YAAFO
א [Alef]*
1 Kwɛ bɔ ni yoo lɛ kome too ta shi, maŋ ni no mli lɛ emli eyi obɔ kɛ mɛi lɛ!+
Kwɛ bɔ ni yoo lɛ etsɔ tamɔ yoo okulafo, maŋ ni no mli lɛ mɛi babaoo yɔɔ emli fe jeŋmaji lɛ!+
Kwɛ bɔ ni anyɛɔ yoo ni no mli lɛ eji maŋnyɛ yɛ kpokpai lɛ ateŋ lɛ nɔ kɛhã nitsumɔ!+
ב [Bet]
2 Fó sɔŋŋ yoo lɛ fóɔ daa jenamɔ,+ ni yaafonui nyiɛɔ ekpaii ahe fɛɛ.
Esuɔlɔi lɛ ateŋ mɔ kome folo po bɛ ni baashɛje emii.+
Lɛ diɛŋtsɛ ehe gbɔmɛi lɛ eje esɛɛ;+ amɛtsɔmɔ ehenyɛlɔi.
ג [Gimel]
3 Yuda etee nomŋɔɔ mli+ kɛ nɔnaa kɛ nyɔŋyeli ni naa wa.+
Eyahi jeŋmaji lɛ ateŋ;+ enáaa hejɔɔmɔhe ko.
Mɛi ni waa lɛ yi lɛ fɛɛ eba enɔ yɛ ehaomɔ be lɛ mli.
ד [Dalet]
4 Gbɛi ni yaa Zion lɛ miiye awerɛho, ejaakɛ mɔ ko baaa gbijurɔyeli lɛ.+
Egbói lɛ fɛɛ efite;+ esɔfoi lɛ miikɛ̃mɔ.
Eblayei froi* lɛ anii efee mɔbɔ, ni ehao waa.
ה [He]
5 Ehenyɛlɔi lɛ etsɔ enuŋtsɔ;* ehenyɛlɔi lɛ ahe ejɔ amɛ.+
Ejaakɛ Yehowa ehã enii efee mɔbɔ yɛ etɔmɔi babaoo lɛ ahewɔ.+
Ebii lɛ enyiɛ ehenyɛlɔ lɛ hiɛ kɛtee nomŋɔɔ mli.+
ו [Waw]
6 Zion biyoo lɛ anunyam lɛ fɛɛ etã.+
Elumɛi lɛ etsɔ tamɔ baayelɔi ni náaa he ko aye nii yɛ,
Ni etɔ amɛ bliboo kɛnyiɛ mɔ ni tiuɔ amɛ lɛ hiɛ.
ז [Zayin]
7 Yɛ Yerusalem nɔnaa gbii lɛ kɛ gbii ni enáaa he ko ewɔ lɛ amli lɛ, Yerusalem kaiɔ
Enibii ni eyɔɔ kɛjɛ blema ni jara wa lɛ fɛɛ.+
Be ni emaŋbii lɛ yaje henyɛlɔ lɛ dɛŋ ni enáaa mɔ ko aye abua lɛ lɛ,+
ח [Het]
8 Yerusalem efee esha waa.+
No hewɔ ni etsɔ nɔ ko ni anyaŋeɔ lɛ.
Mɛi fɛɛ ni be ko ni eho lɛ amɛkɛ woo hãa lɛ lɛ ebuuu lɛ amɛhãaa nɔ ko, ejaakɛ amɛna ehe.+
Lɛ diɛŋtsɛ lɛ ekɛ̃mɔɔ,+ ni etsɔɔ ehe kɛ hiɛgbele.
ט [Tet]
9 Emuji lɛ yɛ etadei lɛ amli.
Ejwɛŋŋ ewɔsɛɛ he.+
Eshigbeemɔ lɛ yɛ naakpɛɛ; ebɛ mɔ ko ni baashɛje emii.
Ao Yehowa, kwɛmɔ minɔnaa lɛ, ejaakɛ henyɛlɔ lɛ efee ehe agbo.+
י [Yod]
10 Henyɛlɔ lɛ kɛ enine efɔ̃ ejwetrii lɛ fɛɛ nɔ.+
Ejaakɛ Yerusalem ena akɛ jeŋmaji lɛ ebote ejamɔhe lɛ,+
Mɛi ni ofã akɛ amɛkaba osafo lɛ mli lɛ.
כ [Kaf]
11 Emaŋbii lɛ fɛɛ miikɛ̃mɔ; amɛmiitao niyenii.*+
Amɛkɛ amɛnibii ni jara wa lɛ eyatsake niyenii, koni amɛyi aná wala.*
Ao Yehowa, kwɛmɔ ni ona akɛ mitsɔ yoo* ni bɛ nɔ ko mli.
ל [Lamed]
12 Nyɛ mɛi fɛɛ ni nyɛtsɔɔ gbɛ lɛ he kɛhoɔ lɛ, ani enɛ jeee nyɛhe sane ko?
Nyɛkwɛa ni nyɛnaa.
Ani piŋmɔ ko yɛ ni naa wa tamɔ bɔ ni ahã mipiŋ lɛ,
Piŋmɔ ni Yehowa hã mitsɔ mli yɛ emlifu ni naa wa lɛ gbi lɛ nɔ lɛ?+
מ [Mem]
13 Etsu la kɛjɛ ŋwɛi tɔ̃ɔ kɛbawo miwui lɛ amli,+ ni eeshã amɛteŋ eko fɛɛ eko.
Ekɛ yaa eha shi kɛtsɔ minaji tsɔne; enyɛ minɔ koni maku misɛɛ.
