5 MOSE*

1 Wiemɔi nɛɛ ji wiemɔi ni Mose kɛ Israel fɛɛ wie yɛ Yordan kpokpaa lɛ nɔ yɛ ŋa lɛ nɔ, yɛ ŋa kpataa ni kã Suf hiɛ lɛ nɔ, yɛ Paran kɛ Tofel kɛ Laban kɛ Hazerot kɛ Dizahab teŋ lɛ. 2 Kɛjɛ Horeb kɛmiiya Kadesh-barnea+ lɛ, kɛ́ atsɔ Seir Gɔŋ lɛ he gbɛ lɛ nɔ lɛ, eheɔ gbii 11. 3 Yɛ afi ni ji 40 lɛ mli+ nyɔɔŋ ni ji 11 lɛ nɔ klɛŋklɛŋ gbi lɛ nɔ lɛ, Mose kɛɛ Israelbii* lɛ nibii fɛɛ ni Yehowa fã lɛ akɛ ekɛɛ amɛ lɛ. 4 Efee enɛ be ni eye Amorbii lɛ amaŋtsɛ Sihon,+ mɔ ni hi Heshbon lɛ nɔ kunim, ní eye Bashan maŋtsɛ Og,+ mɔ ni hi Ashtarot lɛ hu nɔ kunim yɛ Edrei+ lɛ sɛɛ. 5 Mose gbála Mla+ nɛɛ mli yɛ Yordan kpokpaa lɛ nɔ, yɛ Moab shikpɔŋ lɛ nɔ ekɛɛ:

6 “Yehowa, wɔ-Nyɔŋmɔ lɛ, kɛɛ wɔ yɛ Horeb akɛ, ‘Bɔ ni nyɛhi gɔji nɛɛ anɔ lɛ, efa.+ 7 Nyɛdɔa nyɛyi ni nyɛfãa kɛyaa Amorbii+ lɛ agɔji lɛ anɔ kɛ maji fɛɛ ni bɛŋkɛ amɛ yɛ Araba+ lɛ anɔ, nyɛyaa gɔji lɛ anɔ, Shefela lɛ kɛ Negeb lɛ kɛ ŋshɔ lɛ naa,+ nyɛyaa Kanaanbii lɛ ashikpɔŋ lɛ nɔ, kɛ Lebanon,*+ aahu kɛyashi faa wulu lɛ, ni ji Yufrate faa lɛ naa.+ 8 Naa, mikɛ shikpɔŋ lɛ efɔ̃ nyɛhiɛ. Nyɛyaa ni nyɛyaŋɔa shikpɔŋ ni Yehowa kã nyɛtsɛmɛi Abraham kɛ Isak+ kɛ Yakob+ kitã yɛ he akɛ ekɛbaahã amɛ kɛ amɛseshibii ni baaba yɛ amɛsɛɛ lɛ.’+

9 “Ni mikɛɛ nyɛ yɛ nakai be lɛ mli akɛ, ‘Mikome too minyɛŋ mahiɛ nyɛ.+ 10 Yehowa, nyɛ-Nyɔŋmɔ lɛ, ehã nyɛyi efa, ni naa, ŋmɛnɛ lɛ nyɛyi efa tamɔ ŋwɛi ŋulamii.+ 11 Yehowa, nyɛtsɛmɛi a-Nyɔŋmɔ lɛ, ahã nyɛyi afa+ ni nyɛyifalɛ lɛ aku abɔ he toi akpe, ní ejɔɔ nyɛ tamɔ bɔ ni ewo nyɛ shi lɛ pɛpɛɛpɛ.+ 12 Te aaafee tɛŋŋ ni mikome too matere nyɛjatsu lɛ kɛ nyɛnaagbai lɛ kɛ nyɛbéi lɛ?+ 13 Nyɛhalaa hii ni hiɛ kã shi, ni le nii, ni yɔɔ niiashikpamɔ hu kɛjɛa nyɛwekui lɛ amli, ni mahole amɛ nyɛnɔ onukpai.’+ 14 Nyɛhã mi hetoo akɛ, ‘Nɔ ni okɛɛ wɔfee lɛ hi.’ 15 No hewɔ lɛ, miŋɔ nyɛwekui lɛ anɔ onukpai lɛ, mɛi ni hiɛ kã shi ni yɔɔ niiashikpamɔ lɛ, ni mihole amɛ nyɛnɔ onukpai, mɛi akpe nɔkwɛlɔi kɛ mɛi oha nɔkwɛlɔi kɛ mɛi nyɔŋmai enumɔ nɔkwɛlɔi kɛ mɛi nyɔŋma nɔkwɛlɔi kɛ onukpai yɛ nyɛwekui lɛ amli.+

16 “Nakai be lɛ mli lɛ, mifã nyɛkojolɔi lɛ akɛ, ‘Kɛ́ nyɛmiiye nyɛnyɛmimɛi lɛ asane lɛ, nyɛkojoa mɔ kɛ enyɛmi loo maŋnyo kɛ gbɔ teŋ+ yɛ jalɛ naa.+ 17 Nyɛkakwɛa hiɛiaŋ yɛ kojomɔ mli.+ Nyɛboa mɔ bibioo toi tamɔ bɔ ni nyɛbaabo mɔ wulu toi lɛ nɔŋŋ.+ Nyɛkashea gbɔmɛi gbeyei,+ ejaakɛ kojomɔ lɛ, Nyɔŋmɔ nɔ ni;+ ni kɛji sane ko yeli wa tsɔ hã nyɛ lɛ, nyɛkɛbahãa mi, ni maye.’+ 18 Nakai be lɛ mli lɛ, mitsɔɔ nyɛ nibii fɛɛ ni sa akɛ nyɛfee.

19 “Ni wɔfã kɛshi Horeb, ni wɔnyiɛ kɛtsɔ nakai ŋa kpele ni nɔ yɔɔ gbeyei,+ ní nyɛna yɛ gbɛ ni yaa Amorbii lɛ agɔji lɛ anɔ+ lɛ nɔ, tamɔ bɔ ni Yehowa, wɔ-Nyɔŋmɔ lɛ, fã wɔ lɛ pɛpɛɛpɛ, ni naagbee lɛ wɔbashɛ Kadesh-barnea.+ 20 Kɛkɛ ni mikɛɛ nyɛ akɛ, ‘Nyɛbashɛ Amorbii lɛ agɔji lɛ ní Yehowa, wɔ-Nyɔŋmɔ lɛ, kɛmiihã wɔ lɛ anɔ. 21 Naa, Yehowa, nyɛ-Nyɔŋmɔ lɛ, kɛ shikpɔŋ lɛ ehã nyɛ. Nyɛkwɔa kɛyaa ní nyɛyaŋɔa, tamɔ bɔ ni Yehowa, nyɛtsɛmɛi a-Nyɔŋmɔ lɛ, ekɛɛ nyɛ lɛ pɛpɛɛpɛ.+ Nyɛkashea gbeyei, ni nyɛtsui akafãa hu.’

22 “Shi nyɛ fɛɛ nyɛtsi nyɛbɛŋkɛ mi ni nyɛkɛɛ, ‘Hã wɔtsu hii kɛtsɔ wɔhiɛ koni amɛyakwɛ bɔ ni shikpɔŋ lɛ yɔɔ amɛhã wɔ, ní amɛku amɛsɛɛ amɛbakɛɛ wɔ nɔ ko, koni wɔna gbɛ ni sa akɛ wɔtsɔ nɔ, kɛ maji ni wɔbaayanina.’+ 23 Sane lɛ sa mihiɛ, ni no hewɔ lɛ, mihala nyɛteŋ hii 12, mɔ kome kɛjɛ weku fɛɛ weku mli.+ 24 Amɛshi, ni amɛkwɔ kɛtee gɔji lɛ anɔ,+ ni amɛyashɛ Eshkol Jɔɔ* lɛ mli, ni amɛkpá shikpɔŋ lɛ shi. 25 Amɛŋɔ shikpɔŋ lɛ nɔ yibii lɛ eko, ni amɛhiɛ kɛbahã wɔ, ni amɛbakɛɛ wɔ akɛ, ‘Shikpɔŋ lɛ ni Yehowa, wɔ-Nyɔŋmɔ lɛ, kɛhãa wɔ lɛ hi.’+ 26 Shi nyɛsumɔɔɔ ni nyɛyaa, ni nyɛtse Yehowa, nyɛ-Nyɔŋmɔ lɛ, famɔ lɛ hiɛ atua.+ 27 Nyɛtee nɔ nyɛgbigbili nyɛmli yɛ nyɛmama tsũi lɛ amli, ni nyɛwie akɛ, ‘Nyɛ ni Yehowa nyɛɔ wɔ hewɔ ni ejie wɔ kɛje Ejipt shikpɔŋ lɛ nɔ koni ebatu wɔ ewo Amorbii lɛ adɛŋ koni amɛkpãtã wɔhiɛ lɛ. 28 Nɛgbɛ po wɔyaa nɛɛ? Wɔnyɛmimɛi lɛ hã wɔtsui fã,*+ ejaakɛ amɛkɛɛ wɔ akɛ, “Amɛji gbɔmɛi ni dara, ní kwɔlɔ fe wɔ, ni amɛmaji lɛ dara, ni atswa gbogboi awo amɛhe kɛyashi ŋwɛi,*+ ni wɔna Anakbii+ lɛ yɛ jɛmɛ.”’

29 “No hewɔ lɛ, mikɛɛ nyɛ akɛ, ‘Nyɛkahãa amɛhe ŋmiŋmi miimɔmɔa nyɛ, ni nyɛkashea amɛ gbeyei hu.+ 30 Yehowa, nyɛ-Nyɔŋmɔ lɛ, baanyiɛ nyɛhiɛ kɛya ni ebaawu ehã nyɛ,+ tamɔ bɔ ni efee yɛ Ejipt yɛ nyɛ diɛŋtsɛ nyɛhiŋmɛiiaŋ lɛ.+ 31 Ni nyɛna bɔ ni Yehowa, nyɛ-Nyɔŋmɔ lɛ, hiɛ nyɛ yɛ ŋa lɛ nɔ tamɔ bɔ ni nuu hiɛɔ ebinuu lɛ, ehiɛ nyɛ kɛtee he fɛɛ he ni nyɛtee kɛyashi nyɛbashɛ biɛ nɛɛ.’ 32 Shi enɛ fɛɛ sɛɛ lɛ, nyɛheee Yehowa, nyɛ-Nyɔŋmɔ lɛ nɔ nyɛyeee,+ 33 lɛ ji mɔ ni nyiɛ nyɛhiɛ yɛ gbɛ lɛ nɔ, koni eyatao he ko ni nyɛbaabɔ nsara yɛ ehã nyɛ lɛ. Jenamɔ mli lɛ, ejie ehe kpo akɛ la, ni jetsɛremɔ mli lɛ, ejie ehe kpo akɛ atatu, koni etsɔɔ nyɛ gbɛ ni sa akɛ nyɛtsɔ nɔ.+

34 “Nɛkɛ be nɛɛ mli fɛɛ lɛ, Yehowa nu nyɛwiemɔi lɛ, ni emli wo la, ni ekã kitã akɛ,+ 35 ‘Nɛkɛ yinɔbii fɔji nɛɛ ateŋ nuu kome folo po enaŋ shikpɔŋ kpakpa ni mikã kitã akɛ mikɛbaahã nyɛtsɛmɛi lɛ,+ 36 ja Kaleb, Yefune binuu lɛ. Lɛ lɛ, ebaana, ni mikɛ shikpɔŋ ni eyanyiɛ nɔ lɛ baahã lɛ kɛ ebihii, ejaakɛ enyiɛ Yehowa sɛɛ kɛ etsui muu fɛɛ.*+ 37 (Yehowa mli fu mi po yɛ nyɛhewɔ, ni ekɛɛ, “Bo hu oyaŋ jɛmɛ.+ 38 Yoshua, Nun binuu lɛ ni sɔmɔɔ bo*+ lɛ ji mɔ ni baaya shikpɔŋ lɛ nɔ.+ Wajemɔ lɛ,*+ ejaakɛ lɛ ebaahã Israel aŋɔ shikpɔŋ lɛ.”) 39 Agbɛnɛ hu, nyɛbii lɛ ni nyɛkɛɛ abaamɔmɔ amɛ kɛya lɛ,+ kɛ nyɛbihii ni ŋmɛnɛ lɛ amɛleee ekpakpa kɛ efɔŋ lɛ, amɛji mɛi ni baaya shikpɔŋ lɛ nɔ, ni mikɛbaahã amɛ koni etsɔ amɛnɔ.+ 40 Shi nyɛ lɛ, nyɛdɔa nyɛyi ni nyɛtsɔa Ŋshɔ Tsuru lɛ naa gbɛ lɛ nɔ ní nyɛyaa ŋa lɛ nɔ.’+

41 “Kɛkɛ ni nyɛkɛɛ mi akɛ, ‘Wɔfee esha wɔshi Yehowa. Wɔbaakwɔ kɛya ní wɔyawu ta lɛ, tamɔ bɔ ni Yehowa, wɔ-Nyɔŋmɔ lɛ, efã wɔ lɛ pɛpɛɛpɛ!’ No hewɔ lɛ, nyɛteŋ mɔ fɛɛ mɔ wula kɛ etawuu nii, ni nyɛyasusu akɛ ewaaa akɛ nyɛbaakwɔ gɔŋ lɛ.+ 42 Shi Yehowa kɛɛ mi akɛ, ‘Kɛɛmɔ amɛ akɛ: “Nyɛkakwɔa kɛyaa ni nyɛyawua ta lɛ, ejaakɛ mihiŋ nyɛteŋ.+ Kɛ́ nyɛtee lɛ, nyɛhenyɛlɔi lɛ baaye nyɛnɔ kunim.”’ 43 No hewɔ lɛ, mikɛ nyɛ wie, shi nyɛbooo toi. Moŋ lɛ, nyɛtse Yehowa famɔ lɛ hiɛ atua, ni nyɛye nyɛtsuinaa sane ni nyɛka akɛ nyɛbaakwɔ gɔŋ lɛ. 44 Kɛkɛ ni Amorbii ni yɔɔ nakai gɔŋ lɛ nɔ lɛ je kpo ni amɛkɛ nyɛ bakpe, ni amɛnyiɛ nyɛsɛɛ tamɔ wobii nyiɛɔ mɔ sɛɛ lɛ, ni amɛgbɛ nyɛ amɛshwã yɛ Seir aahu kɛtee Horma tɔ̃ɔ. 45 No hewɔ lɛ, nyɛku nyɛsɛɛ ni nyɛbabɔi yaafo yɛ Yehowa hiɛ, shi Yehowa booo nyɛ toi, ni efooo nyɛdaaŋ hu. 46 No hewɔ ni nyɛtee nɔ nyɛhi Kadesh be kplaŋŋ lɛ.

2 “Ni wɔdɔ wɔyi, ni wɔfã kɛtsɔ Ŋshɔ Tsuru lɛ naa gbɛ lɛ nɔ kɛtee ŋa lɛ nɔ, tamɔ bɔ ni Yehowa kɛɛ mi lɛ,+ ni wɔnyiɛ gbii pii kɛfo shi yɛ Seir Gɔŋ lɛ he. 2 Naagbee lɛ, Yehowa kɛɛ mi akɛ, 3 ‘Bɔ ni nyɛfo shi yɛ gɔŋ nɛɛ he lɛ, efa. Agbɛnɛ, nyɛdɔa nyɛyi kɛyaa kooyigbɛ. 4 Ni okɛ famɔ nɛɛ ahã maŋ lɛ akɛ: “Nyɛbaayatsɔ nyɛnyɛmimɛi lɛ, ni ji Esau seshibii+ ni yɔɔ Seir lɛ,+ ahusu lɛ he kɛho, ni amɛbaashe nyɛ gbeyei,+ no hewɔ lɛ, nyɛkwɛa nyɛhe nɔ jogbaŋŋ. 5 Nyɛkatutuaa amɛ,* ejaakɛ mikɛ amɛshikpɔŋ lɛ eko kwraa hãŋ nyɛ, mikɛ nanemaahe kome folo po hãŋ nyɛ, ejaakɛ mikɛ Seir Gɔŋ lɛ ehã Esau akɛ enɔ.+ 6 Niyenii ni nyɛbaaye lɛ, nyɛkɛ shika ahéa yɛ amɛdɛŋ, ni nu ni nyɛbaanu lɛ hu, nyɛwoa he nyɔmɔ.+ 7 Ejaakɛ Yehowa, o-Nyɔŋmɔ lɛ, ejɔɔ bo yɛ nɔ fɛɛ nɔ ni ofeɔ lɛ mli. Ele nyiɛmɔ ni onyiɛ kɛtsɔ ŋa kpele nɛɛ nɔ lɛ jogbaŋŋ. Yehowa, o-Nyɔŋmɔ lɛ, kɛ bo ehi shi afii 40 nɛɛ fɛɛ, ni nɔ ko nɔ ko he ehiako bo.”’+ 8 No hewɔ lɛ, wɔho wɔnyɛmimɛi lɛ, ni ji Esau seshibii+ ni yɔɔ Seir lɛ ahe, ni wɔtsɔɔɔ Araba lɛ gbɛ lɛ nɔ, wɔtsɔɔɔ Elat, ni wɔtsɔɔɔ Ezion-geber+ hu.

“No sɛɛ lɛ, wɔdɔ wɔyi ni wɔtsɔ Moab ŋa lɛ nɔ gbɛ lɛ nɔ.+ 9 Ni Yehowa kɛɛ mi akɛ, ‘Kaayatutua Moab, ni okɛ lɛ akawu ta hu, ejaakɛ mikɛ eshikpɔŋ lɛ eko kwraa hãŋ bo akɛ onɔ, ejaakɛ mikɛ Ar ehã Lot seshibii lɛ akɛ amɛnɔ.+ 10 (Tsutsu lɛ, Embii+ ji mɛi ni yɔɔ jɛmɛ, amɛji maŋ ni he wa, ni amɛyi fa ni amɛkwɔlɔ tamɔ Anakbii lɛ. 11 Abu Refabii+ lɛ hu tamɔ Anakbii+ lɛ nɔŋŋ, ni no mli lɛ, Moabbii lɛ tsɛɔ amɛ Embii. 12 Tsutsu lɛ, Horbii+ ji mɛi ni yɔɔ Seir, shi Esau seshibii lɛ shwie amɛ ni amɛkpãtã amɛhiɛ, ni amɛhi shi yɛ jɛmɛ,+ tamɔ bɔ ni Israel hu baafee shikpɔŋ ni ji amɛnɔ lɛ, shikpɔŋ ni bɔ fɛɛ bɔ ni fee lɛ Yehowa kɛbaahã amɛ lɛ.) 13 Agbɛnɛ, nyɛyaa ni nyɛyafoa Zered Jɔɔ* lɛ.’ No hewɔ lɛ, wɔyafo Zered Jɔɔ*+ lɛ. 14 Bei abɔ ni wɔkɛnyiɛ kɛjɛ Kadesh-barnea kɛyashi wɔfo Zered Jɔɔ* lɛ ji afii 38, kɛyashi yinɔbii ni ji hii tawulɔi lɛ fɛɛ ahiɛ kpãtã kɛje nsara lɛ mli, tamɔ bɔ ni Yehowa kã amɛ kitã lɛ pɛpɛɛpɛ.+ 15 Yehowa nine kã amɛnɔ ni ekpãtã amɛhiɛ kɛje nsara lɛ mli, kɛyashi amɛtã kwraa.+

16 “Be ni hii tawulɔi lɛ fɛɛ gboi kɛje maŋbii lɛ ateŋ nɔŋŋ pɛ lɛ,+ 17 Yehowa kɛ mi wie ekoŋŋ ekɛɛ, 18 ‘Ŋmɛnɛ lɛ, obaayatsɔ Moab kpokpaa, ni ji Ar lɛ nɔ kɛho. 19 Kɛ́ oyashɛ Amonbii lɛ amasɛi lɛ, kaahao amɛ, ni kaatsɔ amɛnaa hu, ejaakɛ mikɛ Amonbii lɛ ashikpɔŋ lɛ eko kwraa hãŋ bo akɛ onɔ, ejaakɛ mikɛhã Lot seshibii lɛ akɛ amɛnɔ.+ 20 Tsutsu lɛ, abuɔ shikpɔŋ nɛɛ hu akɛ Refabii+ lɛ ashikpɔŋ. (Tsutsu lɛ, Refabii ji mɛi ni yɔɔ jɛmɛ, ni Amonbii lɛ tsɛɔ amɛ Zamzumbii. 21 Amɛji maŋ ni he wa, ni amɛyi fa ni amɛkwɔlɔ tamɔ Anakbii+ lɛ; shi Yehowa kpãtã amɛhiɛ yɛ Amonbii lɛ ahiɛ, ni amɛshwie amɛ ni amɛhi shi yɛ jɛmɛ. 22 Nakai nɔŋŋ efee ehã Esau seshibii lɛ ni yɔɔ Seir amrɔ nɛɛ,+ be ni ekpãtã Horbii+ lɛ ahiɛ yɛ amɛhiɛ lɛ, ni amɛshwie amɛ ni amɛhi shi yɛ jɛmɛ kɛbashi ŋmɛnɛ gbi nɛɛ. 23 Shi Avibii lɛ, akrowai amli amɛhi aahu kɛtee Gaza+ tɔ̃ɔ, kɛyashi Kaftorbii+ ni jɛ Kaftor* ba lɛ bakpãtã amɛhiɛ ni amɛhi shi yɛ jɛmɛ.)

24 “Nyɛtea shi, ni nyɛyafoa Arnon Jɔɔ* lɛ.+ Naa, mikɛ Heshbon maŋtsɛ Sihon,+ Amornyo lɛ, ewo odɛŋ. No hewɔ lɛ, bɔimɔ eshikpɔŋ lɛ shɔ̃mɔ, ní okɛ lɛ awu. 25 Ŋmɛnɛ gbi nɛɛ, mahã ohe ŋmiŋmi kɛ ohe gbeyei amɔmɔ gbɔmɛi fɛɛ ni yɔɔ ŋwɛi shishi ni baanu ohe lɛ. Amɛbaahao, ni amɛhe baakpokpo* yɛ ohewɔ.’+

26 “Ni mikɛ toiŋjɔlɛ wiemɔi nɛɛ tsu mɛi kɛjɛ Kedemot+ ŋa lɛ nɔ kɛtee Maŋtsɛ Sihon ni yɔɔ Heshbon lɛ ŋɔɔ+ akɛ, 27 ‘Hã matsɔ oshikpɔŋ lɛ nɔ kɛho. Manyiɛ gbɛjegbɛ lɛ nɔ kɛkɛ, ni migbáŋ kɛyaŋ ninejurɔ loo abɛku.+ 28 Niyenii ni obaahɔ̃ɔ ohã mi lɛ, no kɛkɛ maye, ni nu ni obaahɔ̃ɔ ohã mi lɛ, no kɛkɛ manu. Ŋmɛɛ mi gbɛ kɛkɛ ni manyiɛ minane nɔ kɛho 29 —nakai ji bɔ ni Esau seshibii ni yɔɔ Seir lɛ, kɛ Moabbii ni yɔɔ Ar lɛ fee amɛhã mi—kɛyashi be ni mafo Yordan lɛ kɛya shikpɔŋ ni Yehowa, wɔ-Nyɔŋmɔ lɛ, kɛhãa wɔ lɛ nɔ.’ 30 Shi Maŋtsɛ Sihon ni yɔɔ Heshbon lɛ hãaa wɔho, ejaakɛ Yehowa, o-Nyɔŋmɔ lɛ, ŋmɛ gbɛ ni ekuɛŋ ti,+ ni ekpiliŋ etsui hu, bɔ ni afee ni etu lɛ ewo odɛŋ, tamɔ bɔ ni eba mli amrɔ nɛɛ.+

31 “Ni Yehowa kɛɛ mi akɛ, ‘Naa, mikɛ Sihon kɛ eshikpɔŋ lɛ ebɔi bo hãmɔ momo. Bɔimɔ eshikpɔŋ lɛ shɔ̃mɔ.’+ 32 Be ni Sihon kɛ ewebii lɛ fɛɛ je kpo koni amɛkɛ wɔ abakpe ni amɛkɛ wɔ awu yɛ Yahaz lɛ,+ 33 Yehowa, wɔ-Nyɔŋmɔ lɛ, tu lɛ ewo wɔdɛŋ, ni wɔye lɛ kɛ ebihii lɛ kɛ ewebii lɛ fɛɛ anɔ kunim. 34 Wɔshɔ̃ emaji lɛ fɛɛ yɛ nakai be lɛ mli, ni wɔkpãtã maŋ fɛɛ maŋ hiɛ, ni hii kɛ yei kɛ gbekɛbii hu fata he. Wɔshiii mɔ ko mɔ ko.+ 35 Lɛɛ kooloi lɛ kɛkɛ wɔloo wɔhã wɔhe, kɛ maji ni wɔshɔ̃ lɛ amli nibii lɛ hu. 36 Kɛjɛ Aroer+ ni kã Arnon Jɔɔ* lɛ naa (kɛ maŋ ni yɔɔ jɔɔ lɛ mli lɛ hu), aahu kɛyashi Gilead tɔ̃ɔ lɛ, maŋ ko maŋ ko bɛ ni wɔnyɛɛɛ nɔ kunim wɔye. Yehowa, wɔ-Nyɔŋmɔ lɛ, tu fɛɛ ewo wɔdɛŋ.+ 37 Shi obɛŋkɛɛɛ Amonbii lɛ ashikpɔŋ lɛ,+ ni ji Yabok+ Jɔɔ* lɛ toitoi fɛɛ kɛ maji ni yɔɔ gɔji lɛ anɔ lɛ, aloo he kroko ni Yehowa, wɔ-Nyɔŋmɔ lɛ, kɛɛ okaya lɛ.

3 “Ni wɔdɔ wɔyi ni wɔkwɔ kɛtsɔ Bashan Gbɛ lɛ nɔ. Ni Bashan maŋtsɛ Og kɛ ewebii lɛ fɛɛ je kpo koni amɛkɛ wɔ abakpe ní amɛkɛ wɔ awu yɛ Edrei.+ 2 No hewɔ lɛ, Yehowa kɛɛ mi akɛ, ‘Kaashe lɛ gbeyei, ejaakɛ mikɛ lɛ kɛ ewebii lɛ fɛɛ kɛ eshikpɔŋ lɛ baawo odɛŋ, ni obaafee lɛ tamɔ bɔ ni ofee Amorbii lɛ amaŋtsɛ Sihon ni hi Heshbon lɛ pɛpɛɛpɛ.’ 3 No hewɔ lɛ, Yehowa, wɔ-Nyɔŋmɔ lɛ, ŋɔ Maŋtsɛ Og ni hi Bashan lɛ hu kɛ ewebii lɛ fɛɛ ewo wɔdɛŋ, ni wɔtswia amɛ nii aahu kɛyashi be ni eshwɛɛɛ ewebii lɛ ateŋ mɔ kome folo po ni hiɛ kã. 4 Kɛkɛ ni wɔshɔ̃ emaji lɛ fɛɛ. Maŋ ko maŋ ko bɛ ni wɔshɔ̃ɔɔ yɛ amɛdɛŋ—wɔshɔ̃ maji 60, Argob kpokpaa muu lɛ fɛɛ, ni ji Og maŋtsɛyeli ni yɔɔ Bashan lɛ.+ 5 Maji nɛɛ fɛɛ lɛ, atswa gbogboi ni kwɔlɔ waa awo amɛhe, atara amɛnaa agbói, kɛ amɛsɛɛ adabaŋi,* ni wɔshɔ̃ maji babaoo hu ni atswako gbogboi awoko amɛhe. 6 Shi wɔkpãtã amɛhiɛ,+ tamɔ bɔ ni wɔfee Maŋtsɛ Sihon ni hi Heshbon lɛ, wɔkpãtã maŋ fɛɛ maŋ hiɛ, ni hii kɛ yei kɛ gbekɛbii hu fata he.+ 7 Ni wɔloo lɛɛ kooloi lɛ fɛɛ kɛ maji lɛ amli nibii lɛ wɔhã wɔhe.

8 “Nakai be lɛ mli lɛ, wɔshɔ̃ Amorbii lɛ amaŋtsɛmɛi enyɔ+ ni yɔɔ Yordan kpokpaa lɛ nɔ lɛ ashikpɔŋ lɛ, kɛjɛ Arnon Jɔɔ* lɛ naa aahu kɛtee Hermon Gɔŋ lɛ he tɔ̃ɔ+ 9 (gɔŋ ní tsutsu lɛ Sidonbii lɛ tsɛɔ lɛ Sirion, ní Amorbii lɛ hu tsɛɔ lɛ Senir lɛ), 10 maji fɛɛ ni yɔɔ gɔŋ kɛ eyiteŋ tɛtrɛɛ lɛ nɔ lɛ kɛ Gilead fɛɛ kɛ Bashan fɛɛ kɛyashi Saleka kɛ Edrei,+ maji ni yɔɔ Og ni hi Bashan lɛ maŋtsɛyeli lɛ mli lɛ. 11 Ejaakɛ Maŋtsɛ Og ni hi Bashan lɛ ji Refabii lɛ ateŋ naagbee mɔ ni shwɛ. Egbonyo saatso* lɛ, dade* akɛfee, ni eyɛ Raba ni ji Amonbii lɛ amaŋ lɛ mli lolo. Ekɛlɛ ji ninetalɔi* nɛɛhu, ni elɛɛmɔ ji ninetalɔi ejwɛ, yɛ ninetalɔ kɛlɛ ni akpɛlɛɔ nɔ lɛ naa. 12 Nakai be lɛ mli lɛ, wɔshɔ̃ shikpɔŋ nɛɛ: kɛjɛ Aroer,+ ni kã Arnon Jɔɔ* lɛ naa lɛ, kɛ Gilead gɔji ashikpɔŋ lɛ fã, ni mikɛ maji ni yɔɔ jɛmɛ lɛ ehã Rubenbii lɛ kɛ Gadbii lɛ.+ 13 Ni Gilead he ni shwɛ lɛ, kɛ Bashan fɛɛ ni yɔɔ Og maŋtsɛyeli lɛ shishi lɛ, mikɛhã Manase weku lɛ fã lɛ.+ Atsɛɔ Argob kpokpaa muu lɛ fɛɛ ni yɔɔ Bashan lɛ hu akɛ Refabii lɛ ashikpɔŋ.

14 “Yair,+ Manase binuu lɛ, ŋɔ Argob kpokpaa muu lɛ fɛɛ+ kɛyashi Geshurbii lɛ kɛ Maakatbii lɛ ahusu lɛ naa,+ ni ekɛ egbɛ́i wo nakai akrowai ni yɔɔ Bashan lɛ akɛ, Havot-yair*+ kɛbashi ŋmɛnɛ. 15 Ni mikɛ Gilead ehã Makir.+ 16 Ni Rubenbii lɛ kɛ Gadbii lɛ,+ miŋɔ kɛjɛ Gilead kɛyashi Arnon Jɔɔ* lɛ naa mihã amɛ, ni jɔɔ lɛ teŋ ji amɛhusu, aahu kɛtee Yabok, jɔɔ ni ji Amonbii lɛ ahusu lɛ naa tɔ̃ɔ, 17 kɛ Araba lɛ kɛ Yordan lɛ kɛ husu lɛ, kɛjɛ Kineret kɛyashi Araba lɛ Ŋshɔ lɛ, ni ji Ŋoo Ŋshɔ* lɛ naa, yɛ Pisga gɔŋ lɛ shishi kɛmiiya bokãgbɛ.+

18 “Ni mifã nyɛ akɛ: ‘Yehowa, nyɛ-Nyɔŋmɔ lɛ, kɛ shikpɔŋ nɛɛ ehã nyɛ koni nyɛŋɔ akɛ nyɛnɔ. Nyɛhii kãkãlɔi lɛ fɛɛ akɔlɔ tawuu nii, ní amɛfo mli kɛya, yɛ nyɛnyɛmimɛi Israelbii lɛ ahiɛ.+ 19 Nyɛŋamɛi kɛ nyɛbii kɛ nyɛlɛɛ kooloi lɛ (mile jogbaŋŋ akɛ nyɛyɛ lɛɛ kooloi babaoo diɛŋtsɛ) kɛkɛ baaya nɔ ahi maji ni mikɛhã nyɛ lɛ amli, 20 kɛyashi Yehowa baahã nyɛnyɛmimɛi lɛ aná hejɔlɛ, tamɔ bɔ ni efee ehã nyɛ lɛ, ní amɛ hu amɛbaaŋɔ shikpɔŋ ni Yehowa, nyɛ-Nyɔŋmɔ lɛ, kɛbaahã amɛ yɛ Yordan lɛ sɛɛ lɛ. No sɛɛ lɛ, nyɛteŋ mɔ fɛɛ mɔ aku esɛɛ ebaŋɔ enii ni mikɛhã lɛ lɛ.’+

21 “Nakai be lɛ mli lɛ, mifã Yoshua+ akɛ: ‘Bo diɛŋtsɛ okɛ ohiŋmɛii na nɔ ni Yehowa, nyɛ-Nyɔŋmɔ lɛ, fee maŋtsɛmɛi enyɔ nɛɛ. Nakai nɔŋŋ Yehowa baafee maŋtsɛyelii fɛɛ ni nyɛbaafo faa lɛ kɛyanina lɛ.+ 22 Nyɛkashea amɛ gbeyei, ejaakɛ Yehowa, nyɛ-Nyɔŋmɔ lɛ, ji mɔ ni wuɔ hãa nyɛ.’+

23 “Nakai be lɛ mli lɛ, mikpa Yehowa fai akɛ, 24 ‘Nuŋtsɔ Ofe Yehowa, ohã otsulɔ miina ogbojee lɛ kɛ onine ni yɔɔ hewalɛ lɛ,+ ejaakɛ mɛɛ nyɔŋmɔ yɔɔ ŋwɛi loo shikpɔŋ lɛ nɔ ni tsuɔ hewalɛ nitsumɔi ni tamɔ nɛkɛ, tamɔ bɔ ni ofeɔ lɛ?+ 25 Ofainɛ, hã mafo mli kɛya ní mayakwɛ shikpɔŋ kpakpa ni yɔɔ Yordan lɛ sɛɛ lɛ, gɔji ashikpɔŋ kpakpa nɛɛ kɛ Lebanon.’+ 26 Shi no mli lɛ, Yehowa mli efu mi lolo yɛ nyɛhewɔ,+ ni ebooo mi toi. Moŋ lɛ, Yehowa kɛɛ mi akɛ, ‘Efa! Okɛ mi akawie sane nɛɛ he dɔŋŋ. 27 Kwɔɔ kɛya Pisga yiteŋ,+ ní oyakwɛ anai kɛ kooyi kɛ wuoyi kɛ bokã, ní okɛ ohiŋmɛii akwɛ shikpɔŋ lɛ, ejaakɛ ofoŋ Yordan nɛɛ.+ 28 Wó Yoshua hiɛnyiɛlɔ,+ ní owo lɛ hewalɛ ní owaje lɛ, ejaakɛ lɛ ji mɔ ni baanyiɛ maŋ nɛɛ hiɛ kɛfo mli kɛya,+ ni lɛ nɔŋŋ ji mɔ ni baahã amɛŋɔ shikpɔŋ ni obaana lɛ.’ 29 Enɛɛmɛi fɛɛ ba be ni wɔyɔɔ jɔɔ ni kã Bet-peor+ hiɛ lɛ mli lɛ.

