NǓKPLƆNKPLƆN 38
Gbɛ̀ E Mawu Na We É Ni Sù Nukún Towe Mɛ
Ðó mǐ ɖò gbɛ̀ wutu ɔ, nǔ ɖagbeɖagbe gegě wɛ mǐ sixu wà bo lɛ́ ɖu vivǐ yetɔn. Enyi mǐ na bo tlɛ ɖò tagba lɛ mɛ ɔ, mǐ sixu ɖu vivǐ nǔɖe lɛ tɔn ɖò gbɛ̀ ɔ mɛ. Nɛ̌ mǐ ka sixu xlɛ́ Jehovah ɖɔ gbɛ̀ e é na mǐ é sù nukún mǐtɔn mɛ gbɔn? Hwɛjijɔ taji tɛ wu mǐ ka ɖó na wà mɔ̌?
1. Etɛwu gbɛ̀ ka ɖó na sù nukún mǐtɔn mɛ?
Gbɛ̀ ɖó na sù nukún mǐtɔn mɛ, ɖó nǔnina ɖé wɛ é nyí sín Tɔ́ mǐtɔn wanyiyinɔ ɔ Jehovah gɔ́n. É “gɔ́n wɛ gbɛ̀ ɔ jɔ sín,” enɛ wɛ nyí ɖɔ é wɛ dá nǔ e ɖò gbɛ̀ ɔ mɛ lɛ é bǐ. (Ðɛhan 36:10) “É wɛ nɔ na gbɛ̀, bo nɔ na funfún kpodo nǔ bǐ kpo gbɛtɔ́ lɛ.” (Mɛsɛ́dó 17:25, 28) Jehovah nɔ na mǐ nǔ e sín hudo mǐ ɖó bo na nɔ gbɛ̀ lɛ é. É nɔ lɛ́ bló bɔ mǐ nɔ ɖu gbɛ̀ víví.—Xà Mɛsɛ́dó 14:17.
2. Nɛ̌ mǐ ka sixu xlɛ́ Jehovah ɖɔ gbɛ̀ e é na mǐ é sù nukún mǐtɔn mɛ gbɔn?
Sín hwenu e nɔ towe mɔ xò towe é ɔ, Jehovah nɔ kpé nukún dó wǔtu towe. Ðò ɖɛ e Mawu sɔ́ dó Xó tɔn mɛ é ɖé mɛ ɔ, mɛsɛntɔ́ tɔn lɛ ɖokpo ɖɔ n’i ɖɔ: “Hwenu e kɛ́n jɛ nɔ ce wu é jɛn a ko mɔ mì.” (Ðɛhan 139:16) Gbɛ̀ towe xɔ akwɛ tawun nú Jehovah. (Xà Matie 10:29-31.) Enyi mɛ ɖebǔ jló bo ɖó nǔ gbɛ̀ mɛɖé tɔn nu ɔ, nú é tlɛ nyí gbɛ̀ mɛ ɔ ɖesunɔ tɔn ɔ, é na vɛ́ n’i tawun.a (Tíntɔ́n 20:13) Enyi é ma byɔ ɖó mɔ̌ ǎ, bonu mǐ sɔ́ gbɛ̀ mǐtɔn ɖó axɔ́ nu, alǒ enyi mǐ ma wà nǔ e mǐ ɖó na wà dó nya xɛ ɖò gbɛ̀ mɛ ɖevo lɛ tɔn jí é ǎ ɔ, é na lɛ́ vɛ́ nú Jehovah. Enyi mǐ kpé nukún dó gbɛ̀ mǐtɔn wu, bo lɛ́ ɖó sísí nú gbɛ̀ mɛ ɖevo lɛ tɔn ɔ, é xlɛ́ ɖɔ nǔnina jiwǔ e gbɛ̀ nyí é sù nukún mǐtɔn mɛ nɛ.
