Klɛŋklɛŋ Wolo Ni Akɛmaje Korintobii Lɛ

14 Nyɛtiua suɔmɔ sɛɛ, shi nyɛbɔa mɔdɛŋ waa ni nyɛnáa* nikeenii ni jɛ Nyɔŋmɔ ŋɔɔ lɛ, shi titri lɛ, koni nyɛgba.+ 2 Ejaakɛ mɔ ni wieɔ wiemɔ kroko lɛ, jeee gbɔmɛi ekɛwieɔ, shi moŋ Nyɔŋmɔ, ejaakɛ mɔ ko mɔ ko booo toi,+ shi etsɔɔ mumɔ lɛ nɔ ewieɔ teemɔŋ saji krɔŋkrɔŋi.+ 3 Shi mɔ ni gbaa lɛ tsɔɔ ewiemɔ nɔ etswaa mɛi emaa shi, ni ewoɔ mɛi hewalɛ, ni eshɛjeɔ mɛi amii. 4 Mɔ ni wieɔ wiemɔ kroko lɛ tswaa lɛ diɛŋtsɛ ehe emaa shi, shi mɔ ni gbaa lɛ tswaa asafo emaa shi. 5 Agbɛnɛ, kulɛ masumɔ ni nyɛ fɛɛ nyɛwie wiemɔi srɔtoi,+ shi masumɔ moŋ akɛ nyɛgba.+ Yɛ anɔkwale mli lɛ, mɔ ni gbaa lɛ, efe mɔ ni wieɔ wiemɔi srɔtoi, ja mɔ ni wieɔ wiemɔi srɔtoi lɛ etsɔɔ shishi, koni no atswa asafo lɛ ema shi. 6 Shi amrɔ nɛɛ, nyɛmimɛi, kɛ́ miba nyɛŋɔɔ mibawie wiemɔi srɔtoi lɛ, mɛɛ ekpakpa mafee nyɛ kɛ́ mikɛ kpojiemɔ+ loo nilee+ loo gbalɛ loo nitsɔɔmɔ hu ewieee mitsɔɔɔ nyɛ?

7 Nakai nɔŋŋ eji yɛ nibii ni wala bɛ amɛmli ni gbɛɔ lɛ hu agbɛfaŋ, obɛnta jio, saŋku jio. Kɛji egbɛɛɛ gbɛɛmɔ srɔtoisrɔtoi lɛ, te aaafee tɛŋŋ ayɔse nɔ obɛnta ni akpãa lɛ, aloo nɔ saŋku ni atswaa lɛ? 8 Ejaakɛ kɛji tɛtɛrɛmantɛrɛ lɛ egbɛɛɛ gbɛɛmɔ ni yɔɔ faŋŋ lɛ, namɔ baasaa ehe kɛhã ta? 9 Nakai nɔŋŋ nyɛ hu, kɛ́ nyɛkɛ lilɛi lɛ ewieee wiemɔi ni shishinumɔ waaa lɛ, te mɔ aaafee tɛŋŋ ele nɔ ni akɛɔ lɛ? Anɔkwa, no baatsɔɔ akɛ nyɛmiiwie nyɛmiiwo kɔɔyɔɔ lɛ mli. 10 Eeenyɛ efee akɛ wiemɔi srɔtoi babaoo yɔɔ je lɛ mli, shi eko eko bɛ ni kɛ́ awie lɛ mɔ ko mɔ ko nuuu shishi. 11 No hewɔ lɛ, kɛ́ minuuu wiemɔ lɛ shishi lɛ, matsɔ maŋsɛɛnyo mahã mɔ ni wieɔ lɛ, ni mɔ ni wieɔ lɛ hu baatsɔ maŋsɛɛnyo ehã mi. 12 No hewɔ lɛ, nyɛ hu, akɛni nyɛkɛ hiɛdɔɔ miitao mumɔ lɛ nikeenii lɛ hewɔ lɛ, nyɛbɔa mɔdɛŋ ni nyɛnáa nikeenii ni baatswa asafo lɛ ama shi lɛ babaoo ni eteke nɔ.+

