Amɔ Yesu

Yesu kɛ bɔfoi lɛ nyiɛ kɛtsɔ Kidron Jɔɔ lɛ mli kɛtee Oliv Gɔŋ lɛ nɔ. No mli lɛ, atswa maŋkɛ ŋmɛlɛ 12 kɛ sɛɛ, ni nyɔɔŋtsere lɛ eye emuu. Be ni amɛshɛ Getsemane abɔɔ lɛ mli lɛ, Yesu kɛɛ amɛ akɛ: “Nyɛhia biɛ ni nyɛyaa nɔ nyɛbua.” Kɛkɛ ni Yesu tee ehiɛ fioo ni eyakula shi esɔle ehã Yehowa. No mli lɛ, ehao waa. Ekɛɛ Yehowa akɛ: “Afee bɔ ni bo osumɔɔ.” Kɛkɛ ni Yehowa tsu ŋwɛibɔfo ko ní ebawo Yesu hewalɛ. Be ni Yesu ku esɛɛ eba bɔfoi lɛ aŋɔɔ lɛ, ena akɛ amɛmiiwɔ. Ekɛɛ amɛ akɛ: ‘Nyɛtea shi! Jeee be ni akɛwɔɔ nɛ! Be ni akɛ mi baahã mihenyɛlɔi lɛ eshɛ.’

Etsɛɛɛ ni Yuda ba jɛmɛ. Be ni ebaa lɛ, mɛi pii fata ehe ni amɛhiɛ tsei kɛ klantei. Yuda le akɛ ebaana Yesu yɛ jɛmɛ, ejaakɛ Yesu kɛ ekaselɔi lɛ fɔɔ jɛmɛ yaa. Yuda ekɛɛ asraafoi lɛ akɛ ebaafee nɔ ko ni baahã amɛyɔse Yesu. No hewɔ lɛ, be ni amɛshɛ jɛmɛ lɛ, etee Yesu ŋɔɔ ni ekɛɛ lɛ akɛ: ‘Tsɔɔlɔ, miiŋa bo.’ Kɛkɛ ni eshɔ enaa. Yesu kɛɛ lɛ akɛ: ‘Yuda, ani okɛ naashɔmɔ miijie mi oohã?’

Yesu badamɔ mɛi lɛ ahiɛ ni ebi amɛ akɛ: “Namɔ nyɛtaoɔ?” Amɛkɛɛ lɛ akɛ: “Yesu, Nazaretnyo lɛ.” Ekɛɛ amɛ akɛ: “Mi ni.” Be ni ewie nakai lɛ, amɛtee sɛɛsɛɛ ni amɛyagbeegbee shi. Esaa ebi amɛ akɛ: “Namɔ nyɛtaoɔ?” Amɛhere lɛ nɔ ekoŋŋ akɛ: “Yesu, Nazaretnyo lɛ.” Ehã hetoo akɛ: ‘Mikɛɛ nyɛ akɛ mi ni. Nyɛhãa mɛnɛɛmɛi ayaa.’

Be ni Petro na nɔ ni yaa nɔ lɛ, egbala klante ni efo osɔfonukpa lɛ nyɔŋ ko ni atsɛɔ lɛ Malko lɛ toi. Shi Yesu ta nuu lɛ toi lɛ he ni etsa lɛ. Kɛkɛ ni ekɛɛ Petro akɛ: ‘Okɛ oklante lɛ ato. Kɛ́ okɛ klante nɔ lɛ, akɛ klante baagbe bo.’ Asraafoi lɛ mɔ Yesu ni amɛfimɔ eniji, ni amɛkɛ lɛ tee Ana, ni ji osɔfoi ni abuɔ waa lɛ ateŋ mɔ kome ŋɔɔ. Shi bɔfoi lɛ jo foi. Ana bibii Yesu saji, ni no sɛɛ lɛ, ekɛ lɛ tee Osɔfonukpa Kaiafa ŋɔɔ. Shi mɛni ba bɔfoi lɛ anɔ?