Kojolɔi

16 Be ko lɛ, Samson tee Gaza, ni ena ashawo yoo ko yɛ jɛmɛ ni etee yoo lɛ shĩa. 2 Ayakɛɛ Gazabii lɛ akɛ: “Samson eba biɛ.” No hewɔ lɛ, amɛbɔle he ni eyɔɔ lɛ* ni amɛtee amɛhe nyɔɔŋ muu fɛɛ yɛ maŋ lɛ agbó lɛ naa. Amɛhi jɛmɛ diŋŋ nyɔɔŋ muu lɛ fɛɛ, ni amɛkɛɛkɛɛ amɛhe akɛ: “Kɛ́ je tsɛre lɛ, wɔbaagbe lɛ.”

3 Shi Samson tee nɔ ekã jɛmɛ kɛyashi nyɔɔŋteŋ. Kɛkɛ ni ete shi nyɔɔŋteŋ ni emɔ maŋ lɛ agbó lɛ shinai lɛ kɛ ehe shinaatsei enyɔ lɛ mli, ni efã kɛ amɛsɛɛ adabaŋ* lɛ fɛɛ. Ekɛfɔ̃ ekɔɔŋ nɔ ni ekɛkwɔ kɛtee gɔŋ ni yɔɔ Hebron hiɛ lɛ yiteŋ.

4 No sɛɛ lɛ, eyasumɔ yoo ko ni atsɛɔ lɛ Delila+ ni yɔɔ Sorek Jɔɔ* lɛ mli lɛ. 5 No hewɔ lɛ, Filistibii lɛ anɔyelɔi lɛ tsi amɛbɛŋkɛ yoo lɛ ni amɛkɛɛ lɛ akɛ: “Lakamɔ lɛ,*+ ni etsɔɔ bo nɔ ni hãa enáa hewalɛ waa nakai lɛ, kɛ bɔ ni wɔɔfee wɔmɔ lɛ ni wɔfĩmɔ lɛ ni wɔye enɔ. Kɛ́ ofee nakai lɛ, wɔteŋ mɔ fɛɛ mɔ baahã bo jwiɛtɛi kapɛji 1,100.”

6 Sɛɛ mli lɛ, Delila kɛɛ Samson akɛ: “Ofainɛ tsɔɔmɔ mi he ni onáa ohewalɛ kpele lɛ kɛjɛɔ kɛ nɔ ni abaanyɛ akɛfĩmɔ bo koni aye onɔ.” 7 Samson kɛɛ lɛ akɛ: “Kɛ́ akɛ gãi mli kpãi* hei kpawo ni gbiko fĩmɔ mi lɛ, magbɔjɔ ni matsɔ tamɔ gbɔmɔ fɛɛ gbɔmɔ.” 8 No hewɔ lɛ, Filistibii lɛ anɔyelɔi lɛ kwɔ kɛba ni amɛbahã lɛ gãi mli kpãi hei kpawo ni gbiko, ni ekɛfĩmɔ lɛ. 9 Agbɛnɛ amɛbatee amɛhe yɛ sɛɛtsu lɛ mli, ni yoo lɛ bo etsɛ lɛ ekɛɛ: “Samson, Filistibii lɛ efã kɛba onɔ!” Kɛkɛ ni etserɛ gãi mli kpãi lɛ amli tamɔ bɔ ni klala mli kpãa* tseɔ kɛ́ la sa he lɛ.+ No hewɔ lɛ, anaaa nɔ ni hãa enáa hewalɛ lɛ.

10 Kɛkɛ ni Delila kɛɛ Samson akɛ: “Naa! ofee mi buulu,* ni olaka mi. Agbɛnɛ, ofainɛ, kɛɛmɔ mi, mɛni abaanyɛ akɛfĩmɔ bo.” 11 No hewɔ lɛ, ekɛɛ yoo lɛ akɛ: “Kɛ́ akɛ taŋkpei hei ni akɛtsuko nii pɛŋ fĩmɔ mi lɛ, magbɔjɔ ni matsɔ tamɔ gbɔmɔ fɛɛ gbɔmɔ.” 12 No hewɔ lɛ, Delila kɔ taŋkpei hei ni ekɛfĩmɔ lɛ, ni ebo ekɛɛ: “Samson, Filistibii lɛ efã kɛba onɔ!” (Nakai beiaŋ fɛɛ lɛ, mɛi lɛ etee amɛhe yɛ sɛɛtsu lɛ mli.) Ni etserɛ taŋkpei lɛ yɛ eniji ahe tamɔ kpãi legelegei komɛi.+