4 “Agbɛnɛ, Israel, bo mlai* kɛ yiŋkpɛi* ni mitsɔɔ nyɛ akɛ nyɛye nɔ lɛ toi koni nyɛhi wala mli,+ ní nyɛya nyɛyaŋɔ shikpɔŋ ni Yehowa, nyɛtsɛmɛi a-Nyɔŋmɔ lɛ kɛhãa nyɛ lɛ. 2 Nyɛkɛ nɔ ko akafataa wiemɔ ni mikɛ nyɛ wieɔ lɛ he, ni nyɛkajiea eko hu yɛ mli,+ bɔ ni afee ni nyɛye Yehowa, nyɛ-Nyɔŋmɔ lɛ, kitãi ni miwoɔ nyɛ lɛ anɔ.

3 “Nyɛ diɛŋtsɛ nyɛhiŋmɛii na nɔ ni Yehowa fee yɛ Baal ni yɔɔ Peor lɛ sane lɛ mli lɛ; Yehowa, nyɛ-Nyɔŋmɔ lɛ, kpãtã mɔ fɛɛ mɔ ni yanyiɛ Baal ni yɔɔ Peor lɛ sɛɛ lɛ hiɛ kɛje nyɛteŋ.+ 4 Shi nyɛ mɛi ni nyɛhiɛ Yehowa, nyɛ-Nyɔŋmɔ lɛ, mli kpɛŋŋ lɛ, nyɛ fɛɛ nyɛyɛ wala mli lolo ŋmɛnɛ. 5 Naa, mitsɔɔ nyɛ mlai* kɛ yiŋkpɛi,*+ tamɔ bɔ ni Yehowa, mi-Nyɔŋmɔ lɛ, fã mi lɛ pɛpɛɛpɛ, koni nyɛye nɔ yɛ shikpɔŋ ni nyɛbaayaŋɔ lɛ nɔ. 6 Nyɛyea nɔ jogbaŋŋ,+ ejaakɛ no baahã maji fɛɛ ni baanu mlai* nɛɛ fɛɛ lɛ ana akɛ nyɛhiɛ kã shi+ ni nyɛnuɔ nii ashishi,+ ni amɛbaakɛɛ akɛ, ‘Ŋwanejee ko bɛ he akɛ, maŋ nɛɛ ji maŋ kpeteŋkpele ni hiɛ kã shi ni nuɔ nii ashishi.’+ 7 Ejaakɛ, mɛɛ maŋ kpeteŋkpele yɔɔ nyɔŋmɔi ni bɛŋkɛɔ lɛ tamɔ bɔ ni Yehowa, wɔ-Nyɔŋmɔ lɛ, bɛŋkɛɔ wɔ be fɛɛ be ni wɔtsɛɔ lɛ lɛ?+ 8 Ni mɛɛ maŋ kpeteŋkpele yɔɔ mlai* kɛ yiŋkpɛi* ni ja tamɔ Mla muu nɛɛ fɛɛ ni mikɛfɔ̃ɔ nyɛhiɛ ŋmɛnɛ nɛɛ?+

9 “Shi kwɛmɔ jogbaŋŋ, ní ohiɛ ahi ohe nɔ jogbaŋŋ,* ní ohiɛ akakpa nibii ni ohiŋmɛii ena lɛ anɔ koni amɛkaje otsui mli owala gbii abɔ fɛɛ. Agbɛnɛ hu, hã obii kɛ onabii ale.+ 10 Gbi ni odamɔ Yehowa, o-Nyɔŋmɔ lɛ, hiɛ yɛ Horeb lɛ, Yehowa kɛɛ mi akɛ, ‘Buamɔ maŋ lɛ naa ohã mi, koni mahã amɛnu miwiemɔi lɛ,+ bɔ ni afee ni amɛshe mi gbeyei+ gbii abɔ fɛɛ ni amɛkɛbaahi wala mli yɛ shikpɔŋ lɛ nɔ lɛ, ní amɛtsɔɔ amɛbii lɛ hu.’+

11 “No hewɔ lɛ, nyɛtsi nyɛbɛŋkɛ, ni nyɛbadamɔ gɔŋ lɛ shishi, ni gɔŋ lɛ miitso kɛ la kɛyashi ŋwɛi tɔ̃ɔ; duŋ wo, ni atatu kɛ oblɔtu kpii ba.+ 12 Ni Yehowa kɛ nyɛ bɔi wiemɔ kɛjɛ la lɛ mli.+ Nyɛnu wiemɔi lɛ agbɛɛmɔ kɛkɛ, shi nyɛnaaa mɔ ko mɔ ko*+—gbee kɛkɛ nyɛnu.+ 13 Ni ejaje ekpaŋmɔ lɛ etsɔɔ nyɛ,+ nɔ ni efã nyɛ akɛ nyɛye nɔ lɛ—Kitãi Nyɔŋma lɛ.*+ No sɛɛ lɛ, eŋmala yɛ tɛi tɛtrɛbii enyɔ anɔ.+ 14 Nakai be lɛ mli lɛ, Yehowa fã mi akɛ mitsɔɔ nyɛ mlai* kɛ yiŋkpɛi* ní esa akɛ nyɛye nɔ yɛ shikpɔŋ ni nyɛyaa nyɛyaŋɔ lɛ nɔ lɛ.

15 “No hewɔ lɛ, nyɛkwɛa nyɛhe nɔ jogbaŋŋ*—ejaakɛ gbi nɔ ni Yehowa kɛ nyɛ wie yɛ Horeb kɛjɛ la lɛ teŋ lɛ, nyɛnaaa nɔ ko nɔ ko*— 16 koni nyɛkaye sane fɔŋ ní nyɛyafee nɔ ko he amaga* nyɛhã nyɛhe, nuu loo yoo henɔ ko,+ 17 shikpɔŋ lɛ nɔ kooloo ko henɔ ko loo loofɔlɔ ni filikiɔ yɛ ŋwɛi lɛ henɔ ko,+ 18 nɔ fɛɛ nɔ ni wamɔɔ yɛ shikpɔŋ lɛ nɔ lɛ henɔ ko loo loi ni yɔɔ nui amli* lɛ henɔ ko.+ 19 Ni kɛ́ ohole ohiŋmɛii anɔ kɛtee ŋwɛi ni ona hulu lɛ kɛ nyɔɔŋtsere lɛ kɛ ŋulamii lɛ—ŋwɛi asraafoi lɛ fɛɛ lɛ—kaahã amɛlaka bo ní okoto amɛ ní osɔmɔ amɛ.+ Yehowa, o-Nyɔŋmɔ lɛ, kɛ fɛɛ ehã maji fɛɛ ni yɔɔ ŋwɛi shishi lɛ. 20 Shi nyɛ lɛ, Yehowa ŋɔ nyɛ, ni ejie nyɛ kɛje dade-seremɔ flɔnɔɔ lɛ mli, ejie nyɛ kɛje Ejipt, koni nyɛtsɔmɔ lɛ diɛŋtsɛ enii,*+ tamɔ bɔ ni nyɛji ŋmɛnɛ lɛ.

21 “Nyɛ hewɔ lɛ, Yehowa mli fu mi,+ ni ekã kitã akɛ mifoŋ Yordan lɛ, ni miyaŋ shikpɔŋ kpakpa ni Yehowa, o-Nyɔŋmɔ lɛ, kɛhãa bo akɛ gboshinii lɛ nɔ.+ 22 Ejaakɛ mi lɛ, magbo yɛ shikpɔŋ nɛɛ nɔ; mifoŋ Yordan lɛ,+ shi nyɛ lɛ, nyɛbaafo ní nyɛyaŋɔ shikpɔŋ kpakpa nɛɛ akɛ nyɛnɔ. 23 Nyɛkwɛa nyɛhe nɔ jogbaŋŋ koni nyɛhiɛ akakpa kpaŋmɔ ni Yehowa, nyɛ-Nyɔŋmɔ lɛ, kɛ nyɛ kpaŋ lɛ nɔ,+ ni nyɛkafea amaga* ko, ni ji nibii ni Yehowa, nyɛ-Nyɔŋmɔ lɛ, egu nyɛ lɛ eko henɔ ko nyɛhãa nyɛhe.+ 24 Ejaakɛ Yehowa, o-Nyɔŋmɔ lɛ, ji la ni shãa nii,+ Nyɔŋmɔ ni biɔ ni ajá ekome too pɛ.+

25 “Kɛ́ oná bii kɛ nabii, ni nyɛhi shikpɔŋ lɛ nɔ be kplaŋŋ, ni nyɛye sane fɔŋ ni nyɛfee amaga*+ ko ni nyɛfee efɔŋ yɛ Yehowa, nyɛ-Nyɔŋmɔ lɛ, hiɛ koni nyɛkɛwo emli la lɛ,+ 26 no lɛ, ŋmɛnɛ gbi nɛɛ, miitsɛ ŋwɛi kɛ shikpɔŋ akɛ odasefoi miiwo nyɛ akɛ, bɔ fɛɛ bɔ ni fee lɛ, nyɛhiɛ baakpãtã oya kɛje shikpɔŋ ni nyɛfoɔ Yordan lɛ kɛyaa koni nyɛyaŋɔ lɛ nɔ. Nyɛtsɛŋ yɛ nɔ, shi moŋ, abaakpãtã nyɛhiɛ kwraa.+ 27 Yehowa baagbɛ nyɛ eshwã maji lɛ amli,+ ni nyɛteŋ mɛi fioo ko pɛ baashwɛ+ yɛ maji ni Yehowa baashwie nyɛ kɛya mli lɛ amli. 28 Ni jɛmɛ lɛ, nyɛbaasɔmɔ tsei kɛ tɛi nyɔŋmɔi ni gbɔmɛi kɛ amɛniji fee,+ nyɔŋmɔi ni enaaa nii, amɛnuuu nii, amɛyeee nii, ni amɛnuuu nii ahe fu hu lɛ.

29 “Kɛ́ nyɛtao Yehowa, nyɛ-Nyɔŋmɔ lɛ, be ni nyɛyɔɔ jɛmɛ lɛ, kɛ́ nyɛkɛ nyɛtsui fɛɛ kɛ nyɛsusuma* fɛɛ+ tao esɛɛ gbɛ lɛ, nyɛbaana lɛ kɛ̃.+ 30 Kɛ́ wɔsɛɛ ko lɛ nibii nɛɛ fɛɛ ba onɔ ni oyaje haomɔ kpele mli lɛ, no lɛ, obaaku osɛɛ kɛba Yehowa, o-Nyɔŋmɔ lɛ ŋɔɔ, ni obaabo egbee toi.+ 31 Ejaakɛ Yehowa, o-Nyɔŋmɔ lɛ, ji Nyɔŋmɔ ni naa mɔbɔ.+ Ekwaŋ bo, ni ehãŋ ohiɛ akpãtã, ni ehiɛ kpaŋ kpaŋmɔ ni ekã otsɛmɛi lɛ kitã yɛ he lɛ nɔ.+

32 “Agbɛnɛ, nyɛbia blema gbii ni ba dani afɔ nyɛ lɛ ahe sane, kɛjɛ gbi nɔ ni Nyɔŋmɔ bɔ gbɔmɔ yɛ shikpɔŋ lɛ nɔ lɛ; nyɛtaoa kɛjɛa ŋwɛi naagbeehe kome kɛyashia ŋwɛi naagbeehe kroko lɛ. Ani nɔ ko kpele ni tamɔ nakai eba pɛŋ, aloo anu nɔ ko ni tamɔ nakai pɛŋ?+ 33 Ani maŋ ko enu Nyɔŋmɔ gbee ni eewie kɛmiijɛ la mli pɛŋ, tamɔ bɔ ni onu ní oyɔɔ wala mli lolo lɛ?+ 34 Aloo Nyɔŋmɔ eka pɛŋ akɛ ebaatsɔ kojomɔi* kɛ okadii kɛ naakpɛɛ nii+ kɛ ta+ kɛ nineshiwalɛ+ kɛ nine ni akpã mli kɛ nifeemɔi ni yɔɔ gbeyei anɔ eŋɔ maŋ ko kɛjɛ maŋ kroko mli,+ tamɔ bɔ ni Yehowa, nyɛ-Nyɔŋmɔ lɛ, fee ehã nyɛ yɛ Ejipt yɛ nyɛ diɛŋtsɛ nyɛhiŋmɛiiaŋ lɛ? 35 Nyɛ lɛ, ahã nyɛna nibii nɛɛ fɛɛ, koni nyɛná nyɛle akɛ Yehowa ji anɔkwa Nyɔŋmɔ lɛ;+ lɛ esɛɛ lɛ, nyɔŋmɔ ko bɛ.+ 36 Ehã onu egbee kɛjɛ ŋwɛi koni ekɛjaje bo, ni ehã ona ela kpele lɛ yɛ shikpɔŋ lɛ nɔ, ni onu ewiemɔi lɛ hu kɛjɛ la lɛ mli.+

37 “Akɛni esumɔ otsɛmɛi lɛ, ní ehala amɛseshibii ni ba yɛ amɛsɛɛ lɛ hewɔ lɛ,+ ekɛ ehewalɛ kpele lɛ jie bo kɛje Ejipt, be mli ni ehiɛ yɔɔ onɔ lɛ. 38 Eshwie maji ni dara ni he wa fe bo kɛje ohiɛ, koni ekɛ bo aba, ní ekɛ amɛshikpɔŋ lɛ ahã bo akɛ gboshinii, tamɔ bɔ ni eji ŋmɛnɛ lɛ.+ 39 No hewɔ lɛ, ŋmɛnɛ gbi nɛɛ, ná ole, ní ohã ekã otsui nɔ akɛ Yehowa ji anɔkwa Nyɔŋmɔ ni yɔɔ ŋwɛi shɔŋŋ kɛ shikpɔŋ ni yɔɔ shishi lɛ nɔ lɛ.+ Esɛɛ lɛ, nyɔŋmɔ ko bɛ.+ 40 Ye emlai* kɛ ekitãi ni miwoɔ bo ŋmɛnɛ gbi nɛɛ anɔ, bɔ ni afee ni ahi ahã bo kɛ obii ni baaba yɛ osɛɛ lɛ, koni otsɛ yɛ shikpɔŋ ni Yehowa, o-Nyɔŋmɔ lɛ, kɛhãa bo lɛ nɔ.”+

41 Nakai be lɛ mli lɛ, Mose hala maji etɛ yɛ Yordan lɛ bokãgbɛ.+ 42 Kɛ́ mɔ ko ejeee gbɛ egbe enyɛmi gbɔmɔ, ni jeee nyɛ ni enyɛɔ lɛ momo hewɔ lɛ,+ no lɛ, ejo foi kɛya maji nɛɛ eko mli koni eyi aná wala.+ 43 Maji nɛɛ ji Bezer+ ni yɔɔ ŋa lɛ nɔ, yɛ gɔŋ kɛ eyiteŋ tɛtrɛɛ lɛ nɔ ni akɛhã Rubenbii lɛ, Ramot+ ni yɔɔ Gilead ni akɛhã Gadbii lɛ, kɛ Golan+ ni yɔɔ Bashan ni akɛhã Manasebii lɛ.+

44 Agbɛnɛ, Mla+ ni Mose kɛfɔ̃ Israelbii lɛ ahiɛ lɛ nɛ. 45 Enɛɛmɛi ji kaimɔi kɛ mlai* kɛ yiŋkpɛi* ni Mose kɛhã Israelbii lɛ be ni amɛshi Ejipt lɛ sɛɛ,+ 46 yɛ Yordan kpokpaa lɛ nɔ, yɛ jɔɔ ni kã Bet-peor hiɛ lɛ mli,+ yɛ Amorbii lɛ a-Maŋtsɛ Sihon, mɔ ni hi Heshbon+ lɛ shikpɔŋ lɛ nɔ, mɔ ni Mose kɛ Israelbii lɛ ye enɔ kunim be ni amɛje Ejipt lɛ sɛɛ lɛ.+ 47 Ni amɛŋɔ eshikpɔŋ lɛ kɛ Maŋtsɛ Og+ ni hi Bashan lɛ shikpɔŋ lɛ hu, Amorbii lɛ amaŋtsɛmɛi enyɔ ni hi kpokpaa ni yɔɔ Yordan lɛ bokãgbɛ lɛ nɔ lɛ, 48 kɛjɛ Aroer+ ni kã Arnon Jɔɔ* lɛ naa lɛ, kɛyashi Sion Gɔŋ, ni ji Hermon lɛ he,+ 49 kɛ Araba lɛ ni yɔɔ kpokpaa ni yɔɔ Yordan lɛ bokãgbɛ lɛ nɔ lɛ fɛɛ, kɛyashi Araba lɛ Ŋshɔ* lɛ naa tɔ̃ɔ, yɛ Pisga gɔŋ lɛ shishi.+

5 Ni Mose tsɛ Israel fɛɛ ni ekɛɛ amɛ akɛ: “Israel, nyɛboa taomɔ nii kɛ yiŋkpɛi* ni mijajeɔ mitsɔɔ nyɛ ŋmɛnɛ lɛ toi, ni nyɛkasea ni nyɛyea nɔ jogbaŋŋ. 2 Yehowa, wɔ-Nyɔŋmɔ lɛ, kɛ wɔ kpaŋ kpaŋmɔ yɛ Horeb.+ 3 Jeee wɔtsɛmɛi lɛ ji mɛi ni Yehowa kɛkpaŋ kpaŋmɔ nɛɛ, shi moŋ wɔ, wɔ mɛi fɛɛ ni wɔyɔɔ wala mli yɛ biɛ ŋmɛnɛ gbi nɛɛ. 4 Yehowa kɛ nyɛ wie hiɛ kɛ hiɛ yɛ gɔŋ lɛ nɔ, kɛjɛ la lɛ mli.+ 5 Nakai be lɛ mli lɛ, midamɔ Yehowa kɛ nyɛ teŋ+ koni majaje Yehowa wiemɔ lɛ matsɔɔ nyɛ, ejaakɛ no mli lɛ, nyɛmiishe gbeyei yɛ la lɛ hewɔ, ni nyɛkwɔɔɔ gɔŋ lɛ.+ Ekɛɛ akɛ:

6 “‘Miji Yehowa, o-Nyɔŋmɔ lɛ, mɔ ni jie bo kɛje Ejipt shikpɔŋ lɛ nɔ lɛ, mɔ ni jie bo kɛje nyɔŋyeli shĩa lɛ.+ 7 Kaaná nyɔŋmɔi krokomɛi yɛ misɛɛ* kɔkɔɔkɔ.+

8 “‘Kaafee amaga*+ ko loo nɔ* ko ni tamɔ nii ni yɔɔ ŋwɛi loo nii ni yɔɔ shikpɔŋ lɛ nɔ loo nii ni yɔɔ nui amli* lɛ eko ohã ohe. 9 Kaakoto amɛ, ni kaahã alaka bo ni osɔmɔ amɛ hu,+ ejaakɛ mi, Yehowa, o-Nyɔŋmɔ lɛ, miji Nyɔŋmɔ ni biɔ ni ajá mikome too pɛ,+ ni mikɛ tsɛmɛi ni nyɛɔ mi lɛ atɔmɔi lɛ ahe toigbalamɔ baa bii anɔ, kɛ yinɔ ni ji etɛ kɛ yinɔ ni ji ejwɛ lɛ nɔ,+ 10 shi mijieɔ suɔmɔ ni tsakeee kpo mitsɔɔ mɛi ni sumɔɔ mi ni amɛyeɔ mikitãi lɛ anɔ lɛ aseshibii aahu kɛyashiɔ amɛseshibii lɛ ayinɔ ni ji akpe lɛ nɔ.

11 “‘Okɛ Yehowa, o-Nyɔŋmɔ lɛ, gbɛ́i akatsu nii yɛ gbɛ ni esaaa nɔ,+ ejaakɛ Yehowa gbalaa mɔ fɛɛ mɔ ni kɛ egbɛ́i lɛ tsuɔ nii yɛ gbɛ ni esaaa nɔ lɛ toi.+

12 “‘Ye Hejɔɔmɔ Gbi lɛ, ní obu lɛ krɔŋkrɔŋ, tamɔ bɔ ni Yehowa, o-Nyɔŋmɔ lɛ, fã bo lɛ.+ 13 Gbii ekpaa okɛtsu nii ní okɛfee onibii fɛɛ,+ 14 shi gbi ni ji kpawo lɛ ji hejɔɔmɔ gbi hã Yehowa, o-Nyɔŋmɔ lɛ.+ Kaatsu nitsumɔ ko kwraa,+ bo jio, obinuu jio, obiyoo jio, onyɔŋ nuu jio, onyɔŋ yoo jio, otsina jio, oteji jio, oshĩa kooloi lɛ ateŋ eko jio, ogbɔ ni yɔɔ omaji* lɛ amli jio,+ bɔ ni afee ni onyɔŋ nuu kɛ onyɔŋ yoo ajɔɔ amɛhe tamɔ bo nɔŋŋ.+ 15 Kaimɔ akɛ, bo hu oyatsɔ nyɔŋ yɛ Ejipt shikpɔŋ lɛ nɔ, ni Yehowa, o-Nyɔŋmɔ lɛ, kɛ nineshiwalɛ kɛ nine ni akpã mli jie bo kɛje jɛmɛ.+ No hewɔ ni Yehowa, o-Nyɔŋmɔ lɛ, fã bo akɛ oye Hejɔɔmɔ Gbi lɛ.

16 “‘Okɛ woo ahã opapa kɛ omami,+ tamɔ bɔ ni Yehowa, o-Nyɔŋmɔ lɛ, fã bo lɛ pɛpɛɛpɛ, koni owala sɛɛ atsɛ, ní oshwere* yɛ shikpɔŋ ni Yehowa, o-Nyɔŋmɔ lɛ, kɛhãa bo lɛ nɔ.+

17 “‘Kaagbe gbɔmɔ.+

18 “‘Kaafite gbãla.*+

19 “‘Kaaju.+

20 “‘Kaaye amale odase oshi onyɛmi gbɔmɔ.+

21 “‘Kaashwe akɛ oná onyɛmi gbɔmɔ ŋa.+ Ni kaashwe akɛ oná onyɛmi gbɔmɔ shĩa loo eŋmɔ loo enyɔŋ nuu loo enyɔŋ yoo loo etsina loo eteji loo nɔ fɛɛ nɔ ni ji onyɛmi gbɔmɔ nɔ lɛ.’+

22 “Yehowa jɛ la lɛ kɛ atatu lɛ kɛ oblɔtu kpii lɛ mli ekɛ gbee ni wa jaje kitãi* nɛɛ etsɔɔ nyɛsafo muu lɛ fɛɛ yɛ gɔŋ lɛ nɔ,+ ni ekɛ nɔ ko nɔ ko fataaa he; no sɛɛ lɛ, eŋma yɛ tɛi tɛtrɛbii enyɔ anɔ, ni ekɛhã mi.+

23 “Shi be ni nyɛnu gbee lɛ kɛjɛ duŋ lɛ mli, be mli ni gɔŋ lɛ tsoɔ kɛ la lɛ,+ amrɔ nɔŋŋ lɛ, nyɛwekui lɛ anɔ onukpai lɛ kɛ maŋ lɛ mli onukpai lɛ fɛɛ tsi amɛbɛŋkɛ mi. 24 Ni nyɛkɛɛ akɛ, ‘Naa, Yehowa, wɔ-Nyɔŋmɔ lɛ, ehã wɔna enunyam lɛ kɛ egbojee lɛ, ni wɔnu egbee kɛjɛ la lɛ mli.+ Ŋmɛnɛ gbi nɛɛ, wɔna akɛ Nyɔŋmɔ baanyɛ ekɛ gbɔmɔ awie, ní mɔ lɛ akã he ahi wala mli.+ 25 Agbɛnɛ, mɛni hewɔ wɔbaagboi? Ejaakɛ la kpele nɛɛ baaŋala wɔ. Kɛji wɔtee nɔ wɔnu Yehowa, wɔ-Nyɔŋmɔ lɛ gbee lɛ, bɔ fɛɛ bɔ ni fee lɛ, wɔbaagboi. 26 Ejaakɛ namɔ yɔɔ heloo* fɛɛ teŋ ní enu Nyɔŋmɔ hiɛkãalɔ lɛ gbee ni eewie kɛmiijɛ la mli tamɔ bɔ ni wɔnu lɛ, ni kɛ̃lɛ etee nɔ ehi wala mli? 27 Bo diɛŋtsɛ tsi obɛŋkɛ, ní oyabo nɔ fɛɛ nɔ ni Yehowa, wɔ-Nyɔŋmɔ lɛ, baakɛɛ lɛ toi, ní bo obagba wɔ nɔ fɛɛ nɔ ni Yehowa, wɔ-Nyɔŋmɔ lɛ, baakɛɛ bo lɛ, ni wɔbaabo toi ní wɔfee.’+

28 “No hewɔ lɛ, Yehowa nu wiemɔi ni nyɛkɛ mi wie lɛ, ni Yehowa kɛɛ mi akɛ, ‘Minu wiemɔi ni maŋ nɛɛ kɛ bo wie lɛ. Nɔ fɛɛ nɔ ni amɛwie lɛ hi.+ 29 Miná kulɛ amɛná tsui ni sheɔ mi gbeyei+ ní amɛye mikitãi lɛ fɛɛ anɔ+ be fɛɛ be; kɛkɛ lɛ, ebaahi ehã amɛ kɛ amɛbii kɛya naanɔ!+ 30 Yaa ni oyakɛɛ amɛ akɛ: “Nyɛkua nyɛsɛɛ kɛyaa nyɛmama tsũi lɛ amli.” 31 Shi bo lɛ, okɛ mi ahi biɛ, ni mahã ole kitãi kɛ taomɔ nii kɛ yiŋkpɛi* lɛ fɛɛ ni esa akɛ otsɔɔ amɛ ni amɛye nɔ yɛ shikpɔŋ ni mikɛhãa amɛ akɛ amɛnɔ lɛ nɔ lɛ.’ 32 Agbɛnɛ, nyɛkwɛa jogbaŋŋ ni nyɛfea bɔ ni Yehowa, nyɛ-Nyɔŋmɔ lɛ, efã nyɛ lɛ pɛpɛɛpɛ.+ Nyɛkagbáa ninejurɔ loo abɛku.+ 33 Nyɛnyiɛa gbɛ ni Yehowa, nyɛ-Nyɔŋmɔ lɛ, etsɔɔ nyɛ lɛ fɛɛ nɔ,+ bɔ ni afee ni nyɛhi wala mli ní nyɛshwere ní nyɛgbii asɛɛ atsɛ yɛ shikpɔŋ ni nyɛbaayaŋɔ lɛ nɔ.+

6 “Agbɛnɛ, kitãi kɛ taomɔ nii kɛ yiŋkpɛi* ni Yehowa, nyɛ-Nyɔŋmɔ lɛ, kɛhã akɛ atsɔɔ nyɛ lɛ nɛ, koni nyɛye nɔ kɛ́ nyɛfo mli kɛtee shikpɔŋ ni nyɛyaaŋɔ lɛ nɔ, 2 bɔ ni afee ni oshe Yehowa, o-Nyɔŋmɔ lɛ gbeyei, ní oye emlai kɛ ekitãi ni miwoɔ bo lɛ fɛɛ nɔ—bo kɛ obi kɛ onabi+—owala gbii abɔ fɛɛ, koni owala sɛɛ atsɛ.+ 3 Ni bo toi, Israel, ní oye nɔ jogbaŋŋ, koni oshwere ni nyɛyi afa babaoo yɛ shikpɔŋ ni mliki kɛ wo hoɔ yɛ nɔ lɛ nɔ, tamɔ bɔ ni Yehowa, otsɛmɛi a-Nyɔŋmɔ lɛ, wo bo shi lɛ pɛpɛɛpɛ.

4 “Bo toi, Israel: Yehowa, wɔ-Nyɔŋmɔ lɛ, Yehowa kome ni.+ 5 Suɔmɔ Yehowa, o-Nyɔŋmɔ lɛ, kɛ otsui fɛɛ kɛ osusuma* fɛɛ+ kɛ onyɛmɔ* fɛɛ.+ 6 Hã wiemɔi ni mijajeɔ mitsɔɔ bo ŋmɛnɛ lɛ akã otsui nɔ, 7 ní otĩ mli shii abɔ otsɔɔ obii,*+ ní owie he be ni ota shi yɛ oshĩa kɛ be ni onyiɛ gbɛ nɔ kɛ be ni okã shi kɛ be ni ote shi.+ 8 Fii okpɛtɛ onine akɛ kaimɔ nɔ, amɛtsɔmɔ tamɔ yitsofiinɔ yɛ ohiɛnaa.*+ 9 Ŋmalamɔ yɛ oshĩa lɛ shinaatsei lɛ kɛ ogbói lɛ ahe.

10 “Kɛ́ Yehowa, o-Nyɔŋmɔ lɛ, kɛ bo yashɛ shikpɔŋ ni ekã otsɛmɛi Abraham kɛ Isak kɛ Yakob kitã yɛ he akɛ ekɛbaahã bo lɛ nɔ+—maji wuji ni yɔɔ fɛo ni jeee bo oto,+ 11 shĩai ni amɛmli eyimɔ obɔbɔ kɛ nibii kpakpai srɔtoi ni jeee bo otsu owo mli, bui ni atsatsai ni akɛtoɔ nu ni jeee bo otsa, kɛ wain ŋmɔji ni jeee bo ofee, kɛ oliv tsei ni jeee bo odu*—ni oye ni otɔ lɛ,+ 12 kwɛmɔ jogbaŋŋ ni ohiɛ akakpa Yehowa nɔ,+ mɔ ni jie bo kɛje Ejipt shikpɔŋ lɛ nɔ, mɔ ni jie bo kɛje nyɔŋyeli shĩa lɛ. 13 She Yehowa, o-Nyɔŋmɔ lɛ gbeyei,+ ni lɛ osɔmɔ,+ ni lɛ egbɛ́i okɛkã kitã.+ 14 Nyɛkanyiɛa nyɔŋmɔi krokomɛi asɛɛ, nyɛkanyiɛa maji ni bɔle nyɛ lɛ anyɔŋmɔi lɛ ateŋ eko eko sɛɛ,+ 15 ejaakɛ Yehowa, o-Nyɔŋmɔ lɛ, ni yɔɔ nyɛteŋ lɛ ji Nyɔŋmɔ ni biɔ ni ajá ekome too pɛ.+ Kɛjeee nakai lɛ, Yehowa, o-Nyɔŋmɔ lɛ, mli baawo la ewo bo,+ ni ebaakpãtã ohiɛ kɛje shikpɔŋ lɛ nɔ.+

16 “Nyɛkakaa Yehowa, nyɛ-Nyɔŋmɔ lɛ,+ tamɔ bɔ ni nyɛka lɛ yɛ Masa lɛ.+ 17 Nyɛyea Yehowa, nyɛ-Nyɔŋmɔ lɛ, kitãi lɛ kɛ ekaimɔi lɛ kɛ etaomɔ nii lɛ ni efã nyɛ akɛ nyɛye nɔ lɛ anɔ jogbaŋŋ. 18 Feemɔ nɔ ni ja kɛ nɔ ni hi yɛ Yehowa hiɛ, bɔ ni afee ni oshwere, ní oya oyaŋɔ shikpɔŋ kpakpa ni Yehowa kã otsɛmɛi lɛ kitã yɛ he lɛ,+ 19 kɛtsɔ shwiemɔ ni obaashwie ohenyɛlɔi lɛ fɛɛ kɛje ohiɛ lɛ nɔ, tamɔ bɔ ni Yehowa wo shi lɛ pɛpɛɛpɛ.+

20 “Wɔsɛɛ ko kɛ́ obi* bi bo akɛ, ‘Kaimɔi kɛ taomɔ nii kɛ yiŋkpɛi* lɛ ni Yehowa, wɔ-Nyɔŋmɔ lɛ, kɛhã nyɛ lɛ, te eshishi lɛ?’ 21 no lɛ, kɛɛmɔ obi* lɛ akɛ, ‘Wɔyatsɔmɔ nyɔji wɔhã Farao yɛ Ejipt, shi Yehowa kɛ nineshiwalɛ jie wɔ kɛje Ejipt. 22 Ni Yehowa tee nɔ ehã okadii kɛ naakpɛɛ nii wuji ni kpãtãa nii ahiɛ ba Ejipt+ kɛ Farao kɛ eshĩabii lɛ fɛɛ anɔ yɛ wɔhiɛ.+ 23 Ni ejie wɔ kɛje jɛmɛ, bɔ ni afee ni ekɛ wɔ aba biɛ, ní ekɛ shikpɔŋ ni ekã wɔtsɛmɛi lɛ kitã yɛ he lɛ ahã wɔ.+ 24 Ni Yehowa fã wɔ akɛ, wɔye taomɔ nii nɛɛ fɛɛ anɔ, ní wɔshe Yehowa, wɔ-Nyɔŋmɔ lɛ, gbeyei ní ahi ahã wɔ daa,+ koni wɔya nɔ wɔhi wala mli,+ tamɔ bɔ ni wɔyɔɔ wala mli ŋmɛnɛ lɛ. 25 Ni kɛ́ wɔye kitãi nɛɛ fɛɛ anɔ jogbaŋŋ kɛbo Yehowa, wɔ-Nyɔŋmɔ lɛ, toi* tamɔ bɔ ni efã wɔ lɛ, abaabu no jalɛ ahã wɔ.’+

7 “Kɛ́ Yehowa, o-Nyɔŋmɔ lɛ, kɛ bo yashɛ shikpɔŋ ni oyaa oyaŋɔ lɛ nɔ lɛ,+ ebaashwie jeŋmaji ni amɛmli bii lɛ ayi fa babaoo kɛje ohiɛ hu:+ Hitbii lɛ kɛ Girgashbii lɛ kɛ Amorbii+ lɛ kɛ Kanaanbii lɛ kɛ Perizbii lɛ kɛ Hivbii lɛ kɛ Yebusbii+ lɛ, jeŋmaji kpawo ni amɛmli bii lɛ ayi fa fe bo ní amɛhe wa hu fe bo lɛ.+ 2 Yehowa, o-Nyɔŋmɔ lɛ, baaŋɔ amɛ ewo odɛŋ, ni obaaye amɛnɔ kunim.+ Bɔ fɛɛ bɔ ni fee lɛ, kpatamɔ amɛhiɛ.*+ Okɛ amɛ akakpaŋ kpaŋmɔ ko, ni kaana amɛ mɔbɔ hu.+ 3 Okɛ amɛ akaye gbalahamɔ.* Okɛ obiyei akahã amɛbihii, ni kaaŋɔ amɛbiyei ohã obihii.+ 4 Ejaakɛ amɛbaahã obii* lɛ aje misɛɛ ní amɛyasɔmɔ nyɔŋmɔi krokomɛi;+ ni Yehowa mli baawo la ewo nyɛ, ni ebaakpãtã nyɛhiɛ oya.+

5 “Shi moŋ, nɔ ni esa akɛ nyɛfee amɛ nɛ: Nyɛkumɔa amɛfɔleshaa latɛi lɛ, nyɛjwaraa amɛwɔŋ tɛi lɛ,+ nyɛfolɔa amɛwɔŋ tsei*+ lɛ nyɛshwiea shi, ni nyɛshãa amɛmagai lɛ.+ 6 Ejaakɛ oji maŋ krɔŋkrɔŋ hã Yehowa, o-Nyɔŋmɔ lɛ, ni Yehowa, o-Nyɔŋmɔ lɛ, ehala bo yɛ maji fɛɛ ni yɔɔ shikpɔŋ lɛ nɔ lɛ ateŋ koni otsɔ emaŋ, enii ni eshwɛɛɛ he kwraa.+

7 “Jeee nyɛyi ni fa fe maji krokomɛi fɛɛ amli bii lɛ hewɔ ni Yehowa jie suɔmɔ kpo etsɔɔ nyɛ ni ehala nyɛ lɛ,+ ejaakɛ nyɛ moŋ ji mɛi ni yi faaa fe fɛɛ yɛ maji fɛɛ ateŋ.+ 8 Shi moŋ, suɔmɔ ni Yehowa sumɔɔ nyɛ, kɛ kitã ni ekã nyɛtsɛmɛi lɛ ni eesumɔ akɛ eye nɔ lɛ hewɔ+ ni Yehowa kɛ nineshiwalɛ jie nyɛ, ni ekpɔ̃ nyɛ kɛje nyɔŋyeli shĩa lɛ,+ kɛje Ejipt maŋtsɛ Farao dɛŋ lɛ. 9 Ole jogbaŋŋ akɛ Yehowa, o-Nyɔŋmɔ lɛ, ji anɔkwa Nyɔŋmɔ lɛ, Nyɔŋmɔ anɔkwafo lɛ, mɔ ni yeɔ ekpaŋmɔ nɔ, ní ejieɔ suɔmɔ ni tsakeee kpo etsɔɔ mɛi ni sumɔɔ lɛ ni amɛyeɔ ekitãi lɛ anɔ lɛ aahu kɛyashi yinɔi akpe ni baaba yɛ amɛsɛɛ lɛ nɔ.+ 10 Shi mɛi ni nyɛɔ lɛ lɛ, ekɛ hiɛkpatamɔ baato amɛ najiaŋ tɛ̃ɛ.*+ Eshashaoŋ shi akɛ ebaagbala mɛi ni nyɛɔ lɛ lɛ atoi; ebaato amɛ najiaŋ tɛ̃ɛ.* 11 No hewɔ lɛ, kwɛmɔ jogbaŋŋ ni oye kitãi lɛ kɛ taomɔ nii lɛ kɛ yiŋkpɛi* lɛ ni mikɛhãa bo ŋmɛnɛ lɛ anɔ, ye fɛɛ nɔ.