Ehã mitsɔ yoo ni ashi lɛ.
Gbi muu fɛɛ lɛ, mináaa hewalɛ.
נ [Nun]
14 Ekɛ enine efimɔ minɔtɔmɔi lɛ tamɔ kɔɔŋtso.
Akɛshwie mikɔɔŋ nɔ, ni mihewalɛ etã.
Yehowa kɛ mi ewo mɛi ni minyɛɛɛ amɛ lɛ adɛŋ.+
ס [Samek]
15 Yehowa eshɛrɛ hii ni he wala ni yɔɔ mimli lɛ fɛɛ eshwie.+
Etsɛ kpee ewo mi koni abatswia miblahii lɛ nii.+
Yehowa enaanaa Yuda oblayoo fro lɛ nɔ yɛ bu ni aŋaa wain yɛ mli lɛ mli.+
ע [Ayin]
16 Nibii nɛɛ ahewɔ lɛ, miifó;+ yaafonui miiho kɛmiijɛ mihiŋmɛiiaŋ.
Ejaakɛ mɔ fɛɛ mɔ ni baanyɛ ashɛje mimii loo ewaje mi lɛ kɛ mi teŋ ejekɛ.
Mibihii lɛ efee basaa, ejaakɛ henyɛlɔ lɛ eye kunim.
פ [Pe]
17 Zion egbɛ enijiaŋ,+ ebɛ mɔ ko ni baashɛje emii.
Yehowa efã Yakob henyɛlɔi ni bɔle ehe lɛ fɛɛ koni amɛte shi amɛwo lɛ.+
Yerusalem etsɔ nyaŋemɔ nii ehã amɛ.+
צ [Tsade]
18 Yehowa lɛ, jalɔ ji lɛ,+ ejaakɛ miyeee ekitãi lɛ anɔ.*+
Nyɛ majimaji fɛɛ, nyɛboa toi, ni nyɛnaa mipiŋmɔ lɛ.
Aŋɔ miblayei froi* lɛ kɛ miblahii lɛ nom kɛtee.+
ק [Kof]
19 Mibo mitsɛ misuɔlɔi lɛ, shi amɛje misɛɛ.+
ר [Resh]
20 Ao Yehowa, kwɛmɔ, ejaakɛ mihao waa.
Mimusuŋ miishã mi.*
Mitsui etsɔ ebu shi yɛ mimli, ejaakɛ mitse atua waa.+
Klante miigbe mɛi yɛ agbó lɛ naa;+ ni gbele hu yɛ shĩa lɛ mli.
ש [Shin]
21 Mɛi enu mikɛ̃ɛmɔ lɛ he; mɔ ko bɛ ni baashɛje mimii.
Mihenyɛlɔi lɛ fɛɛ enu sane fɔŋ ni eba minɔ lɛ he.
Amɛná miishɛɛ ejaakɛ bo ohã eba lɛ nakai.+
Shi obaahã gbi ni owie he lɛ aba,+ be ni amɛbaatsɔ tamɔ mi lɛ.+
ת [Taw]
22 Amɛnɔfɔŋfeemɔi lɛ fɛɛ aba ohiɛ, ni okɛ amɛ aye kɛ joomɔ+
Tamɔ bɔ ni okɛ mi eye kɛ joomɔ yɛ minɔtɔmɔi lɛ fɛɛ ahewɔ lɛ.
Ejaakɛ mikɛ̃ɛmɔ lɛ fa, ni mitsui he miiye.
א [Alef]
2 Kwɛ bɔ ni Yehowa kɛ emlifu atatu lɛ eha Zion biyoo lɛ he!
Ejɛ ŋwɛi eshɛ Israel hefɛo lɛ efɔ̃ shikpɔŋ.+
Ekaiii enajiashi sɛi+ lɛ yɛ emlifu gbi lɛ nɔ.
ב [Bet]
2 Yehowa emi Yakob shihilɛhei lɛ fɛɛ ni emusuŋ eshãaa lɛ.
Ekumɔ Yuda biyoo lɛ hei ni atswa gbogboi awo amɛhe lɛ eshwie shi yɛ emlila lɛ mli.+
Eshɛ maŋtsɛyeli lɛ kɛ elumɛi+ lɛ efɔ̃ shikpɔŋ, ni ebule amɛ.+
ג [Gimel]
3 Efolɔ Israel akolontoi* lɛ fɛɛ eshwie shi yɛ emlifu ni naa wa lɛ mli.
Esu eninejurɔ be ni henyɛlɔ lɛ ba lɛ,+
Ni etee nɔ etso yɛ Yakob tamɔ la ni shãa nɔ fɛɛ nɔ ni bɔle ehe lɛ.+
ד [Dalet]
4 Edɔ egãi lɛ mli tamɔ henyɛlɔ ko; ekɛ eninejurɔ eta gãi lɛ tamɔ henyɛlɔ ko;+
Etee nɔ egbe mɛi ni he yɔɔ fɛo yɛ mɔ hiŋmɛiiaŋ lɛ.+
Ni efɔse emlifu lɛ eshwie shi tamɔ la ni miitso+ ewo Zion biyoo lɛ mama tsũ lɛ mli.+
ה [He]
5 Yehowa etsɔ tamɔ henyɛlɔ ko;+
Emi Israel emuu.
Emi emɔji lɛ fɛɛ;
Ekpãtã ehei ni atswa gbogboi awo amɛhe lɛ fɛɛ ahiɛ.
Ni ehã awerɛhoyeli kɛ yaafo lala eyi Yuda biyoo lɛ mli obɔ.
