A ka ɖo gbesisɔmɛ bo ná “ɖu gǔ ayǐkúngban ɔ tɔn” a?

A KA ÐO GBESISƆMƐ BO NÁ BLÓ BƆ AYǏKÚNGBAN Ɔ NÁ HÚZÚ PALAÐÍSI A?

Hwenu e Jexóva ɖe gbe nú gbɛtɔ́ lɛ́ ɖɔ yě ní “kpé ayǐkúngban ɔ jí, bo sɔ́ ɛ ɖó acɛ [yětɔn] glɔ́” é ɔ, é ɖe xlɛ́ ɖɔ gbɛ ɔ bǐ ná wá húzú palaɖísi. (Bǐb. 1:28) Mɛ ɖěɖěe ná nɔ gbɛ káká sɔ́yi lɛ́ é ɖó ná se tónú nú gbeɖiɖe ɖokpó énɛ́ ɔ. Ayǐkúngban ɔ ná nyí palaɖísi ɖo bǐbɛ́mɛ ǎ, ɖó jikpá Edɛ́ni tɔn sɔ́ tíin ǎ wútu. Aamagedɔ́ni gúdo tlóló ɔ, mǐ ɖó ná w’azɔ̌ gěgé, bo ná dó jlá fí ɖěɖěe gblé ɖo ayǐkúngban ɔ jí lɛ́ é ɖó. Énɛ́ ná byɔ́ azɔ̌ tawun!

Énɛ́ flín mǐ azɔ̌ e Izlayɛ́li ví lɛ́ wa, hwenu e yě lɛ́ kɔ sín Babilɔ́nu é. Xwe 70 wɛ to yětɔn nɔ vɔ̌ ná. Amɔ̌, Ezayíi ɖɔ ɖ’ayǐ ɖɔ kpó alɔdó Jexóva tɔn kpó ɔ, yě ná kpé wú bo bló bɔ to ɔ ná lɛ́ nyɔ́ ɖɛkpɛ. Nǔɖɔɖayǐ ɔ ɖɔ: ‘Fí énɛ́ e nyí akúgbéjí ɔ, é ná zé dó húzú jikpá Edɛ́ni tɔn. Ayǐkúngban xúxú énɛ́ ɔ, é ná zé dó húzú jikpá Jexóva tɔn.’ (Eza. 51:3) É kpa Izlayɛ́li ví lɛ́. Mɔ̌ ɖokpó ɔ, Jexóva ná kɔn nyɔ̌ná tɔn dó mɛ ɖěɖěe ná ɖu gǔ ayǐkúngban ɔ tɔn lɛ́ é jí, bɔ yě ná kpé wú bo ná bló bɔ ayǐkúngban ɔ ná húzú palaɖísi ɖɛkpɛ ɖɛkpɛ. Gɔ́ ná ɔ, a tlɛ sixú wa nǔɖé lɛ́ din dó xlɛ́ ɖɔ a ba ná ɖ’alɔ ɖo azɔ̌ énɛ́ mɛ.

Nǔ e a sixú wa lɛ́ é ɖokpó wɛ nyí ɖɔ a ní nɔ wa nǔ e wú a kpé é bǐ bónú xwé towe kpó fí e lɛ́ lɛ̌ dó we lɛ́ é kpó ní nɔ nɔ mǐmɛ́ jí. Ényí nɔzo towe lɛ́ ná bo ma tlɛ nɔ nɔ mǐmɛ́ jí ǎ ɔ, a sixú kpé wú. A sixú lɛ́ d’alɔ bɔ è ná nɔ jlá kpléxɔ Axɔ́súɖuto ɔ tɔn towe kpó kpléɖókpɔ́xɔ e ɖo xá towe mɛ é kpó ɖó. Ényí ninɔmɛ towe yí gbe ɔ, a sixú lɛ́ d’alɔ wěma mɛ bo ná nyí mɛɖéezéjótɔ́ ɖo xá towe mɛ, lobo ná nɔ ɖ’alɔ ɖo sɔhɛnmɛzɔ́ mɛ. Énɛ́ ná xlɛ́ ɖɔ a jló ná d’alɔ nɔví towe lɛ́, ényí hudó tíin ɔ nɛ́. Kanbyɔ́ hwiɖée ɖɔ: ‘Un ka sixú bló bɔ alɔ se kpɛ́n nú mì ɖo ali ɖé lɛ́ nu, bɔ hwenu e Jexóva ná hun ali nú mì bɔ un ná nɔ gbɛ káká sɔ́yi ɖo ayǐkúngban jí ɔ, un ná zán yě a?’