12 “Kɛ́ nyɛtee nɔ nyɛbo yiŋkpɛi* nɛɛ toi, ní nyɛye nɔ, ní nyɛkɛtsu nii lɛ, no lɛ, Yehowa, o-Nyɔŋmɔ lɛ, baaye kpaŋmɔ kɛ suɔmɔ ni tsakeee ni ekã otsɛmɛi lɛ kitã yɛ he lɛ nɔ. 13 Ebaasumɔ bo ni ebaajɔɔ bo ni ebaahã oyi afa babaoo. Hɛɛ, ebaajɔɔ bo kɛ bii babaoo*+ kɛ oshikpɔŋ lɛ nɔ nibaa nii kɛ oŋmaa* kɛ owain hee kɛ omu+ kɛ otsinai abii kɛ otoi abii, yɛ shikpɔŋ ni ekã otsɛmɛi lɛ kitã yɛ he akɛ ekɛbaahã bo lɛ nɔ.+ 14 Abaajɔɔ bo fe maji lɛ fɛɛ;+ nuu loo yoo ko ehiŋ omli ni fɔŋ, ni kooloi ni olɛɔ lɛ hu eko ehiŋ shi ni fɔŋ.+ 15 Yehowa baajie helai fɛɛ kɛje onɔ, ni ekɛ helai ni yɔɔ gbeyei ni ole yɛ Ejipt lɛ eko kwraa baŋ onɔ.+ Shi moŋ, ekɛ helai nɛɛ baaba mɛi fɛɛ ni nyɛɔ bo lɛ anɔ. 16 Maji fɛɛ ni Yehowa, o-Nyɔŋmɔ lɛ, baaŋɔ ewo odɛŋ lɛ, kpatamɔ amɛhiɛ.*+ Kaana* amɛ mɔbɔ,+ ni kaasɔmɔ amɛnyɔŋmɔi lɛ,+ ejaakɛ no baatsɔ bo tsɔne.+

17 “Kɛ́ oookɛɛ yɛ otsui mli akɛ, ‘Jeŋmaji nɛɛ ayi fa fe wɔ. Te mafee tɛŋŋ mashwie amɛ lɛ?’+ 18 no lɛ, kaashe amɛ gbeyei.+ Kaimɔ nɔ ni Yehowa, o-Nyɔŋmɔ lɛ, fee Farao kɛ Ejipt muu lɛ fɛɛ lɛ,+ 19 kojomɔi* kpelei ní ona kɛ ohiŋmɛii lɛ, kɛ okadii kɛ naakpɛɛ nii+ kɛ nineshiwalɛ kɛ nine ni akpã mli ní Yehowa, o-Nyɔŋmɔ lɛ, kɛjie bo lɛ.+ Nakai nɔŋŋ Yehowa, o-Nyɔŋmɔ lɛ, baafee maji fɛɛ ni osheɔ amɛ gbeyei lɛ.+ 20 Yehowa, o-Nyɔŋmɔ lɛ, baahã amɛhao* kɛyashi be ni amɛteŋ mɛi ni eshwɛ+ kɛ mɛi ni etee amɛhe lɛ ahiɛ baakpãtã. 21 Kaahã ŋmiŋmi mɔ bo yɛ amɛhewɔ, ejaakɛ Yehowa, o-Nyɔŋmɔ lɛ, kɛ bo yɛ,+ Nyɔŋmɔ kpeteŋkpele ni he yɔɔ gbeyei ni.+

22 “Bɔ fɛɛ bɔ ni fee lɛ Yehowa, o-Nyɔŋmɔ lɛ, baashwie jeŋmaji nɛɛ kɛje ohiɛ fiofio.+ Ahãŋ okpãtã amɛhiɛ oya, koni ŋa mli kooloi lɛ ayi akafa amɛwo bo. 23 Yehowa, o-Nyɔŋmɔ lɛ, baaŋɔ amɛ ewo odɛŋ ni ebaaye amɛnɔ kunim aahu kɛyashi be ni amɛhiɛ baakpãtã kwraa.+ 24 Ekɛ amɛmaŋtsɛmɛi lɛ baawo odɛŋ,+ ni obaagbe amɛgbɛ́ii kɛje ŋwɛi shishi.+ Mɔ ko mɔ ko nyɛŋ ohiɛ adamɔ+ kɛyashi be ni obaakpãtã amɛhiɛ butuu.+ 25 Nyɛkɛ la ashãa amɛnyɔŋmɔi lɛ amagai lɛ.+ Kaashwe akɛ oná jwiɛtɛi kɛ shika tsuru ni yɔɔ amɛhe lɛ, ni kaaŋɔ ohã ohe hu,+ koni ekatsɔ bo tsɔne, ejaakɛ Yehowa, o-Nyɔŋmɔ lɛ, miihi no.+ 26 Okɛ nihiinii ko akaba oshĩa ní no hã obatsɔ nɔ ko ni atu ahã hiɛkpatamɔ tamɔ nii lɛ nɔŋŋ. Nyaŋemɔ nii lɛ kwraa, ní ohi kwrakwra, ejaakɛ eji nɔ ko ni atu ahã hiɛkpatamɔ.

8 “Nyɛkwɛa jogbaŋŋ ní nyɛyea kitãi fɛɛ ni miwoɔ nyɛ ŋmɛnɛ lɛ anɔ, koni nyɛya nɔ nyɛhi wala mli+ ni nyɛyi afa ni nyɛya nyɛyaŋɔ shikpɔŋ ni Yehowa kã nyɛtsɛmɛi lɛ kitã yɛ he lɛ.+ 2 Kaimɔ gbɛ kakadaŋŋ ni Yehowa, o-Nyɔŋmɔ lɛ, hã onyiɛ nɔ yɛ ŋa lɛ nɔ afii 40 nɛɛ,+ koni ekɛhã oba ohe shi ni ekɛka bo ekwɛ,+ ní ele nɔ ni yɔɔ otsui mli,+ akɛ obaaye ekitãi lɛ anɔ loo oyeŋ nɔ. 3 No hewɔ lɛ, ehã oba ohe shi ni ehã hɔmɔ ye bo,+ ni ekɛ mana+ ni bo loo otsɛmɛi lɛ leee lɛ lɛ bo, bɔ ni afee ni ehã ole akɛ jeee niyenii* pɛ naa gbɔmɔ hiɔ wala mli yɛ, shi moŋ, yɛ wiemɔ fɛɛ wiemɔ ni jɛɔ Yehowa daaŋ lɛ naa.+ 4 Atadei ni owo lɛ fiteee,* ni onaji* hu efuuu afii 40 nɛɛ.+ 5 Ole jogbaŋŋ yɛ otsui mli akɛ, no mli lɛ Yehowa, o-Nyɔŋmɔ lɛ, miijaje bo tamɔ bɔ ni nuu jajeɔ ebinuu lɛ.+

6 “Agbɛnɛ, ye Yehowa, o-Nyɔŋmɔ lɛ, kitãi lɛ anɔ, kɛtsɔ egbɛi lɛ anɔ ni ooonyiɛ kɛ gbeyei ni oooshe lɛ lɛ nɔ. 7 Ejaakɛ Yehowa, o-Nyɔŋmɔ lɛ, kɛ bo miiya shikpɔŋ kpakpa nɔ,+ shikpɔŋ ni fai* yɔɔ nɔ, ní nuhiŋmɛii srɔtoi* hoɔ yɛ shikpɔŋ kplanaa* lɛ nɔ kɛ gɔji lɛ anɔ, 8 shikpɔŋ ni wiiti kɛ barle* kɛ wain ŋmɔji kɛ agbami tsei kɛ pomegranet+ tsei yɔɔ nɔ, shikpɔŋ ni oliv mu kɛ wo yɔɔ nɔ,+ 9 shikpɔŋ ni niyenii námɔ waŋ yɛ nɔ, ní nɔ ko nɔ ko he ehiaŋ bo yɛ nɔ, shikpɔŋ ni dade yɔɔ enɔ tɛi lɛ amli lɛ, ni obaatsa akɔɔble kɛbaajɛ egɔji lɛ amli.

10 “Kɛji oye nii ni otɔ lɛ, jiemɔ Yehowa, o-Nyɔŋmɔ lɛ, yi yɛ shikpɔŋ kpakpa ni ehã bo lɛ hewɔ.+ 11 Kwɛmɔ jogbaŋŋ ní ohiɛ akakpa Yehowa, o-Nyɔŋmɔ lɛ nɔ, ní oyeee ekitãi lɛ kɛ eyiŋkpɛi* lɛ kɛ emlai lɛ ni miwoɔ bo ŋmɛnɛ lɛ anɔ. 12 Kɛji oye nii ni otɔ, ni omamɔ shĩai fɛfɛji ni ohi mli,+ 13 kɛji otsinai kɛ otoi shwere babaoo, ni ojwiɛtɛi kɛ oshika tsuru bafa babaoo, ni oná nɔ fɛɛ nɔ babaoo lɛ, 14 kaahã otsui wó ehe nɔ+ ní no hã ohiɛ kpa Yehowa, o-Nyɔŋmɔ lɛ nɔ, mɔ ni jie bo kɛje Ejipt shikpɔŋ lɛ nɔ lɛ, kɛje nyɔŋyeli shĩa lɛ,+ 15 mɔ ni hã onyiɛ kɛtsɔ ŋa kpeteŋkpele ni nɔ yɔɔ gbeyei lɛ nɔ,+ he ni onufui ni pɔizin yɔɔ amɛmli kɛ nyɔŋmɔŋkrakroi* yɔɔ lɛ, he ni egbi ni nu bɛ jɛmɛ lɛ. Ehã nu tue kɛjɛ tɛsaa ni wa waa lɛ mli,+ 16 ni ekɛ mana+ ni otsɛmɛi lɛ leee lɛ lɛ bo yɛ ŋa lɛ nɔ, bɔ ni afee ni ekɛhã oba ohe shi,+ ní ekɛka bo ekwɛ koni ahi ahã bo wɔsɛɛ.+ 17 Kɛji oookɛɛ yɛ otsui mli akɛ, ‘Mi diɛŋtsɛ mihewalɛ kɛ minineshiwalɛ naa mikɛná nii nɛɛ,’+ 18 no lɛ, kaimɔ akɛ Yehowa, o-Nyɔŋmɔ lɛ, ji mɔ ni hãa bo hewalɛ ni okɛnáa nii lɛ,+ bɔ ni afee ni eye kpaŋmɔ ni ekã otsɛmɛi lɛ kitã yɛ he lɛ nɔ, tamɔ bɔ ni eji ŋmɛnɛ gbi nɛɛ.+

19 “Kɛji ohiɛ aaakpa Yehowa, o-Nyɔŋmɔ lɛ nɔ, ni ooonyiɛ nyɔŋmɔi krokomɛi asɛɛ, ni ooosɔmɔ amɛ, ni oookoto amɛ lɛ, no lɛ, miiye nyɛ odase ŋmɛnɛ gbi nɛɛ akɛ, bɔ fɛɛ bɔ ni fee lɛ, nyɛhiɛ baakpãtã.+ 20 Nyɛhiɛ baakpãtã tamɔ jeŋmaji ni Yehowa kpãtãa amɛhiɛ yɛ nyɛhiɛ lɛ nɔŋŋ, ejaakɛ nyɛbooo Yehowa, nyɛ-Nyɔŋmɔ lɛ, gbee toi.+

9 “Bo toi, Israel, ŋmɛnɛ lɛ oofo Yordan+ lɛ kɛmiiya ni oyashwie jeŋmaji ni dara ni amɛhe wa fe bo,+ maji wuji ni atswa gbogboi awo amɛhe kɛyashi ŋwɛi,*+ 2 maji ni amɛmli gbɔmɛi lɛ dara ní amɛkwɔlɔ, Anakbii+ lɛ, mɛi ni ole ni onu ni awie yɛ amɛhe akɛ, ‘Namɔ baanyɛ Anak bihii lɛ ahiɛ adamɔ?’ lɛ. 3 No hewɔ lɛ, ŋmɛnɛ gbi nɛɛ, ná ole akɛ Yehowa, o-Nyɔŋmɔ lɛ, baanyiɛ ohiɛ kɛfo mli kɛya.+ Eji la ni shãa nii,+ ni ebaakpãtã amɛhiɛ. Ebaaba amɛ shi yɛ ohiɛ, koni oshwie amɛ ni okpãtã amɛhiɛ oya, tamɔ bɔ ni Yehowa wo bo shi lɛ pɛpɛɛpɛ.+

4 “Kɛ́ Yehowa, o-Nyɔŋmɔ lɛ, shwie amɛ kɛje ohiɛ lɛ, kaakɛɛ yɛ otsui mli akɛ, ‘Mi diɛŋtsɛ mijalɛ hewɔ Yehowa kɛ mi ba koni mibaŋɔ shikpɔŋ nɛɛ.’+ Jeee nakai ni, shi moŋ, jeŋmaji nɛɛ anɔfɔŋfeemɔ lɛ hewɔ+ Yehowa shwieɔ amɛ kɛjeɔ ohiɛ lɛ. 5 Jeee ojalɛ loo otsui ni ja hewɔ oyaa oyaŋɔ amɛshikpɔŋ lɛ. Shi moŋ, jeŋmaji nɛɛ anɔfɔŋfeemɔ lɛ hewɔ Yehowa, o-Nyɔŋmɔ lɛ, shwieɔ amɛ kɛjeɔ ohiɛ lɛ,+ kɛ agbɛnɛ hu, bɔ ni afee ni Yehowa aye wiemɔ ni ekã otsɛmɛi Abraham+ kɛ Isak+ kɛ Yakob+ kitã yɛ he lɛ nɔ. 6 Belɛ, ná ole akɛ jeee ojalɛ hewɔ Yehowa, o-Nyɔŋmɔ lɛ, kɛ shikpɔŋ kpakpa nɛɛ hãa bo koni oŋɔ lɛ, ejaakɛ maŋ ni kuɛŋ ti ji bo.+

7 “Kaimɔ bɔ ni owo Yehowa, o-Nyɔŋmɔ lɛ, mli la yɛ ŋa lɛ nɔ lɛ—ohiɛ akakpa nɔ kɔkɔɔkɔ.+ Kɛjɛ gbi ni nyɛshi Ejipt shikpɔŋ lɛ nɔ aahu kɛbashi be ni nyɛbashɛ biɛ nɛɛ, Yehowa hiɛ atua sɔŋŋ nyɛtseɔ.+ 8 Nyɛwo Yehowa mli la yɛ Horeb po, ni Yehowa mli fu nyɛ aahu akɛ kulɛ eetao ekpãtã nyɛhiɛ.+ 9 Be ni mikwɔ kɛtee gɔŋ lɛ nɔ koni miyahe tɛi tɛtrɛbii lɛ,+ ni ji kpaŋmɔ ni Yehowa kɛ nyɛ kpaŋ lɛ he tɛi tɛtrɛbii lɛ,+ mihi gɔŋ lɛ nɔ jetsɛremɔ kɛ jenamɔ gbii 40,+ miyeee nii, ni minuuu nu hu. 10 Kɛkɛ ni Yehowa kɛ tɛi tɛtrɛbii enyɔ ni Nyɔŋmɔ kɛ ewao eŋmala nɔ nii lɛ hã mi, ni wiemɔi ni Yehowa jɛ la lɛ mli ekɛ nyɛ wie yɛ gɔŋ lɛ nɔ, yɛ maŋ* lɛ henaabuamɔ gbi lɛ nɔ lɛ fɛɛ yɛ tɛi tɛtrɛbii lɛ anɔ.+ 11 Be ni jetsɛremɔ kɛ jenamɔ gbii 40 lɛ ba naagbee lɛ, Yehowa kɛ tɛi tɛtrɛbii enyɔ, ni ji kpaŋmɔ lɛ he tɛi tɛtrɛbii lɛ hã mi, 12 ni Yehowa kɛɛ mi akɛ, ‘Tee shi, kpelekemɔ shi oya kɛje biɛ, ejaakɛ omaŋ ní oyajie kɛje Ejipt lɛ eye sane fɔŋ.+ Amɛje gbɛ ni mifã amɛ akɛ amɛnyiɛ nɔ lɛ nɔ oya. Amɛfee dade amaga amɛhã amɛhe.’+ 13 Ni Yehowa kɛɛ mi akɛ, ‘Mikwɛ nɛkɛ maŋ nɛɛ aahu, ni naa! maŋ ni kuɛŋ ti ji amɛ.+ 14 Ŋmɛɛ mi gbɛ ní makpãtã amɛhiɛ, ní magbe amɛgbɛ́i kɛje ŋwɛi shishi, ni mahã otsɔ maŋ ni he wa fe amɛ, ní emli bii lɛ hu ayi fa kwraa fe amɛ.’+

15 “Ni mitsɔ mihe ni mikpeleke shi kɛjɛ gɔŋ lɛ nɔ, be mli ni gɔŋ lɛ miitso kɛ la lɛ,+ ni mikɛ miniji enyɔ lɛ hiɛ kpaŋmɔ lɛ he tɛi tɛtrɛbii enyɔ lɛ.+ 16 Ni mikwɛ, ni mina akɛ nyɛfee esha nyɛshi Yehowa, nyɛ-Nyɔŋmɔ lɛ! Nyɛfee dade tsinabi nyɛhã nyɛhe. Nyɛje gbɛ ni Yehowa fã nyɛ akɛ nyɛnyiɛ nɔ lɛ nɔ oya.+ 17 No hewɔ lɛ, mikɔlɔ tɛi tɛtrɛbii enyɔ lɛ, ni mikɛ miniji enyɔ lɛ fɔ̃ kɛtswia shi ni amɛjwara yɛ nyɛhiɛ.+ 18 Ni miho mibu shi yɛ Yehowa hiɛ jetsɛremɔ kɛ jenamɔ gbii 40, tamɔ tsutsu lɛ. Miyeee nii, ni minuuu nu hu,+ yɛ eshai fɛɛ ni nyɛfee lɛ hewɔ, ejaakɛ nyɛfee efɔŋ yɛ Yehowa hiɛ ni nyɛkɛwo emli la. 19 Ejaakɛ ŋmiŋmi mɔ mi yɛ bɔ ni Yehowa mli efu nyɛ waa,+ ní kulɛ eetao ekpãtã nyɛhiɛ lɛ hewɔ. Shi Yehowa bo mi toi yɛ nakai be lɛ mli hu.+

20 “Yehowa mli fu Aaron aahu akɛ, kulɛ eetao ekpãtã ehiɛ,+ shi mikɛ hiɛdɔɔ kpa fai mihã Aaron yɛ nakai be lɛ mli hu. 21 Kɛkɛ ni miwó nakai nɔ gbonyo* ni nyɛfee, ni ji tsinabi lɛ,+ ni mishã yɛ la mli; mijwara lɛ ni miwiɛ lɛ aahu kɛyashi be ni efee munyɔmunyɔ tamɔ mulu, ni mitsi mulu lɛ mishwie faa ni jɛɔ gɔŋ lɛ mli hoɔ lɛ mli.+

22 “Agbɛnɛ hu, nyɛwo Yehowa mli la yɛ Tabera+ kɛ Masa+ kɛ Kibrot-hataawa+ hu. 23 Be ni Yehowa tsu nyɛ kɛjɛ Kadesh-barnea+ ní ekɛɛ nyɛ akɛ, ‘Nyɛkwɔa kɛyaa ni nyɛyaŋɔa shikpɔŋ ni bɔ fɛɛ bɔ ni fee lɛ mikɛbaahã nyɛ lɛ!’ nyɛtse Yehowa, nyɛ-Nyɔŋmɔ lɛ, famɔ lɛ hiɛ atua ekoŋŋ,+ ni nyɛheee enɔ nyɛyeee*+ ni nyɛbooo lɛ toi hu. 24 Kɛjɛ be ni miná mile nyɛ nɛɛ, Yehowa hiɛ atua sɔŋŋ nyɛtseɔ.

25 “No hewɔ lɛ, mitee nɔ mibu shi yɛ Yehowa hiɛ jetsɛremɔ kɛ jenamɔ gbii 40,+ mibu shi yɛ nɛkɛ gbɛ nɔ ejaakɛ Yehowa kɛɛ ebaakpãtã nyɛhiɛ. 26 Mikɛ hiɛdɔɔ bɔi Yehowa fai kpamɔ mikɛɛ, ‘Nuŋtsɔ Ofe Yehowa, kaakpãtã omaŋ lɛ hiɛ. Amɛji bo diɛŋtsɛ onii,*+ mɛi ni okɛ ogbojee lɛ kpɔ̃, ní okɛ nineshiwalɛ jie amɛ kɛje Ejipt lɛ.+ 27 Kaimɔ otsuji Abraham kɛ Isak kɛ Yakob.+ Kaagbala ojwɛŋmɔ kɛtee maŋ nɛɛ kuɛŋtimɔ kɛ amɛnɔfɔŋfeemɔ kɛ amɛnɔshafeemɔ lɛ nɔ.+ 28 Kɛjeee nakai lɛ, shikpɔŋ ni ojie wɔ kɛje nɔ lɛ nɔ bii lɛ baakɛɛ akɛ: “Yehowa nyɛɛɛ ekɛ amɛ aya shikpɔŋ ni ewo amɛ he shi lɛ nɔ, ni akɛni enyɛɔ amɛ hewɔ lɛ, ejie amɛ kɛtee koni eyagbe amɛ yɛ ŋa lɛ nɔ.”+ 29 Ejaakɛ amɛji omaŋ kɛ bo diɛŋtsɛ onii,*+ mɛi ni okɛ ohewalɛ kpele kɛ onine ni okpã mli lɛ jie lɛ.’+

10 “Nakai be lɛ mli lɛ, Yehowa kɛɛ mi akɛ, ‘Ko tɛi tɛtrɛbii enyɔ ni tamɔ klɛŋklɛŋ tɛi lɛ ohã ohe,+ ní okwɔ kɛba miŋɔɔ yɛ gɔŋ lɛ nɔ; agbɛnɛ hu, okɛ tso akpɛ adeka ohã ohe. 2 Ni maŋma wiemɔi ni yɔɔ klɛŋklɛŋ tɛi tɛtrɛbii ni ojwara amɛ lɛ anɔ lɛ yɛ tɛi tɛtrɛbii nɛɛ anɔ, ni okɛto adeka lɛ mli.’ 3 No hewɔ lɛ, mikɛ akasia tso kpɛ adeka, ni miko tɛi tɛtrɛbii enyɔ ni tamɔ klɛŋklɛŋ tɛi lɛ, ni mihiɛ tɛi tɛtrɛbii enyɔ lɛ yɛ midɛŋ kɛkwɔ kɛtee gɔŋ lɛ nɔ.+ 4 Kɛkɛ ni eŋmala wiemɔi ni eŋmala tsutsu lɛ yɛ tɛi tɛtrɛbii lɛ anɔ,+ Kitãi Nyɔŋma+ lɛ,* wiemɔi ni Yehowa jɛ la lɛ mli ekɛ nyɛ wie yɛ gɔŋ lɛ nɔ,+ yɛ maŋ* lɛ henaabuamɔ gbi lɛ nɔ lɛ;+ ni Yehowa kɛhã mi. 5 Ni mitsɔ mihe, ni mikpeleke shi kɛjɛ gɔŋ lɛ nɔ,+ ni mikɛ tɛi tɛtrɛbii lɛ bawo adeka ni mikpɛ lɛ mli, ni amɛjwere mli, tamɔ bɔ ni Yehowa fã mi lɛ pɛpɛɛpɛ.

6 “Ni Israelbii lɛ fã kɛjɛ Beerot Bene-yaakan kɛtee Mosera. Jɛmɛ Aaron gbo yɛ, ni jɛmɛ afu lɛ yɛ,+ ni ebinuu Eleazar bɔi osɔfo yeli yɛ esɛɛ.+ 7 Amɛfã kɛjɛ jɛmɛ kɛtee Gudgoda, ni amɛjɛ Gudgoda kɛtee Yotbata,+ shikpɔŋ ni fai* hoɔ yɛ nɔ lɛ.

8 “Nakai be lɛ mli lɛ, Yehowa hala Levi weku+ lɛ akɛ amɛ amɛtere Yehowa kpaŋmɔ adeka lɛ,+ ní amɛdamɔ Yehowa hiɛ amɛsɔmɔ lɛ, ní amɛjɔɔ mɛi yɛ egbɛ́i lɛ mli,+ tamɔ bɔ ni amɛfeɔ kɛbashi ŋmɛnɛ lɛ. 9 No hewɔ ni ahãaa Levi gbɛfaŋnɔ loo gboshinii ko yɛ enyɛmimɛi lɛ ateŋ lɛ. Yehowa ji egboshinii, tamɔ bɔ ni Yehowa, o-Nyɔŋmɔ lɛ, kɛɛ lɛ lɛ pɛpɛɛpɛ.+ 10 Mi diɛŋtsɛ mihi gɔŋ lɛ nɔ jetsɛremɔ kɛ jenamɔ gbii 40,+ tamɔ mifee tsutsu lɛ, ni Yehowa bo mi toi yɛ nakai be lɛ mli hu.+ Yehowa sumɔɔɔ ni ekpãtã ohiɛ. 11 Ni Yehowa kɛɛ mi akɛ, ‘Yaa ni oyanyiɛ maŋ lɛ hiɛ, ní nyɛsaa nyɛhe ni nyɛfã, koni amɛya ni amɛyaŋɔ shikpɔŋ ni mikã amɛtsɛmɛi lɛ kitã akɛ mikɛbaahã amɛ lɛ.’+

12 “Agbɛnɛ, Israel, mɛni Yehowa, o-Nyɔŋmɔ lɛ, biɔ yɛ odɛŋ?+ No kɛkɛ ji akɛ: oshe Yehowa, o-Nyɔŋmɔ lɛ gbeyei,+ ni onyiɛ egbɛi lɛ fɛɛ anɔ,+ ni osumɔ lɛ, ni osɔmɔ Yehowa, o-Nyɔŋmɔ lɛ, kɛ otsui fɛɛ kɛ osusuma* fɛɛ,+ 13 ni oye Yehowa kitãi kɛ mlai ni miwoɔ bo ŋmɛnɛ gbi nɛɛ anɔ, koni ahi ahã bo diɛŋtsɛ.+ 14 Naa, ŋwɛi lɛ, Yehowa, o-Nyɔŋmɔ lɛ nɔ ni, ŋwɛii amli ŋwɛii* tete po, kɛ shikpɔŋ lɛ kɛ emli nibii fɛɛ lɛ, enɔ ni.+ 15 Shi otsɛmɛi lɛ kɛkɛ Yehowa tsi ebɛŋkɛ ni ejie esuɔmɔ lɛ kpo etsɔɔ amɛ, ni ehala nyɛ, ni ji amɛseshibii lɛ,+ yɛ maji fɛɛ ateŋ, tamɔ bɔ ni nyɛji ŋmɛnɛ gbi nɛɛ. 16 Nyɛtsua nyɛtsuii ahe* agbɛnɛ,+ ni nyɛkafea nyɛhe kuɛŋtilɔi dɔŋŋ.+ 17 Ejaakɛ Yehowa, nyɛ-Nyɔŋmɔ lɛ, ji nyɔŋmɔi a-Nyɔŋmɔ+ kɛ nuŋtsɔmɛi a-Nuŋtsɔ, Nyɔŋmɔ ni je agbo, ni he wa, ni he yɔɔ naakpɛɛ hu, mɔ ni kwɛɛɛ mɛi ahiɛiaŋ,+ ni eheee nyɔɔŋnii lɛ. 18 Eyeɔ jalɛ sane ehãa gbekɛ ni bɛ tsɛ* kɛ yoo okulafo,+ ni esumɔɔ gbɔ+ ni ehãa lɛ niyenii kɛ atade.* 19 Nyɛ hu nyɛsumɔa gbɔ, ejaakɛ nyɛ hu nyɛyatsɔmɔ gbɔi yɛ Ejipt shikpɔŋ lɛ nɔ.+

20 “She Yehowa, o-Nyɔŋmɔ lɛ gbeyei, lɛ osɔmɔ,+ lɛ ehe okpɛtɛ, ni lɛ egbɛ́i okɛkã kitã. 21 Lɛ ji mɔ ni sa akɛ ojie eyi.+ Lɛ ji o-Nyɔŋmɔ, mɔ ni fee nibii wuji kɛ nibii ni yɔɔ naakpɛɛ nɛɛ fɛɛ ni ona kɛ bo diɛŋtsɛ ohiŋmɛii lɛ ehã bo lɛ.+ 22 Be ni otsɛmɛi lɛ kpeleke shi kɛtee Ejipt lɛ,+ no mli lɛ amɛyifalɛ ji mɛi* 70, ni amrɔ nɛɛ, Yehowa, o-Nyɔŋmɔ lɛ, ehã oyi efa babaoo tamɔ ŋwɛi ŋulamii.+

11 “Suɔmɔ Yehowa, o-Nyɔŋmɔ lɛ,+ ní oye etaomɔ nii kɛ emlai kɛ eyiŋkpɛi* kɛ ekitãi lɛ anɔ be fɛɛ be. 2 Nyɛle akɛ ŋmɛnɛ lɛ, nyɛ mikɛwieɔ lɛ, shi jeee nyɛbii* ni leee loo amɛnako Yehowa, nyɛ-Nyɔŋmɔ lɛ, tsɔsemɔ+ kɛ egbojee+ kɛ enineshiwalɛ+ kɛ enine ni ekpã mli lɛ. 3 Amɛnaaa ekadii lɛ kɛ nibii ni efee Ejipt maŋtsɛ Farao kɛ eshikpɔŋ muu lɛ fɛɛ yɛ Ejipt lɛ;+ 4 aloo nɔ ni efee Ejipt asraafoi lɛ kɛ Farao okpɔŋɔi kɛ ta shwiilii lɛ, ní ehã nui lɛ baha amɛnɔ yɛ Ŋshɔ Tsuru lɛ mli be ni amɛnyiɛ nyɛsɛɛ lɛ; Yehowa kpãtã amɛhiɛ shi kome nyɔŋlo.*+ 5 Amɛnaaa nɔ ni efee ehã nyɛ* yɛ ŋa lɛ nɔ aahu kɛbashi be ni nyɛbashɛ biɛ nɛɛ, 6 aloo nɔ ni efee Datan kɛ Abiram, ni ji Ruben binuu Eliab bihii lɛ, be ni ehã shikpɔŋ lɛ gbele enaa ni emi amɛ kɛ amɛshĩabii kɛ amɛmama tsũi kɛ nɔ fɛɛ nɔ ni hiɛ kã ni nyiɛ amɛsɛɛ lɛ, yɛ Israelbii lɛ fɛɛ ahiɛ lɛ.+ 7 Nyɛ diɛŋtsɛ nyɛkɛ nyɛhiŋmɛii na nibii wuji fɛɛ ni Yehowa fee lɛ.

8 “Nyɛyea kitã muu lɛ fɛɛ ni miwoɔ nyɛ ŋmɛnɛ gbi nɛɛ nɔ, koni nyɛhe awa ní nyɛfo mli kɛya shikpɔŋ lɛ nɔ ní nyɛyaŋɔ shikpɔŋ lɛ, 9 ní agbɛnɛ hu, nyɛwala sɛɛ atsɛ+ yɛ shikpɔŋ ni Yehowa kã kitã akɛ ekɛbaahã nyɛtsɛmɛi lɛ kɛ amɛseshibii lɛ nɔ,+ shikpɔŋ ni mliki kɛ wo hoɔ yɛ nɔ lɛ.+

10 “Shikpɔŋ ni oyaa oyaŋɔ lɛ tamɔɔɔ Ejipt shikpɔŋ lɛ, he ni nyɛjɛ nyɛba lɛ, he ni kɛ́ odu nii lɛ okɛ onane shwieɔ nɔ nu,* tamɔ ashwieɔ abɔɔ ni yelibai* yɔɔ mli nɔ nu lɛ. 11 Shi shikpɔŋ ni nyɛyaa nyɛyafo faa lɛ ní nyɛyaŋɔ lɛ ji shikpɔŋ ni gɔji kɛ shikpɔji kplanakplanai* yɔɔ nɔ.+ Enuɔ nu ni nɛɔ kɛjɛɔ ŋwɛi lɛ;+ 12 eji shikpɔŋ ni Yehowa, o-Nyɔŋmɔ lɛ, kwɛɔ nɔ. Yehowa, o-Nyɔŋmɔ lɛ, hiŋmɛii yɛ nɔ be fɛɛ be, kɛjɛ afi lɛ shishijee kɛyashi afi lɛ naagbee.