13 No sɛɛ lɛ, Delila kɛɛ Samson akɛ: “Kɛbashi amrɔ nɛɛ, ofee mi buulu ni olaka mi.+ Tsɔɔmɔ mi nɔ ni abaanyɛ akɛfĩmɔ bo.” Kɛkɛ ni ekɛɛ yoo lɛ akɛ: “Ja okɛ kpãa ni akɛloɔ nii elo miyiteŋ tsɔi ni agbɔ lɛ kakadaji kpawo lɛ.” 14 No hewɔ lɛ, ekɛ piŋ mɔmɔ amɛ ni ebo etsɛ lɛ ekɛɛ: “Samson, Filistibii lɛ efã kɛba onɔ!” No hewɔ lɛ, ete shi kɛjɛ wɔ lɛ mli ni ejie piŋ ni akɛloɔ nii lɛ kɛ kpãa ni akɛloɔ nii lɛ.

15 Agbɛnɛ yoo lɛ kɛɛ lɛ akɛ: “Te feɔ tɛŋŋ okɛɔ akɛ osumɔɔ mi,+ be ni otsui bɛ mihe? Shii etɛ sɔŋŋ nɛ ni ofee mi buulu ni otsɔko mi nɔ ni hãa onáa hewalɛ kpele lɛ.”+ 16 Akɛni daa gbi lɛ yoo lɛ miisu etsui ni ekɛ wiemɔi miigba enaa hewɔ lɛ, ehao* aahu akɛ jeŋ shihilɛ je etsine.+ 17 No hewɔ lɛ, agbɛnɛ ekɛɛ yoo lɛ nɔ ni yɔɔ etsui mli, akɛ: “Yishɛɛ kakla naa esako miyiteŋ pɛŋ, ejaakɛ Nazirnyo kɛhã Nyɔŋmɔ ji mi kɛjɛ mifɔmɔ mli.*+ Kɛ́ ashɛ miyi lɛ, mihewalɛ lɛ baaje mimli, ni magbɔjɔ ni matsɔ tamɔ gbɔmɛi krokomɛi fɛɛ.”

18 Be ni Delila na akɛ ekɛɛ lɛ nɔ ni yɔɔ etsui mli lɛ, oya nɔŋŋ ni etsu kɛtee Filistibii lɛ anɔyelɔi+ lɛ aŋɔɔ, ekɛɛ: “Nyɛkwɔa kɛbaa agbɛnɛ, ejaakɛ ekɛɛ mi nɔ ni yɔɔ etsui mli.” No hewɔ lɛ, Filistibii lɛ anɔyelɔi lɛ kwɔ kɛba eŋɔɔ, ni amɛkɛ shika lɛ ba. 19 Yoo lɛ wɔle lɛ yɛ enakutsei anaa; kɛkɛ ni etsɛ nuu lɛ ni ehã nuu lɛ shɛ eyiteŋ tsɔi ni agbɔ lɛ kakadaji kpawo lɛ. No sɛɛ lɛ, yoo lɛ bɔi enɔ hewalɛ namɔ, ejaakɛ ehewalɛ lɛ miije emli. 20 Agbɛnɛ yoo lɛ bo etsɛ lɛ ekɛɛ: “Samson, Filistibii lɛ efã kɛba onɔ!” Ete shi yɛ wɔ lɛ mli ni ekɛɛ: “Maje kpo tamɔ tsutsu lɛ,+ ni mahe mihe yɛ amɛdɛŋ.” Shi no mli lɛ, eleee akɛ Yehowa eshi lɛ. 21 No hewɔ lɛ, Filistibii lɛ mɔ lɛ, ni amɛfamɔ ehiŋmɛii. No sɛɛ lɛ, amɛkɛ lɛ kpeleke shi kɛtee Gaza, ni amɛkɛ akɔɔble gboklɛi enyɔ wo lɛ, ni amɛhãa egbɛlɛɔ nii yɛ tsuŋwoohe lɛ. 22 Shi eyiteŋ tsɔi ni ashɛ lɛ bɔi tsaa ekoŋŋ.+

