Kojolɔi

6 Shi Israelbii lɛ fee efɔŋ yɛ Yehowa hiɛ ekoŋŋ,+ no hewɔ lɛ, Yehowa kɛ amɛ wo Midian dɛŋ afii kpawo.+ 2 Midian ye Israel nɔ.+ Midianbii lɛ ahewɔ lɛ, Israelbii lɛ fee teemɔhei* amɛhã amɛhe yɛ gɔji kɛ tɛkploi amli, kɛ hei ni ewa akɛ abaaya lɛ.+ 3 Kɛ́ Israelbii lɛ du nii lɛ, Midianbii lɛ kɛ Amalekbii+ lɛ kɛ Bokãgbɛbii+ lɛ fãa kɛbatutuaa amɛ. 4 Amɛbɔɔ nsara amɛwoɔ amɛ ni amɛkɛ amɛ wuɔ, ni amɛfiteɔ shikpɔŋ lɛ nɔ nibaa nii lɛ kɛyashiɔ Gaza tɔ̃ɔ, ni amɛshiii nɔ ko nɔ ko amɛhãaa Israelbii lɛ ni amɛye, ni amɛshiii gwantɛŋ loo tsinanuu loo teji ko hu.+ 5 Ejaakɛ amɛkɛ amɛkooloi kɛ amɛmama tsũi lɛ kwɔɔ kɛbaa, ni amɛbaa babaoo tamɔ baalabii,+ ni anyɛɛɛ akane amɛ kɛ amɛfukpɔŋɔi lɛ,+ ni amɛbaa shikpɔŋ lɛ nɔ koni amɛbakpãtã ehiɛ. 6 No hewɔ lɛ, Israelbii lɛ ye ohia waa yɛ Midian hewɔ; ni Israelbii lɛ bo amɛtsɛ Yehowa koni ebaye ebua amɛ.+

7 Be ni Israelbii lɛ bo amɛtsɛ Yehowa koni ebaye ebua amɛ yɛ Midian hewɔ lɛ,+ 8 Yehowa tsu gbalɔ ko kɛba Israelbii lɛ aŋɔɔ ni ebakɛɛ amɛ akɛ: “Bɔ ni Yehowa, Israel Nyɔŋmɔ lɛ kɛɛ nɛ, ‘Mi miwó nyɛ kɛje Ejipt, mijie nyɛ kɛje nyɔji ashĩa lɛ.+ 9 No hewɔ lɛ, mikpɔ̃ nyɛ kɛje Ejipt dɛŋ kɛ mɛi fɛɛ ni waa nyɛ yi lɛ adɛŋ, ni mishwie amɛ kɛje nyɛhiɛ ni mikɛ amɛshikpɔŋ lɛ hã nyɛ.+ 10 Ni mikɛɛ nyɛ akɛ: “Miji Yehowa, nyɛ-Nyɔŋmɔ lɛ,+ nyɛkashea Amorbii lɛ ni nyɛyɔɔ amɛshikpɔŋ lɛ nɔ lɛ anyɔŋmɔi lɛ gbeyei.”+ Shi nyɛbooo mi toi.’”*+

11 Sɛɛ mli lɛ, Yehowa bɔfo lɛ ba+ ni ebata tso agbo lɛ ni yɔɔ Ofra, ni ji Yoash, Abiezernyo+ lɛ nɔ lɛ shishi. No mli lɛ, ebinuu Gideon+ miigbee wiiti yɛ bu ni aŋaa wain yɛ mli lɛ mli koni ekɛtee Midianbii lɛ. 12 Yehowa bɔfo lɛ jie ehe kpo etsɔɔ lɛ ni ekɛɛ lɛ akɛ: “Yehowa kɛ bo yɛ,+ bo tawulɔ kãkãlɔ.” 13 Kɛkɛ ni Gideon kɛɛ lɛ akɛ: “Minuŋtsɔ, ofainɛ, kɛ́ Yehowa kɛ wɔ yɛ lɛ, mɛni hewɔ mɔ ni nibii nɛɛ fɛɛ eba wɔnɔ lɛ?+ Nɛgbɛ enaakpɛɛ nibii lɛ fɛɛ ni wɔtsɛmɛi lɛ gba wɔ akɛ efee lɛ yɔɔ,+ amɛkɛɔ akɛ, ‘Ani jeee Yehowa ni wó wɔ kɛje Ejipt?’+ Amrɔ nɛɛ, Yehowa ekwa wɔ+ ni ekɛ wɔ ewo Midian dɛŋ.” 14 Yehowa tsɔ ehiɛ ehã lɛ ni ekɛɛ: “Okɛ hewalɛ ni oná nɛɛ aya, ni obaahere Israel kɛje Midian dɛŋ.+ Ani jeee mi, mitsuɔ bo?” 15 Gideon hã lɛ hetoo akɛ: “Yehowa, ofainɛ. Te mafee tɛŋŋ mahere Israel lɛ? Naa! Shĩa ni mijɛ mli* lɛ ji bibioo kwraa yɛ Manase weku lɛ mli, ni miji mɔ bibioo kwraa yɛ mipapa shĩa lɛ.” 16 Shi Yehowa kɛɛ lɛ akɛ: “Akɛni maye mabua bo*+ hewɔ lɛ, obaagbe Midian oookɛɛ amɛji gbɔmɔ kome.”