13 “Ni kɛ́ nyɛbaabo kitãi ni miwoɔ nyɛ ŋmɛnɛ gbi nɛɛ toi jogbaŋŋ, ní nyɛsumɔ Yehowa, nyɛ-Nyɔŋmɔ lɛ, ní nyɛsɔmɔ lɛ kɛ nyɛtsui fɛɛ kɛ nyɛsusuma* fɛɛ lɛ,+ 14 no lɛ, mi hu mahã nugbɔ anɛ yɛ nyɛshikpɔŋ lɛ nɔ yɛ ebe ni ato lɛ mli, mra mli nugbɔ* kɛ sɛɛkpee nugbɔ,* ni obaabua oŋmaa* kɛ owain hee kɛ omu naa.+ 15 Ni mahã jwɛi akwɛ̃ yɛ oshikpɔji lɛ anɔ kɛhã kooloi ni olɛɔ lɛ, ni obaaye nii otɔ.+ 16 Nyɛkwɛa jogbaŋŋ koni akalaka nyɛtsui ni nyɛgbá afã, ní nyɛyajá nyɔŋmɔi krokomɛi, ní nyɛkoto amɛ hu.+ 17 Kɛjeee nakai lɛ, Yehowa mli baawo la ewo nyɛ, ni ebaaŋa ŋwɛi naa ni nugbɔ enɛŋ,+ ni shikpɔŋ lɛ baŋ enii, ni nyɛhiɛ baakpãtã oya kɛje shikpɔŋ kpakpa ni Yehowa kɛhãa nyɛ lɛ nɔ.+

18 “Nyɛnyɛmɔa miwiemɔi nɛɛ anɔ nyɛwoa nyɛtsuii kɛ nyɛsusumai* amli, ní nyɛfimɔ nyɛkpɛtɛ nyɛniji akɛ kaimɔ nɔ, ní amɛtsɔmɔ tamɔ yitsofiinɔ yɛ nyɛhiɛnaa.*+ 19 Nyɛtsɔa nyɛbii lɛ, wiemɔ he be ni ota shi yɛ oshĩa kɛ be ni onyiɛ gbɛ nɔ kɛ be ni okã shi kɛ be ni ote shi.+ 20 Ŋmalamɔ yɛ oshĩa lɛ shinaatsei lɛ kɛ ogbói lɛ ahe, 21 koni nyɛ kɛ nyɛbii lɛ awala sɛɛ atsɛ+ yɛ shikpɔŋ ni Yehowa kã kitã akɛ ekɛbaahã nyɛtsɛmɛi lɛ nɔ,+ gbii abɔ ni ŋwɛi kã he eyɔɔ shikpɔŋ lɛ yiteŋ nɛɛ.

22 “Kɛ́ nyɛye kitã ni miwoɔ nyɛ nɛɛ nɔ jogbaŋŋ ni nyɛkɛtsu nii, ni nyɛsumɔ Yehowa, nyɛ-Nyɔŋmɔ lɛ,+ ni nyɛnyiɛ egbɛi lɛ fɛɛ anɔ, ni nyɛkpɛtɛ ehe lɛ,+ 23 Yehowa baashwie jeŋmaji nɛɛ fɛɛ kɛje nyɛhiɛ,+ ni nyɛbaashɔ̃shɔ̃ɔ jeŋmaji ni dara ni amɛmli bii lɛ hu ayi fa fe nyɛ lɛ amaji lɛ yɛ amɛdɛŋ.+ 24 He fɛɛ he ni nyɛkɛ nyɛnane baama lɛ baatsɔ nyɛnɔ.+ Nyɛhusu lɛ baajɛ ŋa lɛ nɔ kɛyashi Lebanon, kɛjɛ Faa lɛ, ni ji Yufrate faa lɛ, naa kɛyashi anaigbɛ ŋshɔ* lɛ naa.+ 25 Mɔ ko mɔ ko nyɛŋ nyɛhiɛ adamɔ.+ Yehowa, nyɛ-Nyɔŋmɔ lɛ, baahã nyɛhe ŋmiŋmi kɛ nyɛhe gbeyei amɔ shikpɔŋ muu ni nyɛbaayanyiɛ nɔ lɛ fɛɛ,+ tamɔ bɔ ni ewo nyɛ shi lɛ pɛpɛɛpɛ.

26 “Naa, ŋmɛnɛ lɛ, mikɛ jɔɔmɔ kɛ loomɔ miishwie nyɛhiɛ:+ 27 abaajɔɔ nyɛ kɛ́ nyɛbo Yehowa, nyɛ-Nyɔŋmɔ lɛ, kitãi ní miwoɔ nyɛ ŋmɛnɛ gbi nɛɛ toi,+ 28 ni abaalomɔ nyɛ kɛ́ nyɛbooo Yehowa, nyɛ-Nyɔŋmɔ lɛ, kitãi lɛ toi,+ ni nyɛgbá afã kɛje gbɛ ni mifãa nyɛ ŋmɛnɛ akɛ nyɛnyiɛ nɔ lɛ nɔ, ni nyɛyanyiɛ nyɔŋmɔi ni nyɛleee lɛ asɛɛ.

29 “Kɛ́ Yehowa, o-Nyɔŋmɔ lɛ, kɛ bo yashɛ shikpɔŋ ni oyaa oyaŋɔ lɛ nɔ lɛ, jajemɔ jɔɔmɔ lɛ otsɔɔ* yɛ Gerizim Gɔŋ lɛ nɔ, ni ojaje loomɔ lɛ otsɔɔ* yɛ Ebal Gɔŋ lɛ nɔ.+ 30 Ani jeee Yordan faa lɛ sɛɛ kɛmiiya anaigbɛ,* yɛ Kanaanbii ni yɔɔ Araba lɛ ashikpɔŋ lɛ nɔ, yɛ Gilgal hiɛ, yɛ More tsei wuji+ lɛ amasɛi gɔji nɛɛ yɔɔ? 31 Ejaakɛ nyɛmiifo Yordan lɛ ni nyɛya nyɛyaŋɔ shikpɔŋ ni Yehowa, nyɛ-Nyɔŋmɔ lɛ, kɛhãa nyɛ lɛ.+ Kɛ́ nyɛyaŋɔ shikpɔŋ lɛ ni nyɛhi nɔ lɛ, 32 nyɛkwɛa jogbaŋŋ ní nyɛyea taomɔ nii kɛ yiŋkpɛi* fɛɛ ni mikɛshwieɔ nyɛhiɛ ŋmɛnɛ gbi nɛɛ anɔ.+

12 “Taomɔ nii kɛ yiŋkpɛi* ni sa akɛ nyɛkwɛ jogbaŋŋ ni nyɛye nɔ gbii abɔ fɛɛ ni nyɛyɔɔ wala mli yɛ shikpɔŋ ni Yehowa, nyɛtsɛmɛi a-Nyɔŋmɔ lɛ, kɛbaahã nyɛ akɛ nyɛnɔ lɛ nɔ lɛ nɛ. 2 Nyɛkpãtãa hei fɛɛ ni jeŋmaji ni nyɛbaayashwie amɛ lɛ sɔmɔɔ amɛnyɔŋmɔi lɛ yɛ lɛ ahiɛ kwrakwra,+ gɔji ni kwɔlɔ lɛ anɔ jio, gɔŋkpɔi lɛ anɔ jio, tso fɛɛ tso ni ebu kusuu shishi jio. 3 Nyɛkumɔa amɛfɔleshaa latɛi lɛ, nyɛjwaraa amɛwɔŋ tɛi lɛ,+ nyɛkɛ la ashãa amɛwɔŋ tsei* lɛ, ni nyɛfolɔa amɛnyɔŋmɔi lɛ amagai lɛ nyɛshwiea shi,+ bɔ ni afee ni nyɛgbe amɛgbɛ́i tete kɛje jɛmɛ.+

4 “Nyɛkajáa Yehowa, nyɛ-Nyɔŋmɔ lɛ, yɛ nakai gbɛ nɔ.+ 5 Shi moŋ, nyɛtaoa Yehowa, nyɛ-Nyɔŋmɔ lɛ, sɛɛ gbɛ yɛ he fɛɛ he ni ebaahala yɛ nyɛwekui lɛ fɛɛ ateŋ koni ehã egbɛ́i lɛ ahi jɛmɛ ni ekɛ jɛmɛ afee eshihilɛhe lɛ, ni nyɛya jɛmɛ.+ 6 Jɛmɛ nyɛkɛ nyɛshãa afɔlei,+ kɛ nyɛfɔlei krokomɛi, kɛ nyɛnibii amlijai nyɔŋma mli ekomekomei,*+ kɛ nyɛdɛŋ onia,+ kɛ nyɛshiwoo afɔlei, kɛ afɔlei ni nyɛjɛɔ nyɛsuɔmɔ mli nyɛkɛhãa,+ kɛ nyɛtsinai kɛ nyɛtoi akromɔbii lɛ fɛɛ ayaa.+ 7 Nyɛ kɛ nyɛshĩabii lɛ ayea nii lɛ yɛ jɛmɛ yɛ Yehowa, nyɛ-Nyɔŋmɔ lɛ hiɛ,+ ni nyɛmii ashɛa nyɛhe yɛ nibii fɛɛ ni nyɛtsu lɛ amli,+ ejaakɛ Yehowa, o-Nyɔŋmɔ lɛ, ejɔɔ bo.

8 “Nyɛkafea tamɔ bɔ ni wɔfeɔ yɛ biɛ ŋmɛnɛ lɛ, ní mɔ fɛɛ mɔ feɔ nɔ ni sa lɛ diɛŋtsɛ ehiɛ* lɛ, 9 ejaakɛ nyɛnáko nyɛyashɛ hejɔɔmɔhe+ lɛ kɛ gboshinii ni Yehowa, o-Nyɔŋmɔ lɛ, kɛhãa bo lɛ nɔ. 10 Kɛ́ nyɛná nyɛfo Yordan+ lɛ ni nyɛyahi shikpɔŋ ni Yehowa, nyɛ-Nyɔŋmɔ lɛ, kɛhãa nyɛ akɛ nyɛnɔ lɛ nɔ lɛ, bɔ fɛɛ bɔ ni fee lɛ, ebaahã nyɛhe ajɔ nyɛ kɛjɛ nyɛhenyɛlɔi fɛɛ ni bɔle nyɛ lɛ adɛŋ, ni nyɛbaahi shi shweshweeshwe.+ 11 Nyɛkɛ nibii fɛɛ ni mifãa nyɛ lɛ ayaa he ni Yehowa, nyɛ-Nyɔŋmɔ lɛ, baahala koni ehã egbɛ́i lɛ ahi jɛmɛ lɛ+—ni ji nyɛshãa afɔlei lɛ, kɛ nyɛfɔlei krokomɛi lɛ, kɛ nyɛnibii amlijai nyɔŋma mli ekomekomei*+ lɛ, kɛ nyɛdɛŋ onia lɛ, kɛ afɔle fɛɛ afɔle ni nyɛwoɔ shi akɛ nyɛkɛbaahã Yehowa lɛ. 12 Nyɛmii ashɛa nyɛhe yɛ Yehowa, nyɛ-Nyɔŋmɔ lɛ hiɛ,+ nyɛ kɛ nyɛbihii, nyɛbiyei, nyɛnyɔji hii kɛ nyɛnyɔji yei, kɛ agbɛnɛ hu, Levinyo ni yɔɔ nyɛmaji* lɛ amli lɛ, ejaakɛ ahãaa lɛ gbɛfaŋnɔ loo gboshinii ko yɛ nyɛteŋ.+ 13 Kwɛmɔ jogbaŋŋ ni okayashã oshãa afɔlei lɛ yɛ he fɛɛ he kɛkɛ ni obaana.+ 14 He ni Yehowa baahala yɛ nyɛwekui lɛ ateŋ ekome mli lɛ pɛ okɛ oshãa afɔlei lɛ ayahã yɛ, ni jɛmɛ esa akɛ ofee nibii fɛɛ ni mifãa bo lɛ yɛ.+

15 “Shi be fɛɛ be ni loo baaba otsine lɛ,* obaanyɛ ogbe ni oye,+ yɛ bɔ ni Yehowa, o-Nyɔŋmɔ lɛ, ejɔɔ bo yɛ omaji* lɛ fɛɛ amli ehã lɛ naa. Mɔ ni he tseee kɛ mɔ ni he tse fɛɛ baanyɛ aye, tamɔ bɔ ni oyeɔ adowa kɛ baayelɔ lɛ nɔŋŋ. 16 Shi nyɛkayea lá lɛ;+ nyɛtsia nyɛshwiea shikpɔŋ tamɔ nu.+ 17 Nii ni aŋmɛŋ bo gbɛ ni oye yɛ omaji* lɛ amli ji oŋmaa* loo owain hee loo omu mlijai nyɔŋma mli ekomekomei, loo otsinai kɛ otoi akromɔbii,+ loo afɔle fɛɛ afɔle ni owoɔ shi akɛ okɛbaahã, loo afɔlei ni ojɛɔ osuɔmɔ mli okɛhãa, loo odɛŋ onia. 18 Ye nibii nɛɛ yɛ Yehowa, o-Nyɔŋmɔ lɛ hiɛ, yɛ he ni Yehowa, o-Nyɔŋmɔ lɛ, baahala lɛ+—bo kɛ obinuu kɛ obiyoo kɛ otsulɔ nuu kɛ otsulɔ yoo kɛ Levinyo ni yɔɔ omaji* lɛ amli lɛ; ni omii ashɛ ohe yɛ Yehowa, o-Nyɔŋmɔ lɛ, hiɛ yɛ nibii fɛɛ ni otsu lɛ amli. 19 Kwɛmɔ jogbaŋŋ ni ohiɛ akakpa Levinyo lɛ nɔ,+ gbii abɔ ni oyɔɔ oshikpɔŋ lɛ nɔ lɛ.

20 “Kɛ́ Yehowa, o-Nyɔŋmɔ lɛ, lɛɛ ohusu lɛ mli,+ tamɔ bɔ ni ewo bo shi lɛ,+ ni okɛɛ akɛ, ‘Miitao maye loo,’ akɛni loo miiba otsine* lɛ hewɔ lɛ, no lɛ, obaanyɛ oye be fɛɛ be ni ebaaba otsine.*+ 21 Kɛji he ni Yehowa, o-Nyɔŋmɔ lɛ, baahala akɛ egbɛ́i lɛ ahi lɛ+ kɛ bo teŋ jekɛ lɛ, no lɛ, gbee otsinai loo otoi ni Yehowa ehã bo lɛ eko, tamɔ bɔ ni mifã bo lɛ, ni oye yɛ omaji* lɛ amli be fɛɛ be ni ebaaba otsine.* 22 Ye lɛ tamɔ oyeɔ adowa kɛ baayelɔ lɛ nɔŋŋ;+ mɔ ni he tseee kɛ mɔ ni he tse fɛɛ baanyɛ aye. 23 Tswaa ofai shi kɛkɛ akɛ oyeŋ lá lɛ,+ ejaakɛ lá lɛ ji wala*+ lɛ, ni esaaa akɛ oyeɔ wala* lɛ kɛ loo lɛ fɛɛ. 24 Kaaye lá lɛ. Tsi oshwie shikpɔŋ tamɔ nu.+ 25 Kaaye lá lɛ, koni ahi ahã bo kɛ obii ni baaba yɛ osɛɛ lɛ, akɛni oofee nɔ ni sa Yehowa hiɛ lɛ hewɔ. 26 Kɛ́ ooya he ni Yehowa baahala lɛ, okɛ onibii krɔŋkrɔŋi lɛ kɛ oshiwoo afɔlei lɛ pɛ aya. 27 Okɛ oshãa afɔlei lɛ, loo lɛ kɛ lá lɛ fɛɛ,+ ahã yɛ jɛmɛ, yɛ Yehowa, o-Nyɔŋmɔ lɛ, afɔleshaa latɛ lɛ nɔ, ni atsi afɔlei krokomɛi lɛ alá lɛ ashwie Yehowa, o-Nyɔŋmɔ lɛ, afɔleshaa latɛ lɛ he,+ shi obaanyɛ oye loo lɛ.

28 “Kwɛmɔ jogbaŋŋ ni oye wiemɔi nɛɛ fɛɛ ni mijajeɔ mitsɔɔ bo lɛ anɔ koni ahi ahã bo kɛ obii* ni baaba yɛ osɛɛ lɛ daa, akɛni oofee nɔ ni hi kɛ nɔ ni ja yɛ Yehowa, o-Nyɔŋmɔ lɛ, hiɛ lɛ hewɔ.

29 “Kɛ́ Yehowa, o-Nyɔŋmɔ lɛ, kpãtã jeŋmaji ni oyaa oyashwie lɛ ahiɛ,+ ni ohi amɛshikpɔŋ lɛ nɔ lɛ, 30 kwɛmɔ jogbaŋŋ koni be ni akpãtã amɛhiɛ kɛje ohiɛ lɛ sɛɛ lɛ, tsɔne ko akadu bo. Kaabi amɛnyɔŋmɔi lɛ ahe sane ni okɛɛ akɛ, ‘Te jeŋmaji nɛɛ sɔmɔ amɛnyɔŋmɔi lɛ amɛhã tɛŋŋ? Mi hu mafee nakai nɔŋŋ.’+ 31 Kaajá Yehowa, o-Nyɔŋmɔ lɛ nakai, ejaakɛ amɛfeɔ nihiinii fɛɛ ni Yehowa nyɛɔ lɛ amɛhãa amɛnyɔŋmɔi lɛ; amɛshãa amɛbihii kɛ amɛbiyei po yɛ la mli amɛhãa amɛnyɔŋmɔi lɛ.+ 32 Nyɛkwɛa jogbaŋŋ ni nyɛfea nɔ fɛɛ nɔ ni mifãa nyɛ lɛ.+ Nyɛkɛ nɔ ko akafataa he lɛ, nyɛkajiea eko yɛ mli hu.+

13 “Kɛ́ eba lɛ akɛ gbalɔ ko loo mɔ ko ni tsɔɔ lamɔi anɔ egbaa nɔ ni baaba wɔsɛɛ lɛ te shi yɛ nyɛteŋ, ni etsɔɔ bo okadi loo nɔ ko ni baaba wɔsɛɛ, 2 ni okadi loo nɔ ni ekɛɛ bo akɛ ebaaba wɔsɛɛ lɛ ba mli, ni ekɛɛ akɛ, ‘Hã wɔyanyiɛ nyɔŋmɔi krokomɛi asɛɛ,’ nyɔŋmɔi ni oleee, ‘ní wɔsɔmɔ amɛ’ lɛ, 3 no lɛ, kaabo wiemɔi ni nakai gbalɔ loo lamɔiatsɛ lɛ wieɔ lɛ toi,+ ejaakɛ Yehowa, nyɛ-Nyɔŋmɔ lɛ, miika nyɛ ekwɛ+ akɛ nyɛsumɔɔ Yehowa, nyɛ-Nyɔŋmɔ lɛ, kɛ nyɛtsui fɛɛ kɛ nyɛsusuma* fɛɛ+ lo. 4 Nyɛnyiɛa Yehowa, nyɛ-Nyɔŋmɔ lɛ sɛɛ, ni nyɛshea lɛ gbeyei, nyɛyea ekitãi lɛ anɔ, nyɛboa egbee toi; lɛ esa akɛ nyɛsɔmɔ, ni lɛ ehe nyɛkɛ nyɛhe akpɛtɛa.+ 5 Shi nakai gbalɔ loo lamɔiatsɛ lɛ, agbe lɛ,+ ejaakɛ ewo nyɛ hewalɛ ni nyɛtse Yehowa, nyɛ-Nyɔŋmɔ ni jie nyɛ kɛje Ejipt shikpɔŋ lɛ nɔ, ní ekpɔ̃ nyɛ kɛje nyɔŋyeli shĩa lɛ hiɛ atua, koni ehã nyɛje gbɛ ni Yehowa, nyɛ-Nyɔŋmɔ lɛ, efã nyɛ akɛ nyɛnyiɛ nɔ lɛ nɔ. Ni nyɛjiea nɔ fɔŋ kɛjea nyɛteŋ.+

6 “Kɛ́ onyɛmi nuu, ni ji omami binuu, loo obinuu loo obiyoo loo oŋa ni osumɔɔ lɛ waa loo onaanyo kpaakpa* ka akɛ ebaalaka bo yɛ teemɔŋ, ni ekɛɛ akɛ, ‘Hã wɔya ni wɔyajá nyɔŋmɔi krokomɛi,’+ nyɔŋmɔi ni bo loo otsɛmɛi lɛ leee, 7 maji fɛɛ ni bɔle nyɛ lɛ anyɔŋmɔi lɛ eko, maji ni bɛŋkɛ bo loo maji ni kɛ bo teŋ jekɛ, kɛjɛ shikpɔŋ lɛ naagbeehe kome kɛtee shikpɔŋ lɛ naagbeehe kroko lɛ, 8 kaakpɛlɛ nɔ ohã lɛ ni kaabo lɛ toi,+ kaana lɛ mɔbɔ ni omusuŋ akatsɔ bo yɛ ehe, kaabu ehe hu; 9 shi moŋ, bɔ fɛɛ bɔ ni fee lɛ, gbee lɛ.+ Bo klɛŋklɛŋ tswaa lɛ tɛ koni agbe lɛ, no sɛɛ lɛ, maŋbii lɛ fɛɛ atswia lɛ tɛi.+ 10 Ni tswiamɔ lɛ tɛi ni egbo,+ ejaakɛ eka akɛ ebaahã oje Yehowa, o-Nyɔŋmɔ lɛ, mɔ ni jie bo kɛje Ejipt shikpɔŋ lɛ nɔ, kɛje nyɔŋyeli shĩa lɛ sɛɛ. 11 Kɛkɛ lɛ, Israel fɛɛ baanu ni amɛbaashe gbeyei, ni amɛfeŋ nɔ fɔŋ ko ni tamɔ nakai dɔŋŋ yɛ nyɛteŋ.+

12 “Kɛji eba lɛ akɛ onu yɛ omaji ni Yehowa, o-Nyɔŋmɔ lɛ, kɛhãa bo akɛ ohi mli lɛ ateŋ eko mli akɛ, 13 ‘Hii yaka gbɔmɛi komɛi ejɛ nyɛteŋ amɛtee koni amɛyahã amɛmaŋ lɛ mli bii lɛ aje Nyɔŋmɔ sɛɛ, ni amɛkɛɛ akɛ: “Nyɛhãa wɔyaa ni wɔyasɔmɔa nyɔŋmɔi krokomɛi,” nyɔŋmɔi ni nyɛleee lɛ,’ 14 no lɛ, taomɔ sane lɛ mli, bi mli ni opɛi mli fitsofitso;+ ni kɛ́ oná nɔmimaa akɛ afee nɛkɛ nihiinii nɛɛ yɛ nyɛteŋ lɛɛlɛŋ lɛ, 15 no lɛ, bɔ fɛɛ bɔ ni fee lɛ, okɛ klante agbe nakai maŋ lɛ mli bii lɛ.+ Okɛ klante akpãtã maŋ lɛ kɛ nɔ fɛɛ nɔ ni yɔɔ mli, ní emli lɛɛ kooloi po fata he lɛ ahiɛ.+ 16 No sɛɛ lɛ, buamɔ maŋ lɛ mli ta mli nii lɛ fɛɛ anaa yɛ maŋ lɛ henaabuamɔhe lɛ teŋ, ní okɛ la ashã maŋ lɛ, ni emli ta mli nii lɛ fɛɛ baatsɔ afɔle muu ahã Yehowa, o-Nyɔŋmɔ lɛ. Ebaatsɔ koikoi kɛya naanɔ. Akasaa ato maŋ lɛ dɔŋŋ. 17 Kaakɔ nii ni ajie ato afã koni akpãtã hiɛ* lɛ eko kwraa,+ koni Yehowa ahã emlifu ni naa wa lɛ sɛɛ afo, ní ena bo mɔbɔ, ní emusuŋ atsɔ lɛ yɛ ohe, ní ehã oyi afa, tamɔ bɔ ni ekã otsɛmɛi lɛ kitã lɛ.+ 18 Ejaakɛ esa akɛ obo Yehowa, o-Nyɔŋmɔ lɛ, gbee toi kɛtsɔ ekitãi fɛɛ ni miwoɔ bo ŋmɛnɛ gbi nɛɛ ni oooye nɔ lɛ nɔ, ní no atsɔɔ akɛ oofee nɔ ni ja yɛ Yehowa, o-Nyɔŋmɔ lɛ hiɛ.+

14 “Yehowa, nyɛ-Nyɔŋmɔ lɛ, bii ji nyɛ. Nyɛkafolɔa nyɛhe gbɛ̃i,+ ni nyɛkashɛa nyɛhiɛnaa kpataa* yɛ mɔ ko ni egbo hewɔ.+ 2 Ejaakɛ oji maŋ krɔŋkrɔŋ+ hã Yehowa, o-Nyɔŋmɔ lɛ, ni Yehowa ehala bo yɛ maji fɛɛ ni yɔɔ shikpɔŋ lɛ nɔ lɛ ateŋ koni otsɔ emaŋ, enii ni eshwɛɛɛ he kwraa.+

3 “Kaaye nihiinii ko kwraa.+ 4 Kooloi ni nyɛbaanyɛ nyɛye nɛ:+ tsina kɛ gwantɛŋ kɛ abotia 5 kɛ baayelɔ kɛ adowa kɛ odabɔ kɛ ŋa mli abotia kɛ yɔɔ kɛ ŋa mli gwantɛŋ kɛ gɔji anɔ gwantɛŋ. 6 Nyɛbaanyɛ nyɛye kooloo fɛɛ kooloo ni yɔɔ nane tokotai* ni agbála mli enyɔ ní gɔiɔ eniyenii etaa. 7 Shi nyɛkayea kooloi ni nyiɛ sɛɛ nɛɛ ni gɔiɔ amɛniyenii amɛtaa loo agbála amɛnane tokotai* amli lɛ: afukpɔŋɔ kɛ kpɛŋkplɛ kɛ afutuɔkɔ, ejaakɛ amɛgɔiɔ amɛniyenii amɛtaa moŋ, shi agbálako amɛnane tokotai* lɛ amli. Amɛhe tseee hãaa nyɛ.+ 8 Kɛ kplotoo hu, ejaakɛ agbála enane tokotai* lɛ amli moŋ, shi egɔiii eniyenii etaaa. Ehe tseee hãaa nyɛ. Nyɛkayea amɛloo, ni nyɛkataa amɛgbohii ahe hu.

9 “Nii fɛɛ ni yɔɔ nu mli lɛ ateŋ nɔ ni nyɛbaanyɛ nyɛye nɛ: Nɔ fɛɛ nɔ ni yɔɔ fiji kɛ he totoi lɛ, nyɛbaanyɛ nyɛye.+ 10 Shi nɔ fɛɛ nɔ ni bɛ fiji kɛ he totoi lɛ, nyɛkayea. Ehe tseee hãaa nyɛ.

11 “Nyɛbaanyɛ nyɛye loofɔlɔ fɛɛ loofɔlɔ ni he tse. 12 Shi nyɛkayea nɔ ni nyiɛ sɛɛ nɛɛ: okropɔŋ kɛ ŋshɔ hiɛ akroma kɛ akpaŋa diŋ+ 13 kɛ laalɔɔ tsuru kɛ laalɔɔ diŋ kɛ osaŋsa henɔi fɛɛ 14 kɛ kwaakwaalabite henɔi fɛɛ 15 kɛ duguma kɛ patu kɛ oka kɛ akroma henɔi fɛɛ 16 kɛ patu bibioo kɛ patu ni toii kɛlɛ kɛ omiɔhɔɔ* 17 kɛ ŋa nɔ dɔkɔdɔkɔ kɛ akpaŋa kɛ amiŋ* 18 kɛ klitso kɛ gɔdɔ henɔi fɛɛ kɛ huupu* kɛ aputupata. 19 Kooloi bibiibibii fɛɛ ni yɔɔ fiji* lɛ hu ahe tseee hãaa nyɛ. Nyɛkayea. 20 Kooloo fɛɛ kooloo ni filikiɔ ni he tse lɛ, nyɛbaanyɛ nyɛye.

21 “Nyɛkayea kooloo ko kooloo ko ni egbo.+ Obaanyɛ okɛhã gbɔ ni yɔɔ omaji* lɛ amli lɛ, ni lɛ lɛ, ebaanyɛ eye, aloo abaanyɛ ahɔ̃ɔ ahã maŋsɛɛnyo. Ejaakɛ oji maŋ krɔŋkrɔŋ hã Yehowa, o-Nyɔŋmɔ lɛ.

“Okɛ abotiabi ko nyɛ fufɔ mli nu akahoo abotiabi lɛ.+

22 “Daa afi lɛ, kwɛmɔ ni okɛ odumɔwui lɛ amli nibaa nii fɛɛ ni ba yɛ ŋmɔshi lɛ amlijai nyɔŋma mli ekome ahã.+ 23 Ye oŋmaa* kɛ owain hee kɛ omu mlijai nyɔŋma mli ekomekome, kɛ otsinai kɛ otoi akromɔbii lɛ yɛ Yehowa, o-Nyɔŋmɔ lɛ hiɛ, yɛ he ni ebaahala koni ehã egbɛ́i lɛ ahi jɛmɛ lɛ,+ koni okase Yehowa, o-Nyɔŋmɔ lɛ, gbeyeishemɔ be fɛɛ be.+

24 “Shi kɛ́ gbɛ lɛ jekɛ tsɔ hã bo, ni onyɛɛɛ okɛ nibii nɛɛ aya he ni Yehowa, o-Nyɔŋmɔ lɛ, baahala akɛ egbɛ́i lɛ ahi,+ akɛni jɛmɛ kɛ bo teŋ jekɛ waa hewɔ lɛ (ejaakɛ Yehowa, o-Nyɔŋmɔ lɛ, ejɔɔ bo), 25 no lɛ, feemɔ fɛɛ shika, ni ohiɛ shika lɛ yɛ odɛŋ kɛfã gbɛ kɛya he ni Yehowa, o-Nyɔŋmɔ lɛ, baahala lɛ. 26 Ni obaanyɛ okɛ shika lɛ ahe nɔ fɛɛ nɔ ni baa otsine*—tsinai kɛ gwantɛŋi kɛ abotiai kɛ wain kɛ dãji krokomɛi ni wa, kɛ nɔ fɛɛ nɔ ni osumɔɔ;* ní oye yɛ jɛmɛ yɛ Yehowa, o-Nyɔŋmɔ lɛ hiɛ, ní omii ashɛ ohe, bo kɛ oshĩabii fɛɛ.+ 27 Ni ohiɛ akakpa Levinyo ni yɔɔ omaji lɛ amli lɛ nɔ,+ ejaakɛ ahãaa lɛ gbɛfaŋnɔ loo gboshinii ko yɛ nyɛteŋ.+

28 “Daa afii etɛ naagbee lɛ, jiemɔ onibaa nii ni ba yɛ nakai afi lɛ mli lɛ amlijai nyɔŋma mli ekomekomei lɛ fɛɛ, ni okɛyashwie omaji lɛ amli.+ 29 Kɛkɛ lɛ, Levinyo ni ahãaa lɛ gbɛfaŋnɔ loo gboshinii ko yɛ nyɛteŋ, kɛ gbɔ kɛ gbekɛ ni bɛ tsɛ* kɛ yoo okulafo ni yɔɔ omaji lɛ amli lɛ baaba ni amɛbaye ni amɛtɔrɔ,+ koni Yehowa, o-Nyɔŋmɔ lɛ, ajɔɔ bo yɛ nɔ fɛɛ nɔ ni ofeɔ lɛ mli.+

15 “Daa afii kpawo naagbee lɛ, hã mɛi aye amɛhe.+ 2 Nɛkɛ ji bɔ ni ahã mɛi aye amɛhe ahã: Mɔ fɛɛ mɔ ni kɛ nɔ ko efa enaanyo ko lɛ ahã enaanyo lɛ aye ehe kɛjɛ nyɔmɔ ni ehiɛ lɛ lɛ mli. Ekabi enaanyo loo enyɛmi lɛ nyɔmɔ ni ehiɛ lɛ lɛ, ejaakɛ abaashiɛ heyeli ahã Yehowa.+ 3 Obaanyɛ obi gbɔ nyɔmɔ,+ shi nyɔmɔ fɛɛ nyɔmɔ ni onyɛmi hiɛ bo lɛ, kaabi lɛ. 4 Shi esaaa akɛ nyɛteŋ mɔ ko yeɔ ohia, ejaakɛ bɔ fɛɛ bɔ ni fee lɛ, Yehowa baajɔɔ bo+ yɛ shikpɔŋ ni Yehowa, o-Nyɔŋmɔ lɛ, kɛhãa bo akɛ gboshinii lɛ nɔ, 5 shi ja obo Yehowa, o-Nyɔŋmɔ lɛ, gbee toi kɛmɔ shi, ní oye kitãi nɛɛ fɛɛ ni miwoɔ bo ŋmɛnɛ gbi nɛɛ anɔ dã.+ 6 Ejaakɛ Yehowa, o-Nyɔŋmɔ lɛ, baajɔɔ bo tamɔ bɔ ni ewo bo shi lɛ, ni okɛ onii baafa* jeŋmaji babaoo, shi bo lɛ, ehe ebahiaŋ ni oyafa nɔ ko;+ ni obaaye jeŋmaji babaoo anɔ, shi amɛ lɛ, amɛyeŋ onɔ.+

7 “Kɛ́ onyɛmimɛi lɛ ateŋ mɔ ko batsɔ ohiafo yɛ nyɛteŋ yɛ omaji lɛ eko mli yɛ shikpɔŋ ni Yehowa, o-Nyɔŋmɔ lɛ, kɛhãa bo lɛ nɔ lɛ, kaahã oyitsoŋ* miiwa ni kaamia odɛŋ hu yɛ onyɛmi ohiafo lɛ nɔ.+ 8 Shi moŋ, odɛŋ akpɔ ahã lɛ* tswaa,+ ni bɔ fɛɛ bɔ ni fee lɛ, faa* lɛ nɔ fɛɛ nɔ ni he hiaa lɛ loo nɔ ni ebɛ lɛ. 9 Kwɛmɔ jogbaŋŋ ní okaná susumɔ fɔŋ nɛɛ yɛ otsui mli akɛ, ‘Afi ni ji kpawo lɛ, ni ji afi ni ahãa mɛi yeɔ amɛhe* lɛ eshɛ etã,’+ ni no hewɔ lɛ ofeee onyɛmi ohiafo lɛ ejurɔ, ni ohãaa lɛ nɔ ko nɔ ko. Kɛ́ ebolɔ etsɛ Yehowa ewo bo lɛ, no baatsɔ esha yɛ ogbɛfaŋ.+ 10 Hã lɛ nii tswaa,+ ni kaahã* lɛ nii kɛ mligbigbilimɔ, ejaakɛ enɛ hewɔ Yehowa, o-Nyɔŋmɔ lɛ, baajɔɔ nɔ fɛɛ nɔ ni ofeɔ kɛ nɔ fɛɛ nɔ ni otsuɔ lɛ nɔ lɛ.+ 11 Ejaakɛ ohiafoi baahi shikpɔŋ lɛ nɔ be fɛɛ be.+ No hewɔ ni mifãa bo akɛ, ‘Odɛŋ akpɔ ahã* onyɛmi ní naa nɔ ní miiye ohia yɛ oshikpɔŋ lɛ nɔ lɛ.’+

12 “Kɛ́ ahɔ̃ɔ onyɛmimɛi Hebribii lɛ ateŋ mɔ ko ahã bo, nuu jio, yoo jio, ni esɔmɔ bo afii ekpaa lɛ, no lɛ, afi ni ji kpawo lɛ nɔ lɛ, hã eye ehe.+ 13 Ni kɛ́ ohã eye ehe lɛ, kaawo lɛ gbɛ ni etee kɛ edɛ̃ folo. 14 Hã lɛ otoi lɛ kɛ oŋmaagbeemɔhe nii lɛ kɛ obui ni oŋaa mu loo wain yɛ mli lɛ amli nii lɛ eko tswaa. Bɔ pɛ ni Yehowa, o-Nyɔŋmɔ lɛ, ejɔɔ bo lɛ, nakai ohã lɛ. 15 Kaimɔ akɛ bo hu oyatsɔ nyɔŋ yɛ Ejipt shikpɔŋ lɛ nɔ, ni Yehowa, o-Nyɔŋmɔ lɛ, kpɔ̃ bo. No hewɔ ni mifãa bo ŋmɛnɛ akɛ ofee enɛ lɛ.

