɛn lɛ, kabǐ alokan jí. Mǐ nɔ lɛ́ ɖekúnnu nú mɛ e ɖò xwé mǐtɔn kpá lɛ é, azɔ̌gbɛ́ lɛ, azɔ̌mɛvigbɛ́ lɛ, kpo mɛtuùnmɛ mǐtɔn lɛ kpo hwenu e ali tɔn hun nú mǐ é. Gǎndido mǐtɔn lɛ bǐ ɖò kpɔ́ ɔ ko zɔ́n bɔ gbɛtɔ́ livi mɔkpan ɖò ayikúngban ɔ bǐ jí ko sè ‘wɛnɖagbe hwlɛngán tɔn’ ɔ.​—Ðɛhan 96:2.

A ka tuùn mɛɖé, bo jló na má wɛnɖagbe Axɔsuɖuto Mawu tɔn ɔ tɔn xá kpo nǔ e wɛn enɛ ɔ na hɛn wá nú ye ɖò sɔ é kpo à? Ma hɛn wɛn nukúnɖiɖo tɔn elɔ nú hwiɖokpo ó. Yawǔ má ɛ xá ye lee a kpéwú gbɔn é!

• “Wɛnɖagbe” tɛ mǐ ka ɖó na jla?

• Nɛ̌ Kúnnuɖetɔ́ Jehovah tɔn lɛ ka nɔ xwedó kpɔ́ndéwú Jezu tɔn dó ɖɔ Mawuxó ɔ gbɔn?

Xógbe “gbexosin-alijitɔ́” ɔ nɔ yawǔ dó gesí mɛ e yì fí yɔyɔ̌ ɖé jɛ nukɔn bo hun ali nú mɛ ɖevo lɛ é. Jezu cí gbexosin-alijitɔ́ ɖé ɖɔhun, ɖó è sɛ́ ɛ dó ayikúngban jí bonu é na wà azɔ̌ gbɛxɔnúmɛ tɔn bo hun ali hwlɛngán tɔn nyite. (Matie 20:28) Égbé ɔ, ahwanvu tɔn lɛ nɔ zé afɔ dó afɔdo tɔn mɛ, bo nɔ zán hwenu gègě dó kplɔ́n nǔ mɛ ɖevo lɛ bonu ye na huzu ahwanvu, lee ye kpéwú gbɔn é. (Matie 28:19, 20) Mɛɖé lɛ ko kpéwú bo wà nǔ e mǐ nɔ ylɔ ɖɔ azɔ̌ gbexosin-alijitɔ́ tɔn é.

Gbexosin-alijitɔ́ ɔ wɛnɖagbejlatɔ́ hwebǐnu tɔn wɛ. Kúnnuɖetɔ́ Jehovah tɔn lɛ bǐ wɛ nyí wɛnɖagbejlatɔ́. É ɖò mɔ̌ có, mɛɖé lɛ ko bló tuto yetɔn bo nyí gbexosin-alijitɔ́ hwebǐnu tɔn, bo nɔ zán ganxixo 70 ɖò azɔ̌ Mawuxóɖiɖɔ tɔn ɔ mɛ sunmɛ sunmɛ. Bo na dó sixu bló enɛ ɔ, mɛ gègě ko ɖè hwenu e ye nɔ zán ɖò agbazazɔ́ yetɔn mɛ é kpò. È ko ɖè mɛ ɖevo lɛ bonu ye na wà azɔ̌ gbexosin-alijitɔ́ titewungbe tɔn tɔn ɖò fí e è ɖó hudo wɛnjlatɔ́ Axɔsuɖuto ɔ tɔn lɛ tɔn ɖè hugǎn é, bɔ ye nɔ ɖè ganxixo 130 alǒ hú mɔ̌ ɖó vo nú sinsɛnzɔ́ ɔ sunmɛ sunmɛ. Gbexosin-alijitɔ́ lɛ nɔ zán gbɛzán jlɛ̌ jí tɔn bo nɔ ganjɛ Jehovah wu ɖɔ é na na dandannú gbɛmɛ tɔn lɛ emi. (Matie 6:31-33; 1 Timɔtée 6:6-8) Mɛ e ma sixu nyí gbexosin-alijitɔ́ hwebǐnu tɔn ǎ lɛ é sixu wà azɔ̌ gbexosin-alijitɔ́ alɔgɔtɔ́ tɔn tɔn hwenu e ye kpéwú dó ɔ, bo na ɖɔ Mawuxó nú ganxixo 30 alǒ 50 ɖò sun ɖokpo mɛ.

