BAABUWOL 2
Ɓe kalki Aljanna
Malaa’ikaajo tuurtiiɗo esti Aadamu e Hawwa taa ɓe njaɓa Allah laama dow maɓɓe. Banani, hakke e maayde naasti duniyaaru
HIDDEKO o taga neɗɗo, Allah tagi ruuhuuji ɗuuɗɗi—waato malaa’ika’en. Nder jarne Adnin, malaa’ikaajo tuurtiiɗo, mo wi’eteeɗo Sayɗaanu malla Iblisa, esti hawwa bee dabare o nyaama ɓiɓɓe lekki ki Allah haɗi taa ɓe nyaama.
Huuwtiniri mboodi, Sayɗaanu fewi Hawwa. O wi’i Allah ɗon nyukkina debbo e gorko ko wooɗi masin. Sayɗaanu wi’i Hawwa yoo, kaŋko e goriiko maayataa sam to ɓe nyaami ɓiɓɓe lekki. Banani, Sayɗaanu holli Allah ɗon fewa yimɓe. Malaa’ikaajo pewoowo oo, wi’i sooynde ɗowtaare Allah hokkan ɓe anndal feere e hokkan ɓe boo ndimu. Ɗum fewre maŋga—waato walaa mo wolwi fewre ɓuri fewre nde’e haa lesdi fuu. Bee gooŋga kam, ɗum haala ko laarani laamu on. Wi’ugo yoo, Allah maraay baawɗe laamugo e o laamataa bee adilaaku dow yimɓe maako.
Hawwa nuɗɗini fewre Sayɗaanu. O suuni ɓiɓɓe lekki, e o nyaami ɗe. Ɓaawo man, o hokki goriiko boo, e o nyaami. Banani ɓe laati hakke’en. Ko ɓe ngaɗi ɗon laara bana peetel, ammaa ɗum haala tuurtol on. Nde ɓe luuti Allah bee anniya, Aadamu e Hawwa wudini umrooje Allah, mo tagi e mo hokki ɓe kuuje fuu. O hokki ɓe maa ngeendam timmuɗam.
Danygol “naman hoore ma, an boo a ngatan teppere maako.”—Laataanooji 3:15
Allah hiiti Aadamu e Hawwa ngam tuurtol maɓɓe. O anndini wahayu yoo, goɗɗo feere waran nattugo Sayɗaanu, waato mboodi. Allah mbaraay Aadamu e Hawwa nyalde nde’e, banani o holli enɗam ngam danygol maɓɓe garanɗum. Ɓikkon kon mari tammunde ngam Mo Allah nellata woggan halleende jey waɗi nder jarne Adnin. Bana noy Allah waɗata nufaye maako ko laarani Kisnoowo? Moy woni Nelaaɗo man? Yamle ɗe’e heɓan jaawaabuuji nder Deftere Allah.
Allah farti Aadamu e Hawwa yaasi Aljanna. Jonta ɓe kuuwan caɗɗum haa ɓe nyaama yaasi jarne Adnin. Ɓaawo man Hawwa hooci reedu e danyi Kayinu. Ɗum afo Aadamu e Hawwa. Ɓe keɓi ɓiɓɓe worɓe e ɓiɓɓe rewɓe woɗɓe, bana Habila e Setu, kaakaaji Nuuhu.
—Ndaare Laataanooji fasluuji 3 haa 5; Wahayu Yuhanna 12:9.