16 “Shi kɛ́ ekɛɛ bo akɛ, ‘Mishiŋ oŋɔɔ miyaŋ!’ akɛni esumɔɔ bo kɛ oshĩabii lɛ, ni emii shɛ ehe hu be mli ni eyɔɔ oŋɔɔ lɛ hewɔ lɛ,+ 17 no lɛ, kɔ dade kɛ enaa piɔpiɔ* ni okɛgbu etoi kɛmɔ shinaa lɛ, ní etsɔ onyɔŋ ewala gbii abɔ fɛɛ. Nakai nɔŋŋ ofee onyɔŋ yoo. 18 Kɛ́ oŋmɛɛ ehe ni eshi bo etee lɛ, kaana no akɛ nɔ ko ni wa, ejaakɛ sɔɔmɔ ni esɔmɔ bo afii ekpaa lɛ tamɔ apaafonyo nitsumɔ ni akɛbɔ he toi enyɔ, ni Yehowa, o-Nyɔŋmɔ lɛ, jɔɔ bo yɛ nɔ fɛɛ nɔ ni atsu lɛ mli.

19 “Feemɔ otsina kɛ otoo kromɔbi fɛɛ kromɔbi ni ji nuu lɛ krɔŋkrɔŋ ohã Yehowa, o-Nyɔŋmɔ lɛ.+ Okɛ otsina* kromɔbi lɛ akatsu nitsumɔ ko nitsumɔ ko, ni kaaku otoo kromɔbi hu hetsɔi. 20 Bo kɛ oshĩabii lɛ aye yɛ Yehowa, o-Nyɔŋmɔ lɛ, hiɛ daa afi, yɛ he ni Yehowa baahala lɛ.+ 21 Shi kɛ́ kpa ko yɛ ehe lɛ—akpake ni jio, shwilamɔ ni jio, aloo kpa kroko ni ehiii kwraa jio—okɛkashã afɔle ohã Yehowa, o-Nyɔŋmɔ lɛ.+ 22 Ye yɛ omaji* lɛ amli, tamɔ adowa loo baayelɔ nɔŋŋ, mɔ ni he tseee kɛ mɔ ni he tse fɛɛ baanyɛ aye.+ 23 Shi kaaye elá lɛ;+ tsi oshwie shikpɔŋ tamɔ nu.+

16 “Kaimɔ Abib* nyɔɔŋ lɛ, ní oye Hehoo lɛ ohã Yehowa, o-Nyɔŋmɔ lɛ,+ ejaakɛ Abib nyɔɔŋ lɛ nɔ Yehowa, o-Nyɔŋmɔ lɛ, jie bo nyɔɔŋ mli kɛje Ejipt.+ 2 Ni gbee Hehoo afɔle kooloo lɛ ohã Yehowa, o-Nyɔŋmɔ lɛ,+ too kɛ tsina,+ yɛ he ni Yehowa baahala koni ehã egbɛ́i lɛ ahi jɛmɛ lɛ.+ 3 Okɛ ashikishaŋ-sha* nii ko kwraa akafata he kɛye;+ ejaakɛ esa akɛ oye blodo ni ashikishaŋ-sha bɛ mli, ni ji nɔnaa blodo lɛ gbii kpawo, ejaakɛ oyaiyeli okɛshi Ejipt shikpɔŋ lɛ nɔ.+ Feemɔ enɛ, koni owala gbii abɔ fɛɛ lɛ, okai gbi ni okɛshi Ejipt shikpɔŋ lɛ nɔ lɛ.+ 4 Akana ashikishaŋ-sha* ko ashikishaŋ-sha ko yɛ oshikpɔŋ lɛ nɔ fɛɛ gbii kpawo,+ ni kooloo ni okɛbaashã afɔle yɛ klɛŋklɛŋ gbi lɛ gbɛkɛ mli lɛ hu, kaashi eloo lɛ eko nyɔɔŋ muu lɛ fɛɛ kɛyashi enɔ leebi.+ 5 Aŋmɛŋ bo gbɛ ni ogbe Hehoo afɔle kooloo lɛ yɛ maji ni Yehowa, o-Nyɔŋmɔ lɛ, kɛhãa bo lɛ eko fɛɛ eko kɛkɛ mli. 6 Shi agbe kooloo lɛ yɛ he ni Yehowa, o-Nyɔŋmɔ lɛ, baahala koni ehã egbɛ́i lɛ ahi jɛmɛ lɛ. Gbee Hehoo afɔle kooloo lɛ gbɛkɛ mli kɛ́ hulu lɛ nyɔ shi nɔŋŋ,+ yɛ be ni ato ni okɛshi Ejipt lɛ naa. 7 Okɛ la ashã ni oye+ yɛ he ni Yehowa, o-Nyɔŋmɔ lɛ baahala lɛ,+ ni leebi mli lɛ, obaanyɛ oku osɛɛ kɛya bo diɛŋtsɛ omama tsũi lɛ amli. 8 Gbii ekpaa oye blodo ni ashikishaŋ-sha* bɛ mli, ni gbi ni ji kpawo lɛ nɔ lɛ, afee henaabuamɔ krɔŋkrɔŋ ahã Yehowa, o-Nyɔŋmɔ lɛ. Kaatsu nitsumɔ ko nitsumɔ ko.+

9 “Kanemɔ otsii kpawo. Bɔimɔ otsii kpawo lɛ kanemɔ kɛjɛ klɛŋklɛŋ be ni okɛ nikpamɔ kakla baawo oŋmaa ni yɔɔ ŋmɔ mli lɛ amli lɛ nɔ.+ 10 Ni okɛ odɛŋ nikeenii ni ojɛ osuɔmɔ mli okɛba yɛ bɔ ni Yehowa, o-Nyɔŋmɔ lɛ, ejɔɔ bo ehã lɛ naa+ lɛ aye Otsii Agbi Jurɔ lɛ ohã Yehowa, o-Nyɔŋmɔ lɛ.+ 11 Ni omii ashɛ ohe yɛ Yehowa, o-Nyɔŋmɔ lɛ hiɛ, yɛ he ni Yehowa, o-Nyɔŋmɔ lɛ, baahala koni ehã egbɛ́i lɛ ahi jɛmɛ lɛ, bo kɛ obinuu kɛ obiyoo kɛ onyɔŋ nuu kɛ onyɔŋ yoo kɛ Levinyo ni yɔɔ omaji* lɛ amli kɛ gbɔ kɛ gbekɛ ni bɛ tsɛ* kɛ yoo okulafo ni yɔɔ nyɛteŋ lɛ fɛɛ.+ 12 Kaimɔ akɛ bo hu oyatsɔ nyɔŋ yɛ Ejipt,+ ní ojwɛŋ nɛkɛ taomɔ nii nɛɛ anɔ, ní oye nɔ.

13 “Kɛ́ obua nibii anaa kɛjɛ oŋmaagbeemɔhe lɛ kɛ bui ni oŋaa mu kɛ wain yɛ mli lɛ amli lɛ, ye Agbai Agbi Jurɔ+ lɛ gbii kpawo. 14 Omii ashɛ ohe yɛ ogbijurɔyeli be lɛ mli,+ bo kɛ obinuu kɛ obiyoo kɛ onyɔŋ nuu kɛ onyɔŋ yoo kɛ Levinyo kɛ gbɔ kɛ gbekɛ ni bɛ tsɛ* kɛ yoo okulafo ni yɔɔ omaji lɛ amli lɛ. 15 Ye gbi jurɔ lɛ gbii kpawo+ ohã Yehowa, o-Nyɔŋmɔ lɛ, yɛ he ni Yehowa baahala lɛ, ejaakɛ Yehowa, o-Nyɔŋmɔ lɛ, baajɔɔ onibaa nii fɛɛ kɛ nɔ fɛɛ nɔ ni ofeɔ lɛ nɔ,+ ni omii baashɛ ohe jogbaŋŋ diɛŋtsɛ.+

16 “Daa afi lɛ, ohii lɛ fɛɛ abapue yɛ Yehowa, o-Nyɔŋmɔ lɛ, hiɛ shii etɛ yɛ he ni ebaahala lɛ: yɛ Blodo Ni Ashikishaŋ-sha* Bɛ Mli Gbi Jurɔ+ lɛ kɛ Otsii Agbi Jurɔ+ lɛ kɛ Agbai Agbi Jurɔ+ lɛ shishi, ni amɛteŋ mɔ ko mɔ ko akabapue yɛ Yehowa hiɛ kɛ edɛ̃ folo. 17 Nikeenii ni nyɛteŋ mɔ fɛɛ mɔ kɛbaaba lɛ, ekɛba yɛ bɔ ni Yehowa, o-Nyɔŋmɔ lɛ, ejɔɔ lɛ ehã lɛ naa.+

18 “Holemɔ kojolɔi+ kɛ nɔkwɛlɔi kɛhã weku fɛɛ weku yɛ maji* fɛɛ ni Yehowa, o-Nyɔŋmɔ lɛ, kɛhãa bo lɛ amli, ni amɛkɛ jalɛ kojomɔ akojo maŋbii lɛ. 19 Kaatsɔ jalɛ sane hiɛ obu shi,+ kaakwɛ hiɛiaŋ,+ ni kaahe nyɔɔŋnii hu, ejaakɛ nyɔɔŋnii shwilaa hiɛshikalɔi ahiŋmɛii,+ ni ehãa jalɔi wieɔ wiemɔi ni ejaaa. 20 Jalɛ sane—jalɛ sane sɛɛ otiu,+ koni okã he ohi wala mli ni oyaŋɔ shikpɔŋ ni Yehowa, o-Nyɔŋmɔ lɛ, kɛhãa bo lɛ.

21 “Kaadu* tso ko tso ko akɛ wɔŋ tso*+ yɛ Yehowa, o-Nyɔŋmɔ lɛ, afɔleshaa latɛ ni obaama ohã ohe lɛ masɛi.

22 “Ni okɛ wɔŋ tɛ ko hu akama shi ohã ohe,+ nɔ ni Yehowa, o-Nyɔŋmɔ lɛ, nyɛɔ lɛ.

17 “Okɛ tsina loo too ni kpa ko loo nɔ ko fɔŋ yɔɔ ehe akashã afɔle ohã Yehowa, o-Nyɔŋmɔ lɛ, ejaakɛ Yehowa, o-Nyɔŋmɔ lɛ miihi no.+

2 “Kɛ́ eba lɛ akɛ ana nuu ko loo yoo ko yɛ nyɛteŋ yɛ omaji ni Yehowa, o-Nyɔŋmɔ lɛ, kɛhãa bo lɛ eko mli, ní eefee nɔ ko gbonyo yɛ Yehowa, o-Nyɔŋmɔ lɛ hiɛ, ni eeku ekpaŋmɔ lɛ mli,+ 3 ni egbá afã ni eyajá nyɔŋmɔi krokomɛi, ni ekoto amɛ loo ekoto hulu lɛ loo nyɔɔŋtsere lɛ loo ŋwɛi asraafoi lɛ fɛɛ lɛ,+ nɔ ko ni mifãko akɛ afee.+ 4 Kɛ́ abakɛɛ bo loo onu he lɛ, no lɛ, taomɔ sane lɛ mli fitsofitso. Kɛ́ oná nɔmimaa akɛ afee nihiinii nɛɛ yɛ Israel lɛɛlɛŋ lɛ,+ 5 no lɛ, okɛ nuu lɛ loo yoo lɛ ni fee nɛkɛ nɔ fɔŋ nɛɛ aje kpo kɛya maŋ lɛ agbói lɛ anaa, ni ayatswia nuu lɛ loo yoo lɛ tɛi ni egbo.+ 6 Odasefoi enyɔ loo odasefoi etɛ awiemɔ* naa lɛ,+ agbe mɔ ni sa gbele lɛ. Akagbe lɛ yɛ odasefonyo kome pɛ odaseyeli naa.+ 7 Odasefoi lɛ klɛŋklɛŋ atswia lɛ tɛi koni agbe lɛ, no sɛɛ lɛ, maŋbii lɛ fɛɛ atswia lɛ tɛi. Jiemɔ nɔ fɔŋ kɛje nyɛteŋ.+

8 “Kɛ́ sane ko ba yɛ omaji lɛ eko mli ni sane lɛ yeli wa tsɔ kɛhã bo lɛ, kɛ́ eji sane ni kɔɔ lashishwiemɔ+ loo nɔ ko ni asama mɔ ko yɛ he loo yiwalɛ nifeemɔ ko loo naataamɔ he saji krokomɛi ahe lɛ, no lɛ, tee shi ni oya he ni Yehowa, o-Nyɔŋmɔ lɛ, ehala lɛ.+ 9 Yaa osɔfoi ni ji Levibii lɛ kɛ kojolɔ+ ni sɔmɔɔ yɛ nakai gbii lɛ amli lɛ aŋɔɔ, ní oyabi amɛ, ni amɛ amɛbaakojo sane lɛ amɛhã bo.+ 10 No sɛɛ lɛ, okɛ bɔ ni amɛbaakojo sane lɛ amɛhã bo kɛjɛ he ni Yehowa ehala lɛ atsu nii. Kwɛmɔ jogbaŋŋ ni ofee nɔ fɛɛ nɔ ni amɛbaatsɔɔ bo lɛ pɛpɛɛpɛ. 11 Nyiɛmɔ mla ni amɛkɛbaatsɔɔ bo kɛ bɔ ni amɛbaakojo sane lɛ amɛhã bo lɛ sɛɛ pɛpɛɛpɛ.+ Kaaje bɔ ni amɛbaakojo sane lɛ amɛhã bo lɛ he kɛmiiya ninejurɔ loo abɛku.+ 12 Mɔ ni baaye etsuinaa sane ní eboŋ osɔfo ni sɔmɔɔ Yehowa, o-Nyɔŋmɔ lɛ, loo kojolɔ lɛ toi lɛ, agbe lɛ.+ Jiemɔ nɔ fɔŋ kɛje Israel.+ 13 Maŋbii lɛ fɛɛ baanu ni amɛbaashe gbeyei, ni amɛyeŋ amɛtsuinaa sane dɔŋŋ.+

14 “Kɛ́ otee shikpɔŋ ni Yehowa, o-Nyɔŋmɔ lɛ, kɛhãa bo lɛ nɔ, ni oyaŋɔ shikpɔŋ lɛ ni ohi nɔ, ni okɛɛ akɛ, ‘Hã mawó maŋtsɛ yɛ minɔ tamɔ jeŋmaji fɛɛ ni bɔle mi lɛ feɔ lɛ,’+ 15 no lɛ, bɔ fɛɛ bɔ ni fee lɛ, wó mɔ ni Yehowa, o-Nyɔŋmɔ lɛ, baahala lɛ lɛ maŋtsɛ.+ Wó maŋtsɛ lɛ kɛjɛ onyɛmimɛi lɛ ateŋ. Obɛ hegbɛ akɛ owóɔ gbɔ ni jeee Israelnyo lɛ maŋtsɛ yɛ onɔ. 16 Shi maŋtsɛ lɛ akabua okpɔŋɔi babaoo anaa ehã ehe,+ ni ekahã maŋ lɛ ku amɛsɛɛ kɛtee Ejipt akɛ amɛyaatao okpɔŋɔi babaoo,+ ejaakɛ Yehowa ekɛɛ nyɛ akɛ, ‘Nyɛkakua nyɛsɛɛ kɛyatsɔa nɛkɛ gbɛ nɛɛ nɔ dɔŋŋ.’ 17 Agbɛnɛ hu, ekaŋɔ ŋamɛi pii ehã ehe koni etsui akagbá afã;+ ni ekabua jwiɛtɛi kɛ shika tsuru babaoo hu naa ehã ehe.+ 18 Kɛ́ ebata emaŋtsɛyeli sɛi lɛ nɔ lɛ, ekwɛ Mla nɛɛ ni ayaŋɔ kɛjɛ osɔfoi ni ji Levibii lɛ adɛŋ lɛ nɔ,+ ní eŋma eko yɛ wolo* mli ehã lɛ diɛŋtsɛ ehe.

19 “Wolo lɛ ahi eŋɔɔ, ni ekane ewala gbii abɔ fɛɛ,+ koni ekase Yehowa, e-Nyɔŋmɔ lɛ, gbeyeishemɔ, ní eye Mla nɛɛ mli wiemɔi lɛ fɛɛ kɛ taomɔ nii nɛɛ anɔ ni ekɛtsu nii.+ 20 Kɛkɛ lɛ, etsui wóŋ ehe nɔ yɛ enyɛmimɛi lɛ anɔ, ni egbáŋ afã kɛjeŋ kitã lɛ he kɛyaŋ ninejurɔ loo abɛku, koni ewala sɛɛ atsɛ yɛ emaŋtsɛyeli lɛ mli, lɛ kɛ ebihii, yɛ Israel teŋ.

18 “Levi osɔfoi lɛ kɛ Levi weku muu lɛ fɛɛ lɛ, ahãŋ amɛ gbɛfaŋnɔ loo gboshinii ko yɛ Israel. Amɛbaaye afɔlei ni akɛ la shãa ahãa Yehowa, ni ji egboshinii lɛ eko.+ 2 No hewɔ lɛ, amɛkaná gboshinii ko yɛ amɛnyɛmimɛi lɛ ateŋ. Yehowa ji amɛgboshinii, tamɔ bɔ ni ekɛɛ amɛ lɛ pɛpɛɛpɛ.

3 “Agbɛnɛ, nɔ ni baafee osɔfoi lɛ agbɛnaa nii ni jɛ maŋbii lɛ adɛŋ nɛ: Mɔ fɛɛ mɔ ni baashã afɔle lɛ, tsina jio, too jio, ekɛ kɔɔŋ lɛ kɛ kadai lɛ kɛ musuŋ kotoku lɛ ahã osɔfo lɛ. 4 Okɛ oŋmaa kɛ owain hee kɛ omu klɛŋklɛŋ yibii lɛ kɛ otoi lɛ ahetsɔi ni obaaku klɛŋklɛŋ lɛ ahã lɛ.+ 5 Yehowa, o-Nyɔŋmɔ lɛ, ehala lɛ kɛ ebihii lɛ kɛjɛ owekui lɛ fɛɛ ateŋ koni amɛsɔmɔ yɛ Yehowa gbɛ́i lɛ mli daa.+

6 “Shi kɛji Levinyo ko shi omaji ni yɔɔ Israel lɛ ateŋ eko mli, he ni eyɔɔ lɛ,+ ni eeshwe* ni eya he ni Yehowa ehala* lɛ,+ 7 no lɛ, ebaanyɛ esɔmɔ yɛ jɛmɛ yɛ Yehowa, e-Nyɔŋmɔ lɛ, gbɛ́i lɛ mli, tamɔ bɔ ni enyɛmimɛi Levibii lɛ fɛɛ ni sɔmɔɔ yɛ jɛmɛ yɛ Yehowa hiɛ lɛ feɔ lɛ nɔŋŋ.+ 8 Ekɛ amɛ fɛɛ aná niyenii falɛ pɛpɛɛpɛ,+ kɛfata nɔ ni ebaaná kɛjɛ etsɛmɛi anibii ni ehɔ̃ɔ lɛ mli lɛ he.

9 “Kɛ́ otee shikpɔŋ ni Yehowa, o-Nyɔŋmɔ lɛ, kɛhãa bo lɛ nɔ lɛ, kaakase nifeemɔi ni yɔɔ nyaŋemɔ ni nakai jeŋmaji lɛ feɔ lɛ.+ 10 Akana mɔ ko yɛ nyɛteŋ ni hãa ebinuu loo ebiyoo tsɔɔ la mli,+ aloo mɔ ni klaa,+ aloo mɔ ni feɔ majik,+ aloo mɔ ni biɔ nii,*+ aloo mɔ ni yeɔ ŋkunyaa,+ 11 aloo mɔ ni tsuɔ mɛi tsofa,* aloo mɔ ni yaa mumɔi atsɛlɔ+ loo klamɔfonyo* ŋɔɔ,+ aloo mɔ ni biɔ gbohii anii.+ 12 Ejaakɛ Yehowa miihi mɔ fɛɛ mɔ ni feɔ nɛkɛ nibii nɛɛ, ni nifeemɔi ni yɔɔ nyaŋemɔ nɛɛ ahewɔ Yehowa, o-Nyɔŋmɔ lɛ, shwieɔ amɛ kɛjeɔ ohiɛ lɛ. 13 Kaahã shwamɔ ko hi ohe yɛ Yehowa, o-Nyɔŋmɔ lɛ hiɛ.+

14 “Ejaakɛ jeŋmaji nɛɛ ni oyaa oyashwie amɛ lɛ boɔ nakai mɛi ni feɔ majik+ kɛ mɛi ni klaa lɛ toi,+ shi Yehowa, o-Nyɔŋmɔ lɛ, eŋmɛɛɛ bo gbɛ ni ofee nɔ ko ni tamɔ nakai. 15 Yehowa, o-Nyɔŋmɔ lɛ, baawó gbalɔ ko ni tamɔ mi kɛbaajɛ onyɛmimɛi lɛ ateŋ ehã bo. Nyɛboa lɛ toi.+ 16 Nɔ ni obi Yehowa, o-Nyɔŋmɔ lɛ, yɛ Horeb, yɛ maŋ* lɛ henaabuamɔ gbi lɛ nɔ,+ be ni okɛɛ akɛ, ‘Kaahã minu Yehowa, mi-Nyɔŋmɔ lɛ, gbee loo mina la kpele nɛɛ dɔŋŋ koni mikagbo’+ lɛ hewɔ ebaafee enɛ lɛ. 17 Ni Yehowa kɛɛ mi akɛ, ‘Nɔ ni amɛwie lɛ hi. 18 Mawó gbalɔ ko ni tamɔ bo yɛ amɛnyɛmimɛi lɛ ateŋ mahã amɛ,+ ni mikɛ miwiemɔi lɛ baawo enaa,+ ni ebaawie nɔ fɛɛ nɔ ni mafã lɛ lɛ etsɔɔ amɛ.+ 19 Anɔkwa, mɔ ni booo miwiemɔi ni ebaawie yɛ migbɛ́i mli lɛ toi lɛ, mabi lɛ he sane.+

20 “‘Kɛ́ gbalɔ ko ye etsuinaa sane ni ewie wiemɔ ko yɛ migbɛ́i mli ní mifãko lɛ akɛ ewie, aloo ewie yɛ nyɔŋmɔi krokomɛi agbɛ́ii amli lɛ, agbe nakai gbalɔ lɛ.+ 21 Shi ekolɛ obaakɛɛ yɛ otsui mli akɛ: “Te wɔɔfee tɛŋŋ wɔle akɛ jeee Yehowa ni wie lɛ?” 22 Kɛ́ gbalɔ lɛ wie yɛ Yehowa gbɛ́i lɛ mli, ni wiemɔ lɛ baaa mli loo nɔ ni ekɛɛ ebaaba lɛ baaa lɛ, no lɛ, jeee Yehowa ni wie nakai wiemɔ lɛ. Gbalɔ lɛ diɛŋtsɛ ye etsuinaa sane ni ewie nakai wiemɔ lɛ. Kaashe lɛ gbeyei.’

19 “Kɛ́ Yehowa, o-Nyɔŋmɔ lɛ, kpãtã jeŋmaji ni Yehowa, o-Nyɔŋmɔ lɛ, kɛ amɛshikpɔŋ lɛ hãa bo lɛ ahiɛ, ni oshwie amɛ ni ohi amɛmaji lɛ kɛ amɛshĩai lɛ amli lɛ,+ 2 halamɔ maji etɛ oto yɛ oshikpɔŋ ni Yehowa, o-Nyɔŋmɔ lɛ, kɛhãa bo akɛ onɔ lɛ nɔ.+ 3 Jaa shikpɔŋ ni Yehowa, o-Nyɔŋmɔ lɛ, kɛhã bo akɛ onɔ lɛ mli etɛ, ni osaa gbɛjegbɛi lɛ koni mɔ fɛɛ mɔ ni baagbe mɔ ko lɛ ajo foi kɛya nakai maji lɛ ateŋ ekome mli.

4 “Agbɛnɛ, mɔ ko ni egbe gbɔmɔ ni baajo foi kɛya jɛmɛ bɔ ni afee ni eyi aná wala lɛ, nɔ ni esa akɛ afee yɛ he nɛ: Kɛ́ ejeee gbɛ etswa enyɛmi gbɔmɔ ko nɔ, ni jeee nyɛ ni enyɛɔ lɛ momo hewɔ;+ 5 tamɔ akɛ, ekɛ enyɛmi gbɔmɔ tee koo mli koni amɛyalɛ́ lai, ni ewó enine nɔ koni ekɛ lema lɛ afo tso, shi lema lɛ yitso lɛ fã yɛ tso lɛ he ni eyatswa enyɛmi gbɔmɔ lɛ ni egbo lɛ, no lɛ, mɔ ni gbe mɔ lɛ ajo foi kɛya maji nɛɛ ateŋ ekome mli koni eyi aná wala.+ 6 Kɛjeee nakai lɛ, lá he oweletɔlɔ+ lɛ baatiu mɔ ni egbe gbɔmɔ lɛ yɛ mlila naa,* ni ebaayanina lɛ ni ebaagbe lɛ, ejaakɛ gbɛ ni yaa maŋ lɛ mli lɛ jekɛ tsɔ. Shi akɛni jeee nyɛ enyɛɔ enyɛmi gbɔmɔ lɛ momo hewɔ lɛ, esaaa gbele.+ 7 No hewɔ ni mifãa bo akɛ: ‘Halamɔ maji etɛ oto’ lɛ.

8 “Kɛ́ Yehowa, o-Nyɔŋmɔ lɛ, lɛɛ ohusu lɛ mli tamɔ bɔ ni ekã otsɛmɛi lɛ kitã lɛ,+ ni ekɛ shikpɔŋ lɛ fɛɛ ni ewo shi akɛ ekɛbaahã otsɛmɛi lɛ hã bo lɛ+ 9 —kɛji oooye kitãi nɛɛ fɛɛ ni miwoɔ bo ŋmɛnɛ gbi nɛɛ anɔ pɛpɛɛpɛ, ní osumɔ Yehowa, o-Nyɔŋmɔ lɛ, ní onyiɛ egbɛi lɛ anɔ daa lɛ+—no lɛ, okɛ maji etɛ krokomɛi afata maji etɛ nɛɛ ahe.+ 10 Kɛ́ eba lɛ nakai lɛ, ashwieŋ mɔ ko ni efeko nɔ ko lá shi+ yɛ shikpɔŋ ni Yehowa, o-Nyɔŋmɔ lɛ, kɛhãa bo akɛ gboshinii lɛ nɔ, ni oyeŋ lá ko yi sɔ̃.+

11 “Shi kɛ́ mɔ ko nyɛɔ enyɛmi gbɔmɔ,+ ni etee ehe koni etutua lɛ, ni eye lɛ* awui waa ni egbo, ni mɔ lɛ jo foi kɛtee maji nɛɛ ateŋ ekome mli lɛ, 12 no lɛ, emaŋ lɛ mli onukpai lɛ atsu ni ayatsɛ lɛ kɛjɛ jɛmɛ kɛba, ní amɛtu lɛ amɛwo lá he oweletɔlɔ lɛ dɛŋ, ní egbo.+ 13 Kaana* lɛ mɔbɔ, jiemɔ mɔ ni efeko nɔ ko lɛ lá lɛ he sɔ̃ lɛ kɛje Israel,+ koni ahi ahã bo.

14 “Kɛ́ onine shɛ ogboshinii nɔ yɛ shikpɔŋ ni Yehowa, o-Nyɔŋmɔ lɛ, kɛhãa bo akɛ onɔ lɛ nɔ lɛ, kaatsi onaanyo husu kadimɔnɔ+ kɛje he ni blematsɛmɛi lɛ je husui lɛ yɛ lɛ.

15 “Odasefonyo kome akabu mɔ kroko fɔ* yɛ tɔmɔ loo esha ko ni mɔ lɛ efee lɛ hewɔ.+ Odasefoi enyɔ loo odasefoi etɛ awiemɔ* naa lɛ, sane lɛ ama shi.+ 16 Kɛ́ odasefonyo ko ni hiɛ jwɛŋmɔ fɔŋ ye odase eshi mɔ ko, ni ekɛ sane fɔ̃ mɔ lɛ nɔ akɛ etɔ̃ mla ko lɛ,+ 17 mɛi enyɔ ni kɛ amɛhe taa naa lɛ ayadamɔ Yehowa kɛ osɔfoi lɛ kɛ kojolɔi ni sɔmɔɔ yɛ nakai beiaŋ lɛ ahiɛ.+ 18 Kojolɔi lɛ atao sane lɛ mli fitsofitso,+ ni kɛ́ mɔ ni ye odase lɛ ji amale odasefonyo, ni sane ni efo efɔ̃ enyɛmi lɛ nɔ lɛ bɛ mli lɛ, 19 no lɛ, nyɛfea lɛ bɔ pɛ ni etsɔ ŋaa akɛ ebaafee enyɛmi lɛ,+ ni ojie nɔ fɔŋ lɛ kɛje nyɛteŋ.+ 20 Mɛi ni eshwɛ lɛ baanu ni amɛbaashe gbeyei, ni amɛfeŋ nɔ fɔŋ ko ni tamɔ nakai yɛ nyɛteŋ dɔŋŋ.+ 21 Kaana* mɔbɔ:+ Akɛ wala* ato wala* najiaŋ, hiŋmɛi yɛ hiŋmɛi najiaŋ, nyanyɔŋ yɛ nyanyɔŋ najiaŋ, nine yɛ nine najiaŋ, nane yɛ nane najiaŋ.*+

20 “Kɛ́ ooya ni okɛ ohenyɛlɔi ayawu ta, ni ona akɛ amɛkpɔŋɔi kɛ amɛshwiilii kɛ amɛsraafoi lɛ ayi fa fe onɔ lɛ, kaashe amɛ gbeyei, ejaakɛ Yehowa, o-Nyɔŋmɔ lɛ, ní jie bo kɛje Ejipt shikpɔŋ lɛ nɔ lɛ kɛ bo yɛ.+ 2 Kɛ́ nyɛmiiba nyɛbaje ta lɛ shishi lɛ, osɔfo lɛ atsi abɛŋkɛ maŋbii lɛ ni ekɛ amɛ awie.+ 3 Osɔfo lɛ akɛɛ amɛ akɛ, ‘Bo toi, Israel, nyɛmiiba ni nyɛkɛ nyɛhenyɛlɔi abawu. Nyɛtsui akafãa. Nyɛkashea gbeyei, nyɛkahãa ŋmiŋmi mɔmɔa nyɛ, ni nyɛhe akakpokpoa yɛ amɛhewɔ, 4 ejaakɛ Yehowa, nyɛ-Nyɔŋmɔ lɛ, kɛ nyɛ nyiɛ koni ekɛ nyɛhenyɛlɔi lɛ awu ahã nyɛ, ní ehere nyɛ.’+

5 “Nɔkwɛlɔi lɛ hu akɛɛ maŋbii lɛ akɛ, ‘Namɔ ema shĩa hee ni egbeleko naa? Eku esɛɛ kɛya eshĩa lɛ. Kɛjeee nakai lɛ, ekolɛ ebaayagbo yɛ ta lɛ mli ni mɔ kroko baayagbele shĩa lɛ naa. 6 Ni namɔ efee wain ŋmɔ ni ebɔiko emli yibii lɛ kpamɔ? Eku esɛɛ kɛya eshĩa. Kɛjeee nakai lɛ, ekolɛ ebaayagbo yɛ ta lɛ mli ni mɔ kroko baabɔi emli yibii lɛ kpamɔ. 7 Ni namɔ ebi yoo ko shi kɛhã gbalashihilɛ,* shi ekɛ lɛ boteko gbalashihilɛ mli? Eku esɛɛ kɛya eshĩa.+ Kɛjeee nakai lɛ, ekolɛ ebaayagbo yɛ ta lɛ mli ni nuu kroko kɛ yoo lɛ baabote gbalashihilɛ mli.’ 8 Agbɛnɛ hu, nɔkwɛlɔi lɛ abi maŋbii lɛ akɛ, ‘Namɔ sheɔ gbeyei ni etsui efã?+ Eku esɛɛ kɛya eshĩa, koni ekahã enyɛmimɛi lɛ atsui miifã tamɔ bɔ ni etsui efã lɛ.’*+ 9 Kɛ́ nɔkwɛlɔi lɛ kɛ maŋbii lɛ wie amɛgbe naa lɛ, amɛhala tatsɛmɛi amɛto asraafoi lɛ anɔ koni amɛnyiɛ maŋ lɛ hiɛ.

10 “Kɛ́ obɛŋkɛ maŋ ko koni okɛ lɛ awu ta lɛ, okɛ lɛ awie toiŋjɔlɛ kpaŋmɔ hu he dã.+ 11 Kɛ́ ehã bo naajɔlɛ hetoo ni egbele bo lɛ, no lɛ, mɛi fɛɛ ni abaana yɛ jɛmɛ lɛ baatsɔmɔ mɛi ni abaanyɛ amɛnɔ ní amɛtsu nii amɛhã bo, ni amɛbaasɔmɔ bo.+ 12 Shi kɛ́ esumɔɔɔ ni ekɛ bo akpaŋ toiŋjɔlɛ kpaŋmɔ, shi moŋ, eesumɔ ní ekɛ bo awu lɛ, no lɛ, wo he ka, 13 ni bɔ fɛɛ bɔ ni fee lɛ, Yehowa, o-Nyɔŋmɔ lɛ, kɛ lɛ baawo odɛŋ, ni okɛ klante agbe hii fɛɛ ni yɔɔ mli lɛ. 14 Shi yei kɛ gbekɛbii kɛ lɛɛ kooloi kɛ nɔ fɛɛ nɔ ni yɔɔ maŋ lɛ mli, ni ji maŋ lɛ mli ta mli nii lɛ fɛɛ lɛ, obaanyɛ oloo ohã ohe,+ ní oye ohenyɛlɔi lɛ anibii ni Yehowa, o-Nyɔŋmɔ lɛ, kɛhã bo lɛ.+

15 “Nakai ji bɔ ni ofee maji fɛɛ ni kɛ bo teŋ jekɛ waa, ní jeee jeŋmaji ni bɔle bo nɛɛ ateŋ maji lɛ eko lɛ. 16 Shi kaahã nɔ ko nɔ ko ni muɔ lɛ hi wala mli yɛ gbɔmɛi nɛɛ amaji ni Yehowa, o-Nyɔŋmɔ lɛ, kɛhãa bo akɛ ogboshinii lɛ amli.+ 17 Shi moŋ, kpatamɔ Hitbii lɛ kɛ Amorbii lɛ kɛ Kanaanbii lɛ kɛ Perizbii lɛ kɛ Hivbii lɛ kɛ Yebusbii lɛ ahiɛ kwraa,+ tamɔ bɔ ni Yehowa, o-Nyɔŋmɔ lɛ, fã bo lɛ pɛpɛɛpɛ; 18 koni amɛkatsɔɔ nyɛ nibii fɛɛ ni yɔɔ nyaŋemɔ ni amɛfeɔ amɛhãa amɛnyɔŋmɔi lɛ feemɔ, ní no hã nyɛfee esha nyɛshi Yehowa, nyɛ-Nyɔŋmɔ lɛ.+

19 “Kɛ́ okɛ maŋ ko miiwu ni owo maŋ lɛ he ka gbii babaoo koni oŋɔ maŋ lɛ, kaadɔ lema oto tsei ni yɔɔ jɛmɛ lɛ anɔ ni okɛkpãtã amɛhiɛ. Obaanyɛ oye amɛnɔ yibii lɛ eko, shi kaafolɔ oshwie shi.+ Ani obaawo ŋa mli tso he ka tamɔ owoɔ gbɔmɔ he ka lɛ? 20 Tso ni ole akɛ ayeee eyibii lɛ, no kɛkɛ hiɛ obaanyɛ okpãtã. Obaanyɛ ofo tso lɛ ofɔ̃ shi ni okɛfee kawoo afabaŋ owo maŋ ni kɛ bo wuɔ ta lɛ he, kɛyashi be ni maŋ lɛ baagbee shi.

