NEHEMIA

1 Nehemia,* Hakalia binuu lɛ wiemɔi nɛ:+ No mli lɛ, miyɛ Shushan*+ mɔɔ* lɛ mli yɛ Kislev* nyɔɔŋ lɛ mli yɛ afi ni ji 20* lɛ mli. 2 Nakai beiaŋ lɛ, Hanani,+ ni ji minyɛmimɛi hii lɛ ateŋ mɔ kome lɛ kɛ hii komɛi jɛ Yuda kɛba miŋɔɔ, ni mibi amɛ Yudafoi ni je nomŋɔɔ lɛ mli+ lɛ kɛ Yerusalem hu he saji. 3 Amɛkɛɛ mi akɛ: “Mɛi ni jɛ nomŋɔɔ lɛ mli amɛba lɛ ateŋ mɛi ni eshwɛ yɛ kpokpaa lɛ nɔ lɛ ashihilɛ efee basaa, ni amɛhiɛ eshwie shi hu.+ Akumɔ Yerusalem gbogboi lɛ,+ ni akɛ la eshã egbói lɛ hu.”+

4 Be ni minu wiemɔi nɛɛ nɔŋŋ lɛ, miho mita shi, ni mifó ni miye awerɛho ni mihi ŋmaa+ ni misɔle yɛ ŋwɛi Nyɔŋmɔ lɛ hiɛ gbii pii. 5 Mikɛɛ akɛ: “Ao Yehowa, ŋwɛi Nyɔŋmɔ, Nyɔŋmɔ ni je agbo, ni he yɔɔ gbeyei, ni yeɔ ekpaŋmɔ nɔ, ni jieɔ suɔmɔ ni tsakeee kpo etsɔɔ mɛi ni sumɔɔ lɛ, ni amɛyeɔ ekitãi lɛ anɔ,+ 6 ofainɛ, gbelemɔ otoi kɛ ohiŋmɛii koni obo sɔlemɔ ni mi, otsulɔ, misɔleɔ mihãa bo yɛ otsuji Israelbii lɛ ahewɔ ŋmɛnɛ gbi nɛɛ toi. Jetsɛremɔ kɛ jenamɔ+ fɛɛ lɛ miijaje eshai ni omaŋ Israel efee eshi bo lɛ. Mi kɛ mitsɛ shĩa lɛ fɛɛ efee esha.+ 7 Wɔtɔ̃ onɔ lɛɛlɛŋ,+ ejaakɛ wɔyeko okitãi, kɛ otaomɔ nii, kɛ oyiŋkpɛi* ni okɛhã otsulɔ Mose lɛ anɔ.+

8 “Ofainɛ, kaimɔ kitã ni owo otsulɔ Mose lɛ, akɛ: ‘Kɛ́ nyɛtɔ̃ minɔ lɛ, magbɛ nyɛ mashwã jeŋmaji lɛ ateŋ.+ 9 Shi kɛ́ nyɛku nyɛsɛɛ kɛba miŋɔɔ ni nyɛbo mikitãi lɛ toi ni nyɛye nɔ lɛ, no lɛ kɛji agbɛ nyɛmaŋbii lɛ ashwã ŋwɛi naagbeehe po lɛ, mabua amɛnaa+ kɛaajɛ jɛmɛ ni mikɛ amɛ baaba he ni mihala koni mihã migbɛ́i ahi jɛmɛ lɛ.’+ 10 Amɛji otsuji kɛ omaŋ ni okɛ ohewalɛ kpele lɛ kɛ onineshiwalɛ lɛ kpɔ̃ amɛ lɛ.+ 11 Ao Yehowa, ofainɛ, gbelemɔ otoi ni obo otsulɔ sɔlemɔ lɛ toi, ni agbɛnɛ hu, obo otsuji ni sumɔɔ akɛ amɛshe ogbɛ́i lɛ gbeyei lɛ asɔlemɔ lɛ toi. Ni ofainɛ, hã otsulɔ aye omanye ŋmɛnɛ gbi nɛɛ, ni nuu nɛɛ musuŋ atsɔ lɛ yɛ mihewɔ.”+

No mli lɛ, maŋtsɛ lɛ dãawolɔ ji mi.+

2 Yɛ Maŋtsɛ Artashasta+ nɔyeli afi ni ji 20 lɛ mli yɛ Nisan* nyɔɔŋ lɛ mli lɛ,+ akɛ wain bama ehiɛ, ni tamɔ bɔ ni mifɔɔ feemɔ lɛ, miwó wain lɛ ni mikɛhã maŋtsɛ lɛ.+ Shi enako ni miwerɛ eho mihe pɛŋ. 2 No hewɔ lɛ, maŋtsɛ lɛ kɛɛ mi akɛ: “Mɛni hewɔ owerɛ eho ohe nɛkɛ, be ni ohe yeee? Enɛ lɛ, jeee nɔ ko nɔ ko ni fe akɛ tsuiŋ awerɛhoyeli.” Kɛkɛ ni mitsui fã waa.

3 Kɛkɛ ni mikɛɛ maŋtsɛ lɛ akɛ: “Maŋtsɛ yi aná wala! Mɛni hewɔ esaaa akɛ miyeɔ awerɛho be ni maŋ, ni ji he ni afu mitsɛmɛi lɛ yɛ lɛ efee koikoi, ni akɛ la eshã egbói lɛ?”+ 4 Kɛkɛ ni maŋtsɛ lɛ bi mi akɛ: “Mɛni ji nɔ ni otaoɔ?” Amrɔ nɔŋŋ ni misɔle mihã ŋwɛi Nyɔŋmɔ lɛ.+ 5 Kɛkɛ ni mikɛɛ maŋtsɛ lɛ akɛ: “Kɛ́ esa maŋtsɛ hiɛ, ni otsulɔ hiɛ eba nyam yɛ ohiɛ lɛ, hã maya Yuda, koni maya maŋ ni afu mitsɛmɛi lɛ yɛ mli lɛ mli, koni mayatswa maŋ lɛ ekoŋŋ.”+ 6 No mli lɛ, maŋtsɛ lɛ ŋa* lɛ ta emasɛi, ni maŋtsɛ lɛ bi mi akɛ: “Be enyiɛ ogbɛfaa lɛ baahe, ni mɛɛ be obaaku osɛɛ oba?” No hewɔ lɛ, maŋtsɛ lɛ ná he miishɛɛ akɛ ehã maya,+ ni mitsɔɔ lɛ be lɛ.+

7 Kɛkɛ ni mikɛɛ maŋtsɛ lɛ akɛ: “Kɛ́ esa maŋtsɛ hiɛ lɛ, no lɛ ehã aŋma woji ahã mi koni mikɛyahã amralofoi ni yɔɔ kpokpaa ni yɔɔ Faa Lɛ Sɛɛ* lɛ nɔ lɛ,+ koni amɛŋmɛ mi gbɛ ni mafo mli kɛyashɛ Yuda shweshweeshwe, 8 ni agbɛnɛ hu, aŋma wolo ahã mi ni mikɛyahã Asaf, mɔ ni kwɛɔ maŋtsɛ lɛ koo* lɛ nɔ lɛ, koni ehã mi tsei kɛhã mplaŋi ni akɛbaafee Shĩa* Lɛ Mɔɔ+ lɛ agbói lɛ kɛ maŋ lɛ gbogboi lɛ,+ kɛ shĩa ni mayahi mli lɛ.” No hewɔ lɛ, maŋtsɛ lɛ kɛ fɛɛ hã mi,+ ejaakɛ mi-Nyɔŋmɔ lɛ nine ni hi lɛ yɛ minɔ.+

9 Fiofio lɛ, mibashɛ amralofoi ni yɔɔ kpokpaa ni yɔɔ Faa Lɛ Sɛɛ lɛ nɔ lɛ aŋɔɔ, ni mikɛ maŋtsɛ lɛ woji lɛ hã amɛ. Maŋtsɛ lɛ hã asraafoi tatsɛmɛi kɛ okpɔŋɔnɔtaralɔi fata mihe kɛtee. 10 Be ni Sanbalat,+ Horonnyo* lɛ, kɛ Tobia,+ Amonnyo+ ni ji nɔkwɛlɔ* lɛ, nu he lɛ, eŋɔɔɔ amɛnaa kwraa akɛ mɔ ko eba ni ebaafee nɔ ko kpakpa ehã Israelbii lɛ.

11 Be ko sɛɛ lɛ, mibashɛ Yerusalem, ni mihi jɛmɛ gbii etɛ. 12 Kɛkɛ ni mite shi nyɔɔŋ, mi kɛ hii fioo ko ni fata mihe lɛ, shi mikɛɛɛ mɔ ko mɔ ko nɔ ni Nyɔŋmɔ kɛwo mitsui mli akɛ mifee mihã Yerusalem, ni mikɛ kooloo ko eyaaa ja nɔ ni mita nɔ lɛ pɛ. 13 Ni nyɔɔŋ lɛ mli lɛ, mije kpo kɛtsɔ Jɔɔ Agbó+ lɛ mli kɛtsɔ Onufu Wulu Nuhiŋmɛi lɛ hiɛ kɛtee Lamulu Agbó*+ lɛ naa, ni mikwɛ Yerusalem gbogboi lɛ ni akumɔ ashwie shi lɛ, kɛ egbói lɛ ni akɛ la eshã lɛ.+ 14 Ni mitsɔ he kɛtee Nuhiŋmɛi Agbó+ lɛ naa, kɛ agbɛnɛ hu, kɛtee Maŋtsɛ Kpaakpo lɛ he, shi no mli lɛ gbɛ lɛ edaaa bɔ ni kooloo ni mita nɔ lɛ baanyɛ atsɔ jɛmɛ. 15 Shi mitsa nɔ kɛtsɔ jɔɔ*+ lɛ mli nakai nyɔɔŋ lɛ mli, ni mitee nɔ mikwɛ gbogbo lɛ, ni no sɛɛ lɛ miku misɛɛ, mitsɔ Jɔɔ Agbó lɛ mli, ni miku misɛɛ miba.

16 No mli lɛ, nɔkwɛlɔi+ lɛ leee he ni mitee, kɛ nɔ ni mifeɔ, ejaakɛ no mli lɛ, mikɛko Yudafoi lɛ, kɛ osɔfoi lɛ, kɛ abladei lɛ, kɛ nɔkwɛlɔi lɛ, kɛ nitsulɔi krokomɛi ni eshwɛ lɛ nɔ ko. 17 Agbɛnɛ mikɛɛ amɛ akɛ: “Nyɛ diɛŋtsɛ nyɛmiina shihilɛ gbonyo ni wɔyɔɔ mli, kɛ bɔ ni Yerusalem etsɔ koikoi, kɛ bɔ ni akɛ la eshã egbói lɛ. Nyɛbaa ni nyɛhãa wɔtswaa Yerusalem gbogboi lɛ ekoŋŋ koni hiɛshishwiemɔ nɛɛ sɛɛ afo.” 18 Kɛkɛ ni migba amɛ bɔ ni mi-Nyɔŋmɔ lɛ nine ni hi lɛ ehi minɔ ehã,+ kɛ wiemɔi hu ni maŋtsɛ lɛ kɛ mi wie lɛ.+ Kɛkɛ ni amɛkɛɛ akɛ: “Nyɛhãa wɔtea shi ni wɔmaa.” No hewɔ lɛ, amɛwowoo amɛhe hewalɛ* kɛhã nitsumɔ kpakpa lɛ.+

19 Shi be ni Sanbalat, Horonnyo lɛ, kɛ Tobia,+ Amonnyo,+ ni ji nɔkwɛlɔ* lɛ, kɛ Geshem, Arabianyo+ lɛ nu he lɛ, amɛye wɔhe fɛo,+ ni amɛgbe wɔhe guɔ amɛkɛɛ: “Mɛni nyɛfeɔ lɛ? Jeee maŋtsɛ lɛ hiɛ atua nyɛtseɔ nɛɛ?”+ 20 Shi mikɛɛ amɛ akɛ: “Ŋwɛi Nyɔŋmɔ lɛ ji mɔ ni baahã wɔye omanye,+ ni wɔ ni ji etsuji lɛ, wɔbaate shi ni wɔma; shi nyɛ lɛ, nyɛbɛ gbɛfaŋnɔ ko loo hegbɛ ko loo kaimɔ nɔ* ko yɛ Yerusalem.”+

3 Kɛkɛ ni osɔfonukpa Eliashib+ kɛ osɔfoi lɛ, ni ji enyɛmimɛi hii lɛ te shi ni amɛtswa Gwantɛŋi Agbó+ lɛ. Amɛfee lɛ krɔŋkrɔŋ*+ ni amɛtara naa shinai; amɛfee lɛ krɔŋkrɔŋ aahu kɛyashi Mea Mɔɔ+ lɛ he, kɛ agbɛnɛ hu, kɛyashi Hananel Mɔɔ+ lɛ he. 2 Ni Yeriko+ hii lɛ tswa gbogbo lɛ kɛtsa amɛnɔ; ni Zakur, Imri binuu lɛ tswa gbogbo lɛ kɛtsa Yeriko hii lɛ anɔ.

3 Hasenaa bihii lɛ tswa Loo Agbó+ lɛ; amɛkɛ tsei wo he,+ ni amɛtara naa shinai, ni amɛkɛ klɔklɔi wo naa ni amɛkɛ adabaŋi* wo sɛɛ. 4 Ni mɔ ni saa gbogbo lɛ kɛtsa amɛnɔ ji Meremot,+ Hakoz binuu Uria binuu lɛ, ni mɔ ni saa gbogbo lɛ kɛtsa amɛnɔ ji Meshulam,+ Meshezabel binuu Berekia binuu lɛ, ni mɔ ni saa gbogbo lɛ kɛtsa amɛnɔ ji Zadok, Baana binuu lɛ. 5 Mɛi ni saa gbogbo lɛ kɛtsa amɛnɔ ji Tekoabii lɛ,+ shi amɛteŋ hii hiɛnaanɔbii lɛ baaa amɛhe shi koni amɛtsu nii yɛ amɛnuŋtsɔmɛi lɛ ashishi.*

6 Yoiada, Pasea binuu lɛ kɛ Meshulam, Besodeia binuu lɛ saa Maŋ Momo Lɛ Agbó+ lɛ; amɛkɛ tsei wo he ni amɛtara naa shinai, ni amɛkɛ klɔklɔi wo naa ni amɛkɛ adabaŋi* wo sɛɛ. 7 Ni Melatia, Gibeonnyo+ lɛ, kɛ Yadon, Meronotnyo lɛ saa gbogbo lɛ kɛtsa amɛnɔ, hii ni jɛ Gibeon kɛ Mizpa,+ ni amɛyɛ amralo ni kwɛɔ kpokpaa ni yɔɔ Faa Lɛ Sɛɛ*+ lɛ nɔ lɛ shishi.* 8 Ni Uziel, Harhaia binuu lɛ, ni ji shika tsuru ŋaalɔi lɛ ateŋ mɔ kome lɛ, saa gbogbo lɛ kɛtsa amɛnɔ, ni Hanania, ni ji tsofa-kɛ-ŋma futulɔi* lɛ ateŋ mɔ kome lɛ, saa gbogbo lɛ kɛtsa enɔ; ni amɛkɛ tɛi* kala shikpɔŋ aahu kɛyashi Gbogbo Lɛkɛtɛɛ+ lɛ he yɛ Yerusalem. 9 Ni Refaia, Hur binuu lɛ, ni ji Yerusalem kpokpaa lɛ mlijaa fã nɔ lumɔ lɛ saa gbogbo lɛ kɛtsa amɛnɔ. 10 Ni Yedaia, Harumaf binuu lɛ, saa gbogbo lɛ kɛtsa amɛnɔ yɛ lɛ diɛŋtsɛ eshĩa lɛ hiɛ, ni Hatush, Hashabneia binuu lɛ saa gbogbo lɛ kɛtsa enɔ.

