Wolo Ni Ji Enyɔ Ni Akɛmaje Korintobii Lɛ
3 Ani wɔbɔi wɔhe yijiemɔ ekoŋŋ? Aloo, tamɔ eji yɛ mɛi komɛi agbɛfaŋ lɛ, ani esa akɛ wɔhiɛ yijiemɔ woji kɛbahã nyɛ aloo nyɛhã wɔ woji nɛɛ eko? 2 Nyɛ diɛŋtsɛ nyɛji wɔwolo+ ni aŋma yɛ wɔtsuii anɔ ni gbɔmɛi fɛɛ le ni amɛkaneɔ. 3 Ejaakɛ ajie nyɛ faŋŋ atsɔɔ akɛ nyɛji Kristo wolo ni wɔ akɛ sɔɔlɔi lɛ,+ wɔŋma, jeee kɛ iŋki, shi moŋ kɛ Nyɔŋmɔ hiɛkãalɔ lɛ mumɔ lɛ, jeee yɛ tɛ taoi anɔ,+ shi moŋ yɛ heloo taoi anɔ, ni ji yɛ tsuii anɔ.+
4 Kɛtsɔ Kristo lɛ nɔ lɛ, wɔyɛ nɔmimaa nɛɛ yɛ Nyɔŋmɔ gbɛfaŋ. 5 Jeee akɛ wɔ diɛŋtsɛ lɛ wɔsa jogbaŋŋ akɛ wɔɔsusu akɛ nɔ ko jɛ wɔŋɔɔ, shi moŋ sa ni wɔsa jogbaŋŋ lɛ, Nyɔŋmɔ ŋɔɔ ejɛ,+ 6 mɔ ni yɛ anɔkwale mli lɛ, ehã wɔtsɔmɔ mɛi ni sa jogbaŋŋ akɛ kpaŋmɔ hee+ ko he sɔɔlɔi, jeee mla ni aŋma+ he sɔɔlɔi, shi moŋ mumɔ lɛ he sɔɔlɔi; ejaakɛ mla ni aŋma lɛ buɔ mɔ fɔ kɛyaa gbele mli,+ shi mumɔ lɛ hãa wala.+
7 Agbɛnɛ, kɛ́ mla ni kɛ gbele baa ni akpɛ́ yɛ tɛi+ anɔ yɛ niŋmaa okadii amli lɛ ba yɛ anunyam ni tamɔ nɛkɛ mli aahu akɛ Israelbii lɛ nyɛɛɛ Mose hiɛ akwɛ yɛ ehiɛ anunyam,+ ni ji anunyam ni sɛɛ baafo lɛ hewɔ lɛ, 8 ani mumɔ+ lɛ sɔɔmɔ lɛ hiɛ baŋ nyam babaoo fe no?+ 9 Ejaakɛ kɛ́ mla ni hãa abuɔ mɔ fɔ+ lɛ hiɛ ba nyam lɛ,+ belɛ jalɛ sɔɔmɔ lɛ hiɛ yɛ nyam kwraa fe no!+ 10 Anɔkwa, nɔ ni be ko ni eho lɛ awo ehiɛ nyam po lɛ, ajie enunyam lɛ yɛ ehe yɛ anunyam ni fe no lɛ hewɔ.+ 11 Ejaakɛ kɛ́ akɛ nɔ ni sɛɛ baafo lɛ ba yɛ anunyam mli lɛ,+ belɛ nɔ ni hiɔ shi lɛ anunyam lɛ fe no kwraa!+
12 Akɛni wɔyɛ hiɛnɔkamɔ ni tamɔ nɛkɛ hewɔ lɛ,+ wɔwieɔ kɛ nɔmimaa babaoo, 13 ni wɔfeee nɔ ni Mose fee be ni ekɛ hiɛhaanɔ ha ehiɛ+ koni Israelbii lɛ akakwɛ nɔ ni sɛɛ baafo lɛ naagbee lɛ. 14 Shi amɛjwɛŋmɔi gboi.+ Ejaakɛ kɛbashi ŋmɛnɛ gbi nɛɛ, kɛ́ aakane kpaŋmɔ momo lɛ,+ nakai hiɛhaanɔ lɛ yɛ lolo ni ajieko, ejaakɛ Kristo nɔ pɛ atsɔɔ ajieɔ kɛyaa.+ 15 Anɔkwa, kɛbashi ŋmɛnɛ gbi nɛɛ, be fɛɛ be ni akaneɔ Mose lɛ,+ hiɛhaanɔ ha amɛtsuii anɔ.+ 16 Shi kɛ́ mɔ ko ku esɛɛ kɛba Yehowa* ŋɔɔ lɛ, ajieɔ hiɛhaanɔ lɛ kɛyaa.+ 17 Agbɛnɛ, Yehowa* ji Mumɔ lɛ,+ ni he ni Yehowa* mumɔ lɛ yɔɔ lɛ, jɛmɛ heyeli yɔɔ.+ 18 Ni wɔ fɛɛ lɛ, wɔtamɔ ashwishwɛi ni hãa anaa Yehowa* anunyam lɛ, ni ahako wɔhiɛ. Ni be mli ni wɔfeɔ nakai lɛ, atsakeɔ wɔ hu koni wɔtsɔmɔ tamɔ Nyɔŋmɔ koni wɔjie Nyɔŋmɔ anunyam lɛ kpo kɛjɛ anunyam kome mli kɛya anunyam kroko ni fe klɛŋklɛŋ nɔ lɛ mli,* tamɔ bɔ ni Yehowa,* ni ji Mumɔ lɛ feɔ lɛ pɛpɛɛpɛ.*+