21 “Kɛ́ ana mɔ ko ni agbe lɛ afɔ̃ ŋa nɔ yɛ shikpɔŋ ni Yehowa, o-Nyɔŋmɔ lɛ, kɛhãa bo akɛ onɔ lɛ nɔ, ni aleee mɔ ni gbe lɛ lɛ, 2 no lɛ, omaŋ onukpai lɛ kɛ kojolɔi+ lɛ aje kpo ni amɛyasusu kɛjɛ gbonyo lɛ he kɛya maji ni bɔle jɛmɛ lɛ amli. 3 Kɛkɛ lɛ, maŋ ni bɛŋkɛ gbonyo lɛ fe fɛɛ lɛ mli onukpai lɛ amɔ tsinayoo* ní akɛ lɛ tsuko nii dã, ní awoko lɛ kɔɔŋtso kɛgbalako nɔ ko pɛŋ yɛ tsinai lɛ ateŋ, 4 ni nakai maŋ lɛ mli onukpai lɛ akpala tsinayoo* lɛ kɛya jɔɔ* ni nu hoɔ yɛ mli, ní ahuko loo aduko nɔ* ko yɛ jɛmɛ dã lɛ mli, ni amɛku tsinayoo* lɛ kuɛ yɛ jɛmɛ, yɛ jɔɔ lɛ mli.+

5 “Ni osɔfoi lɛ, ni ji Levibii lɛ atsi abɛŋkɛ, ejaakɛ Yehowa, o-Nyɔŋmɔ lɛ, ehala amɛ koni amɛsɔmɔ lɛ,+ ní amɛjɔɔ mɛi yɛ Yehowa gbɛ́i lɛ mli.+ Amɛ amɛbaatsɔɔ bɔ ni esa akɛ atsu naataamɔ fɛɛ naataamɔ ni kɔɔ awuiyeli he lɛ he nii ahã.+ 6 Ni maŋ ni bɛŋkɛ gbonyo lɛ fe fɛɛ lɛ mli onukpai lɛ fɛɛ afɔfɔɔ amɛdɛ̃+ amɛshwie tsinayoo* ni aku ekuɛ yɛ jɔɔ lɛ mli lɛ nɔ, 7 ní amɛjaje akɛ, ‘Jeee wɔniji shwie lá nɛɛ shi, ni wɔhiŋmɛii hu enaaa be ni ashwie lá lɛ shi lɛ. 8 Yehowa, okɛ enɛ he sɔ̃ lɛ akatere omaŋ Israel, mɛi ni okpɔ̃ lɛ,+ ni kaahã mɔ ni efeko nɔ ko lɛ lá lɛ he sɔ̃ lɛ hi omaŋ Israel teŋ.’+ Kɛkɛ lɛ, akɛ lá lɛ he sɔ̃ lɛ tereŋ amɛ. 9 Nɛkɛ gbɛ nɔ otsɔ ofee nɔ ni ja yɛ Yehowa hiɛ, ní ojie mɔ ni efeko nɔ ko lɛ lá lɛ he sɔ̃ lɛ kɛje nyɛteŋ.

10 “Kɛ́ ofã ta oshi ohenyɛlɔi, ni Yehowa, o-Nyɔŋmɔ lɛ, ye amɛnɔ kunim ehã bo, ni oŋɔ amɛ nom,+ 11 ni ona yoo fɛfɛo ko yɛ nomii lɛ ateŋ, ni oná ehe miishɛɛ, ni oosumɔ ni okɛ lɛ afee oŋa lɛ, 12 no lɛ, obaanyɛ okɛ lɛ aya oshĩa lɛ. Ni eshɛ eyi, ejie ewaobii anaa, 13 ní ejie atade ni ewo be ni aŋɔ lɛ nom lɛ, ni ehi oshĩa lɛ. Efó epapa kɛ emami nyɔɔŋ kome sɔŋŋ,+ ni no sɛɛ lɛ, obaanyɛ okɛ lɛ aná bɔlɛ; obaatsɔ ewu, ni lɛ hu ebaatsɔ oŋa. 14 Shi kɛ́ onáaa ehe miishɛɛ dɔŋŋ lɛ, no lɛ, hã eya+ he fɛɛ he ni esumɔɔ.* Shi kaahɔ̃ɔ lɛ ohe shika, ni kaafee lɛ niseniianii hu, ejaakɛ oshwie ehiɛ shi.

15 “Kɛji nuu ko yɛ ŋamɛi enyɔ, ni esumɔɔ mɔ kome fe mɔ kroko lɛ,* ni mɛi enyɔ lɛ fɛɛ efɔfɔɔ bihii amɛhã lɛ, ni yoo ni esumɔɔɔ lɛ binuu ji kromɔbi lɛ,+ 16 no lɛ, gbi ni ebaaja egboshinii ehã ebihii lɛ, aŋmɛŋ lɛ gbɛ ni ekɛ mɔ ni esumɔɔ lɛ binuu lɛ afee ekromɔbi yɛ mɔ ni esumɔɔɔ lɛ binuu ni ji kromɔbi lɛ najiaŋ. 17 Esa akɛ ebu mɔ ni esumɔɔɔ lɛ binuu lɛ akɛ kromɔbi, ní ehã lɛ nibii fɛɛ ni eyɔɔ lɛ amlijai toi enyɔ, ejaakɛ lɛ ji efɔmɔ hewalɛ lɛ shishijee. Lɛ enɔ ji kromɔbi gbɛnaa lɛ.+

18 “Kɛji nuu ko yɛ binuu kuɛŋtilɔ kɛ atuatselɔ, ni ebooo epapa loo emami toi,+ ni amɛbɔ mɔdɛŋ aahu akɛ amɛbaajaje lɛ, shi ebooo amɛ toi lɛ,+ 19 no lɛ, epapa kɛ emami amɔ lɛ ni amɛkɛ lɛ aje kpo kɛya onukpai lɛ aŋɔɔ yɛ emaŋ lɛ agbó lɛ naa 20 ní amɛkɛɛ emaŋ lɛ mli onukpai lɛ akɛ, ‘Wɔbi nɛɛ, kuɛŋtilɔ kɛ atuatselɔ ni, ni ebooo wɔ toi. Fufeelɔ+ kɛ dãatɔlɔ+ ji lɛ.’ 21 Ni emaŋ lɛ mli hii lɛ fɛɛ atswia lɛ tɛi ni egbo. Nɛkɛ gbɛ nɔ otsɔ ojie nɔ fɔŋ kɛje nyɛteŋ, ni Israel fɛɛ baanu ni amɛbaashe gbeyei.+

22 “Kɛji mɔ ko fee esha ko ni biɔ ni abu lɛ gbele fɔ, ni agbe lɛ,+ ni osɛŋ lɛ yɛ tso jaŋŋ nɔ lɛ,+ 23 egbonyo lɛ akahi tso jaŋŋ lɛ nɔ jenamɔ muu fɛɛ.+ Shi moŋ, kwɛmɔ ni afu lɛ yɛ nakai gbi lɛ nɔ, ejaakɛ mɔ ni asɛŋ lɛ lɛ ji Nyɔŋmɔ loomɔ nɔ,+ ni kaabule shikpɔŋ ni Yehowa, o-Nyɔŋmɔ lɛ, kɛhãa bo akɛ gboshinii lɛ.+

22 “Kɛ́ ona onyɛmi tsina loo too ni edu gbɛ lɛ, kaaje gbɛ oku ohiɛ ofɔ̃ nɔ.+ Bɔ fɛɛ bɔ ni fee lɛ, kpalamɔ lɛ kɛku sɛɛ oyahã onyɛmi lɛ. 2 Shi kɛji he ni onyɛmi lɛ yɔɔ lɛ bɛŋkɛɛɛ bo loo oleee lɛ lɛ, no lɛ, okɛ kooloo lɛ aba oshĩa lɛ, ni eya nɔ ehi oŋɔɔ kɛyashi onyɛmi lɛ aaabatao lɛ. Ni okɛ lɛ aku sɛɛ ahã lɛ.+ 3 Nakai nɔŋŋ ofee onyɛmi teji kɛ etade* kɛ nɔ fɛɛ nɔ ni eyɔɔ ni elaaje ni ooona lɛ. Kaaku ohiɛ ofɔ̃ nɔ.

4 “Kɛ́ ona onyɛmi teji loo etsina ni egbee shi yɛ gbɛ nɔ lɛ, kaaje gbɛ oku ohiɛ ofɔ̃ enɔ. Bɔ fɛɛ bɔ ni fee lɛ, wa lɛ ni ewo kooloo lɛ nɔ.+

5 “Yoo akawo nuu atade, ni nuu hu akawo yoo atade. Ejaakɛ Yehowa, o-Nyɔŋmɔ lɛ, miihi mɔ fɛɛ mɔ ni feɔ nakai.

6 “Kɛ́ onyiɛ gbɛ nɔ ni ona loofɔlɔ tsũ ko, yɛ tso nɔ jio, shikpɔŋ jio, ni loofɔlɔ bii loo wɔji yɛ mli, ni loofɔlɔ nyɛ lɛ bu bii lɛ loo wɔji lɛ anɔ lɛ, no lɛ, kaamɔ nyɛ lɛ kɛ ebii lɛ fɛɛ.+ 7 Kwɛmɔ ni oŋmɛɛ nyɛ lɛ he ni eya, shi obaanyɛ omɔmɔ bii lɛ ohã ohe. Feemɔ enɛ koni ahi ahã bo, ní owala sɛɛ atsɛ.

8 “Kɛ́ oma shĩa hee lɛ, foo afabaŋ* hu owo tsũ lɛ yiteŋ,+ koni mɔ ko akajɛ jɛmɛ ebagbee shi ni okɛ lá yi sɔ̃yeli ba oshĩa lɛ nɔ.

9 “Kaadu dumɔwui srɔtoi enyɔ yɛ owain ŋmɔ mli.+ Kɛjeee nakai lɛ, nɔ fɛɛ nɔ ni dumɔwu ni odu lɛ baawo, kɛ wain ŋmɔ lɛ mli nibaa nii lɛ fɛɛ baaŋmɛɛ bo, ni abaatu ahã jamɔhe lɛ.

10 “Kaatsa tsina kɛ teji fɛɛ okɛhu.+

11 “Kaawo atade ni akɛ kooloo hetsɔi kɛ klala futu kɛfee.+

12 “Feemɔ amanyai wuji owo mama ni obuɔ* lɛ koji ejwɛ lɛ fɛɛ.+

13 “Kɛ́ nuu ko ŋɔ yoo ko akɛ eŋa ni ekɛ lɛ ná bɔlɛ, shi no sɛɛ lɛ ehe bɔi yoo lɛ tsɛ̃mɔ,* 14 ni ekɛ sane fɔ̃ yoo lɛ nɔ akɛ ebaaa ejeŋ jogbaŋŋ, ni ekɛfite egbɛ́i ekɛɛ: ‘Miŋɔ yoo nɛɛ, shi be ni mikɛ lɛ ná bɔlɛ lɛ, minaaa nɔ ko ni tsɔɔ akɛ oblayoo fro ji lɛ’ lɛ, 15 no lɛ, yoo lɛ papa kɛ emami kɛ odaseyeli ni tsɔɔ akɛ oblayoo lɛ ji oblayoo fro lɛ ayahã onukpai lɛ yɛ maŋ lɛ agbó lɛ naa. 16 Oblayoo lɛ papa lɛ akɛɛ onukpai lɛ akɛ, ‘Mikɛ mibiyoo lɛ hã nuu nɛɛ akɛ eŋa, shi ehe miitsɛ̃* mibiyoo lɛ 17 ni ekɛ sane efɔ̃ enɔ akɛ: “Mina akɛ, nɔ ko bɛ obiyoo lɛ he ni tsɔɔ akɛ oblayoo fro ji lɛ.” Naa odaseyeli ni tsɔɔ akɛ mibiyoo lɛ ji oblayoo fro.’ No sɛɛ lɛ, amɛlɛɛ mama lɛ mli yɛ maŋ lɛ mli onukpai lɛ ahiɛ. 18 Maŋ lɛ mli onukpai+ lɛ amɔ nuu lɛ, ní amɛtsɔse lɛ.+ 19 Amɛhe lɛ jwiɛtɛi shekeli* 100 ní amɛkɛhã oblayoo lɛ tsɛ lɛ, ejaakɛ efite Israel oblayoo fro gbɛ́i,+ ni oblayoo lɛ akã he afee eŋa. Ebɛ hegbɛ ni eshwieɔ lɛ,* gbii abɔ fɛɛ ni lɛ nuu lɛ, eyɔɔ wala mli lɛ.

20 “Shi kɛji sane ni akɛfɔ̃ yoo lɛ nɔ lɛ yɛ mli, ni odaseyeli ko bɛ ni tsɔɔ akɛ oblayoo lɛ ji oblayoo fro lɛ, 21 no lɛ, amɛkɛ oblayoo lɛ aje kpo kɛba epapa shĩa lɛ agbó lɛ naa, ní emaŋ lɛ mli hii lɛ atswia lɛ tɛi ni egbo, ejaakɛ efee hiɛgbejianii+ yɛ Israel akɛni ebɔ ajwamaŋ* be ni eyɔɔ epapa shĩa lolo lɛ hewɔ.+ Nɛkɛ gbɛ nɔ otsɔ ojie nɔ fɔŋ kɛje nyɛteŋ.+

22 “Kɛ́ ana nuu ko ni kɛ yoo ko ni ji nuu kroko ŋa miiwɔ* lɛ, amɛyi enyɔ lɛ fɛɛ lɛ, esa akɛ amɛgboi, nuu lɛ ni kɛ yoo lɛ wɔ* lɛ kɛ yoo lɛ fɛɛ.+ Nɛkɛ gbɛ nɔ otsɔ ojie nɔ fɔŋ kɛje nyɛteŋ.

23 “Kɛ́ nuu ko ebi oblayoo fro ko shi kɛhã gbalashihilɛ,* ni nuu kroko kɛ lɛ kpe yɛ maŋ lɛ mli ni ekɛ lɛ wɔ* lɛ, 24 no lɛ, nyɛkɛ amɛyi enyɔ lɛ fɛɛ ajea kpo kɛyaa nakai maŋ lɛ agbó lɛ naa ní nyɛyatswiaa amɛ tɛi ni amɛgboi, nyɛtswiaa oblayoo lɛ tɛi ejaakɛ ebolɔɔɔ yɛ maŋ lɛ mli, kɛ nuu lɛ hu, ejaakɛ efite enaanyo nuu ŋa.+ Nɛkɛ gbɛ nɔ otsɔ ojie nɔ fɔŋ kɛje nyɛteŋ.

25 “Shi kɛji nuu lɛ kɛ oblayoo ni abi eshi kɛhã gbalashihilɛ lɛ kpe yɛ ŋa mli, ni nuu lɛ mɔ oblayoo lɛ akrana naa ni ekɛ lɛ wɔ* lɛ, no lɛ, nuu lɛ ni kɛ oblayoo lɛ wɔ* lɛ kome pɛ agbo, 26 ni kaafee oblayoo lɛ nɔ ko. Oblayoo lɛ efeko esha ko ni sa gbele. Bɔ ni mɔ ko tutuaa enyɛmi gbɔmɔ ni egbeɔ lɛ* lɛ, nakai nɔŋŋ sane nɛɛ ji.+ 27 Ejaakɛ ŋa mli ekɛ oblayoo ni abi eshi kɛhã gbalashihilɛ* lɛ kpe yɛ, ni oblayoo lɛ bolɔ, shi mɔ ko mɔ ko bɛ ni baahere lɛ.

28 “Kɛ́ nuu ko kɛ oblayoo fro ko ní abiko eshi kɛhã gbalashihilɛ* kpe, ni emɔ lɛ ni ekɛ lɛ wɔ* ni ana amɛ lɛ,+ 29 no lɛ, nuu lɛ ni kɛ oblayoo lɛ wɔ* lɛ ahã oblayoo lɛ papa jwiɛtɛi shekeli 50, ní oblayoo lɛ atsɔ eŋa.+ Akɛni efite oblayoo lɛ hewɔ lɛ, ebɛ hegbɛ akɛ eshwieɔ lɛ,* gbii abɔ fɛɛ ni lɛ nuu lɛ, eyɔɔ wala mli lɛ.

30 “Nuu ko akaŋɔ epapa ŋa, koni ekashwie epapa hiɛ shi.*+

23 “Nuu fɛɛ nuu ni ajwara edɔrɔ mli wui kɛsa lɛ loo afo enuutso kɛje nɔ lɛ akaba Yehowa asafo lɛ mli.+

2 “Ajwamaŋbi ko ajwamaŋbi ko akaba Yehowa asafo lɛ mli.+ Ni eseshibii lɛ ateŋ mɔ ko kwraa akaba Yehowa asafo lɛ mli, aahu kɛyashi yinɔ ni ji nyɔŋma lɛ po nɔ.

3 “Amonnyo loo Moabnyo ko akaba Yehowa asafo lɛ mli.+ Amɛseshibii lɛ ateŋ mɔ ko kwraa akaba Yehowa asafo lɛ mli gbi ko gbi ko, aahu kɛyashi yinɔ ni ji nyɔŋma lɛ po nɔ, 4 ejaakɛ amɛkɛ niyenii kɛ nu ebayeee amɛbuaaa nyɛ be ni nyɛjɛ Ejipt ni nyɛnyiɛ gbɛ lɛ nɔ kɛbaa lɛ,+ ni agbɛnɛ hu, akɛni amɛbɔ Bileam, ni ji Beor binuu ni jɛ Petor yɛ Mesopotamia lɛ apaa koni elomɔ bo* lɛ hewɔ.+ 5 Shi Yehowa, o-Nyɔŋmɔ lɛ, booo Bileam toi.+ Shi moŋ, Yehowa, o-Nyɔŋmɔ lɛ, tsake loomɔ lɛ ni etsɔ lɛ jɔɔmɔ ehã bo,+ ejaakɛ Yehowa, o-Nyɔŋmɔ lɛ, sumɔɔ bo.+ 6 Kaatao amɛhilɛkɛhamɔ loo amɛshweremɔ owala gbii abɔ fɛɛ.+

7 “Kaanyɛ Edomnyo, ejaakɛ onyɛmi ni.+

“Kaanyɛ Ejiptnyo hu, ejaakɛ oyatsɔ gbɔ yɛ emaŋ lɛ mli.+ 8 Bii ni abaafɔ ahã amɛ lɛ ayinɔ ni ji etɛ nɔ lɛ baanyɛ aba Yehowa asafo lɛ mli.

9 “Kɛ́ oyabɔ nsara owo ohenyɛlɔi lɛ, tsi ohe kɛje nɔ fɔŋ fɛɛ nɔ fɔŋ he.*+ 10 Kɛ́ nuu ko he tseee yɛ nu ko ni je ehe nyɔɔŋ mli lɛ hewɔ lɛ,+ eje kpo yɛ nsara lɛ mli, ni ekaku esɛɛ kɛba nsara lɛ mli. 11 Gbɛkɛnaashi mli lɛ, ekɛ nu aju ehe, ni no sɛɛ lɛ, ebaanyɛ eku esɛɛ kɛba nsara lɛ mli be ni hulu enyɔ shi.+ 12 Ato he ko banee* kɛhã niiasɛɛyaa yɛ nsara lɛ sɛɛ, ní oya jɛmɛ. 13 Hiɛmɔ sɔsɔo* ofata odɛŋdadei lɛ ahe. Kɛ́ oyasɔ̃ shi yɛ nsara lɛ sɛɛ lɛ, okɛtsa shi, ni no sɛɛ lɛ, otsĩ owamɔ lɛ nɔ. 14 Ejaakɛ Yehowa, o-Nyɔŋmɔ lɛ, nyiɛ onsara lɛ mli+ koni ejie bo ní ekɛ ohenyɛlɔi lɛ awo odɛŋ, ni esa akɛ onsara lɛ mli afee krɔŋkrɔŋ,+ koni ekana hiɛgbejianii ko yɛ oteŋ ní eje osɛɛ.

15 “Kɛ́ nyɔŋ ko jo foi kɛjɛ enuŋtsɔ ŋɔɔ ni eba oŋɔɔ lɛ, okɛ lɛ akahã enuŋtsɔ lɛ. 16 Ebaanyɛ ehi nyɛteŋ yɛ he fɛɛ he ni ebaahala yɛ omaji lɛ amli, he fɛɛ he ni esumɔɔ. Kaafee lɛ niseniianii.+

17 “Israel biyei lɛ ateŋ mɔ ko kwraa akatsɔ jamɔhe ashawo,+ ni Israel bihii lɛ hu ateŋ mɔ ko kwraa akatsɔ jamɔhe ashawo.+ 18 Okɛ ashawo yoo ko nyɔmɔwoo loo ashawo nuu* ko nyɔmɔwoo* akaba Yehowa, o-Nyɔŋmɔ lɛ, shĩa lɛ ní okɛbahã yɛ shi ko ni owo lɛ hewɔ, ejaakɛ Yehowa, o-Nyɔŋmɔ lɛ, miihi nibii enyɔ nɛɛ fɛɛ.

19 “Kaahe nɔ ko he kpa yɛ onyɛmi dɛŋ,+ shika he kpa jio, niyenii he kpa jio, loo nɔ fɛɛ nɔ ni abaanyɛ ahe he kpa yɛ he jio. 20 Obaanyɛ ohe he kpa yɛ gbɔ dɛŋ,+ shi kaahe he kpa yɛ onyɛmi dɛŋ,+ koni Yehowa, o-Nyɔŋmɔ lɛ, ajɔɔ bo yɛ nɔ fɛɛ nɔ ni oootsu lɛ mli yɛ shikpɔŋ ni oyaa oyaŋɔ akɛ onɔ lɛ nɔ.+

21 “Kɛ́ owo Yehowa, o-Nyɔŋmɔ lɛ shi lɛ,+ kaahã osɛɛ miitsɛ kɛ enɔyeli.+ Ejaakɛ bɔ fɛɛ bɔ ni fee lɛ, Yehowa, o-Nyɔŋmɔ lɛ, baabi shi yɛ odɛŋ; kɛ́ ofeee nakai lɛ, no baatsɔ esha ehã bo.+ 22 Shi kɛ́ owooo shi lɛ, oyeŋ fɔ yɛ esha ko hewɔ.+ 23 Ye wiemɔ ni je onaa lɛ nɔ,+ ni ye nɔ ni okɛ bo diɛŋtsɛ onaabu wo shi akɛ obaajɛ osuɔmɔ mli okɛhã Yehowa, o-Nyɔŋmɔ lɛ nɔ.+

24 “Kɛ́ otee onaanyo wain ŋmɔ mli lɛ, obaanyɛ oye wain yibii lɛ bɔ ni osumɔɔ ní otɔ,* shi okɛ eko kwraa akawo onii* amli.+

25 “Kɛ́ otee onaanyo ŋmaa* ŋmɔ mli lɛ, obaanyɛ okɛ onine akumɔ nɔ ni eshɛ yeli lɛ eko, shi okɛ nikpamɔ kakla akawo onaanyo lɛ ŋmaa lɛ mli.+

24 “Kɛ́ nuu ko kɛ yoo ko bote gbalashihilɛ mli, shi enáaa yoo lɛ he miishɛɛ dɔŋŋ akɛni ena hiɛgbejianii ko yɛ yoo lɛ he hewɔ lɛ, no lɛ, eŋma gbalatsemɔ* wolo ehã yoo lɛ,+ ekɛwo edɛŋ, ní eshwie lɛ kɛje eshĩa lɛ.+ 2 Kɛ́ eshi nuu lɛ shĩa etee lɛ, ebaanyɛ eyatsɔ nuu kroko ŋa.+ 3 Kɛ́ nuu ni ji enyɔ nɔ lɛ he tsɛ̃* yoo lɛ ni eŋma gbalatsemɔ* wolo ehã lɛ, ekɛwo edɛŋ, ni eshwie lɛ kɛje eshĩa lɛ, aloo kɛ́ nuu ni ji enyɔ nɔ ní kɛ lɛ bote gbalashihilɛ mli lɛ gbo lɛ, 4 no lɛ, aŋmɛŋ yoo lɛ klɛŋklɛŋ wu ni shwie lɛ lɛ gbɛ ní eŋɔ lɛ ekoŋŋ akɛ eŋa be ni abule yoo lɛ sɛɛ, ejaakɛ Yehowa miihi no. Okɛ esha akaba shikpɔŋ ni Yehowa, o-Nyɔŋmɔ lɛ, kɛhãa bo akɛ gboshinii lɛ nɔ.

5 “Kɛ́ nuu ko bote gbalashihilɛ mli ehee lɛ, akahã ekɛ ehe wo asraafoi anitsumɔ mli, ni akahã etsu nitsumɔi krokomɛi hu. Ahã eye ehe afi kome, ni ehi shĩa ni ehã eŋa lɛ mii ashɛ ehe.+

6 “Mɔ ko akahe wiɛtɛ loo ewiɛbi akɛ awaba* kɛhã nɔ ko ni abafa,+ ejaakɛ kɛ́ efee nakai lɛ, belɛ eehe nɔ ni hãa mɔ ko náa edaaŋ ŋmaa lɛ* yɛ edɛŋ akɛ awaba.

7 “Kɛ́ ana mɔ ko ni eju enyɛmimɛi Israelbii lɛ ateŋ mɔ* ko, ni efee lɛ niseniianii ni ehɔ̃ɔ lɛ lɛ,+ no lɛ, esa akɛ mɔ ni ju gbɔmɔ lɛ agbo.+ Jiemɔ nɔ fɔŋ kɛje nyɛteŋ.+

8 “Kɛ́ kpiti* hela ba lɛ, kwɛmɔ jogbaŋŋ ni ofee nɔ fɛɛ nɔ ni osɔfoi ni ji Levibii lɛ baatsɔɔ nyɛ lɛ.+ Nyɛkwɛa ni nyɛfea bɔ ni mifã amɛ lɛ pɛpɛɛpɛ. 9 Kaimɔ nɔ ni Yehowa, o-Nyɔŋmɔ lɛ, fee Miriam yɛ gbɛ lɛ nɔ, be ni nyɛjɛ Ejipt nyɛbaa lɛ.+

10 “Kɛ́ okɛ nɔ ko fa onaanyo ko lɛ,+ kaabote eshĩa mli ní oyashɔ̃ nɔ ni ekɛmiito awaba lɛ yɛ edɛŋ. 11 Daamɔ kpo lɛ nɔ, ní mɔ ni okɛ nii lɛ fa lɛ lɛ kɛ nɔ ni ekɛtoɔ awaba lɛ aje kpo abahã bo yɛ kpo lɛ nɔ. 12 Ni kɛ́ efĩ mɔ lɛ, kaayawɔ be mli ni nɔ ni ekɛto awaba lɛ kã he eyɛ odɛŋ.+ 13 Bɔ fɛɛ bɔ ni fee lɛ, okɛ nɔ ni ekɛto awaba lɛ aku sɛɛ ayahã lɛ kɛ́ hulu nyɔ shi nɔŋŋ, ni ekɛ emama* lɛ baayawɔ,+ ni ebaajɔɔ bo; ni no baatsɔ jalɛ ahã bo yɛ Yehowa, o-Nyɔŋmɔ lɛ hiɛ.

14 “Kaashishiu apaafonyo ohiafo ni efĩ lɛ, onyɛmimɛi lɛ ateŋ mɔ ko jio, gbɔ ni yɔɔ oshikpɔŋ lɛ nɔ yɛ omaji* lɛ amli lɛ eko jio.+ 15 Wo lɛ nyɔmɔ nakai gbi lɛ nɔŋŋ dani hulu anyɔ shi,+ ejaakɛ efĩ lɛ ni enyɔmɔwoo lɛ nɔ ewala* damɔ. Kɛjeee nakai lɛ, ebaabolɔ etsɛ Yehowa ewo bo, ni no baatsɔ esha ehã bo.+

16 “Akagbe tsɛmɛi yɛ amɛbii anifeemɔ hewɔ, ni akagbe bii yɛ amɛtsɛmɛi anifeemɔ hewɔ.+ Mɔ fɛɛ mɔ lɛ, lɛ diɛŋtsɛ ehe esha hewɔ agbe lɛ.+

17 “Kaatsɔ gbɔ loo gbekɛ ni bɛ tsɛ* sane hiɛ obu shi yɛ kojomɔ mli,+ ni kaashɔ̃ yoo okulafo mama* yɛ edɛŋ akɛ awaba* kɛhã nɔ ko ni ebafa.+ 18 Kaimɔ akɛ bo hu oyatsɔ nyɔŋ yɛ Ejipt, ni Yehowa, o-Nyɔŋmɔ lɛ, kpɔ̃ bo kɛje jɛmɛ.+ No hewɔ ni mifãa bo akɛ ofee enɛ lɛ.

19 “Kɛ́ okpa onibaa nii yɛ oŋmɔ mli, ni ohiɛ kpa ŋmaa ke kome nɔ yɛ ŋmɔ lɛ mli lɛ, kaaku osɛɛ otee ní oyawó. Shi ohã gbɔ kɛ gbekɛ ni bɛ tsɛ kɛ yoo okulafo,+ koni Yehowa, o-Nyɔŋmɔ lɛ, ajɔɔ bo yɛ nɔ fɛɛ nɔ ni ofeɔ lɛ mli.+

20 “Kɛ́ okpala* oliv tso ni oyɔɔ lɛ nɔ yibii lɛ, kaaku osɛɛ oyakpala eniji lɛ anɔ yibii lɛ. Shi nɔ ni baashwɛ lɛ ohã gbɔ kɛ gbekɛ ni bɛ tsɛ kɛ yoo okulafo.+

21 “Kɛ́ otse wain yibii ni yɔɔ owain ŋmɔ mli lɛ, kaaku osɛɛ oyatserɛ nɔ ni shwɛ lɛ. Shi ohã gbɔ kɛ gbekɛ ni bɛ tsɛ kɛ yoo okulafo. 22 Kaimɔ akɛ bo hu oyatsɔ nyɔŋ yɛ Ejipt shikpɔŋ lɛ nɔ. No hewɔ ni mifãa bo akɛ ofee enɛ lɛ.

25 “Kɛji naataamɔ ko te shi yɛ mɛi ateŋ lɛ, amɛya kojolɔi lɛ aŋɔɔ+ ni amɛkojo amɛteŋ, ní amɛbu jalɔ lɛ bem ní amɛbu efɔŋfeelɔ lɛ fɔ.+ 2 Kɛ́ efɔŋfeelɔ lɛ sa gwaomɔ lɛ,+ no lɛ, kojolɔ lɛ ahã ebu shi shwɛtɛɛ, ní agwao lɛ yɛ ehiɛ. Atswa lɛ kpãi lɛ yɛ efɔŋ ni efee lɛ naa. 3 Atswa lɛ kpãi lɛ, kɛ́ efa aahu lɛ 40,+ ekateke nɔ. Kɛ́ atee nɔ atswa lɛ kpãi ni fe enɛ lɛ, no lɛ, onyɛmi lɛ hiɛ baashwie shi yɛ ohiɛ.

4 “Kaawo tsina naabu kotoku be ni eegbee ŋmaa.*+

5 “Kɛji nyɛmimɛi hi shi yɛ he kome ni amɛteŋ mɔ kome gbo ni ebɛ binuu lɛ, no lɛ, mɔ ni egbo lɛ ŋa lɛ kɛ mɔ ko ni jɛɛɛ weku lɛ mli akabote gbalashihilɛ mli. Ewu lɛ nyɛmi nuu aya eŋɔɔ, eŋɔ lɛ akɛ eŋa, ní etsu egbɛnaa nii akɛ wu nyɛmi nuu lɛ he nii ehã lɛ.*+ 6 Kromɔbi ni yoo lɛ baafɔ lɛ baahiɛ nuu ni egbo lɛ gbɛ́i lɛ,+ koni akagbe egbɛ́i kɛje Israel.+

7 “Shi kɛ́ nuu lɛ sumɔɔɔ akɛ ekɛ enyɛmi nuu lɛ ŋa lɛ boteɔ gbalashihilɛ mli lɛ, no lɛ, enyɛmi nuu lɛ ŋa lɛ aya onukpai lɛ aŋɔɔ yɛ maŋ lɛ agbó lɛ naa ni eyakɛɛ akɛ, ‘Miwu lɛ nyɛmi nuu lɛ sumɔɔɔ akɛ ebaa enyɛmi nuu lɛ gbɛ́i lɛ yi yɛ Israel. Ekpɛlɛɛɛ ni etsuɔ egbɛnaa nii akɛ wu nyɛmi nuu lɛ he nii ehãa mi.’ 8 Emaŋ lɛ mli onukpai lɛ atsɛ lɛ ni amɛkɛ lɛ awie. Ni kɛ́ ema nɔ mi doo akɛ, ‘Misumɔɔɔ ni mikɛ lɛ boteɔ gbalashihilɛ mli’ lɛ, 9 no lɛ, nuu lɛ nyɛmi nuu lɛ ŋa lɛ atsi abɛŋkɛ lɛ yɛ onukpai lɛ ahiɛ, ejie nuu lɛ tokota yɛ enane,+ efɛ̃ lajɔ̃ eshwie ehiɛ, ní ekɛɛ akɛ, ‘Nɛkɛ ji bɔ ni sa akɛ afee nuu ni etswaaa enyɛmi nuu shĩa emaaa shi lɛ.’ 10 Enɛ sɛɛ lɛ, gbɛ́i ni akɛbaatsɛ eweku* lɛ yɛ Israel ji, ‘Mɔ ni ajie etokota lɛ shĩa.’

11 “Kɛji hii enyɔ miinɔ, ni amɛteŋ mɔ kome ŋa ba koni ebahere ewu lɛ kɛjɛ mɔ ni yiɔ lɛ lɛ dɛŋ, ni yoo lɛ kpã enine mli ni emɔ mɔ lɛ nuutso lɛ, 12 no lɛ, foo yoo lɛ nine. Kaana* lɛ mɔbɔ.

