Yosia Sumɔɔ Nyɔŋmɔ Mla Lɛ

Yosia batsɔ Yuda maŋtsɛ be ni eye afii kpaanyɔ. Nakai beiaŋ lɛ, Yudabii lɛ miijá amagai, ni amɛmiifee majik. Be ni Yosia ye afii 16 lɛ, ekase bɔ ni asɔmɔɔ Yehowa jogbaŋŋ. Be ni eye afii 20 lɛ, ebɔi amagai kɛ afɔleshaa latɛi fɛɛ ni yɔɔ maŋ lɛ mli lɛ fitemɔ. Kɛkɛ ni be ni eye afii 26 lɛ, eto gbɛjianɔ koni asaa Yehowa sɔlemɔ shĩa lɛ.

Be ni asaa sɔlemɔ shĩa lɛ, Osɔfonukpa Hilkia yana Yehowa Mla wolo lɛ. Eeenyɛ efee akɛ, nɔ ni Mose diɛŋtsɛ ŋma lɛ eyana lɛ. Shafan, ni ji maŋtsɛ lɛ woloŋmalɔ lɛ, kɛ wolo lɛ ba ni ebabɔi kanemɔ waa koni maŋtsɛ lɛ anu. Be ni Maŋtsɛ Yosia nu nibii ni awie yɛ Mla lɛ mli lɛ, ena akɛ emaŋbii lɛ egbo Yehowa nɔ toi afii pii. No hewɔ lɛ, ekɛɛ Hilkia akɛ: ‘Yehowa mli efu wɔ waa. Yaa ni oyakpa lɛ fai ohã wɔ. Ebaatsɔɔ wɔ nɔ ni wɔfee.’ Yehowa tsɔ gbalɔyoo Hulda nɔ ekɛ amɛ wie. Ekɛɛ amɛ akɛ: ‘Yudabii lɛ eshi mi. Magbala amɛtoi, shi mifeŋ nakai be ni Yosia kã he eyeɔ maŋtsɛ, ejaakɛ eba ehe shi.’

Be ni abakɛɛ Maŋtsɛ Yosia nɔ ni Yehowa ewie lɛ, etee sɔlemɔ shĩa lɛ, ni ehã atsɛ Yudabii lɛ fɛɛ kɛba. Kɛkɛ ni ekane Yehowa Mla lɛ waa ehã amɛ fɛɛ. Yosia kɛ maŋbii lɛ fɛɛ wo Yehowa shi akɛ, amɛbaabo lɛ toi yɛ nɔ fɛɛ nɔ mli.

Yudabii lɛ yeko Hehoo lɛ afii babaoo. Shi be ni Yosia kane Mla lɛ, ena akɛ esa akɛ aye Hehoo lɛ daa afi. No hewɔ lɛ, ekɛɛ maŋbii lɛ akɛ: ‘Wɔbaaye Hehoo lɛ wɔhã Yehowa.’ Kɛkɛ ni eto gbɛjianɔ koni ashã afɔlei babaoo, ni eto mɛi ahe gbɛjianɔ koni amɛlá yɛ sɔlemɔ shĩa lɛ. No sɛɛ lɛ, maŋ lɛ ye Hehoo lɛ, kɛkɛ ni amɛye Blodo Ni Ashikishaŋ-sha Bɛ Mli Gbi Jurɔ lɛ hu gbii kpawo. Kɛjɛ Samuel beiaŋ aahu kɛbashi nakai beiaŋ lɛ, ayeko Hehoo ni tamɔ nakai pɛŋ. Yosia sumɔɔ Nyɔŋmɔ Mla lɛ kɛ etsui fɛɛ. Ani bo hu onáa miishɛɛ kɛ́ ookase Yehowa he nii?