NIKASEMƆ 12
Paulo Nyɛmi Yoo Bi ko Fee Ekãa
Ha wɔkase oblanyo ko ni here etsɛkwɛ̃ yiwala lɛ he sane. Oblanyo nɛɛ tsɛkwɛ̃ ji bɔfo Paulo. Wɔlé oblanyo nɛɛ gbɛ́i, shi wɔle akɛ efee nɔ ko ni biɔ ekãa waa. Ani obaasumɔ ni ole nɔ ni efee lɛ?—
No mli lɛ, awo Paulo tsuŋ yɛ Yerusalem. Amɔ lɛ ejaakɛ eeshiɛ Yesu he sane. Hii fɔ̃ji komɛi sumɔɔɔ Paulo sane kwraa, no hewɔ lɛ amɛtsɔ ŋaa fɔŋ ko. Amɛkɛɛ: ‘Nyɛhaa wɔkɛa asraafonyo onukpa akɛ eha esraafoi lɛ kɛ Paulo aba saneyelihe lɛ. Wɔbaatee wɔhe yɛ gbɛ lɛ nɔ, kɛkɛ lɛ kɛ́ akɛ Paulo miiho lɛ wɔgbe lɛ!’
Paulo nyɛmi yoo bi lɛ yakɛɛ Paulo kɛ asraafonyo onukpa lɛ akɛ mɛi lɛ etsɔ ŋaa fɔŋ
Paulo nyɛmi yoo bi ko nu ŋaa fɔŋ ni atsɔ lɛ. Ole nɔ ni efee yɛ he? Etee tsuŋwoohe lɛ ni eyakɛɛ Paulo. Oya nɔŋŋ ni Paulo kɛɛ lɛ akɛ eya ni eyakɛɛ asraafonyo onukpa lɛ ŋaa fɔŋ ni mɛi lɛ etsɔ lɛ. Kɛ́ okwɛ lɛ, ani enɛ feemɔ baawa kɛha Paulo nyɛmi yoo bi lɛ aloo ewaŋ kɛhaŋ lɛ?— Ebaawa, ejaakɛ asraafonyo onukpa lɛ ji nuu ko ni abuɔ waa. Shi Paulo nyɛmi yoo bi lɛ fee ekãa ni etee eyakɛɛ asraafonyo onukpa lɛ.
Asraafonyo onukpa lɛ hu kɔ ŋaa ko. Eha asraafoi aaafee 500 babu Paulo he! Ekɛɛ amɛ akɛ amɛkɛ Paulo aya Kaisarea nakai gbɛkɛ lɛ nɔŋŋ. Ani ahere Paulo yiwala?— Hɛɛ, mɛi fɔ̃ji lɛ nyɛɛɛ amɛtutua lɛ! Ŋaa fɔŋ ni amɛtsɔ lɛ eyayeee omanye.
Mɛni okaseɔ kɛjɛɔ sane nɛɛ mli?— Obaanyɛ ofee ekãa tamɔ bɔ ni Paulo nyɛmi yoo bi lɛ fee lɛ nɔŋŋ. Esa akɛ wɔfee ekãa kɛ́ wɔmiigba mɛi krokomɛi Yehowa he sane. Ani obaafee ekãa ni oya nɔ ogba mɛi krokomɛi Yehowa he sane?— Kɛ́ ofee nakai lɛ, ekolɛ obaahere mɔ ko yiwala.