2 Kronika
35 Kɛkɛ ni Yosia ye Hehoo+ ehã Yehowa yɛ Yerusalem, ni amɛgbe kooloo ni akɛbaaye Hehoo lɛ+ yɛ klɛŋklɛŋ nyɔɔŋ lɛ gbi ni ji 14 lɛ nɔ.+ 2 Ehã osɔfoi lɛ yatsu amɛnitsumɔi lɛ ekoŋŋ, ni ewo amɛ hewalɛ koni amɛtsu nitsumɔ ni amɛtsuɔ yɛ Yehowa shĩa lɛ.+ 3 Kɛkɛ ni ekɛɛ Levibii lɛ, mɛi ni tsɔɔ Israelbii lɛ fɛɛ nii lɛ,+ ni ji mɛi ni afee amɛ krɔŋkrɔŋ ahã Yehowa lɛ akɛ: “Nyɛkɛ Adeka krɔŋkrɔŋ lɛ ayamaa shĩa ni Solomon, David binuu lɛ ma lɛ mli;+ eteremɔ kãaa nyɛkɔɔŋ nɔ dɔŋŋ.+ Agbɛnɛ, nyɛsɔmɔa Yehowa, nyɛ-Nyɔŋmɔ lɛ kɛ ewebii Israel. 4 Ni nyɛsaa nyɛhe yɛ nyɛtsɛmɛi ashĩai lɛ anaa yɛ nyɛkui lɛ anaa yɛ nɔ ni Israel maŋtsɛ David+ kɛ ebinuu Solomon eŋma lɛ naa.+ 5 Nyɛdamɔa he krɔŋkrɔŋ lɛ yɛ nyɛnyɛmimɛi hii, ni ji maŋbii ni eshwɛ lɛ atsɛmɛi ashĩai lɛ anaa, bɔ ni nyɛnyɛmimɛi hii lɛ atsɛmɛi ashĩa fɛɛ tsɛmɛi ashĩa baaná Levibii lɛ atsɛmɛi ashĩa kome ni baasɔmɔ amɛ. 6 Nyɛgbea kooloo ni akɛbaaye Hehoo lɛ,+ ni nyɛfea nyɛhe krɔŋkrɔŋ ni nyɛsaa nyɛhãa nyɛnyɛmimɛi hii lɛ koni nyɛye Yehowa wiemɔ ni etsɔ Mose nɔ ekɛhã lɛ nɔ.”
7 Yosia hã maŋbii lɛ toi, gwantɛŋhii kɛ abotiahii, koni akɛshã Hehoo afɔlei lɛ ahã mɛi fɛɛ ni yɔɔ jɛmɛ lɛ, toi 30,000 kɛ tsinai 3,000. Ejɛ maŋtsɛ lɛ diɛŋtsɛ nibii lɛ amli.+ 8 Elumɛi lɛ hu jɛ amɛsuɔmɔ mli amɛhã maŋbii lɛ, kɛ osɔfoi lɛ, kɛ Levibii lɛ nii. Hilkia,+ kɛ Zakaria, kɛ Yehiel, ni ji anɔkwa Nyɔŋmɔ lɛ shĩa lɛ hiɛnyiɛlɔi lɛ hã osɔfoi lɛ toi 2,600 kɛhã Hehoo afɔlei lɛ kɛ tsinai 300. 9 Konania kɛ Shemaia kɛ Netanel ni ji enyɛmimɛi hii lɛ kɛ agbɛnɛ hu Hashabia, kɛ Yeiel, kɛ Yozabad, ni ji Levibii lɛ anukpai lɛ hã Levibii lɛ toi 5,000 kɛhã Hehoo afɔlei lɛ kɛ tsinai 500.
10 Ato gbɛjianɔ kɛhã sɔɔmɔ lɛ, ni osɔfoi lɛ yadamɔ amɛgbɛhei lɛ, ni Levibii lɛ hu yadamɔ shi yɛ amɛkui lɛ anaa,+ tamɔ bɔ ni maŋtsɛ lɛ efã lɛ. 11 Amɛgbe kooloi ni akɛbaaye Hehoo lɛ,+ ni osɔfoi lɛ kɛ lá ni Levibii lɛ kɛhã amɛ lɛ shwã afɔleshaa latɛ lɛ nɔ,+ shi Levibii lɛ kpɔlɔ kooloi lɛ ahe woji lɛ.+ 12 No sɛɛ lɛ, amɛsaa shãa afɔlei lɛ koni amɛja amɛhã maŋbii ni eshwɛ ni ato amɛnaa yɛ tsɛmɛi ashĩai anaa lɛ, koni amɛkɛhã Yehowa tamɔ bɔ ni aŋma yɛ Mose wolo lɛ mli lɛ; ni nakai nɔŋŋ amɛfee tsinai lɛ hu. 13 Amɛhoo* Hehoo afɔle lɛ yɛ la nɔ tamɔ bɔ ni afeɔ lɛ;+ ni amɛhoo afɔlei krɔŋkrɔŋi lɛ yɛ dadesɛŋi, kɛ kukwɛii, kɛ pan srɔtoi amli, ni amɛkɛbahã maŋbii ni eshwɛ lɛ fɛɛ oya. 14 Kɛkɛ ni amɛsaa Hehoo afɔlei lɛ amɛhã amɛ diɛŋtsɛ amɛhe kɛ osɔfoi lɛ hu, ejaakɛ osɔfoi lɛ, ni ji Aaron seshibii lɛ shã shãa afɔlei lɛ kɛ afɔlei lɛ ahe fɔi lɛ kɛyashi je na, no hewɔ lɛ, Levibii lɛ saa Hehoo afɔlei lɛ amɛhã amɛ diɛŋtsɛ amɛhe kɛ osɔfoi lɛ, ni ji Aaron seshibii lɛ hu.