BA DÒ NÚ NǓ D’EJI
Gbějé ali e nu a sixu xlɛ́ ɖɔ gbɛ̀ e Mawu na we é sù nukún towe mɛ ɖè é ɖé lɛ kpɔ́n.
3. Kpé nukún dó lanmɛ towe wu
Ðó mǐ d’akpá nú Jehovah ɖɔ mǐ na wà jlǒ tɔn hwebǐnu wutu ɔ, mǐ nɔ zán gbɛ̀ mǐtɔn blebǔ dó sɛn ɛ. É cí nǔ ɖɔ mǐ nɔ sɔ́ wǔjɔnú mǐtɔn lɛ xwlé Mawu vɔsanú ɖé ɖɔhun. Xà Hlɔmanu lɛ 12:1, 2, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Etɛ ka ɖó na sísɛ́ we bɔ a na kpé nukún dó lanmɛ towe wu?
Ali tɛ lɛ nu mɔ̌ a ka sixu wà mɔ̌ ɖè?
4. Gbò kpò nyi ali jí nú wǔ gbigblé alǒ kú
Biblu dó wusyɛn lanmɛ nú mǐ ɖɔ mǐ ni nyi alɔ nú nǔwalɔ ɖěɖee nyí awovínú lɛ é. Xò VIDEO ɔ bá kplɔ́n nǔ e a sixu wà bo na nɔ ayijayǐ mɛ é ɖé lɛ.
Xà Nǔnywɛxó 22:3, enɛ gudo hǔn, mi ɖɔ xó ɖó kpɔ́ dó lee hwi kpo mɛ ɖevo lɛ kpo sixu nɔ ayijayǐ mɛ ɖò ninɔmɛ elɔ lɛ mɛ gbɔn é jí:
Ðò xwégbe.
Ðò azɔ̌ towe jí.
Hwenu e a ɖò lanmɛ ba kpɔ́n wɛ é.
Hwenu e a dó mɔ̌to, kɛkɛ́ alǒ ɖò kunkun wɛ é.
5. Ðǒ sísí nú gbɛ̀ vǐ e è ma ko jì ǎ é Tɔn
Davidi zán xógbe lómílómí lɛ dó tinmɛ ɖɔ hwenu e vǐ ɖé ɖò susu wɛ ɖò nɔ tɔn xomɛ é ɔ, Jehovah nɔ ɖ’ayi nǔ e nɔ ɖò jijɛ wɛ lɛ é bǐ wu. Xà Ðɛhan 139:13-15, 17, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Ðò Jehovah nukúnmɛ ɔ, hwenu e è jì mɛɖé é wɛ gbɛ̀ tɔn nɔ bɛ́ à alǒ hwenu e nɔ tɔn mɔ xò tɔn é?
Sɛ́n e Jehovah na Izlayɛli hwexónu tɔn ɔ lɛ é nya xɛ ɖò xoxónɔ lɛ kpo vǐ e ɖò xò yetɔn mɛ lɛ é kpo jí. Xà Tíntɔ́n 21:22, 23, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Linlin tɛ Jehovah ka nɔ ɖó dó mɛ e ma tuùn ǎ bo ɖó gbɛ̀ vǐ e è ma ko jì ǎ é ɖé tɔn te é wu?
Enyi mɛɖé tuùn bo wà mɔ̌ ɔ, nɛ̌ é ka na cí n’i?b
Nɛ̌ linlin e Mawu ɖó é ka cí nú we?
Nyɔnu e gbɛ̀ xɔ akwɛ na é ɖé tlɛ sixu mɔ ɖɔ ɖò ninɔmɛ emitɔn mɛ ɔ, xò jɛn emi na ɖè. Xà Ezayíi 41:10, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Enyi è ɖò kɔ gbidí nú nyɔnu ɖé wɛ bonu é na ɖè xò ɔ, alɔdó mɛ̌ tɔn é ka ɖó na byɔ? Etɛwu?