13 “Kaahiɛ nsɛni tɛi srɔtoi enyɔ yɛ obaagi mli,+ agbo kome kɛ bibioo kome. 14 Kaahiɛ susumɔnii srɔtoi enyɔ yɛ oshĩa,*+ agbo kome kɛ bibioo kome. 15 Hiɛmɔ nsɛni tɛ ni ja ni eye emuu, kɛ susumɔnɔ ni ja ni shɛɔ pɛpɛɛpɛ, koni owala sɛɛ atsɛ yɛ shikpɔŋ ni Yehowa, o-Nyɔŋmɔ lɛ, kɛhãa bo lɛ nɔ.+ 16 Ejaakɛ mɔ fɛɛ mɔ ni ejaaa ni feɔ nɛkɛ nibii nɛɛ, Yehowa, o-Nyɔŋmɔ lɛ, miihi lɛ.+

17 “Kaimɔ nɔ ni Amalek fee bo yɛ gbɛ lɛ nɔ be ni nyɛjɛ Ejipt nyɛbaa lɛ,+ 18 bɔ ni ekɛ bo bakpe yɛ gbɛ lɛ nɔ, ní etutua mɛi ni nyiɛ osɛɛgbɛ blɛooblɛoo lɛ, be ni etɔ bo bliboo ní ofee gbedee lɛ. Esheee Nyɔŋmɔ gbeyei. 19 Kɛ́ Yehowa, o-Nyɔŋmɔ lɛ, hã ohe jɔ bo kɛjɛ ohenyɛlɔi fɛɛ ni bɔle bo lɛ adɛŋ, yɛ shikpɔŋ ni Yehowa, o-Nyɔŋmɔ lɛ, kɛhãa bo akɛ gboshinii koni etsɔ onɔ lɛ nɔ lɛ,+ no lɛ, kpatamɔ Amalek hiɛ, koni akakai lɛ dɔŋŋ yɛ ŋwɛi shishi.+ Ohiɛ akakpa nɔ.

26 “Kɛ́ oná oyashɛ shikpɔŋ ni Yehowa, o-Nyɔŋmɔ lɛ, kɛhãa bo akɛ gboshinii lɛ nɔ, ni oŋɔ akɛ onɔ, ni ohi nɔ lɛ, 2 jiemɔ shikpɔŋ lɛ nɔ nibaa nii* lɛ fɛɛ mli klɛŋklɛŋ yibii ni obaakpa yɛ oshikpɔŋ ni Yehowa, o-Nyɔŋmɔ lɛ, kɛhãa bo lɛ nɔ lɛ eko, ní okɛwo kɛntɛŋ mli ní oya he ni Yehowa, o-Nyɔŋmɔ lɛ, baahala koni ehã egbɛ́i lɛ ahi jɛmɛ lɛ.+ 3 Yaa osɔfo ni sɔmɔɔ yɛ nakai gbii lɛ amli lɛ ŋɔɔ ní oyakɛɛ lɛ akɛ, ‘Ŋmɛnɛ lɛ, miikɛɛ Yehowa, o-Nyɔŋmɔ lɛ akɛ, miná mibashɛ shikpɔŋ ni Yehowa kã wɔtsɛmɛi lɛ kitã akɛ ekɛbaahã wɔ lɛ nɔ.’+

4 “Kɛkɛ lɛ, osɔfo lɛ baahe kɛntɛŋ lɛ yɛ odɛŋ ní ekɛma Yehowa, o-Nyɔŋmɔ lɛ, afɔleshaa latɛ lɛ hiɛ. 5 Ni owie yɛ Yehowa, o-Nyɔŋmɔ lɛ hiɛ akɛ, ‘Aramnyo+ ni tsomlo kɛnyiɛ* ji mipapa, ni ekpeleke shi kɛtee Ejipt+ ni eyahi jɛmɛ akɛ gbɔ, lɛ kɛ eshĩabii fioo ko.+ Shi etsɔ maŋ kpeteŋkpele ni he wa, ni yi fa yɛ jɛmɛ.+ 6 Ni Ejiptbii lɛ fee wɔ niseniianii ni amɛwa wɔ yi ni amɛye wɔ nyɔŋ waa.+ 7 Enɛ hewɔ lɛ, wɔbɔi bolɔmɔ kɛ Yehowa, wɔtsɛmɛi a-Nyɔŋmɔ lɛ tsɛmɔ, ni Yehowa nu wɔgbee, ni ekwɛ wɔmanehulu kɛ wɔhaomɔ kɛ wɔyi ni awaa lɛ.+ 8 Naagbee lɛ, Yehowa kɛ nineshiwalɛ kɛ nine ni akpã mli+ kɛ nifeemɔi ni yɔɔ gbeyei kɛ okadii kɛ naakpɛɛ nii jie wɔ kɛje Ejipt.+ 9 Ni ekɛ wɔ ba biɛ nɛɛ, ni ekɛ shikpɔŋ nɛɛ hã wɔ, shikpɔŋ ni mliki kɛ wo hoɔ yɛ nɔ lɛ.+ 10 Agbɛnɛ, mikɛ shikpɔŋ ni Yehowa kɛhã mi lɛ nɔ nibaa nii lɛ amli klɛŋklɛŋ yibii lɛ eba.’+

“Okɛma Yehowa, o-Nyɔŋmɔ lɛ hiɛ, ní okoto shi yɛ Yehowa, o-Nyɔŋmɔ lɛ hiɛ. 11 Ni omii ashɛ ohe yɛ nibii kpakpai fɛɛ ni Yehowa, o-Nyɔŋmɔ lɛ, kɛdro bo kɛ oshĩabii lɛ hewɔ, bo kɛ Levinyo kɛ gbɔ ni yɔɔ nyɛteŋ lɛ.+

12 “Kɛ́ ojie onibaa nii lɛ amlijai nyɔŋma mli ekomekomei+ lɛ fɛɛ yɛ afi ni ji etɛ, ni ji mlijai nyɔŋma mli ekomekome afi lɛ mli ogbe naa lɛ, okɛhã Levinyo kɛ gbɔ kɛ gbekɛ ni bɛ tsɛ* kɛ yoo okulafo, ní amɛye amɛtɔrɔ yɛ omaji* lɛ amli.+ 13 Ni owie yɛ Yehowa, o-Nyɔŋmɔ lɛ hiɛ akɛ, ‘Mijie gbɛfaŋnɔ krɔŋkrɔŋ lɛ kɛje mishĩa lɛ, ni mikɛhã Levinyo kɛ gbɔ kɛ gbekɛ ni bɛ tsɛ* kɛ yoo okulafo,+ tamɔ bɔ ni ofã mi lɛ pɛpɛɛpɛ. Mikuko okitãi lɛ amli, ni mikuko mihiɛ mishwieko nɔ hu. 14 Miyeko eko be ni miiye awerɛho, ni mijieko eko be ni mihe tseee, ni mikɛ eko hu hãko yɛ gbohii ahewɔ. Mibo Yehowa, mi-Nyɔŋmɔ lɛ, gbee toi, ni mifee nɔ fɛɛ nɔ ni ofã mi lɛ. 15 Agbɛnɛ, jɛɛ ŋwɛi ni ji oshihilɛhe krɔŋkrɔŋ lɛ okwɛ, ní ojɔɔ omaŋ Israel kɛ shikpɔŋ ni okɛhã wɔ lɛ,+ shikpɔŋ ni mliki kɛ wo hoɔ yɛ nɔ lɛ,+ tamɔ bɔ ni okã wɔtsɛmɛi lɛ kitã lɛ.’+

16 “Ŋmɛnɛ gbi nɛɛ, Yehowa, o-Nyɔŋmɔ lɛ, miifã bo ni oye taomɔ nii kɛ yiŋkpɛi* nɛɛ anɔ. Okɛ otsui fɛɛ kɛ osusuma* fɛɛ abo toi ní oye nɔ.+ 17 Ŋmɛnɛ gbi nɛɛ, onine eshɛ Yehowa wiemɔ nɔ akɛ, ebaatsɔ o-Nyɔŋmɔ, kɛji onyiɛ egbɛi lɛ anɔ ni oye etaomɔ nii+ kɛ ekitãi+ kɛ eyiŋkpɛi* lɛ anɔ,+ ni obo egbee toi lɛ. 18 Ni ŋmɛnɛ gbi nɛɛ, Yehowa nine eshɛ owiemɔ nɔ akɛ, obaatsɔ emaŋ, enii ni eshwɛɛɛ he kwraa,+ tamɔ bɔ ni ewo bo shi lɛ, ni akɛ, obaaye ekitãi lɛ fɛɛ anɔ, 19 ni ewo shi akɛ, ebaawó onɔ gojoo fe jeŋmaji krokomɛi fɛɛ ni efee lɛ,+ ni ebaahã oná yijiemɔ kɛ gbɛ́i kɛ anunyam, kɛji ofee ohe maŋ krɔŋkrɔŋ ohã Yehowa, o-Nyɔŋmɔ lɛ.”+

27 Ni Mose kɛ Israel onukpai lɛ fã maŋbii lɛ akɛ: “Nyɛyea kitã fɛɛ kitã ni miwoɔ nyɛ ŋmɛnɛ gbi nɛɛ nɔ. 2 Ni gbi ni nyɛbaafo Yordan lɛ kɛya shikpɔŋ ni Yehowa, o-Nyɔŋmɔ lɛ, kɛhãa bo lɛ nɔ lɛ, okɛ tɛi wuji amamɔ shi ni okɛ kaaloo afutu sũ kɛkpa he.*+ 3 Ni kɛ́ oná ofo faa lɛ, ŋmalamɔ Mla nɛɛ mli wiemɔi lɛ fɛɛ yɛ tɛi lɛ anɔ, koni oya shikpɔŋ ni Yehowa, o-Nyɔŋmɔ lɛ, kɛhãa bo lɛ nɔ, shikpɔŋ ni mliki kɛ wo hoɔ yɛ nɔ lɛ, tamɔ bɔ ni Yehowa, otsɛmɛi a-Nyɔŋmɔ lɛ, wo bo shi lɛ pɛpɛɛpɛ.+ 4 Kɛ́ nyɛfo Yordan lɛ, nyɛkɛ tɛi nɛɛ amamɔa shi yɛ Ebal Gɔŋ+ lɛ nɔ, ni okɛ kaaloo afutu sũ kɛkpa he,* tamɔ bɔ ni mifãa nyɛ ŋmɛnɛ gbi nɛɛ. 5 Agbɛnɛ hu, maa afɔleshaa latɛ yɛ jɛmɛ ohã Yehowa, o-Nyɔŋmɔ lɛ, tɛi afɔleshaa latɛ. Okɛ dade akasa tɛi lɛ ahe.+ 6 Okɛ tɛi muji ama Yehowa, o-Nyɔŋmɔ lɛ, afɔleshaa latɛ lɛ, ni oshã shãa afɔlei yɛ nɔ ohã Yehowa, o-Nyɔŋmɔ lɛ. 7 Okɛ naanyobɔɔ afɔlei+ ayahã yɛ jɛmɛ, ni oye yɛ jɛmɛ,+ ni omii ashɛ ohe yɛ Yehowa, o-Nyɔŋmɔ lɛ hiɛ.+ 8 Ni oŋmala Mla nɛɛ mli wiemɔi lɛ fɛɛ yɛ tɛi lɛ anɔ ní amɛje shi faŋŋ.”+

9 Ni Mose kɛ osɔfoi ni ji Levibii lɛ wie amɛtsɔɔ Israel fɛɛ akɛ: “Israel, feemɔ diŋŋ ni obo toi. Ŋmɛnɛ gbi nɛɛ, otsɔ Yehowa, o-Nyɔŋmɔ lɛ maŋ.+ 10 Bo Yehowa, o-Nyɔŋmɔ lɛ, gbee toi, ní oye ekitãi+ kɛ emlai ni miwoɔ bo* ŋmɛnɛ gbi nɛɛ anɔ.”

11 Nakai gbi lɛ, Mose fã maŋbii lɛ akɛ: 12 “Kɛji nyɛfo Yordan lɛ, wekui ni nyiɛ sɛɛ nɛɛ adamɔ Gerizim Gɔŋ+ lɛ nɔ ní amɛjɔɔ maŋbii lɛ: Simeon kɛ Levi kɛ Yuda kɛ Isakar kɛ Yosef kɛ Benyamin. 13 Ni wekui ni nyiɛ sɛɛ nɛɛ adamɔ Ebal Gɔŋ+ lɛ nɔ amɛjaje loomɔ lɛ amɛtsɔɔ: Ruben kɛ Gad kɛ Asher kɛ Zebulon kɛ Dan kɛ Naftali. 14 Ni Levibii lɛ kɛ gbee ni wa ahã Israelnyo fɛɛ Israelnyo hetoo+ akɛ:

15 “‘Alomɔ mɔ ni feɔ amaga ni agbɔ*+ loo dade amaga+ ko, ni ji ŋaalɔ* ninenaa nitsumɔ, ní ekɛteɔ lɛ, ejaakɛ Yehowa miihi no.’+ (Ni maŋbii lɛ fɛɛ ahere nɔ akɛ, ‘Amen!’*)

16 “‘Alomɔ mɔ ni ebuuu epapa loo emami ehãaa nɔ ko.’+ (Ni maŋbii lɛ fɛɛ akɛɛ akɛ, ‘Amen!’)

17 “‘Alomɔ mɔ ni tsiɔ enaanyo husu kadimɔnɔ kɛjeɔ he ni ema lɛ.’+ (Ni maŋbii lɛ fɛɛ akɛɛ akɛ, ‘Amen!’)

18 “‘Alomɔ mɔ ni hãa shwilafo duɔ gbɛ yɛ gbɛ nɔ.’+ (Ni maŋbii lɛ fɛɛ akɛɛ akɛ, ‘Amen!’)

19 “‘Alomɔ mɔ ni tsɔɔ gbɔ loo gbekɛ ni bɛ tsɛ* loo yoo okulafo+ sane hiɛ ebuɔ shi yɛ kojomɔ mli.’+ (Ni maŋbii lɛ fɛɛ akɛɛ akɛ, ‘Amen!’)

20 “‘Alomɔ mɔ ni kɛ epapa ŋa náa bɔlɛ,* ejaakɛ eshwie epapa hiɛ shi.’*+ (Ni maŋbii lɛ fɛɛ akɛɛ akɛ, ‘Amen!’)

21 “‘Alomɔ mɔ ni kɛ kooloo ko náa bɔlɛ.’*+ (Ni maŋbii lɛ fɛɛ akɛɛ akɛ, ‘Amen!’)

22 “‘Alomɔ mɔ ni kɛ enyɛmi yoo, ni ji epapa biyoo loo emami biyoo náa bɔlɛ.’*+ (Ni maŋbii lɛ fɛɛ akɛɛ akɛ, ‘Amen!’)

23 “‘Alomɔ mɔ ni kɛ eshaayoo náa bɔlɛ.’*+ (Ni maŋbii lɛ fɛɛ akɛɛ akɛ, ‘Amen!’)

24 “‘Alomɔ mɔ ni teɔ ehe ni egbeɔ enyɛmi gbɔmɔ.’+ (Ni maŋbii lɛ fɛɛ akɛɛ akɛ, ‘Amen!’)

25 “‘Alomɔ mɔ ni heɔ nyɔɔŋnii koni egbe mɔ ko ni efeko nɔ ko.’*+ (Ni maŋbii lɛ fɛɛ akɛɛ akɛ, ‘Amen!’)

26 “‘Alomɔ mɔ ni yeee Mla nɛɛ mli wiemɔi lɛ anɔ, ní ekɛ no tsɔɔ akɛ efiii sɛɛ lɛ.’+ (Ni maŋbii lɛ fɛɛ akɛɛ akɛ, ‘Amen!’)

28 “Ni kɛ́ obo Yehowa, o-Nyɔŋmɔ lɛ, gbee toi, ni oye ekitãi fɛɛ ni miwoɔ bo ŋmɛnɛ gbi nɛɛ anɔ jogbaŋŋ lɛ, no lɛ, bɔ fɛɛ bɔ ni fee lɛ, Yehowa, o-Nyɔŋmɔ lɛ, baawó onɔ gojoo fe shikpɔŋ lɛ nɔ jeŋmaji krokomɛi fɛɛ.+ 2 Jɔɔmɔi ni nyiɛ sɛɛ nɛɛ fɛɛ baaba onɔ ni amɛbaateke nɔ,+ ejaakɛ oyaa nɔ oboɔ Yehowa, o-Nyɔŋmɔ lɛ, gbee toi:

3 “Abaajɔɔ bo yɛ maŋ, ni abaajɔɔ bo yɛ ŋa nɔ.+

4 “Abaajɔɔ obii*+ kɛ oshikpɔŋ lɛ nɔ nibaa nii kɛ olɛɛ kooloi abii, otsinabii kɛ otoobii.+

5 “Abaajɔɔ okɛntɛŋ+ kɛ otsɛnsi ni okpɔtɔɔ ashikishaŋ yɛ mli.*+

6 “Abaajɔɔ bo kɛ́ oba shĩa, ni abaajɔɔ bo kɛ́ oje kpo.

7 “Yehowa baahã aye ohenyɛlɔi ni teɔ shi woɔ bo lɛ anɔ kunim yɛ ohiɛ.+ Amɛbaajɛ he kome amɛbatutua bo, shi amɛbaajo onaa foi kɛtsɔ hei srɔtoi kpawo.+ 8 Yehowa baafã jɔɔmɔ ni eba onitoohei+ kɛ onitsumɔi fɛɛ anɔ, ni bɔ fɛɛ bɔ ni fee lɛ, ebaajɔɔ bo yɛ shikpɔŋ ni Yehowa, o-Nyɔŋmɔ lɛ, kɛhãa bo lɛ nɔ. 9 Yehowa baahã otsɔ lɛ diɛŋtsɛ emaŋ krɔŋkrɔŋ,+ tamɔ bɔ ni ewo bo shi lɛ,+ ejaakɛ oyaa nɔ oboɔ Yehowa, o-Nyɔŋmɔ lɛ, kitãi lɛ toi ni onyiɛɔ egbɛi lɛ anɔ. 10 Shikpɔŋ lɛ nɔ maji lɛ fɛɛ baana akɛ Yehowa gbɛ́i lɛ kã onɔ,+ ni amɛbaashe bo gbeyei.+

11 “Yehowa baahã oná bii pii kɛ lɛɛ kooloi babaoo, ni oshikpɔŋ lɛ baaba nii babaoo+ yɛ shikpɔŋ ni Yehowa kã otsɛmɛi lɛ kitã akɛ ekɛbaahã bo lɛ nɔ.+ 12 Yehowa baagbele enitoohe kpakpa, ni ji ŋwɛi lɛ naa ehã bo, ni ebaahã nugbɔ anɛ oshikpɔŋ lɛ nɔ yɛ ebe mli,+ ni ebaajɔɔ nɔ fɛɛ nɔ ni ofeɔ lɛ nɔ. Okɛ onii baafa jeŋmaji babaoo, shi bo lɛ, oyafaŋ nɔ ko yɛ mɔ ko dɛŋ.+ 13 Kɛji otee nɔ obo Yehowa, o-Nyɔŋmɔ lɛ, kitãi ni miwoɔ bo ŋmɛnɛ gbi nɛɛ toi ni oye nɔ, ni okɛtsu nii lɛ, no lɛ, Yehowa baahã otsɔ yitso, shi jeee lei; ni obaakã yiteŋ,+ shi jeee shishi. 14 Kaagbá afã kɛje wiemɔi fɛɛ ni mijajeɔ mitsɔɔ bo ŋmɛnɛ gbi nɛɛ ahe kɛtee ninejurɔ loo abɛku,+ ní oyanyiɛ nyɔŋmɔi krokomɛi asɛɛ ni osɔmɔ amɛ.+

15 “Shi kɛ́ obooo Yehowa, o-Nyɔŋmɔ lɛ, gbee toi, ni oyeee ekitãi kɛ emlai fɛɛ ni miwoɔ bo ŋmɛnɛ gbi nɛɛ anɔ jogbaŋŋ lɛ, no lɛ, loomɔi ni nyiɛ sɛɛ nɛɛ fɛɛ baaba onɔ ni amɛbaateke nɔ:+

16 “Abaalomɔ bo yɛ maŋ, ni abaalomɔ bo yɛ ŋa nɔ.+

17 “Abaalomɔ okɛntɛŋ+ kɛ otsɛnsi ni okpɔtɔɔ ashikishaŋ yɛ mli.+

18 “Abaalomɔ obii*+ kɛ oshikpɔŋ lɛ nɔ nibaa nii kɛ otsinabii kɛ otoobii.+

19 “Abaalomɔ bo kɛ́ oba shĩa, ni abaalomɔ bo kɛ́ oje kpo.

20 “Yehowa baatsu loomɔ kɛ jijaamɔ kɛ toigbalamɔ kɛba onɔ yɛ nɔ fɛɛ nɔ ni otsuɔ lɛ mli kɛyashi ohiɛ baakpãtã oya ni otã kwraa, yɛ onifeemɔi gbohii kɛ kwa ni okwa mi lɛ hewɔ.+ 21 Yehowa baahã hela lɛ akpɛtɛ ohe kɛyashi ebaakpãtã ohiɛ kwraa kɛje shikpɔŋ ni oyaa oyaŋɔ lɛ nɔ.+ 22 Yehowa baahã wɔlɔmɔ fɔŋ kɛ atridii ni naa wa+ kɛ fuumɔ hela kɛ atridii ni hãa mɔ he dɔɔ waa kɛ klante+ kɛ jeŋ dɔlɛ ni hãa ŋmɔshi nibii ŋalaa kɛ hela ni hãa tsei gboiɔ+ aba onɔ; ni amɛbaatiu bo kɛyashi be ni ohiɛ baakpãtã. 23 Ŋwɛi ni yɔɔ oyiteŋ lɛ baatsɔ akɔɔble, ni shikpɔŋ ni yɔɔ oshishi lɛ baatsɔ dade.+ 24 Yehowa baahã nugbɔ ni baanɛ oshikpɔŋ lɛ nɔ lɛ atsɔ mulu kɛ shia, ebaajɛ ŋwɛi eshwie onɔ kɛyashi be ni ohiɛ baakpãtã. 25 Yehowa baahã aye onɔ kunim yɛ ohenyɛlɔi ahiɛ.+ Obaajɛ he kome otutua amɛ, shi obaajo amɛnaa foi kɛtsɔ hei srɔtoi kpawo; ni shikpɔŋ lɛ nɔ maŋtsɛyelii lɛ fɛɛ anaa baakpɛ amɛhe yɛ ohewɔ.+ 26 Ni ogbohii lɛ baatsɔ niyenii kɛhã ŋwɛi loofɔji fɛɛ kɛ shikpɔŋ lɛ nɔ kooloi, ni mɔ ko mɔ ko eshwieŋ amɛ.+

27 “Yehowa baahã Ejipt asanei lɛ atsɛ̃rɛ̃ bo, kookoo kɛ afei afee bo, ni kpala ashwie ohe, ni anyɛŋ bo atsa. 28 Yehowa baahã oye sɛkɛ, oshwila,+ ni ojijaa.* 29 Obaatatra shwane fintiŋŋ, tamɔ bɔ ni shwilafo tatraa yɛ duŋ mli lɛ,+ ni oyeŋ omanye yɛ nɔ fɛɛ nɔ ni ofeɔ lɛ mli; ni abaashishiu bo ni abaaju bo be fɛɛ be, ni onáŋ mɔ ko ahere bo.+ 30 Obaabi yoo shi kɛhã gbalashihilɛ,* shi nuu kroko baato lɛ kabonaa. Obaama shĩa, shi ohiŋ mli.+ Obaafee wain ŋmɔ, shi okpaŋ emli yibii.+ 31 Abaagbe otsina yɛ ohiɛ, shi oyeŋ eko kwraa. Abaaju oteji yɛ ohiɛ kpetekplee, shi onine shɛŋ nɔ dɔŋŋ. Akɛ otoi baahã ohenyɛlɔi, shi onáŋ mɔ ko ahere oyiwala. 32 Ookwɛ nɔŋŋ ni akɛ obihii kɛ obiyei baahã maŋ kroko,+ ni obaashwe amɛ be fɛɛ be, shi onyɛŋ nɔ ko ofee. 33 Maŋ ni oleee baaye oshikpɔŋ lɛ nɔ nibaa nii kɛ nɔ fɛɛ nɔ ni oná yɛ onitsumɔ mli,+ ni abaashishiu bo ni abaawa bo yi be fɛɛ be. 34 Nɔ ni ohiŋmɛii naa lɛ baahã oye sɛkɛ.

35 “Yehowa baahã asanei ni waa mɔ he ní anyɛŋ atsa atsɛ̃rɛ̃ onakutsei kɛ onaji ahe, kɛjɛ onaneshi kɛyashi opampam. 36 Yehowa baashwie bo kɛ maŋtsɛ ni obaawó yɛ onɔ lɛ kɛya jeŋmaŋ ko ni bo kɛ otsɛmɛi lɛ leee lɛ mli,+ ni obaayasɔmɔ nyɔŋmɔi krokomɛi, ni ji tsei kɛ tɛi nyɔŋmɔi yɛ jɛmɛ.+ 37 Ni obaatsɔ nɔ ko ni hãa mɔ naa kpɛɔ ehe kɛ nyaŋemɔ nii,* kɛ nɔ ko ni ayeɔ he fɛo yɛ maji fɛɛ ni Yehowa baashwie bo kɛya mli lɛ ateŋ.+

38 “Okɛ dumɔwui babaoo baaya ŋmɔ mli, shi fioo pɛ obaakpa,+ ejaakɛ baalabii baaye. 39 Obaafee wain ŋmɔji ni obaatsu amɛmli nii, shi onuŋ wain ko, ni okpaŋ nɔ ko hu,+ ejaakɛ gɔgɔmii baaye. 40 Obaaná oliv tsei yɛ okpokpai lɛ fɛɛ anɔ, shi okpaŋ mu ko, ejaakɛ o-oliv yibii lɛ baakpala ashwie shi. 41 Obaafɔ bihii kɛ biyei, shi amɛkãŋ he amɛfeŋ onii, ejaakɛ abaaŋɔ amɛ nom.+ 42 Filikilɔi babaoo* baakpãtã otsei lɛ fɛɛ kɛ oshikpɔŋ lɛ nɔ nibaa nii lɛ ahiɛ. 43 Gbɔ ni yɔɔ oteŋ lɛ nɔ baaya nɔ akwɔ gojoo fe bo, shi bo lɛ, obaakã he oba shi. 44 Ekɛ nii baafa bo, shi bo lɛ, okɛ nɔ ko efaŋ lɛ.+ Ebaatsɔ yitso, shi bo lɛ, obaatsɔ lei.+

45 “Bɔ fɛɛ bɔ ni fee lɛ, loomɔi nɛɛ fɛɛ+ baaba onɔ, ni amɛbaatiu bo ni amɛbaanina bo kɛyashi ohiɛ baakpãtã,+ ejaakɛ obooo Yehowa, o-Nyɔŋmɔ lɛ, gbee toi, ni oyeee ekitãi kɛ emlai ni ewo bo lɛ anɔ.+ 46 Ni amɛbaaya nɔ amɛhi bo kɛ oseshibii lɛ anɔ, ni amɛbaatsɔ okadi kɛ kɔkɔbɔɔ nɔ kɛya naanɔ,+ 47 ejaakɛ okɛ nyamɔ kɛ miishɛɛ tsui sɔmɔɔɔ Yehowa, o-Nyɔŋmɔ lɛ, be ni oná nii fɛɛ babaoo lɛ.+ 48 Yehowa baahã ohenyɛlɔi abatutua bo, ni obaasɔmɔ amɛ+ be ni hɔmɔ+ kɛ kumai miiye bo, ní onáaa atade kpakpa ko owo ní nibii fɛɛ ehia bo lɛ. Ekɛ dade kɔɔŋtso baaŋmɛ okuɛ nɔ kɛyashi ebaakpãtã ohiɛ.

49 “Yehowa baatee jeŋmaŋ ko shi kɛjɛ shɔŋŋ ewo bo,+ kɛjɛ shikpɔŋ lɛ naagbeehe lɛ; ebaatsɛ̃ kɛba tamɔ okropɔŋ,+ jeŋmaŋ ko ni onuuu amɛwiemɔ,+ 50 jeŋmaŋ ko ni hiɛ yɔɔ laŋlaŋ ni ebuuu onukpa, ni enaaa gbekɛ hu mɔbɔ.+ 51 Amɛbaaye olɛɛ kooloi abii kɛ oshikpɔŋ lɛ nɔ nibaa nii kɛyashi ohiɛ baakpãtã. Amɛshiŋ ŋmaa,* wain hee loo mu, tsinabi loo toobi ko kwraa amɛhãŋ bo kɛyashi amɛbaakpãtã ohiɛ.+ 52 Amɛbaawo ohe ka, amɛbaatsĩ onaa amɛwo omaji* lɛ fɛɛ amli yɛ oshikpɔŋ lɛ fɛɛ nɔ kɛyashi ogbogboi ni kwɔlɔ ni wa ni okɛ ohiɛ fɔ̃ɔ nɔ lɛ baakumɔ ashwie shi. Hɛɛ, amɛbaawo ohe ka yɛ omaji lɛ fɛɛ amli yɛ oshikpɔŋ ni Yehowa, o-Nyɔŋmɔ lɛ, kɛhãa bo lɛ fɛɛ nɔ.+ 53 Ni obaaye bo diɛŋtsɛ obii,* obihii kɛ obiyei ni Yehowa, o-Nyɔŋmɔ lɛ, ehã bo lɛ aloo+ yɛ bɔ ni kawoo lɛ naa wa sɔŋŋ hã kɛ haomɔ ni ohenyɛlɔ lɛ kɛba onɔ lɛ hewɔ.

54 “Nuu ni mli jɔ ní nuɔ nii ahe ehãa mɔ, ní yɔɔ nyɛteŋ lɛ po enaŋ enyɛmi nuu loo eŋa ni esumɔɔ lɛ waa loo ebihii ni baashwɛ lɛ mɔbɔ, 55 ni ehãŋ amɛ ebii lɛ aloo ni ebaaye lɛ eko, ejaakɛ bɔ ni kawoo lɛ naa wa sɔŋŋ hã kɛ haomɔ ni ohenyɛlɔ lɛ kɛba omaji lɛ anɔ lɛ hewɔ lɛ, ebɛ nɔ kroko dɔŋŋ.+ 56 Ni yoo ni woɔ ehe ni yitsoŋ ŋɔɔ lɛ ní yɔɔ nyɛteŋ, ní ebaŋ ejwɛŋmɔ mli po akɛ ekɛ enane ama shikpɔŋ yɛ bɔ ni ewoɔ ehe sɔŋŋ+ lɛ hewɔ lɛ hu enaŋ ewu ni esumɔɔ lɛ waa loo ebinuu loo ebiyoo mɔbɔ, 57 enaŋ fɔmɔ sɛɛ nii ni jɛɔ enaji ateŋ kɛ bii ni efɔɔ lɛ po mɔbɔ, ejaakɛ ebaaye amɛ yɛ teemɔŋ yɛ bɔ ni kawoo lɛ naa wa sɔŋŋ hã kɛ haomɔ ni ohenyɛlɔ lɛ kɛba omaji lɛ anɔ lɛ hewɔ.

58 “Kɛ́ oyeee Mla nɛɛ mli wiemɔi fɛɛ ni aŋma yɛ wolo nɛɛ mli+ lɛ anɔ jogbaŋŋ, ni osheee gbɛ́i ni yɔɔ nyam kɛ naakpɛɛ nɛɛ,+ ni ji Yehowa,+ o-Nyɔŋmɔ lɛ, gbɛ́i lɛ gbeyei lɛ, 59 no lɛ, Yehowa kɛ haomɔi ni naa wala waa baaba bo kɛ oseshibii anɔ, haomɔi wuji ni sɛɛ tsɛɔ,+ kɛ helai hu ni naa wawai ni sɛɛ tsɛɔ. 60 Ekɛ Ejipt helai fɛɛ ni no mli lɛ osheɔ amɛ gbeyei lɛ baaba onɔ, ni bɔ fɛɛ bɔ ni fee lɛ, amɛbaakpɛtɛ ohe. 61 Agbɛnɛ hu, Yehowa kɛ hela fɛɛ hela loo haomɔ fɛɛ haomɔ ni aŋmako yɛ Mla wolo nɛɛ mli lɛ baaba onɔ kɛyashi ohiɛ baakpãtã. 62 Eyɛ mli akɛ nyɛyi efa babaoo tamɔ ŋwɛi ŋulamii moŋ,+ shi nyɛteŋ mɛi fioo kɛkɛ baashwɛ,+ ejaakɛ obooo Yehowa, o-Nyɔŋmɔ lɛ, gbee toi.

63 “Ni bɔ ni Yehowa ná he miishɛɛ akɛ ebaahã nyɛshwere ni nyɛyi afa lɛ, nakai nɔŋŋ Yehowa baaná he miishɛɛ akɛ ebaafite nyɛ ni ekpãtã nyɛhiɛ kwraa; ni abaafamɔ nyɛ kɛje shikpɔŋ ni nyɛyaa nyɛyaŋɔ lɛ nɔ.

64 “Yehowa baagbɛ bo eshwã jeŋmaji lɛ fɛɛ ateŋ, kɛjɛ shikpɔŋ lɛ naagbeehe kome kɛyashi shikpɔŋ lɛ naagbeehe kroko,+ ni obaayasɔmɔ tsei kɛ tɛi nyɔŋmɔi yɛ jɛmɛ, nyɔŋmɔi ni bo kɛ otsɛmɛi lɛ leee.+ 65 Onáŋ toiŋjɔlɛ yɛ nakai jeŋmaji lɛ ateŋ,+ ni onáŋ hejɔɔmɔhe ko hu ni okɛ onane baama. Shi moŋ, Yehowa baahã otsui aye+ yɛ jɛmɛ, ni ohiŋmɛii anɔ baaha ni onijiaŋ* baaje wui.+ 66 Owala baayaje oshãra wulu mli, ni obaashe gbeyei jenamɔ kɛ jetsɛremɔ fɛɛ; ni oleŋ kɛji oyi baaná wala lo. 67 Leebi lɛ obaakɛɛ akɛ, ‘Miná kulɛ, je ena!’ ni gbɛkɛ hu lɛ obaakɛɛ akɛ, ‘Miná kulɛ, je etsɛre!’ yɛ gbeyei ni baamɔ bo yɛ otsui mli kɛ nibii ni ohiŋmɛii baana lɛ ahewɔ. 68 Ni bɔ fɛɛ bɔ ni fee lɛ, Yehowa kɛ bo baawo meele mli kɛku sɛɛ kɛya Ejipt ekoŋŋ, kɛyatsɔ gbɛ ni mikɛɛ bo akɛ, ‘Onaŋ dɔŋŋ’ lɛ nɔ, ni nyɛbaahɔ̃ɔ nyɛhe nyɛhã nyɛhenyɛlɔi yɛ jɛmɛ akɛ nyɔji hii kɛ nyɔji yei, shi nyɛnáŋ mɔ ko ahe nyɛ.”