ו [Waw]
6 Ekumɔ egba lɛ eshwie shi,+ tamɔ abɔɔ mli agba.
Efo egbijurɔyeli lɛ sɛɛ.+
Yehowa ehã hiɛ ekpa gbijurɔyeli kɛ hejɔɔmɔ gbi nɔ yɛ Zion,
Ni ebuuu maŋtsɛ kɛ osɔfo ehãaa nɔ ko yɛ emlifu ni naa wa lɛ mli.+
ז [Zayin]
7 Yehowa eshi efɔleshaa latɛ lɛ;
Enyaŋe ejamɔhe lɛ.+
Ekɛ emɔji ni atswa gbogboi awo amɛhe lɛ ahe gbogboi lɛ ewo henyɛlɔ lɛ dɛŋ.+
Amɛhole amɛgbei anɔ yɛ Yehowa shĩa lɛ mli+ tamɔ afeɔ yɛ gbi jurɔ nɔ lɛ.
ח [Het]
8 Yehowa ekpɛ eyiŋ akɛ ebaafite Zion biyoo lɛ gbogbo lɛ.+
Ekpã susumɔ kpãa lɛ mli.+
Esuko enine yɛ hiɛkpatamɔ ni ekɛbaa* lɛ he.
Ni ehãa kpoku kɛ gbogbo fɛɛ yeɔ awerɛho.
Ahã amɛ fɛɛ amɛgbɔjɔ.
ט [Tet]
9 Egbói lɛ eshiu kɛbote shikpɔŋ.+
Efite esɛɛ adabaŋi* lɛ ni ekumɔ amɛ.
Emaŋtsɛ lɛ kɛ elumɛi lɛ yɛ jeŋmaji lɛ ateŋ.+
Mla* ko bɛ; egbalɔi lɛ po náaa ninaa ko kɛjɛɛɛ Yehowa ŋɔɔ.+
י [Yod]
10 Zion biyoo lɛ onukpai lɛ tara shikpɔŋ diŋŋ.+
Amɛmiiloo mulu amɛmiiwo amɛyiteŋ ni amɛbumɔ kpekpe.*+
Yerusalem oblayei froi lɛ kɛ amɛhiɛ ebumɔ shikpɔŋ.
כ [Kaf]
11 Etɔ mihiŋmɛii kɛ yaafo.+
Mimusuŋ miishã mi.*
Afɔse mimlɛbo ashwie shikpɔŋ, yɛ mimaŋ lɛ biyoo* lɛ shigbeemɔ lɛ hewɔ,+
Yɛ gbekɛbii kɛ abifabii ni nɔ enyɔ amɛnɔ yɛ maŋ lɛ henaabuamɔhei lɛ hewɔ.+
ל [Lamed]
12 Be ni nɔ nyɔɔ amɛnɔ yɛ maŋ lɛ henaabuamɔhei lɛ tamɔ mɛi komɛi ni apila amɛ lɛ,
Be ni amɛkamɔ amɛnyɛmɛi adɛŋ ni amɛwala* tãa lɛ,
Amɛyaa nɔ amɛbiɔ amɛnyɛmɛi lɛ akɛ, “Nɛgbɛ ŋmaa* kɛ wain yɔɔ?”+
מ [Mem]
13 Bo Yerusalem biyoo, mɛni mikɛbaaye odase,
Loo, mɛni he manyɛ mikɛ bo ato?
Bo Zion biyoo oblayoo fro, mɛni he manyɛ mikɛ bo ato kɛshɛje omii?
Ejaakɛ okuumɔ lɛ da tamɔ ŋshɔ.+ Namɔ baanyɛ bo atsa?+
נ [Nun]
14 Amale kɛ ninai foji sɔŋŋ ogbalɔi lɛ na yɛ ohe,+
Ni amɛhãaa ona otɔmɔ lɛ koni okaya nomŋɔɔ mli,+
Shi amɛtee nɔ amɛkɛɛ bo amale ninai kɛ lakamɔ wiemɔi.+
ס [Samek]
15 Mɛi fɛɛ ni tsɔɔ gbɛ lɛ nɔ kɛhoɔ lɛ tswaa amɛdɛ̃ amɛwoɔ bo kɛyeɔ ohe fɛo.+
Amɛboɔ tsia* yɛ bɔ ni amɛnaa ekpɛ amɛhe lɛ hewɔ,+ ni amɛhosoɔ amɛyitsei amɛwoɔ Yerusalem biyoo lɛ amɛkɛɔ akɛ:
“Ani jeee maŋ nɛɛ akɛɛ yɛ ehe akɛ, ‘Ehe yɛ fɛo waa, ehãa shikpɔŋ lɛ fɛɛ náa miishɛɛ’ lɛ?”+
פ [Pe]
16 Ohenyɛlɔi lɛ fɛɛ egbɛ amɛdaaŋ amɛwo bo.
Amɛboɔ tsia* ni amɛkpeɔ amɛnyanyɔjiashi amɛkɛɔ akɛ: “Wɔmi lɛ emuu.+
Gbi ni wɔmɛ aahu lɛ nɛ!+ Eshɛ agbɛnɛ, ni wɔna kɛ wɔhiŋmɛii!”+
ע [Ayin]
17 Yehowa efee nɔ ni ekpɛ eyiŋ yɛ he lɛ;+ etsu nɔ ni ekɛɛ lɛ he nii,+
Nɔ ni efã kɛjɛ blema beebe lɛ.+
Ekumɔ eshwie shi ni emusuŋ eshãaa lɛ.+
Ehã henyɛlɔ lɛ miinya yɛ ohewɔ; ewó ohenyɛlɔi lɛ akolonto* lɛ nɔ.
