1 Maŋtsɛmɛi
5 Be ni Hiram, Tiro+ maŋtsɛ lɛ, nu akɛ afɔ Solomon mu ni awó lɛ maŋtsɛ yɛ etsɛ sɛɛ lɛ, etsu etsuji kɛtee Solomon ŋɔɔ, ejaakɛ Hiram ji David naanyo ewala beiaŋ fɛɛ.* + 2 Solomon hu tsu ayakɛɛ Hiram akɛ:+ 3 “Ole jogbaŋŋ akɛ mitsɛ David nyɛɛɛ ama shĩa ahã Yehowa, e-Nyɔŋmɔ lɛ gbɛ́i lɛ, ejaakɛ awu tai ashi lɛ kɛjɛ he fɛɛ he kɛyashi Yehowa kɛ ehenyɛlɔi lɛ wo enajiashi.+ 4 Shi amrɔ nɛɛ, Yehowa, mi-Nyɔŋmɔ lɛ ehã mi hejɔlɛ yɛ he fɛɛ he.+ Mɔ ko mɔ ko eteee shi ewooo mi, ni nɔ fɔŋ ko hu baaa.+ 5 No hewɔ lɛ, mito miyiŋ akɛ mama shĩa mahã Yehowa, mi-Nyɔŋmɔ lɛ gbɛ́i lɛ, tamɔ bɔ ni Yehowa wo mitsɛ David shi akɛ: ‘Obinuu ni mahã eta omaŋtsɛ sɛi lɛ nɔ yɛ osɛɛ lɛ, lɛ ji mɔ ni baama shĩa lɛ ehã migbɛ́i lɛ.’+ 6 No hewɔ lɛ, fã omaŋbii lɛ, ni amɛfolɔ tseneduru tsei yɛ Lebanon+ amɛhã mi. Mitsuji lɛ kɛ otsuji lɛ baafee ekome kɛtsu nii, ni mawo otsuji lɛ nyɔmɔ yɛ bɔ ni obaatsɔɔ lɛ naa, ejaakɛ ole akɛ wɔteŋ mɔ ko mɔ ko leee tsei afolɔmɔ tamɔ Sidonbii lɛ.”+
7 Be ni Hiram nu Solomon wiemɔi lɛ, ená miishɛɛ naakpa ni ekɛɛ akɛ: “Ajie Yehowa yi ŋmɛnɛ gbi nɛɛ, ejaakɛ ehã David binuu ni hiɛ kã shi koni eye maŋ kpele* nɛɛ nɔ!”+ 8 No hewɔ lɛ, Hiram tsu ayakɛɛ Solomon akɛ: “Minu oshɛɛ lɛ. Mafee nɔ fɛɛ nɔ ni oshweɔ lɛ, ni mahã bo tseneduru tsei kɛ junipa tsei.+ 9 Mitsuji lɛ kɛ tsei lɛ baakpeleke shi kɛjɛ Lebanon kɛba ŋshɔ lɛ naa, ni mahã afimɔ yɛ jɛmɛ ni akɛbaatsɔ ŋshɔ hiɛ kɛya he ni obaatsɔɔ mi lɛ. Mahã afɛne yɛ jɛmɛ, koni ohã abahole kɛya. Ni bo hu, nɔ pɛ ni mitaoɔ ni ofee ji, ni ohã mishĩabii lɛ niyenii.”+
10 No hewɔ lɛ, Hiram hã Solomon tseneduru tsei kɛ junipa tsei abɔ ni etaoɔ lɛ fɛɛ. 11 Ni Solomon hã Hiram wiiti kor* susumɔnii 20,000, ni ji niyenii kɛhã eshĩabii lɛ, kɛ oliv mu kpakpa* kor susumɔnii 20. Enɛɛmɛi ji nibii ni Solomon hãa Hiram afi fɛɛ afi.+ 12 Ni Yehowa hã Solomon hiɛshikamɔ tamɔ bɔ ni ewo lɛ shi lɛ pɛpɛɛpɛ.+ Ni toiŋjɔlɛ hi Hiram kɛ Solomon teŋ, ni amɛyi enyɔ lɛ kɛ amɛhe kpaŋ.
13 Maŋtsɛ Solomon nyɛ hii anɔ kɛjɛ Israel fɛɛ kɛhã nitsumɔ; anyɛ hii 30,000 anɔ kɛhã nitsumɔ.+ 14 Daa nyɔɔŋ nɔ lɛ, etsuɔ hii nɛɛ ateŋ 10,000 kɛyaa Lebanon. Amɛyayeɔ nyɔɔŋ kome yɛ Lebanon, ni amɛbayeɔ nyɔji enyɔ yɛ amɛshĩai; ni Adoniram+ ji mɔ ni kwɛɔ mɛi ni anyɛɔ amɛnɔ kɛhã nitsumɔ lɛ anɔ. 15 Solomon yɛ apaafoi* 70,000 kɛ tɛgbalɔi 80,000+ yɛ gɔji lɛ anɔ,+ 16 dani esoro nɔkwɛlɔi+ 3,300 ni Solomon yɔɔ ni kwɛɔ nitsulɔi lɛ anɔ lɛ hu. 17 Yɛ maŋtsɛ lɛ famɔ naa lɛ, amɛgbála tɛi wuji, tɛi ni jara wa+ koni akɛ tɛi ni akpɛ́+ atswa shĩa lɛ faneshi+ lɛ. 18 No hewɔ lɛ, Solomon tsumalɔi lɛ kɛ Hiram tsumalɔi lɛ kɛ Gebalbii+ lɛ gbála tɛi lɛ, ni amɛsaa tsei lɛ kɛ tɛi lɛ koni akɛma shĩa lɛ.