A KA ÐO GBESISƆMƐ BO NÁ KPÉ NUKÚN DÓ MƐ E NÁ FƆ́N SÍN KÚ LƐ́ É WÚ A?

Ée Jezu fɔ́n vǐ nyɔ̌nu Jayilɔ́si tɔn sín kú gúdo tlóló é ɔ, Jezu ɖɔ ɖɔ è ní ná ɛ nǔɖé bónú é ɖu. (Mak. 5:42, 43) Nukúnkpíkpé dó ɖyɔ̌vǐ xwe 12 mɛví énɛ́ wú sixú gɔn wǔ vɛ́. Amɔ̌, lin tamɛ dó nǔ e é ná byɔ́ hwenu e Jezu ná ɖe akpá tɔn e ɖɔ ɖɔ “mɛ e ɖo yɔdo mɛ lɛ́ é bǐ ná se gbe tɔn, bo ná tɔ́n” é jí. (Jaan 5:28, 29) Nǔgbó wɛ ɖɔ Biblu ɖɔ gǒflɛ́mɛ lěe nǔ lɛ́ ná yi gbɔn é tɔn ǎ có, mǐ lin tamɛ ɔ, mǐ ná mɔ ɖɔ mɛ ɖěɖěe ná fɔ́n sín kú lɛ́ é ná ɖó hudó nǔɖuɖu, fí e yě ná nɔ é kpó nǔzínzán kpó tɔn. Din hwɛ̌ ɔ, a ka sixú xlɛ́ ɖɔ émí ɖo gbesisɔmɛ bo ná d’alɔ a? Nǔ ɖé lɛ́ ɖíe bɔ a sixú wa dó xlɛ́ mɔ̌.

Ényí è ɖɔ ɖɔ nukúnkpénǔwútɔ́ lɛ̌dó tɔn ná wá ba agun towe kpɔ́n ɔ, a sixú ná nyǐkɔ bá yí jǒnɔ tɔn. Ényí è sɛ́ mɛ ɖěɖěe wa sinsɛnzɔ́ hwebǐnu tɔn bǔnɔ ɖo Betɛ́li lɛ́ é dó gle ɔ mɛ, bɔ yě mɛ ɖé lɛ́ wá agun, alǒ xá towe mɛ hǔn, d’alɔ yě bónú yě ní mɔ fí e yě ná nɔ é. Kabǐ ényí xwe e nukúnkpénǔwútɔ́ lɛ̌dó tɔn ɖé ná wa lɛ̌dózɔ́ ná é kpé, bɔ è sɛ́ ɛ dó agun, alǒ xá towe mɛ hǔn, d’alɔ ɛ bónú é ní mɔ fí e é ná nɔ é. Ényí è ɖo kpléɖókpɔ́ ɖaxó, alǒ bǔnɔ ɖé ná bló wɛ ɖo xá towe mɛ hǔn, zě hwiɖée jó bá w’azɔ̌ jɛ nukɔn nú kpléɖókpɔ́ ɔ, kabǐ ɖo kpléɖókpɔ́ ɔ gǔdo. A hɛn ɔ, a ná lɛ́ d’alɔ bɔ è ná dó doo nú afɔsɔ́ɖótetɔ́ lɛ́.

