Nikasemɔ 15

Ye Obua Mɛi Koni Afee Nyɔŋmɔ Suɔmɔnaa Nii

Mɛni hewɔ esa akɛ okɛɛ mɛi krokomɛi nɔ ni akaseɔ lɛ? (1)

Namɛi obaanyɛ okɛ amɛ agba sanekpakpa lɛ he sane? (2)

Mɛɛ hewalɛ ojeŋba baanyɛ ana yɛ mɛi krokomɛi anɔ? (2)

Mɛɛ be obaanyɛ okɛ nyɛ asafo lɛ mli bii ashiɛ? (3)

1. Kɛbashi amrɔ nɛɛ, okase nibii kpakpai babaoo kɛjɛ Biblia lɛ mli. Esa akɛ nilee nɛɛ aha ojie Kristofoi asu kpo otsɔɔ. (Efe. 4:22-24) Nilee ni tamɔ nɛkɛ he miihia kɛha onaanɔ wala namɔ. (Yoh. 17:3) Shi kɛlɛ, ehe miihia ni mɛi krokomɛi hu anu sanekpakpa lɛ bɔni afee ni ahere amɛ hu amɛyiwala. Esa akɛ anɔkwa Kristofoi fɛɛ aye mɛi krokomɛi odase. Nyɔŋmɔ famɔ ni.—Rom. 10:10; 1 Kor. 9:16; 1 Tim. 4:16.

2. Obaanyɛ oje shishi okɛ mɛi ni bɛŋkɛ bo lɛ agba nibii kpakpai ni okaseɔ lɛ he sane. Gbaa he sane otsɔɔ oweku mli bii, onanemɛi, nanemɛi skulbii, kɛ nitsumɔ mli bii. Okɛ mlihilɛ kɛ tsuishitoo atsu nii yɛ nakai feemɔ mli. (2 Tim. 2:24, 25) Kaimɔ akɛ bei pii lɛ gbɔmɛi kwɛɔ mɔ ko jeŋba babaoo fe bɔ ni amɛboɔ nɔ ni ekɛɔ lɛ toi. No hewɔ lɛ ojeŋba kpakpa lɛ baanyɛ agbala mɛi krokomɛi koni amɛbo shɛɛ sane ni oshiɛɔ otsɔɔ amɛ lɛ toi.—Mat. 5:16; 1 Pet. 3:1, 2, 16.

3. Ekolɛ etsɛŋ ni ohe baasa akɛ okɛ nyɛ Yehowa Odasefoi asafo lɛ mli bii aaaje shiɛmɔ shishi. Enɛ ji ohiɛ ni oyaa lɛ mli nifeemɔ ko ni he hiaa. (Mat. 24:14) Mɛɛ miishɛɛ ebaaji nɛkɛ, kɛ onyɛ oye obua mɔ ko hu ni ebatsɔ Yehowa tsulɔ ni ena naanɔ wala!—1 Tes. 2:19, 20.