צ [Tsade]
18 Ao, Zion biyoo gbogbo, amɛtsui boɔ tsɛɔ Yehowa.
Yaafonui aho tamɔ faa jetsɛremɔ kɛ jenamɔ.
Kaajɔɔ ohe, ni kaahã ohiŋmɛi* hu miijɔɔ ehe.
ק [Kof]
19 Tee shi! Fó kɛ́ je na, yɛ nyɔɔŋ buu be lɛ shishijee.
Fɔsemɔ otsuiŋ tamɔ nu oshwie Yehowa hiɛ.
Holemɔ oniji anɔ otsɔɔ lɛ yɛ obii lɛ awala* hewɔ,
Obii ni nɔ miinyɔ amɛnɔ yɛ gbɛjegbɛ fɛɛ gbɛjegbɛ koŋ* yɛ hɔmɔ hewɔ lɛ.+
ר [Resh]
20 Ao Yehowa, kwɛmɔ mɔ ni okɛ lɛ eye kɛ joomɔ lɛ, ni ona.
Ani esa akɛ yei aya nɔ aye amɛ diɛŋtsɛ amɛmusuŋbii,* amɛ diɛŋtsɛ amɛbii ni yɔɔ hewalɛ lɛ?+
Ani esa akɛ agbe osɔfoi kɛ gbalɔi yɛ Yehowa jamɔhe lɛ?+
ש [Shin]
21 Oblanyo kɛ nuumo fɛɛ egboi kɛjwere shi yɛ gbɛjegbɛi lɛ anɔ.+
Miblayei froi* lɛ kɛ miblahii lɛ enyɔnyɔi yɛ klante naa.+
Ogbe mɛi yɛ omlifu gbi lɛ nɔ; ogbe mɛi ni omusuŋ eshãaa bo.+
ת [Taw]
22 Otsɛ mɛi ni he yɔɔ gbeyei kɛjɛ he fɛɛ he kɛba oookɛɛ gbijurɔyeli gbi.+
Yɛ Yehowa mlifu gbi lɛ nɔ lɛ, mɔ ko mɔ ko he ejeee mli, ni mɔ ko mɔ ko hu yi náaa wala;+
א [Alef]
3 Miji nuu ni ena amanehulu yɛ emlila tso lɛ hewɔ.
2 Eshwie mi ni ehã minyiɛ duŋ mli, shi jeee la mli.+
3 Anɔkwa, eyaa nɔ ewóɔ enine nɔ eshiɔ mi gbi muu fɛɛ.+
ב [Bet]
4 Ehã migbɔmɔtso* egbɔjɔ ni mitã loo;
Ekumɔ miwui.
5 Ewo mihe ka; ekɛ pɔizin ni joɔ+ kɛ shihilɛ ni mli wa ebɔle mi.
6 Enyɛ minɔ kɛta shi yɛ hei ni ewo duŋ, tamɔ gbɔmɛi ni egboi jeeŋmɔ.
ג [Gimel]
7 Efo afabaŋ ewo mihe koni mikanyɛ mijo foi;
Ekɛ akɔɔble gboklɛi ni tsii ewo mi.+
8 Ni kɛ́ mibolɔ waa kɛhã yelikɛbuamɔ lɛ, ebooo misɔlemɔ lɛ toi.*+
9 Ekɛ tɛi ni ako etsĩmɔ minanegbɛi lɛ;
Ehã migbɛi lɛ ekɔ̃dɔ̃.+
ד [Dalet]
10 Etsɔ tamɔ oshishibrishi ni ewo mi antɛo, tamɔ jata ni etee ehe.+
12 Edɔ egãi lɛ mli, ni eta egãimlibi lɛ ema minɔ.
ה [He]
13 Ekɛ egãimlibii kotoku lɛ mli gãimlibii* lɛ etsurɔ misabai amli.
14 Mitsɔ mɔ ni majimaji lɛ fɛɛ ŋmɔɔ lɛ, amɛláa mihe lala gbi muu fɛɛ.
15 Ekɛ nibii ni joɔ ewo mimli obɔ, ni ehã mitɔ kɛ joomɔtso.+
ו [Waw]
17 Ohãaa maná* toiŋjɔlɛ; mihiɛ ekpa nɔ ni ji ekpakpa nɔ.
18 No hewɔ lɛ mikɛɛ akɛ: “Minunyam lɛ etã, ni mihiɛnɔkamɔ hu etã yɛ Yehowa mli.”
ז [Zayin]
19 Kaimɔ minɔnaa kɛ bɔ ni mibɛ he ko ni miwɔɔ lɛ,+ kɛ joomɔtso lɛ kɛ pɔizin ni joɔ lɛ.+
20 Bɔ fɛɛ bɔ ni fee lɛ, obaakai* ni obaadɔ omli ni oye obua mi.+
21 Mikɛ enɛ baato mitsui mli; ni no hewɔ lɛ, maya nɔ mamɛ.+
ח [Het]
23 Amɛtsɔɔ ehee daa leebi;+ onɔkwayeli lɛ fa babaoo.+
24 Mikɛɔ* akɛ, “Yehowa ji migbɛfaŋnɔ,+ ni no hewɔ maya nɔ mamɛ lɛ lɛ.”+
ט [Tet]
25 Yehowa hi hã mɔ ni hiɛ kã enɔ lɛ,*+ gbɔmɔ* ni yaa nɔ etaoɔ esɛɛ gbɛ lɛ.+
26 Ehi akɛ mɔ baafee diŋŋ*+ kɛmɛ Yehowa yiwalaheremɔ lɛ.+
27 Ehi akɛ nuu baatere kɔɔŋtso lɛ yɛ eblahiiaŋ.+
י [Yod]
