Wolo Ni Ji Enyɔ Ni Akɛmaje Korintobii Lɛ
9 Agbɛnɛ yɛ sɔɔmɔ ni akɛhãa mɛi krɔŋkrɔŋi lɛ gbɛfaŋ lɛ,+ ehe ehiaaa akɛ maŋma nyɛ he nɔ ko, 2 ejaakɛ mile bɔ ni nyɛyɔɔ he suɔmɔ waa akɛ nyɛye nyɛbua, ni mikɛ nyɛ shwãa mitsɔɔ Makedoniabii lɛ, akɛ afi kome nɛ ni Akaiabii lɛ saa amɛhe amɛto, ni nyɛhiɛdɔɔ lɛ ekanya amɛteŋ mɛi pii. 3 Shi miitsu nyɛmimɛi lɛ, koni shwã ni wɔkɛ nyɛ shwãa lɛ akafee efolo yɛ enɛ gbɛfaŋ, ni nyɛsaa nyɛhe nyɛto lɛɛlɛŋ, tamɔ bɔ ni mikɛɛ akɛ nyɛbaafee lɛ. 4 Kɛjeee nakai lɛ, kɛ́ Makedoniabii lɛ kɛ mi ba, ni amɛbana nyɛ akɛ nyɛsako nyɛhe nyɛtoko lɛ, wɔhiɛ baagboi—jeee nyɛ pɛ nyɛhiɛ baagboi—yɛ wɔhiɛ ni wɔkɛfɔ̃ nyɛnɔ lɛ hewɔ. 5 No hewɔ lɛ, misusu akɛ ehe miihia ni mawo nyɛmimɛi lɛ hewalɛ koni amɛtsɔ hiɛ amɛba nyɛŋɔɔ ni amɛbasaa nikeenii babaoo ni nyɛwo he shi lɛ amɛto, koni efee klalo akɛ tsuijurɔ naa nikeenii shi jeee nɔ ko ni ashɔ̃ yɛ nɔnyɛɛ naa.
6 Shi yɛ enɛ gbɛfaŋ lɛ, mɔ fɛɛ mɔ ni lɛteɔ nii ahe eduɔ lɛ, ebaakpa fioo pɛ hu, ni mɔ fɛɛ mɔ ni duɔ babaoo lɛ baakpa babaoo hu.+ 7 Mɔ fɛɛ mɔ afee bɔ ni ekpɛ mli yɛ etsui mli, jeee kɛ mligbigbilimɔ* loo yɛ nɔnyɛɛ naa,+ ejaakɛ mɔ ni hãa kɛ miishɛɛ lɛ, lɛ Nyɔŋmɔ sumɔɔ.+
8 Agbɛnɛ hu, Nyɔŋmɔ baanyɛ ahã edromɔ lɛ fɛɛ afa kɛteke nɔ ahã nyɛ, koni be fɛɛ be lɛ, nyɛná nɔ fɛɛ nɔ ni he hiaa nyɛ yɛ nɔ fɛɛ nɔ mli, ni nyɛná babaoo kɛhã nitsumɔ kpakpa fɛɛ nitsumɔ kpakpa hu.+ 9 (Tamɔ bɔ ni aŋma lɛ, akɛ: “Ekeɔ mɔ nii waa;* ehãa ohiafoi lɛ nɔ. Ejalɛ nifeemɔi lɛ hiɔ shi kɛyaa naanɔ.”+ 10 Agbɛnɛ, mɔ ni kɛ dumɔwui babaoo hãa nidulɔ lɛ, ni ekɛ blodo hu hãa koni aye lɛ baahã nyɛ dumɔwui ni nyɛdu, ni ebaahã nyɛ babaoo ni ateke nɔ, ni ebaahã nyɛkpa jalɛ yibii babaoo.) 11 Yɛ nɔ fɛɛ nɔ mli lɛ, ajɔɔ nyɛ koni nyɛnyɛ nyɛfee ejurɔ yɛ gbɛi srɔtoi fɛɛ anɔ, ni no hãa atsɔɔ wɔnɔ akɛ shidaa hãa Nyɔŋmɔ; 12 ejaakɛ nɛkɛ sɔɔmɔ* nɛɛ, jeee akɛ akɛhãa koni akɛtsu mɛi krɔŋkrɔŋi+ lɛ ahiamɔ nii ahe nii jogbaŋŋ kɛkɛ, shi moŋ ehãa akɛ shidaa babaoo hu hãa Nyɔŋmɔ. 13 Yɛ odaseyeli ni yelikɛbuamɔ nibii ni akɛsɔmɔɔ mɛi nɛɛ kɛhãa lɛ hewɔ lɛ, amɛwoɔ Nyɔŋmɔ hiɛ nyam ejaakɛ nyɛbaa nyɛhe shi nyɛhãa Kristo lɛ he sane kpakpa lɛ, tamɔ bɔ ni nyɛjaje nyɛtsɔɔ lɛ, kɛ agbɛnɛ hu, akɛni nyɛjɛɔ nyɛtsui mli nyɛtsuɔ onia babaoo nyɛhãa amɛ, kɛ mɛi fɛɛ lɛ hewɔ.+ 14 Ni amɛsɔleɔ kɛ hiɛdɔɔ kɛkpaa fai amɛhãa nyɛ, ni amɛsumɔɔ nyɛ, ejaakɛ Nyɔŋmɔ dromɔ ni nɔ bɛ lɛ yɛ nyɛnɔ.
15 Shidaa ahã Nyɔŋmɔ yɛ edromɔ nikeenii ni anyɛŋ naa atsɔɔ lɛ hewɔ.