3 Mose

6 Yehowa tee nɔ ekɛɛ Mose akɛ: 2 “Kɛ́ mɔ* ko laka enaanyo yɛ nɔ ko ní enaanyo lɛ kɛhã lɛ ní ekwɛ nɔ ehã lɛ+ loo nɔ ko ní ekɛhã lɛ ni ekɛto ehã lɛ lɛ he, aloo eju enaanyo lɛ nɔ ko loo eshishiu lɛ lɛ, efee esha ni eyeee Yehowa anɔkwa.+ 3 Aloo kɛ́ ena nɔ ko ni elaaje ni emale yɛ he, aloo kɛji efee eshai ni tamɔ enɛɛmɛi lɛ ateŋ eko ni ekã amale kitã akɛ efeko lɛ,+ no hu efee esha ni eyeee Nyɔŋmɔ anɔkwa, ni nɔ ni esa akɛ efee nɛ: 4 Kɛ́ efee esha ni eye fɔ lɛ, no lɛ, ekɛ nɔ ni eju lɛ, nɔ ni eshɔ̃ lɛ, nɔ ni etsɔ shishiumɔ nɔ ená lɛ, nɔ ni akɛhã lɛ ní ekwɛ nɔ lɛ, loo nɔ ni laaje ni ena lɛ, 5 aloo nɔ fɛɛ nɔ ni ekã he amale kitã lɛ aku sɛɛ ahã, aloo eto nii lɛ najiaŋ pɛpɛɛpɛ+ ni ekɛ nii lɛ jara lɛ mlijai enumɔ mli ekome afata he. Ekɛhã nɔtsɛ lɛ yɛ gbi ni ebaafee faŋŋ akɛ eye fɔ lɛ nɔ. 6 Ni ekɛ gwantɛŋnuu ni kpa ko bɛ ehe ni jara shɛɔ bɔ ni atsɔɔ lɛ abahã Yehowa akɛ esɔ̃ afɔle; ekɛhã osɔfo lɛ ni akɛshã sɔ̃ afɔle.+ 7 Osɔfo lɛ baakpãtã ahã lɛ yɛ Yehowa hiɛ, ni akɛ nɔ fɛɛ nɔ ni efee ni no ehã eye fɔ lɛ baake lɛ.”+

8 Yehowa tee nɔ ekɛ Mose wie ekɛɛ: 9 “Fã Aaron kɛ ebihii lɛ akɛ, ‘Shãa afɔle lɛ he mla nɛ:+ Shãa afɔle lɛ aya nɔ ahi la lɛ nɔ yɛ afɔleshaa latɛ lɛ nɔ jenamɔ muu fɛɛ kɛyashi leebi, ni ahã la lɛ aya nɔ atso yɛ afɔleshaa latɛ lɛ nɔ. 10 Osɔfo lɛ awo esɔfo atade ni akɛ klala fee lɛ,+ ni ewo klala nika+ lɛ kɛtsĩ eyayaiaŋ.* No sɛɛ lɛ, eloo shãa afɔle ni akɛ la lɛ shã yɛ afɔleshaa latɛ lɛ nɔ lɛ lamulu*+ lɛ, ni ekɛshwie afɔleshaa latɛ lɛ masɛi. 11 No sɛɛ lɛ, ejie etadei lɛ,+ ni ewo atadei krokomɛi, ni eloo lamulu lɛ kɛyashwie he ko ni tse yɛ nsara lɛ sɛɛ.+ 12 Ahã la lɛ aya nɔ atso yɛ afɔleshaa latɛ lɛ nɔ. Akahã egbo. Daa leebi lɛ, osɔfo lɛ kɛ lai ashwie nɔ ni eshã,+ ní eto shãa afɔle lɛ yɛ nɔ, ní eshã naanyobɔɔ afɔlei lɛ afɔi lɛ yɛ nɔ.+ 13 Ahã la aya nɔ atso daa yɛ afɔleshaa latɛ lɛ nɔ. Esaaa akɛ egboɔ.