28 Kɛ́ Nyɔŋmɔ kɛfɔ̃ enɔ lɛ, ekome too eta shi ni efee diŋŋ.+
29 Ekɛ enaabu abu mulu mli;+ ekolɛ hiɛnɔkamɔ ko yɛ lolo.+
30 Etsɔ ekpai ehã mɔ ni gbaa lɛ ma lɛ; ehere jɛmɔi lɛ fɛɛ kɛwo emli obɔ.
כ [Kaf]
31 Ejaakɛ Yehowa shɛŋ wɔ efɔŋ kɛyaŋ naanɔ.+
32 Eyɛ mli akɛ ehã aaye awerɛho moŋ, shi ebaana mɔbɔ hu yɛ esuɔmɔ ni tsakeee ni fa babaoo lɛ hewɔ.+
33 Ejaakɛ ebɛ etsui mli akɛ ebaahã gbɔmɛi abii ana nɔ loo ehã amɛwerɛ aho amɛhe.+
ל [Lamed]
34 Kɛ́ mɔ ko naanaa shikpɔŋ lɛ nɔ gboklɛfoi lɛ fɛɛ anɔ yɛ enajiashi,+
35 Kɛ́ mɔ ko tsɔ mɔ ko sane hiɛ ebu shi yɛ Mɔ Ni Nɔ Kwɔ Fe Fɛɛ lɛ hiɛ,+
36 Kɛ́ mɔ ko ye mɔ ko sane fɔŋ yɛ esaneyeli mli lɛ
—Yehowa miihi nibii ni tamɔ nɛkɛ.
מ [Mem]
37 Belɛ, namɔ baanyɛ awie ni ehã nɔ ni ewie lɛ aba mli kɛji Yehowa fãko akɛ eba mli?
38 Nibii kpakpai kɛ nibii gbohii fɛɛ
Jɛɛɛ Mɔ Ni Nɔ Kwɔ Fe Fɛɛ lɛ naa kɛbaaa shi kome.
39 Mɛni hewɔ esa akɛ gbɔmɔ ni hiɛ kã lɛ awie nɔ ni ejɛ esha ni efee lɛ mli kɛba lɛ he nyanyaanya?+
נ [Nun]
40 Nyɛhãa wɔtaoa wɔgbɛi lɛ amli ni wɔpɛia wɔgbɛi lɛ amli jogbaŋŋ,+ ni wɔku wɔsɛɛ kɛya Yehowa ŋɔɔ.+
41 Nyɛhãa wɔholea wɔtsuii kɛ wɔniji anɔ wɔtsɔa Nyɔŋmɔ yɛ ŋwɛi,+ ni wɔkɛa akɛ:
42 “Wɔtɔ̃ ni wɔtse atua,+ ni okɛ wɔhe ekeko wɔ.+
ס [Samek]
44 Okɛ atatu efo wɔ kɛ bo teŋ koni wɔkanyɛ wɔbɛŋkɛ bo, koni wɔsɔlemɔi lɛ akatsɔ mli.+
45 Ohã wɔtsɔmɔ jwɛi kɛ bɔɔla yɛ majimaji lɛ ateŋ.”
פ [Pe]
46 Wɔhenyɛlɔi lɛ fɛɛ gbɛɔ amɛdaaŋ amɛwoɔ wɔ.+
47 Gbeyei nibii kɛ bui ebatsɔ wɔgbɛfaŋnɔ,+ hiɛkpatamɔ kɛ fitemɔ.+
48 Yaafonui hoɔ kɛjeɔ mihiŋmɛiiaŋ tamɔ fai yɛ kuumɔ ni akumɔ mimaŋ lɛ biyoo lɛ hewɔ.+
ע [Ayin]
49 Yaafonui hoɔ kɛjeɔ mihiŋmɛiiaŋ daa, esɛɛ efooo bibioo po,+
50 Kɛyashi Yehowa baajɛ ŋwɛi ekwɛ shikpɔŋ ni ena.+
51 Mihiŋmɛii ewo mi* awerɛho yɛ mimaŋ lɛ biyei lɛ fɛɛ ahewɔ.+
צ [Tsade]
52 Mifeko mihenyɛlɔi lɛ efɔŋ ko shi amɛmiigbɔbi mi tamɔ loofɔlɔ.
53 Amɛhã miwala efee diŋŋ yɛ bu lɛ mli; amɛyaa nɔ amɛkɛ tɛi tswiaa mi.
54 Nui ho yɛ miyiteŋ, ni mikɛɛ akɛ: “Migbe mijeŋ naa!”
ק [Kof]
55 Ao Yehowa, mibo mitsɛ ogbɛ́i lɛ kɛjɛ bu lɛ shishi tɔ̃ɔ.+
56 Bo migbee toi; kaatsimɔ otoi yɛ mibolɔmɔ kɛhã yelikɛbuamɔ, kɛ jiemɔ ni mitaoɔ ni ojie mi lɛ he.
57 Yɛ gbi ni mitsɛ bo lɛ nɔ lɛ, otsi obɛŋkɛ mi. Okɛɛ akɛ: “Kaashe gbeyei.”
ר [Resh]