11 Malkia, Harim+ binuu lɛ, kɛ Hashub, Pahat-moab+ binuu lɛ saa gbogbo lɛ fã kroko* kɛ agbɛnɛ hu, Flɔnɔi Amɔɔ+ lɛ. 12 Ni Shalum, Halohesh binuu lɛ, ni ji Yerusalem kpokpaa lɛ mlijaa fã nɔ lumɔ lɛ kɛ ebiyei lɛ saa gbogbo lɛ kɛtsa amɛnɔ.

13 Hanun kɛ mɛi ni yɔɔ Zanoa+ lɛ saa Jɔɔ Agbó+ lɛ; amɛtswa agbó lɛ ni amɛtara naa shinai, ni amɛkɛ klɔklɔi wo naa ni amɛkɛ adabaŋi* wo sɛɛ, ni amɛsaa gbogbo lɛ fã ni kɛlɛ ji ninetalɔi* 1,000 lɛ kɛyashi Lamulu Agbó*+ lɛ he. 14 Malkia, Rekab binuu lɛ, ni ji Bet-hakerem+ kpokpaa lɛ nɔ lumɔ lɛ saa Lamulu Agbó lɛ; etswa agbó lɛ ni etara naa shinai, ni ekɛ klɔklɔi wo naa, ni ekɛ adabaŋi* wo sɛɛ.

15 Shalun, Kolhoze binuu lɛ, ni ji Mizpa+ kpokpaa lɛ nɔ lumɔ lɛ saa Nuhiŋmɛi Agbó+ lɛ; etswa agbó lɛ ni ewo yiteŋ, etara naa shinai, ni ekɛ klɔklɔi wo naa, ni ekɛ adabaŋi* wo sɛɛ, ni esaa gbogbo lɛ ni yɔɔ Gɔɔta Kpaakpo+ lɛ he lɛ hu kɛyashi Maŋtsɛ Abɔɔ+ lɛ he, kɛ agbɛnɛ hu kɛyashi Atrakpoi+ ni kpelekeɔ shi kɛjɛɔ David Maŋ+ lɛ mli lɛ he.

16 Lɛ esɛɛ lɛ, Nehemia, Azbuk binuu lɛ, ni ji Bet-zur+ kpokpaa lɛ mlijaa fã nɔ lumɔ lɛ saa gbogbo lɛ yɛ David Gɔɔ*+ lɛ hiɛ kɛyashi kpaakpo+ ni afee lɛ he, kɛ agbɛnɛ hu, kɛyashi Hewalɔi Ashĩa lɛ he.

17 Lɛ esɛɛ lɛ, Levibii lɛ saa gbogbo lɛ: Rehum, Bani binuu lɛ; ni Hashabia, ni ji Keila+ kpokpaa lɛ mlijaa fã nɔ lumɔ lɛ damɔ ekpokpaa lɛ najiaŋ esaa gbogbo lɛ kɛtsa enɔ. 18 Lɛ esɛɛ lɛ, enyɛmimɛi hii lɛ saa gbogbo lɛ: Bawai, Henadad binuu lɛ, ni ji Keila kpokpaa lɛ mlijaa fã nɔ lumɔ lɛ.

19 Ni Ezer, Yeshua+ binuu lɛ, ni ji Mizpa nɔ lumɔ lɛ, saa gbogbo lɛ fã kroko kɛtsa enɔ yɛ he ni akwɔɔ kɛyaa Tawuu Nii Atoohe ni yɔɔ Gbogbo Sɛɛ Akulashiŋ+ lɛ hiɛ lɛ.

20 Lɛ esɛɛ lɛ, Baruk, Zabai+ binuu lɛ, kɛ hiɛdɔɔ tsu nii kɛsaa gbogbo lɛ fã kroko, kɛjɛ Gbogbo Sɛɛ Akulashiŋ lɛ nɔ kɛyashi he ni atsɔɔ kɛboteɔ osɔfonukpa Eliashib+ shĩa lɛ.

21 Lɛ esɛɛ lɛ, Meremot,+ Hakoz binuu Uria binuu lɛ, saa gbogbo lɛ fã kroko, kɛjɛ he ni atsɔɔ kɛboteɔ Eliashib shĩa lɛ kɛyashi Eliashib shĩa lɛ naagbeehe lɛ.

22 Ni lɛ esɛɛ lɛ, osɔfoi lɛ, hii ni jɛ Yordan kpokpaa+ lɛ nɔ lɛ,* saa gbogbo lɛ. 23 Amɛsɛɛ lɛ, Benyamin kɛ Hashub saa gbogbo lɛ yɛ amɛ diɛŋtsɛ amɛshĩa lɛ hiɛ. Ni amɛsɛɛ lɛ, Azaria, Anania binuu Maaseia binuu lɛ saa gbogbo lɛ yɛ lɛ diɛŋtsɛ eshĩa lɛ masɛi. 24 Lɛ esɛɛ lɛ, Binui, Henadad binuu lɛ saa gbogbo lɛ fã kroko, kɛjɛ Azaria shĩa lɛ he kɛyashi Gbogbo Sɛɛ Akulashiŋ+ lɛ he, kɛ agbɛnɛ hu, kɛyashi gbogbo lɛ koŋ lɛ he.

25 Lɛ esɛɛ lɛ, Palal, Uzai binuu lɛ saa gbogbo lɛ yɛ Gbogbo Sɛɛ Akulashiŋ lɛ kɛ mɔɔ ni jeɔ kpo kɛjeɔ Maŋtsɛ Shĩa+ lɛ he lɛ, ni ji ŋwɛigbɛ nɔ lɛ ni yɔɔ Bulɔi Akpo+ lɛ nɔ lɛ hiɛ lɛ. Ni lɛ esɛɛ lɛ, Pedaia, Parosh+ binuu lɛ saa gbogbo lɛ kɛtsa enɔ.

26 Ni sɔlemɔ shĩa sɔɔlɔi*+ ni hi Ofel+ lɛ saa gbogbo lɛ kɛyashi Nu Agbó+ lɛ hiɛ yɛ bokãgbɛ, kɛ agbɛnɛ kɛyashi mɔɔ ni eje kpo yɛ gbogbo lɛ mli lɛ he.

27 Amɛsɛɛ lɛ, Tekoabii+ lɛ saa gbogbo lɛ fã kroko, kɛjɛ mɔɔ wulu ni eje kpo yɛ gbogbo lɛ mli lɛ he kɛyashi Ofel gbogbo lɛ he.

28 Osɔfoi lɛ saa gbogbo lɛ yɛ Okpɔŋɔ Agbó+ lɛ yiteŋgbɛ yɛ amɛteŋ mɔ fɛɛ mɔ shĩa hiɛ.

29 Amɛsɛɛ lɛ, Zadok,+ Imer binuu lɛ saa gbogbo lɛ yɛ lɛ diɛŋtsɛ eshĩa lɛ hiɛ.

Ni lɛ esɛɛ lɛ, Shemaia, Shekania binuu lɛ, ni ji Bokãgbɛ Agbó+ lɛ naa kwɛlɔ lɛ saa gbogbo lɛ.

30 Lɛ esɛɛ lɛ, Hanania, Shelemia binuu lɛ, kɛ Hanun, Zalaf binuu ni ji ekpaa nɔ lɛ, saa gbogbo lɛ fã kroko.

Ni lɛ esɛɛ lɛ, Meshulam,+ Berekia binuu lɛ, saa gbogbo lɛ yɛ lɛ diɛŋtsɛ etsũ* lɛ hiɛ.

31 Lɛ esɛɛ lɛ, Malkia, ni ji shika tsuru ŋaalɔi akuu lɛ mli nyo lɛ, saa gbogbo lɛ kɛyashi sɔlemɔ shĩa sɔɔlɔi*+ lɛ kɛ jarayelɔi atsũ lɛ he, yɛ Niiamlitaomɔ Agbó lɛ hiɛ, kɛ agbɛnɛ hu, kɛyashi ŋwɛi asa ni ma gbogbo lɛ koŋ lɛ nɔ lɛ he.

32 Ni shika tsuru ŋaalɔi akuu lɛ kɛ jarayelɔi lɛ saa gbogbo ni yɔɔ ŋwɛi asa ni yɔɔ gbogbo lɛ koŋ lɛ nɔ lɛ kɛ Gwantɛŋi Agbó+ lɛ teŋ lɛ.

4 Agbɛnɛ be ni Sanbalat+ nu akɛ wɔmiitswa gbogbo lɛ ekoŋŋ lɛ, amrɔ nɔŋŋ ni emli fu ni emli wo la waa, ni ebɔi Yudafoi lɛ ahe fɛo yeli. 2 Ni ekɛɛ yɛ enyɛmimɛi hii lɛ kɛ Samaria asraafoi lɛ ahiɛ akɛ: “Mɛni Yudafoi wudɔwudɔi nɛɛ feɔ nɛɛ? Ani amɛ diɛŋtsɛ amɛbaanyɛ amɛfee enɛ? Ani amɛbaashã afɔlei? Ani amɛbaagbe naa yɛ gbi kome mli? Ani amɛbaatsĩɛ tɛi ni eshã nɛɛ ahiɛ kɛjɛ gbogboi ni efee koikoi nɛɛ amli?”+

3 Kɛkɛ ni Tobia,+ Amonnyo+ ni no mli lɛ edamɔ emasɛi lɛ kɛɛ akɛ: “Kɛ́ osɔ po kwɔ nɔ ni amɛmaa lɛ, ebaakumɔ tɛ gbogbo ni amɛtswaa lɛ eshwie shi.”

4 No hewɔ lɛ misɔle akɛ: “Ao wɔ-Nyɔŋmɔ, bo toi, ejaakɛ aagbe wɔhe guɔ;+ hã wiemɔ ni amɛwieɔ amɛshiɔ wɔ lɛ aku sɛɛ abua amɛ diɛŋtsɛ amɛyiteŋ,+ ni ohã amɛtsɔ tamɔ ta mli nii, ni aŋɔ amɛ nom kɛya shikpɔŋ kroko nɔ. 5 Kaatsimɔ amɛtɔmɔi lɛ anɔ, ni kaagbe amɛhe eshai lɛ hu yɛ ohiɛ,+ ejaakɛ amɛjɛ́ mɛi ni tswaa gbogbo lɛ.”

6 No hewɔ lɛ, wɔtee nɔ wɔtswa gbogbo lɛ, ni wɔtsara gbogbo muu lɛ fɛɛ, ni wɔtswa kɛyashi ekwɔlɛ lɛ mlijaa fã, ni maŋbii lɛ tee nɔ amɛtsu nitsumɔ lɛ kɛ amɛtsui fɛɛ.

7 No hewɔ lɛ, be ni Sanbalat, kɛ Tobia,+ kɛ Arabiabii+ lɛ, kɛ Amonbii lɛ, kɛ Ashdodbii+ lɛ nu akɛ aasaa Yerusalem gbogboi lɛ, ni nitsumɔ lɛ miiya nɔ jogbaŋŋ, ni aatsimɔ fɔji ni kamɔ amɛmli lɛ hu lɛ, amɛmli fu waa. 8 Ni amɛkpaŋ akɛ amɛbaaba ni amɛkɛ Yerusalem abawu, koni amɛwo maŋ lɛ mli hirihiri hu. 9 Shi wɔsɔle wɔhã wɔ-Nyɔŋmɔ lɛ, ni wɔto bulɔi yɛ amɛhewɔ koni amɛbu jetsɛremɔ kɛ jenamɔ fɛɛ.

10 Shi no mli lɛ, Yudabii lɛ miikɛɛ akɛ: “Apaafoi* lɛ ahewalɛ etã, ni gbogboi ni ekumɔ babaoo jwere shi; wɔnyɛŋ wɔtswa gbogbo lɛ kɔkɔɔkɔ.”

11 Ni wɔhenyɛlɔi lɛ tee nɔ amɛkɛɛ akɛ: “Be ni amɛaahɛle shi loo be ni amɛaana lɛ, wɔbote amɛteŋ ni wɔgbe amɛ ni wɔhã akpa nitsumɔ lɛ.”

12 Be fɛɛ be ni Yudafoi ni yɔɔ amɛmasɛi lɛ baaba wɔŋɔɔ lɛ, amɛkɛɔ wɔ shii abɔ* akɛ: “Amɛbaajɛ he fɛɛ he amɛkɛ wɔ abawu.”

13 No hewɔ lɛ, mihã hii yadamɔ gbogbo lɛ sɛɛ hei ni fɔji kamɔ ni kwɔlɔɔɔ lɛ, ni mito amɛ yɛ wekui anaa, ni amɛhiɛ klantei, kɛ akpɔlɔi, kɛ gãii. 14 Be ni mina akɛ amɛmiishe gbeyei lɛ, mite shi amrɔ nɔŋŋ ni mikɛɛ abladei lɛ,+ kɛ nɔkwɛlɔi lɛ, kɛ maŋbii ni eshwɛ lɛ akɛ: “Nyɛkashea amɛ gbeyei.+ Nyɛkaia Yehowa, mɔ ni je agbo ni he yɔɔ gbeyei lɛ;+ nyɛwua nyɛhãa nyɛnyɛmimɛi hii lɛ, kɛ nyɛbihii kɛ nyɛbiyei lɛ, kɛ nyɛŋamɛi kɛ nyɛshĩai lɛ.”

15 Agbɛnɛ, be ni wɔhenyɛlɔi lɛ nu akɛ wɔná wɔle nɔ ni amɛfeɔ lɛ, ni anɔkwa Nyɔŋmɔ lɛ efite amɛyiŋtoo lɛ, wɔ fɛɛ wɔku wɔsɛɛ wɔyatsu nii yɛ gbogbo lɛ he. 16 Kɛjɛ nakai gbi lɛ nɔ kɛyaa lɛ, mihii lɛ ateŋ mlijaa fã tsuɔ nitsumɔ lɛ,+ ni amɛteŋ mlijaa fã hiɛɔ akpɔlɔi lɛ, kɛ tsɛŋi lɛ, kɛ gãii lɛ, kɛ damai lɛ. Ni lumɛi+ lɛ damɔ Yuda shĩa muu lɛ fɛɛ sɛɛ, 17 ni ji mɛi ni tswaa gbogbo lɛ. Mɛi ni tereɔ jatsui lɛ kɛ amɛnine kome tsu nii ni amɛkɛ amɛnine kome hu hiɛ tawuu nii.* 18 Ni mɛi ni tswaa gbogbo lɛ ateŋ mɔ fɛɛ mɔ klante ŋmɔ ehɛ be ni amɛtswaa gbogbo lɛ, ni mɔ ni baakpã tɛtɛrɛmantɛrɛ*+ lɛ damɔ mimasɛi.

19 Kɛkɛ ni mikɛɛ abladei lɛ, kɛ nɔkwɛlɔi lɛ, kɛ maŋbii ni eshwɛ lɛ akɛ: “Nitsumɔ lɛ da ni efa, ni wɔgbɛ wɔshwã gbogbo lɛ he, ni gbɛ kamɔ wɔteŋ tsɔ. 20 Kɛ́ nyɛnu tɛtɛrɛmantɛrɛ* gbɛɛmɔ lɛ pɛ lɛ, nyɛbuaa nyɛhe naa kɛbaa he ni wɔyɔɔ lɛ. Wɔ-Nyɔŋmɔ lɛ baawu ahã wɔ.”+

21 No hewɔ lɛ, be ni wɔtsuɔ nii lɛ, hii lɛ ateŋ mlijaa fã lɛ hu hiɛ akpɔlɔi lɛ, kɛjɛ leebi maŋkpa kɛyashi be ni ŋulamii lɛ pue. 22 Nakai beiaŋ lɛ, mikɛɛ maŋbii lɛ akɛ: “Mɔ fɛɛ mɔ kɛ esɔɔlɔ awɔ Yerusalem maŋ lɛ mli, koni amɛbu wɔhe nyɔɔŋ, ni amɛtsu nii kɛ́ je tsɛre.” 23 No hewɔ lɛ, mi jio, minyɛmimɛi hii lɛ jio, misɔɔlɔi lɛ jio,+ bulɔi ni nyiɛɔ misɛɛ lɛ jio, wɔjieee wɔtadei, wɔteŋ mɔ fɛɛ mɔ hiɛ etawuu nii yɛ eninejurɔ.

