Kojolɔi
15 Be ko sɛɛ yɛ wiitikpamɔ gbii lɛ amli lɛ, Samson kɛ abotia ni edako tsɔ tee akɛ eyaasara eŋa lɛ. Ekɛɛ akɛ: “Miitao maya miŋa lɛ ŋɔɔ yɛ sɛɛtsu lɛ mli.” Shi yoo lɛ papa eŋmɛɛɛ lɛ gbɛ ni eya tsũ lɛ mli. 2 Yoo lɛ papa lɛ kɛɛ akɛ: “Misusu akɛ osumɔɔɔ lɛ dɔŋŋ.+ No hewɔ lɛ, mikɛ lɛ ehã mɛi ni fata ohe akɛ ayemforo wu hefatalɔi lɛ ateŋ mɔ kome.+ Bɛ enyɛmi yoo fioo lɛ he yɛ fɛo fe lɛ? Ofainɛ, ŋɔɔ lɛ yɛ enajiaŋ.” 3 Shi, Samson kɛɛ amɛ akɛ: “Agbɛnɛ kɛ́ mifee Filistibii lɛ efɔŋ ko lɛ, mɔ ko nyɛŋ ashwa mi.”
4 No hewɔ lɛ, Samson tee ni eyamɔmɔ osɔi 300. Kɛkɛ ni ekɔlɔ latsei,* ni emɔmɔ osɔi lɛ enyɔnyɔɔnyɔ ni efimɔ amɛleii kɛtsa, ni ekɛ latsei* lɛ wo leii ni efimɔ kɛtsa lɛ eko fɛɛ eko teŋ. 5 Kɛkɛ ni emamɔ latsei* lɛ anaa la, ni eŋmɛɛ osɔi lɛ ahe ewo Filistibii lɛ aŋmaa* ŋmɔji lɛ amli. Ewo nɔ fɛɛ nɔ mli la, kɛjɛ ŋmaa ke nɔ kɛyashi ŋmaa tso nɔ, kɛ agbɛnɛ hu, wain ŋmɔji kɛ oliv ŋmɔji lɛ fɛɛ.
6 Filistibii lɛ bi akɛ: “Namɔ fee enɛ?” Akɛɛ amɛ akɛ: “Samson, Timnanyo lɛ shaanuu lɛ ni fee, ejaakɛ ekɛ Samson ŋa lɛ ehã mɛi ni fata ehe akɛ ayemforo wu hefatalɔi lɛ ateŋ mɔ kome.”+ No hewɔ lɛ, Filistibii lɛ kwɔ kɛtee ni amɛkɛ la yashã yoo lɛ kɛ epapa fɛɛ.+ 7 Kɛkɛ ni Samson kɛɛ amɛ akɛ: “Kɛ́ nɛkɛ nyɛfee lɛ, no lɛ, ja mitɔ mihe owele yɛ nyɛnɔ dani makpa.”+ 8 Kɛkɛ ni egbe amɛ ekomekomei,* ni ekpãtã amɛteŋ mɛi babaoo ahiɛ, ni no sɛɛ lɛ, ekpeleke shi ni eyahi tɛkplo ko mli yɛ Etam tɛsaa lɛ mli.
9 Sɛɛ mli lɛ, Filistibii lɛ kwɔ kɛba ni amɛbabɔ nsara yɛ Yuda, ni amɛmiiya amɛmiiba yɛ Lehi.+ 10 Kɛkɛ ni Yuda hii lɛ kɛɛ akɛ: “Mɛni hewɔ nyɛkwɔ kɛba koni nyɛkɛ wɔ abawu lɛ?” ni amɛhã hetoo akɛ: “Wɔkwɔ kɛba koni wɔbamɔ* Samson, ni wɔfee lɛ tamɔ bɔ ni efee wɔ lɛ pɛpɛɛpɛ.” 11 No hewɔ lɛ, Yuda hii 3,000 kpeleke shi kɛtee tɛkplo lɛ mli yɛ Etam tɛsaa lɛ mli, ni amɛyabi Samson akɛ: “Ani oleee akɛ Filistibii lɛ ni yeɔ wɔnɔ?+ Mɛni ji nɔ ni ofee wɔ nɛɛ?” Ekɛɛ amɛ akɛ: “Bɔ ni amɛfee mi lɛ, nakai mifee amɛ lɛ.” 12 Shi amɛkɛɛ lɛ akɛ: “Wɔba koni wɔbamɔ* bo ni wɔkɛ bo ayahã Filistibii lɛ.” Kɛkɛ ni Samson kɛɛ amɛ akɛ: “Nyɛkãa mi kitã akɛ nyɛ diɛŋtsɛ nyɛfeŋ mi nɔ ko.” 13 Amɛkɛɛ lɛ akɛ: “Dabi, fĩimɔ kɛkɛ wɔbaafĩmɔ bo ni wɔkɛ bo ayahã amɛ, shi wɔgbeŋ bo.”
No hewɔ lɛ, amɛfĩmɔ lɛ kɛ kpãi hei enyɔ ni amɛkɛ lɛ je tɛsaa lɛ mli kɛje kpo. 14 Be ni eshɛ Lehi lɛ, Filistibii lɛ bɔ oshe waa be ni amɛna lɛ lɛ. Kɛkɛ ni Yehowa mumɔ lɛ ba enɔ,+ ni kpãi lɛ ni fĩmɔ eniji lɛ tsɔmɔ tamɔ klala mli kpãi ní akɛ la eshã, ni kpãi lɛ tserɛ yɛ eniji.+ 15 Ni ena tejinuu ko ni gbo etsɛko kadaa wu; ekpã enine mli ni ekɔ, ni ekɛgbe hii 1,000.+ 16 Kɛkɛ ni Samson kɛɛ akɛ:
“Teji kadaa wu—kuu kome, kui enyɔ!
Mikɛ teji kadaa wu lɛ gbe hii 1,000.”+
17 Be ni ewie etã lɛ, eshɛ kadaa wu lɛ efɔ̃, ni etsɛ jɛmɛ akɛ, Ramat-lehi.*+ 18 Kɛkɛ ni kumai ye lɛ waa, ni ebo etsɛ Yehowa ekɛɛ: “Bo otsɔ otsulɔ nine nɔ otsu yiwalaheremɔ nitsumɔ kpele nɛɛ. Shi amrɔ nɛɛ ani obaahã kumai agbe mi, ni miyagbee mɛi ni afolɔko amɛ ketia lɛ adɛŋ?” 19 No hewɔ lɛ, Nyɔŋmɔ hã bu ko ni yɔɔ Lehi lɛ mli gba, ni nu tue kɛjɛ mli.+ Be ni enu nu lɛ, ená hewalɛ* ekoŋŋ ni ehiɛ tserɛ lɛ. No hewɔ ni etsɛ jɛmɛ akɛ En-hakoree,* ni eyɛ Lehi kɛbashi ŋmɛnɛ.
20 Ni ekojo Israel afii 20 yɛ Filistibii lɛ agbii lɛ amli.+