Xónusɔ́ɖóte Akpáxwé 14gɔ́ ɔ Tɔn

Klisanwun nukɔntɔn lɛ funfún wɛnɖagbe Axɔsuɖuto ɔ tɔn gbɔn fí e lín hugǎn ɖò ayikúngban ɔ jí lɛ é. Jezu ɖɔ fí e ye na jla wɛnɖagbe ɔ gbɔn lɛ é nú ye, bo lɛ́ d’alɔ ye ɖò nùjiwǔ linu bɔ ye kplɔ́n nǔ mɛ lɛ dó gbè mɛ lɛ tɔn lɛ mɛ. Jehovah na ye akɔnkpinkpan kpo hlɔnhlɔn kpo bɔ ye ɖu ɖò yadonumɛ syɛnsyɛn lɛ jí.

Jezu sɔ́ susu Jehovah tɔn xlɛ́ mɛsɛ́dó Jaan ɖò nǔmimɔ ɖé mɛ. Ðò nǔmimɔ ɖevo mɛ ɔ, Jaan mɔ Axɔsuɖuto jixwé tɔn b’ɛ ɖu ɖò Satáan jí, bo sú kún dó nú acɛkpikpa tɔn kaka sɔyi. Jaan mɔ Jezu b’ɛ nyí Axɔsu bo ɖò acɛ kpa wɛ, é kpo mɛ 144 000 lɛ kpo. Jaan lɛ́ mɔ bɔ ayikúngban ɔ bǐ huzu palaɖisi ɖé, bɔ mɛ e ɖ’eji lɛ é bǐ ɖò Jehovah sɛ̀n wɛ ɖò fífá mɛ, ɖò bǔ.