NǓKPLƆNKPLƆN 47
A ka Ðò Gbesisɔmɛ Bo Na Bló Baptɛm À?
Biblu kplɔnkplɔn towe zɔ́n bɔ a ko kplɔ́n nǔ gegě dó Jehovah wu. Mɔ̌ ɖokpo ɔ, a ko bló huzuhuzu ɖé lɛ bá dó zán nǔ e a kplɔ́n lɛ é. É ɖò mɔ̌ có, é sixu sín hwɛjijɔ ɖé wu bɔ a mɔ ɖɔ emi kún ko ɖò gbesisɔmɛ, bo na zé emiɖée jó nú Jehovah bá bló baptɛm ó. Nǔkplɔnkplɔn elɔ na ɖɔ xó dó nǔ e nɔ gbò kpò nyi ali jí nú mɛ gegě, bɔ ye ma nɔ bló baptɛm ǎ é ɖé lɛ wu, bo na lɛ́ ɖɔ xó dó lee a sixu ɖu ɖò ye jí gbɔn é jí.
1. Bǎ tɛ mɛ a ka ɖó na tuùn nǔ dó Biblu jí yì ɖó cobo na bló baptɛm?
Cobonu a na bló baptɛm ɔ, a ɖó na “tuùn nǔgbo ɔ bǐ dégbédégbé.” (1 Timɔtée 2:4) Tinmɛ enɛ tɔn wɛ nyí ɖɔ nǔkanbyɔ Biblu tɔn lɛ bǐ sin xósin jɛn a na tó tuùn hwɛ̌ cobo na bló baptɛm ǎ. Klisanwun e bló baptɛm sín hwenu línlín ɖíe lɛ é tlɛ kpò ɖò nǔ kplɔ́n wɛ. (Kolosinu lɛ 1:9, 10) Amɔ̌, a ɖó na mɔ nukúnnú jɛ nǔkplɔnmɛ dodó Biblu tɔn lɛ mɛ. Mɛxo agun tɔn lɛ na d’alɔ we, bɔ a na kpɔ́n ɖɔ emi ka tuùn nǔ dó Jehovah kpo Biblu kpo wu ganji à jí.
2. Afɔ tɛ lɛ mɔ̌ a ka ɖó na ɖè cobá bló baptɛm?
Cobonu a na kpéwú bo na bló baptɛm ɔ, a ɖó na “lɛkɔ sín hwɛ [towe] lɛ gudo, bo wá Mawu gɔ́n.” (Xà Mɛsɛ́dó 3:19.) Tinmɛ enɛ tɔn wɛ nyí ɖɔ, nǔ e a wà nyi dò wá yì lɛ é bǐ vɛ́ nú we tawun, bɔ a byɔ Jehovah ɖɔ é ni sɔ́ hwɛ kɛ emi. Tinmɛ tɔn wɛ lɛ́ nyí ɖɔ a gbɛ́ nǔwalɔ nyanya lɛ bǐ gbídígbídí, bo kánɖeji bo na zán gbɛ̀ lee Mawu ba gbɔn é. Gɔ́ na ɔ, a ɖó na nyí wɛnjlatɔ́ e ma ko bló baptɛm ǎ é, bo na nɔ ɖ’alɔ ɖò azɔ̌ agun tɔn lɛ mɛ, gbɔn kplé lɛ yiyi kpo wɛn ɔ jijla kpo gblamɛ.
3. Etɛwu a ma ka ɖó na lɔn nú xɛsiɖiɖi na dɔn we dó gudo ǎ?
Mɛɖé lɛ nɔ ɖi xɛsi ɖɔ emi kún na kpéwú bo ɖè akpá e emi dó nú Jehovah é ó. Nǔgbo wɛ, a na wá wà nǔ nyi dò hweɖelɛnu. Sunnu kpo nyɔnu kpo gbejinɔtɔ́ ɖěɖee xó Biblu ɖɔ lɛ é lɔ tlɛ wà nǔ nyi dò. Amɔ̌, Jehovah nɔ ɖó nukún ɖɔ mɛsɛntɔ́ emitɔn lɛ ni nyí mɛ maɖóblɔ̌ ǎ. (Xà Ðɛhan 103:13, 14.) Nú a nɔ wà nǔ e wu a kpé é bǐ ɔ, é nɔ víví n’i! É na d’alɔ we. Nǔgbo ɔ, Jehovah na jiɖe mǐ ɖɔ nǔ ɖebǔ ‘kún sixu ɖè mǐ ɖó vo nú wanyiyi e emi ɖexlɛ́ mǐ é ó.’—Xà Hlɔmanu lɛ 8:38, 39.
