Yitso 30

Eha Mɛi ni Folɔ Enaa lɛ Ahetoo

BENI Yudafoi ajamɔ mli hiɛnyiɛlɔi lɛ folɔ Yesu naa akɛ eku Hejɔɔmɔ Gbi lɛ mli lɛ, eha amɛ hetoo akɛ: “Mi-Tsɛ miitsu nii kɛbashi be nɛ, no hewɔ ni mi hu mitsuɔ lɛ.”

Yɛ wiemɔi ni Farisifoi lɛ wieɔ lɛ fɛɛ sɛɛ lɛ, Yesu nitsumɔ lɛ tamɔɔɔ nɔ ni Hejɔɔmɔ Gbi lɛ he mla lɛ teɔ shi ewoɔ lɛ. Enitsumɔ ni ji shiɛmɔ kɛ helai atsamɔ lɛ jɛ Nyɔŋmɔ ŋɔɔ, ni etsuɔ nii daa gbi, yɛ Nyɔŋmɔ nɔkwɛmɔ nɔ lɛ sɛɛnyiɛmɔ mli. Shi kɛlɛ, hetoo ni eha Yudafoi lɛ ha amɛmli fu lɛ waa moŋ kwraa fe tsutsu lɛ, ni amɛtao akɛ amɛbaagbe lɛ. Mɛni hewɔ?

Ejaakɛ agbɛnɛ jeee akɛ amɛheɔ amɛyeɔ akɛ Yesu miiku Hejɔɔmɔ Gbi lɛ mli kɛkɛ, shi moŋ amɛbuɔ wiemɔi ni ewie akɛ eji Nyɔŋmɔ Bi diɛŋtsɛ lɛ hu akɛ musubɔɔ wiemɔ. Shi kɛlɛ, Yesu sheee amɛ gbeyei, ni etee nɔ eha amɛ hetoo lolo yɛ wekukpaa kpakpa ni ka ekɛ Nyɔŋmɔ teŋ lɛ he. Ekɛɛ amɛ akɛ: “Tsɛ lɛ sumɔɔ Bi lɛ, ni etsɔɔ lɛ nibii fiaa ni lɛ diɛŋtsɛ efeɔ lɛ.”

Ni Yesu tee nɔ akɛ: “Ejaakɛ bɔ ni Tsɛ lɛ teeɔ gbohii ashi ni ehaa amɛ wala lɛ, nakai nɔŋŋ hu Bi lɛ hu haa mɛi ni esumɔɔ lɛ wala.” Lɛlɛŋ, Bi lɛ miitee gbohii lɛ ashi yɛ mumɔ mli momo po! Yesu kɛɛ: “Mɔ ni nuɔ miwiemɔi ni eheɔ mɔ ni tsu mi lɛ eyeɔ lɛ, eyɛ naanɔ wala, ni . . . efoŋ yɛ gbele mli kɛtee wala mli.” Hɛɛ, etee nɔ akɛ: “Ŋmɛlɛtswaa lɛ miiba ni eshɛ eta, ni gbohii lɛ aaanu Nyɔŋmɔ Bi lɛ gbee, ni mɛi ni nuɔ lɛ hiɛ aaatsɛ̃.”

Eyɛ mli akɛ nɔ ko bɛ ni aŋma afɔ shi ni tsɔɔ akɛ kɛbashi nakai beaŋ lɛ Yesu etee mɔ ko shi kɛjɛ gbohii ateŋ moŋ, shi kɛlɛ ekɛɛ mɛi ni folɔɔ enaa lɛ akɛ gbohiiashitee diɛŋtsɛ ko ni tamɔ nakai baaba. Ekɛɛ amɛ akɛ: “Enɛ akafee nyɛ naakpɛɛ; ejaakɛ ŋmɛlɛtswaa lɛ miiba, nɔ mli ni mɛi fɛɛ ni yɔɔ gbohii abui amli lɛ aaanu egbee, ni amɛaaje kpo.”

