2 Kronika
22 Kɛkɛ ni Yerusalembii lɛ wó Ahazia, ebihii lɛ ateŋ gbekɛ lɛ maŋtsɛ yɛ esɛɛ, ejaakɛ no mli lɛ, ojotswalɔi ata ni fata Arabbii lɛ ahe kɛba nsara lɛ mli lɛ egbe ebihii onukpai lɛ fɛɛ.+ No hewɔ lɛ, Yehoram binuu Ahazia batsɔ Yuda maŋtsɛ.+ 2 Be ni Ahazia batsɔ maŋtsɛ lɛ, no mli lɛ, eye afii 22, ni eye maŋtsɛ afi kome yɛ Yerusalem. Emami gbɛ́i ji Atalia,+ Omri+ nabi* lɛ.
3 Lɛ hu enyiɛ Ahab shĩabii lɛ agbɛi lɛ anɔ,+ ejaakɛ emami ji mɔ ni woɔ lɛ ŋaa ni efeɔ efɔŋ lɛ. 4 Ni etee nɔ efee efɔŋ yɛ Yehowa hiɛ tamɔ bɔ ni Ahab shĩabii lɛ fee lɛ nɔŋŋ, ejaakɛ be ni epapa gbo lɛ, amɛbatsɔmɔ eŋaawolɔi, ni no kɛ lɛ tee hiɛkpatamɔ mli. 5 Ebo amɛŋaawoo toi ni ekɛ Yehoram, Israel maŋtsɛ Ahab binuu lɛ tee ni amɛkɛ Hazael,+ Siria maŋtsɛ lɛ yawu ta yɛ Ramot-gilead,+ ni jɛmɛ gãitsɛlɔi lɛ tsɛ̃ Yehoram gãi yɛ ni epila. 6 Eku esɛɛ kɛba Yezreel+ koni ebatsa pilamɔ ni amɛpila lɛ yɛ Rama be ni ekɛ Siria maŋtsɛ Hazael yawu lɛ.+
Yuda maŋtsɛ Ahazia,* Yehoram+ binuu lɛ, kpeleke shi kɛtee Yezreel koni eyasara Yehoram,+ Ahab binuu lɛ, ejaakɛ apila lɛ.*+ 7 Shi Nyɔŋmɔ tsɔ ba ni Ahazia ba Yehoram ŋɔɔ lɛ nɔ ekpãtã Ahazia hiɛ; ni be ni eba lɛ, ekɛ Yehoram tee koni amɛkɛ Yehu,+ Nimshi nabi* lɛ ni Yehowa efɔ lɛ mu akɛ ekpãtã Ahab shĩabii lɛ ahiɛ* lɛ ayakpe.+ 8 Be ni Yehu bɔi Ahab shĩabii lɛ ahiɛkpatamɔ lɛ, ena Yuda lumɛi lɛ, kɛ Ahazia nyɛmimɛi hii lɛ abihii, ni sɔmɔɔ Ahazia lɛ, ni egbe amɛ.+ 9 Kɛkɛ ni eyatao Ahazia; amɛyamɔ lɛ yɛ Samaria, ni ji he ni eyatee ehe yɛ lɛ, ni amɛkɛ lɛ ba Yehu ŋɔɔ. Kɛkɛ ni amɛgbe lɛ ni amɛfu lɛ,+ ejaakɛ amɛkɛɛ akɛ: “Yehoshafat, mɔ ni tao Yehowa sɛɛ gbɛ kɛ etsui fɛɛ+ lɛ nabi ji lɛ.” Anáaa mɔ ko yɛ Ahazia shĩabii lɛ ateŋ ni yɔɔ hewalɛ ni ekɛbaaye nɔ yɛ maŋtsɛyeli lɛ mli.
10 Be ni Ahazia mami Atalia+ na akɛ ebinuu lɛ egbo lɛ, ete shi koni ekpãtã maŋtsɛ seshibii lɛ fɛɛ* ahiɛ yɛ Yuda weku lɛ mli.+ 11 Shi Yehoshabeat, maŋtsɛ lɛ biyoo lɛ, mɔ Ahazia binuu Yehoash+ ni eju lɛ kɛjɛ maŋtsɛ bihii ni abaagbe amɛ lɛ ateŋ, ni ekɛ Yehoash kɛ yoo ni kwɛɔ lɛ lɛ yato sɛɛtsu ko mli. Yehoshabeat, Maŋtsɛ Yehoram+ biyoo lɛ (eji osɔfo Yehoiada+ ŋa, kɛ Ahazia nyɛmi yoo) bɔ mɔdɛŋ ekɛ lɛ yato koni Atalia akana lɛ, no hewɔ lɛ Atalia egbeee lɛ.+ 12 Ehi amɛŋɔɔ yɛ anɔkwa Nyɔŋmɔ lɛ shĩa lɛ afii ekpaa, ni akɛ lɛ etee yɛ jɛmɛ. Nakai beiaŋ lɛ, Atalia miiye shikpɔŋ lɛ nɔ.