1 Kronika
26 Naa bɔ ni aja agbonaakwɛlɔi+ lɛ amli awo kuikui amli: yɛ Korabii lɛ anɔ lɛ mli lɛ, Meshelemia,+ Kore binuu lɛ, Kore jɛ Asaf bihii lɛ ateŋ. 2 Meshelemia bihii lɛ nɛ: Ekromɔbi ji Zakaria, mɔ ni ji enyɔ nɔ ji Yediael, mɔ ni ji etɛ nɔ ji Zebadia, mɔ ni ji ejwɛ nɔ ji Yatniel, 3 mɔ ni ji enumɔ nɔ ji Elam, mɔ ni ji ekpaa nɔ ji Yehohanan, mɔ ni ji kpawo nɔ ji Elieho-enai. 4 Obed-edom bihii lɛ nɛ: Ekromɔbi ji Shemaia, mɔ ni ji enyɔ nɔ ji Yehozabad, mɔ ni ji etɛ nɔ ji Yoa, mɔ ni ji ejwɛ nɔ ji Sakar, mɔ ni ji enumɔ nɔ ji Netanel, 5 mɔ ni ji ekpaa nɔ ji Amiel, mɔ ni ji kpawo nɔ ji Isakar, mɔ ni ji kpaanyɔ nɔ ji Peuletai; ejaakɛ Nyɔŋmɔ jɔɔ Obed-edom.
6 Ni afɔ bihii ahã ebinuu Shemaia, ni bihii nɛɛ batsɔmɔ lumɛi yɛ amɛtsɛ shĩa lɛ, ejaakɛ amɛji hii kãkãlɔi. 7 Shemaia bihii nɛ: Otni, kɛ Refael, kɛ Obed, kɛ Elzabad, mɔ ni nyɛmimɛi hii Elihu kɛ Semakia hu ji hii kãkãlɔi lɛ. 8 Obed-edom seshibii* ji mɛnɛɛmɛi fɛɛ; amɛ kɛ amɛbihii lɛ kɛ amɛnyɛmimɛi hii lɛ fɛɛ lɛ, hii kãkãlɔi ni sa kɛhã sɔɔmɔ ji amɛ, hii ni jɛ Obed-edom nɔ lɛ mli lɛ fɛɛ feɔ 62. 9 Ni Meshelemia+ hu yɛ bihii kɛ nyɛmimɛi hii, hii kãkãlɔi 18. 10 Ni Hosa ni jɛ Merari bihii lɛ ateŋ lɛ hu yɛ bihii. Shimri ji onukpa, eyɛ mli akɛ jeee lɛ ji kromɔbi moŋ, shi epapa wó lɛ onukpa, 11 mɔ ni ji enyɔ nɔ ji Hilkia, mɔ ni ji etɛ nɔ ji Tebalia, mɔ ni ji ejwɛ nɔ ji Zakaria. Hosa bihii lɛ kɛ enyɛmimɛi hii lɛ fɛɛ feɔ 13.
12 Yɛ agbonaakwɛlɔi akui nɛɛ amli lɛ, onukpai lɛ tsuɔ nii tamɔ bɔ ni amɛnyɛmimɛi hii lɛ tsuɔ nii lɛ nɔŋŋ, amɛsɔmɔɔ yɛ Yehowa shĩa lɛ. 13 No hewɔ lɛ, amɛfɔ̃ amɛtsɛmɛi ashĩai lɛ anɔ oshiki+ kɛhã agbói srɔtoi lɛ anaakwɛmɔ, mɔ bibioo jio, mɔ wulu jio. 14 Kɛkɛ ni oshiki ni afɔ̃ kɛhã bokãgbɛ nɔ lɛ yagbee Shelemia nɔ. Ni amɛfɔ̃ ebinuu Zakaria, ŋaawolɔ hiɛshikalɔ lɛ nɔ oshiki, ni oshiki ni afɔ̃ yɛ enɔ lɛ yagbee kooyigbɛ nɔ lɛ nɔ. 15 Obed-edom ná wuoyigbɛ nɔ lɛ, ni akɛ nitoohei lɛ hã ebihii+ lɛ. 16 Shupim kɛ Hosa+ ná amɛnɔ lɛ yɛ anaigbɛ, yɛ Shaleket Agbó lɛ masɛi yɛ gbɛjegbɛ ni yaa ŋwɛigbɛ lɛ he, bulɔi yɛ bulɔi amasɛi. 17 Levibii ekpaa yɛ bokãgbɛ; ni ejwɛ yɛ kooyigbɛ daa gbi, ni ejwɛ yɛ wuoyigbɛ daa gbi; ni yɛ nitoohei+ lɛ, mɛi enyɔ yɛ biɛ, ni mɛi enyɔ yɛ biɛ; 18 ni yɛ ablanaa ni yɔɔ anaigbɛ lɛ he lɛ, mɛi ejwɛ yɛ gbɛjegbɛ lɛ he,+ ni mɛi enyɔ yɛ ablanaa lɛ nɔ. 19 Nɛkɛ ji bɔ ni aja agbonaakwɛlɔi ni jɛ Korabii lɛ kɛ Meraribii lɛ ateŋ lɛ amli awo kuikui amli.
