Bɔni Fee Ni Amɛna Amɛgbalashihilɛ Mli Naagbai Lɛ Anaa

Gbalashihilɛ mli naagbai miigba mɛi akpeiakpei abɔ anaa ŋmɛnɛ. Bei pii lɛ nɔni hɔ naagbai nɛɛ ashishi ji wu kɛ ŋa lɛ ateŋ mɔkome nɔko ni efee ni eyasusuuu he bɔni sa aloo yiwalɛnɔ ko ni efee. Shi mɛi babaoo ena amɛgbalashihilɛ mli naagbai lɛ anaa. Akɛ nɔkwɛmɔnɔ lɛ, kwɛmɔ bɔni ebalɛ nakai eha yɛ nuu ko kɛ eŋa ni yɔɔ Uropa bokagbɛ lɛ agbɛfaŋ nɛkɛ.

Afii babaoo lɛ, Stefan (wu lɛ) tɔɔ dãa, eyiɔ eŋa kɛ yiwalɛ ni ekpataa eshika hiɛ ekɛshwɛɔ asɔ yɛ foidamɔ-okpɔŋɔi anɔ. Yɛ fimɔi ni eŋa yɔɔ mli nɛɛ fɛɛ sɛɛ lɛ, ekã he ekɛ nuu nɛɛ hi shi ni eye ebualɛ kɛ shika. Kɛkɛ ni Stefan bɔi Biblia lɛ kasemɔ ni sɛɛ mli lɛ ebatsɔ Yehowa Odasefoi lɛ ateŋ mɔkome. Agbɛnɛ ni eshihilɛ gbɛ lɛ bahi kwraa fe tsutsu moŋ lɛ, eŋa to eyiŋ akɛ ebaatse gbalã lɛ mli.​—1 Kor. 6:​9-11.

Beni atee saneyelihe lɛ ni kojolɔ lɛ bi ni yoo lɛ atsɔɔ nɔhewɔ ni etaoɔ ni atse gbala lɛ mli lɛ, enyɛɛɛ etsɔɔ tɔmɔ ko kwraa yɛ bɔni ewu lɛ baa ejeŋ ehaa agbɛnɛ lɛ he. Nohewɔ lɛ atseee gbala lɛ mli. Fee sɛɛ lɛ, yoo lɛ gbele etsui naa ni ekɛhere anɔkwale lɛ atuu ni beni akɛlɛ ekase Biblia lɛ nyɔji kpaanyɔ sɛɛ lɛ, ekɛ nu mli baptisimɔ fee ehe nɔ ni ejɔɔ eha Nyɔŋmɔ lɛ he okadi. Ŋmɛnɛ nuu nɛɛ kɛ eŋa lɛ miijá Nyɔŋmɔ mɔbɔnalɔ ni ji Yehowa lɛ yɛ ekomefeemɔ mli kɛ miishɛɛ.

Kɛ́ akɛ Kristojamɔ tsu nii lɛ, ehaa anaà wumɛi, ŋamɛi kɛ bii kpakpai. Ni Biblia lɛ yeɔ ebuaa yɛ naagbai anaanamɔ mli. Ehaa mɛi ni kpɛlɛɔ wiemɔ ni yɔɔ mli lɛ nɔ lɛ naa hiɛnɔkamɔ kpakpa ni hiɛ kã ni haa mɔ naà miishɛɛ.