13 No hewɔ lɛ, mɔ ni wieɔ wiemɔ kroko lɛ, esɔle koni enyɛ etsɔɔ shishi hu.+ 14 Ejaakɛ kɛ́ miisɔle yɛ wiemɔ kroko mli lɛ, mumɔ lɛ nikeenii ni akɛhã mi lɛ ni sɔleɔ lɛ, shi mijwɛŋmɔ lɛ wooo yibii ko. 15 No hewɔ lɛ, mɛni mɔ? Mikɛ mumɔ lɛ nikeenii lɛ baasɔle, shi mikɛ mijwɛŋmɔ hu baasɔle. Mikɛ mumɔ lɛ nikeenii lɛ baalá yijiemɔ lala, shi mikɛ mijwɛŋmɔ hu baalá yijiemɔ lala. 16 Kɛjeee nakai lɛ, kɛ́ okɛ mumɔ lɛ nikeenii lɛ ŋɔ yijiemɔ ohã lɛ, te gbɔmɔ folo ko ni yɔɔ nyɛteŋ lɛ aaafee tɛŋŋ ehere oshidaa lɛ nɔ akɛ “Amen,” akɛni eleee nɔ ni okɛɔ lɛ? 17 Anɔkwa, nyɛmiida shi jogbaŋŋ moŋ, shi no etswaaa mɔ kroko lɛ emaaa shi. 18 Miida Nyɔŋmɔ shi akɛ miwieɔ wiemɔi srɔtoi babaoo fe nyɛ fɛɛ. 19 Shi kɛ́ miyɛ asafo ko mli lɛ, mikɛ mijwɛŋmɔ baawie wiemɔkulibii enumɔ* koni mikɛtsɔɔ* mɛi krokomɛi nii moŋ, fe nɔ ni mikɛ wiemɔ kroko mli wiemɔkulibii akpei nyɔŋma baawie.+

20 Nyɛmimɛi, nyɛkatsɔmɔa gbekɛbii bibii yɛ nyɛniiashishinumɔ gbɛfaŋ,+ shi nyɛfea nyɛhe gbekɛbii bibii yɛ efɔŋ gbɛfaŋ;+ ni nyɛtsɔmɔa mɛi ni edara yɛ nyɛniiashishinumɔ gbɛfaŋ.+ 21 Aŋma yɛ Mla lɛ mli akɛ: “‘Matsɔ maŋsɛɛ wiemɔi kɛ mɛikpɔji anaabui anɔ mikɛ maŋ nɛɛ awie, ni no hu po lɛ, amɛboŋ mi toi,’ Yehowa* kɛɛ.”+ 22 No hewɔ lɛ, wiemɔi srɔtoi jeee okadi kɛhã mɛi ni heɔ Nuŋtsɔ lɛ nɔ amɛyeɔ lɛ, shi moŋ kɛhã mɛi ni heee yeee lɛ,+ ni gbalɛ hu jeee mɛi ni heee yeee lɛ anɔ, shi moŋ mɛi ni heɔ Nuŋtsɔ lɛ nɔ amɛyeɔ lɛ anɔ ni. 23 No hewɔ lɛ, kɛ́ asafo muu lɛ fɛɛ bua amɛhe naa yɛ he kome ni amɛ fɛɛ amɛmiiwie wiemɔi srɔtoi, shi mɛi foji loo mɛi ni heee yeee ba jɛmɛ lɛ, ani amɛkɛŋ akɛ nyɛmiiye sɛkɛ? 24 Shi kɛ́ nyɛ fɛɛ nyɛmiigba ni mɔ ko ni heee yeee, loo mɔ folo ko ba jɛmɛ lɛ, mɛi lɛ fɛɛ baajaje lɛ, ni amɛbaapɛi emli jogbaŋŋ. 25 Kɛkɛ lɛ, etsui mli teemɔŋ saji lɛ baaje kpo faŋŋ, ni ekɛ ehiɛ baabu shi ni ejá Nyɔŋmɔ ekɛɛ akɛ: “Nyɔŋmɔ yɛ nyɛteŋ lɛɛlɛŋ.”+

