Yitso 45

Mɔ ni Akpaaa Gbɛ akɛ Ebaatsɔ Kaselɔ

MƐƐ nɔ ko ni woɔ mɔ he gbeyei Yesu na yɛ be mli ni eshɛ ŋshɔ lɛ naa lɛ nɛkɛ! Hii enyɔ komɛi ni amɛhiɛ ewo la fe nine fa kpo kɛjɛ gɔɔ ni bɛŋkɛ jɛmɛ lɛ mli ni amɛjo foi kɛbɛŋkɛ lɛ. Daimonioi yɛ amɛmli. Ekolɛ akɛni mɔ kome hiɛ yɔɔ la fe mɔ kroko lɛ ni ena nɔ yɛ daimonio lɛ kudɔmɔ shishi yɛ be babaoo mli hewɔ lɛ, ebafee mɔ ni agbalaa jwɛŋmɔ kɛyaa enɔ.

Be babaoo nɛ ni nɛkɛ nuu ni nii yɔɔ mɔbɔ nɛɛ ehi sãi lɛ ateŋ ni ewooo nɔ ko nɔ ko. Ni daa gbi, jetsɛremɔ kɛ jenamɔ fɛɛ lɛ, eebolɔ ni ekɛ tɛi miifolɔ ehe. Ehiɛ yɛ la waa akɛ mɔ ko mɔ ko nyɛɛɛ atsɔ nakai gbɛ lɛ nɔ. Abɔ mɔdɛŋ aahu akɛ abaafimɔ lɛ, shi etsɛrɛɔ kɔsɔŋkɔsɔ lɛ ni ekumɔɔ dadei lɛ kɛjɛɔ enaji. Mɔ ko mɔ ko bɛ hewalɛ ni ekɛaaye enɔ kunim.

Beni nuu lɛ bɛŋkɛ Yesu ni eho egbee enaji anaa lɛ, daimonioi ni kudɔɔ lɛ lɛ ha ebolɔ akɛ: “Mɛɛ sane mikɛo yɔɔ, Yesu, Nyɔŋmɔ ni yɔɔ ŋwɛi shɔŋŋ lɛ Bi? Mina Nyɔŋmɔ, akɛ, kaapiŋ mi.”

Yesu tee nɔ ekɛɛ lɛ akɛ: “Jee gbɔmɔ nɛɛ mli, bo mumɔ fɔŋ!” Shi Yesu bi lɛ akɛ: “Te ogbɛiŋ?”

Ehere nɔ akɛ: “Migbɛi ji Legio, ejaakɛ wɔ yi fa.” Damonioi lɛ naa miishɛɛ kɛ amɛna ni mɔ ni amɛyɔɔ emli lɛ miina amanehulu lɛ, ni amɛmii shɛɔ amɛhe akɛ amɛaabua amɛhe naa yɛ amɛmli akɛ kuu ni yɔɔ gbeyeishemɔ mumɔ. Shi ni amɛkɛ Yesu kpe lɛ, amɛkpa lɛ fai ni ekɛ amɛ akawo bu kwɔŋkwɔŋ lɛ mli. Wɔnaa ekoŋŋ akɛ Yesu yɛ hewalɛ waa; enyɛ eye daimonioi ni yitseiaŋ wa lɛ po anɔ. Enɛ jieɔ lɛ kpo faŋŋ akɛ daimonioi lɛ le akɛ bu kwɔŋkwɔŋ lɛ mli ni akɛ amɛ kɛ amɛ hiɛnyiɛlɔ, Satan Abonsam, baawo lɛ ji kojomɔ ni Nyɔŋmɔ kɛbaaha amɛ yɛ naagbee.

Kpolotoi akuu aaafee 2,000 miiye nii yɛ gɔŋ ko ni bɛŋkɛ jɛmɛ lɛ nɔ. No hewɔ lɛ daimonioi lɛ kɛɛ: “Ha wɔya kpolotoi lɛ ateŋ ni wɔyabote amɛmli.” Eka shi faŋŋ akɛ kɛ daimonioi lɛ bote bɔɔnii ni hiɛ heloo kɛ la lɛ amli lɛ, amɛnaa miishɛɛ gbonyo ko ni jeee adebɔɔ mli nɔ. Beni Yesu ŋmɛ amɛ gbɛ ni amɛbote kpolotoi lɛ amli lɛ, 2,000 lɛ fɛɛ wo foi gidigidi kɛjɛ gɔŋ lɛ nɔ ni amɛyabote ŋshɔ lɛ mli ni amɛgboi.