23 Filistibii lɛ anɔyelɔi lɛ bua amɛhe naa koni amɛshã afɔle kpele ko amɛhã Dagon,+ amɛnyɔŋmɔ lɛ, ni amɛye gbi jurɔ ejaakɛ amɛkɛɛkɛɛ amɛhe akɛ: “Wɔnyɔŋmɔ lɛ ejie Samson, wɔhenyɛlɔ lɛ ewo wɔdɛŋ!” 24 Be ni mɛi lɛ na lɛ lɛ, amɛjie amɛnyɔŋmɔ lɛ yi amɛkɛɛ: “Wɔnyɔŋmɔ lɛ ejie wɔhenyɛlɔ lɛ, mɔ ni kpãtã wɔshikpɔŋ lɛ hiɛ+ ni egbe wɔteŋ mɛi babaoo+ lɛ ewo wɔdɛŋ.”

25 Akɛni amɛmii eshɛ amɛhe hewɔ lɛ, amɛkɛɛ akɛ: “Nyɛtsɛa Samson kɛbaa koni wɔŋmɔa lɛ.” No hewɔ lɛ, amɛkɛ Samson je kpo kɛjɛ tsuŋwoohe lɛ kɛba koni amɛŋmɔ lɛ; amɛhã edamɔ akulashiŋi enyɔ lɛ ateŋ. 26 Kɛkɛ ni Samson kɛɛ gbekɛ nuu ni hiɛ enineshi lɛ akɛ: “Hã matara akulashiŋi ni hiɛ shĩa lɛ mli lɛ ahe ni mamɔmɔ mli.” 27 (No mli lɛ, hii kɛ yei eyi shĩa lɛ tɔ. Filistibii lɛ anɔyelɔi lɛ fɛɛ yɛ jɛmɛ, ni hii kɛ yei aaafee 3,000 yɛ tsũ lɛ yiteŋ ni amɛmiikwɛ Samson ni amɛmiiŋmɔ lɛ.)

28 Agbɛnɛ, Samson+ bo etsɛ Yehowa ekɛɛ: “Ao, Nuŋtsɔ Ofe Yehowa, mi-Nyɔŋmɔ, ofainɛ, kaimɔ mi, ni ohã mi hewalɛ+ shi kome nɛɛ pɛ, ofainɛ, hã matɔ mihiŋmɛii enyɔ lɛ ateŋ ekome he owele yɛ Filistibii lɛ anɔ.”+

29 Kɛkɛ ni Samson mɔmɔ akulashiŋi enyɔ ni yɔɔ teŋ ni hiɛ shĩa lɛ mli lɛ amli, ekɛ eninejurɔ mɔ ekome mli ni ekɛ ebɛku hu mɔ ekroko lɛ mli. 30 Samson bo ekɛɛ: “Hã mikɛ* Filistibii lɛ agbo!” Kɛkɛ ni ekɛ ehewalɛ fɛɛ tsi akulashiŋi lɛ, ni shĩa lɛ kumɔ eshwie nɔyelɔi lɛ kɛ mɛi ni yɔɔ jɛmɛ lɛ fɛɛ anɔ.+ No hewɔ lɛ, mɛi ni egbe be ni egboɔ lɛ ayi fa fe mɛi ni egbe yɛ ewala beiaŋ.+

31 Sɛɛ mli lɛ, enyɛmimɛi hii lɛ kɛ etsɛ wekumɛi lɛ fɛɛ kpeleke shi kɛba koni amɛbawó lɛ kɛya. Amɛkɛ lɛ kwɔ kɛtee ni amɛyafu lɛ yɛ Zora+ kɛ Eshtaol teŋ yɛ he ni afu etsɛ Manoa+ yɛ lɛ. No mli lɛ, ekojo Israel afii 20.+