Yiwalaheremɔ Damɔ Nyɔŋmɔ Nɔ
KƐ AKƐTO gbɔmɛi ayifalɛ ni yɔɔ je lɛ mli lɛ ahe lɛ, Nyɔŋmɔ webii lɛ efee mɛi ni amɛyi faaa kwraa yɛ be fɛɛ mli. Shi kɛ̃lɛ ateɔ shi awoɔ amɛ yɛ bei kɛ bei amli waa. Eji Nyɔŋmɔ hebuu bɛ mli kulɛ, amɛyi naŋ wala.
Lalatsɛ David he enɛ eye. Egba mli ejaje etsɔɔ yɛ lalai lɛ ekome mli akɛ: “Kɛ́ jeee Yehowa ni yɔɔ wɔgbɛfaŋ lɛ, ha Israel akɛɛ akɛ: “Kɛ́ jeee Yehowa ni yɔɔ wɔ gbɛfaŋ lɛ, kulɛ beni gbɔmɛi te shi wowɔ lɛ, ni amɛmli wo la wowɔ lɛ, amɛmiwɔ hiɛkalɔi; kulɛ nui su wɔ, ni faai lɛ ha wɔsusuma nɔ; kulɛ nui ni efee hamahama lɛ ha wɔsusuma nɔ.” (Lala 124:1-5) Eji Yehowa bayeee ebuaaa ewebii lɛ kulɛ, akɛ hiɛkpatamɔ ni amɛhenyɛlɔi lɛ kɛbaaba amɛnɔ lɛ baato bɔni shikpɔŋ lɛ mli gbaa enyɔ tamɔ shikpɔŋhosomɔ be mli ni miɔ mɔfɛɛmɔ ni yɔɔ heni shikpɔŋ lɛ gbá yɛ lɛ. Ni abaanyɛ akɛto nui ni efee hamahama ni looɔ nibii fɛɛ ni yɔɔ egbɛ nɔ kɛyaa lɛ he. Kulɛ ŋshɔkei wujiwuji ni wooɔ amɛhe lɛ baasu Israelbii lɛ kwrakwra.
Yɛ nɛkɛ Oshra nɛɛ hewɔ lɛ, amɛyɛ nɔkpakpa ko ni amɛbaanyɛ amɛdamɔ nɔ amɛda Ŋwɛiflooflonyo lɛ shi yɛ yelikɛbuamɔ lɛ hewɔ. Nohewɔ lɛ lalatsɛ lɛ tee nɔ ejie shidaa su kpo etsɔɔ yɛ Israelbii lɛ ahewɔ akɛ: “Yijiemɔ aha Yehowa akɛ ekɛwɔ haaa ni wɔtsɔmɔ amɛ nyanyɔji anaa loo! Wɔsusuma lɛ eje mli, tamɔ loofɔlɔ jeɔ loofɔlɔdulɔi atsɔmɔ mli; tsɔne kpaa lɛ etse, ni wɔje mli! wɔ yelikɛbuamɔ yɛ Yehowa, mɔni fee ŋwɛi kɛ shikpɔŋ lɛ gbɛi amli.”—Lala 124:6-8.
Henyɛlɔ lɛ tao ni emi Israelbii Iɛ, tamɔ kooloo ni yeɔ milɛloo. Shi Yehowa eŋmɛɛɛ gbɛ ni enɛ aba. Israelbii lɛ tamɔ loofɔlɔ ni adulɛ yɛ tsɔne mli. Kɛkɛ ni turukaa lɛ, Yehowa gbele gbɛ ni amɛjo foi. Yɛ anɔkwale mli lɛ, Nyɔŋmɔ webii lɛ yɛ nɔ kpakpa ni amɛbaadamɔ nɔ amɛkɛ amɛhiɛ afɔ Yehowa gbɛi lɛ nɔ kɛha yelikɛbuamɔ, ni ji akɛ, mɔni nakai gbɛi lɛ damɔshi kɛhalɛ lɛ. Nɛkɛ Mɔ nɛɛ haŋ ewebii Iɛ anine anyɛ shi kɔkɔɔkɔ, ejaakɛ lɛ ji Bɔlɔ Ofe lɛ.
Kɛji akɛ Nyɔŋmɔ tsuji lɛ kɛ naagbai komɛi ni mliwawai miikpe ŋmɛnɛ lɛ, amɛbaanyɛ amɛna miishɛjemɔ kɛjɛ wiemɔi ni yɔɔ lalai nɛɛ mli lɛ mli. Ebaatamɔ akɛ amɛfɛɛ kwa amɛbaalaaje kɛjɛ shikpɔŋ lɛ nɔ. Shi Yehowa Nyɔŋmɔ eŋmɛŋ gbɛ ni henyɛlɔ lɛ abule ewebii lɛ ashishi Kpɔmɔ baaba kɛ̃.