Wolo Ni Jɛ Gbɛtsɔɔmɔ Kuu Lɛ Dɛŋ

Suɔmɔ Nyɛmi Maŋtsɛyeli Shiɛlɔ:

FEEMƆ ohe mfoniri okwɛ akɛ ofata Brooklyn Betel weku lɛ he yɛ Sohaa leebi, October 2, 1914. Leebi lɛ, ota ogbɛhe yɛ niyeli okpɔlɔ lɛ he kɛmiimɛ Nyɛminuu C. T. Russell. Trukaa kɛkɛ ni agbele niyelihe asa lɛ shinaa lɛ, ni Nyɛminuu Russell pue. Eho edamɔ shi fioo taakɛ efɔɔ feemɔ lɛ, kɛkɛ ni ekɛ miishɛɛ ŋa Betel weku lɛ ekɛɛ “Nyɛjekoo, nyɛmimɛi!” Shi, nɔ najiaŋ ni ebaayata egbɛhe yɛ okpɔlɔ lɛ yitso lɛ, etswa edɛŋ ni ekɛ adafitswaa ko ni yɔɔ miishɛɛ hã akɛ: “Jeŋmaji Abe lɛ eba naagbee; amɛmaŋtsɛmɛi lɛ eye amɛgbii lɛ amɛtã!” Omii shɛ ohe aahu akɛ onaaa nɔ ni obaafee, ejaakɛ okɛ be kplaŋŋ ekpa be nɛɛ gbɛ! Okɛ Betel weku lɛ mli bii lɛ fɛɛ tee nɔ nyɛkɛ mlifilimɔ tswa nyɛdɛŋ be kplaŋŋ kɛhere adafitswaa ni yɔɔ miishɛɛ nɛɛ nɔ.

Kɛjɛ be ni Nyɛminuu Russell tswa adafi ni yɔɔ miishɛɛ nɛɛ kɛbashi amrɔ nɛɛ, afii nyɔŋmai saŋŋ eho. Mɛni Maŋtsɛyeli lɛ enyɛ etsu kɛjɛ no nɔ kɛbaa nɛɛ? Etsu nibii babaoo diɛŋtsɛ! Yehowa etee nɔ etsɔ Maŋtsɛyeli gbɛjianɔtoo lɛ nɔ etsuu ewebii lɛ ahe fiofio ni etsɔse amɛ, ni amɛyi ebafa—kɛjɛ mɛi akpei fioo ko yɛ afi 1914 mli kɛyashɛ mɛi ni miihe ashɛ akpekpei 8 ŋmɛnɛ. Mɛɛ gbɛi srɔtoi anɔ bo diɛŋtsɛ oná tsɔsemɔi nɛɛ ahe sɛɛ?

Ŋmɛnɛ lɛ, wɔnuɔ ni wɔnyɛmimɛi lɛ miikɛɛ akɛ, “Yehowa ŋwɛi shwiili lɛ miinyiɛ!” ni nakai pɛpɛɛpɛ eji. Kɛ̃lɛ, anɔkwa sane ji akɛ kɛjɛ afi 1914 lɛ kɛbaa nɛɛ, ŋwɛi shwiili lɛ, ni damɔ shi kɛhã Yehowa gbɛjianɔtoo lɛ fã ni anaaa lɛ, etee nɔ enyiɛ oyayaayai, ni kɛ́ okane wolo nɛɛ fitsofitso lɛ enɛ baafee bo faŋŋ. Bɔ ni afee ni anyɛ ashiɛ sane kpakpa lɛ yɛ je lɛŋ fɛɛ lɛ, Maŋtsɛyeli shiɛlɔi lɛ etsɔ ŋaa gbɛi srɔtoi anɔ amɛshiɛ, gbɛi nɛɛ ekomɛi ji adafitswaa woji, tafaa kɛhã woji ajaramɔ, mfonirii ni akɛshiɛ, odaseyeli kaad, gramafon, redio, kɛ Intanɛt lɛ po.

Akɛni Yehowa miijɔɔ nitsumɔ lɛ nɔ hewɔ lɛ, amrɔ nɛɛ wɔnyɛɔ wɔdamɔɔ Biblia lɛ nɔ wɔkalaa woji ni yɔɔ fɛo yɛ wiemɔi 670 kɛ sɛɛ amli, ni wɔkɛhãa mɔ fɛɛ mɔ yaka. Nyɛmimɛi ni ejɛ amɛsuɔmɔŋ amɛkɛ amɛhe ehã lɛ yeɔ amɛbuaa kɛmamɔɔ Maŋtsɛyeli Asai, Kpeei Asai, kɛ nitsumɔhe niji, yɛ maji ni yɔɔ nii saŋŋ kɛ maji ni bɛ nɔ ko tsɔ lɛ hu amli. Ni kɛ́ oshãra ko ba lɛ, nyɛmimɛi jɛɔ amɛsuɔmɔŋ amɛyeɔ amɛbuaa mɛi ni yɔɔ hei ni oshãra lɛ ba yɛ lɛ oya nɔŋŋ, ni amɛkɛ nakai feemɔ tsɔɔ akɛ ‘afɔ amɛ ahã fimɔ be’ lɛɛlɛŋ.—Abɛi 17:17.

Bei komɛi lɛ, osɔfoi lɛ kɛ shiteekɛwolɔi krokomɛi lɛ tsɔɔ ‘mla nɔ amɛyeɔ sane fɔŋ,’ shi kɛ́ wɔkwɛ bɔ ni mɔdɛŋ ni amɛbɔɔ be fɛɛ be koni amɛfee wɔ efɔŋ lɛ ‘hãa sanekpakpa lɛ shwereɔ’ moŋ lɛ, ewajeɔ wɔhemɔkɛyeli waa diɛŋtsɛ.—Lala 94:20; Fil. 1:12.

Eji hegbɛ ni wɔná akɛ wɔkɛ bo efee ekome akɛ Nuŋtsɔ lɛ ‘webii.’ Ofainɛ, ná ole akɛ wɔsumɔɔ nyɛteŋ mɔ fɛɛ mɔ naakpa. Wɔsɔlemɔ ji akɛ, wolo nɛɛ mli saji lɛ aye abua bo koni ohiɛ asɔ omumɔŋ gboshinii lɛ jogbaŋŋ fe bei fɛɛ ni eho.—Mat. 24:45.

Yehowa ajɔɔ bo jogbaŋŋ,

Onyɛmimɛi,

Yehowa Odasefoi Agbɛtsɔɔmɔ Kuu