58 Ao Yehowa, otsu misane lɛ he nii ohã mi,* ni okpɔ̃ miwala.+
59 Ao Yehowa, ona efɔŋ ni afee mi lɛ; ofainɛ ye misane lɛ ohã mi.+
60 Ona owele ni amɛtɔɔ lɛ fɛɛ, ŋai ni amɛtsɔɔ amɛshiɔ mi lɛ fɛɛ.
ש [Sin] loo [Shin]
61 Ao Yehowa, onu wiemɔi ni amɛwieɔ amɛshiɔ mi lɛ, ŋai ni amɛtsɔɔ amɛshiɔ mi lɛ fɛɛ,+
62 Mɛi ni teɔ shi amɛwoɔ mi lɛ anaabui kɛ mihe saji ni amɛwieɔ yɛ ablɛbiaŋ gbi muu fɛɛ lɛ.
63 Kwɛmɔ amɛ; kɛ́ amɛtara shi jio, amɛdamɔ shi jio, amɛkɛ amɛlalai lɛ yeɔ mihe fɛo!
ת [Taw]
64 Ao Yehowa, obaato amɛnajiaŋ yɛ amɛnifeemɔi lɛ anaa.
65 Obaahã amɛtsuiŋ awa, akɛ loomɔ ni okɛfɔ̃ amɛnɔ.
66 Obaatiu amɛ yɛ omlifu lɛ mli ni obaakpãtã amɛhiɛ kɛje Yehowa ŋwɛi lɛ shishi.
א [Alef]
4 Kwɛ bɔ ni shika tsuru ni kpɛlɛɔ, shika tsuru krɔŋŋ lɛ edi tuŋŋ!+
Kwɛ bɔ ni agbɛ tɛi krɔŋkrɔŋi+ lɛ ashwã gbɛjegbɛ fɛɛ gbɛjegbɛ koŋ!*+
ב [Bet]
2 Zion bihii ni ashwɛɛɛ amɛhe,* ni amɛjara wa tamɔ shika tsuru ni atsuu he lɛ,*
Kwɛ bɔ ni abuɔ amɛ tamɔ sũ kɔɔpoi,
Tamɔ gbɛshɔ̃lɔ ninenaa nitsumɔ!
ג [Gimel]
3 Ŋa mli gbei po kɛ amɛfufɔ hãa amɛbii koni amɛye,
Shi mimaŋ lɛ biyoo lɛ etsɔ yiwalɔ,+ tamɔ okpɔŋɔ-loofɔji* yɛ ŋa nɔ.+
ד [Dalet]
4 Abifao ni miiye fufɔ lolo lɛ lilɛi kpɛtɛɔ edaaŋ yɛ kumai hewɔ.
Gbekɛbii baa niyenii,*+ shi mɔ ko mɔ ko hãaa amɛ.+
ה [He]
5 Mɛi ni ye niyenii ni ŋɔɔŋɔi lɛ kamɔ shi kɛ hɔmɔ* yɛ gbɛjegbɛi lɛ anɔ.+
Mɛi ni alɛ amɛ yɛ atadei tsuji amli+ lɛ eloo lamulu* atuu.
ו [Waw]
6 Mimaŋ lɛ biyoo lɛ toigbalamɔ* lɛ naa wa fe esha he toigbalamɔ ni ba Sodom nɔ lɛ,+
Maŋ ni akpãtã ehiɛ trukaa ni náaa mɔ ko aye abua lɛ lɛ.+
ז [Zayin]
7 Nazirmɛi+ ni yɔɔ emli lɛ ahe tse fe snoo, amɛyɛɔ fe mliki.
Amɛtsuɔ fe ojarawatɛi;* amɛtamɔ safiro tɛi ni asha he keŋkeŋ.
ח [Het]
8 Amɛdi fe ŋai;*
Ayooo amɛ yɛ gbɛjegbɛi lɛ anɔ.
Amɛheloo egbi ni ekpɛtɛ amɛwui ahe;+ etsɔ tamɔ tso ni egbi.
ט [Tet]
9 Mɛi ni nyɔnyɔi yɛ klante naa lɛ anɔ hi fe mɛi ni hɔmɔ gbe amɛ lɛ,+
Mɛi ni ŋmɔshi nii ni amɛnáaa amɛye lɛ hewɔ lɛ, amɛtãra loo, ni amɛkamɔ shi tamɔ mɛi ni atsurɔ amɛ nii lɛ.
י [Yod]
10 Yei ni musuŋ tsɔɔ amɛ lɛ aniji ehoo amɛ diɛŋtsɛ amɛbii.+
Amɛtsɔmɔ amɛwerɛhoyeli niyenii be ni akumɔ mimaŋ lɛ biyoo lɛ.+
כ [Kaf]
11 Yehowa ejie emlifu lɛ kpo;
Efɔse emlifu ni naa wa lɛ eshwie shi.+
Ni ehã la eje yɛ Zion, ni eshã Zion faneshii lɛ.+
ל [Lamed]
12 Shikpɔŋ lɛ nɔ maŋtsɛmɛi lɛ kɛ mɛi fɛɛ ni yɔɔ shikpɔŋ* lɛ nɔ lɛ heee amɛyeee akɛ
Shiteekɛwolɔ lɛ kɛ henyɛlɔ lɛ baabote Yerusalem agbói lɛ amli.+
מ [Mem]
13 Enɛ ba lɛ nakai yɛ egbalɔi lɛ ahe eshai lɛ kɛ esɔfoi lɛ atɔmɔi lɛ ahewɔ,+
Mɛi ni shwie jalɔi lɛ alá shi yɛ emli lɛ.+
נ [Nun]
14 Amɛmiikpa shi yɛ gbɛjegbɛi lɛ anɔ tamɔ shwilafoi.+
Lá ekpa amɛhe fɛɛ ni ebule amɛ,+
No hewɔ lɛ, mɔ ko mɔ ko nyɛɛɛ ata amɛtadei lɛ ahe.
