Kojolɔi

20 Enɛ hewɔ lɛ, Israelbii lɛ fɛɛ fã kɛjɛ Dan+ aahu kɛyagbee Beer-sheba, kɛ agbɛnɛ hu kɛjɛ Gilead shikpɔŋ+ lɛ nɔ, ni amɛbabua amɛhe naa akɛ asafo kome* yɛ Yehowa hiɛ yɛ Mizpa.+ 2 No hewɔ lɛ, maŋ lɛ mli onukpai lɛ, ni ji Israel wekui lɛ anɔ onukpai lɛ fɛɛ badamɔ shi yɛ Nyɔŋmɔ webii lɛ asafo lɛ teŋ—asraafoi 400,000 ni nyiɛɔ amɛnane nɔ ni hiɛɔ klante.+

3 Benyaminbii lɛ nu akɛ Israel hii lɛ ekwɔ kɛtee Mizpa.

Kɛkɛ ni Israel hii lɛ bi akɛ: “Nyɛkɛa wɔ, te fee tɛŋŋ ni nɔ fɔŋ kpele tamɔ nɛkɛ ba lɛ?”+ 4 Enɛ hewɔ lɛ, nuu Levinyo lɛ,+ ni ji yoo ni agbe lɛ lɛ wu lɛ hã hetoo akɛ: “Mikɛ mihemɔ* yashɛ Gibea+ yɛ Benyamin koni wɔwɔ jɛmɛ kɛyashi je baatsɛre. 5 Ni mɛi* ni yɔɔ Gibea lɛ te shi amɛwo mi ni amɛbɔle shĩa lɛ nyɔɔŋ. Kulɛ amɛmiitao amɛgbe mi, shi amɛto mihemɔ lɛ kabonaa yɛ no najiaŋ, ni egbo.+ 6 No hewɔ lɛ, miwó mihemɔ lɛ gbonyo lɛ ni mifolɔ mli ni mikɛ ekomekomei tsu kɛtee Israel shikpɔji* lɛ fɛɛ anɔ,+ ejaakɛ amɛfee hiɛshishwiemɔ nii kɛ hiɛgbejianii yɛ Israel. 7 No hewɔ lɛ, nyɛ Israelbii fɛɛ, nyɛtsɔa nyɛjwɛŋmɔ kɛ nɔ ni afee.”+

8 Kɛkɛ ni maŋbii lɛ fɛɛ fee ekome* kɛte shi kɛdamɔ shi ni amɛkɛɛ akɛ: “Wɔteŋ mɔ kome folo ekuŋ esɛɛ kɛyaŋ emama tsũ mli loo eshĩa. 9 Agbɛnɛ nɔ ni wɔbaafee Gibea nɛ: “Wɔbaafɔ̃ oshiki* ni wɔbaakwɔ kɛyatutua lɛ.+ 10 Wɔbaahala hii 10 kɛbaajɛ hii 100 mli yɛ Israel wekui lɛ fɛɛ amli, kɛ hii 100 kɛbaajɛ hii 1,000 mli kɛ hii 1,000 kɛbaajɛ hii 10,000 mli koni amɛyabua niyenii naa amɛhã asraafoi lɛ, bɔ ni afee ni amɛnyɛ amɛkɛ Gibea ni yɔɔ Benyamin lɛ awu, yɛ hiɛgbejianii ni amɛfee yɛ Israel lɛ hewɔ.” 11 No hewɔ lɛ, abua Israel hii lɛ fɛɛ anaa akɛ kuu kome* awo maŋ lɛ.

12 Kɛkɛ ni Israel wekui lɛ tsu hii kɛtee Benyamin weku lɛ mli bii lɛ fɛɛ aŋɔɔ akɛ: “Te fee tɛŋŋ ni afee nɔ fɔŋ kpele tamɔ nɛkɛ yɛ nyɛteŋ lɛ? 13 Nyɛjiea hii yaka gbɔmɛi ni yɔɔ Gibea lɛ+ nyɛhãa wɔ koni wɔgbe amɛ ni wɔjie nɔ fɔŋ lɛ kɛje Israel.”+ Shi Benyaminbii lɛ booo amɛnyɛmimɛi Israelbii lɛ toi.

