1 Kronika
24 Bɔ ni aja Aaron seshibii lɛ amli awo kuikui amli lɛ nɛ: Aaron bihii ji Nadab, kɛ Abihu,+ kɛ Eleazar, kɛ Itamar.+ 2 Shi Nadab kɛ Abihu gboi yɛ amɛpapa hiɛ,+ ni amɛfɔɔɔ bihii; shi Eleazar+ kɛ Itamar tee nɔ amɛsɔmɔ akɛ osɔfoi. 3 David, kɛ agbɛnɛ hu, Zadok+ ni jɛ Eleazar bihii lɛ ateŋ lɛ, kɛ Ahimelek ni jɛ Itamar bihii lɛ ateŋ lɛ, ja amɛmli amɛwo kuikui amli yɛ amɛsɔɔmɔ nitsumɔ lɛ naa. 4 Akɛni Eleazar bihii lɛ ateŋ shĩa onukpai lɛ fa fe Itamar bihii lɛ ateŋ shĩa onukpai lɛ hewɔ lɛ, amɛja amɛmli yɛ amɛshĩa onukpai lɛ anaa: Eleazar bihii lɛ yɛ shĩa onukpai 16 yɛ amɛtsɛmɛi ashĩai lɛ anaa, ni Itamar bihii lɛ yɛ shĩa onukpai 8 yɛ amɛtsɛmɛi ashĩai lɛ anaa.
5 Amɛfɔ̃ oshiki kɛja amɛmli,+ kɛ́ afɔ̃ oshiki yɛ kuu nɛɛ nɔ lɛ, kɛkɛ lɛ afɔ̃ oshiki yɛ kuu kroko lɛ hu nɔ, ejaakɛ Eleazar kɛ Itamar bihii lɛ fɛɛ ateŋ aná nɔkwɛlɔi kɛhã he krɔŋkrɔŋ lɛ kɛ nɔkwɛlɔi kɛhã anɔkwa Nyɔŋmɔ lɛ yɛ. 6 Kɛkɛ ni Netanel binuu Shemaia, ni ji Levibii lɛ awoloŋmalɔ lɛ ŋmala amɛgbɛ́i yɛ maŋtsɛ lɛ, kɛ lumɛi lɛ, kɛ osɔfo Zadok,+ kɛ Abiatar+ binuu Ahimelek,+ kɛ osɔfoi lɛ atsɛmɛi ashĩai onukpai lɛ kɛ Levibii lɛ atsɛmɛi ashĩai onukpai lɛ fɛɛ ahiɛ, kɛ́ ahala tsɛmɛi ashĩa kome yɛ Eleazar lɛ, kɛkɛ lɛ ahala tsɛmɛi ashĩa kome yɛ Itamar.
7 Klɛŋklɛŋ oshiki ni afɔ̃ lɛ yagbee Yehoiarib nɔ; nɔ ni ji enyɔ lɛ yagbee Yedaia nɔ, 8 nɔ ni ji etɛ lɛ yagbee Harim nɔ, nɔ ni ji ejwɛ lɛ yagbee Seorim nɔ, 9 nɔ ni ji enumɔ lɛ yagbee Malkia nɔ, nɔ ni ji ekpaa lɛ yagbee Miyamin nɔ, 10 nɔ ni ji kpawo lɛ yagbee Hakoz nɔ, nɔ ni ji kpaanyɔ lɛ yagbee Abiya+ nɔ, 11 nɔ ni ji nɛɛhu lɛ yagbee Yeshua nɔ, nɔ ni ji nyɔŋma lɛ yagbee Shekania nɔ, 12 nɔ ni ji 11 lɛ yagbee Eliashib nɔ, nɔ ni ji 12 lɛ yagbee Yakim nɔ, 13 nɔ ni ji 13 lɛ yagbee Hupa nɔ, nɔ ni ji 14 lɛ yagbee Yeshebeab nɔ, 14 nɔ ni ji 15 lɛ yagbee Bilga nɔ, nɔ ni ji 16 lɛ yagbee Imer nɔ, 15 nɔ ni ji 17 lɛ yagbee Hezir nɔ, nɔ ni ji 18 lɛ yagbee Hapizez nɔ, 16 nɔ ni ji 19 lɛ yagbee Petahia nɔ, nɔ ni ji 20 lɛ yagbee Yehezekel nɔ, 17 nɔ ni ji 21 lɛ yagbee Yakin nɔ, nɔ ni ji 22 lɛ yagbee Gamul nɔ, 18 nɔ ni ji 23 lɛ yagbee Delaia nɔ, nɔ ni ji 24 lɛ yagbee Maazia nɔ.
19 Kɛ́ amɛba Yehowa shĩa lɛ, bɔ ni ato amɛnitsumɔ lɛ he gbɛjianɔ ahã nɛ,+ tamɔ bɔ ni amɛtsɛ Aaron eto gbɛjianɔ yɛ bɔ ni Yehowa, Israel Nyɔŋmɔ lɛ fã lɛ lɛ naa pɛpɛɛpɛ lɛ.
20 Ni Levibii krokomɛi hu nɛ: yɛ Amram+ bihii lɛ ateŋ lɛ, Shubael;+ yɛ Shubael bihii lɛ ateŋ lɛ, Yedeia; 21 Rehabia+ seshibii lɛ hu nɛ: yɛ Rehabia bihii lɛ ateŋ lɛ, Ishia ji onukpa; 22 yɛ Izeharbii lɛ ateŋ lɛ, Shelomot;+ yɛ Shelomot bihii lɛ ateŋ lɛ, Yahat; 23 ni yɛ Hebron bihii lɛ ateŋ lɛ, Yeria+ ji onukpa, mɔ ni ji enyɔ nɔ ji Amaria, ni mɔ ni ji etɛ nɔ ji Yahaziel, ni mɔ ni ji ejwɛ nɔ ji Yekameam; 24 yɛ Uziel bihii lɛ ateŋ lɛ, Mika; ni yɛ Mika bihii lɛ ateŋ lɛ, Shamir. 25 Mika nyɛmi nuu ji Ishia; ni yɛ Ishia bihii lɛ ateŋ lɛ, Zakaria.
26 Merari+ bihii ji Mali kɛ Mushi; yɛ Yaazia bihii lɛ ateŋ lɛ, Beno. 27 Merari seshibii* nɛ: Yaazia bihii ji Beno, kɛ Shoham, kɛ Zakur, kɛ Ibri; 28 Mali binuu ji Eleazar, mɔ ni fɔɔɔ binuu ko lɛ;+ 29 Kish seshibii nɛ: yɛ Kish bihii lɛ ateŋ lɛ, Yerameel; 30 ni Mushi bihii ji Mali, kɛ Eder, kɛ Yerimot.
Mɛnɛɛmɛi ji Levibii yɛ amɛtsɛmɛi ashĩai lɛ anaa. 31 Ni amɛ hu amɛfɔ̃ oshiki+ tamɔ bɔ ni amɛnyɛmimɛi hii, ni ji Aaron bihii lɛ fee yɛ Maŋtsɛ David, kɛ Zadok, kɛ Ahimelek, kɛ osɔfoi lɛ atsɛmɛi ashĩai onukpai lɛ kɛ Levibii lɛ atsɛmɛi ashĩai onukpai lɛ fɛɛ ahiɛ lɛ. Yɛ tsɛmɛi ashĩai lɛ agbɛfaŋ lɛ, onukpa lɛ kɛ enyɛmi nuu gbekɛ lɛ fɛɛ lɛ, ekome ni.