Klɛŋklɛŋ Wolo Ni Akɛmaje Korintobii Lɛ
4 Esa akɛ gbɔmɛi abu wɔ akɛ wɔji Kristo sɔɔlɔi* kɛ shĩa nɔkwɛlɔi ni atu Nyɔŋmɔ teemɔŋ saji krɔŋkrɔŋi lɛ awo amɛdɛŋ.+ 2 Yɛ enɛ mli lɛ, nɔ ni akpaa gbɛ yɛ shĩa nɔkwɛlɔi adɛŋ ji, ni ana amɛ akɛ anɔkwafoi. 3 Agbɛnɛ, kɛji nyɛ loo gbɔmɛi asaneyelihe ko baapɛi mimli lɛ, mibuuu no akɛ sane ko ni he hiaa. Anɔkwa, mi diɛŋtsɛ po mipɛiii mimli. 4 Ejaakɛ mileee nɔ ko fɔŋ ko yɛ mi diɛŋtsɛ mihe. Shi jeee no baatsɔɔ akɛ jalɔ ji mi; mɔ ni pɛiɔ mimli ji Yehowa.*+ 5 No hewɔ lɛ, nyɛkakojoa+ nɔ ko dani be lɛ ashɛ, kɛyashi Nuŋtsɔ lɛ baaba. Ekɛ duŋ mli teemɔŋ nibii lɛ baaba la hiɛ, ni ebaahã ale tsuiiaŋ yiŋtoi lɛ, kɛkɛ lɛ mɔ fɛɛ mɔ nine baashɛ eyijiemɔ nɔ kɛjɛ Nyɔŋmɔ ŋɔɔ.+
6 Agbɛnɛ, nyɛmimɛi, mikɛ nibii nɛɛ to mi kɛ Apolo+ he* akɛ nɔkwɛmɔnɔ yɛ nyɛhilɛkɛhamɔ hewɔ, koni nyɛtsɔ wɔnɔ nyɛkase shishitoo mla nɛɛ, akɛ: “Nyɛkatekea nibii ni aŋmala lɛ,” koni nyɛkawó nyɛhe nɔ,+ ni nyɛbu mɔ ko akɛ ehi fe mɔ kroko. 7 Ejaakɛ namɔ hãa esoroɔ bo yɛ mɔ kroko he? Anɔkwa, mɛni oyɔɔ ni jeee hã ahã bo?+ No hewɔ lɛ, kɛ́ hã ahã bo lɛ, mɛni hewɔ oshwãa tamɔ nɔ ni jeee hã ahã bo lɛ?
8 Ani nyɛtɔrɔ momo? Ani nyɛtsɔmɔ niiatsɛmɛi momo? Ani nyɛbɔi nɔyeli akɛ maŋtsɛmɛi+ ni wɔfataaa he? Miná ni kulɛ nyɛbɔi nɔyeli akɛ maŋtsɛmɛi lɛɛlɛŋ, koni wɔ hu wɔfata nyɛhe kɛye nɔ akɛ maŋtsɛmɛi.+ 9 Ejaakɛ efeɔ mi akɛ Nyɔŋmɔ kɛ wɔ, ni ji bɔfoi lɛ efee naagbee mɛi ni akɛbaatsɔɔ akɛ hii ni abu amɛ gbele fɔ,+ ejaakɛ wɔtsɔmɔ nifeelɔi yɛ he ko ni akwɛɔ shwɛmɔ yɛ wɔhã je lɛ+ kɛ ŋwɛibɔfoi kɛ gbɔmɛi. 10 Kristo hewɔ lɛ, kwashiai ji wɔ,+ shi nyɛ lɛ hiɛshikalɔi ji nyɛ yɛ Kristo hewɔ; wɔhe waaa, shi nyɛ lɛ, nyɛhe wa; awoɔ nyɛhiɛ nyam, shi wɔ lɛ, wɔhiɛ bɛ nyam. 11 Kɛbashi ŋmɛlɛtswaa nɛɛ nɔ lɛ, hɔmɔ+ kɛ kumai+ yeɔ wɔ, ni wɔwooo atade kpakpa ko,* ni ayiɔ wɔ,*+ ni wɔbɛ shihilɛhe ko, 12 ni wɔgboɔ deŋme, ni wɔkɛ wɔ diɛŋtsɛ wɔniji tsuɔ nii.+ Be ni aajɛ wɔ lɛ, wɔmiijɔɔ;+ be ni aawa wɔ yi lɛ, wɔmiifi shi kɛ tsuishitoo;+ 13 be ni aawie wɔhe efɔŋ lɛ, wɔmiijie naa kɛ mlijɔlɛ;*+ wɔtsɔmɔ tamɔ bɔɔla yɛ je lɛ mli, nibii fɛɛ amli jwɛi, kɛbashi amrɔ nɛɛ.
14 Miŋmaaa nibii nɛɛ koni mikɛwo nyɛ hiɛgbele, shi moŋ koni mikɛwie mitsɔɔ nyɛ akɛ mibii ni misumɔɔ. 15 Ejaakɛ kɛji nyɛyɛ gbɛtsɔɔlɔi* 10,000 yɛ Kristo mli po lɛ, ekã shi faŋŋ akɛ nyɛbɛ tsɛmɛi babaoo; ejaakɛ mitsɔ sane kpakpa lɛ nɔ mitsɔ nyɛtsɛ yɛ Kristo Yesu mli.+ 16 No hewɔ lɛ, miiwo nyɛ hewalɛ ni nyɛkase mi.+ 17 No hewɔ ni miitsu Timoteo nyɛŋɔɔ nɛɛ, ejaakɛ eji mibi ni misumɔɔ kɛ anɔkwafo yɛ Nuŋtsɔ lɛ mli. Ebaakai nyɛ gbɛi ni mitsɔɔ nɔ mifeɔ nii* yɛ Kristo Yesu mli lɛ,+ tamɔ bɔ ni miyaa nɔ mitsɔɔ yɛ asafo fɛɛ asafo mli yɛ he fɛɛ he lɛ.
18 Akɛni nyɛteŋ mɛi komɛi susuɔ akɛ mibaŋ nyɛŋɔɔ hewɔ lɛ, amɛmiiwó amɛhe nɔ. 19 Shi kɛ́ Yehowa* miisumɔ lɛ, etsɛŋ ni maba nyɛŋɔɔ, ni maná male mɛi ni wóɔ amɛhe nɔ lɛ ahewalɛ, shi jeee amɛwiemɔi. 20 Ejaakɛ Nyɔŋmɔ Maŋtsɛyeli lɛ, jeee wiemɔ mli anaa yɛ, shi moŋ hewalɛ mli. 21 Te nɔ ni nyɛsumɔɔ? Ani mihiɛ tso kɛba nyɛŋɔɔ,+ aloo miba kɛ suɔmɔ kɛ mlijɔlɛ mumɔ?