Ezekiel

46 “Nɔ ni Nuŋtsɔ Ofe Yehowa kɛɛ nɛ: ‘Yɛ gbii ekpaa ni akɛtsuɔ nii lɛ amli fɛɛ lɛ,+ aŋa+ mligbɛ kpo lɛ agbó ni hiɛ kwɛɔ bokãgbɛ lɛ,+ shi agbele yɛ Hejɔɔmɔ Gbi lɛ kɛ nyɔɔŋtsere hee gbi lɛ nɔ. 2 Lumɔ lɛ baajɛ agbó lɛ naa ni etsɔ agbó lɛ ablanaa lɛ nɔ gbɛ lɛ nɔ kɛbote mli,+ ni ebaadamɔ agbó lɛ shinaatso lɛ he. Osɔfoi lɛ baashã eshãa afɔle lɛ kɛ enaanyobɔɔ afɔlei lɛ, ni ebaakoto shi yɛ agbó lɛ shinaa lɛ shi, kɛkɛ lɛ eje kpo. Shi akaŋa agbó lɛ kɛyashi gbɛkɛnaashi. 3 Shikpɔŋ lɛ nɔ bii lɛ hu baakoto shi yɛ Yehowa hiɛ yɛ he ni atsɔɔ kɛboteɔ agbó lɛ mli lɛ yɛ Hejɔɔmɔ Gbii lɛ kɛ nyɔɔŋtsere hei lɛ anɔ.+

4 “‘Shãa afɔle ni lumɔ lɛ kɛbaaba ebahã Yehowa yɛ Hejɔɔmɔ Gbi lɛ nɔ lɛ ji, gwantɛŋhii ni darako ekpaa ni kpa ko bɛ amɛhe kɛ gwantɛŋnuu kome ni kpa ko bɛ ehe.+ 5 Ni ŋmaa* afɔle lɛ hu ji, efa* kome kɛhã gwantɛŋnuu lɛ kɛ nɔ fɛɛ nɔ ni ebaanyɛ ekɛhã kɛhã gwantɛŋhii ni darako lɛ, ni ekɛ mu hin* kome afata efa fɛɛ efa he.+ 6 Yɛ nyɔɔŋtsere hee lɛ gbi lɛ nɔ lɛ, ekɛ tsinai lɛ ateŋ tsinanuu* ni kpa ko bɛ ehe, kɛ gwantɛŋhii ni darako ekpaa, kɛ gwantɛŋnuu baashã afɔle lɛ; kpa ko akahi amɛteŋ eko eko he.+ 7 Ekɛ ŋmaa afɔle efa kome ahã kɛhã tsinanuu* lɛ, efa kome kɛhã gwantɛŋnuu lɛ, kɛ nɔ fɛɛ nɔ ni ebaanyɛ ekɛhã kɛhã gwantɛŋhii ni darako lɛ. Ni ekɛ mu hin kome afata efa fɛɛ efa he.

8 “‘Kɛ́ lumɔ lɛ baabote mli lɛ, etsɔ agbó lɛ ablanaa lɛ nɔ gbɛ lɛ nɔ kɛbote mli, ni jɛmɛ nɔŋŋ etsɔ kɛje kpo.+ 9 Ni kɛ́ shikpɔŋ lɛ nɔ bii lɛ miiba Yehowa hiɛ yɛ gbii juji lɛ anɔ lɛ,+ mɛi ni tsɔɔ kooyigbɛ agbó+ lɛ mli kɛbaa koni amɛbajá lɛ, atsɔ wuoyigbɛ agbó+ lɛ mli kɛje kpo, ni mɛi ni tsɔɔ wuoyigbɛ agbó lɛ mli kɛbaa lɛ atsɔ kooyigbɛ agbó lɛ mli kɛje kpo. Mɔ ko mɔ ko akaku esɛɛ kɛtsɔ agbó ni etsɔ mli kɛba lɛ nɔŋŋ mli kɛje kpo, amɛtsɔ agbó ni hiɛ kwɛɔ agbó ni amɛtsɔ mli kɛba lɛ hiɛ lɛ mli kɛje kpo. 10 Ni lumɔ ni yɔɔ amɛteŋ lɛ, eba mli kɛ́ amɛba mli, ni eje kpo kɛ́ amɛje kpo. 11 Yɛ gbii juji lɛ kɛ gbii juji krokomɛi lɛ anɔ lɛ, ŋmaa afɔle ni ekɛba ji, efa kome kɛhã tsinanuu* lɛ, efa kome kɛhã gwantɛŋnuu lɛ, kɛ nɔ fɛɛ nɔ ni ebaanyɛ ekɛhã kɛhã gwantɛŋhii ni darako lɛ, ni ekɛ mu hin kome afata efa fɛɛ efa he.+