5 Shi maŋbii lɛ kɛ amɛŋamɛi lɛ bolɔ waa amɛwo amɛnyɛmimɛi Yudafoi lɛ.+ 2 Amɛteŋ mɛi komɛi kɛɛ: “Wɔ kɛ wɔbihii kɛ wɔbiyei lɛ ayi fa. Esa akɛ wɔná ŋmaa* wɔye koni wɔkagboi.” 3 Amɛteŋ mɛi komɛi hu kɛɛ: “Wɔkɛ wɔŋmɔji kɛ wɔwain ŋmɔji kɛ wɔshĩai toɔ awaba yɛ hɔmɔ lɛ hewɔ koni wɔná ŋmaa wɔye.” 4 Mɛi komɛi hu miikɛɛ: “Wɔkɛ wɔŋmɔji kɛ wɔwain ŋmɔji lɛ eyafa shika koni wɔnyɛ wɔwo maŋtsɛ too lɛ.+ 5 Heloo kɛ lá kome ji wɔ kɛ wɔnyɛmimɛi lɛ fɛɛ,* ni wɔbii lɛ tamɔ amɛbii lɛ nɔŋŋ; shi bianɛ lɛ, nɔ ni eshwɛ pɛ ji ni wɔbaahã wɔbihii kɛ wɔbiyei lɛ ayasɔmɔ akɛ nyɔji, ni wɔbiyei lɛ ekomɛi po miisɔmɔ akɛ nyɔji momo.+ Ni wɔnyɛɛɛ wɔfee he nɔ ko, ejaakɛ wɔŋmɔji kɛ wɔwain ŋmɔji lɛ etsɔmɔ mɛi krokomɛi anɔ.”

6 Be ni minu amɛbolɔmɔ kɛ wiemɔi nɛɛ, mimli fu waa. 7 No hewɔ lɛ, misusu nibii nɛɛ ahe yɛ mitsuiŋ, ni mimli fu abladei lɛ, kɛ nɔkwɛlɔi lɛ, ni mikɛɛ amɛ akɛ: “Nyɛteŋ mɔ fɛɛ mɔ miihe he kpa kɛmiijɛ lɛ diɛŋtsɛ enyɛmi dɛŋ.”+

Agbɛnɛ hu, mitsɛ kpee wulu yɛ amɛhewɔ. 8 Ni mikɛɛ amɛ akɛ: “Wɔbɔ mɔdɛŋ fɛɛ ni wɔbaanyɛ, ni wɔhé wɔ diɛŋtsɛ wɔnyɛmimɛi Yudafoi ni ahɔ̃ɔ amɛ ahã jeŋmaji lɛ; shi amrɔ nɛɛ, ani nyɛbaahɔ̃ɔ nyɛ diɛŋtsɛ nyɛnyɛmimɛi lɛ,+ koni aku sɛɛ ahɔ̃ɔ amɛ ahã wɔ ekoŋŋ?” Kɛkɛ ni amɛdaaŋ jɔ, ni amɛnaaa nɔ ni amɛbaakɛɛ dɔŋŋ. 9 Kɛkɛ ni mikɛɛ akɛ: “Nɔ ni nyɛfeɔ lɛ ehiii. Ani esaaa akɛ nyɛnyiɛɔ akɛ mɛi ni sheɔ Nyɔŋmɔ gbeyei+ koni jeŋmaji lɛ, ni ji wɔhenyɛlɔi lɛ akabɔ wɔ ahora? 10 Agbɛnɛ hu, bɛ mi kɛ minyɛmimɛi hii lɛ, kɛ misɔɔlɔi lɛ hu faa amɛ shika kɛ ŋmaa? Nyɛfainɛ, nyɛhãa wɔkpaa he kpa ni wɔheɔ yɛ amɛdɛŋ lɛ hemɔ.+ 11 Nyɛfainɛ, nyɛkɛ amɛŋmɔji+ kɛ amɛwain ŋmɔji, kɛ oliv ŋmɔji ni amɛyɔɔ lɛ, kɛ amɛshĩai lɛ ahãa amɛ, ni agbɛnɛ hu, nyɛkɛ shika lɛ, kɛ ŋmaa lɛ, kɛ wain hee lɛ, kɛ mu lɛ ni nyɛheɔ akɛ he kpa lɛ mlijai oha mli ekome ahãa amɛ ŋmɛnɛ gbi nɛɛ.”*

12 Ni amɛhere nɔ akɛ: “Wɔkɛ nibii nɛɛ baaku sɛɛ ahã amɛ, ni wɔheŋ nɔ ko yɛ amɛdɛŋ. Wɔbaafee bɔ ni owie lɛ pɛpɛɛpɛ.” No hewɔ lɛ, mitsɛ osɔfoi lɛ ni mihã hii nɛɛ kã kitã akɛ amɛbaaye shi ni amɛwo lɛ nɔ. 13 Agbɛnɛ hu, mikpokpo mitade lɛ mli* ni mikɛɛ: “Nɛkɛ ji bɔ ni anɔkwa Nyɔŋmɔ lɛ baakpokpo nuu fɛɛ nuu ni yeee shiwoo nɛɛ nɔ lɛ kɛje eshĩa kɛ enibii amli, ni nɛkɛ ji bɔ ni abaakpokpo lɛ ashwie.” Kɛkɛ ni asafo muu lɛ fɛɛ here nɔ akɛ: “Amen!”* Ni amɛjie Yehowa yi, ni maŋbii lɛ ye shi ni amɛwo lɛ nɔ.

14 Agbɛnɛ hu, kɛjɛ gbi ni Maŋtsɛ Artashasta+ wó mi amɛnɔ amralo+ yɛ Yuda shikpɔŋ lɛ nɔ, ni ji kɛjɛ enɔyeli afi ni ji 20 lɛ mli+ kɛyashi enɔyeli afi ni ji 32 lɛ mli,+ ni ji afii 12 lɛ, mi kɛ minyɛmimɛi hii lɛ ateŋ mɔ ko mɔ ko heko niyenii ni ahãa amralo fɛɛ amralo akɛ egbɛnaa niyenii lɛ eko pɛŋ.+ 15 Shi amralofoi ni tsɔ mihiɛ lɛ fɛɛ kɛ jatsu fɔ̃ɔ maŋbii lɛ anɔ, ni amɛheɔ jwiɛtɛi shekeli* 40 kɛjɛɔ maŋbii lɛ adɛŋ daa gbi akɛ niyenii* kɛ wain shika. Agbɛnɛ hu, amɛsɔɔlɔi lɛ wa maŋbii lɛ ayi. Shi akɛni misheɔ Nyɔŋmɔ gbeyei hewɔ+ lɛ, mifeee nakai.+

16 Agbɛnɛ hu, mikɛ mihe wo nitsumɔ ni atsu yɛ gbogbo nɛɛ he lɛ mli, ni wɔŋɔɔɔ shikpɔŋ ko wɔhãaa wɔhe;+ misɔɔlɔi lɛ fɛɛ bua amɛhe naa yɛ jɛmɛ kɛhã nitsumɔ lɛ. 17 Yudafoi kɛ nɔkwɛlɔi 150 yeɔ nii yɛ mikpɔlɔ lɛ he, soro mɛi ni jɛ jeŋmaji lɛ amli amɛbaa wɔŋɔɔ lɛ. 18 Daa gbi lɛ, akɛ tsinanuu kome, kɛ gwantɛŋi ekpaa ni hi fe fɛɛ, kɛ kooloi ni yɔɔ fiji hoɔ nii ahãa mi,* ni gbii nyɔŋma fɛɛ gbii nyɔŋma lɛ, mihãa akɛ wain srɔtoi babaoo bahãa wɔ. Enɛ fɛɛ sɛɛ lɛ, mibiii niyenii ni akɛhãa amralo akɛ egbɛnaa nii lɛ eko yɛ maŋbii lɛ adɛŋ, ejaakɛ no mli lɛ, jatsu ni maŋbii lɛ tere lɛ tsii momo. 19 Ao mi-Nyɔŋmɔ, kaimɔ mi ni ofee mi ejurɔ yɛ nibii fɛɛ ni mifee mihã maŋ nɛɛ hewɔ.+

6 Agbɛnɛ be ni ayakɛɛ Sanbalat, kɛ Tobia,+ kɛ Geshem, Arabianyo+ lɛ, kɛ wɔhenyɛlɔi ni eshwɛ lɛ akɛ mitswa gbogbo lɛ ekoŋŋ,+ ni fɔji bɛ mli dɔŋŋ lɛ (no mli lɛ, mitarako agbói lɛ anaa shinai lɛ po),+ 2 amrɔ nɔŋŋ ni Sanbalat kɛ Geshem tsu abakɛɛ mi akɛ: “Hã ni wɔto be ni wɔkpe yɛ akrowai ni yɔɔ Ono+ Jɔɔ lɛ mli lɛ eko mli.” Shi no mli lɛ, amɛmiitsɔ̃ ŋaa koni amɛye mi awui. 3 No hewɔ lɛ, mitsu mɛi kɛtee amɛŋɔɔ akɛ: “Nitsumɔ ni mitsuɔ lɛ da, ni minyɛŋ makpeleke shi. Mɛni hewɔ mahã akpa nitsumɔ lɛ, ni mashi maba nyɛŋɔɔ?” 4 Amɛtsu kɛba miŋɔɔ shii ejwɛ sɔŋŋ kɛ nakai sane kome too lɛ nɔŋŋ, ni eko fɛɛ eko mli lɛ, hetoo kome too lɛ nɔŋŋ mihãa amɛ.

5 Kɛkɛ ni Sanbalat kɛ nakai sane kome too lɛ nɔŋŋ tsu esɔɔlɔ lɛ kɛba miŋɔɔ shii enumɔ nɔ, ni ehiɛ wolo ni asɔoko naa yɛ edɛŋ. 6 Aŋma yɛ wolo lɛ mli akɛ: “Aawie yɛ jeŋmaji lɛ ateŋ, ni Geshem+ hu miikɛɛ nakai akɛ, bo kɛ Yudafoi lɛ miitsɔ̃ ŋaa koni nyɛtse atua.+ Ni no hewɔ otswaa gbogbo lɛ; ni saji nɛɛ tsɔɔ akɛ obaatsɔ amɛnɔ maŋtsɛ. 7 Agbɛnɛ hu, owó gbalɔi koni amɛshiɛ yɛ Yerusalem fɛɛ akɛ, ‘Maŋtsɛ ko yɛ Yuda!’ Abaayakɛɛ maŋtsɛ lɛ nibii nɛɛ. No hewɔ lɛ, ba ni wɔsusu he.”

8 Shi mitsu ni ayakɛɛ lɛ akɛ: “Afeko nibii ni owieɔ nɛɛ eko eko; bo diɛŋtsɛ otsui mli ojɛɔ ofoɔ nakai saji otãa.” 9 Ejaakɛ no mli lɛ, amɛ fɛɛ amɛmiitao amɛwo wɔhe gbeyei, amɛkɛɔ akɛ: “Amɛnijiaŋ baaje wui, ni amɛgbeŋ naa.”+ Agbɛnɛ, mi-Nyɔŋmɔ, wajemɔ minijiaŋ.+

10 Kɛkɛ ni mitee Shemaia, Mehetabel binuu Delaia binuu lɛ shĩa lɛ be ni etsĩ ehe naa yɛ jɛmɛ. Ekɛɛ akɛ: “Hã wɔto be ni wɔkpe yɛ anɔkwa Nyɔŋmɔ lɛ shĩa lɛ, yɛ sɔlemɔ shĩa lɛ mli, ni hã wɔŋamɔ sɔlemɔ shĩa lɛ shinai lɛ, ejaakɛ amɛmiiba ni amɛbagbe bo. Nyɔɔŋ mli amɛbaaba amɛbagbe bo.” 11 Shi mikɛɛ akɛ: “Ani esa akɛ nuu ni tamɔ mi ajo foi? Ani nuu ni tamɔ mi baayabote sɔlemɔ shĩa lɛ mli ni ehiɛ akã?+ Miboteŋ mli!” 12 Kɛkɛ ni miyɔse akɛ jeee Nyɔŋmɔ ni tsu lɛ, shi Tobia kɛ Sanbalat+ ni ebɔ lɛ apaa koni egba gbalɛ nɛɛ eshi mi. 13 Abɔ lɛ apaa koni ewo mihe gbeyei, ni ehã mifee esha, koni amɛná nɔ ko amɛdamɔ nɔ amɛfite migbɛ́i koni amɛbɔ mi ahora.

14 Ao Nyɔŋmɔ, kaimɔ Tobia+ kɛ Sanbalat kɛ nifeemɔi nɛɛ, kɛ agbɛnɛ hu, gbalɔ yoo Noadia kɛ gbalɔi krokomɛi ni bɔɔ mɔdɛŋ akɛ amɛbaawo mihe gbeyei daa nɛɛ.

15 No hewɔ lɛ, akɛ gbii 52 tswa gbogbo lɛ, ni agbe naa yɛ Elul* nyɔɔŋ lɛ nɔ gbi ni ji 25 lɛ nɔ.

16 Be ni wɔhenyɛlɔi lɛ fɛɛ nu he, ni jeŋmaji ni bɔle wɔ lɛ fɛɛ na nɔŋŋ lɛ, amɛhiɛ gboi waa,*+ ni amɛyɔse akɛ wɔ-Nyɔŋmɔ lɛ ji mɔ ni ye ebua ni agbe nitsumɔ nɛɛ naa. 17 Yɛ nakai gbii lɛ amli fɛɛ lɛ, Yuda abladei+ lɛ ŋmalaa woji pii kɛyahãa Tobia, ni Tobia hu hãa amɛ hetoo. 18 Mɛi ni yɔɔ Yuda lɛ ateŋ mɛi babaoo ekã lɛ kitã akɛ amɛkɛ lɛ baafee ekome, ejaakɛ no mli lɛ, eji Ara+ binuu Shekania shaanuu, ni ebinuu Yehohanan kɛ Meshulam+ biyoo ebote gbalashihilɛ mli; Berekia binuu ji Meshulam. 19 Agbɛnɛ hu, amɛbawieɔ ehe saji kpakpai amɛtsɔɔ mi daa. Kɛkɛ lɛ, amɛyabɔ lɛ nibii ni miwieɔ lɛ. Kɛkɛ lɛ, Tobia hu eŋmala woji koni ekɛwo mihe gbeyei.+

7 Be ni atswa gbogbo lɛ agbe naa nɔŋŋ lɛ,+ mikɛ shinai lɛ tara naa;+ kɛkɛ ni ahã agbonaakwɛlɔi+ lɛ, kɛ lalɔi+ lɛ, kɛ Levibii+ lɛ yatsu amɛnitsumɔi lɛ. 2 Kɛkɛ ni mikɛ Yerusalem wo minyɛmi nuu Hanani+ dɛŋ kɛ agbɛnɛ hu Hanania, ni ji Mɔɔ+ lɛ nɔkwɛlɔ lɛ dɛŋ, ejaakɛ nuu ni anyɛɔ amuɔ afɔ̃ɔ enɔ waa ni sheɔ anɔkwa Nyɔŋmɔ lɛ gbeyei+ ji lɛ fe mɛi babaoo. 3 No hewɔ lɛ, mikɛɛ amɛ akɛ: “Nyɛkagbelea Yerusalem agbói lɛ kɛyashi hulu lɛ naa baawa, ni kɛ́ amɛmiibu lɛ, amɛŋamɔ shinai lɛ ni amɛla sɛɛ. Ni nyɛhãa Yerusalembii lɛ asɔmɔa akɛ bulɔi, mɔ fɛɛ mɔ abu yɛ he ni akɛ lɛ baato lɛ, ni mɔ fɛɛ mɔ hu abu yɛ lɛ diɛŋtsɛ eshĩa hiɛ.” 4 No mli lɛ, maŋ lɛ mli lɛɛ ni eda, ni mɛi fioo pɛ yɔɔ mli,+ ni amamɔko tsũi lɛ hu.