Wǎn yí nú Mawu kpo gbɛtɔ́ lɛ kpo wɛ nɔ sísɛ́ gbexosin-alijitɔ́ ɖé. Ði Jezu ɖɔhun ɔ, mǐ nɔ mɔ ɖɔ ninɔmɛ mɛ gègě tɔn blawu ɖò égbé. (Maki 6:34) Amɔ̌, mǐ ɖó nukúnnúmɔjɛnǔmɛ e sixu d’alɔ ye dìn, bo na na ye nukúnɖiɖo nùjɔnǔ tɔn nú sɔgudo é. Wǎn yí nú nɔzo wɛ nɔ sísɛ́ gbexosin-alijitɔ́ ɖé bɔ é nɔ sɔ́ xomɛnyínyɔ́ dó zán hwenu kpo hlɔnhlɔn tɔn kpo dó d’alɔ mɛ ɖevo lɛ ɖò gbigbɔ lixo. (Matie 22:39; 1 Tɛsalonikinu lɛ 2:8) Enɛ nɔ zɔ́n bɔ nùɖiɖi tɔn nɔ lidǒ, bɔ é nɔ sɛkpɔ Mawu d’eji bo nɔ mɔ awǎjijɛ gègě.​—Mɛsɛ́dó 20:35.

• Nɛ̌ a ka sixu tín azɔ̌ gbexosin-alijitɔ́ tɔn mɛ gbɔn?

• Etɛ ka nɔ sísɛ́ mɛɖé lɛ bɔ ye nɔ nyí gbexosin-alijitɔ́ hwebǐnu tɔn?

Nùkplɔnmɛ yɛhwexɔsuɖuto ɔ tɔn ko nyí wuntun Kúnnuɖetɔ́ Jehovah tɔn lɛ tɔn. Wemaxɔmɛ bunɔ lɛ tíìn nú mɛ e nɔ zán hwenu yetɔn bǐ dó jla Axɔsuɖuto ɔ na lɛ é, bonu ye na dó sixu “wà mɛsɛntɔ́ Mawu tɔn sín azɔ̌ [yetɔn] ganji.”​—2 Timɔtée 4:5.

Wemaxɔmɛ Sinsɛnzɔ́ Gbexosinalijitɔ́ Tɔn. Enyi gbexosin-alijitɔ́ hwebǐnu tɔn ɖé wà azɔ̌ enɛ ɔ nú xwè ɖokpo gudo ɔ, è nɔ ylɔ ɛ nú wemaxɔmɛ azǎn ayizɛ́n tɔn ɖé. È sixu bló wemaxɔmɛ enɛ ɖò Kpléxɔ Axɔsuɖuto ɔ tɔn e sɛkpɔ ɛ é ɖé mɛ. Nǔ e wu wemaxɔmɛ enɛ ɔ tíìn é wɛ nyí ɖɔ, é na d’alɔ gbexosin-alijitɔ́ ɔ bɔ é na sɛkpɔ Jehovah, bo na lɛ́ kpé nǔ wu d’eji ɖò akpáxwé sinsɛnzɔ́ ɔ tɔn lɛ bǐ mɛ, lobo na lɛ́ kpó ɖò sinsɛnzɔ́ tɔn wà wɛ kpo gbejininɔ kpo.