17 Ni ekɛɛ lɛ akɛ: “Agbɛnɛ, kɛji mihiɛ eba nyam yɛ ohiɛ lɛ, hã mi okadi ko ni tsɔɔ akɛ bo ji mɔ ni kɛ mi wieɔ lɛ lɛɛlɛŋ. 18 Ofainɛ kaashi biɛ kɛyashi maku misɛɛ ni mikɛ minikeenii lɛ baabama ohiɛ.”+ No hewɔ lɛ, ekɛɛ akɛ: “Mahi biɛ kɛyashi obaaku osɛɛ oba.” 19 Ni Gideon tee ni eyasaa abotia ni edako tsɔ, ni ekɛ ashikishaŋ efa kome* fee blodo ni ashikishaŋ-sha* bɛ mli.+ Ekɛ loo lɛ wo kɛntɛŋ lɛ mli ni ekɛ wonu* lɛ wo nihoomɔ kukwɛi lɛ mli; ni ekɛje kpo ni ekɛbama ehiɛ yɛ tso agbo lɛ shishi.

20 Ni anɔkwa Nyɔŋmɔ lɛ bɔfo lɛ kɛɛ lɛ akɛ: “Okɛ loo lɛ kɛ blodo ni ashikishaŋ-sha* bɛ mli lɛ ashwie tɛsaa agbo lɛ ni yɔɔ jɛmɛ lɛ nɔ, ni otsɔ wonu* lɛ oshwie nɔ.”* Ni efee nakai. 21 Kɛkɛ ni Yehowa bɔfo lɛ kpã edɛhiɛmɔtso lɛ mli ni ekɛ tso lɛ naa sa loo lɛ kɛ blodo ni ashikishaŋ-sha* bɛ mli lɛ he, ni la jɛ tɛsaa lɛ mli ni eshã loo lɛ kɛ blodo ni ashikishaŋ-sha bɛ mli lɛ.+ Kɛkɛ ni Yehowa bɔfo lɛ laaje yɛ ehiɛ. 22 Ni Gideon na akɛ, Yehowa bɔfo ni lɛɛlɛŋ.+

Amrɔ nɔŋŋ ni Gideon kɛɛ akɛ: “Ao migbo mitã, Nuŋtsɔ Ofe Yehowa, ejaakɛ mina Yehowa bɔfo hiɛ kɛ hiɛ!”+ 23 Shi Yehowa kɛɛ lɛ akɛ: “Toiŋjɔlɛ ahã bo. Kaashe gbeyei;+ ogboŋ.” 24 No hewɔ lɛ, Gideon ma afɔleshaa latɛ yɛ jɛmɛ ehã Yehowa, ni atsɛ lɛ akɛ Yehowa-shalom*+ kɛbashi ŋmɛnɛ. Eyɛ Abiezerbii lɛ amaŋ ni ji Ofra lɛ mli lolo.

25 Nakai nyɔɔŋ lɛ mli lɛ, Yehowa kɛɛ lɛ akɛ: “Mɔ tsinanuu* lɛ ni ji opapa nɔ lɛ, tsinanuu* ni ji enyɔ ni eye afii kpawo lɛ, ni okumɔ Baal afɔleshaa latɛ ni ji opapa nɔ lɛ oshwie shi, ni ofo wɔŋ tso* ni ma emasɛi lɛ ofɔ̃ shi.+ 26 Kɛ́ oto tɛi ni okɛma afɔleshaa latɛ ohã Yehowa, o-Nyɔŋmɔ lɛ yɛ he ni yɔɔ shweshweeshwe nɛɛ yiteŋ ogbe naa lɛ, mɔ tsinanuu* ni ji enyɔ lɛ ni okɛshã afɔle akɛ shãa afɔle yɛ lai ni oná kɛjɛ wɔŋ tso* lɛ ni ofo ofɔ̃ shi lɛ mli lɛ nɔ.” 27 No hewɔ lɛ, Gideon ŋɔ etsuji lɛ ateŋ mɛi nyɔŋma ni efee bɔ pɛ ni Yehowa ekɛɛ lɛ lɛ. Shi eeshe epapa shĩa lɛ mli bii lɛ kɛ hii ni yɔɔ maŋ lɛ mli lɛ gbeyei aahu akɛ enyɛɛɛ efee nii nɛɛ shwane, no hewɔ lɛ, efee lɛ nyɔɔŋ.