ÐO GBESISƆMƐ BÁ KPLƆ́N NǓ MƐ ÐĚÐĚE NÁ FƆ́N SÍN KÚ LƐ́ É

Sɔgbe xá Mɛsɛ́dó 24:15 ɔ, mǐ ɖo nukún ɖó wɛ ɖɔ è ná fɔ́n mɛ lǐva mɔ̌kpán sín kú. Mɛ gěgé ɖo yě mɛ bɔ ali ɔ hun nú yě kpɔ́n bónú yě kplɔ́n bo tuun Jexóva ǎ. Fínfɔ́n sín kú yětɔn gúdo wɛ ali énɛ́ ná hun nú yě.a Mɛsɛntɔ́ gbejínɔtɔ́ Mawu tɔn e ko mɔ nǔ kpɔ́n lɛ́ é ná ɖ’alɔ ɖo mɛkplɔ́nkplɔ́nzɔ́ énɛ́ mɛ. (Eza. 11:9) Charlotte e ɖɔ Mawuxó ɖo Elɔ́pu, Tofɔligbé Amɛlíka tɔn kpó Aflíka kpó é ɖo nukún ɖó wɛ bo ná ɖ’alɔ ɖo azɔ̌ énɛ́ mɛ. É ɖɔ kpó xomɛhunhun kpó ɖɔ: “Un ɖo nukún ɖó wɛ bo ná kplɔ́n nǔ mɛ lɛ́ ɖo fínfɔ́n sín kú hwenu. Ényí un xa nǔ dó mɛ e ko nɔ gbɛ kpɔ́n é ɖé wú ɔ, hwɛhwɛ wɛ un nɔ lin nǔ gbɔn lě: ‘Ényí mɛ élɔ́ ko tuun Jexóva wɛ ɔ, gbɛ vo séé wɛ é ná ko zán.’ Akpakpa ɖo sísɔ́ mì wɛ bónú má ɖɔ nǔ e gbɔ mɛ e è fɔ́n sín kú lɛ́ é wú é nú yě.”

Mɛsɛntɔ́ gbejínɔtɔ́ Jexóva tɔn ɖěɖěe kú cóbɔ Jezu wá ayǐkúngban jí lɛ́ é lɔ tlɛ ɖó nǔ gěgé bo ná kplɔ́n. Dǒ nukúnmɛ kpɔ́n, xomɛ ná hun mǐ tawun ɖɔ mǐ ní tínmɛ nǔɖɔɖayǐ ɖěɖěe Daniyɛ́li wlán bo ma ka mɔ nǔ jɛ mɛ ǎ lɛ́ é n’i. (Dan. 12:8) Alɔ dídó Hwliti kpó Nɔemíi kpó bónú yě ná mɔ nǔ jɛ mɛ ɖɔ xwédo yětɔn lɔ ɖo kúnkan e mɛ Mɛsíya ɔ gosín é mɛ ná víví kpɔ́n! Mǐ ná ɖu vǐví nǔkplɔ́nkplɔ́n mɛ lɛ́ tɔn tawun! Kɔgbídínúmɛ gbɛ nyanya élɔ́ tɔn kpó nǔ e nɔ fɛ ayi mǐtɔn lɛ́ é kpó ɖě sɔ́ ná ɖo fínɛ́ ǎ.

Nɛ̌ a ka sixú xlɛ́ gbɔn din ɖɔ émí ɖo gbesisɔmɛ bá ɖ’alɔ ɖo tuto énɛ́ mɛ? Ali tají e nu a sixú wa mɔ̌ ɖe é ɖokpó wɛ nyí ɖɔ a ní tɛ́n kpɔ́n bónú lěe a nɔ kplɔ́n nǔ mɛ gbɔn é ní kpɔ́n te d’é jí, lobo nɔ lɛ́ ɖɔ mawuxó hwɛhwɛ. (Mat. 24:14) É ná bo tlɛ nyí mɛxóxwe, alǒ ninɔmɛ ɖěvo lɛ́ wɛ ɖó dogbó nú we din ɔ, gǎn e a nɔ dó lɛ́ é sixú xlɛ́ gbe sisɔ e mɛ a ɖe, bo ná kplɔ́n nǔ mɛ e ná fɔ́n sín kú lɛ́ é é.

É nyɔ́ tawun ɖɔ è ní lin tamɛ dó nǔkanbyɔ́ tají élɔ́ jí: A ka ɖo gbesisɔmɛ bo ná ɖu gǔ ayǐkúngban ɔ tɔn a? Akpakpa ka ɖo sísɔ́ we wɛ dó nǔ élɔ́ lɛ́ wú a?: Alɔ dídó bónú ayǐkúngban ɔ ná húzú palaɖísi, tíntɛ́nkpɔ́n bónú mɛ e fɔ́n sín kú lɛ́ é ná mɔ nǔ e hudó yě lɛ́ é, gɔ́ nú nǔkplɔ́nkplɔ́n yě. A sixú xlɛ́ ɖɔ émí ɖo gbesisɔmɛ, ényí a nɔ zán ali e hun nú we égbé lɛ́ é bo nɔ ɖ’alɔ ɖo azɔ̌ e cí éé ɖo te kpɔ́n we hwenu e a ná ɖu ayǐkúngban ɔ sín gǔ é ɖɔhun lɛ́ é mɛ ɔ nɛ́.