Lalai
Lala ni David fo. Lala.
108 Ao Nyɔŋmɔ, mitsui efi shi shiŋŋ
Malá ni matswa lala kɛ migbɔmɔtso muu fɛɛ.*+
2 Ao kpãa saŋku, ohiɛ atsɛ̃; ni bo saŋku hu nakai nɔŋŋ.+
Matsĩɛ leebi maŋkpa hiɛ.
3 Ao Yehowa, majie oyi yɛ majimaji lɛ ateŋ;
Malá majie* oyi yɛ jeŋmaji lɛ ateŋ.
4 Ejaakɛ osuɔmɔ ni tsakeee lɛ da, eshɛɔ ŋwɛi tɔ̃ɔ,+
Ni onɔkwayeli lɛ hu shɛɔ atatuiaŋ tɔ̃ɔ.
5 Ao Nyɔŋmɔ, awó onɔ gojoo kɛteke ŋwɛi,
Onunyam lɛ ayi shikpɔŋ lɛ nɔ fɛɛ.+
6 Koni ajie mɛi ni osumɔɔ lɛ,
Okɛ oninejurɔ ahere wɔ, ni ohere minɔ.+
7 Nyɔŋmɔ ejɛ ekrɔŋkrɔŋfeemɔ lɛ mli* ewie akɛ:
8 Gilead+ lɛ, minɔ ni, tamɔ bɔ ni Manase ji minɔ lɛ,
Ni Efraim ji miyitso dade fai;*+
Yuda lɛ, minɔyelitso ni.+
9 Moab ji okpolu ni mijuɔ mihe yɛ mli.+
Mashɛ mitokota lɛ mafɔ̃ Edom nɔ.+
Mabɔ kunimyeli oshe mashwie Filistia nɔ.”+
10 Namɔ kɛ mi baaya maŋ ni atswa gbogbo awo he lɛ he?
Namɔ kɛ mi baaya Edom tɔ̃ɔ?+
11 Ao Nyɔŋmɔ, ani jeee bo, bo mɔ ni okwa wɔ lɛ,
Wɔ-Nyɔŋmɔ, bo mɔ ni ofataaa wɔsraafoi lɛ ahe kɛyaaa ta dɔŋŋ lɛ?+