BA DÒ NÚ NǓ D’EJI
Mǐ ni gbéjé lee Jehovah tuùntuùn ganji, kpo gbeyiyi nú alɔdó tɔn kpo sixu d’alɔ we, bɔ a na ɖu ɖò nǔ ɖebǔ e na gbò kpò nyi ali jí nú we, bɔ a ma na bló baptɛm ǎ lɛ é jí gbɔn é kpɔ́n.
4. Kplɔ́n bo tuùn Jehovah ganji
Bǎ tɛ mɛ a ka ɖó na tuùn Jehovah yì ɖó cobá bló baptɛm? A ɖó na tuùn i ganji bo na yí wǎn n’i, bo na lɛ́ jló na nyɔ́ nukún tɔn mɛ. Xò VIDEO ɔ bá kpɔ́n lee Biblu kplɔntɔ́ e gbɔn gbɛ̀ ɔ bǐ mɛ lɛ é ko wà mɔ̌ gbɔn é. Enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
Ðò video ɔ mɛ ɔ, etɛ ka d’alɔ mɛɖé lɛ bɔ ye ɖò gbesisɔmɛ nú baptɛm?
Xà Hlɔmanu lɛ 12:2, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
A nɔ xò nǔ kpɔ́n dó nǔ e Biblu kplɔ́n mɛ lɛ é wu wɛ à? Alǒ, a nɔ kanbyɔ hwiɖée ɖɔ Kúnnuɖetɔ́ Jehovah tɔn lɛ jɛn ka ɖò nǔgbo ɔ kplɔ́n mɛ wɛ à jí wɛ à?
Enyi mɔ̌ wɛ ɔ, etɛ a ka sixu wà?
5. Ðu ɖò nǔ ɖěɖee sixu gbò kpò nyi ali jí nú we lɛ é jí
Nú mǐ wá gbeta ɔ kɔn bo na zé mǐɖée jó nú Jehovah, bá bló baptɛm ɔ, mǐ mɛ bǐ wɛ nɔ ɖó nǔ e nɔ gbò kpò nyi ali jí nú mǐ lɛ é. Nú a na mɔ kpɔ́ndéwú tɔn ɖé hǔn, xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
Ðò video ɔ mɛ ɔ, nǔ e nɔ gbò kpò nyi ali jí nú mɛ é tɛ lɛ jí Narangerel ka ɖó na ɖu ɖè bá dó sɛn Jehovah?
Nɛ̌ wǎn yí nú Jehovah ka d’alɔ ɛ, b’ɛ ɖu ɖò nǔ enɛ lɛ é gbò kpò nyi ali jí n’i é jí gbɔn?
Xà Nǔnywɛxó 29:25 kpo 2 Timɔtée 1:7 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Etɛ ka nɔ na akɔ́nkpinkpan mǐ bɔ mǐ nɔ ɖu ɖò nǔ e nɔ gbò kpò nyi ali jí nú mǐ lɛ é jí?
6. Ðeji dó alɔdó Jehovah tɔn wu
Jehovah na d’alɔ we bɔ a na nyɔ́ nukún tɔn mɛ. Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
Ðò video ɔ mɛ ɔ, etɛ ka zɔ́n bɔ Biblu kplɔntɔ́ ɔ dɔn yonu dó gudo dó baptɛm blobló wu?
Etɛ ka d’alɔ ɛ b’ɛ na hlɔnhlɔn jiɖe e é ɖó dó Jehovah wu é?
Xà Ezayíi 41:10, 13, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Etɛwu a ka sixu kúdeji ɖɔ, a hɛn ɔ, a na ɖè akpá e a dó bo zé hwiɖée jó nú Mawu é?
