Wolo Ni Ji Enyɔ Ni Akɛmaje Korintobii Lɛ
6 Akɛni wɔkɛ lɛ efee ekome kɛmiitsu nii hewɔ lɛ,+ wɔmiiwo nyɛ hewalɛ hu akɛ, nyɛkahea Nyɔŋmɔ dromɔ lɛ ni nyɛhã yiŋtoo ni yɔɔ sɛɛ lɛ fee efolo.+ 2 Ejaakɛ ekɛɔ akɛ: “Yɛ be ni sa mli lɛ, mibo bo toi, ni miye mibua bo yɛ yiwalaheremɔ gbi nɔ.”+ Naa! Amrɔ nɛɛ ji be ni sa jogbaŋŋ lɛ. Naa! Amrɔ nɛɛ ji yiwalaheremɔ gbi lɛ.
3 Wɔtɔ̃tɔɔɔ mɔ ko mɔ ko nane yɛ gbɛ ko kwraa nɔ, koni wɔsɔɔmɔ lɛ he akaba shwamɔ;+ 4 shi moŋ, yɛ gbɛ fɛɛ gbɛ nɔ lɛ, wɔjieɔ wɔhe yi akɛ Nyɔŋmɔ sɔɔlɔi,+ kɛtsɔ shi ni wɔfiɔ yɛ nibii babaoo amli lɛ nɔ, yɛ amanehului amli, yɛ hiamɔ bei amli, yɛ shihilɛi ni mli wawai amli,+ 5 yɛ yii amli, yɛ tsuŋwoohei,+ yɛ basabasafeemɔi amli, yɛ nitsumɔ dɛŋdɛŋ mli, yɛ bei ni wɔwɔɔɔ amli, yɛ bei ni wɔyeee nii amli;+ 6 yɛ hetsemɔ mli, yɛ nilee mli, yɛ tsuishitoo mli,+ yɛ mlihilɛ mli,+ yɛ mumɔ krɔŋkrɔŋ mli, yɛ suɔmɔ ni osato bɛ mli lɛ mli,+ 7 yɛ anɔkwale wiemɔ mli, yɛ Nyɔŋmɔ hewalɛ mli;+ kɛtsɔ jalɛ tawuu nii+ ni ahiɛɔ yɛ ninejurɔ* kɛ abɛku* fɛɛ lɛ nɔ, 8 kɛtsɔ anunyam kɛ hiɛshishwiemɔ nɔ, kɛtsɔ amaniɛ gbonyo kɛ amaniɛ kpakpa nɔ. Abuɔ wɔ tamɔ mɛi ni lakaa mɛi, shi anɔkwafoi ji wɔ, 9 abuɔ wɔ tamɔ mɛi ni aleee, shi ale wɔ jogbaŋŋ, abuɔ wɔ akɛ mɛi ni miigboi,* shi naa! wɔhiɛ kamɔ,+ abuɔ wɔ tamɔ mɛi ni agbala amɛtoi,* shi akɛ wɔ woko gbele dɛŋ,+ 10 abuɔ wɔ tamɔ mɛi ni miiye awerɛho, shi wɔmii shɛɔ wɔhe daa, abuɔ wɔ tamɔ ohiafoi, shi wɔhãa mɛi pii tsɔmɔɔ niiatsɛmɛi, abuɔ wɔ tamɔ mɛi ni bɛ nɔ ko, shi wɔyɛ nibii fɛɛ.+
11 Korintobii, wɔgbɛ wɔdaaŋ koni wɔkɛ nyɛ awie,* ni wɔgbele wɔtsui naa hu. 12 Wɔgbeleɔ wɔtsui naa wɔhãa nyɛ,*+ shi nyɛ lɛ, nyɛŋaa nyɛtsui naa nyɛwoɔ wɔ. 13 No hewɔ lɛ, nyɛfea nakai nɔŋŋ nyɛhãa wɔ—mikɛ nyɛ miiwie tamɔ mibii—nyɛ hu nyɛgbelea nyɛtsuii anaa.*+
14 Nyɛkɛ mɛi ni heee yeee lɛ akahia kɔɔŋtso kome shishi,*+ ejaakɛ eŋmɛŋ pɛpɛɛpɛ. Ejaakɛ mɛɛ naanyobɔɔ yɔɔ jalɛ kɛ mlatɔmɔ teŋ?+ Aloo mɛɛ tsakpãa yɔɔ la kɛ duŋ teŋ?+ 15 Agbɛnɛ hu, mɛɛ gbeekpãmɔ yɔɔ Kristo kɛ Belial* teŋ?+ Aloo mɛɛ wekukpaa yɔɔ mɔ ni heɔ Nuŋtsɔ lɛ nɔ eyeɔ* kɛ mɔ ni heee yeee lɛ teŋ?*+ 16 Ni mɛɛ ekomefeemɔ yɔɔ Nyɔŋmɔ sɔlemɔ shĩa lɛ kɛ amagai teŋ?+ Ejaakɛ wɔji Nyɔŋmɔ hiɛkãalɔ lɛ sɔlemɔ shĩa;+ tamɔ bɔ ni Nyɔŋmɔ kɛɛ lɛ, akɛ: “Mahi amɛteŋ+ ni manyiɛ yɛ amɛteŋ, ni matsɔ amɛ-Nyɔŋmɔ, ni amɛbaatsɔ mimaŋ.”+ 17 “‘No hewɔ lɛ, nyɛjea amɛteŋ, ni nyɛtsea nyɛhe,’ Yehowa* kɛɛ, ‘ni nyɛkpaa nɔ ni he tseee lɛ hetaa’”;+ “‘ni mahere nyɛ atuu.’”+ 18 “‘Ni matsɔ nyɛtsɛ,+ ni nyɛbaatsɔmɔ mibihii kɛ mibiyei,’+ Yehowa,* Ofe lɛ, kɛɛ.”