3 Mose

4 Yehowa tsa nɔ ekɛɛ Mose akɛ: 2 “Kɛɛmɔ Israelbii lɛ akɛ, ‘Nɔ ni esa akɛ afee kɛ́ mɔ* ko ejeee gbɛ ni efee esha+ akɛni efee nibii ni Yehowa efã akɛ akafee lɛ ateŋ eko lɛ hewɔ lɛ nɛ:

3 “‘Kɛ́ osɔfo ni afɔ lɛ mu+ lɛ fee esha,+ ni no hã maŋ lɛ ye fɔ lɛ, no lɛ, ekɛ tsinanuu* ni kpa ko bɛ ehe abahã Yehowa akɛ esha afɔle yɛ esha ni efee lɛ hewɔ.+ 4 Ekɛ tsinanuu lɛ aba kpee buu lɛ shinaa lɛ naa+ yɛ Yehowa hiɛ, ni ekɛ enine aŋmɛ tsinanuu lɛ yiteŋ, ni egbe tsinanuu lɛ yɛ Yehowa hiɛ.+ 5 No sɛɛ lɛ, osɔfo ni afɔ lɛ mu+ lɛ aŋɔ tsinanuu lɛ lá lɛ eko ní ekɛba kpee buu lɛ mli; 6 ni osɔfo lɛ kɛ ewao atsɔ lá lɛ mli+ ní ekɛ lá lɛ eko ashwã shi shii kpawo+ yɛ Yehowa hiɛ yɛ he krɔŋkrɔŋ lɛ pateeshɛŋ lɛ hiɛ. 7 Osɔfo lɛ kɛ lá lɛ eko hu akpa tsofa-kɛ-ŋma afɔleshaa latɛ ni ma Yehowa hiɛ yɛ kpee buu lɛ mli lɛ akolontoi lɛ ahe;+ ni etsi tsinanuu lɛ lá ni baashwɛ lɛ fɛɛ eshwie shãa afɔle afɔleshaa latɛ ni yɔɔ kpee buu lɛ shinaa lɛ naa lɛ shishi.+

8 “‘No sɛɛ lɛ, ejie tsinanuu ni akɛbaashã esha afɔle lɛ fɔ lɛ fɛɛ, ni fɔ ni ha mlinii lɛ ahe lɛ, kɛ fɔ ni yɔɔ mlinii lɛ ahewɔ lɛ hu fata he, 9 kɛ sabai enyɔ lɛ kɛ fɔ ni yɔɔ amɛhe, ní bɛŋkɛ hɛ lɛ. Ni ejie fɔ ni yɔɔ mlɛbo lɛ he lɛ efata sabai lɛ ahe.+ 10 Etamɔ nɔ ni ajieɔ yɛ naanyobɔɔ afɔle tsinanuu lɛ he lɛ nɔŋŋ.+ Ni osɔfo lɛ ashã fɛɛ* yɛ shãa afɔle afɔleshaa latɛ lɛ nɔ.

11 “‘Shi tsinanuu lɛ hewolo lɛ kɛ eloo lɛ fɛɛ kɛ eyitso lɛ kɛ enaji lɛ kɛ emlinii lɛ kɛ efei+ lɛ— 12 ni tsɔɔ akɛ, tsinanuu muu lɛ fɛɛ ni baashwɛ lɛ—ekɛya nsara lɛ sɛɛ he ko ni tse, he ni atsiɔ lamulu* lɛ ashwieɔ lɛ, ni ekɛ la ashã yɛ lai nɔ.+ Ashã yɛ he ni atsiɔ lamulu lɛ ashwieɔ lɛ.

13 “‘Agbɛnɛ, kɛ́ Israel maŋ muu lɛ fɛɛ ejeee gbɛ ni amɛfee esha ko,+ ni no hã amɛye fɔ, shi maŋ lɛ leee akɛ amɛfee nɔ ko ni Yehowa efã amɛ akɛ amɛkafee,+ 14 ni sɛɛ mli lɛ, aná ale esha lɛ, no lɛ, maŋ lɛ fɛɛ kɛ tsinanuu* aba kpee buu lɛ hiɛ koni akɛshã esha afɔle. 15 Israel onukpai lɛ kɛ amɛniji ashwie tsinanuu lɛ yiteŋ yɛ Yehowa hiɛ, ni agbe tsinanuu lɛ yɛ Yehowa hiɛ.

16 “‘Ni osɔfo ni afɔ lɛ mu lɛ kɛ tsinanuu lɛ lá lɛ eko aba kpee buu lɛ mli. 17 Osɔfo lɛ kɛ ewao atsɔ lá lɛ mli ní ekɛ lá lɛ eko ashwã shi shii kpawo yɛ Yehowa hiɛ, yɛ pateeshɛŋ+ lɛ hiɛ. 18 No sɛɛ lɛ, ekɛ lá lɛ eko akpa tsofa-kɛ-ŋma afɔleshaa latɛ+ ni ma Yehowa hiɛ yɛ kpee buu lɛ mli lɛ akolontoi lɛ ahe; ni etsi lá ni baashwɛ lɛ fɛɛ eshwie shãa afɔle afɔleshaa latɛ ni yɔɔ kpee buu lɛ shinaa lɛ naa+ lɛ shishi. 19 Ejie kooloo lɛ fɔ lɛ fɛɛ, ni eshã yɛ afɔleshaa latɛ lɛ nɔ.+ 20 Bɔ ni efee tsinanuu kroko ni akɛshã esha afɔle lɛ, nakai pɛpɛɛpɛ efee tsinanuu nɛɛ hu. Nakai osɔfo lɛ afee lɛ, ní ekpãtã ehã amɛ,+ ni akɛ amɛhe baake amɛ. 21 Ehã akɛ tsinanuu lɛ aya nsara lɛ sɛɛ, ní eshã lɛ tamɔ bɔ ni eshã klɛŋklɛŋ tsinanuu lɛ nɔŋŋ.+ Eji esha afɔle kɛhã maŋ lɛ.+