Beni mɛi ni kwɛɔ kpolotoi lɛ anɔ lɛ na enɛ lɛ, amɛjo foi amɛtee maŋ lɛ kɛ akrowai lɛ amli amɛyabɔ amaniɛ. Enɛ hewɔ lɛ, mɛi lɛ ba koni amɛbakwɛ nɔ ni eba lɛ. Beni amɛbashɛ lɛ, amɛna nuu ni daimonioi lɛ je emli lɛ. Ni amɛna lɛ ni ewo atade ni ejwɛŋmɔ eba shia, ni eta Yesu naji anaa!

Mɛi ni na enɛ kɛ amɛhiŋmɛi lɛ gba bɔ ni fee ni atsa nuu nɛɛ. Agbɛnɛ hu amɛgba mɛi lɛ bɔ ni kpolotoi lɛ yagboi yɛ naakpɛɛ gbɛ nɔ lɛ. Beni gbɔmɛi lɛ nu enɛ lɛ, gbeyei kpele mɔmɔ amɛ, ni amɛkɛ mɔdɛŋbɔɔ kɛɛ Yesu ni eshi amɛkpokpaa lɛ nɔ. No hewɔ lɛ efee nakai ni ebote lɛlɛ mli ni eshi jɛmɛ. Nuu ni tsutsu ko lɛ daimonioi yɔɔ emli nɛɛ kpa Yesu fai ni eŋmɛ lɛ gbɛ ni efata ehe kɛya. Shi Yesu kɛɛ lɛ akɛ: “Yaa owe kɛ bo diɛŋtsɛ owekumɛi lɛ aŋɔɔ, ni oyagba amɛ nii wuji ni Nuŋtsɔ lɛ [Yehowa] efee ehao kɛ mɔbɔ ni enao lɛ.”

Yɛ bei babaoo mli lɛ Yesu faa mɛi ni etsaa amɛ lɛ ni amɛkakɛɛ mɔ ko mɔ ko, akɛni esumɔɔɔ ni gbɔmɛi lɛ kpɛɔ amɛyiŋ yɛ nibii ni mɛi kɛɔ hoo kɛnyiɛɔ lɛ ahe lɛ hewɔ. Shi bɔ ni esoro enɛ lɛ sa jogbaŋŋ ejaakɛ nɛkɛ nuu ni tsutsu lɛ daimonioi yɔɔ emli nɛɛ baaye odase yɛ gbɔmɛi ni ekolɛ Yesu naŋ hegbɛ eshɛ amɛŋɔɔ lɛ ateŋ. Kɛfata he hu lɛ, jɛmɛ ni nuu lɛ yɔɔ lɛ kɛ odaseyeli baaha yɛ hewalɛ ni Yesu yɔɔ ni ekɛaatsu nitsumɔ kpakpa lɛ he, koni ekɛtsi shitee-kɛ-woo wiemɔi ni abaawie yɛ kpolotoi lɛ ahiɛkpatamɔ hewɔ lɛ naa.

Yɛ Yesu famɔ nɛɛ nɔyeli mli lɛ, nɛkɛ nuu ni tsutsu ko lɛ daimonioi yɔɔ emli nɛɛ tee shia. Kɛkɛ ni ebɔi nibii fɛɛ ni Yesu efee eha lɛ lɛ jajemɔ yɛ Dekapolis maji lɛ amli, ni gbɔmɛi lɛ anaa kpɛ amɛhe waa. Mateo 8:28-34; Marko 5:1-20; Luka 8:26-39; Kpojiemɔ 20:1-3.

▪ Mɛni hewɔ ni ekolɛ agbalaa jwɛŋmɔ kɛyaa mɔ kome pɛ nɔ yɛ be mli ni mɛi enyɔ mli daimonioi lɛ yɔɔ lɛ?

▪ Mɛni tsɔɔ akɛ daimonioi lɛ le akɛ akɛ amɛ baawo bu kwɔŋkwɔŋ ko mli yɛ wɔsɛɛ?

▪ Ekolɛ mɛni hewɔ ni daimonioi sumɔɔ ni amɛbote adesai kɛ kooloi amli lɛ?

▪ Mɛni hewɔ esoro nɔ ni Yesu kɛɛ nɛkɛ nuu ni tsutsu lɛ daimonioi yɔɔ emli nɛɛ, ni efa lɛ ni ekɛɛ mɛi krokomɛi nɔ ni E-fee eha lɛ lɛ?