Abonsam Ka Yesu

Be ni abaptisi Yesu agbe naa lɛ, mumɔ krɔŋkrɔŋ lɛ kpala lɛ kɛtee ŋa lɛ nɔ. Eyeee nii gbii 40 sɔŋŋ, ni hɔmɔ ye lɛ waa. Kɛkɛ ni Abonsam ba ni ebaka lɛ. Ekɛɛ lɛ akɛ: ‘Kɛ́ Nyɔŋmɔ Bi ji bo lɛɛlɛŋ lɛ, hã tɛi nɛɛ atsɔmɔ niyenii.’ Shi Yesu jɛ Ŋmalɛ lɛ mli ehã lɛ hetoo akɛ: ‘Aŋma akɛ jeee niyenii pɛ esa akɛ mɔ ko aná koni eya nɔ ehi wala mli. Esa akɛ ebo nɔ fɛɛ nɔ ni Yehowa wieɔ lɛ hu toi.’

No sɛɛ lɛ, Abonsam kɛɛ Yesu akɛ: ‘Kɛ́ Nyɔŋmɔ Bi ji bo lɛɛlɛŋ lɛ, tuu kɛjɛ sɔlemɔ shĩa lɛ yiteŋ he ni kwɔ fe fɛɛ lɛ kɛya shikpɔŋ. Aŋma akɛ Nyɔŋmɔ baatsu ŋwɛibɔfoi ni amɛbasɔo bo.’ Shi, shi kome ekoŋŋ lɛ, Yesu jɛ Ŋmalɛ lɛ amli ehã lɛ hetoo akɛ: ‘Aŋma akɛ esaaa akɛ okaa Yehowa.’

Kɛkɛ ni Satan kɛ jeŋ maŋtsɛyelii lɛ fɛɛ kɛ nibii fɛɛ ni amɛyɔɔ kɛ amɛnunyam lɛ tsɔɔ Yesu, ni ekɛɛ lɛ akɛ: ‘Mikɛ maŋtsɛyelii nɛɛ fɛɛ kɛ amɛnunyam lɛ baahã bo kɛ́ ojá mi shi kome pɛ.’ Shi Yesu kɛɛ lɛ akɛ: ‘Jee mihiɛ, Satan! Ejaakɛ aŋma akɛ Yehowa pɛ esa akɛ ojá.’

Enɛ sɛɛ lɛ, Abonsam shi Yesu etee, ni ŋwɛibɔfoi ba amɛbahã Yesu niyenii. Kɛjɛ nakai be lɛ nɔ kɛyaa lɛ, Yesu shiɛ Maŋtsɛyeli lɛ he sane kpakpa lɛ. No ji nitsumɔ ni atsu lɛ kɛba shikpɔŋ lɛ nɔ akɛ ebatsu. Mɛi ná nibii ni Yesu tsɔɔ amɛ lɛ ahe miishɛɛ waa, ni he fɛɛ he ni ebaaya lɛ, amɛnyiɛɔ esɛɛ kɛyaa.