Ani Ootao Anɔkwale Hemɔkɛyeli Lɛlɛŋ?
ANI ootao anɔkwale lɛ lɛlɛŋ, oogbu shi kɛmiitao? Ekolɛ obaaha hetoo akɛ: “Hɛɛ, miifee nakai!”
Shi mɛi pii taooo anɔkwale Iɛ diɛŋtsɛ. Yɛ anɔkwale mli lɛ, ekolɛ amɛsumɔɔɔ po ni amɛhé amɛye. Mɛni hewɔ mɔ ko aaafee mɔ ni sumɔɔɔ akɛ eheɔ eyeɔ akɛ Nyɔŋmɔ yɛ, ni ákɛ Biblia lɛ kɛ emli shiwooi ni yɔɔ naakpɛɛ kɛha wɔsɛɛ be lɛ ji ewolo ni ekaaa?
Kɛha mɛi komɛi lɛ, anɔkwasaji nɛɛ anɔkpɛlɛmɔ baabi ni amɛtsake amɛshihilɛ. Ni akɛni amɛsumɔɔɔ ni amɛha amɛshihilɛ kɛ Nyɔŋmɔ gbɛ̀i akpa gbee hewɔ lɛ, amɛtaoɔ ŋwanejeei kɛ shitee kɛ wooi, ni amɛkpɛ amɛ diɛŋtsɛ amɛyiŋ akɛ Biblia lɛ jeee anɔkwale.
Aŋkroaŋkroi komɛi ni yɔɔ Kristofoi asafo lɛ mli lɛ po tamɔ gbɔmɛi nɛɛ. Anɔkwale lɛ hi kɛha amɛ, shi amɛkɛ amɛhe kpɛtɛɔ teemɔŋ nifeemɔ ko ni amɛle akɛ Nyɔŋmɔ Wiemɔ lɛ guɔ lɛ he. No hewɔ lɛ amɛtsiɔ amɛhe kɛjɛɔ he fiofio. Biblia lɛ kɛɔ akɛ: “Henilee ni kpooɔ nii anɔ mɛikomɛi tsɔ ni amɛha amɛhemɔkɛyeli yasha shi.”—1 Timoteo 1:19, The New English Bible.
Beni Yesu Kristo yɔɔ shikpɔŋ nɔ lɛ, gbɔmɛi pii amli wo la yɛ anɔkwale lɛ he. Akɛni amɛmiisumɔ ni amɛfee nɔ ni amɛsumɔɔ hewɔ lɛ, amɛkpoo odaseyeli ni ka shi faŋŋ lɛ nɔkpɛlɛmɔ. Yɛ be mli ni etsɛɔ wiemɔ kɛjɛɔ blema gbalɛ wiemɔi amli lɛ, Yesu kɛɛ akɛ, amɛtsui ekpɛlɛɛɛ sane nɔ. Amɛŋamɔ amɛhiŋmɛii kɛ amɛtoii “koni amɛkana kɛ amɛhiŋmɛii, ni amɛkanu kɛ amɛtoii, ni amɛtsui hu akana shishi ni amɛkpale ni mitsa amɛ” yɛ mumɔŋ.—Mateo 13:14, 15.
Gbɔmɛi ni tamɔ nakai baakɛɛ kɛkɛ akɛ nibii amli bɛ faŋŋ. Mɛi ni teɔ shi woɔ Yesu lɛ ateŋ mɛi komɛi bi lɛ akɛ: “Mɛɛ beyinɔ nɔŋŋ oooha wɔyiŋ afee wɔ kɔshikɔshi kɛyashi? Kɛ bo ji Kristo lɛ, kɛɛmɔ wɔ faŋŋ.” Shi shishinumɔ ni amɛnaaa lɛ jeee nɔ ni jɛ Yesu; ejɛ amɛ diɛŋtsɛ. Yesu ha hetoo akɛ: “Mikɛɛnyɛ, ni nyɛheee nyɛyeee. Nitsumɔi ni mitsuɔ yɛ mitsɛ gbɛi anɔ lɛ, nomɛi miiye mihe odase; shi nyɛ moŋ nyɛheee nyɛyeee, ejaakɛ ‘nyɛjeee mitooi lɛ eko”—Yohane 10:24-26.
Kɛji akɛ mɔ ko sumɔɔɔ ni ebo anɔkwale lɛ toi ni enu shishi ni ekpale ni atsa lɛ lɛ, Satan Abonsam baaŋɔ nakai anɔkwasane lɛ ni ekɛtsu nii. Satan shwilaa “mɛi ni heee yeee lɛ ajwɛŋmɔi lɛ . . . koni Kristo ni ji Nyɔŋmɔ subaŋ lɛ, anunyam sanekpakpa lɛ la ni tsoɔ lɛ akakpɛ miiha amɛ.”—2 Korintobii 4:4; kwɛmɔ Mateo 13:10-15 hu.
Ani enɛ tsɔɔ akɛ hiɛnɔkamɔ ko bɛ akɛ aaanu ni ana sanekpakpa lɛ shishi? Dabi, jeee nakai etsɔɔ! Nɔ ni etsɔɔ ji akɛ, babaoo damɔ bo toibolɔ lɛ nɔ.
Onuɔ nɔ ni Biblia lɛ kɛɔ akɛ eji anɔkwale kɛ ootao anɔkwale hemɔkɛyeli lɛlɛŋ. Jamɔ mli hiɛnyiɛlɔi henɔwolɔi ni pupuuɔ amɛhe lɛ sumɔɔɔ ni amɛbo toi, amɛte shi amɛwo Yesu. Shi asafoi lɛ hu? “Mɛi lɛ ahe jɔ̃ amɛhe yɛ enitsɔɔmɔ lɛ hewɔ”! Asraafoi onukpai ni atsu amɛ ni amɛyamɔ lɛ lɛ ba kɛ amaniɛbɔɔ akɛ: “Bɔ ni gbɔmɔ nɛɛ wieɔ lɛ, mɔ ko ewieko nakai da.”—Mateo 7:28; Yohane 7:46.