14 Kɛkɛ ni Benyaminbii lɛ bua amɛhe naa kɛjɛ amɛmaji lɛ amli ni amɛtee Gibea koni amɛkɛ Israel hii lɛ ayawu. 15 Nakai gbi lɛ, Benyaminbii lɛ bua hii 26,000 ni hiɛɔ klante naa kɛjɛ amɛmaji lɛ amli, soro Gibea hii 700 ni he esa ni ahala lɛ. 16 Ayɛ hii abɛkulɔi 700 ni he esa ni ahala yɛ asraafoi nɛɛ ateŋ. Hii nɛɛ ateŋ mɔ fɛɛ mɔ baanyɛ afɔ̃ yitsɔi kome ganee akromia ni etsɔɔɔ afã.

17 Kɛ́ ajie Benyamin yɛ mli lɛ, Israel hii lɛ bua hii 400,000 ni hiɛɔ klante naa,+ amɛteŋ mɔ fɛɛ mɔ ji tawulɔ ni ebe. 18 Amɛte shi ni amɛkwɔ kɛtee Betel koni amɛyabi Nyɔŋmɔ nii.+ Kɛkɛ ni Israelbii lɛ kɛɛ akɛ: “Wɔteŋ namɔ esa akɛ enyiɛ hiɛ ni wɔkwɔ kɛya ni wɔkɛ Benyaminbii lɛ ayawu?” Yehowa hã hetoo akɛ: “Yuda baanyiɛ hiɛ.”

19 No sɛɛ lɛ, Israelbii lɛ te shi leebi ni amɛyabɔ nsara amɛwo Gibea ni amɛkɛ lɛ wu.

20 Agbɛnɛ, Israelbii lɛ tee koni amɛkɛ Benyaminbii lɛ ayawu; amɛbua amɛhe naa kɛhã ta yɛ Gibea. 21 No hewɔ lɛ, Benyaminbii lɛ je kpo kɛjɛ Gibea ni amɛgbegbee Israel hii 22,000 amɛshwie shi yɛ nakai gbi lɛ nɔ. 22 Shi Israel hii lɛ fee ekãa ni amɛbua amɛhe naa kɛhã ta ekoŋŋ yɛ he ni amɛyabua amɛhe naa yɛ klɛŋklɛŋ gbi lɛ nɔ lɛ nɔŋŋ. 23 Kɛkɛ ni Israelbii lɛ kwɔ kɛtee ni amɛyafó yɛ Yehowa hiɛ kɛyashi gbɛkɛ ni amɛbi Yehowa akɛ: “Wɔsaa wɔkɛ wɔnyɛmimɛi Benyaminbii lɛ ayawu ekoŋŋ lo?”+ Yehowa to he ehã amɛ akɛ: “Nyɛkwɔa kɛyaa ni nyɛkɛ amɛ ayawua.”

