Yitso 8
Amɛjo Foi Kɛjɛ Yiwalɔ ko Dɛŋ
YOSEF tsĩɛ Maria koni ekɛɛ lɛ sane ko ni he hiaa waa. Etsɛko tsɔ ni Yehowa bɔfo ko jie ehe kpo etsɔɔ lɛ, ni ekɛɛ: “Tee shi, ŋɔɔ abifao lɛ kɛ enyɛ lɛ, ni ojo foi oya Mizraim, ni ohi jɛi kɛyashi beyinɔ ni makɛɛo; shi Herode baatao abifao lɛ ni egbe lɛ.”
Oya nɔŋŋ, kɛkɛ ni mɛi etɛ lɛ fɛɛ jo foi kɛtee. Ni eba mli yɛ ebe naa pɛpɛɛpɛ, ejaakɛ Herode ena ele akɛ ŋulamiaŋkwɛlɔi lɛ elaka lɛ ni amɛshi maŋ lɛ mli. Kaimɔ akɛ, kulɛ esa akɛ amɛku amɛsɛɛ amɛbabɔ lɛ amaniɛ kɛ amɛna Yesu lɛ. Herode mli fu waa. No hewɔ lɛ bɔni afee ni egbe Yesu lɛ, efa ni agbe gbekɛbii hii fɛɛ ni yɔɔ Betlehem kɛ ehe kpokpai anɔ ni eye afii enyɔ loo nɔ ni shɛɛɛ nakai lɛ fɛɛ. Nɔ ni edamɔ nɔ ebu afii nɛɛ he akɔntaa lɛ ji adafitswaa ni enine shɛ nɔ yɛ mra mli kɛjɛ ŋulamiaŋkwɛlɔi ni jɛ Boka lɛ adɛŋ lɛ.
Bɔ ni agbe gbekɛbii hii nɛɛ fɛɛ lɛ yɛ mɔbɔ waa diɛŋtsɛ akɛ aaana! Herode asraafoi lɛ tee kɛjɛ shia kome mli kɛtee ekroko mli. Ni kɛ amɛna gbekɛnuu lɛ, amɛshɔɔ lɛ kɛjɛɔ enyɛ dɛŋ. Wɔleee gbekɛbii abɔ ni amɛgbe lɛ ayifalɛ moŋ, shi bɔ ni amɛnyɛmɛi lɛ fo ni amɛye awerɛho lɛ ha Biblia mli gbalɛ ko ni Nyɔŋmɔ gbalɔ Yeremia gba lɛ ba mli.
Yɛ nakai beaŋ lɛ, Yosef kɛ eweku lɛ eyashɛ Mizraim shweshweeshwe, ni amɛyahi jɛmɛ agbɛnɛ. Shi gbi ko gbɛkɛ lɛ, Yehowa bɔfo lɛ saa ejie ehe kpo etsɔɔ Yosef ekoŋŋ yɛ lamɔ mli. Bɔfo lɛ kɛɛ lɛ akɛ: “Tee shi, ni oŋɔ abifao lɛ kɛ enyɛ lɛ, ni oya Israel shikpɔŋ lɛ nɔ; shi mɛi ni taoɔ abifao lɛ susuma lɛ egboi.” No hewɔ lɛ yɛ Biblia mli gbalɛ kroko ni kɛɔ akɛ abaatsɛ Nyɔŋmɔ Bi lɛ kɛjɛ Mizraim kɛba lɛ mlibaa mli lɛ, weku lɛ ku amɛsɛɛ kɛba amɛ diɛŋtsɛ amɛ shikpɔŋ nɔ.
Etamɔ nɔ ni Yosef miitao ni ehi Yudea kwraa, yɛ he ni amɛyɔɔ yɛ Betlehem maŋ lɛ mli dani amɛjo foi kɛtee Mizraim lɛ. Shi ena ele akɛ Herode bi Arkelao ni yitsoŋ wa lɛ miiye maŋtsɛ yɛ Yudea, ni no hewɔ lɛ Yehowa tsɔ lamɔ kroko nɔ ebɔ lɛ kɔkɔ yɛ enɛ he. No hewɔ lɛ Yosef kɛ eweku lɛ fa gbɛ kɛtee kooyigbɛ ni amɛyahi Nazaret maŋ ni yɔɔ Galilea lɛ mli. Biɛ, yɛ nɛkɛ maŋ ni kɛ Yudafoi ajamɔ shikwɛ̃ɛ he jɛkɛ nɛɛ mli Yesu da yɛ. Mateo 2:13-23; Yeremia 31:15; Hoshea 11:1.
▪ Beni ŋulamiaŋkwɛlɔi lɛ ekuuu amɛsɛɛ lɛ, mɛɛ yiwalɛ nɔ ko Maŋtsɛ Herode fee, shi mɛɛ gbɛ nɔ abaa Yesu yi yɛ?
▪ Beni amɛku amɛsɛɛ kɛjɛ Mizraim lɛ, mɛni hewɔ ni Yosef ehiii Betlehem dɔŋŋ lɛ?
▪ Mɛɛ Biblia mli gbalɛi aha amɛba mli yɛ nɛkɛ be nɛɛ mli?