ס [Samek]
15 Amɛboɔ amɛwoɔ amɛ akɛ: “Nyɛshia biɛ! Nyɛhe tseee! Nyɛshia biɛ! Nyɛshia biɛ! Nyɛkataa wɔhe!”
Ejaakɛ amɛbɛ he ko ni amɛwɔɔ, ni amɛmiikpa shi kɛkɛ.
Mɛi miiwie yɛ jeŋmaji lɛ ateŋ akɛ: “Amɛnyɛŋ amɛkɛ wɔ ahi biɛ.*+
פ [Pe]
Gbɔmɛi ebuŋ osɔfoi lɛ dɔŋŋ,+ ni amɛwoŋ onukpai lɛ ahiɛ nyam dɔŋŋ.”+
ע [Ayin]
17 Amrɔ nɛɛ po lɛ, wɔkwɛ gbɛ efolo kɛhã yelikɛbuamɔ aahu akɛ etɔ wɔhiŋmɛii.+
Wɔkwɛ jeŋmaŋ ni nyɛŋ ahere wɔ gbɛ aahu kɛhã yelikɛbuamɔ.+
צ [Tsade]
18 Amɛgbɔbiɔ wɔnajifaamɔi lɛ eko fɛɛ eko+ aahu akɛ wɔnyɛɛɛ wɔnyiɛ wɔhenaabuamɔhei lɛ.
Wɔnaagbee eshɛ etã; wɔgbii lɛ etã, ejaakɛ wɔnaagbee eshɛ.
ק [Kof]
19 Mɛi ni tiuɔ wɔ lɛ ahe yɛ oya fe ŋwɛi okropɔŋi.+
Amɛnyiɛ wɔsɛɛ yɛ gɔji lɛ anɔ; amɛwo wɔ antɛo yɛ ŋa lɛ nɔ.
ר [Resh]
20 Amɛmɔ kɔɔyɔɔ ni wɔmuɔ yɛ wɔgugɔŋ lɛ, mɔ ni Yehowa efɔ lɛ mu lɛ,+ yɛ amɛbu agbo lɛ mli,+
Mɔ ni wɔwie yɛ ehe akɛ: “Ehɔɔŋ lɛ shishi wɔbaahi yɛ jeŋmaji lɛ ateŋ” lɛ.
ש [Sin]
21 Bo Edom+ biyoo ni hiɔ Uz shikpɔŋ lɛ nɔ, omli afili bo ni onya,
Shi kɔɔpoo lɛ baabaje bo hu odɛŋ,+ ni obaanu ni obaatɔ ni obaajie ohe folo.+
ת [Taw]
22 Ao Zion biyoo, otɔmɔ lɛ he toigbalamɔ lɛ miiba naagbee.
Awóŋ* bo kɛyaŋ nomŋɔɔ mli dɔŋŋ.+
Shi bo Edom biyoo, ebaagbala ejwɛŋmɔ kɛba otɔmɔ lɛ nɔ.
Ebaahã ana ohe eshai lɛ.+
5 Ao Yehowa, kaimɔ nɔ ni eba wɔnɔ lɛ.
Kwɛmɔ ni ona wɔhiɛshishwiemɔ lɛ.+
2 Ahe wɔgboshinii lɛ ahã mɛikpɔji, akɛ wɔshĩai lɛ ehã gbɔi.+
3 Wɔtsɔmɔ awusãi, wɔbɛ tsɛmɛi; wɔnyɛmɛi etsɔmɔ tamɔ yei okulafoi.+
4 Wɔ diɛŋtsɛ wɔnu ni wɔnuɔ lɛ, wɔkɛ shika héɔ,+ ni ahɔ̃ɔ wɔ diɛŋtsɛ wɔlai hu ahãa wɔ.
5 Mɛi ni tiuɔ wɔ lɛ eshɛ wɔkuɛ he etã;
Etɔ wɔ, shi ahãaa wɔjɔɔ wɔhe.+
6 Wɔkpãa wɔnine mli wɔhãa Ejipt+ kɛ Asiria+ dani wɔnáa niyenii* ni baashɛ wɔnaa.
7 Wɔtsɛmɛi ni fee esha lɛ bɛ dɔŋŋ, shi wɔ wɔtere amɛtɔmɔi lɛ.
8 Tsuji ji mɛi ni yeɔ wɔnɔ amrɔ nɛɛ; mɔ ko mɔ ko bɛ ni baashɔ̃ wɔ kɛje amɛdɛŋ.
9 Ŋa lɛ nɔ klante lɛ hewɔ lɛ, wɔkɛ wɔwala* woɔ oshãra mli dani wɔnáa wɔniyenii.*+