Kɛ ootao anɔkwale lɛ, oogbu shi ni okɛle Nyɔŋmɔ gbɛ ni oosumɔ ni okɛ e-Wiemɔ lɛ atsu nii yɛ oshihilɛ mli lɛ, obaana anɔkwale hemɔkɛyeli lɛ. Yesu kɛɛ: “Miishɛɛ ji mɛi ni jalɛ he hɔmɔ kɛ kumai yeɔ amɛ lɛ, ejaakɛ aaaha amɛtɔrɔ.” “Mile mitooi lɛ, ni mitoi lɛ le mi.” “Mitooi lɛ boɔ migbee toi, ni mile amɛ, ni amɛnyiɛɔ misɛɛ.” “Mɔ fɛɛ mɔ ni yɔɔ anɔkwale lɛ masɛi lɛ, eboɔ migbee toi.”—Mateo 5:6; Yohane 10:14, 27; 18:37. NW.
Hemɔkɛyeli ji yibii ni Nyɔŋmɔ mumɔ krɔŋkrɔŋ lɛ woɔ. (Galatabii 5:22, 23) Kɛ osɔle obi anɔkwale nilee kɛ hemɔkɛyeli, ni obɔ mɔdɛŋ diɛŋtsɛ akɛ ooona ni ohi shi yɛ naa lɛ, Nyɔŋmɔ baaye abuao. Taakɛ Yesu kɛɛ lɛ: “Nyɛbia, ni aaahanyɛ; nyɛtaoa, ni nyɛaana; nyɛshia, ni aaagbele ahanyɛ.—Mateo 7:7.
Kɛji akɛ oyɛ naagba ni ehe miihia ni otsu he nii lɛ, Nyɔŋmɔ baaye abua bo. Ŋmalɛi ni jɛ mumɔŋ lɛ kɛɔ akɛ: “Okɛ ohiɛ afɔ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ; kaimɔ lɛ yɛ ogbɛi fɛɛ mli, ni lɛ eeejaje otempɔŋi lɛ!”—Abɛi 3:5, 6.
Nyɔŋmɔ lɛ “tsui mli ekwɛɔ.” (1 Samuel 16:7) Ele kɛji akɛ ootao anɔkwale kɛ jalɛ ni kɛ oosumɔ ni ofee nii yɛ gbɛ ni ja lɛ nɔ. Kɛ otsi obɛŋkɛ Nyɔŋmɔ lɛ, lɛ hu eeetsi ebɛŋkɛ bo.—Yakobo 4:8.
Ani oji gbɔmɔ ni tamɔ nɛkɛ? Ani ootao anɔkwale hemɔkɛyeli lɛlɛŋ? Ani onu Tsɛ lɛ tsɔɔmɔi lɛ ni ani ogbele ojwɛŋmɔŋ kɛha enɛ? Ani okase enɛ ni okpɛlɛ nɔ? Ni bɔni afee ni okɛ Nyɔŋmɔ jalɛ gbɛi lɛ akpa gbee lɛ, ani ojaje nibii ni ekolɛ eji naagbai yɛ oshihilɛ mli lɛ?
Kɛji nakai lɛ belɛ, Yesu wiemɔi nɛɛ baanyɛ awo bo hewalɛ: “Aŋma yɛ gbalɔi lɛ amli akɛ: ‘Amɛ fɛɛ amɛaafee Nyɔŋmɔ kaselɔi.’ Mɔ fɛɛ mɔ ni enu yɛ Tsɛ lɛ naa ni ekase hu lɛ ebaa miŋɔɔ.”—Yohane 6:45, NW.
Anaa ŋwɛi Tsɛ lɛ tsɔɔmɔ lɛ yɛ wolo ko ni ekaaa mli. Nyɛhaa wɔsusua sɛɛnamɔ ni yɔɔ he lɛ kɛ bɔ ni enaa wɔhemɔkɛyeli nɔ hewalɛ lɛ he.
[Akrabatsa ni yɔɔ baafa 6]
Hii Nyɔŋmɔ Suɔmɔ Iɛ Mli
Kristofoi heei kɛ mɛi ni egbɔjɔ lɛ baanyɛ agbee shi. Yɛ anɔkwale mli lɛ, nakai ji wɔ fɛɛ. No hewɔ lɛ esa akɛ wɔkwɛ wɔ diɛŋtsɛ wɔhemɔkɛyeli jogbaŋŋ ni wɔbɔ mɔdɛŋ ni wɔye wɔbua mɛi krokomɛi ni amɛwaje amɛhe yɛ mumɔŋ. Mɛɛ gbɛ nɔ wɔɔtsɔ wɔfee enɛ yɛ? Yɛ be mli ni etsɔɔ gbɛ kome lɛ, kaselɔ Yuda ŋma akɛ: “Shi suɔmɔmɛi, nyɛhaa nyɛnane amɔa shi yɛ nyɛ hemɔkɛyeli ni yɔɔ krɔŋkrɔŋ fe fɛɛ lɛ nɔ, nyɛsɔlea yɛ mumɔ krɔŋkrɔŋ lɛ mli, ni nyɛtoa nyɛhe yɛ Nyɔŋmɔ suɔmɔ lɛ mli, ni nyɛkwɛa wɔ-Nuŋtsɔ Yesu Kristo mɔbɔnalɛ lɛ gbɛ, koni nyɛna naanɔ wala.”—Yuda 20, 21.