26 No hewɔ lɛ, nyɛmimɛi, mɛni esa akɛ afee mɔ? Kɛ́ nyɛbua nyɛhe naa, ni mɔ ko yɛ lala ko, ni mɔ ko hu yɛ tsɔɔmɔ ko, ni mɔ kroko hu yɛ kpojiemɔ ko, ni mɔ kroko hu yɛ wiemɔ srɔto ko, ni mɔ kroko hu yɛ shishitsɔɔmɔ ko lɛ,+ nyɛfea nibii fɛɛ bɔ ni baatswa mɛi ama shi. 27 Ni kɛ́ mɔ ko baawie wiemɔ kroko lɛ, esa akɛ efee mɛi enyɔ loo kɛ́ efa aahu lɛ, mɛi etɛ pɛ, ni ato naa awie, ni esa akɛ mɔ ko atsɔɔ shishi.+ 28 Shi kɛ́ shishitsɔɔlɔ ko bɛ lɛ, esa akɛ efee diŋŋ yɛ asafo lɛ mli ni ekɛ lɛ diɛŋtsɛ ehe kɛ Nyɔŋmɔ awie. 29 Gbalɔi enyɔ loo etɛ awie,+ ni mɛi ni eshwɛ lɛ akɔ nɔ ni gbalɛ lɛ tsɔɔ lɛ sɛɛ. 30 Shi kɛ́ mɔ kroko ná kpojiemɔ be ni eta jɛmɛ lɛ, mɔ ni wieɔ lɛ afee diŋŋ. 31 Ejaakɛ nyɛ fɛɛ nyɛbaanyɛ nyɛgba, shi nyɛtoa naa nyɛfea, koni mɛi fɛɛ akase nii ni awo mɛi fɛɛ hewalɛ.+ 32 Kɛ́ gbalɔi lɛ kɛ nikeenii ni jɛ Nyɔŋmɔ ŋɔɔ ni akɛhã amɛ lɛ miitsu nii lɛ, amɛkudɔ bɔ ni amɛkɛtsuɔ nii amɛhãa lɛ. 33 Ejaakɛ Nyɔŋmɔ lɛ, ejeee basabasafeemɔ Nyɔŋmɔ, shi moŋ toiŋjɔlɛ Nyɔŋmɔ ni.+

Tamɔ bɔ ni eyɔɔ yɛ mɛi krɔŋkrɔŋi lɛ asafoi lɛ fɛɛ amli lɛ, 34 yei lɛ afee diŋŋ yɛ asafoi lɛ amli, ejaakɛ aŋmɛɛɛ amɛ gbɛ ni amɛwie.+ Shi moŋ amɛba amɛhe shi amɛwo hii lɛ ashishi,+ tamɔ bɔ ni Mla lɛ hu kɛɔ lɛ. 35 Kɛ́ amɛmiitao amɛkase nɔ ko lɛ, amɛbi amɛwumɛi yɛ shĩa, ejaakɛ eyɛ hiɛgbele akɛ yoo baawie yɛ asafo lɛ mli.

36 Ani nyɛŋɔɔ Nyɔŋmɔ wiemɔ lɛ jɛ, aloo nyɛ pɛ nyɛŋɔɔ eba?

37 Kɛ́ mɔ ko susuɔ akɛ gbalɔ ji lɛ loo eyɛ mumɔ lɛ nikeenii lɛ, esa akɛ ekpɛlɛ nɔ akɛ nibii ni miŋmaa nyɛ lɛ, Nuŋtsɔ lɛ kitãi ni. 38 Shi kɛ́ mɔ ko kpoo enɛ lɛ, lɛ hu abaakpoo lɛ.* 39 No hewɔ lɛ, minyɛmimɛi, nyɛyaa nɔ nyɛbɔa mɔdɛŋ waa akɛ nyɛbaagba,+ shi nyɛkatsĩa wiemɔi srɔtoi wiemɔ anaa.+ 40 Shi moŋ nyɛfea nibii fɛɛ bɔ ni yɔɔ fɛo, kɛ agbɛnɛ hu, yɛ gbɛjianɔtoo naa.*+