7. Wǎn e Jehovah yí nú we é ni lɛ́ sù nukún towe mɛ d’eji
Lě dò e a lin tamɛ dó bǎ e mɛ Jehovah yí wǎn nú we yì ɖó é jí sɔ é ɔ, mɔ̌ dò wɛ é na sù nukún towe mɛ yì ɖó, bɔ a na lɛ́ ba hugǎn bo ná sɛn ɛ kaka sɔyi. Xà Ðɛhan 40:6, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Nyɔna Jehovah tɔn tɛ lɛ hwɛ ka yí wǎn na tawun?
Gbeyiɖɔ Jelemíi yí wǎn nú Jehovah kpo xó tɔn kpo; gɔ́ na ɔ, wǔ e è jɔ ɛ bɔ nyikɔ Jehovah tɔn ɖò ta tɔn é lɛ́ sù nukún tɔn mɛ tawun. É ɖɔ: ‘Nú xó ɖé tɔ́n sín nu towe mɛ bo jɛ tó ce mɛ lě ɔ, tlolo jɛn un nɔ wɔ ɖu; xó towe nɔ dó xomɛhunhun nú mì, bo nɔ na awǎjijɛ mì. Jehovah, Mawu Nǔbǐwukpétɔ́, nyikɔ towe wɛ ɖò wǔ ce.’ (Jelemíi 15:16) Mi ɖɔ xó ɖó kpɔ́ dó nǔkanbyɔ elɔ lɛ jí:
Etɛwu é ka nyí wǔjɔmɛ bǔnɔ ɖé ɖɔ è ni nyí Kúnnuɖetɔ́ Jehovah tɔn?
A ka jló na bló baptɛm bo na nyí Kúnnuɖetɔ́ Jehovah tɔn à?
Nǔɖe ka hɛn we ɖó te dó mɔ̌ wiwa wu wɛ à?
Etɛ a ka lin ɖɔ emi ɖó na wà, bá dó sixu kpéwú bo na bló baptɛm?
MƐÐÉ LƐ ÐƆ: “Un nɔ ɖi xɛsi ɖɔ un kún sixu kpéwú bo wà nǔ ɖěɖee sín akpá un na dó, hwenu e un na bló baptem é é bǐ ó.”
Mɔ̌ wɛ nǔ nɔ cí nú hwi lɔ à?
ETƐ LƐ A KA KPLƆ́N?
Kpo alɔdó Jehovah tɔn kpo ɔ, a hɛn ɔ, a na ɖu ɖò nǔ e nɔ gbò kpò nyi ali jí nú mɛ lɛ é bǐ jí.
Vɔ̌gbɔnji
Bǎ tɛ mɛ a ka ɖó na tuùn nǔ dó Biblu jí yì ɖó cobo na bló baptɛm?
Huzuhuzu tɛ lɛ a ka ɖó na bló cobá bló baptɛm?
Etɛwu a ma ka ɖó na lɔn nú xɛsiɖiɖi na dɔn we dó gudo ǎ?
KÍJÉ
Kpɔ́n nǔ e jí gbeta e kɔn a wá bo na bló baptɛm é ɖó na jinjɔn é.
Kpɔ́n lee a na ɖu ɖò wuvɛ̌ tawun tawun ɖěɖee sixu dɔn we dó gudo lɛ é jí gbɔn é.
Kpɔ́n lee nya ɖé ɖu ɖò nǔ taji e gbò kpò nyi ali jí n’i, bonu é ma bló baptɛm ó lɛ é jí, bɔ é kpá ɛ gbɔn é.
‘Etɛwu A ka Ðò Baptɛm Blobló Sɔ́ Dó Gbɛ̀ Asá Jí Kan Na Wɛ?’ (1:10)
Ðò bǐbɛ̌mɛ ɔ, nya e nɔ nyí Ataa é xò nǔ kpɔ́n dó baptɛm blobló wu. Kpɔ́n nǔ e d’alɔ ɛ b’ɛ jó nǔxokpɔ́n dó, bo ɖè afɔ taji enɛ é.