14 “‘Agbɛnɛ, ŋmaa* afɔle lɛ he mla nɛ:+ Aaron bihii lɛ kɛba Yehowa hiɛ, yɛ afɔleshaa latɛ lɛ hiɛ. 15 Amɛteŋ mɔ kome akpiti ŋmaa afɔle ashikishaŋ kpakpa kɛ emu lɛ kɛ frankinsɛnsi fɛɛ ni jwere ŋmaa afɔle lɛ nɔ lɛ ekɔkɔ obɔ, ni eshã* yɛ afɔleshaa latɛ lɛ nɔ akɛ afɔle ni jeɔ ŋma jogbaŋŋ,* ní efee kaimɔ afɔle* ehã Yehowa.+ 16 Aaron kɛ ebihii lɛ aye nɔ ni baashwɛ lɛ.+ Amɛye lɛ akɛ blodo ni ashikishaŋ-sha* bɛ mli, yɛ he ko krɔŋkrɔŋ. Amɛye yɛ kpee buu lɛ kpo lɛ nɔ.+ 17 Akɛ ashikishaŋ-sha* akafutu mli kɛshã.+ Mikɛhã amɛ akɛ amɛgbɛfaŋnɔ yɛ mifɔlei ni akɛ la shãa lɛ amli.+ Eji nɔ krɔŋkrɔŋ fe fɛɛ,+ tamɔ esha afɔle kɛ sɔ̃ afɔle lɛ nɔŋŋ. 18 Aaron bii lɛ ateŋ mɔ fɛɛ mɔ ni ji nuu lɛ aye eko.+ Eji amɛgbɛfaŋnɔ ni kã shi daa yɛ afɔlei ni akɛ la shãa ahãa Yehowa lɛ amli yɛ nyɛyinɔi fɛɛ amli.+ Nɔ fɛɛ nɔ ni saa amɛhe* lɛ baafee krɔŋkrɔŋ.’”

19 Yehowa kɛ Mose wie ekoŋŋ akɛ: 20 “Afɔle ni Aaron kɛ ebihii lɛ kɛbaahã Yehowa yɛ gbi ni abaafɔ lɛ mu+ lɛ nɔ nɛ: ashikishaŋ kpakpa efa mlijai nyɔŋma mli ekome*+ akɛ ŋmaa afɔle ni akɛbaahã daa,+ akɛ fã ahã leebi, ni akɛ fã hu ahã gbɛkɛ. 21 Akɛ mu afutu ni ashã yɛ kã tɛtrɛɛ nɔ.+ Okɛ mu afutu lɛ jogbaŋŋ, ni okumɔ mli ni okɛbahã akɛ ŋmaa afɔle ni jeɔ ŋma jogbaŋŋ* woɔ Yehowa. 22 Aaron bihii lɛ ateŋ mɔ ni baaye esɛɛ akɛ osɔfo ni afɔ lɛ mu+ lɛ ji mɔ ni baashã afɔle nɛɛ. Abaashã afɔle muu lɛ fɛɛ ahã Yehowa. Eji mla* ni kã shi daa. 23 Osɔfo ŋmaa afɔle fɛɛ ŋmaa afɔle lɛ, ashã emuu lɛ fɛɛ. Akaye eko.”

24 Yehowa kɛ Mose wie ekoŋŋ ekɛɛ: 25 “Kɛɛmɔ Aaron kɛ ebihii lɛ akɛ, ‘Esha afɔle lɛ he mla nɛ:+ He ni agbeɔ shãa afɔle kooloo lɛ yɛ lɛ,+ jɛmɛ nɔŋŋ agbe esha afɔle kooloo lɛ hu yɛ, yɛ Yehowa hiɛ. Eji nɔ krɔŋkrɔŋ fe fɛɛ. 26 Osɔfo lɛ ni kɛ kooloo lɛ baashã esha afɔle lɛ aye.+ Aye yɛ he ko ni yɔɔ krɔŋkrɔŋ, yɛ kpee buu lɛ kpo lɛ nɔ.+

27 “‘Nɔ fɛɛ nɔ ni saa eloo lɛ he lɛ baafee krɔŋkrɔŋ, ni kɛ́ mɔ ko hã lá lɛ eko shwã etade mli lɛ, fɔ atade ni lá lɛ etee mli lɛ he yɛ he ko ni yɔɔ krɔŋkrɔŋ. 28 Sũ gbɛ́ ni ahoo loo lɛ yɛ mli lɛ, ajwara lɛ. Shi kɛ́ ahoo yɛ akɔɔble tsɛnsi mli lɛ, no lɛ, asha mli jogbaŋŋ ní akɛ nu ajale mli.

29 “‘Nuu fɛɛ nuu ni ji osɔfo lɛ aye eko.+ Eji nɔ krɔŋkrɔŋ fe fɛɛ.+ 30 Shi esha afɔle fɛɛ esha afɔle ni akɛ elá lɛ eko baaba kpee buu lɛ mli koni akɛbakpãtã yɛ he krɔŋkrɔŋ lɛ, akaye eko.+ Akɛ la ashã.