5 Shi mi-Nyɔŋmɔ lɛ kɛwo mitsui mli koni mibua abladei lɛ, kɛ nɔkwɛlɔi lɛ, kɛ maŋbii lɛ anaa koni aŋmala amɛgbɛ́ii yɛ wekutɔkpaa wolo lɛ mli.+ Kɛkɛ ni mina wolo ni aŋmala mɛi ni kwɔ kɛba klɛŋklɛŋ lɛ agbɛ́ii yɛ mli yɛ amɛwekutɔkpaa lɛ naa, ni nɔ ni aŋma yɛ mli lɛ nɛ:

6 Agbɛnɛ kpokpaa lɛ* nɔ bii ni jɛ mɛi ni Babilon maŋtsɛ Nebukadnezar+ ŋɔ amɛ nom kɛtee Babilon+ lɛ ateŋ ni ku amɛsɛɛ kɛba Yerusalem kɛ Yuda ni amɛteŋ mɔ fɛɛ mɔ tee emaŋ lɛ nɛ,+ 7 ni ji mɛi ni kɛ Zerubabel,+ kɛ Yeshua,+ kɛ Nehemia, kɛ Azaria, kɛ Raamia, kɛ Nahamani, kɛ Mordekai, kɛ Bilshan, kɛ Misperet, kɛ Bigvai, kɛ Nehum, kɛ Baanah ku amɛsɛɛ kɛba lɛ.

Israel hii lɛ ayibɔ nɛ:+ 8 Parosh bii lɛ, 2,172; 9 Shefatia bii lɛ, 372; 10 Ara+ bii lɛ, 652; 11 Pahat-moab+ bii lɛ ni jɛ Yeshua shĩa lɛ, kɛ Yoab+ shĩa lɛ, 2,818; 12 Elam+ bii lɛ, 1,254; 13 Zatu bii lɛ, 845; 14 Zakai bii lɛ, 760; 15 Binui bii lɛ, 648; 16 Bebai bii lɛ, 628; 17 Azgad bii lɛ, 2,322; 18 Adonikam bii lɛ, 667; 19 Bigvai bii lɛ, 2,067; 20 Adin bii lɛ, 655; 21 Ater bii lɛ ni jɛ Hezekia shĩa lɛ, 98; 22 Hashum bii lɛ, 328; 23 Bezai bii lɛ, 324; 24 Harif bii lɛ, 112; 25 Gibeon+ bii lɛ, 95; 26 Betlehem kɛ Netofa hii lɛ, 188; 27 Anatot+ hii lɛ, 128; 28 Bet-azmawet hii lɛ, 42; 29 Kiriat-yearim,+ kɛ Kefira, kɛ Beerot+ hii lɛ, 743; 30 Rama kɛ Geba+ hii lɛ, 621; 31 Mikmas+ hii lɛ, 122; 32 Betel+ kɛ Ai+ hii lɛ, 123; 33 Nebo kroko lɛ hii lɛ, 52; 34 Elam kroko lɛ bii lɛ, 1,254; 35 Harim bii lɛ, 320; 36 Yeriko bii lɛ, 345; 37 Lod bii lɛ, kɛ Hadid bii lɛ, kɛ Ono+ bii lɛ, 721; 38 Senaa bii lɛ, 3,930.

39 Osɔfoi lɛ hu nɛ:+ Yedaia bii lɛ ni jɛ Yeshua shĩa lɛ, 973; 40 Imer bii lɛ, 1,052; 41 Pashur+ bii lɛ, 1,247; 42 Harim+ bii lɛ, 1,017.

43 Levibii lɛ hu nɛ:+ Yeshua bii lɛ, kɛ Kadmiel+ bii lɛ ni jɛ Hodeva shĩa lɛ, 74. 44 Lalɔi lɛ hu nɛ:+ Asaf+ bii lɛ, 148. 45 Agbonaakwɛlɔi lɛ hu nɛ:+ Shalum bii lɛ, kɛ Ater bii lɛ, kɛ Talmon bii lɛ, kɛ Akub+ bii lɛ, kɛ Hatita bii lɛ, kɛ Shobai bii lɛ, 138.

46 Sɔlemɔ shĩa sɔɔlɔi* lɛ hu nɛ:+ Ziha bii lɛ, kɛ Hasufa bii lɛ, kɛ Tabaot bii lɛ, 47 kɛ Keros bii lɛ, kɛ Sia bii lɛ, kɛ Padon bii lɛ, 48 kɛ Lebana bii lɛ, kɛ Hagaba bii lɛ, kɛ Salmai bii lɛ, 49 kɛ Hanan bii lɛ, kɛ Gidel bii lɛ, kɛ Gahar bii lɛ, 50 kɛ Reaia bii lɛ, kɛ Rezin bii lɛ, kɛ Nekoda bii lɛ, 51 kɛ Gazam bii lɛ, kɛ Uza bii lɛ, kɛ Pasea bii lɛ, 52 kɛ Besai bii lɛ, kɛ Meunim* bii lɛ, kɛ Nefushesim bii lɛ, 53 kɛ Bakbuk bii lɛ, kɛ Hakufa bii lɛ, kɛ Harhur bii lɛ, 54 kɛ Bazlit bii lɛ, kɛ Mehida bii lɛ, kɛ Harsha bii lɛ, 55 kɛ Barkos bii lɛ, kɛ Sisera bii lɛ, kɛ Tema bii lɛ, 56 kɛ Nezia bii lɛ, kɛ Hatifa bii lɛ.

57 Solomon tsuji lɛ abii lɛ hu nɛ:+ Sotai bii lɛ, kɛ Soferet bii lɛ, kɛ Perida bii lɛ, 58 kɛ Yaala bii lɛ, kɛ Darkon bii lɛ, kɛ Gidel bii lɛ, 59 kɛ Shefatia bii lɛ, kɛ Hatil bii lɛ, kɛ Pokeret-hazebaim bii lɛ, kɛ Amon bii lɛ. 60 Sɔlemɔ shĩa sɔɔlɔi*+ lɛ fɛɛ, kɛ Solomon tsuji lɛ abii lɛ fɛɛ feɔ 392.

61 Naa mɛi ni kwɔ kɛjɛ Tel-mela, kɛ Tel-harsha, kɛ Kerub, kɛ Adon, kɛ Imer kɛba lɛ, shi amɛnyɛɛɛ amɛtsɔɔ amɛtsɛmɛi ashĩa loo he ni amɛjɛ, akɛ amɛji Israelbii loo amɛjeee Israelbii:+ 62 Delaia bii lɛ, kɛ Tobia bii lɛ, kɛ Nekoda bii lɛ, 642. 63 Ni yɛ osɔfoi lɛ ateŋ lɛ: Habaia bii lɛ, kɛ Hakoz+ bii lɛ, kɛ Barzilai, mɔ ni kɛ Gileadnyo Barzilai+ biyei lɛ ateŋ mɔ kome bote gbalashihilɛ mli ni akɛ amɛgbɛ́i wo lɛ lɛ bii lɛ. 64 Mɛnɛɛmɛi tao amɛwekutɔkpaa wolo lɛ koni amɛtsɔɔ weku mli ni amɛjɛ, shi anaaa, no hewɔ lɛ, ajie amɛ kɛje osɔfoi lɛ ateŋ.*+ 65 Amralo+ lɛ* kɛɛ amɛ akɛ, amɛkaye nibii ni yɔɔ krɔŋkrɔŋ fe fɛɛ+ lɛ eko kɛyashi abaaná osɔfo ko ni baanyɛ atsɔ Yurim kɛ Tumim lɛ nɔ abi nii.+

66 Asafo muu lɛ fɛɛ feɔ 42,360,+ 67 esoro amɛnyɔji hii kɛ yei+ ni yibɔ ji 7,337 lɛ; amɛyɛ hii kɛ yei lalɔi+ 245 hu. 68 Okpɔŋɔi ni amɛyɔɔ lɛ feɔ 736, ni teji okpɔŋɔi* ni amɛyɔɔ lɛ feɔ 245, 69 ni afukpɔŋɔi ni amɛyɔɔ lɛ feɔ 435, ni tejii ni amɛyɔɔ lɛ hu feɔ 6,720.

70 Tsɛmɛi ashĩai onukpai lɛ ekomɛi tsu onia kɛfi nitsumɔ lɛ sɛɛ.+ Amralo lɛ* hã shika tsuru drakmai* 1,000, kɛ tsɛnsii 50, kɛ osɔfo atadei+ 530 koni akɛwo jwetritoohe lɛ. 71 Ni tsɛmɛi ashiai onukpai lɛ ekomɛi hã shika tsuru drakmai 20,000, kɛ jwiɛtɛi minai* 2,200 koni akɛtsu nitsumɔ lɛ. 72 Ni maŋbii ni eshwɛ lɛ hã shika tsuru drakmai 20,000, kɛ jwiɛtɛi minai 2,000 kɛ osɔfo atadei 67.

73 Ni osɔfoi lɛ, kɛ Levibii lɛ, kɛ agbonaakwɛlɔi lɛ, kɛ lalɔi lɛ,+ kɛ maŋbii lɛ ekomɛi, kɛ sɔlemɔ shĩa sɔɔlɔi* lɛ yahi amɛmaji lɛ amli, ni Israelbii ni eshwɛ lɛ fɛɛ* hu yahi amɛmaji lɛ amli.+ Be ni nyɔɔŋ ni ji kpawo lɛ shɛ lɛ,+ no mli lɛ, Israelbii lɛ fɛɛ eyahi amɛmaji lɛ amli.+

8 Kɛkɛ ni maŋbii lɛ fɛɛ bua amɛhe naa kɛ jwɛŋmɔ kome yɛ henaabuamɔhe lɛ, yɛ Nu Agbó+ lɛ hiɛ, ni amɛkɛɛ Ezra+ ni ji woloŋmalɔ lɛ koni eyakɔ Mose Mla wolo+ lɛ ni Yehowa fã Israelbii lɛ ni amɛye nɔ lɛ kɛba.+ 2 No hewɔ lɛ, yɛ nyɔɔŋ ni ji kpawo lɛ klɛŋklɛŋ gbi lɛ nɔ lɛ,+ osɔfo Ezra kɛ Mla wolo lɛ badamɔ asafo+ lɛ ni ji hii, kɛ yei, kɛ mɛi fɛɛ ni kɛ́ amɛnu lɛ amɛbaanyɛ amɛnu shishi lɛ ahiɛ. 3 Ekane lɛ waa+ etsɔɔ hii lɛ, kɛ yei lɛ, kɛ mɛi fɛɛ ni baanyɛ anu shishi lɛ, yɛ henaabuamɔhe lɛ, yɛ Nu Agbó lɛ hiɛ, kɛjɛ leebi kɛyashi shwane fintiŋŋ; ni maŋbii lɛ bo Mla wolo lɛ mli wiemɔi lɛ toi jogbaŋŋ.+ 4 No mli lɛ, Ezra ni ji woloŋmalɔ lɛ damɔ kpoku ko ni akɛ tso fee lɛ nɔ; afee kpoku nɛɛ yɛ henaabuamɔ lɛ hewɔ. Ni mɛi ni damɔ emasɛi yɛ eninejurɔ nɔ ji Matitia, kɛ Shema, kɛ Anaia, kɛ Uria, kɛ Hilkia, kɛ Maaseia, ni mɛi ni damɔ ebɛku nɔ ji Pedaia, kɛ Mishael, kɛ Malkia,+ kɛ Hashum, kɛ Hash-badana, kɛ Zakaria, kɛ Meshulam.

5 Ezra gbele wolo lɛ mli yɛ maŋbii lɛ fɛɛ ahiɛ, ejaakɛ he ni edamɔ lɛ kwɔ fe he ni maŋbii lɛ fɛɛ damɔ lɛ. Be ni egbeleɔ wolo lɛ mli lɛ, maŋbii lɛ fɛɛ te shi amɛdamɔ shi. 6 Kɛkɛ ni Ezra jie Yehowa, anɔkwa Nyɔŋmɔ lɛ ni je agbo lɛ yi, ni maŋbii lɛ fɛɛ here nɔ akɛ, “Amen!* Amen!”+ ni amɛhole amɛniji anɔ. Kɛkɛ ni amɛkula shi ni amɛkɛ amɛhiɛ bumɔ shi ni amɛjá Yehowa. 7 Ni Yeshua, kɛ Bani, kɛ Sherebia,+ kɛ Yamin, kɛ Akub, kɛ Shabetai, kɛ Hodia, kɛ Maaseia, kɛ Kelita, kɛ Azaria, kɛ Yozabad,+ kɛ Hanan, kɛ Pelaia, ni ji Levibii lɛ, gbala Mla lɛ mli amɛtsɔɔ maŋbii lɛ;+ no mli fɛɛ lɛ, maŋbii lɛ damɔ shi. 8 Ni amɛtee nɔ amɛkane wolo lɛ, ni ji anɔkwa Nyɔŋmɔ lɛ Mla wolo lɛ, ni amɛgbala mli faŋŋ ni amɛtsɔɔ mli; no hewɔ lɛ, amɛhã maŋbii lɛ nu nɔ ni akaneɔ lɛ shishi.+

9 Ni Nehemia, ni nakai beiaŋ lɛ, lɛ ji amralo lɛ,* kɛ osɔfo Ezra,+ ni ji woloŋmalɔ lɛ, kɛ Levibii lɛ ni tsɔɔ maŋbii lɛ nii lɛ kɛɛ maŋbii lɛ fɛɛ akɛ: “Ŋmɛnɛ gbi nɛɛ, gbi krɔŋkrɔŋ ni kɛhã Yehowa, nyɛ-Nyɔŋmɔ lɛ.+ Nyɛkayea awerɛho ni nyɛkafóa hu.” Ejaakɛ no mli lɛ, maŋbii lɛ fɛɛ miifó be ni amɛnu Mla lɛ mli wiemɔi lɛ. 10 Ekɛɛ amɛ akɛ: “Nyɛyaa ni nyɛyayea nii kpakpai,* ni nyɛnua nii ni ŋɔɔ, ni nyɛkɛ niyenii lɛ eko amajea+ mɛi ni bɛ nɔ ko ni amɛbaaye lɛ; ejaakɛ gbi nɛɛ, gbi krɔŋkrɔŋ ni kɛhã wɔ-Nuŋtsɔ lɛ, ni nyɛkayea awerɛho ejaakɛ miishɛɛ ni Yehowa hãa anáa lɛ ji nyɛmɔɔ ni wa.”* 11 Kɛkɛ ni Levibii lɛ shɛje maŋbii lɛ fɛɛ amii amɛkɛɛ: “Nyɛkafóa! Ejaakɛ ŋmɛnɛ gbi nɛɛ, gbi krɔŋkrɔŋ ni, ni nyɛkayea awerɛho.” 12 No hewɔ lɛ, maŋbii lɛ fɛɛ tee ni amɛyaye nii ni amɛnu nii ni amɛkɛ niyenii lɛ eko maje, ni amɛná miishɛɛ waa,+ ejaakɛ amɛnu wiemɔi ni ajaje atsɔɔ amɛ lɛ ashishi.+

13 Ni enɔ jetsɛremɔ lɛ, maŋbii lɛ fɛɛ atsɛmɛi ashĩai onukpai lɛ, kɛ osɔfoi lɛ, kɛ Levibii lɛ babua amɛhe naa kɛbɔle Ezra, ni ji woloŋmalɔ lɛ, koni amɛnu Mla lɛ mli wiemɔi lɛ ashishi jogbaŋŋ. 14 Kɛkɛ ni amɛna akɛ aŋma yɛ Mla ni Yehowa tsɔ Mose nɔ ekɛhã lɛ mli akɛ, Israelbii lɛ ahi agbai ashishi yɛ nyɔɔŋ ni ji kpawo lɛ nɔ gbi jurɔ lɛ mli,+ 15 ni amɛshiɛ+ ni amɛtswa adafi yɛ amɛmaji lɛ fɛɛ amli kɛ agbɛnɛ hu, yɛ Yerusalem fɛɛ akɛ: “Nyɛyaa gɔji lɛ anɔ ni nyɛyaŋɔa oliv tsei aniji ni bai yɔɔ he, kɛ paini tsei aniji ni bai yɔɔ he, kɛ mirto tsei kɛ tɛŋ tsei aniji ni bai yɔɔ he, kɛ tsei krokomɛi fɛɛ aniji ni bai yɔɔ he ni nyɛkɛbafea agbai, tamɔ bɔ ni aŋma lɛ.”