15 Ni lalɔi lɛ, ni ji Asaf bihii lɛ,+ yadamɔ amɛgbɛhei lɛ yɛ David,+ kɛ Asaf,+ kɛ Heman, kɛ Yedutun+ ni ji maŋtsɛ lɛ ninalɔ lɛ, famɔ naa; ni agbonaakwɛlɔi lɛ yɛ agbó fɛɛ agbó naa.+ Akɛni amɛnyɛmimɛi hii Levibii lɛ esaa Hehoo afɔlei lɛ amɛhã amɛ hewɔ lɛ, ehe ehiaaa ni amɛshiɔ amɛnitsumɔ lɛ. 16 No hewɔ lɛ, ato Yehowa sɔɔmɔ lɛ fɛɛ he gbɛjianɔ nakai gbi lɛ koni aye Hehoo lɛ,+ ni agbɛnɛ hu, ashã shãa afɔlei lɛ yɛ Yehowa afɔleshaa latɛ lɛ nɔ tamɔ bɔ ni Maŋtsɛ Yosia efã lɛ.+
17 Israelbii ni yɔɔ jɛmɛ lɛ ye Hehoo lɛ yɛ nakai beiaŋ ni amɛye Blodo Ni Ashikishaŋ-sha* Bɛ Mli Gbi Jurɔ lɛ gbii kpawo.+ 18 Kɛjɛ gbalɔ Samuel gbii lɛ amli lɛ, ayeko Hehoo ko ni tamɔ enɛ dã; ni Israel maŋtsɛmɛi lɛ eko eko hu yeko Hehoo ko ni tamɔ nɔ ni Yosia,+ kɛ osɔfoi lɛ, kɛ Levibii lɛ, kɛ Yudabii kɛ Israelbii fɛɛ ni yɔɔ jɛmɛ lɛ, kɛ Yerusalembii lɛ ye lɛ eko dã. 19 Yosia nɔyeli afi ni ji 18 lɛ nɔ aye nɛkɛ Hehoo nɛɛ.
20 Enɛ fɛɛ sɛɛ be ni Yosia esaa sɔlemɔ shĩa lɛ, Ejipt maŋtsɛ Neko+ kwɔ kɛba Karkemish yɛ Yufrate Faa lɛ he koni ebawu ta. Kɛkɛ ni Yosia je kpo koni ekɛ lɛ ayawu ta.+ 21 No hewɔ lɛ, etsu mɛi kɛtee Yosia ŋɔɔ ekɛɛ: “Yuda maŋtsɛ, ani enɛ lɛ ohe sane ko? Jeee bo mibaa mikɛbawu ta ŋmɛnɛ gbi nɛɛ, shi shĩa kroko mikɛná lɛ, ni Nyɔŋmɔ kɛɛ mifee oya. Kɛ́ osumɔɔɔ ohe sane lɛ, kaate shi owo Nyɔŋmɔ, mɔ ni kɛ mi yɔɔ lɛ, kɛjeee nakai lɛ ebaakpãtã ohiɛ.” 22 Shi Yosia ekuuu esɛɛ kɛjeee Neko sɛɛ, shi moŋ etsake ehe koni akayoo lɛ+ koni ekɛ lɛ ayawu, ni ebooo Neko wiemɔi ni jɛ Nyɔŋmɔ naa lɛ toi. No hewɔ lɛ, eba ebawu yɛ Megido Ŋa lɛ nɔ.+
23 Ni gãitsɛ̃lɔi lɛ tsɛ̃ Maŋtsɛ Yosia gãi, ni maŋtsɛ lɛ kɛɛ etsuji lɛ akɛ: “Nyɛkɛ mi ajea biɛ, ejaakɛ mipila waa.” 24 No hewɔ lɛ, etsuji lɛ wó lɛ kɛje shwiili lɛ mli ni amɛkɛ lɛ wo eshwiili ni ji enyɔ lɛ mli, ni amɛkɛ lɛ ba Yerusalem. Nɛkɛ ji bɔ ni fee ni egbo, ni afu lɛ yɛ etsɛmɛi atɛkplo lɛ mli,+ ni Yuda kɛ Yerusalem fɛɛ fó Yosia. 25 Ni Yeremia+ fo Yosia he yaafo lala, ni lalɔi hii kɛ yei+ fɛɛ tsĩɔ Yosia tã yɛ amɛyaafo lalai lɛ amli kɛbashi ŋmɛnɛ; ni akpɛ mli akɛ alá lalai nɛɛ yɛ Israel, ni aŋmala afata yaafo lalai lɛ ahe.
26 Shi Yosia shihilɛ mli saji krokomɛi fɛɛ, kɛ bɔ ni eye Yehowa Mla ni aŋma lɛ nɔ kɛjie suɔmɔ ni tsakeee kpo, 27 kɛ nibii ni efee, kɛjɛ shishijee kɛyashi naagbee lɛ, aŋmala yɛ Israel Maŋtsɛmɛi Awolo lɛ kɛ Yuda Maŋtsɛmɛi Awolo lɛ mli.+