24 No hewɔ lɛ, yɛ gbi ni ji enyɔ lɛ nɔ lɛ, Israelbii lɛ tsi amɛbɛŋkɛ Benyaminbii lɛ ekoŋŋ. 25 Ni Benyaminbii lɛ hu jɛ Gibea kɛba, ni amɛkɛ amɛ bakpe yɛ gbi ni ji enyɔ lɛ nɔ, ni amɛsaa amɛgbegbee Israelbii 18,000 kroko amɛshwie shi,+ amɛ fɛɛ lɛ, asraafoi ni hiɛɔ klante sɔŋŋ ni. 26 Kɛkɛ ni Israel hii lɛ fɛɛ kwɔ kɛtee Betel. Amɛyafó ni amɛtara shi yɛ Yehowa hiɛ+ ni amɛhi ŋmaa+ yɛ nakai gbi lɛ nɔ aahu kɛyashi gbɛkɛ, ni amɛshã shãa afɔlei+ kɛ naanyobɔɔ afɔlei+ yɛ Yehowa hiɛ. 27 No sɛɛ lɛ, Israel hii lɛ bi Yehowa nii,+ ejaakɛ jɛmɛ anɔkwa Nyɔŋmɔ lɛ kpaŋmɔ adeka lɛ yɔɔ, yɛ nakai bei lɛ amli. 28 No mli lɛ, Finehas,+ Aaron binuu Eleazar binuu lɛ, ji mɔ ni sɔmɔɔ yɛ ehiɛ yɛ nakai bei lɛ amli. Amɛbi akɛ: “Wɔfã kɛya ekoŋŋ ni wɔkɛ wɔnyɛmimɛi, Benyamin hii lɛ ayawu aloo wɔkaya?”+ Yehowa hã hetoo akɛ: “Nyɛkwɔa kɛyaa, ejaakɛ wɔ lɛ, mikɛ amɛ baawo nyɛdɛŋ.” 29 Kɛkɛ ni Israel hã hii komɛi yawo ka+ kɛbɔle Gibea kɛkpe.

30 Israelbii lɛ kwɔ kɛtee koni amɛkɛ Benyaminbii lɛ ayawu yɛ gbi ni ji etɛ lɛ nɔ, ni amɛgba ta amɛwo Gibea tamɔ tsutsu lɛ.+ 31 Be ni Benyaminbii lɛ je kpo kɛtee koni amɛkɛ asraafoi lɛ ayakpe lɛ, agbala amɛ kɛjɛ maŋ lɛ mli.+ Kɛkɛ lɛ, tamɔ bɔ ni eba lɛ tsutsu lɛ, amɛbɔi hii lɛ ekomɛi gbee yɛ gbɛjegbɛi lɛ anɔ, gbɛjegbɛ lɛ ekome yaa Betel, ni ekroko lɛ yaa Gibea, amɛgbegbee Israel hii aaafee 30 amɛshwie shi yɛ gbɛjegbɛi lɛ anɔ.+ 32 No hewɔ lɛ, Benyaminbii lɛ kɛɛ akɛ: “Wɔmiiye amɛnɔ kunim tamɔ tsutsu lɛ.”+ Shi Israelbii lɛ kɛɛ akɛ: “Wɔbaajo foi koni wɔkɛgbala amɛ kɛjɛ maŋ lɛ mli kɛba gbɛjegbɛi lɛ anɔ.” 33 No hewɔ lɛ, Israel hii lɛ fɛɛ te shi kɛjɛ amɛgbɛhei lɛ ni amɛgba ta yɛ Baal-tamar, ni yɛ nakai beiaŋ nɔŋŋ lɛ, Israelbii ni ewo ka lɛ fã kpo kɛjɛ hei ni amɛwo ka yɛ, yɛ Gibea niiaŋ lɛ. 34 No hewɔ lɛ, hii 10,000 ni he esa ni ahala kɛjɛ Israel fɛɛ lɛ baje Gibea hiɛ, ni ta lɛ mli wa. Shi Benyaminbii lɛ leee akɛ oshãra miiba ebanina amɛ.

35 Yehowa ye Benyamin nɔ kunim+ yɛ Israel hiɛ, ni Israelbii lɛ gbegbee Benyamin hii 25,100 amɛshwie shi, amɛ fɛɛ lɛ, asraafoi ni hiɛɔ klante sɔŋŋ ni.+

36 Shi Benyaminbii lɛ susu akɛ amɛbaaye kunim be ni Israel jo amɛnaa foi lɛ,+ shi Israel jo amɛnaa foi ejaakɛ amɛkɛ amɛhiɛ fɔ̃ mɛi ni ewo ka kɛbɔle Gibea lɛ anɔ.+ 37 Mɛi ni ewo ka lɛ ahe fee oya ni amɛfã kɛbatutua Gibea. Kɛkɛ ni mɛi ni wo ka lɛ gba kɛyi maŋ lɛ mli ni amɛgbegbee mɛi ni yɔɔ maŋ lɛ mli lɛ fɛɛ kɛ klante amɛshwie shi.