16 No hewɔ lɛ, maŋbii lɛ je kpo kɛtee ni amɛyaŋɔ kɛba ni amɛkɛbafee agbai amɛhã amɛhe, mɔ fɛɛ mɔ lɛ, yɛ etsũ yiteŋ, kɛ agbɛnɛ hu yɛ amɛkpoi lɛ anɔ, kɛ anɔkwa Nyɔŋmɔ lɛ shĩa lɛ kpoi lɛ anɔ,+ kɛ henaabuamɔhe ni yɔɔ Nu Agbó+ lɛ naa, kɛ henaabuamɔhe ni yɔɔ Efraim Agbó+ lɛ naa lɛ. 17 No hewɔ lɛ, asafo muu lɛ fɛɛ ni eku amɛsɛɛ kɛjɛ nomŋɔɔ mli kɛba lɛ fee agbai ni amɛhi mli, ejaakɛ kɛjɛ Yoshua,+ Nun binuu lɛ gbii lɛ amli kɛbashi nakai gbi lɛ, Israelbii lɛ efeko nakai nɔ ko dã, no hewɔ lɛ, amɛná miishɛɛ waa diɛŋtsɛ.+ 18 Ni akaneɔ anɔkwa Nyɔŋmɔ lɛ Mla wolo lɛ gbi fɛɛ gbi,+ kɛjɛ klɛŋklɛŋ gbi lɛ nɔ kɛyashi naagbee gbi lɛ nɔ. Ni amɛye gbi jurɔ lɛ gbii kpawo, ni afee henaabuamɔ krɔŋkrɔŋ yɛ gbi ni ji kpaanyɔ lɛ nɔ, tamɔ bɔ ni atsɔɔ akɛ afee lɛ.+

9 Yɛ nyɔɔŋ nɛɛ nɔ gbi ni ji 24 lɛ nɔ lɛ, Israelbii lɛ bua amɛhe naa; no mli lɛ, amɛbumɔ kpekpe ni amɛmiihi ŋmaa ni amɛkɛ mulu ewo amɛyiteŋ.+ 2 Kɛkɛ ni Israel seshibii lɛ tse amɛhe kɛje mɛi ni jɛ maji krokomɛi anɔ lɛ fɛɛ ahe,+ ni amɛdamɔ shi ni amɛjaje amɛ diɛŋtsɛ amɛhe eshai lɛ kɛ amɛtsɛmɛi lɛ atɔmɔi lɛ amɛtsɔɔ.+ 3 Kɛkɛ ni amɛdamɔ shi yɛ he ni amɛyɔɔ lɛ nɔŋŋ, ni amɛkɛ gbi lɛ mlijai ejwɛ mli ekome* kane Yehowa, amɛ-Nyɔŋmɔ lɛ, Mla wolo lɛ waa;+ ni amɛkɛ gbi lɛ mlijai ejwɛ mli ekome hu jaje amɛhe eshai lɛ ni amɛkoto Yehowa, amɛ-Nyɔŋmɔ lɛ.

4 Kɛkɛ ni Yeshua, kɛ Bani, kɛ Kadmiel, kɛ Shebania, kɛ Buni, kɛ Sherebia,+ kɛ Bani, kɛ Kenani yadamɔ Levibii lɛ akpoku lɛ nɔ,+ ni amɛkɛ gbee ni wa bo amɛtsɛ Yehowa, amɛ-Nyɔŋmɔ lɛ. 5 Ni Yeshua, kɛ Kadmiel, kɛ Bani, kɛ Hashabneia, kɛ Sherebia, kɛ Hodia, kɛ Shebania, kɛ Petahia, ni ji Levibii lɛ kɛɛ akɛ: “Nyɛtea shi ni nyɛjiea Yehowa, nyɛ-Nyɔŋmɔ lɛ yi kɛyaa naanɔi anaanɔ.*+ Ao Nyɔŋmɔ, ajie onunyam gbɛ́i lɛ yi, gbɛ́i ni nɔ kwɔ fe jɔɔmɔ kɛ yijiemɔ fɛɛ lɛ.

6 “Bo okome too ji Yehowa;+ bo ofee ŋwɛii lɛ, ŋwɛii amli ŋwɛi kɛ amɛsraafoi lɛ fɛɛ, kɛ shikpɔŋ lɛ kɛ nɔ fɛɛ nɔ ni yɔɔ nɔ lɛ, kɛ ŋshɔi lɛ kɛ nɔ fɛɛ nɔ ni yɔɔ amɛmli lɛ. Ni bo ohãa amɛ fɛɛ amɛyaa nɔ amɛhiɔ wala mli, ni ŋwɛi asraafoi lɛ kotoɔ bo. 7 Bo ji Yehowa, anɔkwa Nyɔŋmɔ lɛ, mɔ ni hala Abram,+ ni ejie lɛ kɛje Kaldeabii amaŋ Ur+ lɛ mli, ni ekɛ gbɛ́i Abraham lɛ wo lɛ lɛ.+ 8 Ni ona akɛ ejɛ etsuiŋ eye anɔkwa yɛ ohiɛ,+ no hewɔ lɛ, okɛ lɛ kpaŋ kpaŋmɔ akɛ, okɛ Kanaanbii lɛ, kɛ Hitbii lɛ, kɛ Amorbii lɛ, kɛ Perizbii lɛ, kɛ Yebusbii lɛ, kɛ Girgashbii lɛ ashikpɔŋ lɛ baahã lɛ kɛ eseshi* lɛ;+ ni oye oshiwoi lɛ anɔ, ejaakɛ jalɔ ji bo.

9 “No hewɔ lɛ, ona amanehulu ni wɔtsɛmɛi lɛ na yɛ Ejipt lɛ,+ ni onu bolɔmɔ ni amɛbolɔ yɛ Ŋshɔ Tsuru lɛ naa lɛ. 10 Kɛkɛ ni ofee okadii kɛ naakpɛɛ nii oshi Farao, kɛ etsuji lɛ fɛɛ kɛ eshikpɔŋ lɛ nɔ bii lɛ fɛɛ,+ ejaakɛ ole akɛ amɛfee omaŋbii lɛ nɔ ni amɛtsui sumɔɔ.+ Ni ofee gbɛ́i ohã ohe, ni ekã shi kɛbashi ŋmɛnɛ gbi nɛɛ.+ 11 Ni ogba ŋshɔ lɛ mli yɛ amɛhiɛ, koni amɛtsɔ shikpɔŋ gbiŋ nɔ kɛfo ŋshɔ lɛ,+ ni oshɛrɛ mɛi ni tiuɔ amɛ lɛ owo ŋshɔ lɛ mli tamɔ ashɛɔ tɛ afɔ̃ɔ nui ni efee hamahama mli lɛ.+ 12 Kɛ́ je tsɛre lɛ, okɛ atatu ni damɔ shi jaŋŋ tsɔɔ amɛ gbɛ, ni kɛ́ je na hu lɛ, okɛ la ni damɔ shi jaŋŋ tsɔɔ amɛ gbɛ, koni ekpɛ gbɛ ni amɛnyiɛ nɔ lɛ nɔ.+ 13 Ni okpeleke shi kɛba Sinai Gɔŋ lɛ nɔ,+ ni ojɛ ŋwɛi okɛ amɛ wie+ ni ohã amɛ yiŋkpɛi* ni ja, kɛ mlai ni amuɔ afɔ̃ɔ nɔ,* kɛ taomɔ nii kpakpai kɛ kitãi kpakpai.+ 14 Ni ohã amɛle o-Hejɔɔmɔ Gbi krɔŋkrɔŋ lɛ,+ ni otsɔ otsulɔ Mose nɔ ohã amɛ kitãi, kɛ taomɔ nii, kɛ mla. 15 Ni be ni hɔmɔ ye amɛ lɛ, ohã amɛ niyenii ni jɛ ŋwɛi,+ ni be ni kumai ye amɛ lɛ, ojie nu kɛje tɛsaa mli ohã amɛ,+ ni okɛɛ amɛ ni amɛya shikpɔŋ ni okã kitã* akɛ okɛbaahã amɛ lɛ nɔ koni amɛyaŋɔ.

16 “Shi amɛ, ni ji wɔtsɛmɛi lɛ, ye amɛtsuinaa sane+ ni amɛfee amɛhe kuɛŋtilɔi,+ ni amɛbooo okitãi lɛ toi. 17 Amɛbooo bo toi,+ ni amɛkaiii nibii wuji ni ofee yɛ amɛteŋ lɛ, moŋ lɛ, amɛfee amɛhe kuɛŋtilɔi ni amɛhala hiɛnyiɛlɔ koni ekɛ amɛ aku sɛɛ kɛya amɛnyɔŋyeli lɛ mli yɛ Ejipt.+ Shi akɛni oji Nyɔŋmɔ ni sumɔɔ waa akɛ ekɛ eshai ake,* ni oji musuŋtsɔlɔ* kɛ mɔbɔnalɔ, ni omli fuuu mra, ni oyi obɔ kɛ suɔmɔ ni tsakeee hewɔ lɛ,+ okwaaa amɛ.+ 18 Ni be ni amɛfee tsinabi dade amaga amɛhã amɛhe po ni amɛkɛɛ, ‘Nyɛ-Nyɔŋmɔ ni nyiɛ nyɛhiɛ kɛje Ejipt lɛ nɛ,’+ ni amɛfee nibii babaoo ni etsɔɔɔ bulɛ lɛ, 19 nakai beiaŋ po lɛ, omɔbɔnalɛ babaoo lɛ hewɔ lɛ, okwaaa amɛ yɛ ŋa lɛ nɔ.+ Kɛ́ je tsɛre lɛ, atatu ni damɔ shi jaŋŋ ni tsɔɔ amɛ gbɛ lɛ, ejeee amɛnɔ, ni kɛ́ je na hu lɛ, la ni damɔ shi jaŋŋ ni tsɔɔ amɛ gbɛ ni kpɛɔ gbɛ ni amɛnyiɛ nɔ lɛ nɔ lɛ, ejeee amɛnɔ.+ 20 Ni ohã amɛ omumɔ kpakpa lɛ koni amɛná sɛɛyoomɔ,+ ni ohãa amɛ omana lɛ amɛyeɔ daa,*+ ni kɛ́ kumai miiye amɛ lɛ, ohãa amɛ nu.+ 21 Ohã amɛ niyenii afii 40 yɛ ŋa lɛ nɔ.+ Nɔ ko nɔ ko ehiaaa amɛ. Amɛtadei lɛ tserɛɛɛ,+ ni amɛnaji hu efũuu.

22 “Okɛ maŋtsɛyelii kɛ jeŋmaji wo amɛdɛŋ, ni okɛwo amɛdɛŋ fiofio,+ no hewɔ lɛ, amɛŋɔ Heshbon+ maŋtsɛ Sihon shikpɔŋ lɛ,+ kɛ agbɛnɛ hu, Bashan maŋtsɛ Og+ shikpɔŋ lɛ. 23 Ni ohã amɛbii lɛ ayi fa tamɔ ŋwɛi ŋulamii.+ Kɛkɛ ni okɛ amɛ ba shikpɔŋ ni okɛɛ amɛtsɛmɛi lɛ akɛ* amɛya ni amɛyaŋɔ lɛ nɔ.+ 24 No hewɔ lɛ, amɛbii lɛ tee ni amɛyaŋɔ shikpɔŋ lɛ,+ ni oba Kanaanbii lɛ, ni ji shikpɔŋ lɛ nɔ bii lɛ ashi yɛ amɛhiɛ,+ okɛ Kanaanbii lɛ wo amɛdɛŋ, amɛmaŋtsɛmɛi lɛ kɛ shikpɔŋ lɛ nɔ bii lɛ fɛɛ, koni amɛfee amɛ nɔ ni amɛsumɔɔ. 25 Ni amɛŋɔ maji ni atswa gbogboi awo amɛhe+ kɛ shikpɔŋ ni baa nii,+ ni amɛŋɔ shĩai ni nibii kpakpai srɔtoi fɛɛ eyi amɛmli obɔbɔ, kɛ bui ni akɛtoɔ nu ni atsa momo, kɛ wain ŋmɔji, kɛ oliv ŋmɔji,+ kɛ aduawa tsei babaoo. No hewɔ lɛ, amɛye ni amɛtɔrɔ ni amɛshwishwii, ni amɛná miishɛɛ yɛ ekpakpa ni ofeɔ amɛ waa lɛ hewɔ.

26 “Shi amɛgbo toi ni amɛtse ohiɛ atua,+ ni amɛtsɔ amɛsɛɛ amɛhã o-Mla lɛ.* Amɛgbe ogbalɔi lɛ ni bɔ amɛ kɔkɔ koni amɛku amɛsɛɛ kɛba oŋɔɔ lɛ, ni amɛfee nibii ni etsɔɔɔ bulɛ kwraa.+ 27 No hewɔ lɛ, okɛ amɛ wo amɛhenyɛlɔi lɛ adɛŋ,+ ni amɛhenyɛlɔi lɛ tee nɔ amɛhao amɛ.+ Shi yɛ amɛhaomɔ beiaŋ lɛ, amɛbolɔɔ amɛtsɛɔ bo, ni onuɔ yɛ ŋwɛi; ni omɔbɔnalɛ babaoo lɛ hewɔ lɛ, ohãa amɛ yiwalaherelɔi koni amɛjie amɛ kɛje amɛhenyɛlɔi lɛ adɛŋ.+

28 “Shi kɛ́ amɛhe jɔ amɛ nɔŋŋ lɛ, amɛfeɔ efɔŋ ekoŋŋ yɛ ohiɛ,+ ni oŋmɛɔ amɛhe owoɔ amɛhenyɛlɔi lɛ adɛŋ ni amɛyeɔ amɛnɔ.*+ Ni amɛkuɔ amɛsɛɛ amɛboɔ amɛtsɛɔ bo koni oye obua amɛ,+ ni ojɛɔ ŋwɛi onuɔ ni ohereɔ amɛ shii abɔ yɛ omɔbɔnalɛ babaoo lɛ hewɔ.+ 29 Eyɛ mli akɛ obɔɔ amɛ kɔkɔ koni ogbala amɛ kɛba o-Mla lɛ he ekoŋŋ moŋ, shi amɛyeɔ amɛtsuinaa sane ni amɛbooo okitãi lɛ toi;+ ni amɛkuɔ otaomɔ nii ni kɛ́ mɔ ko ye nɔ lɛ eyaa nɔ ehiɔ wala mli lɛ mli.+ Ni amɛtsɔɔ amɛsɛɛ amɛhãa bo ni amɛfeɔ amɛhe kuɛŋtilɔi ni amɛbooo bo toi. 30 Oto otsui shi ohã amɛ+ afii babaoo, ni otsɔ omumɔ lɛ nɔ ohã ogbalɔi lɛ bɔ amɛ kɔkɔ shii abɔ, shi amɛbooo toi. No hewɔ lɛ, okɛ amɛ wo shikpɔji lɛ anɔ bii lɛ adɛŋ.+ 31 Shi yɛ omɔbɔnalɛ babaoo lɛ hewɔ lɛ, okpãtãaa amɛhiɛ+ ni okwaaa amɛ hu, ejaakɛ oji Nyɔŋmɔ musuŋtsɔlɔ* kɛ mɔbɔnalɔ.+