Kɛbashi nɛkɛ be nɛɛ mli lɛ, eka shi faŋŋ akɛ Yesu ewieko egbɛhe ni he hiaa waa yɛ Nyɔŋmɔ yiŋtoo mli lɛ he yɛ mɛi fɛɛ ahiɛ yɛ gbɛ ni mli tse ni mɔɔ shi hu nɔ tamɔ nɛkɛ. Shi kɛlɛ mɛi ni folɔɔ Yesu naa lɛ yɛ nibii pii fe lɛ diɛŋtsɛ ehe odase ni eye etsɔɔ amɛ nɛɛ kɛkɛ. Yesu kai amɛ akɛ: “Nyɛ lɛ nyɛtsu kɛtee Yohane ŋɔɔ, ni eye anɔkwale lɛ he odase.”

Afii enyɔ pɛ ni etsɔ hiɛ lɛ mli lɛ, Yohane Baptisilɔ lɛ kɛ Yudafoi ajamɔ mli hiɛnyiɛlɔi lɛ wie Mɔ ni baa yɛ esɛɛ lɛ he. Yɛ be mli ni ekaiɔ amɛ yɛ bɔ ni be ko lɛ amɛbuɔ Yohane ni amrɔ nɛɛ awo lɛ tsuŋ lɛ waa lɛ he lɛ, Yesu kɛɛ: “Shi nyɛ lɛ, nyɛsumɔ akɛ nyɛmli afili nyɛ be kukuoo kɛkɛ yɛ ela lɛ mli.” Yesu ha amɛkai enɛ kɛ hiɛnɔkamɔ akɛ ekɛaaye ebua amɛ, hɛɛ, ni ekɛhere amɛyiwala. Shi kɛlɛ ekɛ ehe efɔɔɔ Yohane odaseyeli lɛ nɔ.

“Nakai nitsumɔi ni mitsuɔ [ni naakpɛɛ nii ni efee bianɛ nɔŋŋ lɛ fata he] lɛ nɔŋŋ yeɔ mihe odase akɛ Tsɛ lɛ tsu mi.” Shi yɛ no sɛɛ hu lɛ, Yesu tee nɔ akɛ: “Ni Tsɛ lɛ ni tsu mi lɛ, lɛ diɛŋtsɛ eye mihe odase.” Akɛ nɔkwɛmɔ nɔ lɛ, Nyɔŋmɔ ye Yesu he odase yɛ ebaptisimɔ be lɛ mli ni ekɛɛ: “Mɔ nɛ ji misuɔmɔ Bi ni miná ehe tsui lɛ.”

Lɛlɛŋ, mɛi ni folɔɔ Yesu naa lɛ bɛ naajiemɔ ko yɛ kpoomɔ ni amɛkpoo lɛ lɛ he. Ŋmalɛi ni amɛkɛɔ akɛ amɛmiikwɛ mli lɛ nɔŋŋ yeɔ ehe odase! Yesu mu sane lɛ naa akɛ: “Shi eji nyɛhe Mose nyɛye kulɛ, mi hu nyɛaahe mi nyɛye; shi mihe sane eŋma lɛ. Shi kɛji nyɛheee ŋmalɛi lɛ nyɛyeee lɛ, te aaafee tɛŋŋ ni nyɛaahe miwiemɔi lɛ nyɛye hu?” Yohane 5:17-47; 1:19-27; Mateo 3:17.

▪ Mɛni hewɔ Yesu nitsumɔ lɛ jeee Hejɔɔmɔ Gbi lɛ mlikuu lɛ?

▪ Mɛɛ gbɛ nɔ Yesu tsɔɔ hegbɛ ni he hiaa waa ni eyɔɔ yɛ Nyɔŋmɔ yiŋtoo mli lɛ mli yɛ?

▪ Namɔ odaseyeli Yesu wie he, koni ekɛtsɔɔ akɛ eji Nyɔŋmɔ Bi?