22 “‘Kɛ́ wekunukpa+ ko ejeee gbɛ ni efee esha akɛni efee nibii ni Yehowa, e-Nyɔŋmɔ lɛ, efã akɛ akafee lɛ ateŋ eko lɛ hewɔ, ni no hã eye fɔ, 23 aloo kɛ́ ená ele akɛ etɔ̃ kitã lɛ nɔ lɛ, no lɛ, ekɛ abotianuu* ni kpa ko bɛ ehe abahã akɛ efɔle. 24 Ekɛ enine aŋmɛ abotianuu* lɛ yiteŋ, ni egbe lɛ yɛ he ni agbeɔ shãa afɔle kooloo lɛ yɛ lɛ, yɛ Yehowa hiɛ.+ Esha afɔle ni. 25 Osɔfo lɛ kɛ ewao atsɔ esha afɔle kooloo lɛ lá lɛ eko ní ekɛkpa shãa afɔle afɔleshaa latɛ lɛ akolontoi lɛ ahe,+ ni etsi kooloo lɛ lá ni baashwɛ lɛ eshwie shãa afɔle afɔleshaa latɛ lɛ shishi.+ 26 Eshã kooloo lɛ fɔ lɛ fɛɛ yɛ afɔleshaa latɛ lɛ nɔ tamɔ bɔ ni ashãa naanyobɔɔ afɔle kooloo lɛ fɔ lɛ;+ ni osɔfo lɛ baakpãtã ehã lɛ yɛ esha ni efee lɛ hewɔ, ni akɛ ehe esha lɛ baake lɛ.

27 “‘Kɛ́ shikpɔŋ lɛ nɔ bii lɛ ateŋ mɔ ko* ejeee gbɛ ni efee esha akɛni efee nibii ni Yehowa, e-Nyɔŋmɔ lɛ, efã akɛ akafee lɛ ateŋ eko lɛ hewɔ,+ ni no hã eye fɔ, 28 aloo kɛ́ ená ele akɛ efee esha ko lɛ, no lɛ, ekɛ abotiayoo* ni kpa ko bɛ ehe abahã akɛ efɔle yɛ esha ni efee lɛ hewɔ. 29 Ekɛ enine aŋmɛ esha afɔle kooloo lɛ yiteŋ, ní egbe esha afɔle kooloo lɛ yɛ he ni agbeɔ shãa afɔle kooloo lɛ yɛ lɛ nɔŋŋ.+ 30 Osɔfo lɛ kɛ ewao atsɔ kooloo lɛ lá lɛ eko ní ekɛkpa shãa afɔle afɔleshaa latɛ lɛ akolontoi lɛ ahe, ni etsi kooloo lɛ lá ni baashwɛ lɛ fɛɛ eshwie afɔleshaa latɛ lɛ shishi.+ 31 Ejie kooloo lɛ fɔ lɛ fɛɛ,+ tamɔ bɔ ni ajieɔ naanyobɔɔ afɔle kooloo lɛ fɔ lɛ nɔŋŋ,+ ni osɔfo lɛ ashã yɛ afɔleshaa latɛ lɛ nɔ akɛ afɔle ni jeɔ ŋma jogbaŋŋ* woɔ Yehowa; ni osɔfo lɛ baakpãtã ehã lɛ, ni akɛ ehe esha lɛ baake lɛ.

32 “‘Shi kɛ́ ekɛ gwantɛŋbi miiba ekɛbashã esha afɔle lɛ, ekɛ gwantɛŋbi ni ji yoo ni kpa ko bɛ ehe aba. 33 Ekɛ enine aŋmɛ esha afɔle kooloo lɛ yiteŋ ni egbe lɛ akɛ esha afɔle yɛ he ni agbeɔ shãa afɔle kooloo lɛ yɛ lɛ.+ 34 Osɔfo lɛ kɛ ewao atsɔ esha afɔle kooloo lɛ lá lɛ eko ní ekɛkpa shãa afɔle afɔleshaa latɛ lɛ akolontoi lɛ ahe,+ ni etsi kooloo lɛ lá ni baashwɛ lɛ fɛɛ eshwie afɔleshaa latɛ lɛ shishi. 35 Ejie kooloo lɛ fɔ lɛ fɛɛ, tamɔ bɔ ni ajieɔ naanyobɔɔ afɔle gwantɛŋnuu* lɛ fɔ lɛ pɛpɛɛpɛ, ni osɔfo lɛ kɛshwie afɔlei ni akɛ la shãa ahãa Yehowa lɛ anɔ yɛ afɔleshaa latɛ lɛ nɔ, ni eshã;+ ni osɔfo lɛ baakpãtã ehã lɛ yɛ esha ni efee lɛ hewɔ, ni akɛ ehe esha lɛ baake lɛ.+