32 “Ni agbɛnɛ, Ao wɔ-Nyɔŋmɔ, Nyɔŋmɔ ni je agbo, ni he wa, ni he yɔɔ gbeyei, ni yeɔ ekpaŋmɔ nɔ, ni jieɔ suɔmɔ ni tsakeee kpo,+ kaabu jaramɔ shihilɛ ni wɔ, kɛ wɔmaŋtsɛmɛi lɛ, kɛ wɔlumɛi+ lɛ, kɛ wɔsɔfoi+ lɛ, kɛ wɔgbalɔi+ lɛ, kɛ wɔtsɛmɛi lɛ kɛ omaŋbii lɛ fɛɛ ebaje mli kɛjɛ Asiria maŋtsɛmɛi lɛ agbii lɛ amli+ kɛbashi ŋmɛnɛ gbi nɛɛ lɛ akɛ sane bibioo. 33 Yɛ nibii fɛɛ ni eba wɔnɔ lɛ amli lɛ, bo lɛ, osane ja, ejaakɛ oyeɔ anɔkwa; shi wɔ moŋ wɔfee efɔŋ.+ 34 Wɔmaŋtsɛmɛi lɛ, kɛ wɔlumɛi lɛ, kɛ wɔsɔfoi lɛ, kɛ wɔtsɛmɛi lɛ yeko o-Mla lɛ nɔ, ni amɛboko okitãi lɛ kɛ okaimɔi* lɛ ni okɛbɔ amɛ kɔkɔ lɛ hu toi. 35 Be ni amɛyɔɔ amɛmaŋtsɛyeli lɛ mli ni amɛnáa ekpakpa ni ofee amɛ waa lɛ he sɛɛ, ni amɛyɔɔ shikpɔŋ agbo ni baa nii ni okɛhã amɛ lɛ nɔ lɛ, amɛsɔmɔɔɔ bo+ ni amɛtsiii amɛhe kɛjeee nibii fɔji ni amɛfeɔ lɛ hu ahe. 36 Shi ŋmɛnɛ lɛ, naa wɔ, wɔtsɔmɔ nyɔji+—nyɔji yɛ shikpɔŋ ni okɛhã wɔtsɛmɛi lɛ koni amɛye enɔ yibii kɛ enɔ nibii kpakpai lɛ nɔ. 37 Wɔhe eshai lɛ ahewɔ lɛ, enɔ yibii babaoo lɛ etsɔ maŋtsɛmɛi ni okɛto wɔnɔ lɛ anii.+ Amɛmiiye wɔgbɔmɔtsei kɛ wɔkooloi lɛ anɔ bɔ ni amɛsumɔɔ, ni wɔyɛ haomɔ kpele mli.

38 “Enɛɛmɛi fɛɛ ahewɔ lɛ, wɔmiikpaŋ kpaŋmɔ ni mli wa+ ni wɔmiiŋma yɛ wolo nɔ, ni wɔlumɛi lɛ, kɛ wɔ-Levibii lɛ, kɛ wɔsɔfoi lɛ baasɔo naa.”+

10 Mɛi ni kɛ amɛniianaasɔomɔnɔ sɔo kpaŋmɔ lɛ naa+ lɛ nɛ:

9 Levibii lɛ hu nɛ: Yeshua, Azania binuu lɛ, kɛ Binui ni jɛ Henadad bii lɛ ateŋ lɛ, kɛ Kadmiel,+ 10 kɛ amɛnyɛmimɛi hii Shebania, kɛ Hodia, kɛ Kelita, kɛ Pelaia, kɛ Hanan, 11 kɛ Mika, kɛ Rehob, kɛ Hashabia, 12 kɛ Zakur, kɛ Sherebia,+ kɛ Shebania, 13 kɛ Hodia, kɛ Bani, kɛ Beninu.

14 Maŋbii lɛ ahiɛnyiɛlɔi lɛ nɛ: Parosh, kɛ Pahat-moab,+ kɛ Elam, kɛ Zatu, kɛ Bani, 15 kɛ Buni, kɛ Azgad, kɛ Bebai, 16 kɛ Adonia, kɛ Bigvai, kɛ Adin, 17 kɛ Ater, kɛ Hezekia, kɛ Azur, 18 kɛ Hodia, kɛ Hashum, kɛ Bezai, 19 kɛ Harif, kɛ Anatot, kɛ Nebai, 20 kɛ Magpiash, kɛ Meshulam, kɛ Hezir, 21 kɛ Meshezabel, kɛ Zadok, kɛ Yadua, 22 kɛ Pelatia, kɛ Hanan, kɛ Anaia, 23 kɛ Hoshea, kɛ Hanania, kɛ Hashub, 24 kɛ Halohesh, kɛ Pilha, kɛ Shobek, 25 kɛ Rehum, kɛ Hashabna, kɛ Maaseia, 26 kɛ Ahiya, kɛ Hanan, kɛ Anan, 27 kɛ Maluk, kɛ Harim, kɛ Baanah.

28 Ni maŋbii ni eshwɛ lɛ—osɔfoi lɛ, kɛ Levibii lɛ, kɛ agbonaakwɛlɔi lɛ, kɛ lalɔi lɛ, kɛ sɔlemɔ shĩa sɔɔlɔi* lɛ, kɛ mɔ fɛɛ mɔ ni tse ehe kɛje mɛi ni yɔɔ shikpɔji lɛ anɔ lɛ ahe koni eye anɔkwa Nyɔŋmɔ lɛ Mla lɛ nɔ+ lɛ, kɛ amɛŋamɛi, kɛ amɛbihii, kɛ amɛbiyei, kɛ mɛi fɛɛ ni le nii ni baanyɛ anu nii ashishi* lɛ— 29 kɛ amɛnyɛmimɛi hii, amɛteŋ hii hiɛnaanɔbii lɛ, fee ekome, ni amɛkã kitã kɛ ehe loomɔ akɛ, amɛbaanyiɛ yɛ anɔkwa Nyɔŋmɔ lɛ Mla ni atsɔ Mose, anɔkwa Nyɔŋmɔ lɛ tsulɔ lɛ nɔ akɛhã lɛ naa, ni amɛbaaye Yehowa, wɔ-Nuŋtsɔ lɛ kitãi lɛ, kɛ eyiŋkpɛi* lɛ, kɛ etaomɔ nii lɛ fɛɛ anɔ jogbaŋŋ. 30 Ni amɛkɛɛ hu akɛ: “Wɔkɛ wɔbiyei lɛ hãŋ mɛi ni yɔɔ shikpɔŋ lɛ nɔ lɛ, ni wɔŋɔŋ amɛbiyei lɛ hu wɔhãŋ wɔbihii lɛ.+

31 “Kɛ́ mɛi ni yɔɔ shikpɔŋ lɛ nɔ lɛ kɛ nibii ni amɛhɔ̃ɔ lɛ kɛ ŋmaa* srɔtoi fɛɛ ba koni amɛbahɔ̃ɔ yɛ Hejɔɔmɔ Gbi lɛ nɔ lɛ, wɔhéŋ nɔ ko nɔ ko yɛ amɛdɛŋ yɛ Hejɔɔmɔ Gbi lɛ nɔ+ loo yɛ gbi krɔŋkrɔŋ ko nɔ.+ Agbɛnɛ hu, yɛ afi ni ji kpawo lɛ mli lɛ, wɔtaŋ wɔŋmɔshi nibii lɛ ahe,+ ni wɔbaaŋmɛɛ nyɔmɔ fɛɛ nyɔmɔ ni mɔ ko hiɛ wɔ lɛ hu he.+

32 “Agbɛnɛ hu, wɔ diɛŋtsɛ wɔwo wɔhe mla akɛ, daa afi lɛ, wɔteŋ mɔ fɛɛ mɔ baahã shekel* mlijai etɛ mli ekome kɛhã wɔ-Nyɔŋmɔ lɛ shĩa* lɛ sɔɔmɔ lɛ,+ 33 kɛ blodo ni eko kã eko nɔ*+ lɛ, kɛ ŋmaa afɔle ni ashãa daa+ lɛ, kɛ shãa afɔle ni ashãa daa yɛ Hejɔɔmɔ Gbii+ lɛ kɛ nyɔɔŋtsere hei+ lɛ kɛ gbii juji ni ato+ lɛ anɔ lɛ, kɛ agbɛnɛ hu, krɔŋkrɔŋ nibii lɛ, kɛ esha afɔlei+ ni akɛkpãtãa ahãa Israel lɛ, kɛ nitsumɔi fɛɛ ni atsuɔ yɛ wɔ-Nyɔŋmɔ lɛ shĩa lɛ.

34 “Agbɛnɛ hu, wɔfɔ̃fɔ̃ɔ oshikii yɛ laihamɔ he koni osɔfoi lɛ, kɛ Levibii lɛ, kɛ maŋbii lɛ ato naa amɛkɛba wɔ-Nyɔŋmɔ lɛ shĩa lɛ yɛ wɔtsɛmɛi ashĩai lɛ anaa yɛ bei ni ato lɛ amli daa afi, koni ashã yɛ Yehowa, wɔ-Nyɔŋmɔ lɛ afɔleshaa latɛ lɛ nɔ, tamɔ bɔ ni aŋma yɛ Mla lɛ mli lɛ.+ 35 Agbɛnɛ hu, wɔkɛ wɔshikpɔŋ lɛ nɔ klɛŋklɛŋ yibii kɛ aduawa tsei srɔtoi fɛɛ aklɛŋklɛŋ yibii ni wɔbaakpa lɛ baaba Yehowa shĩa lɛ daa afi,+ 36 kɛ agbɛnɛ hu, wɔbihii lɛ ateŋ kromɔbii lɛ kɛ wɔkooloi lɛ akromɔbii lɛ+—tamɔ bɔ ni aŋma yɛ Mla lɛ mli lɛ—kɛ wɔtsinai, kɛ wɔtoi lɛ akromɔbii lɛ. Wɔkɛbaaba wɔ-Nyɔŋmɔ lɛ shĩa lɛ koni wɔkɛbahã osɔfoi lɛ ni sɔmɔɔ yɛ wɔ-Nyɔŋmɔ lɛ shĩa lɛ.+ 37 Agbɛnɛ hu, wɔkɛ wɔklɛŋklɛŋ ŋmaa ni wɔwiɛ ni boko,+ kɛ oniai ni wɔtsuɔ, kɛ tso fɛɛ tso yibii,+ kɛ wain hee, kɛ mu+ baabahã osɔfoi lɛ koni amɛkɛto wɔ-Nyɔŋmɔ lɛ shĩa lɛ nitoohei* lɛ,+ ni wɔkɛ wɔshikpɔŋ lɛ nɔ nii lɛ mlijai nyɔŋma mli ekome baabahã Levibii lɛ,+ ejaakɛ Levibii lɛ ji mɛi ni buaa mlijai nyɔŋma mli ekomekomei lɛ anaa yɛ wɔmaji ni wɔduɔ nii ni wɔlɛɔ kooloi yɛ mli lɛ fɛɛ amli.

38 “Ni osɔfo lɛ, ni ji Aaron binuu lɛ, baafata Levibii lɛ ahe be ni Levibii lɛ heɔ mlijai nyɔŋma mli ekomekomei lɛ; ni Levibii lɛ hu baajɛ mlijai nyɔŋma mli ekomekomei lɛ amli koni amɛ hu amɛhã wɔ-Nyɔŋmɔ lɛ shĩa lɛ mlijai nyɔŋma mli ekome+ koni akɛto tsũi* ni yɔɔ nitoohe lɛ mli lɛ amli. 39 Ejaakɛ tsũi* ni yɔɔ nitoohe lɛ mli lɛ ji he ni esa akɛ Israelbii lɛ kɛ Levibii lɛ kɛ ŋmaa, kɛ wain hee, kɛ mu+ ni akɛba akɛ onia lɛ ato,+ ni jɛmɛ ji he ni jamɔhe lɛ, kɛ osɔfoi lɛ ni sɔmɔɔ lɛ, kɛ agbonaakwɛlɔi lɛ, kɛ lalɔi lɛ anibii lɛ yɔɔ. Wɔkuŋ wɔhiɛ wɔfɔ̃ŋ wɔ-Nyɔŋmɔ lɛ shĩa lɛ nɔ.”+

11 Agbɛnɛ, lumɛi ni yɔɔ maŋbii lɛ ateŋ lɛ hi Yerusalem;+ shi maŋbii ni eshwɛ lɛ fɔ̃fɔ̃ɔ oshikii+ koni mɛi nyɔŋma fɛɛ mɛi nyɔŋma ateŋ mɔ kome abahi Yerusalem, ni ji maŋ krɔŋkrɔŋ lɛ mli, koni mɛi nɛɛhu ni baashwɛ lɛ ahi maji krokomɛi lɛ amli. 2 Agbɛnɛ hu, maŋbii lɛ jɔɔ hii fɛɛ ni kɛ amɛhe hã akɛ amɛbaahi Yerusalem lɛ.

3 Kpokpaa lɛ nɔ onukpai ni hi Yerusalem lɛ nɛ. (Israelbii ni eshwɛ lɛ, kɛ osɔfoi lɛ, kɛ Levibii lɛ, kɛ sɔlemɔ shĩa sɔɔlɔi*+ lɛ, kɛ Solomon tsuji lɛ abii lɛ,+ hi Yuda maji krokomɛi lɛ amli, mɔ fɛɛ mɔ yɛ lɛ diɛŋtsɛ eshikpɔŋ nɔ yɛ emaŋ.+

4 Agbɛnɛ hu, mɛi ni jɛ Yuda kɛ Benyamin lɛ ekomɛi hi Yerusalem.) Yɛ mɛi ni jɛ Yuda lɛ ateŋ lɛ, Ataia, epapa ji Uzia, ni Uzia hu papa ji Zakaria, ni Zakaria hu papa ji Amaria, ni Amaria hu papa ji Shefatia, ni Shefatia hu papa ji Mahalalel, mɔ ni jɛ Perez bii lɛ ateŋ lɛ,+ 5 kɛ Maaseia, epapa ji Baruk, ni Baruk hu papa ji Kolhoze, ni Kolhoze hu papa ji Hazaia, ni Hazaia hu papa ji Adaia, ni Adaia hu papa ji Yoiarib, ni Yoiarib hu papa ji Zakaria, Shelanyo lɛ bi lɛ. 6 Perez bii lɛ ni hi Yerusalem lɛ fɛɛ feɔ hii kãkãlɔi 468.

7 Ni mɛi ni jɛ Benyamin lɛ hu nɛ: Salu,+ epapa ji Meshulam, ni Meshulam hu papa ji Yoed, ni Yoed hu papa ji Pedaia, ni Pedaia hu papa ji Kolaia, ni Kolaia hu papa ji Maaseia, ni Maaseia hu papa ji Itiel, ni Itiel hu papa ji Yeshaia, 8 ni esɛɛ lɛ Gabai kɛ Salai, mɛi 928; 9 kɛ Yoel, Zikri binuu lɛ, lɛ ji amɛnɔkwɛlɔ, ni Yuda, Hasenua binuu lɛ ji mɔ ni kwɛɔ maŋ lɛ nɔ lɛ sɛɛmɔ.