10 Hɔmɔ ni yeɔ wɔ waa sɔŋŋ hewɔ lɛ, wɔhewolɔ nɔ edɔ tamɔ flɔnɔɔ.+
11 Amɛshwie ŋamɛi ni yɔɔ Zion lɛ ahiɛ shi,* Yuda maji lɛ amli oblayei froi lɛ.+
12 Lumɛi lɛ, amɛniji akɛsɛŋ amɛ,+ ni amɛbuuu onukpai lɛ amɛhãaa nɔ ko.+
13 Oblahii lɛ tereɔ wiɛtɛ lɛ, ni gbekɛbii hii lɛ gbeegbeɔ shi yɛ laii ni amɛtere lɛ ashishi.
14 Onukpai lɛ eshi maŋ lɛ agbó lɛ mli;+ oblahii lɛ etswaaa amɛlala lɛ dɔŋŋ.+
15 Miishɛɛ eje wɔtsui mli; wɔjoo lɛ etsɔ awerɛhoyeli.+
16 Akekere lɛ eje wɔyitso egbee shi. Kpoo hã wɔ, ejaakɛ wɔfee esha!
17 Enɛ hewɔ lɛ, hela emɔ wɔtsui,+
Ni nibii nɛɛ ahewɔ lɛ, wɔhiŋmɛii anɔ eha,+
18 Yɛ Zion gɔŋ lɛ ni etsɔ amaŋfɔ lɛ hewɔ;+ bianɛ lɛ, osɔi ni shwɛɔ yɛ nɔ.
19 Shi bo Yehowa, ota maŋtsɛ sɛi nɔ kɛmiiya naanɔ.
Omaŋtsɛ sɛi lɛ ma shi kɛjɛ yinɔ kome nɔ kɛmiiya yinɔ kroko nɔ.+
20 Mɛni hewɔ esa akɛ ohiɛ akpa wɔnɔ kɛya naanɔ, ni oshi wɔ be kplaŋŋ nɛkɛ?+
21 Ao Yehowa, okɛ wɔ aku sɛɛ kɛba oŋɔɔ, ni wɔbaajɛ wɔsuɔmɔ mli wɔba oŋɔɔ.+
Feemɔ wɔgbii lɛ ehee tamɔ blema gbii lɛ.+
22 Shi, okpoo wɔ kwraa.
Omli efu wɔ waa lolo.+
Yitso 1-4 lɛ ji yaafo lalai ni ato naa yɛ Hebri niŋmaa okadii lɛ anaa.
Loo “Eblayei.”
Hebri sht. ŋm., “eyitso.”
Loo “amɛye ehe fɛo.”
Hebri sht. ŋm., “blodo.”
Loo “koni amɛkɛhã amɛsusuma aná hewalɛ.”
Akɛ wiemɔ “yoo” lɛ miitsu nii kɛmiihã Yerusalem.
Hebri sht. ŋm., “mitse enaabu hiɛ atua.”
Loo “miblayei.”
Loo “koni amɛkɛhã amɛsusuma aná hewalɛ.”
Hebri sht. ŋm., “Mimusuŋnii miitsɔmɔ.”
Loo “hewalɛ.”
Hebri sht. ŋm., “yɛ mi ni emiɔ.”
Adabaŋ ji dade loo tso ni akɛbeleɔ shinaa loo agbó sɛɛ kɛlaa sɛɛ.
Loo “Gbɛtsɔɔmɔ.”
Kpekpe ni atsɔɔ yɛ biɛ lɛ ji mama ko ni bei pii lɛ akɛ kooloo hetsɔi feɔ. Abuɔ be mli ni aaye awerɛho.
Hebri sht. ŋm., “Mimusuŋnii miitsɔmɔ.”
Akɛ wiemɔ ni ji “biyoo” tsuɔ nii akɛ mfonirifeemɔŋ wiemɔ kɛtsɔɔ akɛ mɔ ko nii yɛ mɔbɔ loo anuɔ he ahãa mɔ lɛ.
Loo “amɛsusuma.”
Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
Hebri sht. ŋm., “Amɛkpãa bɛlɛ.”
Hebri sht. ŋm., “Amɛkpãa bɛlɛ.”
Loo “ahewalɛ.”
Hebri sht. ŋm., “kaahã obiyoo lɛ hiŋmɛi.”
Loo “asusumai.”
Hebri sht. ŋm., “gbɛjegbɛi fɛɛ ayitso.”
Loo “amɛ diɛŋtsɛ amɛyibii.”
Loo “Miblayei.”
Loo “Mɛi ni mifɔ ni yɔɔ hewalɛ.”
Hebri sht. ŋm., “miheloo.”
Loo “esaa misɔlemɔ lɛ naa; etsĩɔ misɔlemɔ lɛ naa.”
Shishitsɔɔmɔi komɛi kɛɔ akɛ, “ni ehã mikã shi ni minyɛɛɛ nɔ ko mafee.”
Hebri sht. ŋm., “bihii.”
Loo “misusuma aná.”
Loo “osusuma baakai.”
Loo “Misusuma kɛɔ.”
Loo “Yehowa feɔ mɔ ni hiɛ kã enɔ lɛ ekpakpa.”
Loo “susuma.”
Loo “mɔ baato etsui shi.”
Loo “misusuma.”
Loo “otsu misusuma saji lɛ ahe nii ohã lɛ.”
Hebri sht. ŋm., “gbɛjegbɛi fɛɛ ayitso.”
Loo “ni amɛjara wa.”
Loo “aŋmɛ amɛ kɛ shika tsuru ni atsuu he lɛ.”
Loo “dugumai.” Blɔfo mli lɛ, ostrich.
Hebri sht. ŋm., “blodo.”
Hebri sht. ŋm., “kamɔ shi efolo.”
Loo “bɔɔla.”
Hebri sht. ŋm., “tɔmɔ.”
Loo “koral pii.” Kwɛmɔ Wiemɔi Titrii Amligbalamɔ lɛ.
Hebri sht. ŋm., “ediŋ.”
Loo “shikpɔŋ ni baa nii.”
Loo “Amɛnyɛŋ amɛbahi wɔteŋ akɛ gbɔi.”
Hebri sht. ŋm., “hiɛ.”
Loo “Ewóŋ.”
Hebri sht. ŋm., “blodo.” Kwɛmɔ Wiemɔi Titrii Amligbalamɔ lɛ.
Loo “wɔsusuma.”
Hebri sht. ŋm., “wɔblodo.” Kwɛmɔ Wiemɔi Titrii Amligbalamɔ lɛ.
Loo “Amɛto ŋamɛi ni yɔɔ Zion lɛ kabonaa.”