28 Enɔ jetsɛremɔ be ni maŋ lɛ mli hii lɛ te shi leebi maŋkpa lɛ, amɛna akɛ akumɔ Baal afɔleshaa latɛ lɛ ashwie shi, ni afo wɔŋ tso* ni ma emasɛi lɛ afɔ̃ shi, ni akɛ tsinanuu* ni ji enyɔ lɛ eshã afɔle yɛ afɔleshaa latɛ ni ama lɛ nɔ. 29 Amɛbibii amɛhe akɛ: “Namɔ fee enɛ?” Ni be ni amɛtao mli lɛ, amɛkɛɛ akɛ: “Gideon, Yoash binuu lɛ ni fee enɛ.” 30 No hewɔ lɛ, maŋ lɛ mli hii lɛ kɛɛ Yoash akɛ: “Jiemɔ obinuu lɛ kɛba koni agbe lɛ, ejaakɛ ekumɔ Baal afɔleshaa latɛ lɛ eshwie shi ni efo wɔŋ tso* ni ma emasɛi lɛ efɔ̃ shi.” 31 Kɛkɛ ni Yoash+ kɛɛ mɛi ni kɛ sane lɛ bafɔ̃ ehiɛ lɛ akɛ: “Ani nyɛ esa akɛ nyɛfãa Baal he lo? Ani nyɛ esa akɛ nyɛhereɔ lɛ lo? Mɔ fɛɛ mɔ ni baafã Baal he lɛ, esa akɛ agbe lɛ leebi nɛɛ.+ Kɛ́ nyɔŋmɔ ni lɛ, lɛ diɛŋtsɛ efã ehe,+ ejaakɛ mɔ ko ekumɔ efɔleshaa latɛ eshwie shi.” 32 No hewɔ lɛ, yɛ nakai gbi lɛ nɔ lɛ, ewo Gideon gbɛ́i akɛ Yerubaal,* ni ekɛɛ akɛ: “Baal afã lɛ diɛŋtsɛ ehe, ejaakɛ mɔ ko ekumɔ efɔleshaa latɛ eshwie shi.”

33 Midianbii+ lɛ kɛ Amalekbii+ lɛ kɛ Bokãgbɛbii lɛ fɛɛ fee ekome;+ ni amɛfo faa lɛ kɛtee Yezreel Jɔɔ lɛ mli ni amɛyabɔ nsara yɛ jɛmɛ. 34 Kɛkɛ ni Yehowa mumɔ lɛ ba Gideon nɔ*+ ni ekpã tɛtɛrɛmantɛrɛ* lɛ,+ ni Abiezerbii+ lɛ ba koni amɛbanyiɛ esɛɛ. 35 Etsu mɛi kɛtee Manasebii lɛ fɛɛ aŋɔɔ, ni amɛ hu amɛba koni amɛbanyiɛ esɛɛ. Etsu mɛi kɛtee Asherbii lɛ, kɛ Zebulonbii lɛ, kɛ Naftalibii lɛ hu aŋɔɔ, ni amɛkwɔ kɛba koni amɛkɛ lɛ abakpe.

36 Kɛkɛ ni Gideon kɛɛ anɔkwa Nyɔŋmɔ lɛ akɛ: “Kɛji ootsɔ minɔ ohere Israelbii lɛ tamɔ bɔ ni owo shi lɛ,+ 37 no lɛ, mikɛ gwantɛŋ hetsɔi nɛɛ miiha ŋmaagbeemɔhe lɛ. Kɛ́ bɔ́ nyɔ gwantɛŋ hetsɔi lɛ pɛ nɔ ni shikpɔŋ lɛ ni bɔle ehe lɛ fɛɛ gbi lɛ, no lɛ mana akɛ obaatsɔ minɔ ohere Israel tamɔ bɔ ni owo shi lɛ pɛpɛɛpɛ.” 38 Ni nakai ji bɔ ni eba lɛ. Enɔ jetsɛremɔ be ni ete shi leebi maŋkpa ni eŋa gwantɛŋ hetsɔi lɛ mli lɛ, nu ni eŋa yɛ gwantɛŋ hetsɔi ni bɔ́ enyɔ nɔ lɛ mli lɛ fa aahu akɛ eyi okpolu kome. 39 Shi Gideon kɛɛ anɔkwa Nyɔŋmɔ lɛ akɛ: “Omli akafu mi, hã mabi shi kome ekoŋŋ. Ofainɛ, hã mikɛ gwantɛŋ hetsɔi lɛ aka makwɛ shi kome ekoŋŋ. Ofainɛ, hã gwantɛŋ hetsɔi lɛ pɛ agbi ni bɔ́ anyɔ shikpɔŋ lɛ fɛɛ nɔ.” 40 No hewɔ lɛ, nakai ji bɔ ni Nyɔŋmɔ fee yɛ nakai nyɔɔŋ lɛ mli; gwantɛŋ hetsɔi lɛ pɛ gbi shi bɔ́ nyɔ shikpɔŋ lɛ fɛɛ nɔ.