Wolo Ni Ji Enyɔ Ni Akɛmaje Korintobii Lɛ
5 Ejaakɛ wɔle akɛ, kɛ́ akumɔ wɔshikpɔŋ lɛ nɔ shĩa,* ni ji mama tsũ nɛɛ ashwie shi lɛ,*+ wɔbaaná tsũ ko ni jɛ Nyɔŋmɔ ŋɔɔ, shĩa ni jeee niji akɛfee,+ ni baahi shi kɛya naanɔ yɛ ŋwɛi. 2 Ejaakɛ, anɔkwa, wɔkɛ̃mɔɔ yɛ shĩa* ni wɔyɔɔ mli nɛɛ mli, ni wɔmiishwe waa ni wɔwo wɔnɔ* ni jɛ ŋwɛi* lɛ,+ 3 koni kɛ́ wɔwo lɛ, akana wɔ akɛ mɛi ni hiɛ amɛhe folo. 4 Anɔkwa, wɔ mɛi ni wɔyɔɔ mama tsũ nɛɛ mli lɛ kɛ̃mɔɔ, ni nibii miinyɛ wɔnɔ, ejaakɛ wɔsumɔɔɔ akɛ wɔjie enɛ wɔfɔ̃ shi, shi moŋ wɔmiisumɔ ni wɔwo ekroko lɛ,+ koni wala ami nɔ ni gboɔ lɛ.+ 5 Agbɛnɛ, Nyɔŋmɔ, mɔ ni kɛ mumɔ lɛ ehã wɔ akɛ nɔ ni baaba lɛ he nɔmimaa* lɛ,+ ji mɔ ni esaa wɔ eto nɛkɛ nɔ nɛɛ.+
6 No hewɔ lɛ, be fɛɛ be lɛ wɔyɛ ekãa babaoo ni wɔle akɛ gbii abɔ ni gbɔmɔtso nɛɛ ji wɔshĩa lɛ, wɔbɛ Nuŋtsɔ lɛ ŋɔɔ,+ 7 ejaakɛ wɔnyiɛɔ yɛ hemɔkɛyeli naa, jeee nɔ ni wɔnaa lɛ naa. 8 Shi wɔyɛ ekãa babaoo ni wɔmiisumɔ ni wɔkɛ Nuŋtsɔ lɛ ahi shi, moŋ fe nɔ ni wɔbaahi gbɔmɔtso lɛ mli.+ 9 No hewɔ lɛ, kɛ́ wɔyɛ eŋɔɔ jio, wɔbɛ eŋɔɔ jio, oti ni ma wɔhiɛ ji, ni wɔsa ehiɛ. 10 Ejaakɛ esa akɛ wɔ fɛɛ wɔyapue* yɛ Kristo lɛ kojomɔ sɛi lɛ hiɛ, koni ato mɔ fɛɛ mɔ najiaŋ yɛ nibii ni efee be mli ni eyɔɔ gbɔmɔtso lɛ mli lɛ naa, ekpakpa jio, efɔŋ* jio.+
11 No hewɔ lɛ, akɛni wɔle akɛ esa akɛ ashe Nuŋtsɔ lɛ gbeyei hewɔ lɛ, wɔyaa nɔ wɔhãa mɛi ayiŋ tsɔɔ, shi Nyɔŋmɔ le wɔ jogbaŋŋ.* Shi miyɛ hiɛnɔkamɔ akɛ nyɛhenilei lɛ hu le wɔ jogbaŋŋ.* 12 Jeee akɛ wɔmiijie wɔ diɛŋtsɛ wɔhe yi wɔmiihã nyɛ ekoŋŋ, shi wɔmiihã nyɛ nɔ ni nyɛbaadamɔ nɔ nyɛshwã yɛ wɔ hewɔ, koni nyɛnyɛ nyɛhã mɛi ni shwãa fɔ̃ɔ kponɔgbɛ puemɔ+ nɔ moŋ fe nɔ ni yɔɔ tsui lɛ mli lɛ nɔ lɛ hetoo. 13 Ejaakɛ kɛ́ wɔye sɛkɛ lɛ,+ Nyɔŋmɔ wɔye wɔhã; kɛ́ wɔjwɛŋmɔ miitsu nii jogbaŋŋ lɛ, eetsu nii jogbaŋŋ kɛmiihã nyɛ. 14 Ejaakɛ suɔmɔ ni Kristo lɛ yɔɔ lɛ nyɛɔ wɔnɔ, ejaakɛ wɔmu sane naa nɛkɛ akɛ, gbɔmɔ kome gbo kɛhã mɛi fɛɛ;+ no hewɔ lɛ, mɛi fɛɛ egboi. 15 Ni egbo kɛhã mɛi fɛɛ koni mɛi ni hiɛ kãmɔ lɛ ahiɛ akakãmɔ kɛmiihã amɛ diɛŋtsɛ amɛhe dɔŋŋ,+ shi moŋ amɛhiɛ akãmɔ ahã mɔ ni gbo kɛhã amɛ ni atee lɛ shi lɛ.
16 No hewɔ lɛ, kɛjɛ be nɛɛ nɔ kɛyaa nɛɛ, wɔleee mɔ ko mɔ ko yɛ heloo gbɛfaŋ.+ Kɛ́ be ko ni eho lɛ, wɔle Kristo yɛ heloo gbɛfaŋ po lɛ, ekã shi faŋŋ akɛ amrɔ nɛɛ wɔleee lɛ yɛ nakai gbɛ nɔ dɔŋŋ.+ 17 No hewɔ lɛ, kɛ́ mɔ ko kɛ Kristo efee ekome lɛ, eji bɔɔ nɔ hee;+ tsutsu nibii lɛ eho etee; naa! nibii hei eba shihilɛ mli. 18 Shi nibii fɛɛ jɛ Nyɔŋmɔ ŋɔɔ, lɛ ji mɔ ni tsɔ Kristo nɔ esaa wɔ kɛ lɛ teŋ+ ni ehã wɔ kpatamɔ sɔɔmɔ lɛ,+ 19 no ji akɛ, Nyɔŋmɔ miitsɔ Kristo nɔ eesaa jeŋ ko kɛ lɛ teŋ,+ ni ebuuu amɛtɔmɔi lɛ ahe akɔntaa eshiii amɛ,+ ni etu kpatamɔ lɛ he sane lɛ ewo wɔdɛŋ.+
20 No hewɔ lɛ, wɔji maŋ bɔfoi+ yɛ Kristo najiaŋ,+ tamɔ akɛ, Nyɔŋmɔ miitsɔ wɔnɔ eekpa mɛi fai. Akɛ Kristo najiaŋdamɔlɔi lɛ, wɔkpaa fai akɛ: “Nyɛhãa asaa nyɛ kɛ Nyɔŋmɔ teŋ.” 21 Ehã mɔ ni leee esha+ lɛ tsɔ esha afɔle* yɛ wɔ hewɔ, koni atsɔ enɔ ahã wɔtsɔmɔ Nyɔŋmɔ jalɛ.+