12 “‘Kɛ́ lumɔ lɛ kɛ shãa afɔle+ loo naanyobɔɔ afɔlei ba akɛ nikeenii ni ejɛ esuɔmɔ mli ekɛmiihã Yehowa lɛ, abaagbele agbó ni hiɛ kwɛɔ bokãgbɛ lɛ ahã lɛ, ni ekɛ eshãa afɔle lɛ kɛ enaanyobɔɔ afɔlei lɛ baahã tamɔ bɔ ni efeɔ yɛ Hejɔɔmɔ Gbi lɛ nɔ lɛ.+ Kɛ́ eje kpo lɛ, aŋa agbó lɛ yɛ esɛɛ.+

13 “‘Daa gbi lɛ, okɛ gwantɛŋnuu ni kpa ko bɛ ehe ni náko fe afi ashã shãa afɔle ahã Yehowa.+ Feemɔ enɛ leebi fɛɛ leebi. 14 Daa leebi lɛ, okɛ efa mlijai ekpaa mli ekome afata he kɛba akɛ ŋmaa afɔle, ni okɛ mu hin mlijai etɛ mli ekome afata he koni akɛshwã ashikishaŋ kpakpa lɛ nɔ akɛ ŋmaa afɔle ni ashãa daa ahãa Yehowa. Enɛ ji mla ni kã shi daa. 15 Daa leebi lɛ, amɛkɛ gwantɛŋnuu ni edako lɛ, kɛ ŋmaa afɔle lɛ, kɛ mu lɛ aba akɛ shãa afɔle ni ashãa daa.’

16 “Nɔ ni Nuŋtsɔ Ofe Yehowa kɛɛ nɛ: ‘Kɛ́ lumɔ lɛ ke ebihii lɛ ateŋ mɔ fɛɛ mɔ nii akɛ gboshinii lɛ, ebaatsɔ ebihii lɛ anɔ. No ji amɛgbɛfaŋnɔ ni amɛná akɛ gboshinii. 17 Shi kɛ́ ejɛ egboshinii lɛ mli eke etsuji lɛ eko nii lɛ, ebaatsɔ enɔ kɛyashi heyeli afi lɛ mli;+ ni no sɛɛ lɛ, ebaatsɔ lumɔ lɛ nɔ ekoŋŋ. Gboshinii ni ekɛhãa ebihii lɛ ji nɔ ni baatsɔ amɛnɔ kɛya naanɔ. 18 Lumɔ lɛ akashɔ̃ maŋbii lɛ ateŋ mɔ ko gboshinii yɛ edɛŋ ni eshwie amɛ kɛje amɛgbɛfaŋnɔ lɛ nɔ. Ehã ebihii lɛ gboshinii kɛjɛ lɛ diɛŋtsɛ enɔ lɛ mli, bɔ ni afee ni akashwie mɔ ko kɛmiijɛ lɛ diɛŋtsɛ egbɛfaŋnɔ lɛ nɔ yɛ mimaŋbii lɛ ateŋ.’”

19 Kɛkɛ ni ekɛ mi ba mli kɛtsɔ gbɛ ni atsɔɔ nɔ kɛboteɔ mli,+ ni yɔɔ agbó ni yaa osɔfoi lɛ aniyelihei krɔŋkrɔŋi lɛ, ni hiɛ kwɛɔ kooyigbɛ lɛ masɛi lɛ nɔ,+ ni mina he ko yɛ jɛmɛ yɛ sɛɛgbɛ kɛmiiya anaigbɛ. 20 Ekɛɛ mi akɛ: “Biɛ ji he ni osɔfoi lɛ baahoo sɔ̃ afɔle lɛ kɛ esha afɔle lɛ yɛ, ni jɛmɛ amɛbaashã ŋmaa afɔle+ lɛ yɛ, bɔ ni afee ni amɛkɛ nɔ ko akaje kpo kɛtee kponɔgbɛ kpo lɛ nɔ, ni amɛkɛfee maŋbii lɛ krɔŋkrɔŋ.”+

21 Ekɛ mi je kpo kɛba kponɔgbɛ kpo lɛ nɔ, ni ekɛ mi tsɔ kpo lɛ koji ejwɛ lɛ ahe, ni kpo kroko yɛ kponɔgbɛ kpo lɛ koji ejwɛ lɛ eko fɛɛ eko he. 22 Kpoi bibii yɛ kpo lɛ koji ejwɛ lɛ fɛɛ ahe, amɛkɛlɛmɔ ji ninetalɔi* 40, ni amɛlɛɛmɔ ji ninetalɔi 30. Ejwɛ lɛ fɛɛ hiɛ dalɛ kome.* 23 Atswa kpokui* kɛbɔle ejwɛ lɛ fɛɛ ahe, ni afee he ko yɛ kpokui lɛ ashishi ni ahoɔ afɔlei lɛ yɛ jɛmɛ. 24 Kɛkɛ ni ekɛɛ mi akɛ: “Biɛ ji he ni sɔlemɔ shĩa lɛ sɔɔlɔi lɛ hoɔ maŋbii lɛ afɔle lɛ yɛ.”+