Wemaxɔmɛ nú Wɛnɖagbejlatɔ́ Axɔsuɖuto ɔ Tɔn Lɛ. Wemaxɔmɛ enɛ ɔ, sun wè wɛ è nɔ bló na, bɔ è nɔ kplɔ́n azɔ̌ gbexosin-alijitɔ́ ɖěɖee ko mɔ nǔ kpɔ́n, bo ɖò gbesisɔmɛ bo na jó xwé yetɔn dó bo na yì d’alɔ ɖò fí ɖebǔ e è ɖó hudo yetɔn ɖè lɛ é. Mɔ̌ mɛ ɔ, ye nɔ xwedó kpɔ́ndéwú Wɛnɖagbejlatɔ́ ɖaxó hugǎn e wà devizɔ́ ɖò ayikúngban jí kpɔ́n é, Jezu Klisu tɔn bo nɔ ɖɔ: “Nyɛ na yì, sɛ́ mì dó!” (Ezayíi 6:8; Jaan 7:29) Ðó ye na sɛ̀ tɛn bo na lín dó xwé yetɔn wutu ɔ, é sixu byɔ ɖɔ ye na sɔgbe xá gbɛzinzan fí e ye na yì é tɔn. Aca, lee ayi mɛ nɔ nɔ é, kpo nùɖuɖu lɛ kpo sixu gbɔn vo bǐ sésé nú nǔ e ko má ye lɛ é. É tlɛ sixu lɛ́ byɔ ɖɔ ye ɖó na kplɔ́n gbè ɖevo. Wemaxɔmɛ enɛ ɔ nɔ d’alɔ nɔví sunnu tlɛnnɔ lɛ, nɔví nyɔnu tlɛnnɔ lɛ, gɔ́ nú asú kpo asì kpo lɛ, bonu ye na tɛnkpɔn bo ɖó jijɔ Klisanwun tɔn e sín hudo ye na ɖó ɖò azɔ̌ yetɔn kɔn lɛ é. É nɔ lɛ́ d’alɔ ye bonu ye na tɛnkpɔn bo ɖó nǔwukpikpé e na zɔ́n bɔ Jehovah kpo tutoblonunu tɔn kpo na kpó ɖò ye zán wɛ lɛ é. Mɛ ɖěɖee ɖó xwè bɛ́sín 23 jɛ 65 lɛ é wɛ nɔ yì wemaxɔmɛ enɛ ɔ.

Wemaxɔmɛ Biblu Kpinkplɔn Watchtower Galadi Tɔn. Ðò Ebléegbe mɛ ɔ, tinmɛ “Galadi” tɔn wɛ nyí “Kɔ́ta Kúnnuɖiɖe tɔn.” Sín hwenu e è ɖó Galadi ayǐ ɖò 1943 é ɔ, gbɛtɔ́ nǔ hú 8 000 wɛ ko yí kúnnuɖewema wemaxɔmɛ enɛ ɔ tɔn, bɔ è sɛ́ ye dó ɖi mɛsɛ́dó lɛ, bonu ye na ɖekúnnu “kaka yì fí e gbɛ̀ ɔ kponu ɖó é” kpodo ɖuɖeji ɖaxó kpan. (Mɛsɛ́dó 13:47) Hwenu e mɛ e yí kúnnuɖewema enɛ ɔ lɛ é wá Pérou dó nukɔn é ɔ, agun ɖebǔ ɖò finɛ ǎ. Dìn ɔ, agun e ɖò finɛ é ko hugǎn 1 000. Hwenu e mɛsɛ́dó mǐtɔn lɛ bɛ́ azɔ̌ ɖò Japon é ɔ, Kúnnuɖetɔ́ e ɖò tò ɔ mɛ lɛ é yì wǒ ǎ. Amɔ̌ dìn ɔ, ye ko hú 200 000. Ðò sun atɔ́ɔ́n e ye nɔ dó kplɔ́n nǔ ɖò Galadi lɛ é mɛ ɔ, ye nɔ kplɔ́n Mawuxó ɔ céɖécéɖé tɔn. È nɔ ylɔ mɛ e nyí gbexosin-alijitɔ́ titewungbe tɔn alǒ mɛsɛ́dó lɛ é, mɛ e nɔ wà azɔ̌ ɖò alaxɔ mɛ lɛ é, alǒ nukúnkpénuwutɔ́ lɛdo tɔn lɛ wá wemaxɔmɛ mɔhun. Wemaxɔmɛ enɛ ɔ nɔ d’alɔ ye bɔ azɔ̌ e è nɔ wà gbɔn gbɛ̀ ɔ bǐ mɛ é nɔ yì ganji.

• Aniwu Wemaxɔmɛ Sinsɛnzɔ́ Gbexosin-alijitɔ́ tɔn ka tíìn?

• Wemaxɔmɛ nú Wɛnɖagbejlatɔ́ Axɔsuɖuto ɔ tɔn lɛ ɔ, mɛ̌ mɛ̌ e ka sixu yì?