20 Yɛ Levibii lɛ ateŋ lɛ, Ahiya ji mɔ ni kwɛɔ anɔkwa Nyɔŋmɔ lɛ shĩa nitoohei lɛ kɛ nibii ni afee amɛ krɔŋkrɔŋ* lɛ anitoohei lɛ anɔ.+ 21 Yɛ Ladan, Gershonnyo lɛ bihii lɛ ateŋ, ni ji Ladan shĩai lɛ onukpai lɛ ateŋ lɛ, Yehieli+ 22 kɛ Yehieli bihii lɛ, Zetam kɛ enyɛmi nuu Yoel. Amɛji mɛi ni kwɛɔ Yehowa shĩa lɛ nitoohei lɛ anɔ.+ 23 Yɛ Amrambii lɛ, kɛ Izeharbii lɛ, kɛ Hebronbii lɛ, kɛ Uzielbii lɛ ateŋ lɛ,+ 24 Shebuel, mɔ ni papa ji Gershom, ni lɛ hu epapa ji Mose lɛ ji nitoohei lɛ anɔkwɛlɔ. 25 Enyɛmimɛi hii lɛ ni jɛ Eliezer+ nɔ lɛ mli lɛ nɛ: Eliezer binuu ji Rehabia,+ ni lɛ hu ebinuu ji Yeshaia, ni lɛ hu ebinuu ji Yoram, ni lɛ hu ebinuu ji Zikri, ni lɛ hu ebinuu ji Shelomot. 26 Shelomot nɛɛ kɛ enyɛmimɛi hii lɛ ji mɛi ni kwɛɔ nibii ni afee amɛ krɔŋkrɔŋ lɛ anitoohei lɛ anɔ.+ Nibii nɛɛ ji nibii ni Maŋtsɛ David,+ kɛ tsɛmɛi ashĩai onukpai lɛ,+ kɛ mɛi akpe nɔkwɛlɔi lɛ kɛ mɛi oha nɔkwɛlɔi lɛ kɛ tatsɛmɛi lɛ fee amɛ krɔŋkrɔŋ lɛ. 27 Amɛfee nibii ni aloo+ yɛ tai+ amli lɛ ekomɛi krɔŋkrɔŋ koni akɛtsu Yehowa shĩa lɛ he nii; 28 kɛ agbɛnɛ hu, nibii fɛɛ ni Samuel, ninalɔ+ lɛ, kɛ Saul, Kish binuu lɛ, kɛ Abner,+ Ner binuu lɛ, kɛ Yoab,+ Zeruia binuu+ lɛ fee amɛ krɔŋkrɔŋ lɛ. Akɛ nibii fɛɛ ni afee amɛ krɔŋkrɔŋ lɛ wo Shelomit kɛ enyɛmimɛi hii lɛ adɛŋ koni amɛkwɛ nɔ.
29 Yɛ Izeharbii+ lɛ ateŋ lɛ, ahã Kenania kɛ ebihii lɛ sɔmɔ akɛ onukpai kɛ kojolɔi+ yɛ saji ni kɔɔɔ Nyɔŋmɔ shĩa lɛ he lɛ ahe yɛ Israel.
30 Yɛ Hebronbii+ lɛ ateŋ lɛ, Hashabia kɛ enyɛmimɛi hii lɛ, ni ji hii kãkãlɔi 1,700 lɛ, ji mɛi ni kwɛɔ Yehowa sɔɔmɔ nitsumɔi lɛ kɛ maŋtsɛ lɛ sɔɔmɔ nitsumɔi lɛ fɛɛ anɔ yɛ Yordan kpokpaa lɛ anaigbɛ yɛ Israel. 31 Yɛ Hebronbii lɛ ateŋ lɛ, Yeriya+ ji onukpa yɛ Hebronbii lɛ awekui lɛ amli. Yɛ David maŋtsɛyeli afi ni ji 40 lɛ nɔ lɛ,+ akwɛ amɛmli ni aná hii kãkãlɔi ni sa yɛ amɛteŋ yɛ Yazer+ yɛ Gilead. 32 Ni enyɛmimɛi hii, ni ji tsɛmɛi ashĩai onukpai lɛ ayifalɛ ji hii kãkãlɔi 2,700. No hewɔ lɛ, Maŋtsɛ David kɛ Rubenbii lɛ, kɛ Gadbii lɛ, kɛ Manase weku lɛ fã kroko lɛ wo amɛshishi, koni amɛkwɛ saji fɛɛ ni kɔɔ anɔkwa Nyɔŋmɔ lɛ kɛ maŋtsɛ he lɛ nɔ.