MƐÐÉ LƐ ÐƆ: “Nyɔnu ɖó acɛ bo na ɖè xò alǒ gbɔ, ɖó éyɛ wɛ nyí mɛ e ɖò xò é.”
Etɛwu a ka kúdeji ɖɔ gbɛ̀ xoxónɔ ɖé kpo vǐ e ɖò xò tɔn mɛ é kpo tɔn nɔ xɔ akwɛ nú Jehovah?
ETƐ LƐ A KA KPLƆ́N?
Biblu kplɔ́n mǐ ɖɔ mǐ ni yí wǎn nú gbɛ̀ e Jehovah na mǐ é, bo ɖó sísí na, lobo nya xɛ ɖ’eji. Mǐ na wà mɔ̌ nú gbɛ̀ mǐɖesunɔ tɔn kpo gbɛ̀ mɛ ɖevo lɛ tɔn kpo.
Vɔ̌gbɔnji
Etɛwu gbɛ̀ gbɛtɔ́ tɔn ka xɔ akwɛ nú Jehovah?
Enyi mɛɖé tuùn bo ɖó gbɛ̀ mɛɖé tɔn te ɔ, nɛ̌ é ka nɔ cí nú Jehovah?
Gbɛ̀ e Mawu na we é ka sù nukún towe mɛ à? Etɛwu?
KÍJÉ
Nɛ̌ mǐ ka sixu dókú nú Jehovah nú gbɛ̀ e é na mǐ é gbɔn?
Mawu ka na sɔ́ hwɛ kɛ nyɔnu e ko ɖè xò kpɔ́n é ɖé à? Kpɔ́n xósin ɔ.
Linlin e Mawu nɔ ɖó dó gbɛ̀ wu é ɖó na d’alɔ mǐ bɔ mǐ na cyan ayiɖeɖayǐ e ma na sɔ́ gbɛ̀ mǐtɔn ɖó axɔ́ nu ǎ lɛ é. Kplɔ́n lee nǔ sixu nyí mɔ̌ gbɔn é.
“‘Lanmɛ Bibakpɔ́n E Zɛkpá lɛ É’: A Ðó Na Sɔ́ Tamɛ Nyi Gbě Wɛ Ǎ?” (Réveillez-vous!, 8 octobre 2000)
Enyi mɛɖé ɖó linlin mɛɖée huhu tɔn lɛ ɔ ka lo? Gbějé lee Biblu sixu d’alɔ ɛ gbɔn é kpɔ́n.
a Mɛ e ayi yetɔn gbadó lɛ é sín nǔ nɔ ɖu ayi mɛ nú Jehovah tawun. (Ðɛhan 34:19) É nɔ mɔ nukúnnú jɛ ninɔmɛ vɛwǔ e sixu zɔ́n bɔ è ɖó linlin mɛɖée huhu tɔn lɛ é wu, lobo jló na d’alɔ. Nú a na mɔ lee alɔdó tɔn sixu na hlɔnhlɔn mɛɖé bɔ é na ɖu ɖò linlin mɛɖée huhu tɔn lɛ jí gbɔn é hǔn, xà xóta “Un Jló Na Kú: Biblu ka Sixu D’alɔ Mì Hwenu E Linlin Mɛɖée Huhu Tɔn lɛ Wá nú Mì É À?” ee ɖò akpáxwé Kíjé ɔ mɛ ɖò nǔkplɔnkplɔn elɔ mɛ é.
b Mɛ e ko ɖè xò kpɔ́n lɛ é ɖó na nɔ ɖò hwɛ dó yeɖée wɛ kpowun ǎ, Jehovah sixu sɔ́ hwɛ kɛ ye. Nú a na ɖó mɔjɛmɛ d’eji hǔn, kpɔ́n xóta “Etɛ Biblu ka Ðɔ Dó Xoɖiɖe Wu?” ee ɖò akpáxwé Kíjé ɔ mɛ ɖò nǔkplɔnkplɔn elɔ mɛ é.