Sailm

Nuair a tháinig Iosrael as an Éigipt amach,

teaghlach Iacóib ón bpobal barbartha,

2 rinneadh sanctóir an Tiarna de Iúdá,

agus tharla Iosrael ina ríocht aige.

3 Chonaic an mhuir agus theith sí;

agus chas an Iordáin ar ais.

4 Ghabh na sléibhte ag léimneach amhail reithí,

agus na cnocáin ar nós uan óg.

5 Cad fáth, a mhuir, go dteitheann tú?

Cad chuige duit, a Iordáin, casadh ar ais?

6 Cad fáth a léimeann sibh, a shléibhte amhail reithí,

agus a chnocána, ar nós uan óg?

7 Bí ar crith, a thalaimh, i láthair an Tiarna;

creathnaigh i láthair Dhia Iacóib,

8 a chlaochlaigh an charraig ina linn,

agus an aill ina foinse uisce.