29 Kpaŋmɔ ni Yehowa fã Mose akɛ ekɛ Israelbii lɛ akpaŋ yɛ Moab shikpɔŋ lɛ nɔ lɛ mli wiemɔi nɛ, esoro kpaŋmɔ ni ekɛ amɛ kpaŋ yɛ Horeb lɛ.+

2 Ni Mose tsɛ Israel muu lɛ fɛɛ kɛkpe ni ekɛɛ amɛ akɛ: “Nyɛkɛ nyɛhiŋmɛii na nibii fɛɛ ni Yehowa fee Farao kɛ etsuji lɛ fɛɛ kɛ eshikpɔŋ lɛ fɛɛ yɛ Ejipt shikpɔŋ lɛ nɔ lɛ,+ 3 kojomɔi* kpelei ni ohiŋmɛii na lɛ, nakai okadii kɛ naakpɛɛ nii wuji lɛ.+ 4 Shi kɛbashi ŋmɛnɛ gbi nɛɛ, Yehowa hãko nyɛ tsui ni nyɛkɛbaanu shishi kɛ hiŋmɛii ni nyɛkɛbaana kɛ toii hu ni nyɛkɛbaanu.+ 5 ‘Afii 40 sɔŋŋ ni mikɛnyiɛ nyɛhiɛ yɛ ŋa lɛ nɔ lɛ,+ nyɛtadei fiteee* yɛ nyɛhe ni nyɛtokotai hu yeee yɛ nyɛnaji.+ 6 Nyɛyeee blodo, ni nyɛnuuu wain loo dãa ni wa ko, koni nyɛná nyɛle akɛ miji Yehowa, nyɛ-Nyɔŋmɔ lɛ.’ 7 Naagbee lɛ, nyɛbashɛ biɛ nɛɛ, ni Heshbon maŋtsɛ Sihon+ kɛ Bashan maŋtsɛ Og+ je kpo ni amɛkɛ wɔ bawu, shi wɔye amɛnɔ kunim.+ 8 No sɛɛ lɛ, wɔŋɔ amɛshikpɔŋ lɛ ni wɔkɛhã Rubenbii lɛ kɛ Gadbii lɛ kɛ Manase weku lɛ fã lɛ akɛ gboshinii.+ 9 No hewɔ lɛ, nyɛyea kpaŋmɔ nɛɛ mli wiemɔi lɛ anɔ ni nyɛkɛtsua nii, koni nɔ fɛɛ nɔ ni nyɛbaafee lɛ ahi ahã nyɛ.+

10 “Ŋmɛnɛ gbi nɛɛ, nyɛ fɛɛ nyɛdamɔ Yehowa, nyɛ-Nyɔŋmɔ lɛ hiɛ, nyɛwekui lɛ anɔ onukpai lɛ kɛ nyɛmaŋ lɛ mli onukpai lɛ kɛ nyɛnɔkwɛlɔi lɛ kɛ Israel hii fɛɛ 11 kɛ nyɛbii lɛ kɛ nyɛŋamɛi+ lɛ kɛ ogbɔ+ ni yɔɔ onsara lɛ mli lɛ, kɛjɛ mɔ ni lɛ́ɔ olai nɔ kɛyashi mɔ ni yaa faaŋ ehãa bo lɛ nɔ. 12 Oyɛ biɛ bɔ ni afee ni okɛ Yehowa, o-Nyɔŋmɔ lɛ, akpaŋ ni oye ekitã lɛ nɔ, kpaŋmɔ ni Yehowa, o-Nyɔŋmɔ lɛ, kɛ bo kpaŋɔ ŋmɛnɛ gbi nɛɛ+ 13 bɔ ni afee ni ŋmɛnɛ gbi nɛɛ ehã otsɔ emaŋ,+ ní lɛ hu etsɔ o-Nyɔŋmɔ,+ tamɔ bɔ ni ewo bo shi lɛ, tamɔ bɔ ni ekã otsɛmɛi Abraham+ kɛ Isak+ kɛ Yakob+ kitã lɛ pɛpɛɛpɛ.

14 “Amrɔ nɛɛ, jeee nyɛ pɛ mikɛkpaŋɔ kpaŋmɔ nɛɛ ni mikãa nyɛ kitã nɛɛ, 15 shi moŋ, mikɛ mɛi ni kɛ wɔ damɔ biɛ ŋmɛnɛ gbi nɛɛ yɛ Yehowa, wɔ-Nyɔŋmɔ lɛ hiɛ, kɛ mɛi ni kɛ wɔ bɛ biɛ ŋmɛnɛ gbi nɛɛ hu. 16 (Ejaakɛ nyɛle bɔ ni wɔhi shi wɔhã yɛ Ejipt shikpɔŋ lɛ nɔ, kɛ bɔ ni wɔtsɔ jeŋmaji srɔtoi ateŋ yɛ wɔgbɛfãa lɛ mli lɛ jogbaŋŋ.+ 17 Ni no mli lɛ, nyɛna amɛnyaŋemɔ nibii lɛ kɛ amɛmagai ni yɔɔ nyaŋemɔ*+ ni akɛ tso kɛ tɛ, jwiɛtɛi kɛ shika tsuru fee ní yɔɔ amɛteŋ lɛ.) 18 Nyɛkwɛa jogbaŋŋ koni nuu ko loo yoo ko, weku ko loo tsɛmɛi ashĩa ko akahi nyɛteŋ ŋmɛnɛ gbi nɛɛ ni etsui miije Yehowa, wɔ-Nyɔŋmɔ lɛ sɛɛ, ni eyasɔmɔ nakai jeŋmaji lɛ anyɔŋmɔi lɛ,+ ni tso shishifã ko hu akahi nyɛteŋ ni woɔ yibii ni pɔizin yɔɔ mli kɛ joomɔtso.+

19 “Shi kɛ́ mɔ ko nu kitã nɛɛ mli wiemɔi lɛ ni eshwã yɛ etsui mli ekɛɛ, ‘Eyɛ mli akɛ miyeɔ mitsuinaa sane moŋ, shi mitoiŋ baajɔ mi,’ ni ekɛfite nɔ fɛɛ nɔ* ni yɔɔ egbɛ nɔ lɛ, 20 Yehowa kɛ ehe ekeŋ lɛ.+ Shi moŋ, Yehowa mli baawo la waa ewo nakai mɔ lɛ, ni bɔ fɛɛ bɔ ni fee lɛ, loomɔi fɛɛ ni aŋma yɛ wolo nɛɛ mli lɛ baaba enɔ,+ ni anɔkwa, Yehowa baagbe egbɛ́i kɛje ŋwɛi shishi. 21 Ni Yehowa baajie lɛ kɛje Israel wekui lɛ fɛɛ amli eto afã ní ekɛ amanehulu aba enɔ, yɛ kpaŋmɔ lɛ mli loomɔi fɛɛ ni aŋma yɛ Mla wolo nɛɛ mli lɛ anaa.

22 “Kɛ́ nyɛbii ni baaba wɔsɛɛ lɛ kɛ gbɔ ni jɛ maŋsɛɛ shɔŋŋ lɛ na shikpɔŋ lɛ nɔ haomɔi lɛ, ni ji amanehului lɛ ni Yehowa kɛba nɔ lɛ— 23 sɔlfa kɛ ŋoo kɛ bɔ ni jɛmɛ eshã ehã, ní anyɛɛɛ adu nii yɛ shikpɔŋ muu lɛ fɛɛ nɔ, ní tso ko nyɛɛɛ atsɛ̃ yɛ nɔ, ní kwɛ̃ɛ nii ko kwɛ̃ɛ nii ko hu nyɛɛɛ akwɛ̃ yɛ nɔ, tamɔ eba lɛ yɛ Sodom kɛ Gomora,+ Adma kɛ Zeboim+ ní Yehowa butu amɛ yɛ emlifu kɛ emlila lɛ naa lɛ— 24 amɛ kɛ jeŋmaji lɛ fɛɛ baakɛɛ akɛ, ‘Mɛni hewɔ Yehowa fee shikpɔŋ nɛɛ nɛkɛ?+ Mɛni kɛ mlifu ni naa wa waa nɛɛ ba?’ 25 Kɛkɛ lɛ, amɛbaakɛɛ akɛ, ‘Ejaakɛ amɛkpoo Yehowa, amɛtsɛmɛi a-Nyɔŋmɔ lɛ, kpaŋmɔ+ ni ekɛ amɛ kpaŋ be ni ejie amɛ kɛje Ejipt shikpɔŋ lɛ nɔ lɛ.+ 26 Ni amɛtee amɛyasɔmɔ nyɔŋmɔi krokomɛi ni amɛkoto amɛ, nyɔŋmɔi ni amɛleee ní ehãko amɛ hegbɛ akɛ amɛjá amɛ lɛ.*+ 27 Kɛkɛ ni Yehowa mli wo la waa ewo nakai shikpɔŋ lɛ, ni ekɛ loomɔi fɛɛ ni aŋma yɛ wolo nɛɛ mli lɛ ba shikpɔŋ lɛ nɔ.+ 28 No hewɔ lɛ, Yehowa fã amɛ yɛ emlifu+ kɛ emlila kɛ egirimɔ lɛ naa kɛje amɛshikpɔŋ lɛ nɔ, ni eshwie amɛ kɛtee shikpɔŋ kroko nɔ, he ni amɛyɔɔ ŋmɛnɛ lɛ.’+

29 “Nibii ni aŋɔtee lɛ, Yehowa, wɔ-Nyɔŋmɔ lɛ nɔ ni,+ shi nibii ni ajie lɛ kpo lɛ, wɔ kɛ wɔseshibii lɛ anɔ ni kɛmiiya naanɔ, koni wɔye Mla nɛɛ mli wiemɔi lɛ fɛɛ anɔ.+

30 “Kɛ́ wiemɔi nɛɛ fɛɛ ba onɔ, jɔɔmɔ kɛ loomɔ ni mikɛshwie ohiɛ lɛ,+ ni okai nibii nɛɛ*+ yɛ jeŋmaji fɛɛ ni Yehowa, o-Nyɔŋmɔ lɛ, gbɛ bo eshwã amɛmli lɛ ateŋ,+ 2 ni oku osɛɛ kɛba Yehowa, o-Nyɔŋmɔ lɛ ŋɔɔ,+ ni okɛ otsui fɛɛ kɛ osusuma* fɛɛ bo egbee toi yɛ nibii fɛɛ ni mifãa bo ŋmɛnɛ gbi nɛɛ anaa,+ bo kɛ obihii lɛ, 3 no lɛ, Yehowa, o-Nyɔŋmɔ lɛ, baahã onomii lɛ aku amɛsɛɛ kɛba,+ ni ebaana bo mɔbɔ+ ni ebaabua onaa ekoŋŋ kɛjɛ maji fɛɛ ni Yehowa, o-Nyɔŋmɔ lɛ, gbɛ bo eshwã amɛmli lɛ amli.+ 4 Kɛji agbɛ omaŋ lɛ ashwã kɛtee ŋwɛi naagbeehe tete po lɛ, Yehowa, o-Nyɔŋmɔ lɛ, baabua onaa kɛjɛ jɛmɛ, ni ekɛ bo baaku sɛɛ kɛba.+ 5 Yehowa, o-Nyɔŋmɔ lɛ, kɛ bo baaya shikpɔŋ ni otsɛmɛi lɛ yaŋɔ lɛ nɔ, ni ebaatsɔ onɔ; ni ebaahã oshwere ni oyi afa kwraa fe otsɛmɛi lɛ.+ 6 Yehowa, o-Nyɔŋmɔ lɛ, baatsuu otsui he* kɛ oseshibii lɛ hu atsui he,+ koni osumɔ Yehowa, o-Nyɔŋmɔ lɛ, kɛ otsui fɛɛ kɛ osusuma* fɛɛ ní ohi wala mli.+ 7 Ni Yehowa, o-Nyɔŋmɔ lɛ, kɛ loomɔi nɛɛ fɛɛ baaba ohenyɛlɔi ni nyɛ bo ni amɛwa bo yi lɛ anɔ.+

8 “Ni obaaku osɛɛ ni obo Yehowa gbee toi, ni obaaye ekitãi fɛɛ ni miwoɔ bo ŋmɛnɛ gbi nɛɛ anɔ. 9 Yehowa, o-Nyɔŋmɔ lɛ, baahã oninenaa nitsumɔi fɛɛ ashwere babaoo,+ ebaahã obii kɛ olɛɛ kooloi kɛ oshikpɔŋ lɛ nɔ nibaa nii lɛ afa babaoo, ejaakɛ Yehowa baaná he miishɛɛ ekoŋŋ akɛ ebaahã oshwere, tamɔ bɔ ni ená otsɛmɛi lɛ ahe miishɛɛ lɛ.+ 10 Ni obaabo Yehowa, o-Nyɔŋmɔ lɛ, gbee toi, ni obaaye ekitãi kɛ emlai ni aŋma yɛ Mla wolo nɛɛ mli lɛ anɔ, ni okɛ otsui fɛɛ kɛ osusuma* fɛɛ baaku osɛɛ kɛba Yehowa, o-Nyɔŋmɔ lɛ ŋɔɔ.+

11 “Agbɛnɛ, kitã nɛɛ ni miwoɔ bo ŋmɛnɛ gbi nɛɛ, ejeee nɔ ko ni wa tsɔ kɛhã bo, ni ejeee nɔ ko ni onine nyɛŋ ashɛ nɔ hu.*+ 12 Jeee ŋwɛi eyɔɔ ní obaakɛɛ akɛ, ‘Namɔ baakwɔ kɛya ŋwɛi ni eyaŋɔ ebahã wɔ, koni wɔnu ní wɔye nɔ?’+ 13 Ni jeee ŋshɔ sɛɛ hu eyɔɔ ní obaakɛɛ akɛ, ‘Namɔ baafo ŋshɔ lɛ kɛya esɛɛ ní eyaŋɔ ebahã wɔ, koni wɔnu ní wɔye nɔ?’ 14 Ejaakɛ wiemɔ lɛ bɛŋkɛ bo kpaakpa, eyɛ bo diɛŋtsɛ odaaŋ kɛ bo diɛŋtsɛ otsui mli,+ koni oye nɔ.+

15 “Naa, ŋmɛnɛ gbi nɛɛ, mikɛ wala kɛ ekpakpa, gbele kɛ efɔŋ miishwie ohiɛ.+ 16 Kɛ́ obo Yehowa, o-Nyɔŋmɔ lɛ, kitãi ni miwoɔ bo ŋmɛnɛ gbi nɛɛ toi, ni osumɔ Yehowa, o-Nyɔŋmɔ lɛ,+ ni onyiɛ egbɛi lɛ anɔ, ni oye ekitãi kɛ emlai kɛ eyiŋkpɛi* lɛ anɔ lɛ, no lɛ, obaaya nɔ ohi shi,+ ni oyi baafa, ni Yehowa, o-Nyɔŋmɔ lɛ, baajɔɔ bo yɛ shikpɔŋ ni oyaa oyaŋɔ lɛ nɔ.+

17 “Shi kɛ́ otsui gbá afã,+ ni obooo toi, ni ohã alaka bo, ni okoto nyɔŋmɔi krokomɛi, ni osɔmɔ amɛ lɛ,+ 18 no lɛ, miikɛɛ bo ŋmɛnɛ gbi nɛɛ akɛ, bɔ fɛɛ bɔ ni fee lɛ, ohiɛ baakpãtã.+ Owala sɛɛ etsɛŋ yɛ shikpɔŋ ni ofoɔ Yordan lɛ ni oyaŋɔ lɛ nɔ. 19 Ŋmɛnɛ gbi nɛɛ, miitsɛ ŋwɛi kɛ shikpɔŋ akɛ odasefoi miiwo nyɛ akɛ, mikɛ wala kɛ gbele, jɔɔmɔ kɛ loomɔ, eshwie ohiɛ;+ no hewɔ lɛ, kɔ wala koni ohi wala mli,+ bo kɛ oseshibii,+ 20 ní osumɔ Yehowa, o-Nyɔŋmɔ lɛ,+ ní obo egbee toi, ní okpɛtɛ ehe,+ ejaakɛ lɛ ji owala, ni lɛ ebaahã owala sɛɛ atsɛ waa yɛ shikpɔŋ ni Yehowa kã kitã akɛ ekɛbaahã otsɛmɛi Abraham kɛ Isak kɛ Yakob lɛ nɔ.”+

31 Ni Mose tee ni eyajaje wiemɔi nɛɛ etsɔɔ Israel muu lɛ fɛɛ, 2 ekɛɛ amɛ akɛ: “Ŋmɛnɛ gbi nɛɛ miye afii 120.+ Minyɛŋ manyiɛ nyɛhiɛ* dɔŋŋ, ejaakɛ Yehowa ekɛɛ mi akɛ, ‘Ofoŋ Yordan nɛɛ.’+ 3 Yehowa, o-Nyɔŋmɔ lɛ, ji mɔ ni baanyiɛ ohiɛ kɛfo faa lɛ, ni lɛ diɛŋtsɛ ebaakpãtã jeŋmaji nɛɛ ahiɛ yɛ ohiɛ, ni obaaŋɔ amɛshikpɔŋ lɛ.+ Yoshua ji mɔ ni baanyiɛ ohiɛ kɛfo faa lɛ,+ tamɔ bɔ ni Yehowa ewie lɛ pɛpɛɛpɛ. 4 Yehowa baafee amɛ tamɔ bɔ ni efee Amorbii lɛ amaŋtsɛmɛi Sihon+ kɛ Og+ kɛ amɛshikpɔŋ lɛ, be ni ekpãtã amɛhiɛ lɛ.+ 5 Yehowa baaye amɛnɔ kunim ehã nyɛ, ni nyɛfea amɛ tamɔ bɔ ni kitã tso muu lɛ fɛɛ ni mikɛhã nyɛ lɛ tsɔɔ lɛ.+ 6 Nyɛfea ekãa ni nyɛwajea nyɛhe.+ Nyɛkashea gbeyei, ni nyɛtsui hu akafãa yɛ amɛhiɛ,+ ejaakɛ Yehowa, o-Nyɔŋmɔ lɛ, ji mɔ ni kɛ bo nyiɛ lɛ. Eshiŋ bo, ni ekwaŋ bo hu.”+

7 Ni Mose tsɛ Yoshua ni ekɛɛ lɛ yɛ Israel muu lɛ fɛɛ hiɛ akɛ: “Feemɔ ekãa ni owaje ohe,+ ejaakɛ bo ji mɔ ni kɛ maŋ nɛɛ baaya shikpɔŋ ni Yehowa kã otsɛmɛi lɛ kitã akɛ ekɛbaahã amɛ lɛ nɔ, ni bo okɛbaahã amɛ akɛ gboshinii.+ 8 Yehowa ji mɔ ni baanyiɛ ohiɛ, ni ekɛ bo baahi shi.+ Eshiŋ bo, ni ekwaŋ bo hu. Kaashe gbeyei, ni otsui akafã hu.”+

9 Ni Mose ŋma nɛkɛ Mla nɛɛ,+ ni ekɛhã osɔfoi ni ji Levibii lɛ, mɛi ni wóɔ Yehowa kpaŋmɔ adeka lɛ, kɛ Israel onukpai lɛ fɛɛ. 10 Mose fã amɛ ekɛɛ: “Daa afii kpawo naagbee, yɛ be ni ato yɛ afi ni ahãa mɛi yeɔ amɛhe lɛ mli,+ be ni ayeɔ Agbai Agbi Jurɔ+ lɛ, 11 kɛ́ Israel muu lɛ fɛɛ bapue yɛ Yehowa, o-Nyɔŋmɔ lɛ hiɛ,+ yɛ he ni ehala lɛ, kanemɔ nɛkɛ Mla nɛɛ ní Israel muu lɛ fɛɛ anu.+ 12 Buamɔ maŋ lɛ naa kɛkpe,+ hii kɛ yei kɛ gbekɛbii* kɛ ogbɔ ni yɔɔ omaji* lɛ amli lɛ, bɔ ni afee ni amɛbo Yehowa, nyɛ-Nyɔŋmɔ lɛ toi, ni amɛkase ehe nii, ni amɛshe lɛ gbeyei, ni amɛkwɛ ni amɛye Mla nɛɛ mli wiemɔi lɛ fɛɛ anɔ. 13 Ni amɛbii ni leee Mla nɛɛ baabo toi+ ni amɛbaakase Yehowa, nyɛ-Nyɔŋmɔ lɛ, gbeyeishemɔ, gbii abɔ fɛɛ ni nyɛkɛbaahi shikpɔŋ ni nyɛfoɔ Yordan lɛ nyɛyaŋɔ lɛ nɔ lɛ.”+

14 Ni Yehowa kɛɛ Mose akɛ: “Naa! Eshwɛ fioo ni obaagbo.+ Tsɛ Yoshua, ní okɛ lɛ fɛɛ abadamɔ kpee buu lɛ naa, koni mawó lɛ hiɛnyiɛlɔ.”+ No hewɔ lɛ, Mose kɛ Yoshua tee ni amɛyadamɔ kpee buu lɛ naa. 15 Kɛkɛ ni Yehowa bapue yɛ atatu ni damɔ shi jaŋŋ lɛ mli yɛ kpee buu lɛ naa, ni atatu ni damɔ shi jaŋŋ lɛ badamɔ kpee buu lɛ shinaa lɛ naa.+

16 Agbɛnɛ, Yehowa kɛɛ Mose akɛ: “Naa! Eshwɛ fioo ni obaagbo,* ni maŋ nɛɛ baabɔi maŋsɛɛ nyɔŋmɔi ni bɔle amɛ yɛ shikpɔŋ ni amɛyaa nɔ lɛ nɔ lɛ jamɔ.*+ Amɛbaakwa mi,+ ni amɛbaaku mikpaŋmɔ ni mikɛ amɛ kpaŋ lɛ mli.+ 17 Nakai be lɛ mli lɛ, mimli baawo la awo amɛ,+ ni makwa amɛ,+ ni mikɛ mihiɛ baatee amɛ+ kɛyashi amɛhiɛ baakpãtã. Ni be ni amanehului kɛ haomɔi babaoo eba amɛnɔ sɛɛ lɛ,+ amɛbaakɛɛ akɛ, ‘Ani jeee wɔ-Nyɔŋmɔ lɛ ni bɛ wɔteŋ lɛ hewɔ ni amanehului nɛɛ eba wɔnɔ lɛ?’+ 18 Shi makã he mikɛ mihiɛ atee amɛ yɛ nakai gbi lɛ nɔ, yɛ nibii fɔji fɛɛ ni amɛfee akɛni amɛje misɛɛ amɛyanyiɛ nyɔŋmɔi krokomɛi asɛɛ lɛ hewɔ.+

19 “Agbɛnɛ, nyɛŋmaa lala nɛɛ nyɛhãa nyɛhe,+ ni nyɛtsɔa Israelbii lɛ.+ Hã amɛkase,* bɔ ni afee ni lala nɛɛ atsɔ midasefonyo ni baaye odase eshi Israelbii lɛ.+ 20 Kɛ́ mikɛ amɛ yashɛ shikpɔŋ ni mikã amɛtsɛmɛi lɛ kitã yɛ he lɛ nɔ+—shikpɔŋ ni mliki kɛ wo hoɔ yɛ nɔ lɛ+—ni amɛye nii amɛtɔrɔ ni amɛshwere* lɛ,+ amɛbaaje misɛɛ kɛyanyiɛ nyɔŋmɔi krokomɛi asɛɛ ni amɛbaasɔmɔ amɛ, ni amɛbuŋ mi amɛhãŋ nɔ ko, ni amɛbaaku mikpaŋmɔ lɛ mli.+ 21 Kɛ́ amanehului kɛ haomɔi babaoo ba amɛnɔ lɛ,+ lala nɛɛ baaye odase eshi amɛ (ejaakɛ esaaa akɛ amɛseshibii lɛ ahiɛ kpaa nɔ), ejaakɛ dani mikɛ amɛ baayashɛ shikpɔŋ ni mikã he kitã lɛ nɔ po lɛ, mile susumɔi ni amɛhiɛ.”+

22 No hewɔ lɛ, nakai gbi lɛ Mose ŋma lala nɛɛ, ni etsɔɔ Israelbii lɛ.

23 Kɛkɛ ni ewó* Yoshua, Nun binuu lɛ, hiɛnyiɛlɔ+ ni ekɛɛ: “Feemɔ ekãa ni owaje ohe,+ ejaakɛ bo ji mɔ ni kɛ Israelbii lɛ baaya shikpɔŋ ni mikã amɛ kitã yɛ he lɛ nɔ,+ ni mikɛ bo baahi shi.”

24 Be ni Mose ŋma Mla nɛɛ mli wiemɔi lɛ fɛɛ ewo wolo nɔ egbe naa nɔŋŋ lɛ,+ 25 Mose fã Levibii lɛ ní wóɔ Yehowa kpaŋmɔ adeka lɛ akɛ: 26 “Nyɛŋɔa nɛkɛ Mla wolo+ nɛɛ ní nyɛkɛfɔ̃a Yehowa, nyɛ-Nyɔŋmɔ lɛ, kpaŋmɔ adeka lɛ masɛi,+ ni ebaatsɔ odasefonyo yɛ jɛmɛ, ni ebaaye odase eshi nyɛ. 27 Ejaakɛ mi diɛŋtsɛ mile nyɛtuatsemɔ+ kɛ nyɛkuɛŋtimɔ lɛ jogbaŋŋ.+ Kɛji be ni mihiɛ kã ni mikɛ nyɛ yɔɔ lolo nɛɛ po lɛ nyɛtseɔ Yehowa hiɛ atua nɛkɛ lɛ, belɛ migbele sɛɛ lɛ, enyiɛ nɔŋŋ ni nyɛfeŋ nakai! 28 Buamɔ nyɛwekui lɛ anɔ onukpai lɛ kɛ nyɛnɔkwɛlɔi lɛ fɛɛ anaa ohã mi, ni mawie wiemɔi nɛɛ mawo amɛtoiiaŋ, ni matsɛ ŋwɛi kɛ shikpɔŋ lɛ akɛ odasefoi mawo amɛ.+ 29 Ejaakɛ mile jogbaŋŋ akɛ, migbele sɛɛ lɛ nyɛbaafee nibii fɔji kɛ̃,+ ni nyɛbaagbá afã kɛje gbɛ ni mifã nyɛ akɛ nyɛnyiɛ nɔ lɛ nɔ. Ni bɔ fɛɛ bɔ ni fee lɛ, amanehulu baaba nyɛnɔ+ yɛ gbii lɛ anaagbee lɛ mli, ejaakɛ nyɛbaafee efɔŋ yɛ Yehowa hiɛ, ni nyɛkɛ nyɛninenaa nitsumɔi lɛ baawo emli la.”

30 Ni Mose wie lala nɛɛ mli wiemɔi lɛ kɛjɛ shishijee kɛyashi naagbee ewo Israel asafo muu lɛ fɛɛ toiiaŋ akɛ:+

 3 Ejaakɛ majaje Yehowa gbɛ́i lɛ matsɔɔ.+

Nyɛgbaa wɔ-Nyɔŋmɔ lɛ agbojee lɛ nyɛtsɔa!+

 5 Amɛji mɛi ni eye sane fɔŋ lɛ.+

Amɛjeee ebii, tɔmɔ lɛ jɛ amɛ.+

Amɛji yinɔ kɔɔdɔŋ ni bɛ eŋɛlɛ nɔ!+

15 Be ni Yeshurun* shwi lɛ, ekɛ atuatsemɔ shi ntia.

Oshwi, ofee titirii, ofu agbo.+

29 Miná kulɛ amɛhiɛ kã shi!+ Kulɛ amɛbaajwɛŋ enɛ nɔ.+

Kulɛ amɛbaasusu bɔ ni amɛnaagbee baafee lɛ he.+

Hã amɛte shi ni amɛye amɛbua nyɛ.

Hã amɛtsɔ nyɛbobaahe.

Mi migbeɔ mɔ, ni mi mihãa anáa wala.+

44 Ni Mose ba ni ebawie lala nɛɛ mli wiemɔi lɛ fɛɛ ewo maŋbii lɛ atoiiaŋ,+ lɛ kɛ Hoshea,*+ Nun binuu lɛ. 45 Be ni Mose wie wiemɔi nɛɛ fɛɛ etsɔɔ Israel muu lɛ fɛɛ egbe naa lɛ, 46 ekɛɛ amɛ akɛ: “Nyɛhãa wiemɔi fɛɛ ni mikɛbɔɔ nyɛ kɔkɔ ŋmɛnɛ gbi nɛɛ akãa nyɛtsui nɔ,+ koni nyɛfã nyɛbii* lɛ ní amɛye Mla nɛɛ mli wiemɔi lɛ fɛɛ nɔ jogbaŋŋ.+ 47 Ejaakɛ wiemɔ nɛɛ jeee wiemɔ folo kɛhã nyɛ, shi moŋ, no nɔ nyɛwala damɔ,+ ni wiemɔ nɛɛ ji nɔ ni baahã nyɛhi shi nyɛtsɛ yɛ shikpɔŋ ni nyɛfoɔ Yordan lɛ ni nyɛyaŋɔ lɛ nɔ.”

48 Yehowa kɛ Mose wie yɛ nakai gbi lɛ nɔ nɔŋŋ akɛ: 49 “Yaakwɔ Abarim gɔŋ nɛɛ,+ ni ji Nebo Gɔŋ+ lɛ ni yɔɔ Moab shikpɔŋ lɛ nɔ, yɛ Yeriko hiɛ lɛ, ní oyakwɛ Kanaan shikpɔŋ lɛ ni mikɛhãa Israelbii lɛ akɛ amɛnɔ lɛ.+ 50 No sɛɛ lɛ, obaagbo yɛ gɔŋ ni oyaakwɔ lɛ nɔ, ni abaafu bo tamɔ afu otsɛmɛi lɛ,* tamɔ bɔ ni onyɛmi nuu Aaron gbo yɛ Hor Gɔŋ+ lɛ nɔ ni afu lɛ tamɔ afu otsɛmɛi lɛ,* 51 ejaakɛ nyɛyi enyɔ lɛ fɛɛ nyɛyeee mi anɔkwa yɛ Israelbii lɛ ateŋ yɛ Meriba nui+ lɛ ni yɔɔ Kadesh, yɛ Zin ŋa lɛ nɔ lɛ he, ejaakɛ nyɛfeee mi krɔŋkrɔŋ yɛ Israelbii lɛ ahiɛ.+ 52 Obaana shikpɔŋ lɛ yɛ shɔŋŋ moŋ, shi oyaŋ shikpɔŋ nɛɛ ni mikɛhãa Israelbii lɛ nɔ.”+

33 Agbɛnɛ jɔɔmɔ ni Mose, anɔkwa Nyɔŋmɔ lɛ gbɔmɔ lɛ, kɛjɔɔ Israelbii lɛ dani egbo nɛ.+ 2 Ekɛɛ akɛ:

 7 Ni jɔɔmɔ ni ekɛjɔɔ Yuda nɛ:+

 8 Ni Levi lɛ, ewie yɛ ehe akɛ:+

12 Ni Benyamin lɛ, ewie yɛ ehe akɛ:+

13 Ni Yosef lɛ, ewie yɛ ehe akɛ:+

18 Ni Zebulon lɛ, ewie yɛ ehe akɛ:+

19 Amɛbaatsɛ maji kɛya gɔŋ lɛ nɔ.

Ni jɛmɛ amɛbaashã jalɛ afɔlei yɛ.

20 Ni Gad lɛ, ewie yɛ ehe akɛ:+

“Ajɔɔ mɔ ni lɛɔ Gad husui lɛ amli lɛ.+

Maŋ lɛ mli onukpai lɛ baabua amɛhe naa.

22 Ni Dan lɛ, ewie yɛ ehe akɛ:+

“Dan lɛ, jata bi ni.+

Ebaatu kɛaajɛ Bashan.”+

23 Ni Naftali lɛ, ewie yɛ ehe akɛ:+

Ŋɔɔ anai kɛ wuoyi ofee onɔ.”

24 Ni Asher lɛ, ewie yɛ ehe akɛ:+

“Ajɔɔ Asher kɛ bihii.

29 Israel, oyɛ miishɛɛ!+

34 Ni Mose jɛ Moab ŋa kpataa lɛ nɔ ekwɔ Nebo Gɔŋ+ lɛ, kɛtee Pisga yiteŋ,+ yɛ Yeriko+ hiɛ. Ni Yehowa kɛ shikpɔŋ lɛ fɛɛ tsɔɔ lɛ, kɛjɛ Gilead kɛyashi Dan+ 2 kɛ Naftali fɛɛ kɛ Efraim kɛ Manase shikpɔŋ lɛ kɛ Yuda shikpɔŋ lɛ fɛɛ, aahu kɛyashi anaigbɛ ŋshɔ* lɛ naa,+ 3 kɛ Negeb+ lɛ kɛ Kpokpaa+ lɛ, Yeriko shikpɔŋ kplanaa* lɛ, tɛŋ tsei amaŋ lɛ, aahu kɛyashi Zoar.+

4 Ni Yehowa kɛɛ lɛ akɛ: “Shikpɔŋ ní mikã Abraham kɛ Isak kɛ Yakob kitã yɛ he akɛ, ‘Mikɛbaahã oseshi’* lɛ nɛ.+ Mihã okɛ bo diɛŋtsɛ ohiŋmɛii ena, shi ofoŋ mli kɛyaŋ jɛmɛ.”+

5 Enɛ sɛɛ lɛ, Mose, Yehowa tsulɔ lɛ gbo yɛ jɛmɛ, yɛ Moab shikpɔŋ lɛ nɔ, tamɔ bɔ ni Yehowa wie lɛ.+ 6 Efu lɛ yɛ jɔɔ ni yɔɔ Moab shikpɔŋ lɛ nɔ lɛ mli, yɛ Bet-peor hiɛ, ni mɔ ko mɔ ko leee he ni egbonyobu yɔɔ kɛbashi ŋmɛnɛ.+ 7 Mose eye afii 120 be ni egbo lɛ.+ No mli lɛ, ehiŋmɛii anɔ ehako, ni ehewalɛ hu etãko. 8 Israelbii lɛ fó Mose gbii 30+ yɛ Moab ŋa kpataa lɛ nɔ. Ni gbii ni amɛkɛfóɔ Mose ni amɛkɛyeɔ ehe awerɛho lɛ ba naagbee.

9 Yoshua, Nun binuu lɛ, eyi obɔ kɛ hiɛshikamɔ mumɔ, ejaakɛ Mose kɛ enine ŋmɛ enɔ;+ ni Israelbii lɛ bo lɛ toi, ni amɛfee tamɔ bɔ ni Yehowa fã Mose lɛ pɛpɛɛpɛ.+ 10 Shi gbalɔ ko eteko shi dɔŋŋ yɛ Israel ni tamɔ Mose,+ mɔ ni Yehowa le lɛ hiɛ kɛ hiɛ+ lɛ. 11 Mose fee okadii kɛ naakpɛɛ nii fɛɛ ni Yehowa tsu lɛ ní eyafee yɛ Ejipt shikpɔŋ lɛ nɔ etsɔɔ Farao kɛ etsuji lɛ fɛɛ kɛ eshikpɔŋ lɛ fɛɛ lɛ,+ 12 ni Mose tsu nineshiwalɛ nii kɛ hewalɛ nitsumɔi wuji hu yɛ Israelbii lɛ fɛɛ ahiɛ.+