Hiɛkpamɔ

NYƆŊMƆ OFE lɛ ji jeŋ muu fɛɛ Nuntsɔ. Shihilɛ mli ni wɔyɔɔ bianɛ, kɛ wɔsɛɛ be mli fɛɛ damɔ enɔ. Eyɛ hewalɛ ní ekɛwoɔ mɔ nyɔmɔ kɛ hewalɛ ní ekɛgbalaa mɔ toi. Eyɛ hewalɛ ní ekɛhaa mɔ wala kɛ hewalɛ ní ekɛkpataa mɔ hiɛ. Kɛ́ wɔná enɔkpɛlɛmɔ lɛ, no lɛ wɔbaaye omanye; kɛ́ wɔnáaa enɔkpɛlɛmɔ lɛ, no lɛ wɔbaana amanehulu kpele diɛŋtsɛ. Kwɛ bɔ ni ehe hiaa waa diɛŋtsɛ ákɛ wɔjamɔ lɛ afee nɔ ni sa ehiɛ!

Gbɔmɛi jáa nibii yɛ gbɛ̀i pii anɔ. Kɛ́ jamɔ tamɔ gbɛjegbɛ lɛ, ani jamɔ gbɛ̀i fɛɛ náa Nyɔŋmɔ nɔkpɛlɛmɔ? Dabi, fɛɛ náaa enɔkpɛlɛmɔ. Yesu, ni ji Nyɔŋmɔ gbalɔ lɛ tsɔɔ akɛ gbɛ̀i enyɔ pɛ yɔɔ. Ekɛɛ akɛ: “Agbó ni lɛɛ kɛ gbɛ tɛtɛrɛɛ ji nɔ ni kɛ mɔ yaa hiɛkpatamɔ mli lɛ, ni mɛi ní boteɔ mli lɛ fá pii. Shi agbó fintɔ̃ɔ kɛ gbɛ ni etsa ji nɔ ni kɛ mɔ yaa wala mli lɛ, ni mɛi fioo ji mɛi ni naa no.”​—Mateo 7:13, 14.

Jamɔi srɔtoi enyɔ pɛ yɔɔ: nɔ ni kɛ mɔ yaa wala mli kɛ nɔ ni kɛ mɔ yaa hiɛkpatamɔ mli. Wolo bibioo nɛɛ yiŋtoo ji ní eye ebua bo ní ona gbɛ ní kɛ mɔ yaa naanɔ wala mli lɛ.