Nǔ e nǔxatɔ́ lɛ́ kanbyɔ́ lɛ́ é
Hwenu e Davídi wlán xó e ɖo Ðɛhan 61:9 mɛ lɛ́ é ɔ, é ɖɔ ɖɔ émí ná mlá nyǐkɔ Mawu tɔn “hwebǐnu.” Ðiɖɔ wɛ é ka ɖe ɖɔ émí kún ná kú gbeɖé ó a?
Éǒ. Nǔ e Davídi wlán é sɔgbe, bo lɛ́ ɖo jlɛ̌ jí.
Ð’ayi nǔ e é wlán ɖo wěmafɔ énɛ́ kpó mɔ̌hun lɛ́ kpó mɛ é wú: “Un ná nɔ ɖo han ji mlá we wɛ hwebǐnu, bo ná dó ɖe akpá e un dó lɛ́ ayǐhɔ́ngbe ayǐhɔ́ngbe.” “Aklúnɔ Mawu ce, un ná nɔ kpa we kpó ayixa ce bǐ kpó, un ná nɔ kpa susu nú nyǐkɔ towe káká sɔ́yi.” “Un ná nɔ mlá nyǐkɔ towe tɛgbɛ, bo ná mlá káká yi káká sá.”—Ðɛh. 61:9; 86:12; 145:1, 2.
Hwenu e Davídi wlán xó énɛ́ lɛ́ é ɔ, ɖiɖɔ wɛ é ɖe ɖɔ émí kún ná kú gbeɖé ó ǎ. Davídi tuun ɖɔ Jexóva ɖɔ tónúmase gbɛtɔ́ tɔn ná dɔn kú wá, bo yí gbe ɖɔ hwɛhutɔ́ wɛ émí nyí. (Bǐb. 3:3, 17-19; Ðɛh. 51:6, 7) É tuun ɖɔ mɛ ɖěɖěe sín nǔ nyɔ́ Mawu nukúnmɛ lɛ́ é, ɖi Ablaxámu, Izáki kpó Jakɔ́bu kpó wá kú. Gɔ́ ná ɔ, Davídi tuun ɖɔ émíɖésúnɔ ná wá kú. (Ðɛh. 37:25; 39:5) Amɔ̌, xó e é ɖɔ ɖo Ðɛhan 61:9 mɛ é xlɛ́ ɖɔ é ɖo biba wɛ vɛ́návɛ́ná, bo ka kán ɖ’é jí bo ná kpa súsú nú Mawu káká sɔ́yi, énɛ́ wɛ nyí nú gbɛhwenu tɔn bǐ.—2 Sam. 7:12.
Hweɖélɛ́nu ɔ, Davídi wlán nǔ e jɛ dó éɖésúnɔ mɛtún ɔ jí lɛ́ é, lěe mǐ sixú ɖ’ayi wú gbɔn ɖo nǔwlánwlán aga tɔn Ðɛhan 18, 51 kpó 52gɔ́ ɔ kpó tɔn mɛ é. Ðo Ðɛhan 23gɔ́ ɔ mɛ ɔ, Davídi e nyí lɛ̌ngbɔ́nyitɔ́ ɖé é jlɛ́ Jexóva dó lɛ̌ngbɔ́nyitɔ́ e nɔ xlɛ́ ali mɛ, fá kɔ nú mɛ, bo nɔ lɛ́ nya xɛ ɖo mɛ jí é wú. Énɛ́ sísɛ́ ɛ bɔ é ba ná sɛn Mawu ‘nú gbɛhwenu tɔn bǐ.’—Ðɛh. 23:6.
Flín ɖɔ Jexóva wɛ xlɛ́ ali Davídi bɔ é wlán nǔ e é wlán lɛ́ é bǐ. Nǔɖɔɖayǐ ɖěɖěe kúnkplá nǔ e ná wá jɛ ɖo nukɔnmɛ lɛ́ é ɖo nǔ ɖěɖěe é wlán lɛ́ é mɛ. Ði kpɔ́ndéwú ɔ, ɖo Ðɛhan 110gɔ́ ɔ mɛ ɔ, Davídi dó gesí hwenu e Aklúnɔ tɔn ná “jínjɔ́n aɖisí [Mawu tɔn] xwé” ɖo jǐxwé, bɔ è ná ná ɛ acɛ ɖaxó é. Étɛ́ é ka ná wa kpó acɛ énɛ́ kpó? É ná zán dó hu acɛ nú kɛntɔ́ Mawu tɔn lɛ́, bo ‘ɖó hwɛ nú akɔta’ e ɖo ayǐkúngban ɔ jí lɛ́ é. Davídi ɔ, tɔ́gbó Jezu e nyí Mɛsíya ɔ é tɔn wɛ n’i; Mɛsíya ɔ ná kp’acɛ sín jǐxwé, bo ná nyí ‘vɔ̌sánúxwlémawutɔ́ káká sɔ́yi mavɔmavɔ.’ (Ðɛh. 110:1-6) Jezu ɖɔ ɖɔ émí wú ɖɔ xó dó wɛ nǔɖɔɖayǐ e ɖo Ðɛhan 110gɔ́ ɔ mɛ é ɖe, bo ná jɛnu ɖo sɔgúdo.—Mat. 22:41-45.
Ɛɛn, Jexóva sɔ́ d’ayi mɛ nú Davídi bɔ é wlán nǔ dó nǔ e ná jɛ ɖo hwetɔnnu, bo ná lɛ́ jɛ ɖo sɔgúdo hwenu e é ná fɔ́n sín kú, bo ná mlá Jexóva káká sɔ́yi é wú. Énɛ́ d’alɔ mǐ bɔ mǐ sixú ɖɔ ɖɔ ninɔmɛ e ɖo ayǐ ɖo Izlayɛ́li hwexónu tɔn ɔ é kpó lěe gbɛ ná wá cí ɖo sɔgúdo hwenu e nǔɖɔɖayǐ Mawu tɔn lɛ́ ná jɛnu é kpó wú ɖɔ xó dó wɛ Ðɛhan 37:10, 11, 29 ɖe.—Kpɔ́n akpáxwé 8gɔ́ xóta “A ná nɔ kpɔ́ xá mì ɖo palaɖísi mɛ” tɔn, éé ɖo Atɔxwɛ élɔ́ mɛ é.
Hǔn, Ðɛhan 61:9 kpó wěmafɔ mɔ̌hun ɖěvo lɛ́ kpó xlɛ́ ɖɔ Davídi ba bo ná kpa susu nú Jexóva ɖo Izlayɛ́li hwexónu tɔn ɔ káká yi kú. Gɔ́ ná ɔ, wěmafɔ lɛ́ ɖe nǔ e Davídi ná wa ɖo sɔgúdo hwenu e Jexóva ná fɔ́n ɛ sín kú é xlɛ́.