10 Osɔfoi lɛ ateŋ lɛ: Yedaia, Yoiarib binuu lɛ, kɛ Yakin,+ 11 kɛ Seraia, epapa ji Hilkia, ni Hilkia hu papa ji Meshulam, ni Meshulam hu papa ji Zadok, ni Zadok hu papa ji Meraiot, ni Meraiot hu papa ji Ahitub,+ ni ji anɔkwa Nyɔŋmɔ lɛ shĩa* lɛ hiɛnyiɛlɔ lɛ, 12 kɛ amɛnyɛmimɛi hii lɛ ni tsu shĩa lɛ nitsumɔ lɛ, mɛi 822; kɛ Adaia, epapa ji Yeroham, ni Yeroham hu papa ji Pelalia, ni Pelalia hu papa ji Amzi, ni Amzi hu papa ji Zakaria, ni Zakaria hu papa ji Pashur, ni Pashur+ hu papa ji Malkia, 13 kɛ Adaia nyɛmimɛi hii lɛ, tsɛmɛi ashĩai onukpai lɛ, mɛi 242; kɛ Amashai, epapa ji Azarel, ni Azarel hu papa ji Ahzai, ni Ahzai hu papa ji Meshilemot, ni Meshilemot hu papa ji Imer, 14 kɛ amɛnyɛmimɛi hii lɛ ni ji hii kãkãlɔi lɛ, mɛi 128; ni amɛnɔkwɛlɔ ji Zabdiel, ni jɛ hiɛnaanɔbii aweku ko mli lɛ.

15 Ni Levibii lɛ ateŋ lɛ: Shemaia,+ epapa ji Hashub, ni Hashub hu papa ji Azrikam, ni Azrikam hu papa ji Hashabia, ni Hashabia hu papa ji Buni, 16 kɛ Shabetai+ kɛ Yozabad+ ni jɛ Levibii lɛ ahiɛnyiɛlɔi lɛ ateŋ, ni ji mɛi ni kwɛɔ anɔkwa Nyɔŋmɔ lɛ shĩa lɛ kponɔgbɛ nitsumɔ lɛ nɔ lɛ; 17 kɛ Matania,+ epapa ji Mika, ni Mika hu papa ji Zabdi, ni Zabdi hu papa ji Asaf,+ mɔ ni kwɛɔ lala lɛ nɔ, ni nyiɛɔ yijiemɔ lala lɛ hiɛ kɛ́ aasɔle lɛ,+ kɛ Bakbukia, mɔ ni ji esɛɛkwɛlɔ yɛ enyɛmimɛi hii lɛ ateŋ lɛ, kɛ Abda, epapa ji Shamua, ni Shamua hu papa ji Galal, ni Galal hu papa ji Yedutun.+ 18 Levibii ni yɔɔ maŋ krɔŋkrɔŋ lɛ mli lɛ fɛɛ feɔ 284.

19 Ni agbonaakwɛlɔi lɛ ji Akub, kɛ Talmon+ kɛ amɛnyɛmimɛi hii ni buɔ agbói lɛ anaa lɛ, amɛ fɛɛ amɛfeɔ 172.

20 Israelbii ni eshwɛ lɛ, kɛ osɔfoi ni eshwɛ lɛ, kɛ Levibii ni eshwɛ lɛ, yɛ Yuda maji krokomɛi lɛ fɛɛ amli, mɔ fɛɛ mɔ yɛ lɛ diɛŋtsɛ egboshinii nɔ. 21 Sɔlemɔ shĩa sɔɔlɔi*+ lɛ hi Ofel,+ ni Ziha kɛ Gishpa ji sɔlemɔ shĩa sɔɔlɔi* lɛ anɔkwɛlɔi.

22 Levibii lɛ ni yɔɔ Yerusalem lɛ anɔkwɛlɔ ji Uzi, epapa ji Bani, ni Bani hu papa ji Hashabia, ni Hashabia hu papa ji Matania, ni Matania+ hu papa ji Mika, mɔ ni jɛ Asaf bii ni ji lalɔi lɛ ateŋ lɛ; Uzi ji mɔ ni kwɛɔ anɔkwa Nyɔŋmɔ lɛ shĩa lɛ nitsumɔ lɛ nɔ. 23 Maŋtsɛ lɛ wo mla yɛ amɛhe,+ ni ato akɛ ahã lalɔi lɛ nibii fɛɛ ni he hiaa amɛ gbi fɛɛ gbi. 24 Ni Petahia ji mɔ ni woɔ maŋtsɛ lɛ ŋaa* yɛ saji fɛɛ ni kɔɔ maŋbii lɛ ahe lɛ he; Petahia papa ji Meshezabel, mɔ ni jɛ Yuda binuu Zera bii lɛ ateŋ lɛ.

25 Yɛ amɛshihilɛhei kɛ amɛhewɔ shikpɔji lɛ agbɛfaŋ lɛ, mɛi ni jɛ Yuda lɛ ateŋ mɛi komɛi hi Kiriat-arba+ kɛ emaji ni baa lɛ abo* lɛ amli, kɛ Dibon kɛ emaji ni baa lɛ abo lɛ amli, kɛ Yekabzeel+ kɛ eshihilɛhei lɛ amli, 26 kɛ Yeshua, kɛ Molada,+ kɛ Bet-pelet,+ 27 kɛ Hazar-shual,+ kɛ Beer-sheba kɛ emaji ni baa lɛ abo* lɛ amli, 28 kɛ Ziklag,+ kɛ Mekona kɛ emaji ni baa lɛ abo* lɛ amli, 29 kɛ En-rimon,+ kɛ Zora,+ kɛ Yarmut, 30 kɛ Zanoa,+ kɛ Adulam kɛ amɛshihilɛhei lɛ, kɛ Lakish+ kɛ ehe shikpɔji lɛ, kɛ Azeka+ kɛ maji ni baa lɛ abo* lɛ. Amɛhi* Beer-sheba kɛyashi Hinom Jɔɔ lɛ mli tɔ̃ɔ.+

31 Ni mɛi ni jɛ Benyamin lɛ hi Geba,+ kɛ Mikmash, kɛ Aiya, kɛ Betel+ kɛ emaji ni baa lɛ abo* lɛ amli, 32 kɛ Anatot,+ kɛ Nob,+ kɛ Anania, 33 kɛ Hazor, kɛ Rama,+ kɛ Gitaim, 34 kɛ Hadid, kɛ Zeboim, kɛ Nebalat, 35 kɛ Lod, kɛ Ono,+ kɛ ŋaalɔi ajɔɔ lɛ mli. 36 Ni ahã Levibii akui ni jɛ Yuda lɛ ateŋ mɛi komɛi yahi Benyamin.

12 Osɔfoi lɛ kɛ Levibii lɛ ni kɛ Shealtiel+ binuu Zerubabel,+ kɛ Yeshua+ kwɔ kɛba lɛ nɛ: Seraia, kɛ Yeremia, kɛ Ezra, 2 kɛ Amaria, kɛ Maluk, kɛ Hatush, 3 kɛ Shekania, kɛ Rehum, kɛ Meremot, 4 kɛ Ido, kɛ Ginetoi, kɛ Abiya, 5 kɛ Miyamin, kɛ Maadia, kɛ Bilga, 6 kɛ Shemaia, kɛ Yoiarib, kɛ Yedaia, 7 kɛ Salu, kɛ Amok, kɛ Hilkia, kɛ Yedaia. Mɛnɛɛmɛi ji osɔfoi lɛ kɛ amɛnyɛmimɛi hii lɛ ahiɛnyiɛlɔi yɛ Yeshua gbii lɛ amli.

8 Levibii lɛ ji Yeshua, kɛ Binui, kɛ Kadmiel,+ kɛ Sherebia, kɛ Yuda, kɛ Matania,+ mɔ ni kɛ enyɛmimɛi hii lɛ nyiɛɔ hiɛ yɛ shidaa lalai lɛ amli lɛ. 9 Ni amɛnyɛmimɛi hii Bakbukia kɛ Uni damɔɔ amɛhiɛ kɛbuɔ.* 10 Yeshua fɔ Yoiakim, ni Yoiakim hu fɔ Eliashib,+ ni Eliashib hu fɔ Yoiada.+ 11 Ni Yoiada hu fɔ Yonatan, ni Yonatan hu fɔ Yadua.

12 Yoiakim gbii lɛ amli lɛ, mɛi ni ji osɔfoi, ni ji tsɛmɛi ashĩai onukpai lɛ nɛ: yɛ Seraia+ nɔ lɛ mli lɛ, Meraia; yɛ Yeremia nɔ lɛ mli lɛ, Hanania; 13 yɛ Ezra+ nɔ lɛ mli lɛ, Meshulam; yɛ Amaria nɔ lɛ mli lɛ, Yehohanan; 14 yɛ Maluki nɔ lɛ mli lɛ, Yonatan; yɛ Shebania nɔ lɛ mli lɛ, Yosef; 15 yɛ Harim+ nɔ lɛ mli lɛ, Adna; yɛ Meraiot nɔ lɛ mli lɛ, Helkai; 16 yɛ Ido nɔ lɛ mli lɛ, Zakaria; yɛ Gineton nɔ lɛ mli lɛ, Meshulam; 17 yɛ Abiya+ nɔ lɛ mli lɛ, Zikri; yɛ Miniamin nɔ lɛ mli lɛ, . . . ;* yɛ Moadia nɔ lɛ mli lɛ, Piltai; 18 yɛ Bilga+ nɔ lɛ mli lɛ, Shamua; yɛ Shemaia nɔ lɛ mli lɛ, Yehonatan; 19 yɛ Yoiarib nɔ lɛ mli lɛ, Matenai; yɛ Yedaia+ nɔ lɛ mli lɛ, Uzi; 20 yɛ Salai nɔ lɛ mli lɛ, Kalai; yɛ Amok nɔ lɛ mli lɛ, Eber; 21 yɛ Hilkia nɔ lɛ mli lɛ, Hashabia; yɛ Yedaia nɔ lɛ mli lɛ, Netanel.

22 Aŋmala Levibii lɛ atsɛmɛi ashĩai onukpai lɛ agbɛ́ii yɛ Eliashib, kɛ Yoiada, kɛ Yohanan, kɛ Yadua+ gbii lɛ amli, ni nakai nɔŋŋ afee yɛ osɔfoi lɛ hu agbɛfaŋ, kɛyashi Persianyo Dario maŋtsɛyeli be lɛ mli.

23 Aŋmala Levibii ni ji tsɛmɛi ashĩai onukpai lɛ agbɛ́ii yɛ wolo ni aŋmalaa nakai beiaŋ saji yɛ mli lɛ mli kɛyashi Yohanan, Eliashib binuu lɛ gbii lɛ amli. 24 Levibii lɛ ateŋ onukpai lɛ ji, Hashabia, kɛ Sherebia, kɛ Yeshua,+ Kadmiel+ binuu lɛ, ni amɛnyɛmimɛi hii lɛ damɔɔ amɛhiɛ kɛjieɔ Nyɔŋmɔ yi ni amɛdaa lɛ shi tamɔ bɔ ni David, anɔkwa Nyɔŋmɔ lɛ gbɔmɔ lɛ efã ni afee lɛ,+ bulɔi yɛ bulɔi amasɛi. 25 Matania,+ kɛ Bakbukia, kɛ Obadia, kɛ Meshulam, kɛ Talmon, kɛ Akub+ buɔ akɛ agbonaakwɛlɔi,+ amɛbuɔ agbói lɛ anaa tsũi ni yɔɔ nitoohe lɛ mli lɛ ahe. 26 Mɛnɛɛmɛi sɔmɔ yɛ Yoiakim gbii lɛ amli, kɛ agbɛnɛ hu yɛ Nehemia, amralo lɛ, kɛ osɔfo Ezra,+ woloŋmalɔ lɛ gbii lɛ amli; Yoiakim tsɛ ji Yeshua,+ ni Yeshua hu tsɛ ji Yozadak.

27 Be ni agbeleɔ Yerusalem gbogboi lɛ anaa lɛ, ayatao Levibii lɛ, ni akɛ amɛ jɛ hei ni amɛyɔɔ lɛ fɛɛ kɛba Yerusalem koni amɛbaye gbogboi lɛ anaagbelemɔ he gbi jurɔ lɛ kɛ miishɛɛ, koni amɛkɛ tsɛŋtsɛŋi, kɛ kpãa saŋkui, kɛ saŋkui alá shidaa lalai.+ 28 Ni lalɔi* abii lɛ jɛ kpokpaa lɛ nɔ amɛbabua amɛhe naa, amɛjɛ hei fɛɛ ni bɔle Yerusalem lɛ, amɛjɛ Netofatbii+ lɛ ashihilɛhei lɛ, 29 amɛjɛ Bet-gilgal,+ kɛ agbɛnɛ hu Geba+ kɛ Azmawet+ shikpɔji lɛ anɔ, ejaakɛ lalɔi lɛ emamɔ shihilɛhei amɛhã amɛhe kɛbɔle Yerusalem he kɛkpe. 30 Ni osɔfoi lɛ kɛ Levibii lɛ fee amɛhe krɔŋkrɔŋ, ni amɛfee maŋbii lɛ, kɛ agbói lɛ,+ kɛ gbogbo+ lɛ hu krɔŋkrɔŋ.+

31 Kɛkɛ ni mikɛ Yuda lumɛi lɛ kwɔ kɛba gbogbo lɛ nɔ. Agbɛnɛ hu, mito lalɔi akui wuji enyɔ koni amɛlá shidaa lalai, kɛ kui koni amɛshi akoŋ kɛnyiɛ amɛsɛɛ, ni kuu kome nyiɛ gbogbo lɛ nɔ kɛtee ninejurɔgbɛ yɛ he ni Lamulu Agbó*+ lɛ yɔɔ lɛ gbɛ. 32 Hoshaia kɛ Yuda lumɛi lɛ ateŋ mlijaa fã yi amɛsɛɛ, 33 ni mɛi ni fata amɛhe ji Azaria, kɛ Ezra, kɛ Meshulam, 34 kɛ Yuda, kɛ Benyamin, kɛ Shemaia, kɛ Yeremia. 35 Osɔfoi lɛ ekomɛi abii ni hiɛ tɛtɛrɛmantɛrɛi+ ni fata amɛhe lɛ nɛ: Zakaria, etsɛ ji Yonatan, ni Yonatan hu tsɛ ji Shemaia, ni Shemaia hu tsɛ ji Matania, ni Matania hu tsɛ ji Mikaia, ni Mikaia hu tsɛ ji Zakur, ni Zakur hu tsɛ ji Asaf,+ 36 kɛ Zakaria nyɛmimɛi hii Shemaia, kɛ Azarel, kɛ Milalai, kɛ Gilalai, kɛ Maai, kɛ Netanel, kɛ Yuda, kɛ Hanani, ni amɛhiɛ David, anɔkwa Nyɔŋmɔ lɛ gbɔmɔ lɛ nibii ni akɛtswaa lala lɛ;+ ni Ezra,+ woloŋmalɔ lɛ nyiɛ amɛhiɛ. 37 Be ni amɛshɛ Nuhiŋmɛi Agbó+ lɛ he lɛ, amɛtee amɛhiɛ tɛ̃ɛ kɛtsɔ gbogbo lɛ kwɔɔhe lɛ yɛ David Shĩa lɛ yiteŋ kɛtsɔ David Maŋ+ lɛ Atrakpo+ lɛ nɔ, kɛtee Nu Agbó+ lɛ yiteŋ yɛ bokãgbɛ.

38 Lalɔi akuu ni ji enyɔ ni láa shidaa lala lɛ yi abɛkugbɛ,* ni mi kɛ maŋbii lɛ ateŋ mlijaa fã ni eshwɛ lɛ yi amɛsɛɛ yɛ gbogbo lɛ nɔ yɛ Flɔnɔi Amɔɔ+ lɛ yiteŋ kɛtee Gbogbo Lɛkɛtɛɛ+ lɛ nɔ, 39 ni amɛtsɔ Efraim Agbó+ lɛ yiteŋ kɛtee Maŋ Momo Lɛ Agbó+ lɛ nɔ, kɛba Loo Agbó+ lɛ nɔ, kɛba Hananel Mɔɔ+ lɛ nɔ, kɛba Mea Mɔɔ lɛ nɔ kɛtee Gwantɛŋi Agbó+ lɛ nɔ; ni amɛyawa yɛ Bulɔi Agbó lɛ naa.