38 No mli lɛ, Israel hii lɛ kɛ mɛi ni ewo ka lɛ eto akɛ amɛwo lasu yɛ maŋ lɛ mli ni ete shi kɛya ŋwɛi koni efee okadi kɛhã amɛ.

39 Be ni Israelbii lɛ jo Benyaminbii lɛ anaa foi yɛ ta lɛ mli lɛ, Benyamin hii lɛ bɔi amɛ tutuamɔ, ni amɛgbegbee Israel hii aaafee 30,+ ni amɛkɛɛ akɛ: “Eyɛ faŋŋ akɛ wɔmiiye amɛnɔ kunim tamɔ bɔ ni wɔfee yɛ tsutsu ta lɛ mli lɛ nɔŋŋ.”+ 40 Shi lasu kpɔŋŋ lɛ ni awo yɛ maŋ lɛ mli akɛ okadi lɛ bɔi ŋwɛi yaa. Be ni Benyamin hii lɛ tsɔ amɛsɛɛ ni amɛkwɛ lɛ, amɛna akɛ awo maŋ muu lɛ fɛɛ mli la ni eetso kɛmiiya ŋwɛi. 41 Kɛkɛ ni Israel hii lɛ dɔ amɛyi, ni gbeyei mɔmɔ Benyamin hii lɛ, ejaakɛ amɛna akɛ oshãra enina amɛ etã. 42 No hewɔ lɛ, amɛkpa Israel hii lɛ asɛɛnyiɛmɔ, ni amɛwo foi kɛyi ŋa lɛ nɔ gbɛ, shi Israel asraafoi lɛ tiu amɛ; Israel hii ni jɛ maji lɛ amli lɛ hu bafata he kɛgbegbee Benyaminbii lɛ. 43 Amɛbɔle Benyaminbii lɛ ni amɛtiu amɛ gidigidi. Amɛnaanaa amɛnɔ yɛ Gibea hiɛ tuuntu yɛ Gibea bokãgbɛ. 44 Naagbee lɛ, Benyamin hii 18,000 gboi, amɛ fɛɛ lɛ, tawulɔi kãkãlɔi sɔŋŋ ni.+

45 Benyamin hii lɛ dɔ amɛyi ni amɛwo foi kɛyi ŋa lɛ nɔ kɛtee Rimon tɛsaa+ lɛ he, ni Israelbii lɛ gbegbee hii 5,000* yɛ gbɛjegbɛi lɛ anɔ, ni amɛtee nɔ amɛtiu amɛ kɛtee Gidom tɔ̃ɔ; no hewɔ lɛ, amɛgbegbee hii 2,000 kroko hu amɛshwie shi. 46 Benyaminbii ni gboi yɛ nakai gbi lɛ nɔ lɛ fɛɛ ayibɔ ji, hii 25,000 ni hiɛɔ klante,+ amɛ fɛɛ lɛ, tawulɔi kãkãlɔi sɔŋŋ ni. 47 Shi hii 600 jo foi kɛyi ŋa lɛ nɔ kɛtee Rimon tɛsaa lɛ he, ni amɛhi Rimon tɛsaa lɛ nɔ nyɔji ejwɛ.

48 Ni Israel hii lɛ tsɔ amɛhiɛ amɛwo Benyaminbii lɛ ekoŋŋ, ni amɛkɛ klante gbegbee mɛi ni yɔɔ maŋ lɛ mli lɛ, kɛjɛ gbɔmɔ nɔ kɛyashi kooloo nɔ, amɛkpãtã nɔ fɛɛ nɔ ni shwɛ lɛ hiɛ. Agbɛnɛ hu, amɛwo maŋ fɛɛ maŋ ni yɔɔ amɛgbɛ nɔ lɛ mli la.