40 Kɛkɛ ni lalɔi akui enyɔ ni láa shidaa lala lɛ badamɔ anɔkwa Nyɔŋmɔ lɛ shĩa lɛ hiɛ; mi kɛ nɔkwɛlɔi lɛ ateŋ mlijaa fã ni fata mihe lɛ hu badamɔ jɛmɛ, 41 ni osɔfoi nɛɛ, Eliakim, kɛ Maaseia, kɛ Miniamin, kɛ Mikaia, kɛ Elioenai, kɛ Zakaria, kɛ Hanania hu hiɛ tɛtɛrɛmantɛrɛi kɛdamɔ jɛmɛ, 42 ni Maaseia, kɛ Shemaia, kɛ Eleazar, kɛ Uzi, kɛ Yehohanan, kɛ Malkia, kɛ Elam, kɛ Ezer hu damɔ jɛmɛ. Ni lalɔi lɛ ni Izrahia kwɛɔ amɛnɔ lɛ kɛ gbee ni wa lá.

43 Nakai gbi lɛ, amɛshã afɔlei babaoo ni amɛmii shɛ amɛhe,+ ejaakɛ anɔkwa Nyɔŋmɔ lɛ hã amɛmii shɛ amɛhe waa diɛŋtsɛ. Yei lɛ kɛ gbekɛbii lɛ hu nya waa+ aahu akɛ, anu nyamɔ ni anya yɛ Yerusalem lɛ he yɛ shɔŋŋ.+

44 Nakai gbi lɛ, ahala hii ato nitoohei+ ni akɛ oniai+ lɛ, kɛ klɛŋklɛŋ yibii+ lɛ, kɛ mlijai nyɔŋma mli ekomekomei+ lɛ baato mli lɛ anɔ. Jɛmɛ ji he ni amɛbaabua maji lɛ aŋmɔshi nibii ni Mla lɛ biɔ+ ni akɛbahã osɔfoi lɛ kɛ Levibii+ lɛ anaa awo, ejaakɛ mɛi ni yɔɔ Yuda lɛ nya waa yɛ sɔɔmɔ ni osɔfoi lɛ kɛ Levibii lɛ sɔmɔɔ lɛ hewɔ. 45 Ni amɛbɔi amɛ-Nyɔŋmɔ lɛ nitsumɔ lɛ tsumɔ kɛ nitsumɔ ni akɛwo amɛdɛŋ akɛ amɛfee nibii krɔŋkrɔŋ lɛ, ni nakai nɔŋŋ lalɔi lɛ kɛ agbonaakwɛlɔi lɛ fee, tamɔ bɔ ni David kɛ ebinuu Solomon fã ni afee lɛ. 46 Ejaakɛ yɛ David kɛ Asaf gbii lɛ amli tɔ̃ɔ lɛ, ayɛ mɛi* ni kwɛɔ lalɔi lɛ anɔ, ni amɛ nɔŋŋ amɛkwɛɔ yijiemɔ kɛ shidaa lalai ni aláa ahãa Nyɔŋmɔ lɛ hu nɔ.+ 47 Ni yɛ Zerubabel+ gbii lɛ amli kɛ Nehemia gbii lɛ amli fɛɛ lɛ, Israel fɛɛ hãa lalɔi+ kɛ agbonaakwɛlɔi+ lɛ nɔ ni he hiaa amɛ daa gbi. Israelbii lɛ yɛ nɔ ni amɛkɛhãa Levibii lɛ,+ ni Levibii lɛ hu yɛ nɔ ni amɛkɛhãa Aaron seshibii lɛ.

13 Nakai gbi lɛ, akane Mose wolo lɛ yɛ maŋbii lɛ atoiiaŋ,+ ni ana ni aŋma yɛ mli akɛ, Amonnyo ko loo Moabnyo+ ko akaba anɔkwa Nyɔŋmɔ lɛ asafo lɛ mli,+ 2 ejaakɛ amɛkɛ niyenii* kɛ nu ebakpeee Israelbii lɛ, shi amɛyabɔ Bileam apaa koni ebalomɔ amɛ.+ Shi wɔ-Nyɔŋmɔ lɛ hã loomɔ lɛ fɛɛ tsɔ jɔɔmɔ.+ 3 Be ni amɛnu Mla lɛ nɔŋŋ lɛ, amɛhã mɛi fɛɛ ni jɛ maji krokomɛi anɔ lɛ,* tse amɛhe kɛje Israelbii lɛ ahe.+

4 Dani abaafee enɛ lɛ, no mli lɛ, Eliashib+ ji osɔfo ni kwɛɔ tsũi* ni yɔɔ wɔ-Nyɔŋmɔ lɛ shĩa* lɛ nitoohe lɛ mli lɛ anɔ,+ ni ekɛ Tobia+ efee weku. 5 Esaa tsũi* ni yɔɔ nitoohe lɛ mli lɛ ateŋ eko ni da waa lɛ mli ehã lɛ; be ko ni eho lɛ, akɛ ŋmaa* afɔlei lɛ, frankinsɛnsi lɛ, kɛ sɔlemɔ shĩa lɛ nibii lɛ, kɛ ŋmaa mlijai nyɔŋma mli ekomekomei lɛ, kɛ wain hee mlijai nyɔŋma mli ekomekomei lɛ, kɛ mu+ mlijai nyɔŋma mli ekomekomei lɛ, nibii ni ato akɛ akɛhã Levibii+ lɛ, kɛ lalɔi lɛ, kɛ agbonaakwɛlɔi lɛ, kɛ agbɛnɛ hu, oniai ni atsuɔ ahãa osɔfoi lɛ toɔ jɛmɛ.+

6 Nɛkɛ be nɛɛ mli fɛɛ lɛ, mibɛ Yerusalem ejaakɛ mitee maŋtsɛ lɛ ŋɔɔ yɛ Babilon maŋtsɛ Artashasta+ nɔyeli afi ni ji 32 lɛ mli;+ ni be ko sɛɛ lɛ, mibi maŋtsɛ lɛ gbɛ. 7 Kɛkɛ ni miba Yerusalem ni mibana efɔŋ kpele ni Eliashib+ efee yɛ Tobia+ hewɔ, akɛ esaa tsũi ni yɔɔ nitoohe lɛ mli lɛ ateŋ eko mli ehã lɛ yɛ anɔkwa Nyɔŋmɔ lɛ shĩa lɛ kpo lɛ nɔ. 8 Mináaa he miishɛɛ kwraa, no hewɔ lɛ, mijie Tobia tsũ mli nibii lɛ fɛɛ kɛje tsũ* ni yɔɔ nitoohe lɛ mli lɛ mli mishɛrɛ mishwie. 9 No sɛɛ lɛ, mifã akɛ atsumɔ tsũ lɛ mli, ni amɛtsumɔ mli; ni mikɛ anɔkwa Nyɔŋmɔ lɛ shĩa lɛ nibii lɛ kɛ ŋmaa afɔlei lɛ, kɛ frankinsɛnsi+ lɛ ku sɛɛ wo mli.+

10 Ni mina hu akɛ, akɛ nibii ni ato akɛ akɛhã Levibii+ lɛ hãko amɛ,+ no hewɔ lɛ, Levibii lɛ kɛ lalɔi lɛ ni tsuɔ nitsumɔ lɛ eshi amɛtee, mɔ fɛɛ mɔ etee lɛ diɛŋtsɛ eŋmɔ mli.+ 11 No hewɔ lɛ, mikã nɔkwɛlɔi lɛ ahiɛ+ ni mikɛɛ amɛ akɛ: “Mɛni hewɔ nyɛku nyɛhiɛ nyɛfɔ̃ anɔkwa Nyɔŋmɔ lɛ shĩa lɛ nɔ lɛ?”+ Kɛkɛ ni mibua amɛnaa ni mikɛ amɛ to amɛnitsumɔi lɛ anɔ ekoŋŋ. 12 Ni mɛi ni yɔɔ Yuda lɛ fɛɛ kɛ ŋmaa mlijai nyɔŋma mli ekomekomei+ lɛ, kɛ wain hee mlijai nyɔŋma mli ekomekomei lɛ, kɛ mu mlijai nyɔŋma mli ekomekomei lɛ ba tsũi ni yɔɔ nitoohe lɛ amli.+ 13 Kɛkɛ ni mikɛ osɔfo Shelemia, kɛ Zadok, woloŋmalɔ lɛ, kɛ Pedaia ni jɛ Levibii lɛ ateŋ lɛ, to tsũi ni yɔɔ nitoohe lɛ mli lɛ anɔ, ni Hanan, ni ji Matania binuu Zakur binuu lɛ ji mɔ ni yeɔ ebuaa amɛ, ejaakɛ hii nɛɛ ji hii ni amuɔ afɔ̃ɔ amɛnɔ. Amɛnitsumɔ ji amɛja nibii lɛ amɛhã amɛnyɛmimɛi lɛ.

14 Ao mi-Nyɔŋmɔ, kaimɔ mi+ yɛ enɛ hewɔ, ni kaatsumɔ suɔmɔ ni tsakeee ni mijie lɛ kpo yɛ mi-Nyɔŋmɔ lɛ shĩa lɛ kɛ emli sɔɔmɔ* lɛ hewɔ lɛ.+

15 Nakai gbii lɛ amli lɛ, mina akɛ mɛi ni yɔɔ Yuda lɛ naanaa wainŋaa bui amli yɛ Hejɔɔmɔ Gbi lɛ nɔ,+ amɛkɛ ŋmaa babaoo baa ni amɛkɛtereɔ tejii, ni amɛkɛ wain, kɛ wain yibii, kɛ agbamii, kɛ jatsui srɔtoi fɛɛ baa Yerusalem yɛ Hejɔɔmɔ Gbi lɛ nɔ.+ No hewɔ lɛ, mibɔ amɛ kɔkɔ koni amɛkahɔ̃ɔ nii yɛ nakai gbi lɛ nɔ.* 16 Ni Tirobii komɛi ni yɔɔ maŋ lɛ mli lɛ kɛ loo kɛ jarayeli nibii srɔtoi fɛɛ baa amɛbahɔ̃ɔ amɛhãa Yudabii lɛ kɛ mɛi ni yɔɔ Yerusalem lɛ yɛ Hejɔɔmɔ Gbi lɛ nɔ.+ 17 No hewɔ lɛ, mikã Yuda abladei lɛ ahiɛ ni mikɛɛ amɛ akɛ: “Mɛɛ efɔŋ nyɛfeɔ nɛɛ, ni nyɛkɛbuleɔ Hejɔɔmɔ Gbi lɛ po nɛɛ? 18 Jeee enɛ nɔŋŋ nyɛtsɛmɛi lɛ fee hewɔ ni wɔ-Nyɔŋmɔ lɛ kɛ sane fɔŋ nɛɛ fɛɛ ba wɔnɔ, kɛ agbɛnɛ hu, maŋ nɛɛ nɔ lɛ? Agbɛnɛ nyɛmiibule Hejɔɔmɔ Gbi lɛ,+ ni no baahã Nyɔŋmɔ mli awo la waa awo Israel.”

19 No hewɔ lɛ, dani Hejɔɔmɔ Gbi lɛ baaje shishi lɛ, kɛ́ duŋ bɔi woo yɛ Yerusalem agbói lɛ anɔ pɛ lɛ, mifãa koni aŋamɔ shinai lɛ. Miwoɔ kitã hu akɛ, akagbele shinai lɛ kɛyashi Hejɔɔmɔ Gbi lɛ baaho, ni mihãa mi diɛŋtsɛ misɔɔlɔi lɛ ekomɛi yadamɔɔ agbói lɛ anaa koni akɛ jatsui akaba mli yɛ Hejɔɔmɔ Gbi lɛ nɔ. 20 No hewɔ lɛ, jarayelɔi kɛ nihɔ̃ɔlɔi ni hɔ̃ɔ jarayeli nibii srɔtoi fɛɛ lɛ wɔ Yerusalem agbói lɛ asɛɛ shi kome loo shii enyɔ. 21 Kɛkɛ ni mibɔ amɛ kɔkɔ ni mikɛɛ amɛ akɛ: “Mɛni hewɔ nyɛbawɔɔ gbogbo lɛ sɛɛ lɛ? Kɛ́ nyɛfee nakai ekoŋŋ lɛ, mawó minine nɔ yɛ nyɛnɔ.” Kɛjɛ nakai be lɛ nɔ lɛ, amɛbaaa yɛ Hejɔɔmɔ Gbi lɛ nɔ dɔŋŋ.

22 Ni mikɛɛ Levibii lɛ akɛ amɛfee amɛhe krɔŋkrɔŋ daa ni amɛba ni amɛbabu agbói lɛ anaa koni afee Hejɔɔmɔ Gbi lɛ krɔŋkrɔŋ.+ Ao mi-Nyɔŋmɔ, kaimɔ mi yɛ enɛ hu hewɔ, ni ona mi mɔbɔ yɛ osuɔmɔ ni tsakeee ni fa babaoo lɛ hewɔ.+

23 Nakai gbii lɛ amli hu lɛ, mina Yudafoi ni kɛ Ashdod yei,+ kɛ Amon yei,+ kɛ Moab yei ebote gbalashihilɛ mli.*+ 24 Amɛbii lɛ ateŋ mlijaa fã wieɔ Ashdod wiemɔ lɛ, ni fã hu wieɔ jeŋmaji krokomɛi lɛ awiemɔ, shi amɛteŋ mɔ ko mɔ ko nyɛɛɛ awie Yudafoi awiemɔ lɛ. 25 No hewɔ lɛ, mikã amɛhiɛ ni milomɔ amɛ, ni miyi hii lɛ ateŋ mɛi komɛi+ ni mifamɔ amɛyitsɔi ni mihã amɛkã Nyɔŋmɔ kitã ni mikɛɛ amɛ akɛ: “Nyɛkɛ nyɛbiyei lɛ akahãa amɛbihii lɛ, ni nyɛkaŋɔa amɛbiyei lɛ eko nyɛhãa nyɛbihii lɛ loo nyɛ diɛŋtsɛ nyɛhe.+ 26 Ani jeee enɛɛmɛi nɔŋŋ hã Israel maŋtsɛ Solomon fee esha lɛ? Maŋtsɛ ko maŋtsɛ ko bɛ jeŋmaji babaoo lɛ ateŋ ni tamɔ lɛ;+ ni e-Nyɔŋmɔ lɛ sumɔ lɛ,+ ni no hewɔ lɛ, Nyɔŋmɔ wó lɛ Israel fɛɛ nɔ maŋtsɛ. Shi eŋamɛi ni jɛ maji krokomɛi anɔ lɛ hã lɛ po efee esha.+ 27 Ani ejeee nɔ ko ni yɔɔ naakpɛɛ waa akɛ nyɛkɛ yei ni jɛ maji krokomɛi anɔ ebote gbalashihilɛ mli ni nyɛkɛfee efɔŋ kpele nyɛshi wɔ-Nyɔŋmɔ lɛ?”+

28 Osɔfonukpa Eliashib+ binuu Yoiada+ bihii lɛ ateŋ mɔ kome etsɔ Sanbalat,+ Horonnyo lɛ shaanuu. No hewɔ lɛ, mishwie lɛ yɛ mihe.

29 Ao mi-Nyɔŋmɔ, kaimɔ amɛ ejaakɛ amɛbule osɔfoyeli lɛ kɛ osɔfoyeli kpaŋmɔ+ lɛ kɛ Levibii lɛ anɔ lɛ hu.+

30 No hewɔ lɛ, mifee amɛ krɔŋkrɔŋ kɛje jeŋmaji krokomɛi anibii fɛɛ ni ebule amɛ lɛ he, ni mikɛ nitsumɔi wo osɔfoi lɛ kɛ Levibii lɛ adɛŋ, mɔ fɛɛ mɔ yatsu enitsumɔ,+ 31 ni mito gbɛjianɔ koni akɛ lai+ lɛ aba yɛ bei ni ato lɛ amli, kɛ agbɛnɛ hu, klɛŋklɛŋ yibii ni akpaa lɛ.

Ao mi-Nyɔŋmɔ, kaimɔ mi ni ofee mi ejurɔ.+